ﻣﺎﻗﺎﻟﯩﻨﯩﯔ ﺋﺎﭘﺘﻮﺭﻯ ﻧﯘﺭﻯ ﺗﯜﺭﻛﻪﻝ ﺋﺎﻣﯧﺮﯨﻜﺎ ﺋﯘﻳﻐﯘﺭ ﺟﻪﻣﺌﯩﻴﯩﺘﯩﻨﯩﯔ ﺳﺎﺑﯩﻖ ﺭﻩﺋﯩﺴﻰ. ﻧﯚﯞﻩﺗﺘﻪ ﯞﺍﺷﯩﻨﮕﺘﻮﻧﺪﯨﻜﻰ ﺑﯩﺮ ﺗﯩﺠﺎﺭﯨﻲ ﻗﺎﻧﯘﻥ ﻣﯘﻻﺯﯨﻤﻪﺕ ﺷﯩﺮﻛﯩﺘﯩﻨﯩﯔ ﺋﺎﺩﯞﯗﻛﺎﺗﻰ. ﺋﯘ ﻣﺎﻗﺎﻟﯩﺴﯩﺪﺍ، ﮔﯜﻩﻧﺘﺎﻧﺎﻣﻮﺩﯨﻜﻰ ﺋﯘﻳﻐﯘﺭﻻﺭﻧﻰ ﺋﺎﻣﯧﺮﯨﻜﯩﻐﺎ ﻳﻪﺭﻟﻪﺷﺘﯜﺭﯛﺷﻨﻰ ﺋﻪﯓ ﺗﻮﻏﺮﺍ ﻳﻮﻝ ﺩﻩﭖ ﻛﯚﺭﺳﯩﺘﯩﺪﯗ ﯞﻩ ﻣﯘﻧﺪﺍﻕ ﻳﺎﺯﯨﺪﯗ: ﺷﯘﻧﺪﺍﻕ، ﺋﯘﻳﻐﯘﺭﻻﺭﻧﻰ ﺋﺎﻣﯧﺮﯨﻜﯩﻐﺎ ﻳﻪﺭﻟﻪﺷﺘﯜﺭﯛﺵ ﺑﻪﻟﮕﯩﻠﯩﻚ ﻗﯩﻴﯩﻨﭽﯩﻠﯩﻘﻼﺭﻧﻰ ﺗﯘﻏﺪﯗﺭﯨﺪﯗ، ﺋﻪﻣﻤﺎ ﺋﺎﺭﯨﺪﯨﻦ 6 ﻳﯩﻞ ﺋﯚﺗﻜﻪﻥ ﺑﯜﮔﯜﻧﻜﻰ ﻛﯜﻧﺪﻩ ﺋﯩﺸﻨﯩﯔ ﺗﻮﻏﺮﯨﺴﻰ ﺑﯘ. ﺋﺎﭘﺘﻮﺭ ﻳﻪﻧﻪ ﻣﯘﻧﺪﺍﻕ ﻳﺎﺯﯨﺪﯗ: ﺧﯩﺘﺎﻱ ﺩﯨﭙﻠﻮﻣﺎﺗﯩﻚ ﻗﺎﻧﺎﻟﻠﯩﺮﻯ ﺋﺎﺭﻗﯩﻠﯩﻖ، 100 ﺩﯨﻦ ﺋﺎﺭﺗﯘﻕ ﺩﯙﻟﻪﺗﻨﯩﯔ ﺑﯘ ﻣﻪﻫﺒﯘﺳﻼﺭﻧﻰ ﻗﻮﺑﯘﻝ ﻗﯩﻠﯩﺸﯩﻐﺎ ﺗﻮﺳﻘﯘﻧﻠﯘﻕ ﻗﯩﻠﺪﻯ. ﺋﺎﻣﯧﺮﯨﻜﯩﻨﯩﯔ ﻗﻮﺑﯘﻝ ﻗﯩﻠﯩﺸﯩﻐﯩﻤﯘ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﯨﺪﯨﻐﺎﻧﻠﯩﻘﻰ ﺋﯧﻨﯩﻖ، ﺋﻪﻣﻤﺎ، ﺋﺎﻣﯧﺮﯨﻜﺎ ﺑﯘ ﺋﯩﺸﻨﻰ ﺋﺎﻣﯧﺮﯨﻜﺎ ﺋﺎﺳﺎﺳﯩﻲ ﻗﺎﻧﯘﻧﻰ ﯞﻩ ﺟﯩﻨﺎﻳﻰ ﺋﯩﺸﻼﺭ ﻗﺎﻧﯘﻧﻰ ﺑﯘﻳﯩﭽﻪ ﺧﯩﺘﺎﻳﻐﺎ ﭼﯜﺷﻪﻧﺪﯛﺭﯛﭖ ﺑﯧﺮﻩﻟﻪﻳﺪﯗ.

