ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ 5 ‏- ﺋﯩﻴﯘﻝ ﺋﯜﺭﯛﻣﭽﻰ ﯞﻩﻗﻪﺳﯩﺪﻩ ﺋﻮﻗﻘﺎ ﺗﯘﺗﯘﻟﯘﭖ ﻳﺎﺭﯨﻼﻧﻐﺎﻥ ﺋﯘﻳﻐﯘﺭ ﻳﺎﺷﻠﯩﺮﯨﻨﯩﯔ ﻗﻮﻟﻐﺎ ﺋﯧﻠﯩﻨﻐﺎﻧﻠﯩﻘﯩﻨﻰ، ﺑﯘ ﻳﺎﺷﻼﺭﻧﯩﯔ ﺩﻭﺧﺘﯘﺭﻻﺭ ﺗﻪﺭﯨﭙﯩﺪﯨﻦ ﺋﺎﺷﻜﺎﺭﯨﻠﯩﻨﯩﭗ ﺗﯘﺗﯘﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﻣﻪﻛﺘﻪ.

ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺑﺎﻳﺎﻧﺎﺗﭽﯩﺴﻰ ﺩﯨﻠﺸﺎﺕ ﺭﯦﺸﯩﺖ ﺋﻪﭘﻪﻧﺪﯨﻨﯩﯔ ﺋﯧﻴﺘﯩﺸﯩﭽﻪ، ﻗﻪﺷﻘﻪﺭ ﻛﯧﺮﻩﻣﺒﺎﻍ ﺩﻭﺧﺘﯘﺭﺧﺎﻧﯩﺴﻰ ﯞﻩ ﻳﻪﻛﻪﻥ ﻧﺎﻫﯩﻴﯩﻠﯩﻚ ﻣﯩﻠﻠﯩﻲ ﺗﯩﺒﺎﺑﻪﺕ ﺩﻭﺧﺘﯘﺭﺧﺎﻧﯩﺴﯩﻨﯩﯔ ﺩﻭﺧﺘﯘﺭﻟﯩﺮﻯ، 5 ‏- ﺋﯩﻴﯘﻝ ﺋﯜﺭﯛﻣﭽﻰ ﯞﻩﻗﻪﺳﯩﺪﻩ ﺋﻮﻕ ﺗﻪﻛﻜﻪﻥ ﺋﯘﻳﻐﯘﺭﻻﺭﺩﯨﻦ ﺑﯩﺮ ﻗﺎﻧﭽﯩﺴﯩﻨﻰ ﺧﯩﺘﺎﻱ ﺳﺎﻗﭽﻰ ﺗﺎﺭﻣﺎﻗﻠﯩﺮﯨﻐﺎ ﺗﯘﺗﯘﭖ ﺑﻪﺭﮔﻪﻥ.

ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﻨﯩﯔ ﺑﺎﺷﻠﯩﻘﻰ ﺋﯜﻣﯩﺪ ﺋﺎﮔﺎﻫﻰ ﺋﻪﭘﻪﻧﺪﻯ، ﺗﻪﺗﻘﯩﻘﺎﺕ ﻣﻪﺭﻛﯩﺰﻯ ﺗﻪﺭﯨﭙﯩﺪﯨﻦ ﻗﻮﻟﻐﺎ ﭼﯜﺷﯜﺭﯛﻟﮕﻪﻥ ﺋﯩﺸﻪﻧﭽﻠﯩﻚ ﻣﻪﻟﯘﻣﺎﺗﻼﺭﻏﺎ ﺋﺎﺳﺎﺳﻠﯩﻨﯩﭗ، 5 ‏- ﺋﯩﻴﯘﻝ ﺋﯜﺭﯛﻣﭽﻰ ﯞﻩﻗﻪﺳﯩﺪﻩ ﻫﻪﻗﯩﻘﻪﺗﻪﻥ ﺩﻭﺧﺘﯘﺭﻻﺭﻧﯩﯔ، ﻳﺎﺭﯨﻼﻧﻐﺎﻥ ﺋﯘﻳﻐﯘﺭ ﻳﺎﺷﻠﯩﺮﯨﻨﻰ ﺧﯩﺘﺎﻱ ﺳﺎﻗﭽﻰ ﺗﺎﺭﻣﺎﻗﻠﯩﺮﯨﻐﺎ ﺗﯘﺗﯘﭖ ﺑﻪﺭﮔﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﺋﯚﺗﻜﻪﻥ ﻳﯩﻠﻰ 5 ‏- ﺋﯩﻴﯘﻝ ﺋﯜﺭﯛﻣﭽﻰ ﯞﻩﻗﻪﺳﻰ ﻳﯜﺯ ﺑﻪﺭﮔﻪﻧﺪﻩ، ﺧﯩﺘﺎﻱ ﻫﯚﻛﯜﻣﯩﺘﻰ ﺗﯧﻠﯧﻔﻮﻧﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ ﺑﺎﺭﻟﯩﻖ ﺋﯘﭼﯘﺭ ﯞﺍﺳﺘﯩﻠﯩﺮﯨﻨﻰ ﭘﯜﺗﯜﻧﻠﻪﻱ ﻗﺎﻣﺎﻝ ﻗﯩﻠﯩﯟﺍﻟﻐﺎﻧﻠﯩﻘﻰ ﺋﯜﭼﯜﻥ، ﺑﯩﺰ ﺑﯘ ﻫﻪﻗﺘﻪ ﺋﯘﭼﯘﺭ ﺋﯧﻠﯩﺸﻘﺎ ﺋﺎﻣﺎﻟﺴﯩﺰ ﻗﺎﻟﻐﺎﻥ ﺋﯩﺪﯗﻕ.

