ﻧﺎﻣﺎﻳﯩﺸﻘﺎ 150 ﺗﯩﻦ ﺋﺎﺭﺗﯘﻕ ﻛﯩﺸﻰ ﻗﺎﺗﻨﺎﺷﺘﻰ

ﻧﺎﻣﺎﻳﯩﺶ ﺷﯘ ﺟﺎﻱ ﯞﺍﻗﺘﻰ ﭼﯜﺷﺘﯩﻦ ﻛﯧﻴﯩﻦ ﺳﺎﺋﻪﺕ ﺋﯩﻜﻜﯩﺪﻩ ﺧﯩﺘﺎﻱ ﺋﻪﻟﭽﯩﺨﺎﻧﯩﺴﻰ ﺋﺎﻟﺪﯨﺪﺍ ﺑﺎﺷﻼﻧﺪﻯ. ﻧﺎﻣﺎﻳﯩﺸﻨﻰ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﭼﺎﻗﯩﺮﯨﻘﻰ ﺑﯩﻠﻪﻥ ﺋﺎﻣﯧﺮﯨﻜﺎ ﺋﯘﻳﻐﯘﺭ ﺑﯩﺮﻟﻪﺷﻤﯩﺴﻰ ﺗﻪﺷﻜﯩﻠﻠﯩﮕﻪﻥ ﺑﻮﻟﯘﭖ، ﻧﺎﻣﺎﻳﯩﺸﻘﺎ ﺧﻪﻟﻘﺌﺎﺭﺍﻟﯩﻖ ﺗﻪﺷﻜﯩﻼﺗﻼﺭﺩﯨﻦ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺋﻪﺯﺍﻟﯩﺮﻯ، ﭼﯧﮕﺮﯨﺴﯩﺰ ﻣﯘﺧﺒﯩﺮﻻﺭ ﺗﻪﺷﻜﯩﻼﺗﻰ ﺋﻪﺯﺍﻟﯩﺮﻯ، ﺋﺎﻣﯧﺮﯨﻜﯩﺪﺍ ﻳﺎﺷﺎﯞﺍﺗﻘﺎﻥ ﺑﯩﺮ ﻗﯩﺴﻤﻰ ﺋﯘﻳﻐﯘﺭﻻﺭﺩﯨﻦ ﺑﺎﺷﻘﺎ ﺋﺎﻣﯧﺮﯨﻜﯩﺪﺍ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﻠﯩﺮﻯ ﯞﻩ ﺩﯦﻤﻮﻛﺮﺍﺗﯩﻴﯩﻨﻰ ﻳﺎﻗﯩﻠﯩﻐﯘﭼﻰ ﺧﯩﺘﺎﻱ ﺗﻪﺷﻜﯩﻼﺗﻠﯩﺮﯨﻨﯩﯔ ﺋﻪﺯﺍﻟﯩﺮﻯ ﺑﻮﻟﯘﭖ، 150 ﻛﻪ ﻳﯧﻘﯩﻦ ﻛﯩﺸﻰ ﻗﺎﺗﻨﺎﺷﺘﻰ.

ﻧﺎﻣﺎﻳﯩﺸﻘﺎ ﺋﺎﻣﯧﺮﯨﻜﺎ ﺋﯘﻳﻐﯘﺭ ﺑﯩﺮﻟﻪﺷﻤﯩﺴﻰ ﺑﺎﺵ ﻛﺎﺗﯩﭙﻰ ﺋﺎﻟﯩﻢ ﺳﯩﻴﯩﺘﻮﻑ ﺭﯨﻴﺎﺳﻪﺗﭽﯩﻠﯩﻚ ﻗﯩﻠﺪﻯ. ﺋﺎﻟﯩﻢ ﺳﯩﻴﯩﺘﻮﻑ، ﻧﯘﺗﻘﯩﺪﺍ ﺧﯩﺘﺎﻳﻨﯩﯔ 2001 - ﻳﯩﻠﻰ ﺋﻮﻟﯩﻤﭙﯩﻚ ﺳﺎﻫﯩﺒﺨﺎﻧﻠﯩﻘﯩﻨﻰ ﻗﻮﻟﻐﺎ ﻛﻪﻟﺘﯜﺭﯛﺵ ﺋﺎﻟﺪﯨﺪﺍ ﭘﯜﺗﯜﻥ ﺩﯗﻧﻴﺎ ﺟﺎﻣﺎﺋﻪﺗﭽﯩﻠﯩﻜﯩﮕﻪ، ﺋﻮﻟﯩﻤﭙﯩﻜﺘﯩﻦ ﺑﯘﺭﯗﻥ ﻛﯩﺸﯩﻠﯩﻚ ﻫﻮﻗﯘﻗﻨﻰ ﻳﺎﺧﺸﯩﻼﻳﺪﯨﻐﺎﻧﻠﯩﻘﻰ ﻫﻪﻗﻘﯩﺪﻩ ﯞﻩﺩﻩ ﺑﻪﺭﮔﻪﻧﻠﯩﻜﯩﻨﻰ، ﺋﻪﻣﻤﺎ ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻚ ﺳﺎﻫﯩﺒﺨﺎﻧﯩﻠﯩﻖ ﻫﻮﻗﯘﻗﯩﻐﺎ ﺋﯧﺮﯨﺸﯩﯟﯦﻠﯩﭙﻼ ﺋﯘﻳﻐﯘﺭ، ﺗﯩﺒﻪﺕ ﯞﻩ ﺑﺎﺷﻘﺎ ﻣﯩﻠﻠﻪﺗﻠﻪﺭﮔﻪ ﻗﺎﺭﺍﺗﻘﺎﻥ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﻠﯩﺮﯨﻨﻰ ﺋﯧﻐﯩﺮﻻﺷﺘﯘﺭﻏﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

" ﺑﯩﺰ ﺷﯘ ﺋﯚﺯ ﺋﺎﯞﺍﺯﯨﻨﻰ ﭼﯩﻘﯩﺮﺍﻟﻤﯩﻐﺎﻥ ﻛﯩﺸﯩﻠﻪﺭﮔﻪ ﯞﺍﻛﺎﻟﯩﺘﻪﻥ ﻧﺎﺭﺍﺯﯨﻠﯩﻖ ﻧﺎﻣﺎﻳﯩﺸﻰ ﺋﯚﺗﻜﯜﺯﮔﯩﻨﻰ ﻛﻪﻟﺪﯗﻕ"

ﺋﯘ ﺧﯩﺘﺎﻳﺪﯨﻜﻰ ﻛﯩﺸﯩﻠﯩﻚ ﺩﻩﭘﺴﻪﻧﺪﯨﭽﯩﻠﯩﻜﻠﯩﺮﻯ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ، ﺑﯘ ﻳﯩﻞ ﻣﺎﺭﺗﺘﺎ ﺧﻮﺗﻪﻥ ﯞﻩ ﺗﯩﺒﻪﺗﻠﻪﺭﺩﻩ ﻳﯜﺯ ﺑﻪﺭﮔﻪﻥ ﻧﺎﻣﺎﻳﯩﺸﻨﻰ ﻣﯩﺴﺎﻝ ﻗﯩﻠﺪﻯ ﯞﻩ ﺧﻮﺗﻪﻧﺪﻩ ﺋﯘﻳﻐﯘﺭ ﺋﺎﻳﺎﻟﻠﯩﺮﻯ ﺗﻪﺭﯨﭙﯩﺪﯨﻦ ﺗﯩﻨﭻ ﻳﻮﺳﯘﻧﺪﺍ ﺋﯧﻠﯩﭗ ﺑﯧﺮﯨﻠﻐﺎﻥ ﻧﺎﻣﺎﻳﯩﺶ ﺟﻪﺭﻳﺎﻧﯩﺪﺍ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ 600 ﺋﻪﺗﺮﺍﭘﯩﺪﺍ ﺋﯘﻳﻐﯘﺭ ﺋﺎﻳﺎﻟﻨﻰ ﻗﻮﻟﻐﺎ ﺋﺎﻟﻐﺎﻧﻠﯩﻘﯩﻨﻰ ﻫﻪﻣﺪﻩ ﺑﯘﻻﺭﻧﯩﯔ ﺗﯧﺨﯩﭽﻪ ﺗﯜﺭﻣﯩﺪﻩ ﺋﯩﻜﻪﻧﻠﯩﻜﯩﻨﻰ ﻛﯚﺭﺳﻪﺗﺘﻰ.

ﺋﺎﻟﯩﻢ ﺳﯩﻴﯩﺘﻮﻑ ﭼﻪﺗﺌﻪﻟﻠﻪﺭﺩﻩ ﺋﻮﻟﯩﻤﭙﯩﻚ ﻣﻪﺷﺌﯩﻠﯩﻨﻰ ﺋﯚﺗﻜﯜﺯﯛﺷﻜﻪ ﻗﺎﺭﺷﻰ ﻛﯩﺸﯩﻠﻪﺭﻧﯩﯔ ﺋﯚﺯ ﻧﺎﺭﺍﺯﯨﻠﯩﻘﻠﯩﺮﯨﻨﻰ ﺋﯩﭙﺎﺩﯨﻠﻪﭖ ﻧﺎﻣﺎﻳﯩﺶ ﻗﯩﻼﻟﯩﻐﺎﻧﻠﯩﻘﯩﻨﻰ، ﺋﻪﻣﻤﺎ ﺧﯩﺘﺎﻱ ﺋﯩﭽﯩﺪﻩ ﺑﯘ ﺧﯩﻞ ﻧﺎﻣﺎﻳﯩﺸﻼﺭﻏﺎ ﻣﯘﻣﻜﯩﻨﭽﯩﻠﯩﻚ ﻳﻮﻕ ﺑﻮﻟﻐﺎﻧﻠﯩﻘﯩﻨﻰ ﻛﯚﺭﺳﯩﺘﯩﭗ ﻣﯘﻧﺪﺍﻕ ﺩﯦﺪﻯ: " ﺋﻪﻣﻤﺎ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ، ﺗﯩﺒﻪﺕ ﯞﻩ ﺧﯩﺘﺎﻳﻨﯩﯔ ﺑﺎﺷﻘﺎ ﺭﺍﻳﻮﻧﻠﯩﺮﯨﺪﺍ ﺧﯩﺘﺎﻱ ﻫﺎﻛﯩﻤﯩﻴﯩﺘﻰ ﺋﺎﺳﺘﯩﺪﺍ ﺋﺎﺯﺍﺏ ﭼﯧﻜﯩﯟﺍﺗﻘﺎﻥ ﻛﯩﺸﯩﻠﻪﺭ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯧﻐﯩﺮ ﺟﺎﺯﺍﺳﻰ ﺳﻪﯞﻩﺑﻠﯩﻚ ﺧﯩﺘﺎﻳﻐﺎ ﻗﺎﺭﺷﻰ ﺋﯚﺯ ﻧﺎﺭﺍﺯﯨﻠﯩﻘﯩﻨﻰ ﺋﯩﭙﺎﺩﯨﻠﻪﺷﻜﻪ ﻣﯘﻳﻪﺳﺴﻪﺭ ﺑﻮﻻﻟﻤﯩﺪﻯ. ﺷﯘﯕﺎ ﺑﯩﺰ ﺑﯜﮔﯜﻥ ﺑﯘ ﻳﻪﺭﮔﻪ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﻨﯩﯔ ﺑﯧﺴﯩﻤﻰ ﺳﻪﯞﻩﺑﻠﯩﻚ، ﺑﯘ ﻣﯘﺳﺘﻪﺑﯩﺖ ﻫﺎﻛﯩﻤﯩﻴﻪﺗﻜﻪ ﻗﺎﺭﺷﻰ ﺋﯚﺯ ﺋﺎﯞﺍﺯﯨﻨﻰ ﭼﯩﻘﯩﺮﯨﺸﻘﺎ ﺟﯜﺭﺋﻪﺕ ﻗﯩﻼﻟﻤﯩﻐﺎﻥ ﺋﺎﺷﯘ ﻛﯩﺸﯩﻠﻪﺭﮔﻪ ﯞﺍﻛﺎﻟﯩﺘﻪﻥ ﻧﺎﺭﺍﺯﯨﻠﯩﻖ ﻧﺎﻣﺎﻳﯩﺸﻰ ﺋﯚﺗﻜﯜﺯﮔﯩﻨﻰ ﻛﻪﻟﺪﯗﻕ."

ﭼﯧﮕﺮﯨﺴﯩﺰ ﻣﯘﺧﺒﯩﺮﻻﺭ ﺗﻪﺷﻜﯩﻼﺗﻰ:" ﺭﺍﺑﯩﻴﻪ ﻗﺎﺩﯨﺮ، ﺑﯘ ﻏﻪﻳﺮﻩﺗﻠﯩﻚ ﺋﺎﻳﺎﻝ، ﻛﯩﺸﯩﻠﯩﻚ ﻫﻮﻗﯘﻕ ﺋﯜﭼﯜﻥ ﺋﯚﺯ ﺋﻪﺭﻛﯩﻨﻠﯩﻜﯩﻨﻰ ﺑﻪﺩﻩﻝ ﻗﯩﻠﯩﭗ ﺗﯚﻟﯩﺪﻯ"

