ﺭﺍﺩﯨﺌﻮﻣﯩﺰﻣﯘ ﺑﯘ ﻫﻪﻗﺘﻪ ﺗﻪﭘﺴﯩﻠﻰ ﺧﻪﯞﻩﺭﻟﻪﺭﻧﻰ ﺋﯩﮕﯩﻠﻪﭖ ﺧﻪﯞﻩﺭ ﻗﯩﻠﻐﺎﻥ ﺋﯩﺪﻯ. ﺋﻪﻣﻤﺎ ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﯩﺪﺍ ﺑﯧﺮﯨﻠﮕﻪﻥ ﺑﯘ ﺧﻪﯞﻩﺭﺩﻩ ﺋﺎﻻﻫﯩﺪﻩ ﺗﯩﻠﻐﺎ ﺋﯧﻠﯩﺸﻘﺎ ﺗﯧﮕﯩﺸﻠﯩﻚ ﻳﯧﺮﻯ ﺑﻮﻟﺴﺎ، ﺋﯘﻳﻐﯘﺭ ﺋﯧﻠﯩﺪﻩ ﻳﺎﺷﺎﻳﺪﯨﻐﺎﻥ ﺧﯩﺘﺎﻳﻼﺭﻧﯩﯔ ﺋﯘﻳﻐﯘﺭﻻﺭ ﻫﻪﻗﻘﯩﺪﻩ ﺋﯧﻴﺘﻘﺎﻧﻠﯩﺮﻯ ﯞﻩ ﺋﯘﻳﻐﯘﺭ ﻳﺎﺷﻠﯩﺮﯨﻨﯩﯔ ﺧﯩﺘﺎﻱ ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﻩ ﻳﯜﺭﮔﯜﺯﯛﯞﺍﺗﻘﺎﻥ ﺳﯩﻴﺎﺳﻪﺕ ﻫﻪﻗﻘﯩﺪﯨﻜﻰ ﻛﯚﺯ ﻗﺎﺭﺍﺷﻠﯩﺮﯨﺪﯗﺭ.

ﺧﻪﯞﻩﺭﺩﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ ﺋﺎﭘﺘﻮﺭ ﻣﻪﺯﻛﯘﺭ ﺗﻪﭘﺴﯩﻠﻰ ﺧﻪﯞﻩﺭﻧﻰ ﻳﯧﺰﯨﺶ ﺋﯜﭼﯜﻥ ﺟﻪﻧﯘﺑﯩﻲ ﺋﯘﻳﻐﯘﺭ ﺋﯧﻠﯩﻨﯩﯔ ﻛﯘﭼﺎﺭ، ﻗﻪﺷﻘﻪﺭ، ﻳﻪﻛﻪﻥ ﻗﺎﺗﺎﺭﻟﯩﻖ ﯞﯨﻼﻳﻪﺕ ﻧﺎﻫﯩﻴﯩﻠﯩﺮﯨﻨﻰ ﺯﯨﻴﺎﺭﻩﺕ ﻗﯩﻠﻐﺎﻥ ﯞﻩ ﻳﻪﺭﻟﯩﻜﻠﻪﺭ ﺑﯩﻠﻪﻥ ﻣﯘﯕﺪﺍﺷﻘﺎﻥ.

ﻛﯘﭼﺎﺩﯨﻜﻰ ﺑﯩﺮ ﺧﯩﺘﺎﻱ ﺷﻮﭘﯘﺭ ﻣﯘﺧﺒﯩﺮﻯ ﺑﯩﻠﻪﻥ ﻣﯘﯕﺪﯨﺸﯩﺶ ﺟﻪﺭﻳﺎﻧﯩﺪﺍ: "ﻳﯩﭙﻪﻙ ﻳﻮﻟﯩﺪﯨﻜﻰ ﺑﯘ ﮔﯜﺯﻩﻝ ﺷﻪﻫﻪﺭﻧﻰ ﺗﺎﻏﻼﺭ ﯞﻩ ﭼﯚﻟﻠﻪﺭ ﺋﻮﺭﺍﭖ ﺗﯘﺭﯨﺪﯗ. ﺋﻪﻣﻤﺎ ﺑﯘ ﺷﻪﻫﻪﺭﺩﻩ ﺋﯘﻳﻐﯘﺭﻻﺭ ﺑﻪﻙ ﻛﯚﭖ ﺑﻮﻟﯘﭖ، ﻣﺎﻧﺎ ﺑﯘ، ﺑﯘ ﻳﻪﺭﺩﯨﻜﻰ ﺑﯩﺮﺩﯨﻦ - ﺑﯩﺮ ﻣﻪﺳﯩﻠﻪ،" ﺩﯦﮕﻪﻥ ﻫﻪﻣﺪﻩ ﺋﯘﻳﻐﯘﺭﻻﺭﻧﻰ " ﻗﺎﻻﻕ ﯞﻩ ﺗﻪﺭﺑﯩﻴﻪ ﻛﯚﺭﻣﯩﮕﻪﻥ،" ﺩﻩﭖ ﺳﯜﺭﻩﺗﻠﯩﮕﻪﻥ.

