ﺧﻪﯞﻩﺭﺩﯨﻦ ﻳﻪﻧﻪ ﻣﻪﻟﯘﻡ ﺑﻮﻟﯘﺷﯩﭽﻪ، ﺋﯘﻳﻐﯘﺭ ﺋﯧﻠﯩﺪﻩ 2007 ‏ - ﻳﯩﻠﻰ ﺋﯩﺸﻠﻪﭘﭽﯩﻘﯩﺮﯨﻠﻐﺎﻥ ﺧﺎﻡ ﻧﯧﻔﯩﺖ ﻣﻪﻫﺴﯘﻻﺕ ﻣﯩﻘﺪﺍﺭﻯ 26 ﻣﯩﻠﻴﻮﻥ 400 ﻣﯩﯔ ﺗﻮﻧﻨﯩﻐﺎ، ﺗﻪﺑﯩﺌﯩﻲ ﮔﺎﺯ ﻣﯩﻘﺪﺍﺭﻯ 21 ﻣﯩﻠﻴﺎﺭﺩ 100 ﻣﯩﻠﻴﻮﻥ ﻛﯘﭘﻤﯧﺘﯩﺮﻏﺎ ﻳﯧﺘﯩﭗ، ﺑﯘ ﺭﺍﻳﻮﻥ ﭘﯜﺗﯜﻥ ﺧﯩﺘﺎﻱ ﺑﯘﻳﯩﭽﻪ ﺋﻪﯓ ﭼﻮﯓ ﻧﯧﻔﯩﺖ، ﺗﻪﺑﯩﺌﯩﻲ ﮔﺎﺯ ﺋﯩﺸﻠﻪﭘﭽﯩﻘﯩﺮﯨﺶ ﺭﺍﻳﻮﻧﯩﻐﺎ ﺋﺎﻳﻼﻧﻐﺎﻥ.

ﺧﯩﺘﺎﻱ ﻫﯚﻛﯜﻣﯩﺘﻰ، ﻫﺎﺯﯨﺮﻏﺎ ﻗﻪﺩﻩﺭ ﻏﻪﺭﺑﻨﯩﯔ ﮔﺎﺯﯨﻨﻰ ﺷﻪﺭﯨﻘﻘﻪ ﻳﻪﺗﻜﯜﺯﯛﺵ، ﺧﯩﺘﺎﻱ - ﻗﺎﺯﺍﻗﯩﺴﺘﺎﻥ ﺧﺎﻡ ﻧﯧﻔﯩﺖ ﺗﯘﺭﯗﺑﺎ ﻟﯩﻨﯩﻴﯩﺴﻰ، ﺋﯜﺭﯛﻣﭽﻰ - ﻟﻪﻧﺠﯘ ﺗﻪﻳﻴﺎﺭ ﻣﺎﻱ ﺗﯘﺭﯗﺑﺎ ﻟﯩﻨﯩﻴﯩﺴﻰ، ﻏﻪﺭﺑﯩﻲ ﺩﯨﻴﺎﺭ ﺧﺎﻡ ﻧﯧﻔﯩﺖ ﺗﯘﺭﯗﺑﺎ ﻟﯩﻨﯩﻴﯩﺴﻰ ﻗﺎﺗﺎﺭﻟﯩﻖ ﻧﯧﻔﯩﺖ ﻗﯘﺭﯗﻟﯘﺷﻠﯩﺮﯨﻨﻰ ﺋﯩﺸﻘﺎ ﺋﺎﺷﯘﺭﯗﭖ، ﺧﯩﺘﺎﻱ ﺷﻪﻫﻪﺭﻟﯩﺮﯨﻨﻰ ﻳﯧﻘﯩﻠﻐﯘ ﯞﻩ ﺋﯧﻨﯩﺮﮔﯩﻴﻪ ﺑﯩﻠﻪﻥ ﺗﻪﻣﯩﻨﻠﯩﻤﻪﻛﺘﻪ ﻫﻪﻣﺪﻩ ﺑﯘﻧﯩﯖﺪﯨﻦ ﻛﯚﭖ ﺋﯩﻘﺘﯩﺴﺎﺩﯨﻲ ﻣﻪﻧﭙﻪﺋﻪﺗﻠﻪﺭﮔﻪ ﺋﯧﺮﯨﺸﻤﻪﻛﺘﻪ.

ﺑﯩﺮﺍﻕ، ﭼﻪﺗﺌﻪﻟﻠﻪﺭﺩﻩ ﺋﯘﻳﻐﯘﺭﻻﺭﻧﯩﯔ ﺳﯩﻴﺎﺳﯩﻲ ﻣﻪﻧﭙﻪﺋﻪﺗﻰ ﺋﯜﭼﯜﻥ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺋﯘﻳﻐﯘﺭ ﺗﻪﺷﻜﯩﻼﺗﻠﯩﺮﻯ ﺋﯩﺰﭼﯩﻞ ﺗﯜﺭﺩﻩ، ﺋﯘﻳﻐﯘﺭ ﺩﯨﻴﺎﺭﯨﺪﯨﻜﻰ ﻣﻮﻝ ﻧﯧﻔﯩﺖ ﺑﺎﻳﻠﯩﻘﯩﺪﯨﻦ ﺋﯘﻳﻐﯘﺭ ﺧﻪﻟﻘﯩﻨﯩﯔ ﻗﯩﻠﭽﻪ ﻣﻪﻧﭙﻪﺋﻪﺗﻠﯩﻨﻪﻟﻤﻪﻱ ﻛﯧﻠﯩﯟﺍﺗﻘﺎﻧﻠﯩﻘﯩﻨﻰ، ﺩﯦﻬﻘﺎﻧﻼﺭﻧﯩﯔ ﺗﯘﺭﻣﯘﺵ ﺳﻪﯞﯨﻴﯩﺴﯩﻨﯩﯔ ﺗﯚﯞﻩﻧﻠﯩﻜﯩﻨﻰ، ﺋﯘﻳﻐﯘﺭ ﺋﯩﺸﺴﯩﺰﻻﺭ ﺳﺎﻧﯩﻨﯩﯔ ﻛﯚﭘﻠﯩﻜﯩﻨﻰ، ﺋﻮﻣﯘﻣﻪﻥ ﺋﯘﻳﻐﯘﺭﻻﺭﻧﯩﯔ ﻧﺎﻣﺮﺍﺗﻠﯩﻘﺘﺎ ﻳﺎﺷﺎﯞﺍﺗﻘﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﻣﻪﻛﺘﻪ.