ﺋﺎﻣﯧﺮﯨﻜﯩﺪﯨﻜﻰ ﻳﯩﺮﯨﻚ ﺗﻪﺗﻘﯩﻘﺎﺕ ﺋﻮﺭﮔﺎﻧﻠﯩﺮﯨﻨﯩﯔ ﺑﯩﺮﻯ ﺑﻮﻟﻐﺎﻥ "ﻣﯩﺮﺍﺱ ﻓﻮﻧﺪﻯ ﺟﻪﻣﺌﯩﻴﯩﺘﻰ" ﭘﻪﻳﺸﻪﻧﺒﻪ ﻛﯜﻧﻰ ﻳﯩﻐﯩﻦ ﭼﺎﻗﯩﺮﯨﭗ، ﺧﯩﺘﺎﻳﺪﯨﻜﻰ ﻣﯩﻠﻠﯩﻲ ﯞﻩ ﺩﯨﻨﯩﻲ ﻣﻪﺳﯩﻠﯩﻠﻪﺭﻧﻰ ﻫﻪﻝ ﻗﯩﻠﯩﺶ ﭼﺎﺭﯨﺴﻰ ﺋﯜﺳﺘﯩﺪﻩ ﻣﯘﺗﻪﺧﻪﺳﺴﯩﺲ، ﺩﯨﻨﯩﻲ ﺯﺍﺕ ﯞﻩ ﺳﯩﻴﺎﺳﻰ ﭘﺎﺋﺎﻟﯩﻴﻪﺗﭽﯩﻠﻪﺭﻧﯩﯔ ﭘﯩﻜﯩﺮﯨﻨﻰ ﺋﺎﻟﺪﻯ.

ﺋﺎﻣﯧﺮﯨﻜﯩﺪﯨﻜﻰ ﻳﯩﺮﯨﻚ ﺋﯩﻠﻤﯩﻲ ﺗﻪﺗﻘﯩﻘﺎﺕ ﺋﻮﺭﮔﺎﻧﻠﯩﺮﯨﻨﯩﯔ ﺑﯩﺮﻯ- ﻣﯩﺮﺍﺱ ﻓﻮﻧﺪﻯ ﺟﻪﻣﺌﯩﻴﯩﺘﯩﻨﯩﯔ ﺋﯘﻳﯘﺷﺘﯘﺭﯗﺷﯩﺪﯨﻜﻰ ﭘﻪﻳﺸﻪﻧﺒﻪ ﻛﯜﻧﻜﻰ ﻳﯩﻐﯩﻦ "ﺧﯩﺘﺎﻳﺪﺍ ﺩﯨﻨﯩﻲ ﺋﻪﺭﻛﯩﻨﻠﯩﻚ ﯞﻩ ﻣﯩﻠﻠﻰ ﻣﻪﺳﯩﻠﯩﻠﻪﺭ -- ﻳﯧﯖﻰ ﺋﯘﺳﯘﻟﺪﯨﻜﻰ ﻫﻪﻝ ﻗﯩﻠﯩﺶ ﭼﺎﺭﯨﺴﻰ ﺗﯧﭙﯩﺸﻨﯩﯔ ﺯﺍﻣﺎﻧﻰ " ﺩﯦﮕﻪﻥ ﺗﯧﻤﯩﺪﺍ ﺋﯚﺗﻜﯜﺯﯛﻟﺪﻯ.