ﻧﺎﻣﺎﻳﯩﺶ ﺑﯧﺸﯩﺪﺍ ﻳﻪﻧﻪ، ﭼﯧﮕﺮﯨﺴﯩﺰ ﻣﯘﺧﺒﯩﺮﻻﺭ ﺗﻪﺷﻜﯩﻼﺗﻰ ﯞﺍﺷﯩﻨﮕﺘﻮﻥ ﺑﯚﻟﯜﻣﯩﻨﯩﯔ ﺩﯨﺮﯦﻜﺘﻮﺭﻯ ﻟﯘﺳﻰ ﻣﻮﺭﯨﻠﻠﻮﻥ ﺧﺎﻧﯩﻢ ﺳﯚﺯﮔﻪ ﭼﯩﻘﺘﻰ ﯞﻩ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﻮﻟﯩﻤﭙﯩﻚ ﺋﯧﭽﯩﻠﯩﺶ ﻫﺎﺭﭘﯩﺴﯩﺪﯨﻤﯘ ﻛﯩﺸﯩﻠﯩﻚ ﻫﻮﻗﯘﻗﻨﻰ ﺋﯩﺰﭼﯩﻞ ﺩﻩﭘﺴﻪﻧﺪﻩ ﻗﯩﻠﯩﺸﯩﻨﻰ ﺩﺍﯞﺍﻣﻼﺷﺘﯘﺭﯗﯞﺍﺗﻘﺎﻧﻠﯩﻘﯩﻨﻰ، ﺳﯩﻴﺎﺳﯩﻲ ﭘﯩﻜﺮﻯ ﺋﻮﺧﺸﯩﻤﺎﻳﺪﯨﻐﺎﻥ ﻛﯩﺸﯩﻠﻪﺭﻧﯩﯔ ﺗﯜﺭﻣﯩﻠﻪﺭﮔﻪ ﺗﺎﺷﻠﯩﻨﯩﭗ ﻛﯧﻠﯩﯟﺍﺗﻘﺎﻧﻠﯩﻘﯩﻨﻰ ﺑﯘﻧﯩﯔ ﺋﯘﻳﻐﯘﺭ، ﺗﯩﺒﻪﺕ ﻗﺎﺗﺎﺭﻟﯩﻖ ﻣﯩﻠﻠﻪﺗﻠﻪﺭ ﺋﺎﺭﯨﺴﯩﺪﺍ ﺗﯧﺨﯩﻤﯘ ﺋﯧﻐﯩﺮ ﺋﯩﻜﻪﻧﻠﯩﻜﯩﻨﻰ ﻛﯚﺭﺳﻪﺗﺘﻰ.