ﻳﺎﺭﯨﻼﻧﻐﺎﻥ ﺋﯘﻳﻐﯘﺭ ﻳﺎﺷﻠﯩﺮﯨﻨﯩﯔ ﻫﻪﻗﯩﻘﻪﺗﻪﻥ ﺩﻭﺧﺘﯘﺭﻻﺭ ﺗﻪﺭﯨﭙﯩﺪﯨﻦ ﺗﯘﺗﯘﭖ ﺑﯧﺮﯨﻠﮕﻪﻧﻠﯩﻜﯩﮕﻪ ﺋﯩﺴﭙﺎﺕ ﺗﯧﭙﯩﺶ ﺋﯜﭼﯜﻥ ﺑﯩﺰ ﻗﻪﺷﻘﻪﺭ ﻛﯧﺮﻩﻣﺒﺎﻍ ﺩﻭﺧﺘﯘﺭﺧﺎﻧﯩﺴﯩﻐﺎ ﯞﻩ ﻳﻪﻛﻪﻥ ﻧﺎﻫﯩﻴﯩﻠﯩﻚ ﻣﯩﻠﻠﯩﻲ ﺗﯩﺒﺎﺑﻪﺕ ﺩﻭﺧﺘﯘﺭﺧﺎﻧﯩﺴﯩﻐﺎ ﺗﯧﻠﯧﻔﯘﻥ ﺋﯘﺭﺩﯗﻕ. ﺋﻪﻣﻤﺎ ﻗﺎﻧﭽﻪ ﻛﯚﭖ ﺗﯩﺮﯨﺸﻘﺎﻥ ﺑﻮﻟﺴﺎﻗﻤﯘ ﺑﯘ ﺩﻭﺧﺘﯘﺭﺧﺎﻧﯩﻼﺭﺩﯨﻦ ﺑﯩﺰﮔﻪ ﺟﺎﯞﺍﺏ ﺑﯧﺮﯨﺪﯨﻐﺎﻥ ﺋﺎﺩﻩﻡ ﭼﯩﻘﻤﯩﺪﻯ.

ﺗﯧﻠﯧﻔﻮﻧﯩﻤﯩﺰﻏﺎ ﺗﺎﺳﺎﺩﯨﭙﯩﻲ ﺋﯘﻟﯘﻧﯘﭖ ﻗﺎﻟﻐﺎﻥ ﻳﻪﻛﻪﻧﺪﯨﻜﻰ ﺑﯩﺮ ﻗﯩﺰ ﺋﻮﻗﯘﻏﯘﭼﻰ، ﻗﻪﺷﻘﻪﺭﺩﯨﻜﻰ ﺑﯩﺮ ﺋﯘﻳﻐﯘﺭ ﺋﺎﺋﯩﻠﯩﺴﻰ ﺷﯘﻧﯩﯖﺪﻩﻙ ﺑﯩﺮ ﺑﯩﻤﺎﺭ ﺑﯩﻠﻪﻥ ﺳﯚﻫﺒﻪﺕ ﺋﯚﺗﻜﯜﺯﺩﯗﻕ.

