ﻣﯘﺷﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﻧﻮﺭﯞﯦﮕﯩﻴﻪ ﺋﯘﻳﻐﯘﺭ ﻛﻮﻣﯩﺘﯧﺘﻰ ﻳﯧﻘﯩﻨﺪﺍ ﻫﻪﻳﺌﻪﺕ ﺋﻪﺯﺍﻟﯩﺮﯨﻨﻰ ﻳﯩﻐﯩﭗ ﻳﯩﻐﯩﻦ ﭼﺎﻗﯩﺮﯨﭗ ﻳﯧﻘﯩﻨﻘﻰ ﺑﯩﺮ ﻣﻪﺯﮔﯩﻠﻠﯩﻚ ﺧﯩﺰﻣﻪﺗﻠﻪﺭﻧﻰ ﺧﯘﻻﺳﯩﻼﺵ ﺑﯩﻠﻪﻥ ﺑﯩﺮ ﯞﺍﻗﯩﺘﺘﺎ ﺭﻭﺯﺍ ﺋﯧﻴﻰ ﻣﻪﺯﮔﯩﻠﯩﺪﯨﻜﻰ ﺋﻮﭘﭽﻪ ﺋﯩﭙﺘﺎﺭﻻﺵ، ﺩﯨﻨﯩﻲ ﺗﻪﺑﻠﯩﻎ ﻗﯩﻠﯩﺶ، ﺋﯚﺷﺮﻩ - ﺯﺍﻛﺎﺕ، ﭘﯧﺘﺮﻯ ﺗﺎﭘﺸﯘﺭﯗﺵ ﻣﻪﺳﯩﻠﯩﺴﻰ ﺋﯜﺳﺘﯩﺪﻩ ﺋﯚﺯ - ﺋﺎﺭﺍ ﻛﯧﯖﻪﺵ ﺋﯧﻠﯩﭗ ﺑﯧﺮﯨﭗ، ﺑﯘ ﻗﺎﺗﺎﺭﺩﯨﻜﻰ ﺩﯨﻨﯩﻲ ﭘﺎﺋﺎﻟﯩﻴﻪﺗﻠﻪﺭ ﺋﺎﺭﻗﯩﻠﯩﻖ ﺋﯘﻳﻐﯘﺭ ﻳﺎﺵ - ﺋﯚﺳﻤﯜﺭﻟﯩﺮﯨﻨﯩﯔ ﺩﯨﻨﯩﻲ ﺑﯩﻠﯩﻢ ﭼﯜﺷﻪﻧﭽﯩﺴﯩﻨﻰ ﺋﯚﺳﺘﯜﺭﯛﺷﻨﻰ ﻣﻪﻗﺴﻪﺕ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﻧﯚﯞﻩﺗﺘﻪ ﺩﯗﻧﻴﺎﺩﯨﻜﻰ ﺋﻪﯓ ﺑﺎﻱ ﺩﯙﻟﻪﺗﻠﻪﺭﻧﯩﯔ ﻗﺎﺗﺎﺭﯨﺪﺍ ﺳﺎﻧﯩﻠﯩﺪﯨﻐﺎﻥ ﻧﻮﺭﯞﯦﮕﯩﻴﯩﺪﻩ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭ ﻣﯘﺳﯘﻟﻤﺎﻧﻠﯩﺮﯨﻤﯘ ﺭﺍﻣﯩﺰﺍﻥ ﺋﯧﻴﯩﺪﺍ ﺋﯩﺴﻼﻡ ﺩﯨﻨﯩﺪﯨﻜﻰ ﺑﻪﺵ ﻣﯘﻫﯩﻢ ﭘﻪﺭﯨﺰﻧﯩﯔ ﺑﯩﺮﻯ ﺑﻮﻟﻐﺎﻥ ﺭﻭﺯﺍ ﺗﯘﺗﯘﺵ ﭘﺎﺋﺎﻟﯩﻴﯩﺘﯩﻨﻰ ﺋﯚﺯﻟﯩﺮﯨﻨﯩﯔ ﻳﺎﺧﺸﻰ ﺋﯩﻘﺘﯩﺴﺎﺩﻯ ﯞﻩ ﻣﻪﻧﯩﯟﯨﻲ ﺗﻪﻳﻴﺎﺭﻟﯩﻘﻰ ﺑﯩﻠﻪﻥ ﺧﺎﺗﯩﺮﺟﻪﻡ ﻫﺎﻟﺪﺍ ﺑﺎﺷﻠﯩﯟﻩﺗﺘﻰ.

