ﺧﻪﯞﻩﺭﮔﻪ ﻗﺎﺭﯨﻐﺎﻧﺪﺍ، ﺑﯘ ﻧﺎﻫﯩﻴﯩﻠﯩﻚ ﭘﺎﺭﺗﯩﻴﻪ‏ - ﻫﯚﻛﯜﻣﻪﺕ ﺩﺍﺋﯩﺮﯨﻠﯩﺮﯨﻨﯩﯔ ﺋﯜﭺ ﺧﯩﻞ ﻛﯜﭼﻠﻪﺭﮔﻪ ﻗﺎﺭﺷﻰ ﺳﯩﻴﺎﺳﯩﻲ ﺗﻪﺷﯟﯨﻖ ﺗﻪﺭﺑﯩﻴﻪ ﭘﺎﺋﺎﻟﯩﻴﯩﺘﯩﻨﯩﯔ ﻧﯘﻗﺘﯩﻠﯩﻖ ﺗﯜﺭﯨﻨﯩﯔ ﺑﯩﺮﻯ ﺑﻮﻟﯘﭖ، ﺋﯘﻟﯘﻏﭽﺎﺕ ﻧﺎﻫﯩﻴﯩﺴﯩﻨﯩﯔ ﻫﻪﺭ ﺑﯩﺮ ﻳﯧﺰﺍ ‏ - ﻛﻪﻧﺘﻠﯩﺮﯨﮕﯩﭽﻪ، ﻫﯩﺰﺑﯘﻝ - ﺗﻪﻫﺮﯨﺮﻧﻰ  ﭘﺎﺵ ﻗﯩﻠﯩﺶ، ﺋﯘﻧﯩﯖﺪﯨﻦ ﺋﺎﮔﺎﻫ ﺑﻮﻟﯘﺵ ﻫﻪﻣﻤﻪ ﺑﯩﺮﻟﯩﻜﺘﻪ ﻫﯩﺰﺑﯘﻝ - ﺗﻪﻫﺮﯨﺮﺩﯨﻦ  ﺋﯩﺒﺎﺭﻩﺕ ﺑﯩﺪﺋﻪﺕ ﺗﻪﺷﻜﯩﻼﺗﻘﺎ ﻗﺎﺭﺷﻰ ﺗﯘﺭﯗﺵ ﺗﻪﺷﯟﯨﻘﺎﺗﻰ ﺋﯧﻠﯩﭗ ﺑﯧﺮﯨﻠﻤﺎﻗﺘﺎ ﺋﯩﻜﻪﻥ.

ﻧﺎﻫﯩﻴﯩﻠﯩﻚ ﭘﺎﺭﺗﻜﻮﻡ ﺑﯘ ﺧﯩﻞ ﺗﻪﺷﯟﯨﻘﯩﻲ ﺗﻪﺭﺑﯩﻴﯩﻨﻰ ﻛﻪﻧﺖ ﺭﺍﺩﯨﺌﻮﻟﯩﺮﯨﺪﺍ ﻛﯜﻧﺪﻩ ﺋﺎﯕﻠﯩﺘﯩﺶ، ﻫﻪﭘﺘﯩﺪﻩ ﺋﺎﯕﻠﯩﺘﯩﺶ ﻗﯧﺘﯩﻢ ﺳﺎﻧﻰ ﺋﯜﭺ ﻗﯧﺘﯩﻤﺪﯨﻦ ﺋﺎﺯ ﺑﻮﻟﻤﺎﺳﻠﯩﻘﻘﺎ ﻛﺎﭘﺎﻟﻪﺗﻠﯩﻚ ﻗﯩﻠﯩﺶ، ﻫﯩﺰﺑﯘﻝ - ﺗﻪﻫﺮﯨﺮﻧﯩﯔ  ﻗﺎﻧﯘﻧﺴﯩﺰ ﺋﯚﻛﺘﯩﭽﻰ ﺗﻪﺷﻜﯩﻼﺕ ﺋﯩﻜﻪﻧﻠﯩﻜﯩﻨﻰ، ﺗﻪﺷﯟﯨﻘﺎﺕ ﭘﺎﺋﺎﻟﯩﻴﻪﺗﻠﯩﺮﯨﻨﻰ ﻛﯜﭼﻪﻳﺘﯩﭗ ﻫﻪﺭ ﺑﯩﺮ ﺋﻮﺭﮔﺎﻥ ﻫﻪﻡ ﻛﻪﻧﺖ ﻳﯧﺰﯨﻼﺭﺩﺍ 100ﻛﯜﻧﻠﯜﻙ ﻣﯘﻗﯩﻤﻠﯩﻘﻨﻰ ﻛﯜﭼﻪﻳﺘﯩﺶ ﺳﯩﻴﺎﺳﯩﻲ ﺋﯚﮔﯩﻨﯩﺶ، ﻧﻮﺗﯘﻕ ﺳﯚﺯﻟﻪﺵ ﭘﺎﺋﺎﻟﯩﻴﻪﺗﻠﯩﺮﯨﻨﻰ ﺋﻮﺭﯗﻧﻼﺷﺘﯘﺭﯗﺵ ﺋﻮﻗﺘﯘﺭﯗﺷﻰ ﭼﯜﺷﯜﺭﮔﻪﻥ.