ﻣﻮﺭﯨﻠﻠﻮﻥ ﺧﺎﻧﯩﻢ، ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ، ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ ﺋﯚﺯ ﺧﻪﻟﻘﯩﻨﯩﯔ ﻛﯩﺸﯩﻠﯩﻚ ﻫﻮﻗﯘﻗﻰ ﺋﯘﭼﯘﻥ ﻛﯜﺭﻩﺵ ﻗﯩﻠﻐﺎﻧﻠﯩﻘﯩﻨﻰ، ﺋﻪﻣﻤﺎ ﺋﯘﻧﯩﯔ ﻧﯘﺭﻏﯘﻥ ﺑﻪﺩﻩﻟﻠﻪﺭﻧﻰ ﺗﯚﻟﯩﮕﻪﻧﻠﯩﻜﯩﻨﯩﻤﯘ ﻛﯚﺭﺳﯩﺘﯩﭗ: " ﺭﺍﺑﯩﻴﻪ ﻗﺎﺩﯨﺮ، ﺑﯘ ﻏﻪﻳﺮﻩﺗﻠﯩﻚ ﺋﺎﻳﺎﻝ، ﻛﯩﺸﯩﻠﯩﻚ ﻫﻮﻗﯘﻕ ﺋﯜﭼﯜﻥ ﺋﯚﺯ ﺋﻪﺭﻛﯩﻨﻠﯩﻜﯩﻨﻰ ﺑﻪﺩﻩﻝ ﻗﯩﻠﯩﭗ ﺗﯚﻟﯩﺪﻯ" ﺩﯦﺪﻯ ﯞﻩ ﺧﺎﻧﯩﻤﻨﯩﯔ ﺑﯘ ﻳﻪﺭﺩﯨﻜﻰ ﭘﺎﺋﺎﻟﯩﻴﻪﺗﻠﯩﺮﻯ ﺋﯘﭼﯘﻥ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻧﯩﯔ ﺋﺎﺋﯩﻠﯩﺴﯩﻨﻰ ﺋﯩﺰﭼﯩﻞ ﺗﯜﺭﺩﻩ ﭘﺎﺭﺍﻛﻪﻧﺪﻩ ﻗﯩﻠﯩﭗ ﺗﯘﺭﻏﺎﻧﻠﯩﻘﯩﻨﻰ ﻫﻪﻣﺪﻩ ﺋﯘﻧﯩﯔ ﺋﻮﻏﯘﻟﻠﯩﺮﯨﻨﻰ ﻗﻮﻟﻐﺎ ﺋﺎﻟﻐﺎﻧﻠﯩﻘﯩﻨﻰ، ﺗﻮﺭﺩﺍ ﻣﺎﻗﺎﻟﻪ ﺋﯧﻼﻥ ﻗﯩﻠﻐﺎﻧﻠﯩﻘﻰ ﺋﯜﭼﯜﻥ " ﺑﯚﻟﮕﯜﻧﭽﯩﻠﯩﻚ ﺋﯩﺪﯨﻴﯩﺴﯩﺪﯨﻜﻰ ﻣﺎﻗﺎﻟﻪ ﺋﯧﻼﻥ ﻗﯩﻠﺪﻯ " ﺩﯦﮕﻪﻥ ﺟﯩﻨﺎﻳﻪﺕ ﺑﯩﻠﻪﻥ ﺋﻪﻳﯩﺒﻠﯩﻨﯩﭗ 9 ﻳﯩﻠﻠﯩﻖ ﻗﺎﻣﺎﻕ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﯩﻨﻐﺎﻥ ﺋﺎﺑﻠﯩﻜﯩﻢ ﺋﺎﺑﺪﯗﺭﯦﻬﯩﻤﻨﻰ ﺋﯚﺯ ﺗﻪﺷﻜﯩﻼﺗﯩﻨﯩﯔ " ﺋﯩﻨﺘﯧﺮﻧﯧﺖ ﺋﯚﻛﺘﯩﭽﯩﻠﯩﺮﻯ ﻳﺎﻛﻰ ﺋﯩﻨﺘﯧﺮﻧﯧﺘﺘﻪ ﻗﺎﺭﺷﻰ ﭘﯩﻜﯩﺮ ﺋﯩﭙﺎﺩﯨﻠﯩﮕﻪﻧﻠﯩﻜﻰ ﺋﯜﭼﯜﻥ ﻣﻪﻫﺒﯘﺳﻘﺎ ﺋﺎﻳﻼﻧﻐﯘﭼﯩﻼﺭ " ﺗﯩﺰﯨﻤﻠﯩﻜﯩﮕﻪ ﻛﯩﺮﮔﯜﺯﮔﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﭼﯧﮕﺮﯨﺴﯩﺰ ﻣﯘﺧﺒﯩﺮﻻﺭ ﺗﻪﺷﻜﯩﻼﺗﻰ ﯞﺍﺷﯩﻨﮕﺘﻮﻥ ﺑﯚﻟﯜﻣﯩﻨﯩﯔ ﺩﯨﺮﯦﻜﺘﻮﺭﻯ ﻟﯘﺳﻰ ﻣﻮﺭﯨﻠﻠﻮﻥ ﺧﺎﻧﯩﻢ ﻳﻪﻧﻪ، ﺋﻮﻟﯩﻤﭙﯩﻜﻜﻪ ﭘﻪﻗﻪﺕ ﺑﯩﺮ ﺋﺎﻳﺪﯨﻦ ﺋﺎﺭﺗﯘﻕ ﯞﺍﻗﯩﺖ ﻗﺎﻟﻐﺎﻧﺪﯨﻤﯘ، ﺧﯩﺘﺎﻳﺪﺍ ﻛﯩﺸﯩﻠﯩﻚ ﻫﻮﻗﯘﻕ ﯞﻩ ﺋﺎﺧﺒﺎﺭﺍﺕ ﺋﻪﺭﻛﯩﻨﻠﯩﻜﯩﻨﯩﯔ ﺗﯧﺨﯩﻤﯘ ﺋﯧﻐﯩﺮ ﺩﻩﭘﺴﻪﻧﺪﻩ ﻗﯩﻠﯩﻨﯩﯟﺍﺗﻘﺎﻧﻠﯩﻘﯩﻨﻰ، 2001 - ﻳﯩﻠﻰ ﺧﯩﺘﺎﻳﻐﺎ ﺋﻮﻟﯩﻤﭙﯩﻚ ﺋﯚﺗﻜﯜﺯﯛﺵ ﺳﺎﻫﯩﭙﺨﺎﻧﻠﯩﻘﻰ ﺑﯧﺮﯨﻠﮕﻪﻧﺪﻩ ﺋﯚﺯ ﺗﻪﺷﻜﯩﻼﺗﯩﻨﯩﯔ ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﯩﯔ ﺑﯘ ﻗﺎﺭﺍﺭﯨﻨﻰ ﺋﻪﻳﯩﺒﻠﯩﮕﻪﻧﻠﯩﻜﯩﻨﻰ، ﮔﻪﺭﭼﻪ ﻛﯩﺸﯩﻠﻪﺭ ﺧﯩﺘﺎﻳﻐﺎ ﭘﯘﺭﺳﻪﺕ ﺑﯧﺮﯨﻠﺴﻪ ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ، ﺋﺎﺧﺒﺎﺭﺍﺕ ﺋﻪﺭﻛﯩﻨﻠﯩﻚ ﻗﺎﺗﺎﺭﻟﯩﻘﻼﺭﻏﺎ ﻳﻮﻝ ﺋﯧﭽﯩﻠﯩﺪﯗ ﺩﻩﭖ ﭼﯜﺷﻪﻧﮕﻪﻧﻠﯩﻜﯩﻨﻰ، ﺋﻪﻣﻤﺎ ﺑﯘﻻﺭﻧﻰ ﻫﯧﭻ ﻗﺎﻳﺴﯩﺴﯩﻨﯩﯔ ﺋﻪﻣﻪﻟﮕﻪ ﺋﺎﺷﻤﯩﻐﺎﻧﻠﯩﻘﯩﻨﻰ ﻛﯚﺭﺳﻪﺗﺘﻰ ﯞﻩ ﻣﯘﻧﺪﺍﻕ ﺩﯦﺪﻯ: " ﻣﺎﻧﺎ ﺑﯘ ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﻨﯩﯔ ﺋﻪﯓ ﭼﻮﯓ ﻣﻪﻏﻠﯘﺑﯩﻴﯩﺘﻰ. ﺋﯘﻻﺭ ﺧﯩﺘﺎﻳﻨﻰ 2001 - ﻳﯩﻠﻰ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻜﻪ ﺑﻪﺭﮔﻪﻥ ﯞﻩﺩﯨﺴﯩﮕﻪ ﯞﺍﭘﺎ ﻗﯩﻠﯩﺸﻘﺎ ﻗﯩﺴﺘﺎﺵ ﺟﻪﻫﻪﺗﺘﻪ ﺋﺎﻧﭽﻪ ﻛﯚﭖ ﻛﯜﭺ ﭼﯩﻘﺎﺭﻣﯩﺪﻯ."

 ﻗﻪﺷﻘﻪﺭﺩﯨﻜﻰ ﺋﻮﻟﯩﻤﭙﯩﻚ ﻣﻪﺷﺌﻪﻝ ﻳﻪﺗﻜﯜﺯﯛﺵ ﭘﺎﺋﺎﻟﯩﻴﯩﺘﻰ ﺑﯩﺮ ﻳﺎﺳﺎﻟﻤﺎ " ﻧﯩﻘﺎﺑﻠﯩﻖ ﺗﺎﻧﺴﺎ "

ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﻪﺳﻠﻰ ﭘﯩﻼﻧﻰ ﺑﯘﻳﯩﭽﻪ ﺋﯘﻳﻐﯘﺭ ﺋﯧﻠﯩﺪﻩ ﺋﯧﻠﯩﭗ ﺑﯧﺮﯨﻠﻐﺎﻥ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﯩﯔ ﻣﻪﺷﺌﻪﻝ ﻳﻪﺗﻜﯜﺯﯛﺵ ﭘﺎﺋﺎﻟﯩﻴﯩﺘﻰ 26 - ﺋﯩﻴﯘﻧﺪﯨﻦ ﺑﺎﺷﻼﭖ ﺋﯚﺗﻜﯜﺯﯛﻟﻤﻪﻛﭽﻰ ﺑﻮﻟﻐﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺧﯩﺘﺎﻱ ﻫﯚﻛﯜﻣﯩﺘﻰ ﻣﻪﺯﻛﯘﺭ ﭘﯩﻼﻧﯩﻨﻰ ﺗﯘﻳﯘﻗﺴﯩﺰ ﺋﯚﺯﮔﻪﺭﺗﯩﭗ 17 - ﺋﯩﻴﯘﻧﻐﺎ ﺋﯚﺯﮔﻪﺭﺗﻜﻪﻥ ﻫﻪﻣﺪﻩ ﺋﻮﻟﯩﻤﭙﯩﻚ ﻣﻪﺷﺌﯩﻠﯩﻨﻰ ﻛﯜﭼﻠﯜﻙ ﻣﯘﺩﺍﭘﯩﺌﻪ ﺋﺎﺳﺘﯩﺪﺍ ﺋﯜﺭﯛﻣﭽﻰ ﯞﻩ ﻗﻪﺷﻘﻪﺭ ﻗﺎﺗﺎﺭﻟﯩﻖ ﺷﻪﻫﻪﺭﻟﻪﺭﺩﻩ ﺋﯚﺗﻜﯜﺯﮔﻪﻥ ﺋﯩﺪﻯ.

