ﮔﻪﺭﭼﻪ ﺑﯘ ﻗﯧﺘﯩﻤﻘﻰ ﻳﻪﺭﻣﻪﻧﻜﯩﮕﻪ 20 ﮔﻪ ﻳﯧﻘﯩﻦ ﺩﯙﻟﻪﺗﻨﯩﯔ ﺳﻮﺩﺍ ﯞﻩﻛﯩﻠﻠﻪﺭ ﺋﯚﻣﯩﻜﻰ ﻗﺎﺗﻨﺎﺷﻘﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﯨﻨﯩﯔ ﺑﺎﺵ ﺳﻪﻫﯩﭙﯩﻠﯩﺮﻯ ﺗﯜﺭﻙ ﺋﯚﻣﯩﻜﯩﻨﯩﯔ ﺋﯜﺭﯛﻣﭽﯩﺪﯨﻜﻰ ﭼﻮﯓ - ﻛﯩﭽﯩﻚ ﭘﺎﺋﺎﻟﯩﻴﻪﺗﻠﯩﺮﻯ ﻫﻪﻗﻘﯩﺪﯨﻜﻰ ﺧﻪﯞﻩﺭ - ﻛﯚﺭﯛﻧﯜﺷﻠﻪﺭ ﺑﯩﻠﻪﻥ ﺗﻮﻟﻐﺎﻥ. ﺑﯘ ﺧﻪﯞﻩﺭ - ﻛﯚﺭﯛﻧﯜﺷﻠﻪﺭﺩﻩ، ﺧﯩﺘﺎﻱ ﺑﯩﻠﻪﻥ ﺗﯜﺭﻛﯩﻴﻪ، ﻗﺎﻧﺪﺍﻗﺘﯘﺭ ﺑﯩﺮ ﺋﯧﻐﯩﺰﺩﯨﻦ ﺋﻮﺭﺗﺎﻕ ﻧﻪﭘﻪﺱ ﺋﯧﻠﯩﯟﺍﺗﻘﺎﻥ ﺟﺎﻥ - ﺟﯩﮕﻪﺭ ﺩﻭﺳﺘﻼﺭﺩﻩﻙ ﻗﯩﻠﯩﭗ ﻛﯚﺭﺳﯩﺘﯩﻠﻤﻪﻛﺘﻪ، ﺑﻮﻟﯘﭘﻤﯘ ﺑﯘ ﺧﯩﻞ ﺧﻪﯞﻩﺭ - ﻛﯚﺭﯛﻧﯜﺷﻠﻪﺭﻧﯩﯔ، ﺋﯘﻳﻐﯘﺭﭼﻪ ﺗﯩﻞ - ﻳﯧﺰﯨﻘﺘﯩﻜﻰ ﺋﺎﺧﺒﺎﺭﺍﺕ ﯞﺍﺳﺘﯩﻠﯩﺮﯨﺪﺍ ﻛﯚﭘﺮﻩﻙ ﻳﻪﺭ ﺋﯧﻠﯩﺸﻰ، ﻳﻪﺭﻟﯩﻚ ﺧﻪﻟﻘﻨﯩﯔ ﻛﺎﻟﻠﯩﺴﯩﺪﺍ ﺗﯜﺭﻟﯜﻙ ﮔﯘﻣﺎﻧﻰ ﻗﺎﺭﺍﺷﻼﺭﻧﻰ ﯞﻩ ﻗﯩﺴﻤﻪﻥ ﺋﻪﻧﺪﯨﺸﯩﻠﻪﺭﻧﻰ ﭘﻪﻳﺪﺍ ﻗﯩﻠﻤﺎﻗﺘﺎ.

ﺳﻪﯞﻩﺑﻰ ﺷﯘﻛﻰ، ﺋﯘﻳﻐﯘﺭﻻﺭﻧﯩﯔ ﻧﻪﺯﯨﺮﯨﺪﻩ ﺗﯜﺭﻛﯩﻴﻪ، ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯜﭼﯜﻥ ﻫﺎﻳﺎﺗﻰ ﻗﯩﻤﻤﻪﺗﻜﻪ ﺋﯩﮕﻪ ﺑﯩﺮ ﺩﯙﻟﻪﺕ، ﻛﯚﭘﻠﯩﮕﻪﻥ ﺋﯘﻳﻐﯘﺭﻻﺭ ﺗﯜﺭﻛﯩﻴﻪ ﺟﯘﻣﻬﯘﺭﯨﻴﯩﺘﯩﻨﻰ ﯞﻩ ﺗﯜﺭﻙ ﺧﻪﻟﻘﯩﻨﻰ ﺋﯚﺯﻟﯩﺮﯨﻨﯩﯔ ﻣﻪﻧﯩﯟﯨﻲ ﻳﯚﻟﻪﻧﭽﯜﻛﻰ ﺩﻩﭖ ﻗﺎﺭﯨﻤﺎﻗﺘﺎ، ﻳﻪﻧﻪ ﻛﯧﻠﯩﭗ ﺗﯜﺭﻛﻠﻪﺭ ﺑﯩﻠﻪﻥ ﺋﯘﻳﻐﯘﺭﻻﺭ ﻗﺎﻧﺪﺍﺵ ﯞﻩ ﺋﯘﺭﯗﻗﺪﺍﺵ ﺧﻪﻟﻖ، ﺷﯘﻧﯩﯔ ﺋﯜﭼﯜﻥ ﺗﯜﺭﻛﯩﻴﻪ ﺑﯩﻠﻪﻥ ﺧﯩﺘﺎﻱ ﺋﻮﺗﺘﯘﺭﯨﺴﯩﺪﯨﻜﻰ ﻣﯘﻧﺎﺳﯩﯟﻩﺗﻠﻪﺭ ﺑﻮﻟﺴﺎ ﺋﯘﻳﻐﯘﺭ ﺧﻪﻟﻘﻰ ﻳﯧﻘﯩﻨﺪﯨﻦ ﻛﯚﯕﯜﻝ ﺑﯚﻟﯜﭖ ﻛﯧﻠﯩﯟﺍﺗﻘﺎﻥ ﺋﻪﯓ ﻧﺎﺯﯗﻙ ﻣﻪﺳﯩﻠﯩﻠﻪﺭﻧﯩﯔ ﺑﯩﺮﻯ. ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻨﯩﯔ ﻳﯧﻘﯩﻨﻘﻰ ﺯﺍﻣﺎﻥ ﺗﺎﺭﯨﺨﯩﻐﺎ ﻧﻪﺯﻩﺭ ﺳﺎﻟﻐﺎﻧﺪﯨﻤﯘ، ﺋﯘﻳﻐﯘﺭﻻﺭﻧﯩﯔ ﻣﯩﻠﻠﯩﻲ ﻣﯘﺳﺘﻪﻗﯩﻠﻠﯩﻖ ﻛﯜﺭﻩﺷﻠﯩﺮﯨﺪﻩ ﺗﯜﺭﻛﯩﻴﻪ ﯞﻩ ﺗﯜﺭﻙ ﺧﻪﻟﻘﯩﻨﯩﯔ ﺑﺎﺷﺘﯩﻦ - ﺋﺎﺧﯩﺮﻯ ﻧﺎﻫﺎﻳﯩﺘﻰ ﻣﯘﻫﯩﻢ ﺭﻭﻝ ﺋﻮﻳﻨﯩﻐﺎﻧﻠﯩﻘﯩﻨﻰ ﻛﯚﺭﯛﭖ ﻳﯧﺘﻪﻟﻪﻳﻤﯩﺰ.

