ﺋﯩﺴﻤﺎﺋﯩﻞ ﺗﯩﻠﯩﯟﺍﻟﺪﻯ ﻗﻪﺷﻘﻪﺭﺩﻩ ﺋﺎﺳﺎﺳﻠﯩﻖ ﻗﻪﺷﻘﻪﺭ ﯞﯨﻼﻳﻪﺗﻠﯩﻚ 6 - ﺋﻮﺗﺘﯘﺭﺍ ﻣﻪﻛﺘﻪﭖ، ﻛﻮﻧﺎ ﺷﻪﻫﻪﺭ ﻧﺎﻫﯩﻴﯩﻠﯩﻚ 1 - ﯞﻩ 2 - ﺋﻮﺗﺘﯘﺭﺍ ﻣﻪﻛﺘﻪﭖ، ﻗﻪﺷﻘﻪﺭ ﭘﯩﺪﺍﮔﻮﮔﯩﻜﺎ ﺋﯩﻨﯩﺴﺘﯩﺘﯘﺗﻰ ﻗﺎﺗﺎﺭﻟﯩﻖ ﻣﻪﻛﺘﻪﭘﻠﻪﺭﺩﻩ ﺗﻪﻛﺸﯜﺭﯛﺵ ﺋﯧﻠﯩﭗ ﺑﯧﺮﯨﭗ " ﺷﯩﻨﺠﺎﯕﻨﯩﯔ ﺗﻪﺭﻩﻗﻘﯩﻴﺎﺕ ﻣﯘﻗﯩﻤﻠﯩﻘﻰ ﻛﻪﻟﮕﯜﺳﯩﺪﻩ ﻣﺎﺋﺎﺭﯨﭙﻘﺎ ﺗﺎﻳﯩﻨﯩﺸﻘﺎ ﺗﻮﻏﺮﺍ ﻛﯧﻠﯩﺪﯗ، " ﺩﻩﭖ ﺳﯚﺯﻟﯩﮕﻪﻥ.

ﺋﯘ، ﻫﯧﻴﺘﮕﺎﻫ ﻣﻪﺳﭽﯩﺘﻰ ﻗﺎﺗﺎﺭﻟﯩﻖ ﺟﺎﻣﺌﻪﻟﻪﺭﺩﯨﻤﯘ ﻣﻪﺧﺴﯘﺱ ﺯﯨﻴﺎﺭﻩﺗﺘﻪ ﺑﻮﻟﯘﭖ، ﺟﯜﻣﻪ ﺩﺍﻣﻮﻟﻼ ﻗﺎﺗﺎﺭﻟﯩﻖ ﯞﻩﺗﻪﻧﭙﻪﺭﯞﻩﺭ ﺩﯨﻨﯩﻲ ﺯﺍﺗﻼﺭﻏﺎ ﻗﻪﺷﻘﻪﺭﻧﯩﯔ ﻣﯘﻗﯩﻤﻠﯩﻖ ﺧﯩﺰﻣﯩﺘﯩﮕﻪ ﺗﯚﻫﭙﻪ ﻗﻮﺷﻘﺎﻧﻠﯩﻘﯩﻐﺎ ﺭﻩﺧﻤﻪﺕ ﺋﯧﻴﺘﻘﺎﻥ ﻫﻪﻣﺪﻩ ﻗﻪﺷﻘﻪﺭﺩﯨﻜﻰ ﺯﯨﻴﺎﺭﯨﺘﻰ ﺩﺍﯞﺍﻣﯩﺪﺍ ﺑﯘ ﺧﯩﻞ ﯞﻩﺗﻪﻧﭙﻪﺭﯞﻩﺭ ﺩﯨﻨﯩﻲ ﺯﺍﺕ، ﻣﯩﻠﻠﯩﻲ ﺋﻮﻗﯘﺗﻘﯘﭼﻰ - ﺋﻮﻗﯘﻏﯘﭼﻰ ﻫﻪﻣﺪﻩ ﻣﯩﻠﻠﯩﻲ ﻛﺎﺩﯨﺮﻻﺭﻏﺎ ﻗﻪﺷﻘﻪﺭﺩﯨﻦ ﺋﯩﺒﺎﺭﻩﺕ ﻣﯩﻠﻠﯩﻲ ﺑﯚﻟﮕﯜﻧﭽﯩﻠﯩﻜﻜﻪ ﻗﺎﺭﺷﻰ ﻛﯜﺭﻩﺷﻨﯩﯔ ﺋﺎﻟﺪﯨﻨﻘﻰ ﺳﯧﭙﯩﺪﻩ ﺗﯜﺭﻟﯜﻙ ﻣﯘﻗﯩﻤﻠﯩﻖ ﺗﻪﺩﺑﯩﺮﻟﯩﺮﯨﻨﻰ ﻛﯜﭼﻪﻳﺘﯩﭗ، "ﻣﯘﻗﯩﻤﻠﯩﻖ ﻫﻪﻣﻤﯩﻨﻰ ﺑﯧﺴﯩﭗ ﭼﯜﺷﯩﺪﯗ" ﺩﻩﻳﺪﯨﻐﺎﻥ ﺋﯩﺪﯨﻴﻪ ﺑﯩﻠﻪﻥ ﺯﻩﺭﺑﻪ ﺑﯧﺮﯨﺶ ﺳﺎﻟﻤﯩﻘﯩﻨﻰ ﺋﺎﺷﯘﺭﯗﺵ ﻫﻪﻗﻘﯩﺪﻩ ﻳﻮﻟﻴﻮﺭﯗﻕ ﺑﻪﺭﮔﻪﻥ.

ﺋﯩﺴﻤﺎﺋﯩﻞ ﺗﯩﻠﯩﯟﺍﻟﺪﯨﻨﯩﯔ ﺑﯘ ﻗﯧﺘﯩﻤﻘﻰ ﻗﻪﺷﻘﻪﺭ ﺯﯨﻴﺎﺭﯨﺘﻰ ﻗﻪﺷﻘﻪﺭﺩﻩ ﻣﯘﻗﯩﻤﻠﯩﻖ ﺗﻪﺩﺑﯩﺮﻟﯩﺮﻯ ﻫﻪﺳﺴﯩﻠﻪﭖ ﻛﯜﭼﻪﻳﺘﯩﻠﮕﻪﻥ، ﻣﺎﺋﺎﺭﯨﭙﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ ﺑﺎﺭﻟﯩﻖ ﺳﺎﻫﻪﻟﻪﺭﺩﻩ "ﺋﯜﭺ ﺧﯩﻞ ﻛﯜﭼﻠﻪﺭ"ﮔﻪ ﻗﺎﺭﺷﻰ ﺳﯩﻴﺎﺳﯩﻲ ﺋﯩﺪﯦﺌﻮﻟﻮﮔﯩﻴﻪ ﺑﻮﻳﯩﭽﻪ ﺗﻪﺭﺑﯩﻴﯩﻠﻪﺵ ﺑﺎﺷﻼﻧﻐﺎﻥ ﺑﯩﺮ ﻣﻪﺯﮔﯩﻠﮕﻪ ﺗﻮﻏﺮﺍ ﻛﻪﻟﺪﻯ.

ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﻗﻪﺷﻘﻪﺭﺩﻩ 4 - ﺋﺎﯞﻏﯘﺳﺖ ﯞﻩ 12 - ﺋﺎﯞﻏﯘﺳﺖ ﯞﻩﻗﻪﻟﯩﺮﯨﺪﯨﻦ ﻛﯧﻴﯩﻦ ﻣﯘﻗﯩﻤﻠﯩﻖ ﺑﺎﻫﺎﻧﯩﺴﯩﺪﺍ ﺋﯘﻳﻐﯘﺭﻻﺭﻏﺎ ﻗﺎﺭﺍﺗﻘﺎﻥ ﺳﯩﻴﺎﺳﯩﻲ ﻫﻪﻣﺪﻩ ﺩﯨﻨﯩﻲ ﺑﯧﺴﯩﻤﻼﺭﻧﻰ ﻳﻪﻧﯩﻤﯘ ﻛﯜﭼﻪﻳﺘﻜﻪﻥ ﺋﯩﺪﻯ.