ﻟﯘﺳﻰ ﻣﻮﺭﯨﻠﻠﻮﻥ ﺧﺎﻧﯩﻢ ﺑﯘ ﻧﯚﯞﻩﺕ ﻗﻪﺷﻘﻪﺭﺩﻩ ﺋﯧﻠﯩﭗ ﺑﯧﺮﯨﻠﻐﺎﻥ ﺋﻮﻟﯩﻤﭙﯩﻚ ﻣﻪﺷﺌﻪﻝ ﻳﻪﺗﻜﯜﺯﯛﺵ ﭘﺎﺋﺎﻟﯩﻴﯩﺘﯩﻨﻰ ﺑﯩﺮ ﻳﺎﺳﺎﻟﻤﺎ ﻳﻮﺳﯘﻧﺪﺍ ﺋﯧﻠﯩﭗ ﺑﯧﺮﯨﻠﻐﺎﻥ " ﻧﯩﻘﺎﺑﻠﯩﻖ ﺗﺎﻧﺴﺎ " ﺩﻩﭖ ﺋﺎﺗﯩﺪﻯ. ﺋﯘ ﻣﯘﻧﺪﺍ ﺩﯦﺪﻯ: " ﺷﯘﻧﺪﺍﻕ، ﺋﯘﻳﻐﯘﺭ ﺋﯧﻠﯩﺪﻩ ﺋﯚﺗﻜﯜﺯﯛﻟﮕﻪﻥ ﻣﻪﺷﺌﻪﻝ ﻳﻪﺗﻜﯜﺯﯛﺵ ﭘﺎﺋﺎﻟﯩﻴﯩﺘﯩﻨﻰ ﺑﯩﺮ ﻳﺎﺳﺎﻟﻤﺎ ﻫﺎﻟﺪﺍ ﺋﯧﻠﯩﭗ ﺑﯧﺮﯨﻠﻐﺎﻥ 'ﻧﯩﻘﺎﺑﻠﯩﻖ ﺗﺎﻧﺴﺎ' ﺩﻩﭖ ﺋﺎﺗﺎﺷﻘﺎ ﺑﻮﻟﯩﺪﯗ. ﭼﯜﻧﻜﻰ ﭘﺎﺋﺎﻟﯩﻴﻪﺗﻜﻪ ﻫﯚﻛﯜﻣﻪﺕ ﺋﯚﺯﻯ ﺗﺎﻟﻠﯩﻐﺎﻥ ﺑﯩﺮ ﻗﯩﺴﯩﻢ ﻛﯩﺸﯩﻠﻪﺭ ﻗﺎﺗﻨﺎﺷﺘﻰ ﻫﻪﻣﺪﻩ ﺑﺎﺷﻘﯩﻼﺭ ﺋﯚﻳﻠﯩﺮﯨﺪﯨﻦ ﭼﯩﻘﻤﺎﺳﻠﯩﻘﻘﺎ، ﭘﺎﺋﺎﻟﯩﻴﻪﺗﻨﻰ ﺗﯧﻠﯧﯟﯨﺰﻭﺭﺩﯨﻦ ﻛﯚﺭﯛﺷﻜﻪ ﻣﻪﺟﺒﯘﺭﻻﻧﺪﻯ."

ﺋﯘ ﻳﻪﻧﻪ ﺑﯘﻧﺪﺍﻕ ﺑﯩﺮ ﭘﺎﺋﺎﻟﯩﻴﻪﺗﻨﯩﯔ ﺋﻪﺳﻠﯩﺪﻩ ﺑﯩﺮ ﺗﻪﺑﺮﯨﻜﻠﻪﺵ ﺗﯜﺳﯩﻨﻰ ﺋﯧﻠﯩﺸﻨﯩﯔ ﺋﻮﺭﻧﯩﻐﺎ ﻗﻪﺷﻘﻪﺭﺩﻩ ﻛﯩﺸﯩﻠﻪﺭﻧﯩﯔ ﺑﯘ ﭘﺎﺋﺎﻟﯩﻴﻪﺕ ﺋﯚﺗﻜﯜﺯﯛﻟﯜﯞﺍﺗﻘﺎﻥ ﺳﻮﺭﯗﻧﺪﯨﻦ ﺋﺎﻣﺎﻟﻨﯩﯔ ﺑﺎﺭﯨﭽﻪ ﻳﯩﺮﺍﻗﻼﺷﺘﯘﺭﯗﻟﻐﺎﻧﻠﯩﻘﯩﻨﻰ ﻛﯚﺭﺳﯩﺘﯩﭗ: "ﺑﯘ ﺑﯩﺮ ﺋﯩﻨﺘﺎﻳﯩﻦ ﻛﯜﻟﻜﯩﻠﯩﻚ ﺋﯩﺶ ﺑﻮﻟﯘﭖ، ﺋﻮﻟﯩﻤﭙﯩﻚ ﺭﻭﻫﯩﻐﺎ ﺑﻪﻛﻤﯘ ﺯﯨﺖ" ﺩﯦﺪﻯ.

ﻳﺎﯓ ﺟﯩﻴﻪﻧﻠﻰ:  "ﺧﯩﺘﺎﻳﺪﯨﻜﻰ ﻣﯧﻬﻤﺎﻧﺨﺎﻧﯩﻼﺭﻧﯩﯔ ﺗﯩﺒﻪﺕ ﯞﻩ ﺋﯘﻳﻐﯘﺭﻻﺭﻧﻰ ﻗﻮﺑﯘﻝ ﻗﯩﻠﻤﺎﺳﻠﯩﻐﻰ ﺋﯩﺮﻗﯩﻲ ﻛﻪﻣﺴﯩﺘﯩﺶ ﯞﻩ ﺋﻮﻟﯩﻤﭙﯩﻚ ﺭﻭﻫﯩﻲ ﺑﯩﻠﻪﻥ ﭘﯜﺗﯜﻧﻠﻪﻱ ﺯﯨﺖ"

ﺑﯜﮔﯜﻥ ﺧﯩﺘﺎﻱ ﺋﻪﻟﭽﯩﺨﺎﻧﯩﺴﻰ ﺋﺎﻟﺪﯨﺪﺍ ﺑﯧﻴﺠﯩﯔ ﺋﻮﻟﯩﻤﭙﯩﻜﻰ ﻣﻪﺷﺌﯩﻠﯩﻨﯩﯔ ﺋﯘﻳﻐﯘﺭ ﺋﯩﻠﯩﺪﯨﻦ ﺋﯚﺗﻜﯜﺯﯛﻟﮕﻪﻧﻠﯩﻜﯩﮕﻪ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﯛﺵ ﻫﻪﻣﺪﻩ ﺧﯩﺘﺎﻳﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﯩﮕﻪ ﻗﺎﺭﺷﻰ ﺋﯧﻠﯩﭗ ﺑﯧﺮﯨﻠﻐﺎﻥ ﻧﺎﻣﺎﻳﯩﺸﻘﺎ ﺋﺎﻣﯧﺮﯨﻜﯩﺪﺍ ﻳﺎﺷﺎﻳﺪﯨﻐﺎﻥ ﺧﯩﺘﺎﻱ ﺩﯦﻤﻮﻛﺮﺍﺗﻠﯩﺮﻯ ﯞﻩ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﻠﯩﺮﯨﺪﯨﻦ " ﭘﯘﺭﺍﻕ ﻛﯜﭼﻰ" ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﯩﻨﯩﯔ ﻗﯘﺭﻏﯘﭼﯩﺴﻰ ﯞﻩ ﺭﻩﺋﯩﺴﻰ ﻳﺎﯓ ﺟﯩﻴﻪﻧﻠﻰ، ﺟﯘﯕﮕﻮ ﺋﻪﺭﻛﯩﻦ ﺩﯦﻤﻮﻛﺮﺍﺗﻼﺭ ﭘﺎﺭﺗﯩﻴﯩﺴﯩﻨﯩﯔ ﺭﻩﺋﯩﺲ ﭼﯧﻦ ﻣﯩﯔ ﯞﻩ ﺟﯘﯕﮕﻮ ﺩﯦﻤﻮﻛﺮﺍﺗﯩﻴﻪ ﭘﺎﺭﺗﯩﻴﯩﺴﯩﻨﯩﯔ ﺭﻩﺋﯩﺴﻰ ﯞﺍﯓ ﺟﯜﻥ ﻗﺎﺗﺎﺭﻟﯩﻘﻼﺭ ﯞﻩ ﺑﯘ ﭘﺎﺭﺗﯩﻴﯩﻠﻪﺭﻧﯩﯔ ﻗﻮﻟﻠﯩﻐﯘﭼﯩﻠﯩﺮﻯ ﻗﺎﺗﻨﺎﺷﺘﻰ.

ﺑﯘ ﻧﺎﻣﺎﻳﯩﺶ ﺋﯜﭼﯜﻥ ﺗﯜﻧﯜﮔﯜﻥ ﻛﻪﭺ ﺑﻮﺳﺘﯘﻧﺪﯨﻦ ﻛﻪﻟﮕﻪﻥ ﻳﺎﯓ ﺟﯩﻴﻪﻧﻠﻰ، ﺧﯩﺘﺎﻳﺪﺍ ﺋﯘﻳﻐﯘﺭ ﯞﻩ ﺗﯩﺒﻪﺕ ﻗﺎﺗﺎﺭﻟﯩﻖ ﻣﯩﻠﻠﻪﺗﻠﻪﺭﻧﯩﯔ ﭼﻮﯓ ﺷﻪﻫﻪﺭﻟﻪﺭﺩﻩ ﻣﯧﻬﻤﺎﻧﺨﺎﻧﯩﻐﺎ ﻗﻮﺑﯘﻝ ﻗﯩﻠﯩﻨﻤﺎﻳﺪﯨﻐﺎﻧﻠﯩﻘﯩﻨﻰ، ﺑﯘﻧﯩﯔ ﺋﻮﻟﯩﻤﭙﯩﻚ ﺭﻭﻫﻰ ﺑﯩﻠﻪﻥ ﺯﯨﺖ ﺋﯩﻜﻪﻧﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﭖ: "ﻫﺎﺯﯨﺮ ﺋﯘﻻﺭﻧﻰ ﻧﯘﺭﻏﯘﻥ ﻣﯧﻬﻤﺎﻧﺨﺎﻧﯩﻼﺭ ﻗﻮﺑﯘﻝ ﻗﯩﻠﻤﺎﻳﺪﯗ. ﻛﯚﭘﭽﯩﻠﯩﻚ ﺋﯧﻴﺘﯩﭗ ﺑﯧﻘﯩﯖﻼﺭﭼﯘ، ﺑﯘ ﻛﻪﻣﺴﯩﺘﯩﺶ ﺑﻮﻟﻤﺎﻱ ﻧﯧﻤﻪ؟ ﻛﻪﻣﺴﯩﺘﯩﺶ، ﺋﻮﻟﯩﻤﭙﯩﻚ ﺭﻭﻫﯩﻲ ﺑﯩﻠﻪﻥ ﭘﯜﺗﯜﻧﻠﻪﻱ ﻗﺎﺭﯨﻤﯘ ‏ - ﻗﺎﺭﺷﻰ ﺋﯘﻗﯘﻡ ﺩﯗﺭ" ﺩﯦﺪﻯ.

ﺋﯘ ﻳﻪﻧﻪ، ﺧﯩﺘﺎﻳﻨﯩﯔ ﺋﯘﻳﻐﯘﺭﻻﺭ ﻣﯘﺳﯘﻟﻤﺎﻥ ﺑﻮﻟﻐﺎﻧﻠﯩﻘﻰ ﺋﯘﭼﯘﻥ ﺋﯘﻻﺭﻧﻰ ﻧﺎﻫﺎﻳﯩﺘﯩﻤﯘ ﺋﯘﺗﯘﻗﻠﯘﻕ ﻫﺎﻟﺪﺍ " ﺗﯧﺮﺭﻭﺭﭼﻰ" ﺩﻩﭖ ﺋﺎﺗﺎﺷﻘﺎ ﻣﯘﯞﻩﭘﭙﻪﻕ ﺑﻮﻟﻐﺎﻧﻠﯩﻘﯩﻨﻰ ﻫﻪﻣﺪﻩ ﺧﯩﺘﺎﻳﻼﺭﻧﯩﯔ ﻣﯩﻠﻠﻪﺗﭽﯩﻠﯩﻚ ﺗﯘﻳﻐﯘﺳﯩﻐﺎ ﺋﻮﺕ ﻳﯧﻘﯩﺶ ﺋﺎﺭﻗﯩﻠﯩﻖ ﺋﯘﻳﻐﯘﺭﻻﺭﻏﺎ ﻗﺎﺭﺷﻰ ﺗﯘﺭﯗﺷﻘﺎ ﺋﯘﺭﯗﻧﯘﭖ ﻛﻪﻟﮕﻪﻧﻠﯩﻜﯩﻨﻰ ﻛﯚﺭﺳﻪﺗﺘﻰ.