1860 - ﻳﯩﻠﻼﺭﺩﺍ ﻳﺎﻗﯘﭘﺒﻪﮒ ﻗﻪﺷﻘﻪﺭﯨﻴﻪ ﺩﯙﻟﯩﺘﯩﻨﻰ ﻗﯘﺭﻏﺎﻧﺪﺍ، ﺋﻮﺳﻤﺎﻧﻠﻰ ﺋﯩﻤﭙﯩﺮﺍﺗﻮﺭﻟﯘﻗﯩﻨﯩﯔ ﭘﺎﺩﯨﺸﺎﻫﻰ ﺳﯘﻟﺘﺎﻥ ﺋﺎﺑﺪﯗﻝ ﺋﻪﺯﯨﺰﺧﺎﻧﻨﯩﯔ ﺳﯩﻴﺎﺳﻰ ﯞﻩ ﻫﻪﺭﺑﯩﻲ ﺟﻪﻫﻪﺗﺘﻪ ﻗﻮﻟﻠﯩﺸﯩﻐﺎ ﺋﯧﺮﯨﺸﻜﻪﻥ. 1933 - ﻳﯩﻠﻰ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﺗﯘﻧﺠﻰ ﺟﯘﻣﻬﯘﺭﯨﻴﻪﺕ ﻗﯘﺭﯗﻟﻐﺎﻧﺪﯨﻤﯘ، ﺑﯘ ﺧﻪﯞﻩﺭﺩﯨﻦ ﺋﻪﻳﻨﻰ ﭼﺎﻏﺪﯨﻜﻰ ﺗﯜﺭﻛﯩﻴﻪ ﺟﯘﻣﻬﯘﺭﯨﻴﯩﺘﻰ ﻫﯚﻛﯜﻣﯩﺘﻰ ﯞﻩ ﺧﻪﻟﻘﻰ ﻛﯚﭖ ﺳﯚﻳﯜﻧﮕﻪﻥ، ﺗﯜﺭﻙ ﻣﻪﺗﺒﯘﺋﺎﺗﻠﯩﺮﻯ، " ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻨﯩﯔ ﺋﺎﻱ - ﻳﯘﻟﺘﯘﺯﻟﯘﻕ ﻛﯚﻙ ﺑﺎﻳﺮﯨﻘﯩﺪﯨﻦ ﺗﯜﺭﻛﯩﻴﯩﻨﯩﯔ ﺋﺎﻱ - ﻳﯘﻟﺘﯘﺯﻟﯘﻕ ﻗﯩﺰﯨﻞ ﺑﺎﻳﺮﯨﻘﯩﻐﺎ ﺳﺎﻻﻡ " ﺩﯦﮕﻪﻧﺪﻩﻙ ﭼﻮﯓ ﻣﺎﯞﺯﯗﻻﺭ ﺑﯩﻠﻪﻥ ﺷﻪﺭﻗﺘﯩﻜﻰ ﻗﺎﻥ ﻗﯧﺮﯨﻨﺪﺍﺷﻠﯩﺮﻯ ﺗﻪﺭﯨﭙﯩﺪﯨﻦ ﻗﯘﺭﯗﻟﻐﺎﻥ ﺑﯘ ﻳﯧﯖﻰ ﺟﯘﻣﻬﯘﺭﯨﻴﻪﺗﻨﻰ ﺗﻪﻧﺘﻪﻧﻪ ﺑﯩﻠﻪﻥ ﺗﯜﺭﻙ ﺧﻪﻟﻘﯩﻐﻪ ﺗﻪﻗﺪﯨﻢ ﻗﯩﻠﯩﭗ ﺗﻮﻧﯘﺷﺘﯘﺭﻏﺎﻥ ﺋﯩﺪﻯ.

