ئامېرىكىدىكى ئۇيغۇر ئالىمى ئەركىن سىدىق ۋە باشقا دۆلەتلەردىكى بىر قانچە زىيالىينىڭ ئۇچۇرلىرىغا ئاساسلانغاندا، مەزكۇر توربەتنىڭ ساھىبى تۇرسۇنجان ھېزىم ئۆتكەن يىلى 7-ئايدا ئاقسۇ ئوتتۇرا سوت مەھكىمىسى تەرىپىدىن 7 يىللىق قاماق جازاسىغا ھۆكۈم قىلىنغان.

تۇرسۇنجان ھېزىم بۇ يىل 38 ياش بولۇپ، ئۇ شىنجاڭ ئۇنىۋېرسىتېتىنىڭ تارىخ فاكۇلتېتىنى 1996-يىلى پۈتتۈرگەن. ئەسلىدە ئاقسۇدىكى بىر ئوتتۇرا مەكتەپتە تارىخ ئوقۇتقۇچىسى بولغان تۇرسۇنجان، نامەلۇم بىر سەۋەب تۈپەيلى، ئوقۇتقۇچىلىق خىزمىتىدىن قالدۇرۇلۇپ مەكتەپ دەرۋازىسىنىڭ كۆزەتچىلىكىگە قويۇلغان. ئۇ، 2009-يىلى، 5-ئىيۇل ئۈرۈمچى ۋەقەسى يۈز بېرىپ ئۇزۇن ئۆتمەيلا ئائىلىسىدىن تۇتۇپ كېتىلگەن ئىكەن.

تۇرسۇنجان ھېزىمنى يېقىندىن تونۇغۇچىلار ئۇنىڭ تارىخ ئىلمىي بويىچە چوڭقۇر ۋە ئەتراپلىق مەلۇماتى ۋە كىشىلىك ئەخلاق پەزىلىتى بىلەن جامائەت ئىچىدە سۆيۈلگەن بىر كىشى ئىكەنلىكىنى، ئەمما ئىلمىي ۋە تارىخىي مەسىلىلەردىكى ھەققانىيەتچىلىكى سەۋەبلىك، خىتاي دۆلەت بىخەتەرلىك خادىملىرىنىڭ بۇرۇنلا دىققەت نۇقتىسىغا ئايلانغانلىقىنى بىلدۈرۈشتى. مەلۇم بولۇشىچە، تۇرسۇنجان ھېزىم ئۈستىدىكى سوتمۇ مەخپىي يوسۇندا ئېچىلغان، سوتقا ئائىلىسى قاتناشتۇرۇلمىغان. تۇرسۇنجان ھېزىمنىڭ سوتنىڭ مەزكۇر ھۆكۈمىگە نارازىلىق ئەرزى سۇنغان-سۇنمىغانلىقى مەلۇم ئەمەس.

ئۆتكەن يىلى قاماققا ھۆكۈم قىلىنغانلاردىن دىيارىم توربېتىنىڭ ساھىبى دىلشات پەرھات، سوت مەيدانىدا ئۆزىنىڭ مەزكۇر ھۆكۈمگە نارازىلىق ئەرزى سۇنمايدىغانلىقىنى، چۈنكى مەۋجۇت ئەدلىيە سىستېمىدىن ئادالەتلىك بىر ھۆكۈمنىڭ چىقىشىنى ئۈمىد قىلمايدىغانلىقىنى بىلدۈرگەن ئىدى.