ﺩﻭﻟﻪﺕ ﻣﻪﺟﻠﯩﺴﯩﺪﯨﻜﻰ ﺩﯦﻤﻮﻛﺮﺍﺗﯩﻚ ﯞﻩ ﺟﯘﻣﻬﯘﺭﯨﻴﻪﺗﭽﻰ ﺋﻪﺯﺍﻻﺭ ﭘﺮﯦﺰﯨﺪﯦﻨﺖ ﺋﻮﺑﺎﻣﺎﻧﯩﯔ ﺧﯩﺘﺎﻳﺪﯨﻦ ﺧﻪﻟﻖ ﭘﯘﻟﯩﻨﯩﯔ ﻗﯩﻤﻤﯩﺘﯩﻨﻰ ﺋﻪﺭﻛﯩﻦ ﻗﻮﻳﯘﯞﯦﺘﯩﺸﻜﻪ ﻣﯘﻧﺎﺳﯩﯟﻩﺗﻠﯩﻚ ﻫﯧﭽﻘﺎﻧﺪﺍﻕ ﯞﻩﺩﻩ ﺋﺎﻻﻟﻤﯩﻐﺎﻧﻠﯩﻘﯩﻨﻰ ﺋﻪﺳﻜﻪﺭﺗﯩﭗ، ﺋﺎﻣﯧﺮﯨﻜﺎ ﺳﻮﺩﺍ ﻣﯩﻨﯩﺴﺘﯩﺮﻟﯩﻘﯩﻨﻰ "ﺧﯩﺘﺎﻳﻨﯩﯔ ﭘﯘﻝ -ﻣﯘﺋﺎﻣﯩﻠﻪ ﻣﺎﻧﺎﭘﻮﻟﯩﻴﯩﺴﻰ"ﺋﯜﺳﺘﯩﺪﯨﻦ ﺗﻪﻛﺸﯜﺭﯛﺵ ﺋﯧﻠﯩﭗ ﺑﯧﺮﯨﺸﻘﺎ ﭼﺎﻗﯩﺮﻏﺎﻥ.

ﺋﺎﻣﯧﺮﯨﻜﺎ ﺩﯦﻤﻮﻛﺮﺍﺗﯩﻚ ﻛﯧﯖﻪﺵ ﭘﺎﻻﺗﺎ ﺋﻪﺯﺍﺳﻰ ﭼﺎﺭﻟﯩﺲ ﺷﯘﻣﯩﺮ ﯞﻩ ﺟﯘﻣﻬﯘﺭﯨﻴﻪﺗﭽﻰ ﻛﯧﯖﻪﺵ ﭘﺎﻻﺗﺎ ﺋﻪﺯﺍﺳﻰ ﻟﯩﻨﺪﺳﯧﻲ ﮔﺮﺍﺧﺎﻣﻼﺭﻧﯩﯔ ﺋﺎﻣﯧﺮﯨﻜﺎ ﺳﻮﺩﺍ ﻣﯩﻨﯩﺴﺘﯩﺮﻟﯩﻘﯩﻐﺎ ﻳﺎﺯﻏﺎﻥ ﺑﯘ ﻫﻪﻗﺘﯩﻜﻰ ﺧﯧﺘﯩﺪﻩ " ﺋﻪﮔﻪﺭ ﺳﻮﺩﺍ ﻣﯩﻨﯩﺴﺘﯩﺮﻟﯩﻘﻰ ﺧﯩﺘﺎﻱ ﻳﻮﻟﻐﺎ ﻗﻮﻳﻐﺎﻥ ﭘﯘﻝ ﺳﯩﻴﺎﺳﯩﺘﯩﻨﯩﯔ ﺧﻪﻟﻘﺌﺎﺭﺍ ﻛﯧﻠﯩﺸﯩﻤﮕﻪ ﺧﯩﻼﭖ ﻗﻮﺷﯘﻣﭽﻪ ﻳﺎﺭﺩﻩﻡ ﺋﯩﻜﻪﻧﻠﯩﻜﯩﻨﻰ ﺑﺎﻳﻘﯩﺴﺎ، ﺧﯩﺘﺎﻳﻐﺎ ﺋﯧﻐﯩﺮ ﺟﺎﺯﺍ ﻗﻮﻳﯘﻟﯘﺷﻰ ﻣﯘﻣﻜﯩﻦ" ﺩﯨﮕﻪﻥ.