ﺟﯘﻣﻬﯘﺭﯨﻴﻪﺗﻨﯩﯔ ﻗﯘﺭﯗﻟﯘﺵ ﺟﻪﺭﻳﺎﻧﯩﺪﺍ ﺑﻮﻟﺴﯘﻥ، ﻳﺎﻛﻰ ﺟﯘﻣﻬﯘﺭﯨﻴﻪﺗﺘﯩﻦ ﻛﯧﻴﯩﻦ ﺑﻮﻟﺴﯘﻥ، ﺗﯜﺭﻛﯩﻴﯩﻨﯩﯔ ﻛﯚﭘﻠﯩﮕﻪﻥ ﺳﺎﺑﯩﻖ ﺋﻮﻓﯩﺘﺴﯧﺮﻟﯩﺮﻯ ﯞﻩ ﻣﺎﺋﺎﺭﯨﭙﭽﯩﻠﯩﺮﻯ ﺧﺎﻟﯩﺴﺎﻧﻪ ﻫﺎﻟﺪﺍ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻐﺎ ﻛﯧﻠﯩﭗ، ﺋﯘﻳﻐﯘﺭﻻﺭﻧﯩﯔ ﻣﯩﻠﻠﯩﻲ ﻣﯘﺳﺘﻪﻗﯩﻠﻠﯩﻖ ﻫﻪﺭﯨﻜﻪﺗﻠﯩﺮﯨﻨﯩﯔ ﺭﺍﯞﺍﺟﻠﯩﻨﯩﺸﻰ ﯞﻩ ﺋﯘﻳﻐﯘﺭﻻﺭ ﺋﺎﺭﯨﺴﯩﺪﺍ ﺋﯩﻠﻤﯩﻲ ﻣﺎﺋﺎﺭﯨﭙﻨﯩﯔ ﺋﻮﻣﯘﻣﻠﯩﺸﯩﺸﻰ ﺋﯜﭼﯜﻥ ﺯﻭﺭ ﺗﯚﻫﭙﻪ ﻗﻮﺷﻘﺎﻥ ﺋﯩﺪﻯ. ﻳﻪﻧﻪ ﻛﯧﻠﯩﭗ ﺗﯜﺭﻛﯩﻴﻪ، 50 ﻳﯩﻠﺪﯨﻦ ﻛﯚﭘﺮﻩﻙ ﯞﺍﻗﯩﺘﺘﯩﻦ ﺑﯘﻳﺎﻥ ﺋﯘﻳﻐﯘﺭﻻﺭﻧﯩﯔ ﭼﻪﺗﺌﻪﻟﻠﻪﺭﺩﻩ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﻣﯩﻠﻠﯩﻲ ﻫﻪﺭﯨﻜﻪﺗﻠﯩﺮﯨﻨﯩﯔ ﺋﻪﯓ ﻣﯘﻫﯩﻢ ﻣﻪﺭﻛﻪﺯﻟﯩﺮﯨﻨﯩﯔ ﺑﯩﺮﻯ ﺑﻮﻟﯘﭖ ﻛﻪﻟﺪﻯ، ﻣﻪﻳﻠﻰ ﺗﯜﺭﻛﯩﻴﻪ ﻫﯚﻛﯜﻣﯩﺘﻰ ﺑﯩﻠﻪﻥ ﺧﯩﺘﺎﻱ ﻫﯚﻛﯜﻣﯩﺘﻰ ﺋﻮﺗﺘﯘﺭﯨﺴﯩﺪﯨﻜﻰ ﻣﯘﻧﺎﺳﯩﯟﻩﺗﻠﻪﺭﻧﯩﯔ ﻗﺎﻳﺴﻰ ﺧﯩﻠﺪﺍ ﺋﯚﺯﮔﯩﺮﯨﺸﯩﺪﯨﻦ ﻗﻪﺗﺌﯩﻴﻨﻪﺯﻩﺭ، ﺗﯜﺭﻙ ﺧﻪﻟﻘﯩﻨﯩﯔ ﺋﯘﻳﻐﯘﺭ ﺧﻪﻟﻘﯩﻐﻪ ﺑﻮﻟﻐﺎﻥ ﺩﻭﺳﺘﻠﯘﻗﻰ، ﻫﯧﺴﺪﺍﺷﻠﯩﻘﻰ ﯞﻩ ﻗﻮﻟﻠﯩﺸﯩﺪﺍ ﻫﯧﭻ ﺑﯩﺮ ﺋﯚﺯﮔﯩﺮﯨﺶ ﺑﻮﻟﻤﯩﺪﻯ ﯞﻩ ﻫﺎﺯﯨﺮﻣﯘ ﻫﻪﻡ ﺷﯘﻧﺪﺍﻕ.

ﺑﯜﮔﯜﻥ ﭘﻪﻗﻪﺕ ﺗﯜﺭﻛﯩﻴﯩﺪﯨﻼ ﺋﻪﻣﻪﺱ، ﺩﯗﻧﻴﺎﻧﯩﯔ ﻫﻪﺭ ﻗﺎﻧﺪﺍﻕ ﻳﯧﺮﯨﺪﯨﻜﻰ ﺑﯩﺮ ﺋﯘﻳﻐﯘﺭ ﺗﻪﺷﻜﯩﻼﺗﻰ ﺧﯩﺘﺎﻳﻐﺎ ﻗﺎﺭﺷﻰ ﻧﺎﻣﺎﻳﯩﺶ ﻗﯩﻠﯩﭗ ﭼﯩﻘﻘﺎﻧﺪﺍ، ﺷﯘ ﺋﻪﻟﻠﻪﺭﺩﻩ ﺗﯘﺭﯗﺷﻠﯘﻕ ﺗﯜﺭﻙ ﻗﯧﺮﯨﻨﺪﺍﺷﻼﺭﻧﯩﯖﻤﯘ ﺗﻪﺷﻪﺑﺒﯘﺳﻜﺎﺭﻟﯩﻖ ﺑﯩﻠﻪﻥ ﺋﯘﻳﻐﯘﺭﻻﺭ ﺳﯧﭙﯩﺪﯨﻦ ﻳﻪﺭ ﺋﯧﻠﯩﭗ، ﺋﯚﺯﻟﯩﺮﯨﻨﯩﯔ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻠﯩﻖ ﻗﯧﺮﯨﻨﺪﺍﺷﻠﯩﺮﯨﻐﺎ ﺑﻮﻟﻐﺎﻥ ﻗﻮﻟﻠﯩﺸﯩﻨﻰ ﺋﻮﭼﯘﻕ ﻧﺎﻣﺎﻳﻪﻥ ﻗﯩﻠﯩﯟﺍﺗﻘﺎﻧﻠﯩﻘﯩﻐﺎ ﺷﺎﻫﯩﺖ ﺑﻮﻻﻻﻳﻤﯩﺰ.