ﺋﯘﻟﯘﻏﭽﺎﺕ ﻧﺎﻫﯩﻴﯩﺴﻰ ﺩﺍﺋﯩﺮﯨﻠﯩﺮﻯ ﺑﯘ ﻳﯜﺯ ﻛﯜﻧﻠﯜﻙ ﺗﻪﺷﯟﯨﻘﯩﻲ ﺗﻪﺭﺑﯩﻴﻪ ﺋﺎﺭﻗﯩﻠﯩﻖ ﻫﻪﺭ ﺑﯩﺮ ﻛﺎﺩﯨﺮ ﻫﻪﻡ ﺩﯦﻬﻘﺎﻥ ﺋﺎﻣﻤﯩﻨﯩﯔ ﻛﺎﻟﻠﯩﺴﯩﺪﺍ ﻫﯩﺰﺑﯘﻝ - ﺗﻪﻫﺮﯨﺮﻧﯩﯔ  ﺑﯩﺪﺋﻪﺕ ﺋﻪﻛﺴﯩﻴﻪﺗﭽﯩﻞ ﺗﻪﺷﻜﯩﻼﺕ ﺋﯩﻜﻪﻧﻠﯩﻜﯩﻨﻰ ﺋﺎﻳﺪﯨﯖﻼﺷﺘﯘﺭﯗﺵ، ﻫﯩﺰﺑﯘﻝ - ﺗﻪﻫﺮﯨﺮﭼﯩﻠﻪﺭﮔﻪ ﻫﯧﭽﻘﺎﻧﺪﺍﻕ ﻳﻮﭼﯘﻕ ﻗﻮﻳﻤﺎﺳﻠﯩﻘﻘﺎ ﻛﺎﭘﺎﻟﻪﺗﻠﯩﻚ ﻗﯩﻠﯩﺸﻨﻰ ﻣﻪﻗﺴﻪﺕ ﻗﯩﻠﻤﺎﻗﺘﺎ ﺋﯩﻜﻪﻥ.

ﺋﯘﻳﻐﯘﺭ ﺋﯧﻠﯩﮕﻪ ﺩﺍﺋﯩﺮ ﺧﻪﯞﻩﺭﻟﻪﺭﺩﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﺋﯘﻳﻐﯘﺭ ﺋﯧﻠﯩﻨﯩﯔ ﻫﻪﺭ ﻗﺎﻳﺴﻰ ﺟﺎﻳﻠﯩﺮﯨﺪﺍ ﺭﺍﻣﯩﺰﺍﻥ ﻛﯩﺮﯨﺸﻰ ﺑﯩﻠﻪﻥ ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﻗﺎﻧﯘﻧﺴﯩﺰ ﺩﯨﻨﯩﻲ ﭘﺎﺋﺎﻟﯩﻴﻪﺗﻠﻪﺭﮔﻪ ﻗﺎﺭﺷﻰ ﺗﯘﺭﯗﺵ ﻧﺎﻣﯩﺪﺍ،ﺋﯘﻳﻐﯘﺭﻻﺭﻧﯩﯔ ﺩﯨﻨﯩﻲ ﺋﯧﺘﯩﻘﺎﺩ ﺋﻪﺭﻛﯩﻨﻠﯩﻜﯩﮕﻪ ﺗﻮﺳﻘﯘﻧﻠﯘﻕ ﻗﯩﻠﯩﺪﯨﻐﺎﻥ ﻫﻪﺭﯨﻜﻪﺗﻠﻪﺭﻧﻰ ﻛﯜﭼﻪﻳﺘﻤﻪﻛﺘﻪ.