ﺋﯘﻳﻐﯘﺭ > خەۋەرلەر > ﺑﯜﮔﯜﻧﻜﻰ ﻗﯩﺴﻘﺎ ﺧﻪﯞﻩﺭﻟﻪﺭ

ﯞﺍﻛﺎﻟﻪﺗﺴﯩﺰ ﻣﯩﻠﻠﻪﺗﻠﻪﺭ ﺗﻪﺷﻜﯩﻼﺗﻰ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﻧﻮﭘﯘﺱ ﻳﯚﺗﻜﻪﺵ ﺳﯩﻴﺎﺳﯩﺘﯩﻨﻰ ﺩﻩﺭﻫﺎﻝ ﺗﻮﺧﺘﯩﺘﯩﺸﻘﺎ ﭼﺎﻗﯩﺮﺩﻯ

ﻣﯘﺧﺒﯩﺮﯨﻤﯩﺰ ﺟﯜﻣﻪ

2008-09-22

19 - ﺳﯧﻨﺘﻪﺑﯩﺮ، ﯞﺍﻛﺎﻟﻪﺗﺴﯩﺰ ﻣﯩﻠﻠﻪﺗﻠﻪﺭ ﺗﻪﺷﻜﯩﻼﺗﻰ ﺋﯧﺴﺘﻮﻧﯩﻴﻪ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﻧﻮﭘﯘﺱ ﻳﯚﺗﻜﻪﺵ ﺳﯩﻴﺎﺳﯩﺘﻰ ﻫﻪﻗﻘﯩﺪﻩ ﺑﯩﺮ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﻰ ﺋﯚﺗﻜﯜﺯﮔﻪﻥ ﺑﻮﻟﯘﭖ، ﻳﯩﻐﯩﻨﻐﺎ ﻗﺎﺗﻨﺎﺷﻘﺎﻥ ﻣﯘﺗﻪﺧﻪﺳﺴﯩﺴﻠﻪﺭ ﺑﯩﺮﻟﯩﻜﺘﻪ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﺋﯘﻳﻐﯘﺭ ﺋﯩﻠﻰ، ﺗﯩﺒﻪﺕ ﯞﻩ ﺋﯩﭽﻜﻰ ﻣﻮﯕﻐﯘﻟﻼﺭﻏﺎ ﻗﺎﺭﺍﺗﻘﺎﻥ ﻧﻮﭘﯘﺱ ﻳﯚﺗﻜﻪﺵ ﺳﯩﻴﺎﺳﯩﺘﯩﻨﻰ ﺩﻩﺭﻫﺎﻝ ﺗﻮﺧﺘﯩﺘﯩﺸﻘﺎ ﭼﺎﻗﯩﺮﯨﭗ ﺧﯩﺘﺎﺑﻨﺎﻣﻪ ﺋﯧﻼﻥ ﻗﯩﻠﺪﻯ.

ﺧﯩﺘﺎﭘﻨﺎﻣﯩﺪﺍ ﻛﯚﺭﺳﯩﺘﯩﻠﯩﺸﯩﭽﻪ، ﺑﯘ ﻧﯚﯞﻩﺗﻠﯩﻚ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﻰ، ﺧﯩﺘﺎﻳﻨﯩﯔ ﺋﯘﻳﻐﯘﺭ ﺋﯩﻠﻰ، ﺗﯩﺒﻪﺕ ﯞﻩ ﺋﯩﭽﻜﻰ ﻣﻮﯕﻐﯘﻟﻼﺭﻏﺎ ﻗﺎﺭﺍﺗﻘﺎﻥ ﻧﻮﭘﯘﺱ ﻳﯚﺗﻜﻪﺵ ﺳﯩﻴﺎﺳﯩﺘﯩﮕﻪ ﻫﻪﻣﺪﻩ ﺩﯗﻧﻴﺎﻧﯩﯔ ﺑﺎﺷﻘﺎ ﺟﺎﻳﻠﯩﺮﯨﺪﺍ ﻳﯜﺯ ﺑﯧﺮﯨﯟﺍﺗﻘﺎﻥ ﻧﻮﭘﯘﺱ ﻳﯚﺗﻜﻪﺵ ﺳﯩﻴﺎﺳﻪﺗﻠﯩﺮﯨﮕﻪ ﻧﯩﺴﺒﻪﺗﻪﻥ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻨﯩﯔ ﺟﯩﺪﺩﯨﻲ ﻣﯘﺋﺎﻣﯩﻠﻪ ﻗﯩﻠﻤﺎﻳﯟﺍﺗﻘﺎﻧﻠﯩﻘﯩﻐﺎ ﻗﺎﺭﯨﺘﺎ ﺋﺎﮔﺎﻫﻼﻧﺪﯗﺭﯗﺵ ﺗﯘﻳﻐﯘﺳﻰ ﻗﻮﺯﻏﺎﺵ ﺋﯜﭼﯜﻥ ﺋﻮﻳﯘﺷﺘﯘﺭﯗﻟﻐﺎﻥ.

ﺑﯘ ﻧﯚﯞﻩﺗﻠﯩﻚ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯧﻐﯩﻨﻰ ﺋﯧﻼﻥ ﻗﯩﻠﻐﺎﻥ ﺧﯩﺘﺎﭘﻨﺎﻣﯩﺪﺍ، ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺕ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﺗﯩﺒﻪﺕ ﻗﺎﺗﺎﺭﻟﯩﻖ ﺭﺍﻳﻮﻧﻼﺭﻏﺎ ﻗﺎﺭﺍﺗﻘﺎﻥ ﺧﯩﺘﺎﻱ ﻛﯚﭼﻤﻪﻧﻠﯩﺮﯨﻨﻰ ﺋﻮﺭﯗﻧﻼﺷﺘﯘﺭﯗﺵ ﺳﯩﻴﺎﺳﯩﺘﯩﻨﻰ ﺩﻩﺭﻫﺎﻝ ﺗﻮﺧﺘﯩﺘﯩﺸﻘﺎ ﻗﯩﺴﺘﺎﺷﻘﺎ ﭼﺎﻗﯩﺮﯨﻠﻐﺎﻥ ﻫﻪﻣﺪﻩ ﻳﺎﯞﺭﻭﭘﺎ ﺋﯩﺘﺘﯩﭙﺎﻗﯩﻐﺎ ﺧﯩﺘﺎﻱ ﺑﯩﻠﻪﻥ ﺋﯚﺗﻜﯜﺯﯨﺪﯨﻐﺎﻥ ﺩﯨﭙﻠﻮﻣﺎﺗﯩﻚ ﺩﯨﺌﺎﻟﻮﮔﻼﺭﺩﺍ ﻧﻮﭘﯘﺱ ﻳﯚﺗﻜﻪﺵ ﻣﻪﺳﯩﻠﯩﺴﯩﻨﻰ ﻣﯘﻫﯩﻢ ﻣﻪﺳﯩﻠﻪ ﺳﯜﭘﯩﺘﯩﺪﻩ ﺋﻮﺗﺘﯘﺭﯨﻐﺎ ﻗﻮﻳﯘﺵ ﺗﻪﻛﻠﯩﭙﻰ ﺑﯧﺮﯨﻠﮕﻪﻥ.

ﻣﻪﻟﯘﻡ ﺑﻮﻟﯘﺷﯩﭽﻪ، ﺑﯘ ﻧﯚﯞﻩﺕ ﺋﯧﭽﯩﻠﻐﺎﻥ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﯩﻐﺎ ﯞﺍﻛﺎﻟﻪﺗﺴﯩﺰ ﻣﯩﻠﻠﻪﺗﻠﻪﺭ ﺗﻪﺷﻜﯩﻼﺗﯩﻨﯩﯔ ﭘﻪﺧﺮﯨﻲ ﺭﻩﺋﯩﺴﻰ ﺋﻪﺭﻛﯩﻦ ﺋﺎﻟﯩﭙﺘﯧﻜﯩﻦ ﺋﻪﭘﻪﻧﺪﯨﻤﯘ ﻗﺎﺗﻨﺎﺷﻘﺎﻥ ﯞﻩ ﻳﯧﭙﯩﻠﯩﺶ ﻧﯘﺗﻘﻰ ﺳﯚﺯﻟﯩﮕﻪﻥ.

ﺧﯩﺘﺎﭘﻨﺎﻣﯩﺪﺍ ﺋﻮﺗﺘﯘﺭﯨﻐﺎ ﻗﻮﻳﯘﻟﯩﺸﯩﭽﻪ، ﯞﺍﻛﺎﻟﻪﺗﺴﯩﺰ ﻣﯩﻠﻠﻪﺗﻠﻪﺭ ﺗﻪﺷﻜﯩﻼﺗﻰ 2009 - ﻳﯩﻠﻰ ﻳﻪﻧﻪ، ﻧﯚﯞﻩﺗﺘﯩﻜﻰ ﻧﻮﭘﯘﺱ ﻳﯚﺗﻜﻪﺵ ﺷﻪﻛﯩﻠﻠﯩﺮﻯ ﯞﻩ ﺋﯘﻻﺭﻧﯩﯔ ﺋﯩﻨﺴﺎﻧﯩﻴﻪﺗﻜﻪ ﻛﯚﺭﺳﯩﺘﯩﺪﯨﻐﺎﻥ ﺗﻪﺳﯩﺮﻯ ﻫﻪﻣﺪﻩ ﻧﻮﭘﯘﺱ ﻳﯚﺗﻜﻪﺷﻜﻪ ﺗﺎﻗﺎﺑﯩﻞ ﺗﯘﺭﯗﺷﺘﺎ ﻳﻪﺭﺷﺎﺭﻯ ﺧﺎﺭﺍﻛﺘﯧﺮﻟﯩﻚ ﻫﻪﺭﯨﻜﻪﺕ ﻗﻮﺯﻏﺎﺷﻨﻰ ﻣﻪﻗﺴﻪﺕ ﻗﯩﻠﻐﺎﻥ ﺷﯘﻧﺪﺍﻕ ﺷﻪﻛﯩﻠﺪﯨﻜﻰ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﻰ ﺋﯘﻳﯘﺷﺘﯘﺭﯨﺪﯨﻜﻪﻥ.