ﺷﯘﻧﯩﯔ ﺋﯜﭼﯜﻧﻤﯘ ﺗﯜﺭﻛﯩﻴﻪ، ﺧﯩﺘﺎﻳﻨﯩﯔ " ﯞﻩﺗﯩﻨﯩﻤﯩﺰﻧﻰ ﭘﺎﺭﭼﯩﻼﺷﻘﺎ ﺋﯘﺭﯗﻧﻐﺎﻥ ﭼﻪﺗﺌﻪﻟﺪﯨﻜﻰ ﺩﯛﺷﻤﻪﻥ ﻛﯜﭼﻠﻪﺭ " ﺩﻩﭖ ﺋﺎﺗﺎﻟﻐﺎﻥ ﻗﺎﺭﺍ ﺗﯩﺰﯨﻤﻠﯩﻜﯩﺪﻩ ﺑﯩﺮﯨﻨﭽﻰ ﺋﻮﺭﯗﻧﻐﺎ ﻗﻮﻳﯘﻟﯘﭖ ﻛﻪﻟﺪﻯ، ﮔﻮﻣﯩﻨﺪﺍﯓ ﺩﻩﯞﺭﯨﺪﯨﻤﯘ ﺷﯘﻧﺪﺍﻕ ﺋﯩﺪﻯ، ﻫﺎﺯﯨﺮﻣﯘ ﻫﻪﻡ ﺷﯘﻧﺪﺍﻕ، ﺷﯘﻧﯩﯔ ﺋﯜﭼﯜﻧﻤﯘ ﺧﯩﺘﺎﻱ ﻫﺎﻛﯩﻤﯩﻴﯩﺘﻰ ﺗﯜﺭﻛﯩﻴﻪ ﺟﯘﻣﻬﯘﺭﯨﻴﯩﺘﯩﮕﻪ ﯞﻩ ﺗﯜﺭﻛﯩﻴﻪ ﺧﻪﻟﻘﯩﻐﻪ ﻧﻪﭘﺮﻩﺕ ﯞﻩ ﺋﯚﭼﻤﻪﻧﻠﯩﻚ ﺗﯘﻳﻐﯘﺳﻰ ﺑﯩﻠﻪﻥ ﻗﺎﺭﺍﭖ ﻛﻪﻟﺪﻯ، ﺋﯩﭽﻜﻰ ﻫﯚﺟﺠﻪﺕ ﯞﻩ ﺋﯘﻗﺘﯘﺭﯗﺷﻠﯩﺮﯨﺪﺍ ﺗﯜﺭﻛﯩﻴﯩﻨﻰ، " ﯞﻩﺗﯩﻨﯩﻤﯩﺰﻧﯩﯔ ﺑﯩﺮﻟﯩﻜﯩﮕﻪ ﺧﻪﯞﭖ ﻳﻪﺗﻜﯜﺯﯛﯞﺍﺗﻘﺎﻥ ﺋﻪﯓ ﺋﺎﺳﺎﺳﻠﯩﻖ ﺩﯛﺷﻤﻪﻥ ﻛﯜﭺ " ﺩﻩﭖ ﺗﻪﻛﯩﺘﻠﻪﭖ، ﻫﻪﺭ ﺩﻩﺭﯨﺠﯩﻠﯩﻚ ﻫﯚﻛﯜﻣﻪﺗﻠﻪﺭﻧﻰ ﺑﯘ ﺟﻪﻫﻪﺗﺘﻪ ﺋﯩﺰﭼﯩﻞ ﺗﯜﺭﺩﻩ ﺋﺎﮔﺎﻫﻼﻧﺪﯗﺭﯗﭖ ﻛﻪﻟﺪﻯ، ﺩﯨﭙﻠﻮﻣﺎﺗﯩﻴﻪ ﺟﻪﻫﻪﺗﺘﯩﻤﯘ، ﺗﯜﺭﻛﯩﻴﻪ ﻫﯚﻛﯜﻣﯩﺘﻰ ﺭﻩﻫﺒﻪﺭﻟﯩﺮﯨﻨﻰ، ﺳﻮﺩﯨﮕﻪﺭ ﯞﻩ ﺳﺎﻳﺎﻫﻪﺗﭽﯩﻠﯩﺮﯨﻨﻰ ﻣﯘﻣﻜﯩﻦ ﺑﺎﺭ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻐﺎ ﺩﺍﺭﯨﺘﻤﺎﺳﻠﯩﻖ ﺗﺎﻛﺘﯩﻜﯩﺴﯩﻨﻰ ﻗﻮﻟﻠﯩﻨﯩﭗ ﻛﻪﻟﮕﻪﻥ ﺋﯩﺪﻯ.

ﺑﻪﺯﻯ ﺋﯘﭼﯘﺭﻻﺭﻏﺎ ﻗﺎﺭﯨﻐﺎﻧﺪﺍ، ﺗﯜﺭﻛﯩﻴﯩﻨﯩﯔ ﺳﺎﺑﯩﻖ ﭘﺮﯦﺰﯨﺪﯦﻨﺘﻠﯩﺮﯨﺪﯨﻦ ﺗﯘﺭﻏﯘﺕ ﺋﯚﺯﺍﻝ ﯞﻩ ﺳﯘﻻﻳﻤﺎﻥ ﺩﻩﻣﯩﺮﻩﻟﻠﻪﺭ ﺋﻪﻳﻨﻰ ﭼﺎﻏﺪﺍ ﺧﯩﺘﺎﻱ ﻫﯚﻛﯜﻣﯩﺘﯩﺪﯨﻦ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻐﺎ ﺑﯧﺮﯨﭗ ﻣﻪﻫﻤﯘﺕ ﻗﻪﺷﻘﯩﺮﯨﻨﯩﯔ ﻗﻪﺑﺮﯨﺴﯩﻨﻰ ﺗﺎﯞﺍﭖ ﻗﯩﻠﯩﺸﻨﻰ ﺗﻪﻟﻪﭖ ﻗﯩﻠﻐﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﯘﻻﺭﻧﯩﯔ ﺑﯘ ﺗﻪﻟﯩﭙﻰ ﺭﻩﺕ ﻗﯩﻠﯩﻨﻐﺎﻥ، ﻳﻪﻧﻪ ﺗﯜﺭﻛﯩﻴﻪ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻘﻰ ﺗﺎﻛﻰ 80 - ﻳﯩﻠﻼﺭﺩﯨﻦ ﺋﯧﺘﯩﺒﺎﺭﻩﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﻛﻮﻧﺴﯘﻟﺨﺎﻧﺎ ﻗﯘﺭﯗﺷﻨﻰ ﺋﯩﻠﺘﯩﻤﺎﺱ ﻗﯩﻠﻐﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺧﯩﺘﺎﻱ ﻫﯚﻛﯜﻣﯩﺘﻰ ﺑﯘﻧﯩﯖﻐﺎ ﻳﻮﻝ ﻗﻮﻳﻤﯩﻐﺎﻥ.

