Хитай демократчилири өз баянида, завуттики хитайларниң пәқәтла 6 - Айниң 16 - Күни " җәнубий дияр " тор бетидә елан қилинған " 6 нәпәр уйғур 2 нәпәр хитай қизиға басқунчилиқ қилди" дегән қутратқулуқ характери еғир болған сахта учурғила тайинип 25 - Июн кечиси коллектип һалда топлинип, завуттики уйғур ишчилириниң ятиқиға бастуруп кирип, калтәк - Тоқмақлар билән уйғур ишчилирини уруп яриландуруп, һәтта өлүм вәқәсини кәлтүрүп чиқарғанлиқиға қарита өзлириниң қаттиқ әпсуслинидиғанлиқини билдүрди.

Радиомиз уйғур бөлүминиң зияритини қобул қилған, америкидики хитай демократчилиридин хоңкуңда чиқидиған "йөнилиш" журнилиниң баш муһәррири җаң вейго әпәнди алди билән бу вәқәдә зиянкәшликкә учриған уйғурларға болған һесдашлиқини билдүрүп, бир инсан болуш сүпити билән адәм урушқа қатнашқан хитай ишчилириниң бу хил инсан қелипидин чиққан явузлуқини өзиниң қобул қилалмайдиғанлиқини ипадилиди.

Җаң вейго әпәнди бу вәқәниң келип чиқишида, хитай коммунист һөкүмити йеқинқи 30 йилдин буян хитай яшлириға сиңдүрүватқан " чоң хитайчилиқ" идийиси билән биллә, ичкири хитай өлкилиридә, хитайниң һөкүмәт ахбарат вастилирида миллий баравәрлик тәләп қилған уйғурларни "милли бөлгүнчи", "террорчи", " дөләтни парчилашқа урунған " дәп тәшвиқ қилса, тирикчилик ғемидә ичкири хитай өлкилиридә яшашқа мәҗбур болуватқан уйғурларни " оғри", "янчуқчи" дегәнгә охшаш һақарәтлик нам билән атап, хитай хәлқигә уйғурлар тоғрилиқ тәтүр тәшвиқат йүргүзүп миллий мәсилини өткүрләштүрүвәтти дәп қарап, алди билән хитай һөкүмитиниң бухил вәқәләрниң келип чиқишидики мәсулийити сүрүштүрүлүши керәкликини тәкитлиди.


Җаң вейго әпәнди бу вәқәниң йүз беришидә хитай коммунист һөкүмитиниң тәтүр тәшвиқатидин башқа йәнә, хитай миллитиниң тарихтин буян шәкилләнгән өз характеридики өзидин башқа милләтләрни кәмситиштәк писхик амил сәвәб болған дәп қарайдиғанлиғини баян қилди.

Җаң вейго әпәнди, бу қетимлиқ қанлиқ вәқәдики хитай ишчилирини бу қәдәр рәһимсиз қиливәткән сәвәб, хитай коммунист һөкүмитиниң 60 йилдин буян елип барған синипий күрәш тәрбийиси, хитай миллитидә әслидинла аҗиз болған диний етиқадниң суслуқи вә хитайда бу йилларда техиму күчәйгән шәхсийәтчилик һәмдә нөвәттә дуня миқясида партлиған иқтисади бөһран шараитида, хитайдики ишсизлиқ нисбитиниң ешип бериши қатарлиқлардур дәп көрсәтти.

Җаң вейго әпәнди йәнә, хитай һөкүмити һазир йүргүзүватқан уйғур ишчилирини хитай өлкилиригә йөткәшниң әмәлийәттә, хитайниң таң сулалиси дәвридин қалған ассимилятсийә сияситиниң давами икәнликини, хитай демократчилириниң бу қилмишни әйиблиши керәкликини тәкитлиди.

Җаң вейго әпәнди сөзиниң ахирида, хитай һөкүмити елип бериватқан бу хил тәңсизлик сияситиниң ахирқи һесабта хитайниң өзини һалакәткә елип баридиғанлиқини тәкитләп, хитай зиялийлирини бу ишқа нисбәтән сәгәк позитсийидә болуп, хитай һөкүмитини бу хил инсанийәткә апәт елип келидиған қилмиштин тосушқа чақирди.

Пикир - Қарашлириңизни оттуриға қойуң

Пикир - Байанлириңиз тор башқурғучиси тәрипидин тәстиқлиниши керәк болуп, тор бәттә шу заман елан қилинмайду. Бир аз вақиттин кейин, пикир - Байанлириңизниң тәстиқланған йаки тәстиқланмиғанлиқини қайта тәкшүрүп көрүшигизни сораймиз. Пикир - Қарашлириңизни төвәндики җәдвәл арқилиқ, уйғур кона йезиқи бойичә йоллийалайсиз.

Исим (ихтийар)

Шәһәр (ихтийар)

Пикир - Қарашлириңиз