ﻳﺎﯓ ﺟﯩﻴﻪﻧﻠﻰ: "ﺋﯘﻳﻐﯘﺭﻻﺭ ﺋﺎﺭﯨﺴﯩﺪﺍ ﺧﯩﺘﺎﻱ ﻛﻮﻣﭙﺎﺭﺗﯩﻴﯩﺴﯩﻨﯩﯔ ﺯﯨﻴﺎﻧﻜﻪﺷﻠﯩﻜﯩﮕﻪ ﺋﯘﭼﺮﯨﻤﯩﻐﺎﻥ ﺑﯩﺮﻩﺭﺳﯩﻤﯘ ﻳﻮﻕ ﺋﯩﻜﻪﻥ"

ﻳﺎﯓ ﺟﯩﻴﻪﻧﻠﻰ ﺧﯩﺘﺎﻳﻨﯩﯔ ﺋﯘﻳﻐﯘﺭﻻﺭﻧﻰ ﺗﯧﺮﺭﻭﺭﭼﻰ ﺩﻩﭖ ﺋﺎﺗﺎﺷﻘﺎ ﻛﯚﺭﺳﻪﺗﻜﻪﻥ ﺳﻪﯞﻩﺑﻠﯩﺮﻯ ﺋﯜﺳﺘﯩﺪﻩ ﺗﻮﺧﺘﯩﻠﯩﭗ: " ﺋﯘﻻﺭﻧﯩﯔ ﺋﯘﻳﻐﯘﺭﻻﺭﻧﻰ ﺗﯧﺮﺭﻭﺭﭼﻰ ﺩﻩﭖ ﻛﯚﺭﺳﯩﺘﯩﺸﯩﺪﯨﻜﻰ ﺑﯩﺮﺩﯨﻦ - ﺑﯩﺮ ﺑﺎﻫﺎﻧﯩﺴﻰ ﺋﯘﻳﻐﯘﺭﻻﺭ ﺯﻭﺭﺍﯞﺍﻥ ﯞﺍﺳﯩﺘﯩﻠﻪﺭﻧﻰ ﻗﻮﻟﻼﻧﺪﻯ ﺩﯦﻴﯩﺶ. ﺳﻮﺭﺍﭖ ﺑﺎﻗﺎﻱ، ﺧﯩﺘﺎﻳﻼﺭﻧﯩﯔ ﺋﺎﺭﯨﺴﯩﺪﺍ ﺯﻭﺭﺍﯞﺍﻥ ﯞﺍﺳﯩﺘﯩﻠﻪﺭﻧﻰ ﺋﯩﺸﻠﯩﺘﯩﺪﯨﻐﺎﻥ ﻛﯩﺸﯩﻠﻪﺭ ﻳﻮﻗﻤﯘ؟ ﺑﯩﺮ ﺧﯩﺘﺎﻳﻨﯩﯔ ﺯﻭﺭﺍﯞﺍﻥ ﯞﺍﺳﯩﺘﯩﻠﻪﺭﻧﻰ ﺋﯩﺸﻠﻪﺗﻜﻪﻧﻠﯩﻜﻰ ﺑﯩﻠﻪﻥ ﺑﺎﺭﻟﯩﻖ ﺧﯩﺘﺎﻳﻼﺭ ﺯﻭﺭﺍﯞﺍﻥ ﺋﯘﻧﺴﯘﺭﻻﺭﻏﺎ ﺋﺎﻳﻠﯩﻨﯩﭗ ﻗﺎﻻﻣﺪﯗ؟"

ﻳﺎﯓ ﺟﯩﻴﻪﻧﻠﻰ ﻳﻪﻧﻪ، ﺧﯩﺘﺎﻳﺪﺍ ﺋﯘﻳﻐﯘﺭ، ﺗﯩﺒﻪﺕ ﻗﺎﺗﺎﺭﻟﯩﻖ ﻣﯩﻠﻠﻪﺗﻠﻪﺭﻧﯩﯔ ﺋﯧﺰﯨﻠﯩﺸﻜﻪ ﺋﯘﭼﺮﯨﺸﯩﻨﯩﯔ ﺑﯩﺮ ﻧﻪﭼﭽﻪ ﻛﯜﻧﻠﯜﻙ ﺋﯩﺶ ﺋﻪﻣﻪﺳﻠﯩﻜﯩﻨﻰ، ﺋﯘﻻﺭﻧﯩﯔ ﺑﻪﻟﻜﻰ ﺧﯩﺘﺎﻱ ﻛﻮﻣﭙﺎﺭﺗﯩﻴﯩﺴﻰ ﺧﯩﺘﺎﻳﻐﺎ ﻫﯚﻛﯜﻣﺮﺍﻧﻠﯩﻖ ﻗﯩﻠﯩﺸﻘﺎ ﺑﺎﺷﻠﯩﻐﺎﻧﺪﯨﻦ ﺑﯘﻳﺎﻥ ﺩﺍﯞﺍﻣﻠﯩﺸﯩﭗ ﻛﯧﻠﯩﯟﺍﺗﻘﺎﻧﻠﯩﻘﯩﻨﻰ ﺑﯘﻧﻰ ﺋﺎﻣﯧﺮﯨﻜﯩﻐﺎ ﻛﻪﻟﮕﻪﻧﺪﯨﻦ ﻛﯩﻴﯩﻦ ﺗﯧﺨﯩﻤﯘ ﭼﻮﯕﻘﯘﺭ ﺗﻮﻧﯘﭖ ﻳﻪﺗﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﺋﯘ ﻣﯘﻧﺪﺍﻕ ﺩﯦﺪﻯ: " ﺋﺎﻣﯧﺮﯨﻜﯩﻐﺎ ﻛﻪﻟﮕﻪﻧﺪﯨﻦ ﻛﯧﻴﯩﻦ ﻧﯘﺭﻏﯘﻥ ﺋﯘﻳﻐﯘﺭ ﺩﻭﺳﺘﻼﺭ ﺑﯩﻠﻪﻥ ﺗﻮﻧﯘﺷﺘﯘﻡ ﻫﻪﻣﺪﻩ ﺋﯘﻗﺘﯘﻣﻜﻰ، ﺑﯘﻻﺭﻧﯩﯔ ﺋﺎﺭﯨﺴﯩﺪﺍ ﺧﯩﺘﺎﻱ ﻛﻮﻣﭙﺎﺭﺗﯩﻴﯩﺴﯩﻨﯩﯔ ﺯﯨﻴﺎﻧﻜﻪﺷﻠﯩﻜﯩﮕﻪ ﺋﯘﭼﺮﯨﻤﯩﻐﺎﻥ ﺑﯩﺮﻩﺭﺳﯩﻤﯘ ﻳﻮﻕ ﺋﯩﻜﻪﻥ."