ﺑﯘ ﻳﯩﻐﯩﻦ، 2008 ‏- ﻳﯩﻠﻰ ﻟﺨﺎﺳﺎ ﯞﻩﻗﻪﺳﻰ ﯞﻩ ﺑﯘ ﻳﯩﻞ 5 ‏- ﺋﯩﻴﯘﻟﺪﺍ ﺋﯜﺭﯛﻣﭽﻰ ﯞﻩﻗﻪﺳﻰ ﻳﯜﺯ ﺑﯧﺮﯨﭗ، ﺧﯩﺘﺎﻳﺪﯨﻜﻰ ﻣﯩﻠﻠﯩﻲ ﻣﻪﺳﯩﻠﻪ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻨﯩﯔ ﺩﯨﻘﻘﯩﺘﯩﻨﻰ ﻗﻮﺯﻏﯩﻐﺎﻥ ﻣﻪﺯﮔﯩﻠﺪﻩ ﭼﺎﻗﯩﺮﯨﻠﻐﺎﻥ ﺑﻮﻟﯘﭖ، ﻳﯩﻐﯩﻨﻨﯩﯔ ﻣﻪﻗﺴﯩﺘﻰ ﻣﯘﺗﻪﺧﻪﺳﺴﯩﺴﻠﻪﺭ، ﺳﯩﻴﺎﺳﻰ ﭘﺎﺋﺎﻟﯩﻴﻪﺗﭽﯩﻠﻪﺭ ﯞﻩ ﺩﯨﻨﯩﻲ ﺯﺍﺗﻼﺭﻧﯩﯔ ﺑﯘ ﻣﻪﺳﯩﻠﯩﺪﯨﻜﻰ ﭘﯩﻜﯩﺮﯨﻨﻰ ﺋﯧﻠﯩﺶ، ﺑﯘ ﻣﻪﺳﯩﻠﯩﻨﻰ ﻫﻪﻝ ﻗﯩﻠﯩﺸﻨﯩﯔ ﭼﺎﺭﻩ ‏- ﺗﻪﺩﺑﯩﺮﻯ ﺋﯜﺳﺘﯩﺪﻩ ﺋﯩﺰﺩﯨﻨﯩﺶ ﺋﯩﺪﻯ.

ﻳﯩﻐﯩﻨﺪﺍ ﻛﻮﻣﻤﯘﻧﯩﺰﻡ ﻗﯘﺭﺑﺎﻧﻠﯩﺮﻯ ﺧﺎﺗﯩﺮﻩ ﻓﻮﻧﺪ ﺟﻪﻣﺌﯩﻴﯩﺘﯩﻨﯩﯔ ﺭﻩﺋﯩﺴﻰ ﺩﻭﻛﺘﻮﺭ ﻟﯧﯥ ﺋﯧﺪﯞﺍﺭﺩﺱ، ﺧﯩﺘﺎﻱ ﺋﺎﺳﺎﺳﯩﻲ ﻗﺎﻧﯘﻧﯩﺪﺍ ﭘﯘﻗﺮﺍﻻﺭﻧﯩﯔ ﺩﯨﻨﯩﻲ ﺋﻪﺭﻛﯩﻨﻠﯩﻚ ﻫﻮﻗﯘﻗﻰ ﻛﺎﭘﺎﻟﻪﺗﻜﻪ ﺋﯩﮕﻪ ﻗﯩﻠﯩﻨﻐﺎﻧﻠﯩﻘﯩﻨﻰ، ﻟﯧﻜﯩﻦ ﺑﯘ ﻫﻮﻗﯘﻗﻨﻰ ﻗﺎﭼﺎﻥ، ﻗﻪﻳﻪﺭﺩﻩ، ﻗﺎﻧﺪﺍﻕ ﺋﯩﺸﻠﯩﺘﯩﺸﻨﻰ ﺩﯨﻨﻰ ﻣﯘﺧﻠﯩﺴﻼﺭ ﺋﻪﻣﻪﺱ، ﻫﯚﻛﯜﻣﻪﺕ ﻗﺎﺭﺍﺭ ﻗﯩﻠﯩﺪﯨﻐﺎﻧﻠﯩﻘﯩﻨﻰ، ﺧﯩﺘﺎﻳﻨﯩﯔ ﺩﯨﻨﯩﻲ ﺋﻪﺭﻛﯩﻨﻠﯩﻚ ﺩﻩﭘﺴﻪﻧﺪﯨﭽﯩﻠﯩﻜﻰ ﭼﻮﻗﯘﻡ ﺋﻮﺗﺘﯘﺭﯨﻐﺎ ﻗﻮﻳﯘﺷﻘﺎ ﺗﯧﮕﯩﺸﻠﯩﻚ ﻣﻪﺳﯩﻠﻪ ﺑﻮﻟﯘﭖ ﻗﺎﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺋﯘ 1999": ‏- ﻳﯩﻠﺪﯨﻦ ﺑﺎﺷﻼﭖ ﺋﺎﻣﯧﺮﯨﻜﺎ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﺧﻪﻟﻘﺌﺎﺭﺍ ﺩﯨﻨﯩﻲ ﺋﻪﺭﻛﯩﻨﻠﯩﻚ ﻗﺎﻧﯘﻧﯩﻐﺎ ﺋﺎﺳﺎﺳﻪﻥ ﺧﯩﺘﺎﻳﻨﻰ ﺋﺎﻻﻫﯩﺪﻩ ﺩﯨﻘﻘﻪﺕ ﻗﯩﻠﯩﺪﯨﻐﺎﻥ ﺩﯙﻟﻪﺗﻠﻪﺭ ﺗﯩﺰﯨﻤﻠﯩﻜﯩﮕﻪ ﻛﯩﺮﮔﯜﺯﺩﻯ. ﺑﯘ ﻧﯧﻤﻪ ﺋﯜﭼﯜﻥ ؟ ﭼﯜﻧﻜﻰ ﺧﯩﺘﺎﻱ ﺩﯨﻨﯩﻲ ﺋﻪﺭﻛﯩﻨﻠﯩﻜﻜﻪ ﺋﯧﻐﯩﺮ ﺩﻩﺭﯨﺠﯩﺪﻩ ﺧﯩﻼﭘﻠﯩﻖ ﻗﯩﻠﻐﺎﻧﻠﯩﻘﻰ ﺋﯜﭼﯜﻧﺪﯗﺭ. ﺧﯩﺘﺎﻳﺪﺍ ﺩﯨﻨﯩﻲ ﺋﻪﺭﻛﯩﻨﻠﯩﻚ ﺩﻩﭘﺪﻩﻧﺪﻩ ﻗﯩﻠﯩﻨﯩﺶ ﯞﻩﻗﻪﺳﻰ ﻛﯩﺸﯩﻨﻰ ﭼﯚﭼﯩﺘﯩﺪﯨﻐﺎﻥ ﺑﯩﺮ ﺋﻪﻫﯟﺍﻟﺪﺍ. ﺑﯘ ﻣﻪﺳﯩﻠﻪ ﺋﻮﺗﺘﯘﺭﯨﻐﺎ ﻗﻮﻳﯘﺵ ﺯﯙﺭﯛﺭ ﺑﯩﺮ ﻣﻪﺳﯩﻠﻪ. ﺑﯘﻧﻰ ﻛﯚﺭﻣﻪﺳﻠﯩﻜﻪ ﺳﯧﻠﯩﺸﻘﺎ ﻳﺎﻛﻰ ﺋﯘﻧﻰ ﻛﯩﭽﯩﻜﻠﯩﺘﯩﺸﻜﻪ ﺑﻮﻟﻤﺎﻳﺪﯗ. ﺑﯘ ﻣﻪﺳﯩﻠﻪ ﻳﻪﻧﻪ ﺋﯩﻘﺘﯩﺴﺎﺩﻯ ﯞﻩ ﺳﯩﻴﺎﺳﻰ ﺳﻪﯞﻩﺑﻠﻪﺭﻧﯩﯔ ﻛﯚﻟﻪﯕﮕﯜﺳﯩﺪﻩ ﻗﺎﻟﺴﺎ ﺑﻮﻟﻤﺎﻳﺪﯗ" ﺩﻩﭖ ﻛﯚﺭﺳﻪﺗﺘﻰ.

ﻳﯩﻐﯩﻨﺪﺍ ﺩﻭﻛﻼﺕ ﺑﻪﺭﮔﻪﻥ ﺯﺍﺗﻼﺭﻧﯩﯔ ﺑﯩﺮﻯ ﺋﯘﻳﻐﯘﺭ ﺭﻩﻫﺒﯩﺮﻯ، ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ ﺭﻩﺋﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﺪﯗﺭ. ﺋﯘ، ﻣﯩﺮﺍﺱ ﻓﻮﻧﺪﻯ ﺟﻪﻣﺌﯩﻴﯩﺘﯩﺪﯨﻜﻰ ﺳﯚﺯﯨﺪﻩ ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﻰ ﻣﯩﻠﻠﯩﻲ ﺳﯩﻴﺎﺳﯩﺘﯩﻨﻰ ﺋﯩﺴﻼﻫ ﻗﯩﻠﯩﭗ، ﺋﯘﻳﻐﯘﺭ ﯞﻩ ﺗﯩﺒﻪﺗﻠﻪﺭ ﺑﯩﻠﻪﻥ ﺳﯚﻫﺒﻪﺕ ﺋﯜﺗﻜﯜﺯﯛﺷﻜﻪ ﭼﺎﻗﯩﺮﺩﻯ.