ﻧﯘﺭﻯ ﺗﯜﺭﻛﻪﻝ ﻣﺎﻗﺎﻟﯩﺴﯩﺪﻩ ﻳﻪﻧﻪ، ﺋﯘﻳﻐﯘﺭﻻﺭﻧﯩﯔ ﺋﺎﻣﯧﺮﯨﻜﯩﻠﯩﻘﻼﺭ ﺑﯩﻠﻪﻥ ﻣﻪﻳﻠﻰ ﺗﺎﺭﯨﺨﺘﺎ، ﻣﻪﻳﻠﻰ ﺑﯜﮔﯜﻥ ﺑﻮﻟﺴﯘﻥ ﺑﯩﺮ ﻣﻪﻧﭙﻪﺋﻪﺕ ﺗﻮﻗﯘﻧﯘﺷﻰ ﺑﻮﻟﻤﯩﻐﺎﻧﻠﯩﻘﯩﻨﻰ، ﮔﯜﻩﻧﺘﺎﻧﺎﻣﻮﺩﯨﻜﻰ ﺋﯘﻳﻐﯘﺭﻻﺭﻧﯩﯔ ﺧﯩﺘﺎﻳﻐﺎ ﻗﺎﺭﺷﻰ ﺋﻪﺭﻛﯩﻨﻠﯩﻚ ﺟﻪﯕﭽﯩﻠﯩﺮﻯ ﺋﯩﻜﻪﻧﻠﯩﻜﯩﻨﻰ، ﺋﯘﻻﺭﻧﯩﯔ ﺋﺎﻣﯧﺮﯨﻜﯩﻐﺎ ﻗﺎﺭﯨﺘﺎ ﺑﯩﺮ ﺗﻪﻫﺪﯨﺖ ﺋﺎﻣﯩﻠﻰ ﺑﻮﻟﯘﺷﻨﯩﯔ ﻣﯘﻣﻜﯩﻨﺴﯩﺰﻟﯩﻜﯩﻨﻰ ﺑﺎﻳﺎﻥ ﻗﯩﻠﯩﺪﯗ ﯞﻩ ﻣﯘﻧﺪﺍﻕ ﻳﺎﺯﯨﺪﯗ: ﺋﺎﻣﯧﺮﯨﻜﯩﺪﺍ ﺋﯘﻳﻐﯘﺭﻻﺭﻧﯩﯔ ﺳﯩﻴﺎﺳﯩﻲ ﭘﺎﻧﺎﻫﻠﯩﻖ ﺗﯩﻠﯩﺸﻰ ﻣﯘﺷﯘ ﺋﻪﺳﯩﺮﻧﯩﯔ 50 ‏ - ﻳﯩﻠﻠﯩﺮﻯ ﺑﺎﺷﻼﻧﻐﺎﻥ. ﻫﺎﺯﯨﺮﻏﺎ ﻗﻪﺩﻩﺭ ﺋﺎﻣﯧﺮﯨﻜﯩﺪﺍ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭﻻﺭﻧﯩﯔ ﻣﯘﺗﻠﻪﻕ ﻛﯚﭖ ﻗﯩﺴﻤﻰ ﺳﯩﻴﺎﺳﯩﻲ ﭘﺎﻧﺎﻫﻠﯩﻖ ﺗﯩﻠﯩﮕﻪﻥ، ﺋﯘﻻﺭ ﺑﯜﮔﯜﻥ ﻫﻪﺭ ﻗﺎﻳﺴﻰ ﺳﺎﻫﻪﺩﯨﻜﻰ ﻧﻪﺗﯩﺠﯩﻠﯩﺮﻯ ﺑﯩﻠﻪﻥ ﺋﺎﻣﯧﺮﯨﻜﺎ ﺟﻪﻣﺌﯩﻴﯩﺘﯩﮕﻪ ﺗﻮﻫﭙﻪ ﻗﻮﺷﯘﯞﺍﺗﯩﺪﯗ. ﻧﯘﺭﻯ ﺗﯘﺭﻛﻪﻝ ﭘﯩﻜﺮﯨﻨﻰ ﻣﯘﻧﺪﺍﻕ ﺩﺍﯞﺍﻣﻼﺷﺘﯘﺭﯨﺪﯗ: ﺑﯩﺰ ﺑﯩﻠﻪﻥ ﻳﻪﻧﻰ ﺑﯜﮔﯜﻥ ﺋﺎﻣﯧﺮﯨﻜﯩﺪﺍ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭﻻﺭ ﺑﯩﻠﻪﻥ ﺑﯜﮔﯜﻥ ﮔﯜﻩﻧﺘﺎﻧﺎﻣﻮﺩﺍ ﺗﯘﺭﯗﯞﺍﺗﻘﺎﻥ ﺋﯘﻳﻐﯘﺭﻻﺭﻧﯩﯔ ﺋﺎﺭﯨﺴﯩﺪﺍ ﺑﯩﺮﻻ ﭘﻪﺭﻕ ﺑﺎﺭ، ﺋﯘ ﺑﻮﻟﺴﯩﻤﯘ، ﺑﯩﺰ ﺑﯘ ﻳﻪﺭﮔﻪ ﺋﺎﻳﺮﻭﭘﯩﻼﻥ ﺋﺎﺭﻗﯩﻠﯩﻖ ﻛﻪﻟﺪﯗﻕ، ﺋﯘﻻﺭ ﺑﻮﻟﺴﺎ ﺗﺎﻍ ﺋﺎﺗﻼﭖ ﻛﻪﻟﺪﻯ، ﻳﻪﻧﻰ ﺗﯘﺗﯘﻟﯘﭖ ﻛﻪﻟﺪﻯ.

