ﺋﺎﻣﯧﺮﯨﻜﺎ ﭘﺮﯨﺰﯨﺪﯦﻨﺘﻰ ﺑﺎﺭﺍﻙ ﺋﻮﺑﺎﻣﺎ ﺑﯘ ﻳﯩﻠﻠﯩﻖ ﻧﻮﺑﯧﻞ ﺗﯧﻨﭽﻠﯩﻖ ﻣﯘﻛﺎﭘﺎﺗﯩﻐﺎ ﻻﻳﯩﻖ ﻛﯚﺭﯛﻟﺪﻯ. ﻣﻪﺭﻛﯩﺰﻯ ﻧﻮﺭﯞﯨﮕﯩﻴﯩﻨﯩﯔ ﺋﻮﺳﻠﻮ ﺷﻪﻫﯩﺮﯨﮕﻪ ﺟﺎﻳﻼﺷﻘﺎﻥ ﻧﻮﺑﯧﻞ ﻣﯘﻛﺎﭘﺎﺗﻰ ﻛﻮﻣﯩﺘﯧﺘﻰ ﺑﺎﺭﺍﻙ ﺋﻮﺑﺎﻣﺎﻧﯩﯔ ﻣﯘﻛﺎﭘﺎﺗﻘﺎ ﻻﻳﯩﻖ ﻛﯚﺭﯛﻟﯜﺷﯩﻨﯩﯔ ﺳﻪﯞﻩﺑﯩﻨﻰ "ﻣﯘﯞﺍﭘﭙﻪﻗﯩﻴﻪﺗﻠﯩﻚ ﻫﺎﻟﺪﺍ ﻳﯜﺭﮔﯜﺯﯛﯞﺍﺗﻘﺎﻥ ﺩﯨﭙﻠﻮﻣﺎﺗﯩﻴﯩﺴﻰ ﯞﻩ ﻳﺎﺩﺭﻭ ﻗﻮﺭﺍﻟﻠﯩﺮﯨﻨﻰ ﻗﯩﺴﻘﺎﺭﺗﯩﺶ ﺋﯜﭼﯜﻥ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﻫﻪﺭﯨﻜﻪﺗﻠﯩﺮﻯ ﺋﯜﭼﯜﻥ " ﺩﻩﭖ ﻛﯚﺭﺳﻪﺗﺘﻰ.

ﻧﻮﺑﯧﻞ ﺗﯧﻨﭽﻠﯩﻖ ﻣﯘﻛﺎﭘﺎﺗﯩﻨﯩﯔ ﺑﺎﺭﺍﻙ ﺋﻮﺑﺎﻣﺎﻏﺎ ﺑﯧﺮﯨﻠﯩﺸﻰ ﺧﻪﻟﻘﺌﺎﺭﺍﺩﺍ ﻛﯜﭼﻠﯜﻙ ﻣﯘﻧﺎﺯﯨﺮﻩ ﭘﻪﻳﺪﺍ ﻗﯩﻠﺪﻯ. ﻫﻪﺭ ﺳﺎﻫﻪ ﻛﯩﺸﯩﻠﻪﺭ ﺑﯘﻧﯩﯖﻐﺎ ﻧﯩﺴﺒﻪﺗﻪﻥ ﺋﻮﺧﺸﯩﻤﺎﻳﺪﯨﻐﺎﻥ ﭘﯩﻜﯩﺮﻟﻪﺭﺩﻩ ﺑﻮﻟﺪﻯ. ﺋﻪﻣﻤﺎ ﺷﯘﻧﯩﺴﻰ ﺋﯧﻨﯩﻘﻜﻰ، ﺑﯘ ﻗﺎﺭﺍﺭ ﻫﻪﻣﻤﻪ ﻛﯩﺸﯩﻨﻰ ﻫﻪﻳﺮﺍﻥ ﻗﺎﻟﺪﯗﺭﺩﻯ. ﻗﺎﺭﺍﺭ ﺋﯧﻼﻥ ﻗﯩﻠﯩﻨﻐﺎﻧﺪﯨﻦ ﻛﯧﻴﯩﻦ، ﺑﯘ ﻗﯧﺘﯩﻤﻠﯩﻖ ﻧﻮﺑﯧﻞ ﻣﯘﻛﺎﭘﺎﺗﯩﻐﺎ ﻧﺎﻣﺰﺍﺕ ﻛﯚﺭﺳﯩﺘﯩﻠﮕﻪﻥ ﻓﺮﺍﻧﺴﯩﻴﻪ ﭘﺮﯦﺰﯨﺪﯦﻨﺘﻰ ﻧﯩﻜﻮﻻﺱ ﺳﺎﺭﻛﻮﺯﯨﻲ ﻛﯚﺯ ﻗﺎﺭﯨﺸﯩﻨﻰ ﺑﺎﻳﺎﻥ ﻗﯩﻠﯩﭗ، "ﺑﯘ ﺋﺎﻣﯧﺮﯨﻜﯩﻨﯩﯔ ﻗﺎﻳﺘﯩﺪﯨﻦ ﺩﯗﻧﻴﺎ ﺧﻪﻟﻘﯩﻨﯩﯔ ﻛﯚﯕﻠﯩﺪﻩ ﺋﻮﺭﯗﻥ ﺋﯧﻠﯩﺸﻘﺎ ﺑﺎﺷﻠﯩﻐﺎﻧﻠﯩﻘﯩﻨﯩﯔ ﺑﯩﺸﺎﺭﯨﺘﻰ،" ﺩﯦﺪﻯ.

ﺋﯩﺮﺍﻥ ﭘﺮﯦﺰﯨﺪﯦﻨﺘﻰ ﺋﻪﺧﻤﻪﺩﻯ ﻧﯧﺠﺎﺩﻧﯩﯔ ﻣﻪﺳﻠﯩﻬﻪﺗﭽﯩﺴﻰ ﺋﺎﻟﻰ ﺋﻪﻛﺒﻪﺭ ﺟﯩﯟﺍﻧﻜﻔﯩﺮ: "ﺑﯘ ﻣﯘﻛﺎﭘﺎﺗﻨﯩﯔ، ﺋﻮﺑﺎﻣﺎﻧﯩﯔ ﺩﯗﻧﻴﺎﻏﺎ ﺋﺎﺩﺍﻟﻪﺕ ﺋﻪﻛﯩﻠﯩﺸﻰ ﺋﯜﭼﯜﻥ ﺗﯜﺭﺗﻜﻪ ﺑﻮﻟﯘﺷﯩﻨﻰ ﺋﯜﻣﯩﺪ ﻗﯩﻠﯩﻤﯩﺰ،" ﺩﯦﺪﻯ.

1983 - ﻳﯩﻠﻠﯩﻖ ﻧﻮﺑﯧﻞ ﻣﯘﻛﺎﭘﺎﺗﯩﻐﺎ ﺋﯧﺮﯨﺸﻜﻪﻥ ﭘﻮﻟﺸﺎ ﺳﺎﺑﯩﻖ ﭘﺮﯦﺰﯨﺪﯦﻨﺘﻰ ﻟﯧﺦ ﯞﺍﻟﯧﺴﺎ ﺑﯘ ﻗﺎﺭﺍﺭﻏﺎ ﻫﻪﻳﺮﺍﻥ ﻗﺎﻟﻐﺎﻧﻠﯩﻘﯩﻨﻰ ﺋﯩﭙﺎﺩﻩ ﻗﯩﻠﯩﭗ ﻣﯘﻧﺪﺍﻕ ﺩﯦﺪﻯ: "ﻣﯘﺷﯘﻧﺪﺍﻕ ﺗﯧﺰﻣﯘ؟ ﺋﯘ ﺗﯧﺨﻰ ﻳﯧﯖﻰ ﭘﺮﯦﺰﯨﺪﯦﻨﺖ ﺑﻮﻟﺪﻯ، ﺗﯧﺨﻰ ﺑﯩﺮ ﺋﯩﺶ ﻗﯩﻠﻐﯘﺩﻩﻛﻤﯘ ﯞﺍﻗﺘﻰ ﺑﻮﻟﻤﯩﺪﻯ. ﺑﯘ ﻣﯘﻛﺎﭘﺎﺕ ﺋﯘﻧﯩﯔ ﻗﯩﻠﻤﺎﻗﭽﻰ ﺑﻮﻟﻐﺎﻥ ﺋﯩﺸﻠﯩﺮﯨﻐﺎ ﻣﻪﺩﻩﺕ ﺑﯧﺮﯨﺶ ﺋﯜﭼﯜﻥ ﺑﯧﺮﯨﻠﮕﻪﻥ ﺑﻮﻟﺴﺎ ﻛﯧﺮﻩﻙ. ﯞﻩﺩﯨﻠﯩﺮﯨﻨﻰ ﺋﻪﻣﻪﻟﮕﻪ ﺋﺎﺷﯘﺭﺍﻻﻣﺪﯗ ‏ - ﻳﻮﻕ ؟ ﺋﯘﻧﻰ ﻛﯧﻴﯩﻦ ﺑﯩﻠﯩﻤﯩﺰ، ﺑﯘﻧﻰ ﻗﯩﻠﯩﺸﻰ ﺋﯜﭼﯜﻥ ﺋﯘﻧﯩﯖﻐﺎ ﯞﺍﻗﯩﺖ ﺑﯧﺮﻩﻳﻠﻰ."
 
ﭘﻪﻟﻪﺳﺘﯩﻦ ﺭﻩﻫﺒﯩﺮﻯ ﻣﻪﻫﻤﯘﺩ ﺋﺎﺑﺒﺎﺱ ﺋﻮﺑﺎﻣﺎﻧﯩﯔ ﭘﻪﻟﻪﺳﺘﯩﻨﮕﻪ ﻣﯘﺳﺘﻪﻗﯩﻠﻠﯩﻖ ﺋﯧﻠﯩﭗ ﻛﯧﻠﯩﺸﯩﻨﻰ ﺋﯜﻣﯩﺪ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺳﺎﺑﯩﻖ ﺳﻮﯞﯦﺖ ﺋﯩﺘﺘﯩﭙﺎﻗﻰ ﭘﺮﯦﺰﯨﺪﯦﻨﺘﻰ ﻣﯩﺨﺎﺋﯩﻞ ﮔﻮﺭﺑﺎﭼﯩﻔﻤﯘ ﻧﻮﺑﯧﻞ ﺗﯧﻨﭽﻠﯩﻖ ﻣﯘﻛﺎﭘﺎﺗﯩﻐﺎ ﺋﯧﺮﯨﺸﻜﻪﻥ ﺷﻪﺧﯩﺴﻠﻪﺭﻧﯩﯔ ﺑﯩﺮﻯ ﺋﯩﺪﻯ. 1990 - ﻳﯩﻠﻰ ﻧﻮﺑﯧﻞ ﺋﺎﻟﻐﺎﻥ ﮔﻮﺭﺑﺎﭼﯧﻒ ﻛﯚﺯ ﻗﺎﺭﯨﺸﯩﻨﻰ ﻣﯘﻧﺪﺍﻕ ﺋﯩﭙﺎﺩﻩ ﻗﯩﻠﺪﻯ: "ﺑﯘﻧﯩﯖﺪﯨﻦ ﺳﯚﻳﯜﻧﺪﯛﻡ. ﺋﻮﺑﺎﻣﺎﻧﯩﯔ ﻫﺎﺯﯨﺮ ﻗﯩﻠﯩﯟﺍﺗﻘﺎﻧﻠﯩﺮﻯ ﻛﯩﺸﯩﮕﻪ ﺋﯜﻣﯩﺪ ﺑﯧﻐﯩﺸﻼﻳﺪﯗ. ﻣﯘﺷﯘﻧﺪﺍﻕ ﻗﯧﻴﯩﻦ ﺑﯩﺮ ﭘﻪﻳﯩﺘﺘﻪ، ﻣﻪﺳﺌﯘﻟﯩﻴﻪﺗﻨﻰ ﺋﯚﺯ ﺋﯜﺳﺘﯩﮕﻪ ﺋﺎﻻﻻﻳﺪﯨﻐﺎﻥ، ﻣﻪﻳﺪﺍﻧﻰ، ﺟﺎﺳﺎﺭﯨﺘﻰ ﯞﻩ ﺳﯩﻴﺎﺳﻰ ﺋﯩﺮﺍﺩﯨﺴﻰ ﺑﻮﻟﻐﺎﻥ ﻛﯩﺸﯩﻠﻪﺭﻧﻰ ﺭﯨﻐﺒﻪﺗﻠﻪﻧﺪﯛﺭﯛﺵ ﻛﯧﺮﻩﻙ."

ﻫﺎﺯﯨﺮ ﺧﯩﺘﺎﻳﺪﺍ ﺯﯨﻴﺎﺭﻩﺗﺘﻪ ﺑﻮﻟﯘﯞﺍﺗﻘﺎﻥ ﻳﺎﭘﻮﻧﯩﻴﻪ ﺑﺎﺵ ﻣﯩﻨﯩﺴﺘﯩﺮﻯ ﻳﯘﻛﻴﯘ ﺧﺎﺗﻮﻳﺎﻣﺎﻣﯘ ﺋﻮﺑﺎﻣﺎﻧﻰ ﭼﯩﻦ ﻳﯜﺭﯨﻜﯩﺪﯨﻦ ﺗﻪﺑﺮﯨﻜﻠﻪﻳﺪﯨﻐﺎﻧﻠﯩﻘﯩﻨﻰ، ﺋﻮﺑﺎﻣﺎ ﺗﻪﺧﺘﻜﻪ ﺋﻮﻟﺘﯘﺭﻏﺎﻥ ﻳﺎﻧﯟﺍﺭﺩﯨﻦ ﺑﯧﺮﻯ ﺩﯗﻧﻴﺎﻧﯩﯔ ﺋﯚﺯﮔﯩﺮﯨﺸﻜﻪ ﺑﺎﺷﻠﯩﻐﺎﻧﻠﯩﻘﯩﻨﻰ ﺋﯩﭙﺎﺩﻩ ﻗﯩﻠﺪﻯ.

ﺑﯘ ﻫﻪﻗﺘﻪ ﭘﯩﻜﯩﺮ ﺑﺎﻳﺎﻥ ﻗﯩﻠﻐﺎﻧﻼﺭ ﺑﯩﺮﺩﻩﻙ، "ﻧﻮﺑﯧﻞ ﺗﯧﻨﭽﻠﯩﻖ ﻣﯘﻛﺎﭘﺎﺗﻰ ﺋﻮﺑﺎﻣﺎﻧﻰ ﺩﯗﻧﻴﺎﻏﺎ ﺗﯧﻨﭽﻠﯩﻖ ﺋﻪﭖ ﻛﯧﻠﯩﺸﻜﻪ ﺭﯨﻐﺒﻪﺗﻠﻪﻧﺪﯛﺭﯛﺵ ﺋﯜﭼﯜﻥ ﺑﯧﺮﯨﻠﺪﻯ،" ﺩﻩﭖ ﻗﺎﺭﯨﻤﺎﻗﺘﺎ. ﺋﻮﺑﺎﻣﺎ ﺩﯗﻧﻴﺎﻧﻰ ﻳﺎﺩﺭﻭ ﻗﻮﺭﺍﻟﻠﯩﺮﯨﺪﯨﻦ ﯞﺍﺯ ﻛﯧﭽﯩﺸﻜﻪ ﭼﺎﻗﯩﺮﯨﭗ ﻳﺎﺩﺭﻭ ﻗﻮﺭﺍﻟﻠﯩﺮﯨﻨﻰ ﻗﯩﺴﻘﺎﺭﺗﯩﺸﻘﺎ ﺗﯩﺮﯨﺸﻤﺎﻗﺘﺎ. ﺋﯘ ﻳﻪﻧﻪ ﺋﻮﺗﺘﯘﺭﺍ ﺷﻪﺭﻗﺘﯩﻤﯘ ﺗﯧﻨﭽﻠﯩﻖ ﺑﻪﺭﭘﺎ ﻗﯩﻠﯩﺶ ﺋﯜﭼﯜﻥ ﺑﯩﺮ ﻗﯩﺴﯩﻢ ﺗﻪﺩﺑﯩﺮﻟﻪﺭﻧﻰ ﺋﺎﻟﻐﺎﻥ ﺑﻮﻟﺴﯩﻤﯘ،ﺋﻪﻣﻤﺎ ﺗﯧﺨﻰ ﺋﯘﻧﯩﯔ ﻣﯧﯟﯨﺴﯩﻨﻰ ﺋﺎﻻﻟﻤﯩﻐﺎﻥ ﺋﯩﺪﻯ. ﻧﻮﺑﯩﻞ ﻣﯘﻛﺎﭘﺎﺗﻰ ﻛﻮﻣﯩﺘﯧﺘﻰ ﺭﻩﺋﯩﺴﻰ ﺗﻮﺭﺑﺠﻮﺭﻥ ﺟﺎﮔﻠﻪﻧﺪ ﺋﻪﭘﻪﻧﺪﻯ ﻗﯩﻠﻐﺎﻥ ﺳﯚﺯﯨﺪﻩ " :ﻫﺎﺯﯨﺮ ﺩﯗﻧﻴﺎﻧﯩﯔ ﺯﯨﺪﺩﯨﻴﻪﺗﻠﻪﺭﻧﻰ ﻫﻪﻝ ﻗﯩﻠﯩﺪﯨﻐﺎﻥ ﻛﯜﭼﻠﯜﻙ ﺩﯨﭙﻠﻮﻣﺎﺗﯩﻴﯩﮕﻪ ﺋﯧﻬﺘﯩﻴﺎﺟﻰ ﺑﺎﺭ، ﺑﺎﺭﺍﻙ ﺋﻮﺑﺎﻣﺎ ﻣﺎﻧﺎ ﺑﯘﻧﻰ ﻗﯩﻠﯩﯟﺍﺗﯩﺪﯗ" ﺩﯦﺪﻯ. ﺋﻪﻣﻤﺎ ﺑﯘ ﭘﯩﻜﯩﺮﮔﻪ ﻗﺎﺭﺷﻰ ﭼﯩﻘﻘﯘﭼﯩﻼﺭﻣﯘ ﺑﺎﺭ.

1976 - ﻳﯩﻠﻰ ﻧﻮﺑﯧﻠﻐﺎ ﺋﯧﺮﯨﺸﻜﻪﻥ ﺋﯧﺮﻻﻧﺪﯨﻴﯩﻠﯩﻚ ﻣﻪﻳﺮﯨﺪ ﻛﻮﺭﮔﯩﻦ ﻣﺎﮔﯘﺭ ﺑﻮﻟﺴﺎ، ﺑﯘ ﻗﺎﺭﺍﺭﻏﺎ "ﺗﻮﻟﯩﻤﯘ ﺋﻪﭘﺴﯘﺳﻠﯩﻨﺎﺭﻟﯩﻖ" ﺩﻩﭖ ﺑﺎﻫﺎ ﺑﻪﺭﺩﻯ ﯞﻩ ﻣﯘﻧﺪﺍﻕ ﺩﯦﺪﻯ: "ﭘﺮﯦﺰﯨﺪﯦﻨﺖ ﺋﻮﺑﺎﻣﺎ ﺗﯧﺨﻰ ﺋﯩﺮﺍﻕ ﯞﻩ ﺋﺎﻓﻐﺎﻧﯩﺴﺘﺎﻥ ﺋﯘﺭﯗﺷﻠﯩﺮﯨﻨﻰ ﺋﺎﻳﺎﻗﻼﺷﺘﯘﺭﺍﻟﻤﯩﺪﻯ. ﺋﯘ ﺗﯧﺨﻰ ﺑﯘ ﺟﻪﻫﻪﺗﺘﻪ ﺋﯚﺯﯨﻨﻰ ﺋﯩﺴﭙﺎﺗﻼﭖ ﺑﻮﻻﻟﻤﯩﺪﻯ."
 
ﺑﯘ ﻫﻪﻗﺘﻪ ﻣﻪﺗﺒﯘﺋﺎﺗﻼﺭﻏﺎ ﭘﯩﻜﺮﯨﻨﻰ ﺑﺎﻳﺎﻥ ﻗﯩﻠﻐﺎﻥ ﺗﺎﻟﯩﺒﺎﻧﻨﯩﯔ ﺑﺎﻳﺎﻧﺎﺗﭽﯩﺴﻰ ﺯﻩﺑﯩﺒﯘﻟﻼﻫ ﻣﯘﺟﺎﻫﯩﺖ ﻣﯘﻧﺪﺍﻕ ﺩﯦﺪﻯ: "ﺋﺎﻓﻐﺎﻧﯩﺴﺘﺎﻧﺪﺍ ﺗﯧﻨﭽﻠﯩﻖ ﺋﯜﭼﯜﻥ ﻫﯧﭽﻘﺎﻧﺪﺍﻕ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﺋﯚﺯﮔﯩﺮﯨﺶ ﺋﯧﻠﯩﭗ ﺑﯧﺮﯨﻠﻤﯩﺪﻯ. ﺋﻮﺑﺎﻣﺎ ﺋﺎﻓﻐﺎﻧﯩﺴﺘﺎﻧﻨﯩﯔ ﺗﯧﻨﭽﻠﯩﻘﻰ ﺋﯜﭼﯜﻥ ﺗﯧﺨﻰ ﻫﯧﭽﻨﯩﻤﻪ ﻗﯩﻠﻤﯩﺪﻯ. ﺋﯘﻧﯩﯔ ﻧﻮﺑﯧﻞ ﺗﯧﻨﭽﻠﯩﻖ ﻣﯘﻛﺎﭘﺎﺗﻰ ﺋﺎﻟﻐﺎﻧﻠﯩﻘﯩﻐﺎ ﻗﺎﺗﺘﯩﻖ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﯨﻤﯩﺰ. ﻧﻮﺑﯧﻞ ﻣﯘﻛﺎﭘﺎﺗﻰ ﻛﻮﻣﯩﺘﯧﺘﯩﻨﯩﻤﯘ ﺑﯘ ﻗﺎﺭﺍﺭﻯ ﺋﯜﭼﯜﻥ ﺋﻪﻳﯩﺒﻠﻪﻳﻤﯩﺰ."

ﺑﯘ ﻳﯩﻠﻠﯩﻖ ﺗﯧﻨﭽﻠﯩﻖ ﻣﯘﻛﺎﭘﺎﺗﯩﻐﺎ ﻧﺎﻣﺰﺍﺕ ﻛﯚﺭﺳﯩﺘﯩﻠﮕﻪﻧﻠﻪﺭﻧﯩﯔ ﺳﺎﻧﻰ 205 ﺑﻮﻟﯘﭖ، ﺑﯘﻧﯩﯔ ﺋﯩﭽﯩﺪﻩ 33 ﻯ ﻛﻮﻟﻠﯩﻜﺘﯩﭗ ﺋﻮﺭﯗﻥ، 177 ﺳﻰ ﺷﻪﺧﺴﯩﻠﻪﺭ ﺋﯩﺪﻯ. ﻧﯘﺭﻏﯘﻥ ﻛﯩﺸﯩﻠﻪﺭ ﺑﯘ ﻳﯩﻠﻠﯩﻖ ﻧﻮﺑﯧﻞ ﺗﯧﻨﭽﻠﯩﻖ ﻣﯘﻛﺎﭘﺎﺗﯩﻨﯩﯔ ﺑﯧﻴﺠﯩﯔ ﺗﻴﻪﻧﺌﻪﻧﻤﯧﻦ ﯞﻩﻗﻪﺳﯩﻨﯩﯔ 20 ﻳﯩﻠﻠﯩﻘﻰ ﻣﯘﻧﺎﺳﯩﯟﯨﺘﻰ ﺑﯩﻠﻪﻥ ﺧﯩﺘﺎﻳﺪﯨﻜﻰ ﻛﻮﻣﻤﯘﻧﯩﺴﺖ ﻫﺎﻛﯩﻤﻴﯩﺘﯩﮕﻪ ﻗﺎﺭﺷﻰ ﺑﻮﻟﻐﺎﻥ ﺩﯦﻤﻮﻛﺮﺍﺕ ﺷﻪﺧﺴﻠﻪﺭﺩﯨﻦ ﺑﯩﺮﯨﮕﻪ ﺑﯧﺮﯨﻠﯩﺪﯗ، ﺩﻩﭖ ﻗﺎﺭﯨﻐﺎﻥ ﺋﯩﺪﻯ.

ﻣﯘﻛﺎﭘﺎﺗﻨﯩﯔ ﺑﺎﺭﺍﻙ ﺋﻮﺑﺎﻣﺎﻏﺎ ﺑﯧﺮﯨﻠﮕﻪﻧﻠﯩﻜﻰ ﺋﯧﻼﻥ ﻗﯩﻠﯩﻨﻐﺎﻧﺪﯨﻦ ﻛﯧﻴﯩﻦ 1989 - ﻳﯩﻠﻰ ﺗﻴﻪﻧﺌﻪﻧﻤﯧﻨﺪﯨﻜﻰ ﺋﻮﻗﯘﻏﯘﭼﯩﻼﺭ ﻫﻪﺭﯨﻜﯩﺘﯩﻨﯩﯔ ﺑﺎﺷﻼﻣﭽﯩﻠﯩﺮﯨﺪﯨﻦ ﺑﯩﺮﻯ ﺑﻮﻟﻐﺎﻥ ﯞﺍﯓ ﺩﻩﻧﻤﯘ ﺋﯚﺯ ﻛﯚﺯ ﻗﺎﺭﯨﺸﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ. ﯞﺍﯓ ﺩﻩﻥ ﺋﻮﻗﯘﻏﯘﭼﯩﻼﺭ ﯞﻩﻗﻪﺳﻰ ﻗﺎﻧﻠﯩﻖ ﺑﺎﺳﺘﯘﺭﯗﻟﯘﭖ ﻗﻮﻟﻐﺎ ﺋﯧﻠﯩﻨﻐﺎﻧﺪﯨﻦ ﻛﯧﻴﯩﻦ ﺋﯘﺯﯗﻥ ﻳﯩﻞ ﺧﯩﺘﺎﻳﺪﺍ ﺗﯜﺭﻣﯩﺪﻩ ﻳﺎﺗﻘﺎﻥ ﯞﻩ ﻛﯧﻴﯩﻦ ﺋﺎﻣﯧﺮﯨﻜﯩﻨﯩﯔ ﺩﯨﭙﻠﻮﻣﺎﺗﯩﻚ ﺑﯧﺴﯩﻤﻰ ﺑﯩﻠﻪﻥ ﺋﺎﻣﯧﺮﯨﻜﯩﺪﺍ ﺩﺍﯞﺍﻟﯩﻨﯩﺶ ﺋﯜﭼﯜﻥ ﻗﻮﻳﯘﭖ ﺑﯧﺮﯨﻠﮕﻪﻥ ﺑﻮﻟﯘﭖ، ﺋﯘ ﻫﺎﺯﯨﺮ ﺗﻪﻳﯟﻩﻥ ﺳﯩﻴﺎﺳﻪﺕ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺩﻩﺭﺱ ﺑﻪﺭﻣﻪﻛﺘﻪ. ﺧﯩﺘﺎﻱ ﺩﯦﻤﻮﻛﺮﺍﺕ ﯞﺍﯓ ﺩﻩﻥ ﺋﺎﻣﯧﺮﯨﻜﺎ ﺋﺎﯞﺍﺯﻯ ﺭﺍﺩﯨﺌﻮﺳﯩﻐﺎ ﺑﻪﺭﮔﻪﻥ ﺑﺎﻳﺎﻧﺎﺗﯩﺪﺍ ﻣﯘﻧﺪﺍﻕ ﺩﻩﻳﺪﯗ: "ﻣﻪﻥ ﺋﻪﻟﯟﻩﺗﺘﻪ ﺋﻮﺑﺎﻣﺎﻧﻰ ﺗﻪﺑﺮﯨﻜﻠﻪﻳﻤﻪﻥ. ﺋﻪﻣﻤﺎ ﻣﻪﻥ ﺟﯘﯕﮕﻮﺩﯨﻜﻰ ﻫﺎﻛﯩﻤﯩﻴﻪﺗﻜﻪ ﻗﺎﺭﺷﻰ ﺑﻮﻟﻐﺎﻥ ﺳﯩﻴﺎﺳﯩﻲ ﺋﯚﻛﺘﯩﭽﻰ ﺷﻪﺧﺴﻠﻪﺭﻧﯩﯔ ﻣﯘﻛﺎﭘﺎﺗﻘﺎ ﺋﯧﺮﯨﺸﻪﻟﻤﯩﮕﻪﻧﻠﯩﻜﯩﮕﻪ ﺋﯩﻨﺘﺎﻳﯩﻦ ﺋﻪﭘﺴﯘﺳﻼﻧﺪﯨﻢ،" ﺩﯦﺪﻯ.

ﺋﯘ ﺳﯚﺯﯨﺪﻩ ﻳﻪﻧﻪ ﺧﯩﺘﺎﻳﻨﯩﯔ ﻫﺎﺯﯨﺮ ﺋﯩﻨﺘﺎﻳﯩﻦ ﻣﯘﻫﯩﻢ ﺑﯩﺮ ﭘﻪﻳﺘﯩﺪﻩ ﺗﯘﺭﯗﯞﺍﺗﻘﺎﻧﻠﯩﻘﯩﻨﻰ ﺋﻪﺳﻜﻪﺭﺗﯩﭗ ﻣﯘﻧﺪﺍﻕ ﺩﻩﻳﺪﯗ: "ﻣﻪﻥ ﻧﻮﺑﯧﻞ ﺗﯧﻨﭽﻠﯩﻖ ﻣﯘﻛﺎﭘﺎﺗﻰ ﻣﺎﻧﺎ ﻣﯘﺷﯘﻧﺪﺍﻕ ﭘﻪﺭﻗﻠﯩﻖ ﻛﯚﺯ ﻗﺎﺭﺍﺷﺘﯩﻜﻰ ﻛﯩﺸﯩﻠﻪﺭﮔﻪ ﺑﯧﺮﯨﻠﮕﻪﻧﺪﯨﻼ ﺋﯚﺯ ﻣﻪﻧﺎﺳﯩﻨﻰ ﺗﺎﭘﯩﺪﯗ، ﺩﻩﭖ ﻗﺎﺭﺍﻳﻤﻪﻥ. ﺩﯗﻧﻴﺎ ﺋﯜﭼﯜﻥ ﺋﯧﻠﯩﭗ، ﻫﺎﺯﯨﺮ ﺧﯩﺘﺎﻱ ﻫﺎﻟﻘﯩﻠﯩﻖ ﺑﯩﺮ ﭘﻪﻳﺘﺘﻪ ﺗﯘﺭﻣﺎﻗﺘﺎ. ﺧﯩﺘﺎﻱ ﺑﺎﺵ ﻛﯚﺗﯜﺭﯛﯞﺍﺗﻘﺎﻥ ﺑﯩﺮ ﺩﯙﻟﻪﺕ ﺑﻮﻟﯘﺵ ﺳﯜﭘﯩﺘﻰ ﺑﯩﻠﻪﻥ ﺟﯩﺪﺩﯨﻲ ﻫﺎﻟﺪﺍ ﺩﯦﻤﻮﻛﺮﺍﺗﯩﻴﯩﮕﻪ ﻣﯘﻫﺘﺎﺝ. ﻧﻮﺑﯧﻞ ﺗﯧﻨﭽﻠﯩﻖ ﻣﯘﻛﺎﭘﺎﺗﻰ ﺧﯩﺘﺎﻳﻨﯩﯔ ﺩﯦﻤﻮﻛﺮﺍﺗﯩﻴﯩﻠﯩﺸﯩﺸﯩﮕﻪ ﺗﯜﺭﺗﻜﯩﻠﯩﻚ ﺭﻭﻝ ﺋﻮﻳﻨﯩﻐﺎﻥ ﺑﻮﻻﺗﺘﻰ. ﺟﯘﯕﮕﻮﻧﯩﯔ ﺩﯦﻤﻮﻛﺮﺍﺗﯩﻴﯩﻠﯩﺸﯩﺸﻰ ﺩﯦﻤﻪﻙ ﺩﯗﻧﻴﺎﻧﯩﯔ ﺗﯧﻨﭽﻠﯩﻘﻰ ﺋﯜﭼﯜﻥ ﺋﻪﯓ ﺯﻭﺭ ﺗﯚﻫﭙﻪ ﺩﯦﻤﻪﻙ."

ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻤﯘ ﺋﺎﻟﺪﯨﻨﻘﻰ ﻳﯩﻠﻼﺭﺩﺍ ﺋﺎﺭﻗﺎ - ﺋﺎﺭﻗﯩﻼﭖ ﻧﻮﺑﯧﻞ ﻣﯘﻛﺎﭘﺎﺗﯩﻐﺎ ﻧﺎﻣﺰﺍﺕ ﻛﯚﺭﺳﯩﺘﯩﻠﮕﻪﻥ ﺋﯩﺪﻯ. ﺑﺎﺭﺍﻙ ﺋﻮﺑﺎﻣﺎﻏﺎ ﻣﯘﻛﺎﭘﺎﺕ ﺑﯧﺮﯨﻠﮕﻪﻧﺪﯨﻦ ﻛﯧﻴﯩﻦ، ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻤﯘ ﺑﺎﺭﺍﻙ ﺋﻮﺑﺎﻣﺎﻧﻰ ﺗﻪﺑﺮﯨﻜﻠﻪﻳﺪﯨﻐﺎﻧﻠﯩﻘﯩﻨﻰ ﯞﻩ ﺋﯘﻧﯩﯔ ﺩﯗﻧﻴﺎ ﺗﯧﻨﭽﻠﯩﻘﻰ ﺋﯜﭼﯜﻥ ﺗﯧﺨﯩﻤﯘ ﻛﯚﭖ ﺧﯩﺰﻣﻪﺕ ﻗﯩﻠﯩﺸﯩﻨﻰ ﺋﺎﺭﺯﯗ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺋﯩﭙﺎﺩﻩ ﻗﯩﻠﺪﻯ.

ﺑﺎﺭﺍﻙ ﺋﻮﺑﺎﻣﺎ 12 - ﺋﺎﻳﻨﯩﯔ 10 - ﻛﯜﻧﻰ ﺋﻮﺳﻠﻮﺩﺍ ﺋﯚﺗﻜﯜﺯﯛﻟﯩﺪﯨﻐﺎﻥ ﺑﯩﺮ ﻣﯘﺭﺍﺳﯩﻢ ﺑﯩﻠﻪﻥ ﻣﯧﺪﺍﻝ ﯞﻩ 10 ﻣﯩﻠﻴﻮﻥ ﺷﯩﯟﯨﺖ ﻛﺮﻭﻧﻰ ﻳﻪﻧﻰ ﺗﻪﺧﻤﯩﻨﻪﻥ ﺑﯩﺮ ﻳﯧﺮﯨﻢ ﻣﯩﻠﻴﻮﻥ ﺩﻭﻟﻼﺭ ﭘﯘﻝ ﻣﯘﻛﺎﭘﺎﺗﯩﻨﻰ ﺗﺎﭘﺸﯘﺭﯗﭖ ﺋﺎﻟﯩﺪﯨﻜﻪﻥ.