ﺩﻭﻛﻼﺗﺘﺎ، ﮔﻪﺭﭼﻪ ﺧﻪﻟﻘﺌﺎﺭﺍ ﻛﯩﺸﯩﻠﯩﻚ ﻫﻮﻗﯘﻕ ﺧﯩﺘﺎﺑﻨﺎﻣﯩﺴﻰ ﺋﯧﻼﻥ ﻗﯩﻠﯩﻨﻐﯩﻨﯩﻐﺎ ﯞﻩ ﺧﯩﺘﺎﻱ ﺧﻪﻟﻖ ﺟﯘﻣﻬﯘﺭﯨﻴﯩﺘﻰ ﻗﯘﺭﯗﻟﯘﭖ ﺋﯘﻳﻐﯘﺭﻻﺭﻏﺎ ﺋﺎﭘﺘﻮﻧﻮﻣﯩﻴﻪ ﻫﻮﻗﯘﻗﻰ ﯞﻩﺩﻩ ﻗﯩﻠﯩﻨﻐﯩﻨﯩﻐﺎ ﺋﺎﺭﯨﺪﯨﻦ 60 ﻳﯩﻞ ﺋﯚﺗﻜﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﯘﻳﻐﯘﺭﻻﺭﻧﯩﯔ ﻛﯩﺸﯩﻠﯩﻚ ﻫﻮﻗﯘﻗﯩﻨﯩﯔ ﻫﻪﺭ ﻗﺎﻳﺴﻰ ﺗﻪﺭﻩﭘﻠﻪﺭﺩﯨﻦ ﺋﯧﻐﯩﺮ ﺩﻩﭘﺴﻪﻧﺪﯨﭽﯩﻠﯩﻜﻜﻪ ﺋﯘﭼﺮﺍﭖ ﻛﯧﻠﯩﯟﺍﺗﻘﺎﻧﻠﯩﻘﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ.

ﺩﻭﻛﻼﺗﺘﺎ، ﺧﯩﺘﺎﻳﻨﯩﯔ 2007 - ﻳﯩﻠﻰ 13 - ﺳﯧﻨﺘﻪﺑﯩﺮ "ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﻰ ﻳﻪﺭﻟﯩﻚ ﺧﻪﻟﻘﻨﯩﯔ ﻛﯩﺸﯩﻠﯩﻚ ﻫﻮﻗﯘﻗﻠﯩﺮﯨﻨﻰ ﻗﻮﻏﺪﺍﺵ ﺧﯩﺘﺎﺑﻨﺎﻣﯩﺴﻰ" ﻧﻰ ﻗﻮﻟﻼﭖ ﺑﯩﻠﻪﺕ ﺗﺎﺷﻠﯩﻐﺎﻧﻠﯩﻘﻰ ﯞﻩ ﻣﻪﺯﻛﯘﺭ ﺧﯩﺘﺎﺑﻨﺎﻣﯩﺪﻩ ﻛﯚﺭﺳﯩﺘﯩﻠﮕﻪﻥ ﭘﺮﯨﻨﺴﯩﭙﻼﺭﻏﺎ ﺋﻪﻣﻪﻝ ﻗﯩﻠﯩﺸﻘﺎ ﯞﻩﺩﻩ ﺑﻪﺭﮔﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﻪﻣﻪﻟﯩﻴﻪﺗﺘﻪ ﺧﯩﺘﺎﻳﻨﯩﯔ ﯞﻩﺩﯨﺴﯩﺪﻩ ﺗﯘﺭﻣﯩﻐﺎﻧﻠﯩﻘﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ.

ﺩﻭﻛﻼﺗﺘﺎ، ﺋﯘﻳﻐﯘﺭﻻﺭ ﻛﯩﺸﯩﻠﯩﻚ ﻫﻮﻗﯘﻗﯩﻨﯩﯔ ﺩﻩﭘﺴﻪﻧﺪﻩ ﻗﯩﻠﯩﻨﯩﺶ ﺋﻪﻫﯟﺍﻟﻰ ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﻰ ﻳﻪﺭﻟﯩﻚ ﺧﻪﻟﻘﻠﻪﺭ ﻫﻮﻗﯘﻕ ﺧﯩﺘﺎﺑﻨﺎﻣﯩﺴﯩﻨﯩﯔ ﻫﻪﺭ ﺑﯩﺮ ﻣﺎﺩﺩﯨﺴﯩﺪﯨﻜﻰ ﻣﯩﺰﺍﻧﻼﺭ ﺑﻮﻳﯩﭽﻪ ﻣﯩﺴﺎﻟﻼﺭ ﺑﯩﻠﻪﻥ ﺗﻪﭘﺴﯩﻠﯩﻲ ﭼﯜﺷﻪﻧﺪﯛﺭﯛﻟﮕﻪﻥ.

ﺩﻭﻛﻼﺗﺘﺎ ﻳﻪﻧﻪ، ﺋﯘﻳﻐﯘﺭﻻﺭﻧﯩﯔ ﻣﺎﺋﺎﺭﯨﭗ، ﺋﺎﺧﺒﺎﺭﺍﺕ ، ﺧﯩﺰﻣﻪﺕ ﭘﯘﺭﺳﯩﺘﻰ ﻗﺎﺗﺎﺭﻟﯩﻖ ﺟﻪﻫﻪﺗﻠﻪﺭﺩﻩ ﻛﻪﻣﺴﯩﺘﯩﺸﻜﻪ ﺋﯘﭼﺮﯨﻐﺎﻧﻠﯩﻘﻰ ﯞﻩ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﯨﻜﻰ ﻳﻪﺭ ﺋﺎﺳﺘﻰ ﺑﺎﻳﻠﯩﻘﻼﺭﺩﯨﻦ ﻗﯩﻠﭽﻪ ﺑﻪﻫﺮﯨﻤﻪﻥ ﺑﻮﻟﻤﯩﻐﺎﻧﻠﯩﻘﻰ ﺋﯩﻠﮕﯩﺮﻯ ﺳﯜﺭﯛﻟﮕﻪﻥ.

ﺑﯘ، ﺑﺎﺵ ﺷﺘﺎﺑﻰ ﺋﺎﻣﯧﺮﯨﻜﺎ ﭘﺎﻳﺘﻪﺧﺘﻰ ﯞﺍﺷﯩﻨﮕﺘﻮﻧﻐﺎ ﺟﺎﻳﻼﺷﻘﺎﻥ ﺋﯘﻳﻐﯘﺭ ﻛﯩﺸﯩﻠﯩﻚ ﻫﻮﻗﯘﻕ ﭘﺮﻭﮔﺮﺍﻣﻤﯩﺴﻰ ﺷﯘ ﺧﯩﻠﺪﺍ ﺋﯧﻼﻥ ﻗﯩﻠﻐﺎﻥ ﺋﻪﯓ ﻳﯧﯖﻰ ﺩﻭﻛﻼﺗﺘﯘﺭ.