ﻧﯘﺭﻯ ﺗﯜﺭﻛﻪﻝ ﻣﺎﻗﺎﻟﯩﺴﯩﺪﻩ ﻳﻪﻧﻪ، ﺋﯘﻳﻐﯘﺭﻻﺭﻧﯩﯔ ﺋﻪﺯﻩﻟﺪﯨﻦ ﺋﻪﺭﻛﯩﻨﻠﯩﻚ ﯞﻩ ﺩﯦﻤﻮﻛﺮﺍﺗﯩﻴﻪﭘﻪﺭﯞﻩﺭ ﺧﻪﻟﻖ ﺋﯩﻜﻪﻧﻠﯩﻜﻰ، ﺋﯘﻳﻐﯘﺭﻻﺭﻧﯩﯔ ﺑﯜﮔﯜﻧﻜﻰ ﻛﯜﺭﯨﺸﯩﻨﯩﯔ ﺋﺎﻟﺪﯨﻨﻘﻰ ﺋﻪﺳﯩﺮﺩﻩ ﻗﯘﺭﻏﺎﻥ ﻣﯩﻠﻠﯩﻲ ﯞﻩ ﺩﯦﻤﻮﻛﺮﺍﺗﯩﻚ ﺩﯙﻟﯩﺘﯩﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺵ ﺋﯩﻜﻪﻧﻠﯩﻜﯩﻨﻰ ﺷﯘ ﺳﻪﯞﻩﺑﺘﯩﻦ، ﺋﺎﻣﯧﺮﯨﻜﯩﻨﯩﯔ ﻧﯚﯞﻩﺗﺘﻪ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺩﯨﻜﺘﺎﺗﻮﺭﻻﺭﻏﺎ ﻗﺎﺭﺷﻰ ﻫﻪﺭﯨﻜﯩﺘﯩﻨﻰ ﺋﯘﻳﻐﯘﺭﻻﺭﻣﯘ ﻗﺎﺭﺷﻰ ﺋﯧﻠﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﯛﭖ ﺋﯚﺗﺘﻰ.

ﺑﯩﺰ ﺑﯜﮔﯜﻥ ﺋﺎﺩﯞﻭﻛﺎﺕ ﻧﯘﺭﻯ ﺗﯜﺭﻛﻪﻝ ﺑﯩﻠﻪﻥ ﮔﯜﻩﻧﺘﺎﻧﺎﻣﻮﺩﯨﻜﻰ ﺋﯘﻳﻐﯘﺭﻻﺭ ﻣﻪﺳﯩﻠﯩﺴﯩﻨﯩﯔ ﺋﯘﻳﻐﯘﺭ ﺩﺍﯞﺍﺳﯩﺪﯨﻜﻰ ﺋﻮﺭﻧﻰ ﻫﻪﻗﻘﯩﺪﻩ ﭘﯩﻜﯩﺮ ﺋﯩﮕﯩﻠﯩﺪﯗﻕ. ﺋﯘﻧﯩﯔ ﻗﺎﺭﯨﺸﯩﭽﻪ، ﮔﯜﻩﻧﺘﺎﻧﺎﻣﻮﺩﯨﻜﻰ ﺋﯘﻳﻐﯘﺭﻻﺭ ﻣﻪﺳﯩﻠﯩﺴﻰ ﻳﺎﻟﻐﯘﺯ ﺋﻮﻥ ﻧﻪﭼﭽﻪ ﺋﯘﻳﻐﯘﺭﻧﯩﯔ ﻫﺎﻳﺎﺗﯩﻲ ﺑﯩﺨﻪﺗﻪﺭﻟﯩﻜﻰ ﻣﻪﺳﯩﻠﯩﺴﻰ ﺋﻪﻣﻪﺱ، ﺑﻪﻟﻜﻰ ﺑﯩﺮ ﻣﯩﻠﻠﻪﺗﻨﯩﯔ ﻣﯘﺳﺘﻪﻗﯩﻠﻠﯩﻖ ﺩﺍﯞﺍﺳﯩﻨﯩﯔ ﻫﻪﻗﻘﺎﻧﯩﻴﻠﯩﻖ ﻣﻪﺳﯩﻠﯩﺴﯩﺪﯗﺭ.