ﺭﺍﺑﯩﻴﻪ ﺧﺎﻧﯩﻢ ﻣﯘﻧﺪﺍﻕ ﺩﻩﻳﺪﯗ ": ﺋﻪﮔﻪﺭ ﺑﯩﺰ ﺑﯘ ﻳﯩﻞ 7 ‏- ﺋﺎﻳﺪﺍ ﻳﯜﺯ ﺑﻪﺭﮔﻪﻥ ﺋﯜﺭﯛﻣﭽﻰ ﯞﻩﻗﻪﺳﻰ ﯞﻩ 2008 ‏- ﻳﯩﻠﻰ ﻣﺎﺭﺕ ﺋﯧﻴﯩﺪﺍ ﻳﯜﺯ ﺑﻪﺭﮔﻪﻥ ﺗﯩﺒﻪﺕ ﯞﻩﻗﻪﺳﯩﺪﯨﻦ ﺳﺎﯞﺍﻕ ﺋﺎﻟﻤﺎﻗﭽﻰ ﺑﻮﻟﺴﺎﻕ، ﺧﯩﺘﺎﻱ ﻫﯚﻛﯜﻣﯩﺘﻰ ﺧﯩﺘﺎﻱ ﺑﻮﻟﻤﯩﻐﺎﻥ ﻣﯩﻠﻠﻪﺗﻠﻪﺭﻧﻰ ﻳﯧﺘﯩﻢ ﻗﺎﻟﺪﯗﺭﯗﺵ، ﺋﯘﻻﺭﻏﺎ ﺗﻮﺧﺘﺎﯞﺳﯩﺰ 'ﻗﺎﺗﺘﯩﻖ ﺯﻩﺭﺑﻪ ﺑﯧﺮﯨﺶ' ﻫﻪﺭﯨﻜﯩﺘﻰ ﺋﯧﻠﯩﭗ ﺑﯧﺮﯨﺸﻨﻰ ﺗﻮﺧﺘﯩﺘﯩﺸﻰ ﻻﺯﯨﻢ".

ﺭﺍﺑﯩﻴﻪ ﺧﺎﻧﯩﻢ ﻳﻪﻧﻪ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﯞﻩ ﺗﯩﺒﻪﺗﻠﻪﺭ ﺑﯩﻠﻪﻥ ﺳﯚﻫﺒﻪﺕ ﺋﯧﻠﯩﭗ ﺑﯧﺮﯨﺶ ﯞﺍﻗﺘﻰ ﻳﯧﺘﯩﭗ ﻛﻪﻟﮕﻪﻧﻠﯩﻜﯩﻨﻰ ﺋﻪﺳﻜﻪﺭﺗﯩﭗ، "ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻣﯧﻨﯩﯔ ﺑﯩﻠﻪﻥ، ﺩﺍﻻﻱ ﻻﻣﺎ ﻫﻪﺯﺭﻩﺗﻠﯩﺮﻯ ﺑﯩﻠﻪﻥ ﯞﻩ ﺑﯩﺰﮔﻪ ﺋﻮﺧﺸﺎﺵ ﺑﯚﻫﺮﺍﻧﻐﺎ ﺋﯘﭼﺮﯨﻐﺎﻥ، ﻫﯚﻛﯜﻣﻪﺕ ﺳﯩﻴﺎﺳﯩﺘﯩﮕﻪ ﻗﻮﺷﯘﻟﻤﯩﻐﺎﻧﻠﯩﻘﻰ ﺋﯜﭼﯜﻧﻼ ﻫﺎﻗﺎﺭﻩﺗﻜﻪ ﺋﯘﭼﺮﯨﻐﺎﻥ، ﺗﯜﺭﻣﯩﮕﻪ ﺗﺎﺷﻼﻧﻐﺎﻥ ﯞﻩ ﻛﻪﻣﺴﯩﺘﯩﻠﮕﻪﻥ ﮔﯘﺭﯗﻫﻼﺭ ﺑﯩﻠﻪﻥ ﺳﯚﻫﺒﻪﺗﻜﻪ ﺋﻮﻟﺘﯘﺭﯗﺵ ﯞﺍﻗﺘﻰ ﻳﯧﺘﯩﭗ ﻛﻪﻟﺪﻯ" ﺩﻩﭖ ﻛﯚﺭﺳﻪﺗﺘﻰ.