ﻫﺎﻟﺒﯘﻛﻰ، ﺧﯩﺘﺎﻳﻼﺭ ﻫﻪﻗﻘﯩﺪﻩ ﺗﻮﺧﺘﺎﻟﻐﺎﻥ ﻳﻪﺭﻛﻪﻧﻠﯩﻚ ﺳﻮﺩﯨﮕﻪﺭ ﻣﻪﻣﻪﺗﺘﯘﺭﺳﯘﻥ ﺑﻮﻟﺴﺎ، ﺋﯚﺯﯨﻨﯩﯔ ﺧﯩﺘﺎﻳﻼﺭﻧﻰ ﭘﻪﺱ ﻛﯚﺭﯨﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﯞﻩ: "ﺋﯘﻻﺭ ﻫﺎﺯﯨﺮ ﻣﺎﺭﻛﯩﺴﯩﺰﻡ ﻳﺎﻛﻰ ﻛﻮﻣﻤﯘﻧﯩﺰﻣﻐﺎ ﺋﯩﺸﻪﻧﻤﻪﻳﺪﯗ. ﺋﯘﻻﺭ ﭘﻪﻗﻪﺕ ﭘﯘﻟﻐﯩﻼ ﭼﻮﻗﯘﻧﯩﺪﯗ. ﭘﯘﻝ ﺋﯘﻻﺭﻧﯩﯔ ﺧﯘﺩﺍﺳﻰ" ﺩﯦﮕﻪﻥ. ﻗﻪﺷﻘﻪﺭﻟﯩﻚ ﺋﯘﻳﻐﯘﺭ ﺳﻮﺩﯨﮕﻪﺭ ﺧﯩﺘﺎﻳﻨﯩﯔ ﻳﻮﻝ ﯞﻩ ﻛﯚﯞﺭﯛﻛﻠﻪﺭﻧﻰ ﭘﻪﻗﻪﺕ ﺋﯘﻳﻐﯘﺭ ﺋﯧﻠﯩﮕﻪ ﻛﯚﭘﻠﻪﭖ ﺧﯩﺘﺎﻱ ﻳﯚﺗﻜﻪﺵ ﺋﯜﭼﯜﻧﻼ ﻳﺎﺳﺎﯞﺍﺗﻘﺎﻧﻠﯩﻘﯩﻨﻰ، ﺋﻪﻣﻤﺎ ﻫﯚﻛﯜﻣﻪﺗﻨﯩﯔ ﻧﻪﺩﻩ ﺑﯧﺴﯩﻢ ﻛﯚﭖ ﺑﻮﻟﺴﺎ ﺷﯘ ﻳﻪﺭﺩﻩ ﻣﻪﺳﯩﻠﯩﻨﯩﯔ ﻛﯚﭖ ﺑﻮﻟﯩﺪﯨﻐﺎﻧﻠﯩﻘﯩﻨﻰ ﺋﯘﻧﺘﯘﭖ ﻗﺎﻟﻤﺎﺳﻠﯩﻘﻰ ﻛﯧﺮﻩﻛﻠﯩﻜﯩﻨﻰ ﺑﯩﻠﺪﯛﺭﮔﻪﻥ.

ﺧﻪﯞﻩﺭﺩﻩ ﻛﯚﺭﺳﯩﺘﯩﻠﯩﺸﯩﭽﻪ، ﺋﺎﭘﺘﻮﺭ ﻣﻪﻳﻠﻰ ﻗﻪﻳﻪﺭﮔﻪ ﺑﺎﺭﻣﯩﺴﯘﻥ ﻛﯚﭘﯩﻨﭽﻪ ﻫﺎﻟﻼﺭﺩﺍ ﺧﯩﺘﺎﻱ ﺑﯩﺨﻪﺗﻪﺭﻟﯩﻚ ﺗﺎﺭﻣﺎﻗﻠﯩﺮﻯ ﺧﺎﺩﯨﻤﻠﯩﺮﻯ ﺋﯘﻧﯩﯖﻐﺎ ﺋﻪﮔﯩﺸﯩﯟﺍﻟﻐﺎﻥ.