ﺑﺎﻳﺎﻧﺎﺗﺘﺎ، ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ ﺧﻪﻟﻘﺌﺎﺭﺍ ﻗﺎﻧﯘﻥ ﯞﻩ ﺋﺎﻣﯧﺮﯨﻜﺎ ﺋﺎﺳﺎﺳﯩﻲ ﻗﺎﻧﯘﻧﯩﻐﺎ ﺧﯩﻼﭖ ﻫﻪﺭﯨﻜﻪﺕ ﻗﯩﻠﺪﻯ ﺩﻩﭖ ﺋﻪﻳﯩﺒﻠﻪﻧﺪﻯ. ﺑﺎﻳﺎﻧﺎﺗﺘﺎ ﻳﻪﻧﻪ ﺋﯘﻳﻐﯘﺭ ﻣﻪﻫﺒﯘﺳﻠﯩﺮﯨﻨﯩﯔ ﮔﯘﻧﺎﻫﺴﯩﺰﻟﯩﻘﻰ ﺗﻪﻛﯩﺘﻠﯩﻨﯩﭗ، ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ ﺩﯙﻟﻪﺕ ﺑﯩﺨﻪﺗﻪﺭﻟﯩﻜﻰ ﻧﺎﻣﻰ ﺋﺎﺳﺘﯩﺪﺍ ﺑﺎﺷﻘﯩﻼﺭﻧﯩﯔ ﺋﻪﺭﻛﯩﻨﻠﯩﻜﯩﮕﻪ ﺩﻩﺧﻠﻰ - ﺗﻪﺭﯛﺯ ﻳﻪﺗﻜﯜﺯﻣﻪﺳﻠﯩﻜﻜﻪ ﭼﺎﻗﯩﺮﯨﻠﺪﻯ.

ﺑﺎﻳﺎﻧﺎﺗﺘﺎ ﻳﻪﻧﻪ ﻣﯘﻧﺪﺍﻕ ﺩﯦﻴﯩﻠﺪﻯ: "ﻫﯚﺭﻣﻪﺗﻠﯩﻚ ﭘﺮﯦﺰﯨﺪﯦﻨﺖ، ﺋﺎﻣﯧﺮﯨﻜﺎ ﺋﺎﺳﺎﺳﯩﻲ ﻗﺎﻧﯘﻧﻰ ﺧﺎﻟﯩﻐﺎﻧﭽﻪ ﺋﯩﺸﻠﯩﺘﯩﺪﯨﻐﺎﻥ ﻗﯘﺭﯗﻕ ﻗﻪﻏﻪﺯ ﺋﻪﻣﻪﺱ، ﺋﯘ ﺋﺎﻣﯧﺮﯨﻜﺎ ﻗﺎﻧﯘﻧﻠﯩﺮﯨﻨﯩﯔ ﺋﺎﺳﺎﺳﯩﺪﯗﺭ، ﺑﯩﺰ ﺳﯩﺰﻧﻰ ﺳﻮﺕ ﺑﯩﻠﻪﻥ ﺟﯩﺪﻩﻟﻠﻪﺷﻤﻪﺳﻠﯩﻜﻜﻪ ﯞﻩ ﺋﺎﺳﺎﺳﯩﻲ ﻗﺎﻧﯘﻧﻨﯩﯔ ﭘﺮﯨﻨﺴﯩﭙﻠﯩﺮﯨﻐﺎ ﺋﻪﻣﻪﻝ ﻗﯩﻠﯩﺸﻘﺎ ﭼﺎﻗﯩﺮﯨﻤﯩﺰ."

ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺑﯜﮔﯜﻥ ﻳﻪﻧﻪ، ﺋﺎﻣﻤﯩﻐﺎ ﻣﯘﺭﺍﺟﻪﺕ ﺋﯧﻼﻥ ﻗﯩﻠﯩﭗ، ﮔﯘﻩﻧﺘﺎﻧﺎﻣﻮ ﺋﯘﻳﻐﯘﺭﻟﯩﺮﯨﻨﯩﯔ ﺋﻪﺭﻛﯩﻨﻠﯩﻜﻰ ﺋﯜﭼﯜﻥ ﻫﻪﺭﯨﻜﻪﺕ ﺋﯧﻠﯩﭗ ﺑﯧﺮﯨﺸﻘﺎ ﭼﺎﻗﯩﺮﺩﻯ. ﭼﺎﻗﯩﺮﯨﻘﺘﺎ ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺟﻮﺭﺝ ﺑﯘﺷﻘﺎ، ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﻛﺎﻧﺪﯨﻠﯩﺰﺍ ﺭﺍﻳﺴﻘﺎ ﯞﻩ ﺩﯙﻟﻪﺕ ﺑﯩﺨﻪﺗﻪﺭﻟﯩﻚ ﻣﯩﻨﯩﺴﺘﯩﺮﻯ Michael Chertoff ﻗﺎ ﻗﺎﺭﯨﺘﯩﭗ ﻣﻪﻛﺘﯘﭖ ﻳﯧﺰﯨﺶ ﯞﻩ ﻓﺎﻛﯩﺲ ﻳﻮﻟﻼﺵ ﺗﻪﻟﻪﭖ ﻗﯩﻠﯩﻨﺪﻯ.

ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ 150 ﺩﯨﻦ ﺋﺎﺭﺗﯘﻕ ﺩﯙﻟﻪﺗﺘﻪ 2 ﻣﯩﻠﻴﻮﻥ 200 ﻣﯩﯖﺪﯨﻦ ﺋﺎﺭﺗﯘﻕ ﺋﺎﻛﺘﯩﭗ ﭘﺎﺋﺎﻟﯩﻴﻪﺗﭽﯩﺴﻰ ﯞﻩ ﻗﻮﻟﻠﯩﻐﯘﭼﯩﻠﯩﺮﻯ ﺑﺎﺭ ﺑﯩﺮ ﺗﻪﺷﻜﯩﻼﺗﺘﯘﺭ.