ﻳﯩﻐﯩﻨﺪﺍ ﻳﻪﻧﻪ، ﻛﺎﺩﯨﺮﻻﺭﻧﯩﯔ ﺳﯩﻴﺎﺳﯩﻲ ﻣﻪﻳﺪﺍﻧﻰ ﻗﻪﺗﺌﯩﻲ ﺑﻮﻟﯘﺷﻰ، ﺳﯩﻴﺎﺳﯩﻲ ﺳﻪﺯﮔﯜﺭﻟﯜﻛﻰ ﺋﯜﺳﺘﯜﻥ ﺑﻮﻟﯘﺷﻰ ﺗﻪﻛﯩﺘﻠﯩﻨﯩﺶ ﺑﯩﻠﻪﻥ ﺑﯩﻠﻠﻪ، ﺋﯘﻻﺭﻧﯩﯔ ﭼﻮﯓ ﯞﻩﻗﻪﻟﻪﺭﺩﻩ، ﻫﺎﻟﻘﯩﻠﯩﻖ ﭘﻪﻳﺘﻠﻪﺭﺩﻩ ﺳﯩﻨﺎﻗﺘﯩﻦ ﺋﯚﺗﯜﺷﻰ ﺗﻪﻟﻪﭖ ﻗﯩﻠﯩﻨﻐﺎﻥ. ﺋﻮﺭﺍﻣﯩﺪﯨﻦ ﻗﺎﺭﯨﻐﺎﻧﺪﺍ، ﭼﺎﻗﯩﺮﯨﻘﻼﺭﻧﯩﯔ ﺋﺎﺳﺎﺳﻠﯩﻘﻰ ﺋﯘﻳﻐﯘﺭ ﺭﺍﻳﻮﻧﯩﺪﯨﻜﻰ ﻣﯩﻠﻠﯩﻲ ﻛﺎﺩﯨﺮﻻﺭﻏﺎ ﻗﺎﺭﯨﺘﯩﻠﻐﺎﻧﻠﯩﻘﻰ ﻣﻪﻟﯘﻡ.

5 ‏- ﺋﯩﻴﯘﻝ ﯞﻩﻗﻪﺳﯩﺪﯨﻦ ﻛﯧﻴﯩﻦ ﺑﯩﺮ ﺗﯜﺭﻛﯜﻡ ﺋﯘﻳﻐﯘﺭ ﻛﺎﺩﯨﺮﻻﺭﻧﯩﯔ، ﺑﻮﻟﯘﭘﻤﯘ ﻗﺎﻧﯘﻥ ﺳﺎﻫﻪﺳﯩﺪﯨﻜﻰ ﺋﯘﻳﻐﯘﺭ ﻛﺎﺩﯨﺮﻻﺭﻧﯩﯔ ﯞﻩﺯﯨﭙﻪ ﺋﯩﺠﺮﺍ ﻗﯩﻠﯩﺸﺘﺎ ﭘﺎﺳﺴﯩﭗ ﭘﻮﺯﯨﺘﺴﯩﻴﻪ ﻛﯚﺭﺳﻪﺗﻜﻪﻧﻠﯩﻜﻰ، ﻫﻪﺗﺘﺎ ﺑﻪﺯﯨﻠﯩﺮﯨﻨﯩﯔ ﯞﻩﺯﯨﭙﯩﺴﯩﺪﯨﻦ ﺋﯩﺴﺘﯩﭙﺎ ﺑﻪﺭﮔﻪﻧﻠﯩﻜﻰ ﻏﻪﻳﺮﯨﻲ ﺭﻩﺳﻤﯩﻲ ﺧﻪﯞﻩﺭ ﺳﯜﭘﯩﺘﯩﺪﻩ ﺟﻪﻣﺌﯩﻴﻪﺗﺘﻪ ﺗﺎﺭﻗﯩﻠﯩﭗ ﻳﯜﺭﮔﻪﻥ ﺋﯩﺪﻯ.
 
ﺑﯘ ﻗﯧﺘﯩﻤﻘﻰ ﻳﯩﻐﯩﻨﺪﺍ ﻳﻪﻧﻪ، ﻣﯩﻠﻠﻪﺗﻠﻪﺭ ﺋﯩﺘﺘﯩﭙﺎﻗﻠﯩﻘﯩﻨﻰ ﻛﯜﭼﻪﻳﺘﯩﺶ، ﻣﯩﻠﻠﯩﻲ ﺯﯨﺪﺩﯨﻴﻪﺗﻠﻪﺭﻧﻰ ﭘﻪﺳﻪﻳﺘﯩﺶ ﺗﻪﻟﯩﭙﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ ﺑﻮﻟﺴﯩﻤﯘ، ﺑﯘ ﻧﯘﻗﺘﯩﺪﺍ ﭘﻪﻗﻪﺕ " ﻗﻪﺗﺌﯩﻲ ﭼﯩﯔ ﺗﯘﺭﯗﺵ"، "ﺋﻪﺳﺘﺎﻳﯩﺪﯨﻞ ﺋﯩﺠﺮﺍ ﻗﯩﻠﯩﺶ" ﺩﯦﮕﻪﻧﮕﻪ ﺋﻮﺧﺸﺎﺵ ﺋﺎﺑﺴﺘﺮﺍﻛﺖ ﺷﻮﺋﺎﺭﻻﺭ ﺗﻪﻛﺮﺍﺭﻻﻧﻐﺎﻥ. ﺋﻪﻣﻤﺎ ﺋﯘﻳﻐﯘﺭ ﺭﺍﻳﻮﻧﯩﺪﯨﻜﻰ ﻣﯩﻠﻠﯩﻲ ﺯﯨﺪﺩﯨﻴﻪﺗﻨﯩﯔ ﻣﻪﻧﺒﻪﺳﻰ ﺑﻮﻟﻐﺎﻥ ﺋﯩﻘﺘﯩﺴﺎﺩﯨﻲ ﺗﻪﯕﺴﯩﺰﻟﯩﻚ، ﻣﯩﻠﻠﯩﻲ ﻛﻪﻣﺴﯩﺘﯩﺶ ﯞﻩ ﺩﯨﻨﯩﻲ ﭼﻪﻛﻠﯩﻤﯩﻠﻪﺭﻧﻰ ﺋﻪﻣﻪﻟﺪﯨﻦ ﻗﺎﻟﺪﯗﺭﯗﺷﻨﯩﯔ ﻛﻮﻧﻜﺮﯦﺖ ﭼﺎﺭﯨﻠﯩﺮﻯ ﻫﻪﻗﻘﯩﺪﻩ ﻫﯧﭻ ﺗﻮﺧﺘﺎﻟﻤﯩﻐﺎﻥ.