ﺋﯘﻳﻐﯘﺭﻻﺭﻧﯩﯔ ﺋﻪﻗﯩﻠﻠﯩﻖ ﺋﻪﺟﺪﺍﺩﻟﯩﺮﯨﻤﯘ ﺋﯚﺯ ﯞﺍﻗﺘﯩﺪﺍ ﺋﯩﻠﯩﻢ - ﻣﻪﺭﯨﭙﻪﺗﻜﻪ ﺋﺎﻻﻫﯩﺪﻩ ﭼﻮﯓ ﺋﻪﻫﻤﯩﻴﻪﺕ ﺑﻪﺭﮔﻪﻥ ﯞﻩ ﺩﯗﻧﻴﺎ ﻣﻪﺩﻩﻧﯩﻴﯩﺘﯩﮕﻪ ﺯﻭﺭ ﻫﻪﺳﺴﯩﻠﻪﺭﻧﻰ ﻗﻮﺷﯘﭖ، ﺋﯘﻧﺘﯘﻟﻤﺎﺱ ﻣﯩﺮﺍﺳﻼﺭﻧﻰ ﻗﺎﻟﺪﯗﺭﻏﺎﻥ. ﺋﻪﭘﺴﯘﺳﻜﻰ ﻫﺎﺯﯨﺮﻗﻰ ﻛﯜﻧﺪﻩ، ﯞﻩﺗﻪﻥ ﺋﯩﭽﻰ ﯞﻩ ﺳﯩﺮﺗﯩﺪﯨﻜﻰ ﺋﯘﻳﻐﯘﺭﻻﺭﻧﯩﯔ ﺋﺎﻧﺎ ﺗﯩﻠﻰ ﺧﻪﯞﭘﻜﻪ ﺋﯘﭼﺮﯨﻤﺎﻗﺘﺎ. ﺑﻮﻟﯘﭘﻤﯘ ﭼﻪﺗﺌﻪﻟﻠﻪﺭﺩﻩ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭﻻﺭﻧﯩﯔ ﺋﯚﺯ ﭘﻪﺭﺯﻩﻧﺘﻠﯩﺮﯨﮕﻪ ﺋﺎﻧﺎ ﺗﯩﻠﯩﻨﻰ ﺋﯚﮔﯩﺘﯩﭗ ﺗﻪﺭﺑﯩﻴﯩﻠﻪﺵ ﺷﺎﺭﺍﺋﯩﺘﻰ ﻫﻪﻣﻤﯩﻼ ﺟﺎﻳﺪﺍ ﺋﻮﯕﺎﻳﻠﯩﻖ ﺑﻮﻟﻤﯩﻐﺎﻧﻠﯩﻘﯩﻨﯩﯔ ﭼﻮﯓ ﺳﻪﯞﻩﺑﻰ ﺋﯘﻻﺭ ﺗﯘﺭﻏﺎﻥ ﻣﻪﻣﻠﯩﻜﻪﺗﻠﻪﺭﺩﻩ ﺋﯘﻳﻐﯘﺭ ﺗﯩﻠﯩﺪﺍ ﺋﻮﻗﯘﻳﺪﯨﻐﺎﻥ ﻣﻪﻛﺘﻪﭘﻠﻪﺭﻧﯩﯔ ﺑﻮﻟﻤﯩﻐﺎﻧﻠﯩﻘﻰ، ﺑﻮﻟﻐﺎﻧﺪﯨﻤﯘ ﻛﻪﻣﻠﯩﻜﻰ ﺋﯩﺪﻯ.

ﺋﯘﻳﻐﯘﺭﻻﺭ ﺋﻪﯓ ﺯﯨﭻ ﻳﻪﺭﻟﻪﺷﻜﻪﻥ ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﺪﻩﻙ ﺑﯩﺮ ﭼﻮﯓ ﻣﻪﻣﻠﯩﻜﻪﺗﺘﻪ ﺋﯘﻳﻐﯘﺭﻻﺭﻧﯩﯔ ﺋﯚﺯ ﺋﺎﻧﺎ ﺗﯩﻠﯩﺪﺍ ﺋﻮﻗﯘﻳﺪﯨﻐﺎﻥ ﺑﯩﺮﻩﺭ ﺋﯘﻳﻐﯘﺭ ﻣﻪﻛﺘﯩﭙﯩﻨﯩﯔ ﺑﻮﻟﻤﯩﻐﺎﻧﻠﯩﻘﻰ ﺑﯩﺮ ﺑﻮﺷﻠﯘﻕ ﺋﯩﺪﻯ. ﻳﯧﻘﯩﻨﺪﺍ ﻣﻪﻛﻜﻪ ﺷﻪﻫﯩﺮﯨﺪﻩ ﺗﯘﻧﺠﻰ ﺋﯘﻳﻐﯘﺭ ﻣﻪﻛﺘﯩﭙﻰ ﺋﯧﭽﯩﻠﺪﻯ. ﺑﯘ ﻣﻪﻛﺘﻪﭖ ﻳﯘﻗﯩﺮﯨﻘﻰ ﺑﻮﺷﻠﯘﻗﻨﻰ ﺗﻮﻟﺪﯗﺭﻏﯘﺳﻰ.

ﻣﻪﻛﻜﻪ ﺷﻪﻫﯩﺮﯨﺪﻩ ﺋﯧﭽﯩﻠﻐﺎﻥ ﺋﯘﻳﻐﯘﺭ ﻣﻪﻛﺘﯩﭙﯩﻨﯩﯔ ﺗﻪﻟﯩﻢ - ﺗﻪﺭﺑﯩﻴﻪ ﺋﯩﺸﻠﯩﺮﻯ ﻣﻪﺳﺌﯘﻟﻰ ﺋﺎﺑﺪﯗﻟﻼ ﻫﺎﺟﯩﻢ ﺑﯘ ﻫﻪﻗﺘﯩﻜﻰ ﺳﯚﻫﺒﯩﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﻐﺎﻥ ﺋﯩﺪﻯ.

ﻣﻪﻛﺘﻪﭖ ﻣﻪﺳﺌﯘﻟﻰ ﺑﯩﻠﻪﻥ ﺳﯚﻫﺒﻪﺕ

ﺋﺎﺑﺪﯗﻟﻼ ﻫﺎﺟﯩﻢ ﻣﻪﻛﻜﯩﺪﻩ ﺋﯧﭽﯩﻠﻐﺎﻥ ﺋﯘﻳﻐﯘﺭ ﻣﻪﻛﺘﯩﭙﯩﻨﻰ ﺗﻮﻧﯘﺷﺘﯘﺭﯗﭖ ﻣﯘﻧﺪﺍﻕ ﺩﯦﺪﻯ:" ﺋﯘﻳﻐﯘﺭﻻﺭ ﺯﯨﭻ ﺋﻮﺭﯗﻧﻼﺷﻘﺎﻥ ﻣﻪﻛﻜﻪ ﺷﻪﻫﯩﺮﯨﺪﻩ ﺑﯩﺮ ﺋﯘﻳﻐﯘﺭ ﻣﻪﻛﺘﯩﭙﻰ ﺋﯧﭽﯩﺶ ﺑﯘ ﻳﻪﺭﺩﯨﻜﻰ ﻛﻪﯓ ﺋﯘﻳﻐﯘﺭﻻﺭﻧﯩﯔ ﺋﯘﺯﯗﻥ ﻳﯩﻠﻼﺭﺩﯨﻦ ﺑﯩﺮﻯ ﺋﺎﺭﺯﯗ ﻗﯩﻠﯩﭗ ﻛﻪﻟﮕﻪﻥ ﺑﯩﺮ ﺋﺎﺭﻣﯩﻨﻰ ﺋﯩﺪﻯ. ﻣﻪﻛﺘﻪﭖ ﺋﺎﺧﯩﺮﻯ ﺋﯧﭽﯩﻠﺪﻯ. ﻣﻪﻛﺘﯩﭙﯩﻤﯩﺰ ﺋﯧﭽﯩﻠﯩﭗ ﺑﯜﮔﯜﻥ ﺋﯜﭼﯩﻨﭽﻰ ﻛﯜﻧﯩﮕﻪ ﻗﻪﺩﻩﻡ ﻗﻮﻳﺪﻯ. ﺋﻮﻗﯘﻏﯘﭼﯩﻼﺭ ﯞﻩ ﺋﺎﺗﺎ - ﺋﺎﻧﯩﻼﺭﻧﯩﯔ ﺑﯘ ﻳﯧﯖﻰ ﻣﻪﻛﺘﻪﭘﻜﻪ ﺑﻮﻟﻐﺎﻥ ﻗﯩﺰﻏﯩﻨﻠﯩﻘﻰ ﻧﺎﻫﺎﻳﯩﺘﻰ ﻳﯘﻗﯩﺮﻯ ﺑﻮﻟﻤﺎﻗﺘﺎ. ﺩﻩﺭﺳﻠﯩﻜﻠﯩﺮﯨﻤﯩﺰ ﻫﺎﺯﯨﺮﭼﻪ ﻗﯘﺭﺋﺎﻥ ﻛﻪﺭﯨﻢ، ﻫﻪﺩﯨﺲ، ﺗﻪﭘﺴﯩﺮ ﯞﻩ ﺋﻪﺧﻼﻗﺘﯩﻦ ﺋﯩﺒﺎﺭﻩﺕ ﺑﻮﻟﯘﭖ، ﻳﺎﺵ - ﺋﯚﺳﻤﯜﺭﻟﻪﺭﻧﯩﯔ ﺳﻪﯞﯨﻴﯩﺴﯩﮕﻪ ﻣﯘﻧﺎﺳﯩﭗ ﻫﺎﻟﺪﺍ ﺗﻪﻳﻴﺎﺭﻻﻧﺪﻯ. ﺋﻮﻗﯘﻏﯘﭼﯩﻼﺭ ﻫﻪﺭ ﻛﯜﻧﻰ ﺋﻪﺗﯩﮕﻪﻥ ﺳﺎﺋﻪﺕ ﺋﺎﻟﺘﯩﺪﻩ ﻛﯧﻠﯩﭗ ﻛﻪﭺ ﺳﺎﺋﻪﺕ ﺗﻮﻗﻘﯘﺯﺩﺍ ﻗﺎﻳﺘﯩﺪﯗ. ﺑﺎﻟﯩﻼﺭﻧﯩﯔ ﺋﻮﻗﯘﺷﻰ، ﺋﻮﻳﻨﺎﭖ ﻛﯚﯕﯜﻝ ﺋﯧﭽﯩﺸﻰ ﯞﻩ ﺩﻩﻡ ﺋﯧﻠﯩﺸﻰ ﻫﻪﻣﻤﯩﺴﻰ ﺑﯩﯟﺍﺳﯩﺘﻪ ﺋﻮﺭﯗﻧﻼﺷﺘﯘﺭﯗﻟﻐﺎﻥ ﭘﺮﻭﮔﺮﺍﻣﻤﯩﻼﺭ ﺋﯩﭽﯩﺪﻩ ﺑﻮﻟﯩﺪﯗ."

ﺋﯘﻳﻐﯘﺭ ﺗﯩﻠﻰ ﺩﻩﺭﺳﻠﯩﻜﻰ ﻳﻮﻟﻐﺎ ﻗﻮﻳﯘﻟﯘﺵ ﺋﺎﻟﺪﯨﺪﺍ

ﺋﺎﺑﺪﯗﻟﻼ ﻫﺎﺟﯩﻢ ﺑﯩﺰﻧﯩﯔ ﺋﯘﻳﻐﯘﺭ ﺗﯩﻠﻰ ﺩﻩﺭﺳﻠﯩﻜﻰ ﻫﻪﻗﻘﯩﺪﻩ ﺳﻮﺭﯨﻐﺎﻥ ﺳﻮﺋﺎﻟﯩﻤﯩﺰﻏﺎ ﺟﺎﯞﺍﺏ ﺑﯧﺮﯨﭗ ﻣﯘﻧﺪﺍﻕ ﺩﯦﺪﻯ:" ﺋﯘﻳﻐﯘﺭ ﺗﯩﻠﻰ ﺩﻩﺭﺳﻠﯩﻜﯩﮕﻪ ﻛﻪﻟﺴﻪﻙ، ﺑﯘ ﺩﻩﺭﺳﻠﯩﻚ ﭘﺮﻭﮔﺮﺍﻣﻤﯩﻤﯩﺰﺩﺍ ﺑﺎﺭ. ﺋﯘﻳﻐﯘﺭ ﺗﯩﻠﻰ ﺩﻩﺭﺳﻠﯩﻜﯩﻨﯩﯔ ﻣﯘﺋﻪﻟﻠﯩﻤﻠﯩﻜﯩﮕﻪ ﺗﺎﻟﻼﻧﻐﺎﻥ ﻛﯩﺸﯩﻠﻪﺭﻧﯩﯔ ﻫﻪﻣﻤﯩﺴﻰ ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﻨﯩﯔ ﻫﻪﺭ ﻗﺎﻳﺴﻰ ﺋﯘﻧﯩﯟﯦﺮﺳﯩﺘﯧﺘﻠﯩﺮﯨﺪﺍ ﺋﻮﻗﯘﯞﺍﺗﻘﺎﻥ ﺋﻮﻗﯘﻏﯘﭼﯩﻼﺭ ﺑﻮﻟﻐﺎﻧﻠﯩﻘﻰ ﺋﯜﭼﯜﻥ ﺋﯘﻻﺭ ﻫﺎﺯﯨﺮ ﺋﯧﻤﺘﯩﻬﺎﻥ ﻣﻪﺯﮔﯩﻠﯩﺪﻩ ﺑﻮﻟﯘﭖ ﻗﺎﻟﻐﺎﻥ. ﺷﯘ ﺳﻪﯞﻩﺑﺘﯩﻦ ﺑﯘ ﻫﻪﭘﺘﻪ ﺋﯘﻳﻐﯘﺭ ﺗﯩﻠﻰ ﺩﻩﺭﺳﻠﯩﻜﻰ ﻛﯧﭽﯩﻜﺘﯜﺭﯛﻟﺪﻯ. ﺋﯘﻧﻰ ﻛﯧﻠﯩﺪﯨﻐﺎﻥ ﺷﻪﻧﺒﻪ ﻛﯜﻧﯩﺪﯨﻦ ﺋﯧﺘﯩﺒﺎﺭﻩﻥ ﺭﻩﺳﻤﻰ ﺑﺎﺷﻼﻳﻤﯩﺰ."

ﺑﯘ ﻣﻪﻛﺘﻪﭘﺘﻪ ﻫﺎﺯﯨﺮ 35 ﺑﺎﻻ ﺋﻮﻗﯘﻳﺪﯗ

ﺋﺎﺑﺪﯗﻟﻼ ﻫﺎﺟﯩﻢ ﻳﻪﻧﻪ ﻣﯘﻧﺪﺍﻕ ﺩﯦﺪﻯ:" ﻣﻪﻛﺘﯩﭙﯩﻤﯩﺰﮔﻪ ﺩﻩﺳﻠﻪﭖ ﺋﯩﺴﻤﯩﻨﻰ ﺗﯩﺰﯨﻤﻼﺗﻘﺎﻧﻼﺭ ﺳﺎﻧﻰ 20 ﺑﻮﻟﯘﭖ، ﺑﯩﺮﯨﻨﭽﻰ ﻛﯜﻧﻰ 22 ﺋﻮﻗﯘﻏﯘﭼﻰ ﻛﻪﻟﺪﻯ. ﺋﯩﻜﻜﯩﻨﭽﻰ ﻛﯜﻧﻰ 28، ﺑﯜﮔﯜﻥ ﺋﯜﭼﯩﻨﭽﻰ ﻛﯜﻧﻰ 35 ﺋﻮﻗﯘﻏﯘﭼﻰ ﻛﻪﻟﺪﻯ. ﺋﻮﻗﯘﻏﯘﭼﯩﻼﺭ ﺳﺎﻧﯩﻨﯩﯔ ﻛﯜﻧﺪﯨﻦ - ﻛﯜﻧﮕﻪ ﺋﺎﺷﯩﺪﯨﻐﺎﻧﻠﯩﻘﻰ ﺋﯧﻨﯩﻖ. ﺑﯘ ﻣﻪﻛﺘﻪﭖ ﻣﻪﻛﻜﯩﺪﯨﻜﻰ ﻳﺎﻗﯘﭖ ﺑﻪﺩﻩﯞﻟﻪﺕ ﯞﻩﻗﭗ ﺑﯩﻨﺎﺳﯩﺪﺍ ﺋﯧﭽﯩﻠﻐﺎﻥ ﺑﻮﻟﯘﭖ، ﺋﻮﻗﯘﻏﯘﭼﯩﻼﺭﻧﯩﯔ ﻳﯧﻤﻪﻙ - ﺋﯩﭽﻤﻪﻛﻠﯩﺮﻯ ﯞﻩ ﺋﻮﻗﯘﺗﻘﯘﭼﯩﻼﺭﻧﯩﯔ ﻣﺎﺋﺎﺷﻠﯩﺮﻯ ﺷﯘ ﯞﻩﺧﭙﯩﻨﯩﯔ ﯞﻩ ﺑﯘ ﺟﺎﻳﺪﯨﻜﻰ ﺋﯘﻳﻐﯘﺭﻻﺭﻧﯩﯔ ﻣﺎﺩﺩﯨﻲ ﻳﺎﺭﺩﯨﻤﻰ ﺗﻪﻣﯩﻦ ﺋﯧﺘﯩﻠﻤﻪﻛﺘﻪ. ﻳﯧﻘﯩﻨﺪﺍ ﻳﻪﻧﻪ ﻗﯩﺰﻻﺭ ﺋﯜﭼﯜﻥ ﻣﻪﺧﺴﯘﺱ ﺑﯩﺮ ﻣﻪﻛﺘﻪﭖ ﺋﯧﭽﯩﺶ ﭘﯩﻼﻧﯩﻤﯩﺰ ﺑﺎﺭ. ﺑﯘ ﺟﺎﻳﺪﯨﻜﻰ ﻛﯚﭖ ﺳﺎﻧﻠﯩﻖ ﺋﯘﻳﻐﯘﺭﻻﺭﻧﯩﯔ ﺗﻪﻟﯩﭙﯩﻤﯘ ﺷﯘ ﺑﻮﻟﯘﭖ ﻛﻪﻟﺪﻯ."

ﺋﻮﻗﯘﻏﯘﭼﯩﻼﺭ ﺑﯩﻠﻪﻥ ﺳﯚﻫﺒﻪﺕ

ﻣﻪﻛﻜﯩﺪﻩ ﻳﯧﯖﻰ ﺋﯧﭽﯩﻠﻐﺎﻥ ﺋﯘﻳﻐﯘﺭ ﻣﻪﻛﺘﯩﭙﯩﻨﻰ ﺯﯨﻴﺎﺭﻩﺕ ﻗﯩﻠﯩﺶ ﺋﻪﺳﻨﺎﺳﯩﺪﺍ، ﺑﯘ ﻣﻪﻛﺘﻪﭘﺘﻪ ﺋﻮﻗﯘﯞﺍﺗﻘﺎﻥ ﺋﯘﻳﻐﯘﺭ ﺑﺎﻟﯩﻠﯩﺮﻯ ﺑﯩﻠﻪﻧﻤﯘ ﺳﯚﻫﺒﻪﺕ ﺋﯚﺗﻜﯜﺯﮔﻪﻥ ﺋﯩﺪﯗﻕ. ﺋﯘﻻﺭﻧﯩﯔ ﻫﻪﻣﻤﯩﺴﻰ ﺋﯚﺯﻟﯩﺮﯨﻨﯩﯔ ﺑﯘ ﻳﯧﯖﻰ ﻣﻪﻛﺘﻪﭘﺘﯩﻦ ﺋﯩﻨﺘﺎﻳﯩﻦ ﻣﻪﻣﻨﯘﻥ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﯛﺷﺘﻰ. ﺋﺎﺗﺎ - ﺋﺎﻧﯩﻼﺭﻣﯘ ﺑﺎﻟﯩﻠﯩﺮﯨﻨﯩﯔ ﺋﺎﻧﺎ ﯞﻩﺗﯩﻨﯩﺪﯨﻦ ﻳﯩﺮﺍﻗﺘﺎ ﺑﻮﻟﻐﺎﻥ ﺑﯘ ﻣﻪﻣﻠﯩﻜﻪﺗﺘﻪ ﺋﯘﻳﻐﯘﺭ ﺗﯩﻠﯩﺪﺍ ﺩﻩﺭﺱ ﺋﯚﮔﯩﻨﯩﺶ ﭘﯘﺭﺳﯩﺘﯩﮕﻪ ﺋﯧﺮﯨﺸﻜﻪﻧﻠﯩﻜﯩﺪﯨﻦ ﺑﻪﻛﻤﯘ ﺧﻮﺷﺎﻝ ﺑﻮﻟﯘﭖ، ﻫﺎﻳﺎﺟﺎﻧﻐﺎ ﺗﻮﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﯛﺷﺘﻰ.

ﺋﻮﻗﯘﻏﯘﭼﯩﻼﺭﻧﯩﯔ ﺋﺎﺳﺎﺳﻠﯩﻖ ﻛﯚﭖ ﻗﯩﺴﻤﻰ ﺋﯚﺳﻤﯜﺭ ﺑﺎﻟﯩﻼﺭ ﺑﻮﻟﺴﯩﻤﯘ، ﺋﺎﺯ ﺳﺎﻧﺪﺍ ﭼﻮﯕﻼﺭﻣﯘ ﻛﯧﻠﯩﭗ ﺋﻮﻗﯘﯞﯦﺘﯩﭙﺘﯘ. ﺑﯘ ﻫﻪﻗﯩﻘﻪﺗﻪﻥ ﺳﯚﻳﯜﻧﯜﺷﻜﻪ ﺗﯧﮕﯩﺸﻠﯩﻚ ﺋﯩﺶ ﺋﯩﺪﻯ. ﭼﯜﻧﻜﻰ ﺋﻮﻗﯘﺵ، ﺑﯩﻠﯩﻢ ﺋﯧﻠﯩﺸﻨﯩﯔ ﻳﺎﺵ ﺑﻪﻟﮕﯩﻠﯩﻤﯩﺴﻰ ﻳﻮﻕ.

ﺑﯘ ﻣﻪﻛﺘﻪﭘﻜﻪ ﺋﻮﻗﯘﻏﯘﭼﻰ ﺑﻮﻟﯘﭖ ﻛﻪﻟﮕﻪﻥ ﭼﻮﯕﻼﺭﺩﯨﻦ ﺋﺎﺑﺪﯗﻝ ﻣﯘﺗﻪﻟﻠﯩﭗ ﻫﺎﺟﯩﻢ ﺑﯩﻠﻪﻥ ﺳﯚﻫﺒﻪﺕ ﺋﯚﺗﻜﯜﺯﮔﻪﻥ ﺋﯩﺪﯗﻕ. ﺋﯘ ﻣﯘﻧﺪﺍﻕ ﺩﯦﺪﻯ:" ﺋﯩﻠﮕﯩﺮﻯ ﻳﯘﺭﺗﯩﻤﯩﺰﺩﺍ ﺋﻮﻗﯘﺵ ﺷﺎﺭﺍﺋﯩﺘﯩﻤﯩﺰ ﻳﺎﺧﺸﻰ ﺑﻮﻟﻤﯩﻐﺎﻧﻠﯩﻘﺘﯩﻦ، ﺩﯨﻨﯩﻲ ﺟﻪﻫﻪﺗﺘﻪ ﻫﯧﭽﻘﺎﻧﺪﺍﻕ ﺳﺎﯞﺍﺗﻘﺎ ﺋﯩﮕﻪ ﺑﻮﻻﻟﻤﯩﻐﺎﻥ ﺋﯩﺪﯨﻢ. ﭘﻪﻗﻪﺕ ﺋﯚﺯﻟﯩﻜﯩﻤﺪﯨﻦ ﻗﯘﺭﺋﺎﻥ ﺋﻮﻗﯘﺷﻨﻰ ﺋﯚﮔﯩﻨﯩﯟﺍﻟﻐﺎﻥ ﺑﻮﻟﺴﺎﻣﻤﯘ، ﺑﯘ ﻳﻪﺭﮔﻪ ﻛﻪﻟﮕﻪﻧﺪﯨﻦ ﻛﯧﻴﯩﻦ، ﺑﯩﻠﯩﻤﯩﻤﻨﯩﯔ ﺗﯚﯞﻩﻧﻠﯩﻜﯩﻨﻰ، ﺑﺎﺷﻘﯩﻼﺭ ﺋﺎﻟﺪﯨﺪﺍ ﻗﯩﺮﺍﺋﻪﺕ ﻗﯩﻠﯩﺸﺘﯩﻦ ﺧﯩﺠﯩﻞ ﺑﻮﻟﯩﺪﯨﻐﺎﻧﻠﯩﻘﯩﻤﻨﻰ ﻫﯧﺲ ﻗﯩﻠﺪﯨﻢ. ﺋﯚﺯﯛﻡ ﺋﯜﻥ ﺋﺎﻟﻐﯘﺩﯨﻦ ﺗﯩﯖﺸﺎﭖ ﺋﯚﮔﯩﻨﯩﺸﻜﻪ ﺗﯩﺮﯨﺸﯩﭗ ﻛﻪﻟﮕﻪﻥ ﺋﯩﺪﯨﻢ. ﺑﯘ ﻗﯧﺘﯩﻢ ﺑﯘ ﻣﻪﻛﺘﻪﭘﻨﯩﯔ ﺋﯧﭽﯩﻠﯩﺸﻰ ﺑﯩﻠﻪﻥ ﺑﯩﺰﮔﻪ ﺋﻮﺧﺸﯩﻐﺎﻧﻼﺭﻏﺎ ﻳﺎﺧﺸﻰ ﺷﺎﺭﺍﺋﯩﺖ ﻫﺎﺯﯨﺮﻻﻧﻐﺎﻥ ﺑﻮﻟﯘﭖ، ﺑﯘ ﺑﯩﺰ ﺋﯜﭼﯜﻥ ﺋﺎﻟﻼﻫﻨﯩﯔ ﭼﻮﯓ ﺭﻩﻫﻤﯩﺘﻰ ﺑﻮﻟﺪﻯ. ﻣﻪﻥ ﺑﯘ ﻣﻪﻛﺘﻪﭘﻨﻰ ﺋﺎﭼﻘﺎﻧﻼﺭﻏﺎ ﺭﻩﻫﻤﻪﺕ ﺋﯧﺘﯩﻤﻪﻥ. ﺩﻩﺭﺳﻠﯩﻜﯩﻤﯩﺰﮔﻪ ﻳﻪﻧﻪ ﺋﯘﻳﻐﯘﺭ ﯞﻩ ﺋﻪﺭﻩﺏ ﺗﯩﻠﻠﯩﺮﻯ ﻗﻮﺷﯘﻟﯩﺪﯨﻐﺎﻧﻠﯩﻘﯩﻤﯘ ﺑﯩﺰ ﺋﯜﭼﯜﻥ ﭼﻮﯓ ﭘﯘﺭﺳﻪﺕ. ﭼﯜﻧﻜﻰ ﺋﻪﺭﻩﺏ ﺗﯩﻠﻰ ﻗﯘﺭﺋﺎﻥ ﺗﯩﻠﻰ، ﺋﯘﻳﻐﯘﺭ ﺗﯩﻠﻰ ﺑﯩﺰ ﺋﯘﻳﻐﯘﺭﻻﺭﻧﻰ ﻳﻮﻗﯩﻠﯩﺸﺘﯩﻦ ﺳﺎﻗﻼﭖ ﻗﺎﻟﯩﺪﯨﻐﺎﻥ ﺗﯩﻞ. ﺑﯘ ﻳﻪﺭﺩﻩ ﺋﯚﺯﻟﯩﺮﯨﻨﻰ ﺋﯘﻳﻐﯘﺭ ﺩﻩﭖ ﻳﯜﺭﮔﻪﻥ ﻛﯚﭖ ﻛﯩﺸﯩﻠﻪﺭﻧﯩﯔ ﺋﯚﺯ ﺋﺎﻧﺎ ﺗﯩﻠﯩﻨﻰ ﺑﯩﻠﻤﻪﻳﺪﯨﻐﺎﻧﻠﯩﻘﻰ ﻣﯧﻨﻰ ﺑﻪﻙ ﺋﻪﭘﺴﯘﺳﻼﻧﺪﯗﺭﻏﺎﻥ ﺋﯩﺪﻯ. ﺋﯘﻳﻐﯘﺭ ﺗﯩﻠﻰ ﺩﻩﺭﺳﻠﯩﻜﻰ ﻛﯩﺮﮔﯜﺯﯛﻟﺴﻪ ﻣﻪﻥ ﺋﯘﻧﻰ ﻳﺎﻗﺘﯘﺭﯗﭖ ﺋﻮﻗﯘﻳﻤﻪﻥ."