ﻟﯧﻜﯩﻦ ﺧﯩﺘﺎﻱ ﺋﯩﺠﺘﯩﻤﺎﺋﯩﻲ ﭘﻪﻧﻠﻪﺭ ﺋﺎﻛﺎﺩﯨﻤﯩﻴﯩﺴﻰ ﭘﻪﻟﺴﻪﭘﻪ ﺗﻪﺗﻘﯩﻘﺎﺕ ﺋﻮﺭﻧﯩﻨﯩﯔ ﺗﻪﺗﻘﯩﻘﺎﺗﭽﯩﺴﻰ ﺩﻭﻛﺘﻮﺭ ﺟﺎﯓ ﺑﻮﺷﯘﻱ ﻳﯩﻐﯩﻨﺪﺍ ﺳﯚﺯ ﻗﯩﻠﯩﭗ، ﺧﯩﺘﺎﻳﺪﯨﻜﻰ ﻣﻪﺳﯩﻠﯩﻨﯩﯔ ﻧﯩﮕﯩﺰﻯ ﺳﯧﺴﺘﯩﻤﯩﺪﯨﻜﻰ ﻣﻪﺳﯩﻠﻪ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ. ﺋﯘ، 60 " ﻳﯩﻠﺪﺍ ﺟﯘﯕﮕﻮﻧﯩﯔ ﻧﯘﺭﻏﯘﻥ ﺟﺎﻳﻠﯩﺮﯨﺪﺍ ﻫﻪﻗﯩﻘﻪﺗﻪﻥ ﺯﻭﺭ ﺋﯩﻠﮕﯩﺮﯨﻠﻪﺵ ﺑﻮﻟﺪﻯ. ﺑﻮﻟﯘﭘﻤﯘ ﺋﯩﻘﺘﯩﺴﺎﺩﻯ ﺳﺎﻫﻪﺩﻩ. ﻟﯧﻜﯩﻦ ﺷﯘﻧﯩﯔ ﺑﯩﻠﻪﻥ ﺑﯩﺮﮔﻪ ﺯﯨﺪﺩﯨﻴﻪﺗﻠﻪﺭ ﺑﺎﺵ ﻛﯚﺗﻪﺭﺩﻯ. ﺑﻪﺯﻯ ﺩﻭﺳﺘﻼﺭ ﺩﺍﺋﯩﻢ ﺟﯘﯕﮕﻮ ﻫﯚﻛﯜﻣﯩﺘﯩﻨﻰ ﻛﯩﺸﯩﻠﯩﻚ ﻫﻮﻗﯘﻗﻘﺎ ﻫﯚﺭﻣﻪﺕ ﻗﯩﻠﻤﯩﺪﻯ، ﻣﯩﻠﻠﯩﻲ ﻣﻪﺳﯩﻠﯩﻠﻪﺭﺩﻩ ﺋﺎﺯ ﺳﺎﻧﻠﯩﻘﻼﺭﻧﯩﯔ ﻣﻪﺩﻩﻧﯩﻴﻪﺕ ﯞﻩ ﺩﯨﻨﯩﻲ ﻫﻮﻗﯘﻗﻰ ﻫﯚﺭﻣﻪﺕ ﻗﯩﻠﯩﻨﻤﯩﺪﻯ، ﺩﻩﭖ ﺗﻪﻧﻘﯩﺪ ﻗﯩﻠﯩﺪﯗ. ﻣﻪﻥ ﺷﯘﻧﻰ ﺗﻪﻛﯩﺘﻠﯩﻤﻪﻛﭽﻰ، ﻣﻪﻳﻠﻰ ﺩﯨﻨﯩﻲ ﺋﻪﺭﻛﯩﻨﻠﯩﻚ ﻫﻮﻗﯘﻗﻰ، ﻣﻪﻳﻠﻰ ﻣﻪﺩﻩﻧﯩﻴﻪﺕ ﻫﻮﻗﯘﻗﻰ ﺑﻮﻟﺴﯘﻥ، ﺑﯘ ﻳﻪﺭﺩﯨﻜﻰ ﻣﻪﺳﯩﻠﻪ ﺋﺎﺧﯩﺮﻯ ﺑﯧﺮﯨﭗ، ﺟﯘﯕﮕﻮﻧﯩﯔ ﺗﯜﺯﯛﻟﻤﯩﺴﯩﮕﻪ ﺗﺎﻗﯩﻠﯩﺪﯗ. ﺑﯘ ﻳﻪﺭﺩﯨﻜﻰ ﻧﯩﮕﯩﺰﻟﯩﻚ ﻣﻪﺳﯩﻠﻪ ﺟﯘﯕﮕﻮﻧﯩﯔ ﺗﯜﺯﯛﻟﻤﯩﺴﯩﺪﯨﻜﻰ ﻣﻪﺳﯩﻠﯩﺪﯗﺭ" ﺩﻩﭖ ﺗﻪﻛﯩﺘﻠﯩﺪﻯ.