 ﺋﻪﻣﻤﺎ ﺑﯜﮔﯜﻥ ﺗﺎﺷﻘﻰ ﻛﯚﺭﯛﻧﯜﺷﺘﯩﻦ ﻗﺎﺭﯨﻐﯩﻨﯩﻤﯩﺰﺩﺍ، ﺧﯩﺘﺎﻱ ﻫﺎﻛﯩﻤﯩﻴﯩﺘﯩﻨﯩﯔ ﺗﯜﺭﻛﯩﻴﻪ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﻩﺗﻠﯩﺮﯨﮕﻪ ﺋﺎﻻﻫﯩﺪﻩ ﺋﻪﻫﻤﯩﻴﻪﺕ ﺑﯧﺮﯨﯟﺍﺗﻘﺎﻧﻠﯩﻘﯩﻨﻰ ﻛﯚﺭﯛﯞﯦﻠﯩﺶ ﺗﻪﺱ ﺋﻪﻣﻪﺱ. ﻣﻪﺳﯩﻠﻪﻥ، ﺑﯘ ﻗﯧﺘﯩﻢ ﺋﯚﺗﻜﯜﺯﯛﻟﮕﻪﻥ " ﺋﯜﺭﯛﻣﭽﻰ ﺳﻮﺩﺍ ﻳﻪﺭﻣﻪﻧﻜﯩﺴﻰ " ﮔﻪ، ﺗﯜﺭﻛﯩﻴﻪ ﺩﯙﻟﻪﺕ ﺋﯩﺸﻠﯩﺮﻯ ﻛﻮﻣﯩﺴﺴﺎﺭﻯ ﻛﯜﺭﺷﺎﺕ ﺗﯜﺯﻣﻪﻥ ﺋﺎﻻﻫﯩﺪﻩ ﺗﻪﻛﻠﯩﭗ ﺑﯩﻠﻪﻥ ﻗﺎﺗﻨﺎﺷﺘﻰ. ﺗﯜﺭﻙ ﻣﻪﻫﺴﯘﻻﺗﻠﯩﺮﻯ ﻳﻪﺭﻣﻪﻧﻜﯩﺴﯩﻤﯘ ﺑﯘ ﻗﯧﺘﯩﻤﻘﻰ " ﺋﯜﺭﯛﻣﭽﻰ ﺳﻮﺩﺍ ﻳﻪﺭﻣﻪﻧﻜﯩﺴﻰ " ﻧﯩﯔ ﺋﻪﯓ ﻣﯘﻫﯩﻢ ﺗﻪﺭﻛﯩﯟﻯ ﻗﯩﺴﻤﻰ ﺑﻮﻟﯘﭖ، ﺗﯜﺭﻙ ﺷﯩﺮﻛﻪﺗﻠﯩﺮﻯ ﺋﯜﭼﯜﻥ ﺋﺎﺟﺮﯨﺘﯩﻠﻐﺎﻥ ﺋﻮﺭﯗﻧﻤﯘ ﻳﻪﺭﻣﻪﻧﻜﻪ ﺯﺍﻟﯩﻨﯩﯔ ﻛﯚﭖ ﻗﯩﺴﻤﯩﻨﻰ ﺋﯩﮕﯩﻠﯩﮕﻪﻥ ﺋﯩﺪﻯ.

ﺧﻪﯞﻩﺭﻟﻪﺭﺩﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺗﻪﻛﻠﯩﭙﻰ ﯞﻩ ﺗﻪﺷﻪﺑﺒﯘﺳﻰ ﺑﯩﻠﻪﻥ ﺗﯜﺭﻛﯩﻴﻪ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ " ﺗﯜﺭﻛﯩﻴﻪ ﺳﻮﺩﺍ - ﺳﺎﻧﺎﺋﻪﺕ ﺭﺍﻳﻮﻧﻰ " ﻗﯘﺭﯗﺷﻨﻰ ﻗﺎﺭﺍﺭ ﻗﯩﻠﻐﺎﻥ. ﺗﯜﺭﻛﯩﻴﻪ، 11 ﻳﯩﻠﺪﯨﻦ ﺑﯘﻳﺎﻥ " ﺋﯜﺭﯛﻣﭽﻰ ﺧﻪﻟﻘﺌﺎﺭﺍ ﺳﻮﺩﺍ ﻳﻪﺭﻣﻪﻧﻜﯩﺴﻰ " ﮔﻪ ﻗﺎﺗﻨﯩﺸﯩﭗ ﻛﻪﻟﻤﻪﻛﺘﻪ ﯞﻩ ﻫﯧﭻ ﺑﯩﺮ ﯞﺍﻗﯩﺖ ﻫﺎﺯﯨﺮﻗﯩﺪﻩﻙ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﻨﯩﯔ ﻫﻪﺷﻪﻡ ﯞﻩ ﺩﺍﻏﺪﯗﻏﺎ ﺑﯩﻠﻪﻥ ﻛﯜﺗﯩﯟﯦﻠﯩﺸﯩﻐﺎ، ﺷﯘﻧﺪﺍﻗﻼ ﭘﯜﺗﯜﻥ ﺋﺎﺧﺒﺎﺭﺍﺕ ﯞﺍﺳﺘﯩﻠﯩﺮﯨﻨﻰ ﺳﻪﭘﻪﺭﯞﻩﺭ ﻗﯩﻠﯩﭗ ﻛﻪﯓ ﻛﯚﻟﻪﻣﺪﻩ ﺗﻪﺷﯟﯨﻖ ﻗﯩﻠﯩﺸﯩﻐﺎ ﺋﯘﭼﺮﺍﭖ ﺑﺎﻗﻤﯩﻐﺎﻥ ﺋﯩﺪﻯ.