ﺧﻪﻟﻖ ﭘﯘﻟﯩﻨﯩﯔ ﻗﯩﻤﻤﯩﺘﻰ ﻣﻪﺳﯩﻠﯩﺴﻰ ﭘﺮﯦﺰﯨﺪﯦﻨﺖ ﺋﻮﺑﺎﻣﺎﻧﯩﯔ ﺑﯘ ﻗﯧﺘﯩﻤﻘﻰ ﺧﯩﺘﺎﻱ ﺯﯨﻴﺎﺭﯨﺘﯩﺪﻩ ﺗﻪﺭﻩﭘﻠﻪﺭ ﻛﯧﻠﯩﺸﻪﻟﻤﯩﮕﻪﻥ ﻣﻪﺳﯩﻠﯩﻠﻪﺭﻧﯩﯔ ﺑﯩﺮﻯ ﺋﯩﺪﻯ. ﺋﻮﺑﺎﻣﺎ ﻫﯚﻛﯜﻣﯩﺘﻰ ﺑﯘﺵ ﻫﯚﻛﯜﻣﯩﺘﯩﻨﯩﯔ ﻣﻪﺯﻛﯘﺭ ﻣﻪﺳﯩﻠﯩﺪﯨﻜﻰ ﻣﻪﻳﺪﺍﻧﯩﻨﻰ ﺩﺍﯞﺍﻣﻼﺷﺘﯘﺭﯗﭖ، ﺧﯩﺘﺎﻳﻨﻰ ﭘﯘﻝ ﻗﯩﻤﻤﯩﺘﯩﻨﻰ ﻛﻮﻧﺘﺮﻭﻝ ﻗﯩﻠﯩﯟﺍﺗﻘﺎﻥ ﺩﯙﻟﻪﺕ، ﺩﻩﭖ ﺋﯧﻼﻥ ﻗﯩﻠﯩﺸﻨﻰ ﺭﻩﺕ ﻗﯩﻠﯩﭗ ﻛﻪﻟﺪﻯ.

ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﯩﻨﯩﯔ ﻗﺎﺭﻣﯩﻘﯩﺪﯨﻜﻰ ﺋﺎﻣﯧﺮﯨﻜﺎ - ﺧﯩﺘﺎﻱ ﺋﯩﻘﺘﯩﺴﺎﺩﻯ ﯞﻩ ﺑﯩﺨﻪﺗﻪﺭﻟﯩﻚ ﻛﯚﺯﯨﺘﯩﺶ ﻛﻮﻣﯩﺘﯧﺘﻰ ﭘﻪﻳﺸﻪﻧﺒﻪ ﻛﯜﻧﻰ ﺋﯧﻼﻥ ﻗﯩﻠﻐﺎﻥ ﺧﯩﺘﺎﻱ ﻫﻪﻗﻘﯩﺪﯨﻜﻰ ﺩﻭﻛﻼﺗﺘﺎ، ﺧﯩﺘﺎﻳﻨﯩﯔ ﭘﯘﻝ ﻗﯩﻤﻤﯩﺘﯩﻨﻰ ﻛﻮﻧﺘﺮﻭﻝ ﻗﯩﻠﯩﺶ ﺳﯩﻴﺎﺳﯩﺘﯩﻨﯩﯔ ﺋﺎﻣﯧﺮﯨﻜﺎ ﺋﯩﻘﺘﯩﺴﺎﺩﯨﻐﺎ ﻛﯚﺭﺳﯩﺘﯩﯟﺍﺗﻘﺎﻥ ﺗﻪﺳﯩﺮﯨﻨﻰ ﺋﺎﺯﺍﻳﺘﯩﺪﯨﻐﺎﻥ ﻗﺎﻧﯘﻥ ﭼﯩﻘﯩﺮﯨﺸﻨﻰ ﺗﻪﻛﻠﯩﭗ ﻗﯩﻠﻐﺎﻥ.