ﺗﯜﺯﯛﻟﻤﯩﺪﯨﻜﻰ ﺑﯘ ﺗﻮﺳﺎﻟﻐﯘﺩﯨﻦ ﻗﺎﻧﺪﺍﻕ ﺋﯧﺸﯩﺶ ﻛﯧﺮﻩﻙ ؟ ﺟﺎﯓ ﺑﻮﺷﯘﻱ ﻣﯘﻧﺪﺍﻕ ﺩﻩﻳﺪﯗ":ﺑﯘ ﺗﻮﺳﺎﻟﻐﯘﻧﻰ ﺋﺎﺗﻼﭖ ﺋﯜﺗﯜﺷﻨﯩﯔ ﻳﻮﻟﻰ ﺟﯘﯕﮕﻮﻧﯩﯔ ﺳﯩﻴﺎﺳﯩﻲ ﺗﯜﺯﯛﻟﻤﻪ ﺋﯩﺴﻼﻫﺎﺗﯩﻨﻰ ﺋﯩﻠﮕﯩﺮﻯ ﺳﯜﺭﯛﺷﺘﯜﺭ. ﺑﯘ ﻣﻪﺳﯩﻠﯩﺪﻩ ﺟﯘﯕﮕﻮﻧﯩﯔ ﺋﯩﭽﻰ ﯞﻩ ﺳﯩﺮﺗﯩﺪﯨﻜﻰ ﻧﯘﺭﻏﯘﻥ ﻛﯩﺸﯩﻠﻪﺭﻧﯩﯔ ﺗﻮﻧﯘﺵ ﺟﻪﻫﻪﺗﺘﯩﻜﻰ ﺋﻮﺭﺗﺎﻗﻠﯩﻘﻰ ﺑﺎﺭ". ﺟﺎﯓ ﺑﻮﺷﯘﻱ ﻣﯩﺮﺍﺱ ﻓﻮﻧﺪﻯ ﺟﻪﻣﺌﯩﻴﯩﺘﯩﺪﯨﻜﻰ ﺳﯚﺯﯨﺪﻩ ﻳﻪﻧﻪ، ﺧﯩﺘﺎﻱ ﻛﻮﻣﭙﺎﺭﺗﯩﻴﯩﺴﯩﻨﯩﯔ ﺧﺎﺗﺎﻟﯩﻘﯩﻨﻰ ﺗﻪﻧﻘﯩﺪ ﻗﯩﻠﯩﺸﻘﺎ ﺑﻮﻟﯩﺪﯨﻐﺎﻧﻠﯩﻘﯩﻨﻰ، ﻟﯧﻜﯩﻦ ﺗﻪﻧﻘﯩﺪ ﺋﯩﺠﺎﺑﯩﻲ ﭘﯩﻜﯩﺮﻟﻪﺭﻧﻰ ﺋﻮﺗﺘﯘﺭﯨﻐﺎ ﻗﻮﻳﯘﺵ ﺋﺎﺳﺎﺳﯩﺪﺍ ﺋﯧﻠﯩﭗ ﺑﯧﺮﯨﻠﯩﺸﻰ ﻛﯧﺮﻩﻙ، ﺩﻩﭖ ﻗﺎﺭﺍﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺋﯘ، ﻣﯩﻠﻠﯩﻲ ﻣﻪﺳﯩﻠﻪ ﻧﯚﯞﻩﺗﺘﯩﻜﻰ ﺋﻪﻫﯟﺍﻟﺪﺍ ﺧﯩﺘﺎﻱ ﺩﯗﭺ ﻛﯧﻠﯩﯟﺍﺗﻘﺎﻥ ﻛﯚﺭﯛﻧﻪﺭﻟﯩﻚ ﻣﻪﺳﯩﻠﯩﻠﻪﺭﻧﯩﯔ ﺑﯩﺮﻯ ﺋﯩﻜﻪﻧﻠﯩﻜﯩﻨﻰ، ﻣﯩﻠﻠﯩﻲ ﻣﻪﺳﯩﻠﯩﻨﻰ ﻗﺎﻧﺪﺍﻕ ﻫﻪﻝ ﻗﯩﻠﯩﺶ ﺧﯩﺘﺎﻳﻨﯩﯔ ﻛﻪﻟﮕﯜﺳﯩﺪﻩ ﺗﯩﻨﭻ ﺋﯚﺯﮔﯩﺮﯨﺸﯩﺪﯨﻜﻰ ﻧﯩﮕﯩﺰﻟﯩﻚ ﻣﻪﺳﯩﻠﯩﻠﻪﺭﻧﯩﯔ ﺑﯩﺮﻯ ﻫﯧﺴﺎﺑﻠﯩﻨﯩﺪﯨﻐﺎﻧﻠﯩﻘﯩﻨﻰ ﺋﻪﺳﻜﻪﺭﺗﺘﻰ. ﺋﯘ، " ﺷﯘﯕﺎ ﻣﯩﻠﻠﯩﻲ ﻣﻪﺳﯩﻠﯩﻨﻰ ﻫﻪﻝ ﻗﯩﻠﯩﺸﻨﻰ ﺟﯘﯕﮕﻮﻧﯩﯔ ﺳﯩﻴﺎﺳﯩﻲ ﺗﯜﺯﯛﻟﻤﻪ ﺋﯩﺴﻼﻫﺎﺕ ﺑﺎﺳﻘﯘﭼﯩﺪﯨﻜﻰ ﺑﯩﺮ ﻣﻪﺳﯩﻠﻪ ﻳﺎﻛﻰ ﺋﯘﻧﯩﯔ ﺑﯩﺮ ﻗﯩﺴﯩﻤﻰ ﺩﯦﻴﯩﺸﻜﻪ ﺑﻮﻟﯩﺪﯗ... ﻣﻪﺳﯩﻠﯩﻨﻰ ﻫﻪﻝ ﻗﯩﻠﯩﺸﻨﯩﯔ ﻳﻮﻟﻰ ﺟﯘﯕﮕﻮ ﺟﻪﻣﺌﯩﻴﯩﺘﯩﻨﯩﯔ ﺗﯩﻨﭻ ﺋﯚﺯﮔﯩﺮﯨﺸﯩﮕﻪ ﺋﯩﺠﺎﺑﯩﻲ ﺗﯚﻫﭙﻪ ﻗﻮﺷﯘﺵ، ﺩﻩﭖ ﻗﺎﺭﺍﻳﻤﻪﻥ... ﻟﯧﻜﯩﻦ ﺑﯘ ﻛﻮﻣﭙﺎﺭﺗﯩﻴﯩﮕﻪ ﺋﻮﺧﺸﺎﺵ، ﺋﻮﺧﺸﯩﻤﯩﻐﺎﻥ ﭘﯩﻜﯩﺮﺩﯨﻜﻰ ﺗﻪﺭﻩﭘﻠﻪﺭ ﯞﻩ ﻣﻪﺳﯩﻠﯩﻠﻪﺭﮔﻪ ﺩﯛﺷﻤﻪﻧﻠﯩﻚ ﭘﻮﺯﯨﺘﺴﯩﻴﯩﺴﯩﺪﻩ ﻣﯘﺋﺎﻣﯩﻠﻪ ﻗﯩﻠﯩﺶ ﺑﯩﻠﻪﻥ ﺑﻮﻟﻤﺎﺳﻠﯩﻘﻰ ﻛﯧﺮﻩﻙ... ﻣﻪﻥ ﺟﯘﯕﮕﻮ ﺑﻮﮔﯘﻥ ﺩﯗﭺ ﻛﯧﻠﯩﯟﺍﺗﻘﺎﻥ ﺗﯜﺭﻟﯜﻙ ﻣﻪﺳﯩﻠﯩﻠﻪﺭﻧﻰ ﺟﯜﻣﻠﯩﺪﯨﻦ ﻣﯩﻠﻠﯩﻲ ﻣﻪﺳﯩﻠﻪ ﻫﻪﺭ ﻗﺎﻳﺴﻰ ﻣﯩﻠﻠﻪﺗﻠﻪﺭﻧﯩﯔ ﺋﻮﺭﺗﺎﻕ ﺗﯩﺮﯨﺸﭽﺎﻧﻠﯩﻘﻰ، ﺷﯘﻧﯩﯔ ﺑﯩﻠﻪﻥ ﺑﯩﺮﮔﻪ ﻫﺎﻛﯩﻤﯩﻴﻪﺕ ﺋﯩﭽﻰ ﯞﻩ ﺳﯩﺮﺗﯩﺪﯨﻜﻰ ﺯﺍﺗﻼﺭﻧﯩﯔ ﺋﻮﺭﺗﺎﻕ ﻫﻪﻣﻜﺎﺭﻟﯩﻘﯩﺪﺍ ﻫﻪﻝ ﺑﻮﻟﯩﺪﯗ، ﺩﻩﭖ ﻗﺎﺭﺍﻳﻤﻪﻥ،" ﺩﻩﻳﺪﯗ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﺑﻮﻟﺴﺎ، ﻳﯩﻐﯩﻨﺪﺍ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭﻻﺭﻏﺎ ﺋﺎﺳﺴﯩﻤﯩﻠﯩﻴﺎﺗﺴﯩﻴﻪ ﺳﯩﻴﺎﺳﯩﺘﻰ ﻳﯜﺯﮔﯜﺯﯛﯞﺍﺗﻘﺎﻧﻠﯩﻘﯩﻨﻰ ﻛﯚﺭﺳﯩﺘﯩﭗ، ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﻰ ﺋﺎﺳﺴﯩﻤﯩﻠﯩﻴﺎﺗﺴﯩﻴﻪ ﺳﯩﻴﺎﺳﯩﺘﯩﮕﻪ ﺧﺎﺗﯩﻤﻪ ﺑﯧﺮﯨﺸﻜﻪ ﭼﺎﻗﯩﺮﺩﻯ. ﺋﯘ، ﺋﯘﻳﻐﯘﺭﻻﺭ ﻧﻪﺯﯨﺮﯨﺪﻩ، ﺋﯘﻳﻐﯘﺭ ﻗﯩﺰﻟﯩﺮﯨﻨﻰ ﺋﯩﭽﻜﯩﺮﻯ ﺋﯚﻟﻜﯩﻠﻪﺭﮔﻪ ﻳﯚﺗﻜﻪﺵ ﺳﯩﻴﺎﺳﯩﺘﻰ ﺑﯘ ﺋﺎﺳﺴﯩﻤﯩﻠﯩﻴﺎﺗﺴﯩﻴﯩﻨﯩﯔ ﺑﯩﺮ ﻗﯩﺴﯩﻤﻰ، ﺩﻩﭖ ﻗﺎﺭﯨﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﻣﯩﺮﺍﺱ ﻓﻮﻧﺪﻯ ﺟﻪﻣﺌﯩﻴﯩﺘﯩﺪﯨﻜﻰ ﻳﯩﻐﯩﻨﺪﺍ ﻳﻪﻧﻪ، ﺋﺎﻣﯧﺮﯨﻜﯩﺪﯨﻜﻰ ﺧﯩﺘﺎﻱ ﺧﺮﯨﺴﺘﻴﺎﻥ ﺩﯨﻨﯩﻲ ﺟﻪﻣﺌﯩﻴﯩﺘﻰ‏ - ﺟﯘﯕﮕﻮ ﻳﺎﺭﺩﻩﻡ ﺟﻪﻣﺌﯩﻴﯩﺘﯩﻨﯩﯔ ﻣﻪﺳﺌﯘﻟﻰ ﺑﺎﺏ ﻓﯘ، ﺑﯧﻴﺠﯩﯖﻠﯩﻖ ﺧﯩﺘﺎﻱ ﺗﻪﺗﻘﯩﻘﺎﺗﭽﻰ ﯞﺍﯓ ﮔﯘﺍﯕﺸﻰ، ﻣﻪﺭﻛﯩﺰﻯ ﻧﻴﯘ ﻳﻮﺭﻛﺘﯩﻜﻰ ﺋﻪﺭﻛﯩﻦ ﺗﯩﺒﻪﺕ ﺋﻮﻗﯘﻏﯘﭼﯩﻼﺭ ﺋﯘﻳﯘﺷﻤﯩﺴﯩﻨﯩﯔ ﺭﻩﺋﯩﺴﻰ ﺗﻪﻧﺰﯨﻦ ﺩﻭﺭﺟﻰ ﯞﻩ ﺟﻪﻧﯘﺑﯩﻲ ﻣﻮﯕﻐﯘﻟﯩﻴﻪ ﻛﯩﺸﯩﻠﯩﻚ ﻫﻮﻗﯘﻕ ﺋﯘﭼﯘﺭ ﻣﻪﺭﻛﯩﺰﯨﻨﯩﯔ ﻣﻪﺳﺌﯘﻟﻰ ﺋﯧﻨﺨﯧﺒﺎﺗﯘ ﺗﻮﮔﯘﭼﯘﻗﻼﺭ ﺩﻭﻛﻼﺕ ﺑﻪﺭﺩﻯ.