ﺋﯘﻧﺪﺍﻗﺘﺎ ﺧﯩﺘﺎﻳﻨﯩﯔ ﺗﯜﺭﻛﯩﻴﯩﮕﻪ ﻗﺎﺭﺍﺗﻘﺎﻥ ﺳﯩﻴﺎﺳﯩﺘﯩﺪﯨﻜﻰ ﺑﯘ ﺗﯘﻳﯘﻗﺴﯩﺰ ﺋﯚﺯﮔﯩﺮﯨﺶ ﻧﯧﻤﯩﺪﯨﻦ ﺩﯨﺮﻩﻙ ﺑﯧﺮﯨﺪﯗ ؟ ﺧﯩﺘﺎﻱ ﺗﯜﺭﻛﯩﻴﯩﺪﯨﻦ ﻧﯧﻤﯩﻨﻰ ﻛﯜﺗﻤﻪﻛﭽﻰ ؟ ﺑﻪﺯﻯ ﺳﯩﻴﺎﺳﻰ ﻛﯚﺯﻩﺗﻜﯜﭼﯩﻠﻪﺭ ﺑﯘﻧﻰ ﺗﯚﯞﻩﻧﺪﯨﻜﻰ ﺑﯩﺮﻗﺎﻧﭽﻪ ﻧﯘﻗﺘﺎ ﺑﯘﻳﯩﭽﻪ ﺋﯩﺰﺍﻫﻼﺷﻘﺎ ﺗﯩﺮﯨﺸﻤﺎﻗﺘﺎ: ﺗﯜﺭﻛﯩﻴﯩﻨﻰ " ﺷﺎﯕﺨﻪﻱ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﻰ " ﻏﺎ ﺳﯚﺭﻩﭖ ﻛﯩﺮﯨﭗ، ﺋﺎﺗﺎﻟﻤﯩﺶ " 3 ﺧﯩﻞ ﻛﯜﭼﻠﻪﺭﮔﻪ ﺯﻩﺭﺑﻪ ﺑﯧﺮﯨﺶ " ﺩﯦﮕﻪﻥ ﻧﯩﻘﺎﭖ ﺋﺎﺳﺘﯩﺪﺍ ﺋﯘﻳﻐﯘﺭﻻﺭﻧﯩﯔ ﻣﯩﻠﻠﯩﻲ ﻫﻪﺭﯨﻜﻪﺗﻠﯩﺮﯨﮕﻪ ﻗﺎﺭﺍﺗﻘﺎﻥ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﯩﻨﻰ ﺳﯩﻴﺎﺳﻰ ﯞﻩ ﺩﯨﭙﻠﻮﻣﺎﺗﯩﻴﻪ ﺟﻪﻫﻪﺗﺘﻪ ﺗﯧﺨﯩﻤﯘ ﻛﻪﯓ ﻗﻮﻟﻼﺷﻘﺎ ﺋﯩﮕﻪ ﻗﯩﻠﯩﺶ. ﻣﯧﻨﯩﯖﭽﻪ ﺑﯘ ﺧﯩﻞ ﺋﯧﻬﺘﯩﻤﺎﻝ ﺋﻪﺳﻼ ﻣﯘﻣﻜﯩﻦ ﺋﻪﻣﻪﺱ، ﺧﯩﺘﺎﻳﻨﯩﯔ ﻳﻪﻧﻪ ﺑﯩﺮ ﻣﻪﻗﺴﯩﺘﻰ، ﺗﯜﺭﻛﯩﻴﻪ ﻛﻪﻟﮕﯜﺳﯩﺪﻩ ﺗﻪﺳﯩﺲ ﻗﯩﻠﻤﺎﻗﭽﻰ ﺑﻮﻟﻐﺎﻥ ﯞﻩ ﻗﯩﻤﻤﯩﺘﻰ ﻧﻪﭼﭽﻪ 10 ﻣﯩﻠﻴﺎﺭﺩ ﺩﻭﻟﻼﺭﻏﺎ ﺑﺎﺭﯨﺪﯨﻐﺎﻥ ﻳﺎﺩﺭﻭ ﺋﯧﻠﯧﻜﺘﯩﺮ ﺋﯩﺴﺘﺎﻧﺴﯩﺴﻰ ﻗﯘﺭﯗﺵ ﺳﺎﻻﻫﯩﻴﯩﺘﯩﮕﻪ ﺋﯩﮕﻪ ﺑﻮﻟﯘﺵ ﯞﻩ ﺑﯘ ﺋﺎﺭﻗﯩﻠﯩﻖ ﺋﯚﺯﯨﻨﯩﯔ ﻳﺎﺩﺭﻭ ﻛﯜﭼﻰ ﺟﻪﻫﻪﺗﺘﻪ ﺩﯗﻧﻴﺎﺩﯨﻜﻰ ﺗﻪﺳﯩﺮﻯ ﯞﻩ ﻏﻪﺭﺏ ﺋﻪﻟﻠﯩﺮﻯ ﺑﻮﻟﻐﺎﻥ ﺭﯨﻘﺎﺑﻪﺕ ﻛﯜﭼﯩﻨﻰ ﺋﺎﺷﯘﺭﯗﺵ، ﭼﯜﻧﻜﻰ ﺋﻮﺗﺘﯘﺭﺍ ﺷﻪﺭﻕ ﺭﺍﻳﻮﻧﯩﺪﺍ ﺋﺎﺗﻮﻡ ﯞﻩ ﻳﺎﺩﺭﻭ ﻛﯜﭼﯩﻨﻰ ﻧﺎﻣﺎﻳﻪﻥ ﻗﯩﻠﯩﺶ ﺑﻮﻟﺴﺎ ﺧﯩﺘﺎﻱ ﺋﯜﭼﯜﻥ ﺯﻭﺭ ﺳﯩﻴﺎﺳﻰ ﯞﻩ ﻫﻪﺭﺑﯩﻲ ﺋﻪﻫﻤﯩﻴﻪﺗﻜﻪ ﺋﯩﮕﻪ.