ﺋﯘ ﻳﻪﻧﻪ: " ﺧﯩﺘﺎﻳﺪﺍ ﺑﻪﺯﻯ ﻛﯩﺸﯩﻠﻪﺭﻧﯩﯔ ﭼﻮﯓ ﺧﻪﻧﺰﯗﭼﯩﻠﯩﻖ ﺋﯩﺪﯨﻴﯩﺴﯩﻨﻰ ﺋﯩﺸﻘﺎ ﺳﯧﻠﯩﭗ ﻣﯩﻠﻠﻪﺗﭽﯩﻠﯩﻚ ﻫﯧﺴﺴﯩﻴﺎﺗﯩﻨﻰ ﻗﻮﺯﻏﺎﭖ ﻫﻪﺗﺘﺎ ﺋﯘﻳﻐﯘﺭﻻﺭﻧﻰ ﻛﯚﺭﯛﭖ ﺑﺎﻗﻤﺎﻱ ﺗﯘﺭﯗﭘﻤﯘ ﺋﯘﻳﻐﯘﺭﻻﺭﻏﺎ ﺋﯚﭺ ﺑﻮﻟﻤﺎﻗﺘﺎ. ﻣﺎﻧﺎ ﺑﯘ ﺭﯨﺌﺎﻟﻠﯩﻘﻨﻰ ﺧﯩﺘﺎﻱ ﻛﻮﻣﭙﺎﺭﺗﯩﻴﯩﺴﯩﻨﯩﯔ ﻫﺎﻛﯩﻤﯩﻴﯩﺘﻰ ﻛﻪﻟﺘﯜﺭﯛﭖ ﭼﯩﻘﺎﺭﻏﺎﻥ" ﺩﯦﺪﻯ.

ﻳﺎﯓ ﺟﯩﻴﻪﻧﻠﻰ ﺋﯚﺯﯨﻨﯩﯔ ﻧﯧﻤﻪ ﺋﯜﭼﯜﻥ ﺷﯘﻧﭽﻪ ﻳﯩﺮﺍﻗﺘﯩﻦ ﻛﯧﻠﯩﭗ ﺑﯜﮔﯜﻧﻜﻰ ﻧﺎﻣﺎﻳﯩﺸﻘﺎ ﻗﺎﺗﻨﺎﺷﻘﺎﻧﻠﯩﻘﯩﻨﯩﯔ ﺳﻪﯞﻩﺑﻰ ﺋﯜﺳﺘﯩﺪﻩ ﺗﻮﺧﺘﯩﻠﯩﭗ ﺑﯘ ﻛﯜﻧﻨﯩﯔ ﺋﻪﺳﻠﯩﺪﻩ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﯨﻦ ﺋﻮﻟﯩﻤﭙﯩﻚ ﻣﻪﺷﺌﯩﻠﻰ ﺋﯚﺗﯩﺪﯨﻐﺎﻥ ﻛﯜﻥ ﺋﯩﻜﻪﻧﻠﯩﻜﯩﻨﻰ، ﺋﻪﻣﻤﺎ ﺧﯩﺘﺎﻳﻨﯩﯔ ﯞﺍﻗﺘﯩﻨﻰ ﺋﯚﺯﮔﻪﺭﺗﯩﭗ ﭘﺎﺋﺎﻟﯩﻴﻪﺗﻨﻰ ﺑﯘﺭﯗﻥ ﺋﯧﻠﯩﭗ ﺑﺎﺭﻏﺎﻧﻠﯩﻘﯩﻨﻰ، ﺷﯘﻧﺪﺍﻗﺘﯩﻤﯘ ﺑﯜﮔﯜﻥ ﺋﯘﻳﻐﯘﺭﻻﺭ ﺑﯩﻠﻪﻥ ﺑﯩﺮﻟﯩﻜﺘﻪ ﺋﯘﻳﻐﯘﺭ ﺋﯩﻠﯩﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﯩﻨﻰ ﺳﯚﻛﯜﺵ ﺋﯜﭼﯜﻥ ﺑﯘ ﻳﻪﺭﮔﻪ ﻛﻪﻟﮕﻪﻧﻠﯩﻜﯩﻨﻰ ﺑﺎﻳﺎﻥ ﻗﯩﻠﺪﻯ.

ﻧﺎﻣﺎﻳﯩﺸﺘﺎ ﻳﻪﻧﻪ ﺧﯩﺘﺎﻱ ﺩﯦﻤﻮﻛﺮﺍﺗﯩﻴﻪ ﭘﺎﺭﺗﯩﻴﯩﺴﯩﻨﯩﯔ ﺭﻩﺋﯩﺴﻰ ﯞﺍﯓ ﺟﯜﻥ ﯞﻩ ﺧﯩﺘﺎﻱ ﻟﯩﺒﯧﺮﺍﻝ ﺩﯦﻤﻮﻛﺮﺍﺗﻼﺭ ﭘﺎﺭﺗﯩﻴﯩﺴﯩﻨﯩﯔ ﺭﻩﺋﯩﺴﻰ ﭼﯧﻦ ﻣﯩﯖﻼﺭﻣﯘ ﺳﯚﺯﮔﻪ ﭼﯩﻘﺘﻰ. ﺋﯘﻻﺭ ﻫﻪﺭ ﺋﯩﻜﻜﯩﻠﯩﺴﻰ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻨﯩﯔ ﺋﺎﻱ ﻳﯘﻟﺘﯘﺯﻟﯘﻕ ﺑﺎﻳﺮﯨﻘﯩﻨﻰ ﻛﯚﺗﯜﺭﯛﯞﺍﻟﻐﺎﻥ ﺋﯩﺪﻯ.

ﺋﺎﻣﯧﺮﯨﻜﺎ ﺋﯘﻳﻐﯘﺭ ﺑﯩﺮﻟﻪﺷﻤﯩﺴﯩﻨﯩﯔ ﺑﺎﺵ ﻛﺎﺗﯩﭙﻰ ﺋﺎﻟﯩﻢ ﺳﯩﻴﯩﺘﻮﻑ ﺑﯜﮔﯜﻧﻜﻰ ﻧﺎﻣﺎﻳﯩﺸﻨﯩﯔ ﺋﻪﻫﻤﯩﻴﯩﺘﻰ ﻫﻪﻗﻘﯩﺪﻩ ﺗﻮﺧﺘﺎﻟﺪﻯ ﯞﻩ ﺑﯘ ﺧﯩﻠﺪﯨﻜﻰ ﻧﺎﻣﺎﻳﯩﺸﻨﯩﯔ ﺋﯘﻳﻐﯘﺭ ﻣﯩﻠﻠﻲ ﺩﻩﯞﺍﺳﯩﻨﯩﯔ ﺋﯜﻧﯜﻣﯩﻨﻰ ﺋﺎﺷﯘﺭﯗﺷﻘﺎ ﭘﺎﻳﺪﯨﻠﯩﻖ ﺋﯩﻜﻪﻧﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﺩﻯ.