ﺋﺎﻣﯧﺮﯨﻜﺎ - ﺧﯩﺘﺎﻱ ﺋﯩﻘﺘﯩﺴﺎﺩﯨﻲ ﯞﻩ ﺧﻪﯞﭘﺴﯩﺰﻟﯩﻚ ﺗﻪﻛﺸﯜﺭﯛﺵ ﻛﻮﻣﯩﺘﯧﺘﻰ ﻳﯩﻠﻠﯩﻖ ﺩﻭﻛﻼﺗﯩﺪﺍ: "ﺑﯧﻴﺠﯩﯔ ﻧﺎﯞﺍﺩﺍ ﺗﻪﻳﯟﻩﻥ - ﺟﯘﯕﮕﻮ ﺋﯘﺭﯗﺷﻰ ﻳﯜﺯ ﺑﯧﺮﯨﭗ ﺋﺎﻣﯧﺮﯨﻜﺎ ﺋﻮﺗﺘﯘﺭﯨﻐﺎ ﭼﯜﺷﺴﻪ، ﺋﺎﻣﯧﺮﯨﻜﯩﻐﺎ ﺗﺎﻗﺎﺑﯩﻞ ﺗﯘﺭﯗﺵ ﺋﯜﭼﯜﻥ ﺩﯦﯖﯩﺰ ﺋﺎﺭﻣﯩﻴﯩﺴﯩﻨﻰ ﻛﯜﭼﻠﻪﻧﺪﯗﺭﯗﯞﺍﺗﯩﺪﯗ،" ﺩﯦﺪﻯ.

ﺩﻭﻛﻼﺗﺘﺎ ﻳﻪﻧﻪ، ﺧﯩﺘﺎﻳﻨﯩﯔ ﻫﺎﺯﯨﺮ ﺋﯩﻨﺘﯧﺮﻧﯧﺖ ﺗﻮﺭﻯ ﺟﺎﺳﯘﺳﻠﯩﻘﻰ ﯞﻩ ﺗﻮﺭ ﺋﯘﺭﯗﺷﻰ ﺋﯩﻘﺘﯩﺪﺍﺭﯨﻨﯩﻤﯘ ﺋﺎﺷﯘﺭﯗﭖ، ﺋﺎﻣﯧﺮﯨﻜﯩﻨﯩﯔ ﺋﯩﻨﺘﯧﺮﻧﯧﺖ ﺗﻮﺭ ﺳﯧﺴﺘﯩﻤﯩﺴﯩﻐﺎ ﺗﻪﻫﺪﯨﺖ ﭘﻪﻳﺪﺍ ﻗﯩﻠﯩﯟﺍﺗﻘﺎﻧﻠﯩﻘﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﺪﻯ ﯞﻩ "ﺧﯩﺘﺎﻱ، ﺟﺎﺳﯘﺳﻠﯘﻕ ﭘﺎﺋﺎﻟﯩﻴﻪﺗﻠﯩﺮﯨﻨﯩﯔ ﻛﯚﻟﯩﻤﻰ، ﺩﻩﺭﯨﺠﯩﺴﻰ ﯞﻩ ﺋﯩﺨﺘﯩﺴﺎﺳﻠﯩﺸﯩﺸﯩﻨﻰ ﻛﯜﻧﺪﯨﻦ - ﻛﯜﻧﮕﻪ ﺋﺎﺷﯘﺭﻣﺎﻗﺘﺎ،" ﺩﻩﭖ ﺋﻪﺳﻜﻪﺭﺗﺘﻰ.

ﺋﺎﻣﯧﺮﯨﻜﺎ - ﺧﯩﺘﺎﻱ ﺋﯩﻘﺘﯩﺴﺎﺩﯨﻲ ﯞﻩ ﺧﻪﯞﭘﺴﯩﺰﻟﯩﻚ ﺗﻪﻛﺸﯜﺭﯛﺵ ﻛﻮﻣﯩﺘﯧﺘﻰ 2000 - ﻳﯩﻠﻰ ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﻰ ﺗﺎﺭﻣﯩﻘﯩﺪﺍ ﻗﯘﺭﯗﻟﻐﺎﻥ ﺑﯩﺮ ﺋﻮﺭﮔﺎﻥ ﺑﻮﻟﯘﭖ، ﺋﺎﻣﯧﺮﯨﻜﯩﻨﯩﯔ ﺧﯩﺘﺎﻱ ﺑﯩﻠﻪﻥ ﻛﯜﻧﺴﺎﻳﯩﻦ ﺋﯧﺸﯩﭗ ﺑﯧﺮﯨﯟﺍﺗﻘﺎﻥ ﺗﯩﺠﺎﺭﯨﺘﯩﻨﯩﯔ ﺧﻪﯞﭘﺴﯩﺰﻟﯩﻜﻜﻪ ﺑﻮﻟﻐﺎﻥ ﺗﻪﺳﯩﺮﻯ ﺋﯜﺳﺘﯩﺪﻩ ﺗﻪﻛﺸﯜﺭﯛﺵ ﺋﯧﻠﯩﭗ ﺑﺎﺭﯨﺪﯗ. "ﺏ ﺏ ﺱ" ﻧﯩﯔ ﺩﯨﻴﯩﺸﭽﻪ، ﺑﯘ ﻗﯧﺘﯩﻤﻠﯩﻖ ﺩﻭﻛﻼﺗﺘﺎ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ ﻣﻪﺳﯩﻠﯩﻠﻪﺭ ﺑﯘ ﻫﻪﻳﺌﻪﺗﻨﯩﯔ ﺑﺎﻟﺪﯗﺭﻗﻰ ﻳﯩﻠﻼﺭﺩﺍ ﺋﯧﻼﻥ ﻗﯩﻠﻐﺎﻥ ﺩﻭﻛﻼﺗﻠﯩﺮﯨﺪﯨﻜﯩﺪﯨﻦ ﻧﻪﭼﭽﻪ ﻫﻪﺳﺴﻪ ﺟﯩﺪﺩﯨﻲ ﺋﯩﻜﻪﻥ.

ﺋﻪﻣﻤﺎ، ﺧﯩﺘﺎﻳﻨﯩﯔ ﺋﺎﻣﯧﺮﯨﻜﯩﺪﺍ ﺗﯘﺭﯗﺷﻠﯘﻕ ﺋﻪﻟﭽﯩﺨﺎﻧﯩﺴﯩﻨﯩﯔ ﺑﺎﻳﺎﻧﺎﺗﭽﯩﺴﻰ ﯞﺍﯓ ﺑﺎﯞﺩﯗﯓ ﺩﻭﻛﻼﺗﺘﺎ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻧﻼﺭﻧﻰ ﺋﯩﻨﻜﺎﺭ ﻗﯩﻠﯩﭗ، ﺋﯘﻧﯩﯔ "ﺳﻮﻏﯘﻕ ﺋﯘﺭﯗﺵ ﭼﯜﺷﻰ" ﺋﯩﻜﻪﻧﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﺩﻯ.