ﺋﯘﻳﻐﯘﺭ > خەۋەرلەر > ﺑﯜﮔﯜﻧﻜﻰ ﻗﯩﺴﻘﺎ ﺧﻪﯞﻩﺭﻟﻪﺭ

ﺧﯘ ﺟﯩﻴﺎﻧﯩﯔ ﺭﻩﭘﯩﻘﯩﺴﻰ ﻫﯚﻛﯜﻣﻪﺗﻨﯩﯔ ﺗﻪﻫﺪﯨﺘﯩﮕﻪ ﺋﯘﭼﺮﯨﺸﯩﺪﯨﻦ ﺋﻪﻧﺪﯨﺸﻪ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ

ﻣﯘﺧﺒﯩﺮﯨﻤﯩﺰ ﺟﯜﻣﻪ

2008-10-10

ﺑﯘ ﻳﯩﻠﻠﯩﻖ ﻧﻮﺑﯧﻞ ﺗﯩﻨﭽﻠﯩﻖ ﻣﯘﻛﺎﭘﺎﺗﯩﻐﺎ ﻧﺎﻣﺰﺍﺕ ﻛﯚﺭﺳﯩﺘﯩﻠﮕﻪﻥ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﻰ ﺧﯘ ﺟﯩﻴﺎﻧﯩﯔ ﺭﻩﭘﯩﻘﯩﺴﻰ ﺯﯦﯔ ﺟﯩﻨﻴﻪﻥ، ﺧﯩﺘﺎﻳﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﻠﯩﺮﯨﻨﻰ ﺋﻮﭼﯘﻕ ‏ - ﺋﺎﺷﻜﺎﺭﺍ ﺗﻪﻧﻘﯩﺪﻟﻪﺷﻨﻰ ﺩﺍﯞﺍﻣﻼﺷﺘﯘﺭﯨﺪﯨﻐﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﯘ ﻓﺮﺍﻧﺴﯩﻴﻪ ﺋﺎﮔﯧﻨﺘﻠﯩﻘﯩﻐﺎ ﺗﯜﺭﻣﯩﺪﯨﻜﻰ ﺋﯧﺮﻯ ﯞﻩ ﺋﯚﺯﯨﻨﯩﯔ ﺧﯩﺘﺎﻱ ﻫﯚﻛﯜﻣﻪﺕ ﺗﻪﺭﻩﭘﻨﯩﯔ ﺗﻪﻫﺪﯨﺘﯩﮕﻪ ﺋﯘﭼﺮﯨﺸﯩﺪﯨﻦ ﺋﻪﻧﺪﯨﺸﻪ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ.

ﻓﺮﺍﻧﺴﯩﻴﻪ ﺋﺎﮔﯧﻨﺘﻠﯩﻘﯩﺪﺍ ﻧﻪﻗﯩﻞ ﺋﯧﻠﯩﭗ ﺧﻪﯞﻩﺭ ﻗﯩﻠﯩﻨﯩﺸﯩﭽﻪ، ﺯﯦﯔ ﺋﯚﺯﯨﻨﯩﯔ ﺑﯘ ﺋﯩﺸﺘﯩﻦ ﯞﺍﺯ ﻛﻪﭼﻤﻪﻳﺪﯨﻐﺎﻧﻠﯩﻘﯩﻨﻰ ﺋﯧﻴﺘﻘﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﺑﻪﺯﻯ ﯞﺍﻗﯩﺘﻼﺭﺩﺍ ﺋﯚﺯﻯ ﺗﻪﯞﻩﻛﻜﯜﻝ ﻗﯩﻠﯩﯟﺍﺗﻘﺎﻥ ﺧﻪﺗﻪﺭﻧﻰ ﻣﯚﻟﭽﻪﺭﻟﯩﻴﻪﻟﻤﯩﮕﻪﻧﻠﯩﻜﯩﺪﯨﻦ ﺑﻪﺯﯨﺪﻩ ﺋﯩﻜﻜﯩﻠﯩﻨﯩﭗ ﻗﺎﻟﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ.

ﺧﯘ ﺟﯩﻴﺎ ﺗﻮﺭ ﺋﺎﺧﺒﺎﺭﺍﺗﻰ ﯞﻩ ﺑﻠﻮﮒ ﺑﻪﺗﻠﯩﺮﯨﺪﯨﻦ ﭘﺎﻳﺪﯨﻠﯩﻨﯩﭗ ﺧﯩﺘﺎﻳﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﻰ ﯞﻩ ﺋﻪﻳﺪﯨﺰ ﺑﯩﻤﺎﺭﻻﺭﻧﯩﯔ ﻛﻪﻣﺴﯩﺘﯩﻠﯩﺸﻜﻪ ﺋﺎﻻﻗﯩﺪﺍﺭ ﻗﯩﻠﻤﯩﺸﻼﺭﻧﻰ ﺋﯩﺰﭼﯩﻞ ﺋﺎﺷﻜﺎﺭﯨﻼﭖ ﻛﻪﻟﮕﻪﻥ ﺑﻮﻟﻐﺎﭼﻘﺎ، ﺑﯘ ﻳﯩﻞ ﺋﺎﭘﺮﯨﻠﺪﺍ ﺋﺎﻏﺪﯗﺭﻣﯩﭽﯩﻠﯩﻖ ﺟﯩﻨﺎﻳﯩﺘﻰ ﺑﯩﻠﻪﻥ 3 ﻳﯧﺮﯨﻢ ﻳﯩﻠﻠﯩﻖ ﻗﺎﻣﺎﻕ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﯩﻨﻐﺎﻥ ﺋﯩﺪﻯ.

ﺷﯘﻧﯩﯖﺪﯨﻦ ﻛﯩﻴﯩﻦ ﺧﯘ ﻧﯩﯔ ﺭﻩﭘﯩﻘﯩﺴﻰ ﺯﯦﯔ ﺟﯩﻨﻴﻪﻥ ﺋﯩﻨﺘﯧﺮﻧﯧﺖ ﺑﻠﻮﮒ ﺑﻪﺗﻠﯩﺮﯨﺪﯨﻦ ﭘﺎﻳﺪﯨﻠﯩﻨﯩﭗ ﺋﯧﺮﯨﻨﯩﯔ ﺗﯜﺭﻣﯩﮕﻪ ﺗﺎﺷﻠﯩﻨﯩﺸﯩﺪﯨﻜﻰ ﺋﺎﺩﺍﻟﻪﺗﺴﯩﺰﻟﯩﻜﻜﻪ ﻛﯩﺸﯩﻠﻪﺭﻧﯩﯔ ﺩﯨﻘﻘﯩﺘﯩﻨﻰ ﺗﺎﺭﺗﯩﺸﻘﺎ ﺗﯩﺮﯨﺸﭽﺎﻧﻠﯩﻖ ﻛﯚﺭﺳﯩﺘﯩﭗ ﻛﯧﻠﯩﯟﺍﺗﻘﺎﻥ ﺑﻮﻟﯘﭖ، ﺋﯘ ﺑﯘ ﻳﯩﻞ ﺋﺎﯞﻏﯘﺳﺘﺘﯩﻜﻰ ﺑﯧﻴﺠﯩﯔ ﺋﻮﻟﯩﻤﭙﯩﻚ ﻣﻪﺯﮔﯩﻠﯩﺪﻩ ﺋﯩﻜﻜﻰ ﻫﻪﭘﺘﻪ ﻧﻪﺯﻩﺭ ﺑﻪﻧﺖ ﺋﺎﺳﺘﯩﻐﺎ ﺋﯧﻠﯩﻨﻐﺎﻥ ﺋﯩﺪﻯ.