ﺑﯩﺰ ﺋﯘﻻﺭﺩﯨﻦ ﺋﯧﺮﯨﺸﻤﻪﻛﭽﻰ ﺑﻮﻟﻐﺎﻥ ﺟﺎﯞﺍﺑﻨﻰ ﺋﺎﻻﻟﻤﯩﻐﺎﻥ ﺑﻮﻟﺴﺎﻗﻤﯘ، ﺋﻪﻣﻤﺎ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺑﯘ ﺟﺎﻳﻼﺭﺩﺍ ﺑﯩﺨﻪﺗﻪﺭﻟﯩﻚ ﺗﻪﺩﺑﯩﺮﻟﯩﺮﯨﻨﻰ ﺩﺍﯞﺍﻣﻠﯩﻖ ﻛﯜﭼﻪﻳﺘﯩﯟﺍﺗﻘﺎﻧﻠﯩﻘﻰ ﻫﻪﻣﺪﻩ ﻛﯩﺸﯩﻠﻪﺭﻧﯩﯔ ﺳﻪﺯﮔﯜﺭ ﻣﻪﺳﯩﻠﯩﻠﻪﺭﺩﯨﻦ ﯞﻩ ﺳﯩﻴﺎﺳﯩﻲ ﯞﻩﺯﯨﻴﻪﺗﺘﯩﻦ ﻗﺎﻧﭽﯩﻠﯩﻚ ﺑﯩﺰﺍﺭ ﺑﻮﻟﻐﺎﻧﻠﯩﻘﻰ ﺑﯩﺰ ﺋﯧﻠﯩﭗ ﺑﺎﺭﻏﺎﻥ ﺳﯚﻫﺒﻪﺗﻠﻪﺭﺩﯨﻦ ﺋﯧﻨﯩﻖ ﺋﺎﺷﻜﺎﺭﯨﻼﻧﺪﻯ.

ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﻨﯩﯔ ﺑﺎﺷﻠﯩﻘﻰ ﺋﯜﻣﯩﺪ ﺋﺎﮔﺎﻫﻰ ﺋﻪﭘﻪﻧﺪﻯ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺑﯧﺴﯩﻤﻰ ﺋﺎﺳﺘﯩﺪﺍ، ﻧﯚﯞﻩﺗﺘﻪ ﺋﯘﻳﻐﯘﺭﻻﺭﻧﯩﯔ ﻳﯜﺯ ﺑﻪﺭﮔﻪﻥ ﻫﻪﻗﯩﻘﻪﺗﻨﻰ ﻫﯧﭽﻘﺎﭼﺎﻥ ﻗﻮﺭﻗﻤﺎﺳﺘﯩﻦ ﺑﺎﻳﺎﻥ ﻗﯩﻼﻟﻤﺎﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﻗﻪﺷﻘﻪﺭ ﺷﻪﻫﻪﺭﻟﯩﻚ ﺳﺎﻗﭽﻰ ﺋﯩﺪﺍﺭﯨﺴﯩﺪﯨﻜﻰ ﺑﯩﺮ ﺧﺎﺩﯨﻤﻐﺎ ﺗﯧﻠﯧﻔﯘﻧﯩﻤﯩﺰ ﺋﯘﻻﻧﻐﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﯘﻣﯘ ﺳﻮﺋﺎﻟﯩﻤﯩﺰ ﺋﺎﺧﯩﺮﻻﺷﻤﺎﻱ ﺗﯘﺭﯗﭖ ﺗﯧﻠﯧﻔﯘﻥ ﺗﯘﺭﯗﭘﻜﯩﺴﯩﻨﻰ ﻗﻮﻳﯘﯞﻩﺗﺘﻰ.

ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﻴﻰ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﻨﯩﯔ ﺑﺎﺷﻠﯩﻘﻰ ﺋﯜﻣﯩﺪ ﺋﺎﮔﺎﻫﻰ ﺋﻪﭘﻪﻧﺪﻯ، ﺳﺎﻗﭽﯩﻠﯩﻖ ﯞﻩﺯﯨﭙﯩﺴﻰ ﺋﯚﺗﻪﯞﺍﺗﻘﺎﻥ ﺋﯘﻳﻐﯘﺭﻻﺭﻧﯩﯔ ﻫﺎﺯﯨﺮﻗﻰ ﯞﻩﺯﯨﻴﯩﺘﯩﻨﻰ ﺗﻮﻧﯘﺷﺘﯘﺭﺩﻯ.

ﻳﯘﻗﯩﺮﯨﺪﯨﻜﻰ ﺋﺎﯞﺍﺯ ﺋﯘﻟﯩﻨﯩﺸﯩﺪﯨﻦ، ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﯩﻤﯩﺰﻧﯩﯔ ﺗﻪﭘﺴﯩﻼﺗﯩﻨﻰ ﺋﺎﯕﻼﻳﺴﯩﻠﻪﺭ.