ﺷﯩﻤﺎﻟﯩﻲ ﻳﺎﯞﺭﻭﭘﺎﻏﺎ ﺟﺎﻳﻼﺷﻘﺎﻥ ﻧﻮﺭﯞﯦﮕﯩﻴﻪ ﮔﻪﺭﭼﻪ ﺧﺮﯨﺴﺘﺌﺎﻥ ﺩﯨﻨﯩﻐﺎ ﺋﯧﺘﯩﻘﺎﺩ ﻗﯩﻠﯩﺪﯨﻐﺎﻥ ﺩﯙﻟﻪﺕ ﺑﻮﻟﺴﯩﻤﯘ، ﻟﯧﻜﯩﻦ ﺑﯘ ﺩﯙﻟﻪﺗﺘﻪ ﻳﺎﺷﺎﯞﺍﺗﻘﺎﻥ ﻫﻪﺭ ﺑﯩﺮ ﻣﯘﺳﯘﻟﻤﺎﻥ ﯞﻩ ﻳﺎﻛﻰ ﺑﺎﺷﻘﺎ ﺑﯩﺮ ﺩﯨﻨﺪﯨﻜﻰ ﻛﯩﺸﯩﻠﻪﺭﻧﯩﯔ ﺩﯨﻨﯩﻲ ﻫﻪﻕ - ﻫﻮﻗﯘﻗﻰ ﺩﻩﺧﻠﻰ - ﺗﻪﺭﯛﺯﮔﻪ ﺋﯘﭼﺮﯨﻤﺎﻳﺪﯗ، ﺋﻪﻛﺴﯩﭽﻪ، ﻗﺎﻧﯘﻥ ﺗﻪﺭﯨﭙﯩﺪﯨﻦ ﻗﺎﺗﺘﯩﻖ ﻗﻮﻏﺪﯨﻠﯩﻨﯩﺪﯗ. ﺑﯘ، ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﯘﻳﻐﯘﺭ ﻣﯘﺳﯘﻟﻤﺎﻧﻠﯩﺮﯨﻐﺎ ﻗﺎﺭﯨﺘﺎ ﺧﯩﺘﺎﻱ ﻫﯚﻛﯜﻣﯩﺘﻰ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺩﯨﻨﺴﯩﺰﻻﺷﺘﯘﺭﯗﺵ ﺳﯩﻴﺎﺳﯩﺘﻰ ﺑﯩﻠﻪﻥ ﺋﺎﺳﻤﺎﻥ - ﺯﯦﻤﯩﻦ ﺯﻭﺭ ﭘﻪﺭﻕ ﺑﻮﻟﯘﭖ، ﺋﯘﻳﻐﯘﺭ ﻣﯘﺳﯘﻟﻤﺎﻧﻠﯩﺮﯨﻨﯩﯔ ﺭﻭﺯﺍ ﺗﯘﺗﯘﺷﻰ، ﻧﻮﺭﻣﺎﻝ ﺩﯨﻨﯩﻲ ﺋﯩﺒﺎﺩﻩﺕ ﻗﯩﻠﯩﺸﻰ ﻫﻪﺗﺘﺎ ﺭﺍﻣﯩﺰﺍﻥ ﺋﯧﻴﯩﺪﺍ ﺋﯚﺯﻟﯩﺮﯨﻨﯩﯔ ﻳﯧﻤﻪﻛﻠﯩﻚ ﺗﯩﺠﺎﺭﯨﺘﯩﻨﻰ ﺗﻮﺧﺘﯩﺘﯩﺸﯩﻐﯩﻤﯘ ﻫﻮﻗﯘﻕ ﺑﯧﺮﯨﻠﻤﯩﮕﻪﻥ ﻫﻪﻗﺴﯩﺰﻟﯩﻘﻰ ﺑﯩﻠﻪﻥ ﺳﯧﻠﯩﺸﺘﯘﺭﻣﯩﺴﻰ ﺋﯩﻨﺘﺎﻳﯩﻦ ﺯﻭﺭ ﺑﻮﻟﻐﺎﻥ ﭘﻪﺭﻗﺘﯘﺭ.

ﻧﺎﻣﺮﺍﺗﻠﯩﻖ، ﻫﻮﻗﯘﻗﺴﯩﺰﻟﯩﻖ ﻫﯚﻛﯜﻡ ﺳﯜﺭﯛﯞﺍﺗﻘﺎﻥ ﺋﯘﻳﻐﯘﺭ ﺋﯧﻠﯩﺪﻩ ﺋﯩﻨﺘﺎﻳﯩﻦ ﻛﯚﭖ ﻛﯩﺸﯩﻠﻪﺭﻧﯩﯔ ﺭﻭﺯﺍ ﺋﯧﻴﯩﺪﺍ ﻳﺎﺧﺸﻰ ﻳﻪﭖ - ﺋﯩﭽﯩﭗ ﺭﻭﺯﺍ ﺗﯘﺗﯘﺷﻰ ﺋﯜﭼﯜﻥ ﻳﯧﺘﻪﺭﻟﯩﻚ ﺋﯩﻘﺘﯩﺴﺎﺩﯨﻲ ﺷﺎﺭﺍﺋﯩﺘﻰ ﺑﻮﻟﻤﯩﺴﯩﻤﯘ، ﻟﯧﻜﯩﻦ ﺭﻭﺯﺍ ﺗﯘﺗﯘﺷﻨﯩﯔ ﺧﺎﺳﯩﻴﯩﺘﻰ ﯞﻩ ﺋﺎﻟﻼﻫﻘﺎ ﺑﻮﻟﻐﺎﻥ ﭼﻮﯕﻘﯘﺭ ﺋﯧﺘﯩﻘﺎﺩﻯ ﺗﯜﭘﻪﻳﻠﯩﺪﯨﻦ ﻧﺎﭼﺎﺭ ﻳﯧﺴﯩﻤﯘ، ﻳﻪﻧﯩﻼ ﺋﯚﺯﯨﻨﯩﯔ ﺩﯨﻨﯩﻲ ﭘﻪﺭﺯﯨﻨﻰ ﺋﺎﺩﺍ ﻗﯩﻠﯩﺸﻨﻰ ﺩﯨﻨﯩﻲ ﺑﯘﺭﭼﻰ ﺩﻩﭖ ﺑﯩﻠﯩﭗ ﻛﯧﻠﯩﯟﺍﺗﻘﺎﻧﻼﺭ ﺑﻪﻛﻤﯘ ﻛﯚﭖ.

ﻳﯘﻗﯩﺮﯨﻘﻰ ﺋﺎﯞﺍﺯ ﺋﯘﻟﯩﻨﯩﺸﯩﺪﯨﻦ، ﻣﯘﺷﯘ ﻣﻪﺳﯩﻠﻪ ﺋﯜﺳﺘﯩﺪﻩ ﻧﻮﺭﯞﯦﮕﯩﻴﯩﺪﻩ ﻳﺎﺷﺎﯞﺍﺗﻘﺎﻥ ﺋﯚﻣﻪﺭ ﻫﺎﺟﯩﻢ ﺑﯩﻠﻪﻥ ﺑﻮﻟﻐﺎﻥ ﺳﯚﻫﺒﻪﺗﻨﯩﯔ ﺗﻪﭘﺴﯩﻼﺗﯩﻨﻰ ﺳﯩﻠﻪﺭﮔﻪ ﺳﯘﻧﺪﯗﻕ.