ﺋﻪﻣﻤﺎ ﻳﻪﻧﻪ ﺑﻪﺯﻯ ﺳﯩﻴﺎﺳﻰ ﻛﯜﺯﻩﺗﻜﯜﭼﯩﻠﻪﺭﻧﯩﯔ ﻣﯚﻟﭽﯩﺮﯨﮕﻪ ﻗﺎﺭﯨﻐﺎﻧﺪﺍ ﺧﯩﺘﺎﻱ، ﺗﯜﺭﻛﯩﻴﯩﮕﻪ ﻗﺎﺭﯨﺘﺎ ﺩﻩﺭﯨﺠﯩﺪﯨﻦ ﺗﺎﺷﻘﯩﺮﻯ ﻳﯧﻘﯩﻨﻠﯩﺸﯩﺶ ﺳﯩﻴﺎﺳﯩﺘﯩﻨﻰ ﻳﻮﻟﻐﺎ ﻗﻮﻳﯘﺷﺘﺎ، ﺑﻮﻟﯘﭘﻤﯘ ﺋﻪﺳﻠﯩﺪﻩ ﻳﯜﺭﮔﯜﺯﯛﭖ ﻛﯧﻠﯩﯟﺍﺗﻘﺎﻥ ﺳﯩﻴﺎﺳﯩﺘﯩﮕﻪ ﺧﯩﻼﭖ ﻫﺎﻟﺪﺍ ﺗﯜﺭﻛﯩﻴﯩﻨﯩﯔ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻐﺎ ﺑﯩﯟﺍﺳﺘﻪ ﺳﯩﯖﯩﭗ ﻛﯩﺮﯨﭗ ﻛﻪﯓ ﺩﺍﺋﯩﺮﯨﺪﻩ ﺋﯩﻘﺘﯩﺴﺎﺩﻯ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﺸﯩﻐﺎ ﺭﯗﺧﺴﻪﺕ ﻗﯩﻠﯩﺸﺘﺎ، ﺋﯘﻳﻐﯘﺭ ﺧﻪﻟﻘﯩﻨﯩﯔ ﺗﯜﺭﻛﯩﻴﻪ ﯞﻩ ﺗﯜﺭﻙ ﺧﻪﻟﻘﯩﻐﻪ ﺑﻮﻟﻐﺎﻥ ﺋﯜﻣﯩﺪ ﯞﻩ ﺋﯩﺸﻪﻧﭽﯩﺴﯩﻨﻰ ﺋﺎﺟﯩﺰﻻﺷﺘﯘﺭﯗﺷﻨﻰ ﻣﻪﻗﺴﻪﺕ ﻗﯩﻠﻐﺎﻥ ﺑﻮﻟﯘﺷﻰ ﻣﯘﻣﻜﯩﻦ. ﻣﻪﻟﯘﻡ ﻣﻪﻧﯩﺪﯨﻦ ﺋﺎﻟﻐﺎﻧﺪﺍ ﺑﯘ، ﺧﯩﺘﺎﻱ ﻫﺎﻛﯩﻤﯩﻴﯩﺘﯩﻨﯩﯔ ﺋﯘﻳﻐﯘﺭﻻﺭﻧﯩﯔ ﻣﯩﻠﻠﯩﻲ ﺋﯩﺮﺍﺩﯨﺴﯩﻨﻰ ﺋﺎﺟﯩﺰﻻﺷﺘﯘﺭﯗﺵ ﻫﻪﺭﯨﻜﯩﺘﯩﻨﯩﯔ ﻣﯘﻫﯩﻢ ﺑﯩﺮ ﭘﺎﺭﭼﯩﺴﻰ.

ﺑﯘ ﺧﯩﻞ ﻗﺎﺭﺍﺷﻨﯩﯔ ﻣﻪﻟﯘﻡ ﺋﯩﻠﻤﯩﻲ ﺋﺎﺳﺎﺳﻰ ﺑﺎﺭ، ﭼﯜﻧﻜﻰ ﺗﯜﺭﻛﯩﻴﯩﻨﯩﯔ " ﺋﯜﺭﯛﻣﭽﻰ ﺧﻪﻟﻘﺌﺎﺭﺍ ﺳﻮﺩﺍ ﻳﻪﺭﻣﻪﻧﻜﯩﺴﻰ " ﮔﻪ ﻗﺎﺗﻨﯩﺸﯩﺸﯩﻨﯩﯔ ﯞﻩ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﺳﺎﻧﺎﺋﻪﺕ ﯞﻩ ﺳﻮﺩﺍ ﺭﺍﻳﻮﻧﻰ ﻗﯘﺭﯗﺷﯩﻨﯩﯔ ﻳﻪﺭﻟﯩﻚ ﺧﻪﻟﻘﻘﻪ ﻫﯧﭻ ﺑﯩﺮ ﭘﺎﻳﺪﯨﺴﻰ ﻳﻮﻕ، ﭼﯜﻧﻜﻰ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﺋﯩﻤﭙﻮﺭﺕ - ﺋﯧﻜﯩﺴﭙﻮﺭﺕ ﻫﻮﻗﯘﻗﻰ ﭘﯜﺗﯜﻧﻠﻪﻱ ﺧﯩﺘﺎﻱ ﺷﯩﺮﻛﻪﺗﻠﯩﺮﻯ ﯞﻩ ﺧﯩﺘﺎﻱ ﺧﻮﺟﺎﻳﯩﻨﻠﯩﺮﯨﻨﯩﯔ ﻗﻮﻟﯩﺪﺍ، ﺷﯘﯕﺎ ﺗﯜﺭﻙ ﺷﯩﺮﻛﻪﺗﻠﯩﺮﯨﻨﯩﯔ ﯞﻩ ﺳﻮﺩﯨﮕﻪﺭﻟﯩﺮﯨﻨﯩﯔ ﺑﯘ ﺭﺍﻳﻮﻧﺪﯨﻜﻰ ﺷﯧﺮﯨﻚ ﯞﻩ ﺧﯧﺮﯨﺪﺍﺭﻟﯩﺮﯨﻤﯘ ﺋﻪﻟﯟﻩﺗﺘﻪ ﺧﯩﺘﺎﻳﻼﺭﺩﯨﻦ ﺋﯩﺒﺎﺭﻩﺕ.

