ﺋﻮﺑﺎﻣﺎ ﻫﯚﻛﯜﻣﯩﺘﻰ ﺋﺎﻟﺪﯨﻨﻘﻰ ﻫﻪﭘﺘﻪ، ﭘﻮﻟﺸﺎ ﯞﻩ ﭼﯧﺦ ﻗﺎﺗﺎﺭﻟﯩﻖ ﺩﯙﻟﻪﺕ ﺭﺍﻳﻮﻧﻼﺭﻏﺎ ﺋﻮﺭﯗﻧﻼﺷﺘﯘﺭﯗﻟﯘﺵ ﭘﯩﻼﻧﻼﻧﻐﺎﻥ ﺑﺎﺷﻘﯘﺭﯗﻟﯩﺪﯨﻐﺎﻥ ﺑﻮﻣﺒﺎ ﻗﺎﻟﻘﺎﻥ ﺳﯩﺴﺘﯧﻤﯩﺴﻰ ﻗﯘﺭﯗﻟﯘﺷﻨﯩﯔ ﺑﯩﻜﺎﺭ ﻗﯩﻠﯩﻨﯩﺪﯨﻐﺎﻧﻠﯩﻘﯩﻨﻰ ﺟﺎﻛﺎﺭﻟﯩﻐﺎﻧﺪﯨﻦ ﻛﯩﻴﯩﻦ، ﺑﻪﺯﻯ ﺗﻪﻧﻘﯩﺪﭼﯩﻠﻪﺭ ﺑﯘﻧﻰ ﺭﯗﺳﯩﻴﻪ ﺩﺍﺋﯩﺮﯨﻠﯩﺮﯨﻨﻰ ﺧﻮﺵ ﻗﯩﻠﯩﺸﻰ ﻳﺎﻛﻰ ﺋﯩﺮﺍﻥ ﻳﺎﺩﺭﻭ ﻣﻪﺳﯩﻠﯩﺪﻩ ﺭﯗﺳﯩﻴﯩﻨﯩﯔ ﻳﺎﺭﺩﯨﻤﯩﻨﻰ ﻗﻮﻟﻐﺎ ﻛﻪﻟﺘﯜﺭﯛﺵ ﺋﯜﭼﯜﻥ ﺋﯧﻠﯩﭗ ﺑﯧﺮﯨﻠﻐﺎﻥ، ﺩﻩﭖ ﺳﯜﺭﻩﺗﻠﯩﮕﻪﻥ ﺋﯩﺪﻯ.

ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﯩﺪﺍ ﻛﯚﺭﺳﯩﺘﯩﺸﯩﭽﻪ، ﭘﺮﯦﺰﯨﺪﯦﻨﺖ ﺋﻮﺑﺎﻣﺎ ﺋﯘ ﻳﻪﻛﺸﻪﻧﺒﻪ ﻛﯜﻧﻰ CBS ﺗﯧﻠﯧﯟﯨﺰﯨﻴﯩﻨﯩﯔ ﺯﯨﻴﺎﺭﯨﺘﯩﻨﻰ ﻗﻮﺑﯘﻝ ﻗﯩﻠﻐﺎﻧﺪﺍ، ﻣﻪﺯﻛﯘﺭ ﭘﯩﻼﻥ ﺭﯗﺳﯩﻴﻪ ﺩﺍﺋﯩﺮﯨﻠﯩﺮﯨﻨﻰ ﺧﻮﺵ ﻗﯩﻠﯩﺶ ﻣﻪﻗﺴﯩﺘﯩﺪﻩ ﻳﺎﻛﻰ ﺭﯗﺳﯩﻴﻪ ﺩﺍﺋﯩﺮﯨﻠﯩﺮﯨﻨﯩﯔ ﺑﯧﺴﯩﻤﻰ ﺋﺎﺳﺘﯩﺪﺍ ﺑﯩﻜﺎﺭ ﻗﯩﻠﯩﻨﻐﺎﻥ، ﺩﯦﮕﻪﻥ ﭘﯩﻜﯩﺮﻟﻪﺭﻧﻰ ﺭﻩﺕ ﻗﯩﻠﺪﻯ.