ﮔﯜﻩﻧﺘﺎﻧﺎﻣﻮﺩﯨﻜﻰ ﻫﻪﺭ ﺑﯩﺮ ﺋﯘﻳﻐﯘﺭﻧﯩﯔ ﺩﺍﯞﺍﺳﯩﻨﯩﯔ، ﺑﯜﮔﯜﻥ ﺋﺎﻣﯧﺮﯨﻜﺎ ﺳﻮﺗﯩﺪﺍ ﺑﯩﺮ ﻣﯩﻠﻠﻪﺗﻨﯩﯔ ﺩﺍﯞﺍﺳﻰ ﺳﯜﭘﯩﺘﯩﺪﻩ ﺋﻮﺗﺘﯘﺭﯨﻐﺎ ﭼﯩﻘﯩﯟﺍﺗﻘﺎﻧﻠﯩﻘﯩﻨﻰ ﺋﻪﺳﻜﻪﺭﺗﻜﻪﻥ ﻧﯘﺭﻯ ﺗﯜﺭﻛﻪﻝ، ﺑﯘ ﻣﺎﻗﺎﻟﯩﻨﻰ ﻳﯧﺰﯨﺶ ﻣﻪﻗﺴﯩﺘﻰ ﻫﻪﻗﻘﯩﺪﻩ ﻣﯘﻧﺪﺍﻕ ﺗﻮﺧﺘﯩﻠﯩﺪﯗ: ﻧﯘﺭﻯ ﺗﯜﺭﻛﻪﻟﻨﯩﯔ ﻗﺎﺭﯨﺸﯩﭽﻪ، ﮔﯜﻩﻧﺘﺎﻧﺎﻣﻮﺩﯨﻜﻰ ﺋﯘﻳﻐﯘﺭﻻﺭ ﻣﻪﺳﯩﻠﯩﺴﻰ ﺑﯜﮔﯜﻥ ﻳﺎﺧﺸﻰ ﺑﯩﺮ ﻳﯚﻧﯜﻟﯜﺷﻜﻪ ﻳﯜﺯﻟﻪﻧﺪﻯ ﺋﻪﻣﻤﺎ، ﺋﯘﻻﺭﻧﯩﯔ ﻫﺎﻳﺎﺗﻰ ﺧﻪﭖ - ﺧﻪﺗﻪﺭﺩﯨﻦ ﺗﺎﻣﺎﻣﻪﻥ ﻗﯘﺗﯘﻟﯘﭖ ﺑﻮﻟﻤﯩﺪﻯ.

ﻧﯘﺭﻯ ﺗﯜﺭﻛﻪﻝ ﮔﯜﻩﻧﺘﺎﻧﺎﻣﻮﺩﯨﻜﻰ ﺋﯘﻳﻐﯘﺭﻻﺭ ﻣﻪﺳﯩﻠﯩﺴﯩﻨﻰ، ﻣﯘﻫﺎﺟﯩﺮﻩﺗﺘﯩﻜﻰ ﺋﯘﻳﻐﯘﺭ ﺗﻪﺷﻜﯩﻼﺗﻠﯩﺮﻯ ﺑﯩﻠﻪﻥ ﺧﯩﺘﺎﻱ ﻫﯚﻛﯜﻣﯩﺘﻰ ﺋﺎﺭﯨﺴﯩﺪﺍ ﺧﻪﻟﻘﺌﺎﺭﺍ ﺳﻪﻫﻨﯩﺪﯨﻜﻰ ﺋﻪﯓ ﻛﻪﺳﻜﯩﻦ ﺑﯩﺮ ﻛﯜﺭﻩﺵ ﺩﻩﭖ ﻗﺎﺭﺍﻳﺪﯗ.