ﻳﻪﻧﻪ ﻛﯧﻠﯩﭗ ﺧﯩﺘﺎﻱ ﺷﯩﺮﻛﻪﺗﻠﯩﺮﻯ ﯞﻩ ﺧﻮﺟﺎﻳﯩﻨﻠﯩﺮﯨﻨﯩﯔ ﺗﯜﺭﻛﻠﻪﺭﮔﻪ ﺳﺎﺗﯩﺪﯨﻐﺎﻥ ﻣﯧﻠﻰ ﺑﯘ ﺭﺍﻳﻮﻧﻨﯩﯔ ﺗﻪﺑﯩﺌﯩﻲ ﺑﺎﻳﻠﯩﻘﻠﯩﺮﻯ ﯞﻩ ﺋﯘﻳﻐﯘﺭ ﺧﻪﻟﻘﯩﻨﯩﯔ ﻗﺎﻥ - ﺗﻪﺭﻯ ﺑﻪﺩﯨﻠﯩﮕﻪ ﻛﻪﻟﮕﻪﻥ ﻳﯧﺰﺍ ﺋﯩﮕﯩﻠﯩﻚ ﻣﻪﻫﺴﯘﻻﺗﻠﯩﺮﯨﺪﯨﻦ ﺋﯩﺒﺎﺭﻩﺕ. ﻣﻪﻟﯘﻡ ﻣﻪﻧﯩﺪﯨﻦ ﺋﺎﻟﻐﺎﻧﺪﺍ ﺗﯜﺭﻙ ﺷﯩﺮﻛﻪﺗﻠﯩﺮﻯ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﺧﯩﺘﺎﻳﻨﯩﯔ ﻳﻪﺭﻟﯩﻜﻠﻪﺭﻧﻰ ﺗﺎﻻﻥ - ﺗﺎﺭﺍﺝ ﻗﯩﻠﯩﺶ ﯞﻩ ﺳﯜﻣﯜﺭﯛﺵ ﺳﯩﻴﺎﺳﯩﺘﯩﮕﻪ ﺑﯩﻠﯩﭗ - ﺑﯩﻠﻤﻪﻱ ﺷﯧﺮﯨﻚ ﺑﻮﻟﻐﺎﻥ ﺑﻮﻟﯩﺪﯗ، ﺑﯘ ﻫﺎﻝ ﺗﻪﺑﯩﺌﯩﻲ ﻫﺎﻟﺪﺍ ﺋﯚﺯﻟﯩﺮﻯ ﺑﯩﻠﻪﻥ ﻗﺎﻥ ‏ - ﻗﯧﺮﯨﻨﺪﺍﺵ ﺑﻮﻟﻐﺎﻥ ﺗﯜﺭﻛﯩﻴﻪ ﯞﻩ ﺗﯜﺭﻙ ﺧﻪﻟﻘﯩﺪﯨﻦ ﺯﻭﺭ ﺋﯜﻣﯩﺪ ﻛﯜﺗﯜﭖ ﻛﯧﻠﯩﯟﺍﺗﻘﺎﻥ ﺋﯘﻳﻐﯘﺭ ﺧﻪﻟﻘﻰ ﺋﺎﺭﯨﺴﯩﺪﺍ ﺋﯜﻣﯩﺪﺳﯩﺰﻟﯩﻚ، ﻫﻪﺗﺘﺎ ﻧﺎﺭﺍﺯﯨﻠﯩﻖ ﭘﻪﻳﺪﺍ ﻗﯩﻠﯩﺸﻰ ﻣﯘﻣﻜﯩﻦ.

ﺑﯘ، ﺋﯘﺯﯗﻥ ﻳﯩﻠﻼﺭﺩﯨﻦ ﺑﯘﻳﺎﻥ ﺗﯜﺭﻙ ﺧﻪﻟﻘﻰ ﺑﯩﻠﻪﻥ ﺋﯘﻳﻐﯘﺭ ﺧﻪﻟﻘﯩﻨﻰ ﻫﯧﺴﺴﯩﻴﺎﺕ ﺟﻪﻫﻪﺗﺘﻪ ﺑﯩﺮ - ﺑﯩﺮﯨﺪﯨﻦ ﺋﯘﺯﺍﻗﻼﺷﺘﯘﺭﯗﺵ ﺳﯩﻴﺎﺳﯩﺘﯩﻨﻰ ﻗﻮﻟﻠﯩﻨﯩﭗ ﻛﻪﻟﮕﻪﻥ ﯞﻩ ﺑﯘ ﺟﻪﻫﻪﺗﺘﻪ ﺋﺎﻧﭽﻪ ﻣﯘﯞﻩﭘﭙﻪﻗﯩﻴﻪﺗﻜﻪ ﺋﯧﺮﯨﺸﻪﻟﻤﯩﮕﻪﻥ ﺧﯩﺘﺎﻱ ﻫﺎﻛﯩﻤﯩﻴﯩﺘﻰ ﺋﯜﭼﯜﻥ ﻧﺎﻫﺎﻳﯩﺘﻰ ﭘﺎﻳﺪﯨﻠﯩﻖ ﺑﯩﺮ ﺋﺎﻣﯩﻠﺪﯨﻦ ﺋﯩﺒﺎﺭﻩﺕ !