ﺋﯘ ﺑﯘ ﻫﻪﻗﺘﻪ ﺗﻮﺧﺘﯩﻠﯩﭗ: " ﺑﯘ ﻳﻪﺭﺩﯨﻜﻰ ﺧﯩﺰﻣﯩﺘﯩﻢ ﺭﯗﺳﯩﻴﻪ ﺩﺍﺋﯩﺮﯨﻠﯩﺮﻯ ﺑﯩﻠﻪﻥ ﻛﯧﯖﯩﺸﯩﺶ ﺋﻪﻣﻪﺱ. ﺋﺎﻣﯧﺮﯨﻜﺎ ﺩﯙﻟﻪﺕ ﻣﯘﺩﺍﭘﯩﺌﻪ ﭘﻮﺯﯨﺘﺴﯩﻴﯩﺴﯩﻨﯩﯔ ﻗﺎﻧﺪﺍﻕ ﺑﻮﻟﯘﺷﯩﻨﻰ ﺭﯗﺳﯩﻴﻪ ﺑﻪﻟﮕﯩﻠﯩﻴﻪﻟﻤﻪﻳﺪﯗ" ﺩﯦﺪﻯ.

ﺑﺎﺷﻘﯘﺭﯗﻟﯩﺪﯨﻐﺎﻥ ﺑﻮﻣﺒﺎ ﻗﺎﻟﻘﺎﻥ ﺳﯩﺴﺘﯧﻤﺎ ﻗﯘﺭﯗﻟﯘﺷﻨﻰ ﺑﯩﻜﺎﺭ ﻗﯩﻠﯩﺶ ﭘﯩﻼﻧﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻧﺪﯨﻦ ﻛﯩﻴﯩﻦ، "ﺋﺎﻣﯧﺮﯨﻜﺎ ﻳﺎﯞﺭﻭﭘﺎﺩﯨﻜﻰ ﻣﯘﻫﯩﻢ ﺋﯩﺘﺘﯩﭙﺎﻗﺪﺍﺷﻠﯩﺮﯨﻐﺎ ﺋﺎﺳﯩﻴﻠﯩﻖ ﻗﯩﻠﺪﻯ" ﺩﯦﮕﻪﻥ ﭘﯩﻜﯩﺮﻟﻪﺭﻣﯘ ﻣﻪﻳﺪﺍﻧﻐﺎ ﻛﻪﻟﮕﻪﻥ ﺋﯩﺪﻯ.

ﺋﺎﻣﯧﺮﯨﻜﺎ ﺩﯙﻟﻪﺕ ﻣﯘﺩﺍﭘﯩﺌﻪ ﻣﯩﻨﯩﺴﺘﯩﺮﻯ ﺭﻭﺑﯧﺮﺕ ﮔﯧﻴﺘﯩﺲ، ﻧﻴﯘ-ﻳﻮﺭﻙ ﯞﺍﻗﯩﺖ ﮔﯧﺰﯨﺘﯩﺪﻩ ﺑﯘ ﻫﻪﻗﺘﻪ ﺋﯧﻼﻥ ﻗﯩﻠﻐﺎﻥ ﻣﺎﻗﺎﻟﯩﺴﯩﺪﻩ، ﻣﻪﺯﻛﯘﺭ ﭘﯩﻼﻧﯩﻨﯩﯔ ﺋﯩﺮﺍﻧﻨﯩﯔ ﻳﺎﺩﯗﺭ ﻣﻪﺳﯩﻠﯩﺪﯨﻜﻰ ﺋﻪﯓ ﻳﯧﯖﻰ ﺋﯘﭼﯘﺭﻻﺭﻏﺎ ﺋﺎﺳﺎﺳﻪﻥ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻧﻠﯩﻘﻰ، ﺋﻪﻣﻤﺎ ﺋﺎﻣﯧﺮﯨﻜﯩﻨﯩﯔ ﺭﯗﺳﯩﻴﯩﻨﻰ ﺧﻮﺵ ﻗﯩﻠﯩﺶ ﺋﯜﭼﯜﻥ ﻳﺎﯞﺭﻭﭘﺎﺩﯨﻜﻰ ﺋﯩﺘﺘﯩﭙﺎﻗﺪﺍﺷﻠﯩﺮﯨﺪﯨﻦ ﯞﺍﺯ ﻛﻪﭼﻤﻪﻳﺪﯨﻐﺎﻧﻠﯩﻘﻨﻰ ﺋﯩﻠﮕﯩﺮﻯ ﺳﯜﺭﺩﻯ.