ﻣﻪﺷﺌﻪﻟﮕﻪ ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﻣﻪﺭﻛﯩﺰﻯ ﻛﻮﻣﯩﺘﯧﺖ ﺳﯩﻴﺎﺳﯩﻲ ﺑﻴﯘﺭﻭﺳﯩﻨﯩﯔ ﺋﻪﺯﺍﺳﻰ ﯞﺍﯓ ﻟﯧﭽﯜﻩﻥ ﺋﯚﺯﻯ ﺋﻮﺕ ﻳﺎﻗﻘﺎﻥ.

ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯧﻴﯩﻨﯩﯔ ﺑﺎﻳﺎﻧﺎﺗﭽﯩﺴﻰ ﺩﯨﻠﺸﺎﺕ ﺭﯨﺸﯩﺘﻨﯩﯔ ﺋﯧﻴﺘﯩﺸﯩﭽﻪ، ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻚ ﻣﻪﺷﺌﯩﻠﻰ ﺋﯜﺭﯛﻣﭽﯩﮕﻪ ﻛﯧﻠﯩﺸﺘﯩﻦ ﺑﯘﺭﯗﻥ ﺋﺎﭘﺘﻮﻧﻮﻡ ﺭﺍﻳﻮﻥ ﺑﯩﻠﻪﻥ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﻣﯩﻨﯩﺴﺘﯩﺮﻟﯩﻘﻰ ﺑﯩﺮﻟﻪﺷﻤﻪ ﺋﯘﻗﺘﯘﺭﯗﺵ ﭼﯩﻘﯩﺮﯨﭗ، ﻫﯚﻛﯜﻣﻪﺗﻨﯩﯔ ﺋﻮﺭﯗﻧﻼﺷﺘﯘﺭﯗﺷﯩﺪﯨﻦ ﺳﯩﺮﺕ ﻫﯧﭽﻜﯩﻤﻨﯩﯔ ﭼﻪﺗﺌﻪﻝ ﻣﯘﺧﺒﯩﺮﻟﯩﺮﻯ ﺑﯩﻠﻪﻥ ﻛﯚﺭﯛﺷﯜﺷﻜﻪ ﺭﯗﺧﺴﻪﺕ ﻗﯩﻠﯩﻨﻤﺎﻳﺪﯨﻐﺎﻧﻠﯩﻘﯩﻨﻰ، ﺋﻪﮔﻪﺭ ﭘﺎﺵ ﺑﻮﻟﯘﭖ ﻗﺎﻟﺴﺎ 'ﺩﯙﻟﻪﺕ ﻣﻪﺧﭙﯩﻴﻪﺗﻠﯩﻜﯩﻨﻰ ﺳﺎﺗﻘﺎﻥ' ﺩﯦﮕﻪﻥ ﺟﯩﻨﺎﻳﻰ ﻧﺎﻡ ﺑﯩﻠﻪﻥ ﺟﺎﺯﺍﻟﯩﻨﯩﺪﯨﻐﺎﻧﻠﯩﻘﯩﻨﻰ ﺟﺎﻛﺎﺭﻟﯩﻐﺎﻥ.

ﻓﺮﺍﻧﺴﯩﻴﻪ ﺋﺎﮔﯧﻨﺘﻠﯩﻘﯩﻨﯩﯔ ﺑﺎﻳﺎﻥ ﻗﯩﻠﯩﺸﯩﭽﻪ، ﺧﯩﺘﺎﻱ ﻫﯚﻛﯜﻣﯩﺘﻰ ﺋﯜﺭﯛﻣﭽﯩﺪﻩ ﺋﻮﻟﯩﻤﭙﯩﻚ ﻣﻪﺷﺌﯩﻠﯩﻨﻰ ﻗﺎﺭﺷﻰ ﺋﯧﻠﯩﺶ ﺋﯜﭼﯜﻥ ﺑﻪﻟﮕﯩﻠﯩﮕﻪﻥ ﻛﯩﺸﯩﻠﻪﺭﺩﯨﻦ ﺑﺎﺷﻘﺎ، ﻛﻮﭼﯩﻼﺭﻏﺎ ﭼﯩﻘﯩﭗ ﺋﺎﻟﻘﯩﺸﻼﯞﺍﺗﻘﺎﻥ ﻛﯩﺸﯩﻠﻪﺭﻧﯩﯔ ﻫﻪﻣﻤﯩﺴﻰ ﺧﯩﺘﺎﻳﻼﺭﺩﯨﻦ ﺋﯩﺒﺎﺭﻩﺕ.

ﺭﻭﻳﺘﯧﺮﺱ ﺋﺎﮔﯧﻨﺘﻠﯩﻘﯩﻨﯩﯔ ﺑﯜﮔﯜﻥ ﻗﻪﺷﻘﻪﺭﺩﯨﻦ ﺧﻪﯞﻩﺭ ﻗﯩﻠﯩﺸﯩﭽﻪ، ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻚ ﻣﻪﺷﺌﯩﻠﻰ ﻧﯧﻔﯩﺖ ﺑﺎﻳﻠﯩﻘﻰ ﻣﻮﻝ ﯞﻩ ﺳﯩﻴﺎﺳﯩﻲ ﺟﻪﻫﻪﺗﺘﻪ ﺳﻪﺯﮔﯜﺭ ﺑﻮﻟﻐﺎﻥ ﺑﯘ ﺭﺍﻳﻮﻧﺪﺍ ﺋﯘﻳﻐﯘﺭﻻﺭ ﺋﻪﯓ ﺯﯨﭻ ﺋﻮﻟﺘﯘﺭﺍﻗﻼﺷﻘﺎﻥ ﻗﻪﺷﻘﻪﺭﺩﯨﻦ ﺋﯚﺗﯜﺵ ﺋﺎﻟﺪﯨﺪﺍ ﺗﯘﺭﻏﺎﻧﺪﺍ، ﺑﯘ ﺷﻪﻫﻪﺭﺩﻩ ﻣﻪﺷﺌﻪﻝ ﺋﯚﺗﯩﺪﯨﻐﺎﻥ ﻳﻮﻟﻼﺭﺩﯨﻜﻰ ﺳﻮﺩﺍ ﺩﯗﻛﺎﻧﻠﯩﺮﻯ ﭘﯜﺗﯜﻧﻠﻪﻱ ﺗﺎﻗﯩﯟﯦﺘﯩﻠﮕﻪﻥ. ﻫﻪﻣﻤﻪ ﺩﻭﻗﻤﯘﺷﻨﻰ ﺧﯩﺘﺎﻱ ﺳﺎﻗﭽﯩﻠﯩﺮﻯ، ﺋﻮﺕ ﺋﯚﭼﯜﺭﮔﯜﭼﯩﻠﻪﺭ ﻗﺎﻣﺎﻝ ﻗﯩﻠﻐﺎﻥ. ﺧﯩﺘﺎﻱ ﻫﯚﻛﯜﻣﯩﺘﻰ ﺑﯘ ﺷﻪﻫﻪﺭﺩﻩ ﻣﻪﺷﺌﻪﻟﻨﻰ ﻛﯜﺗﯜﯞﯦﻠﯩﺶ ﺋﯜﭼﯜﻥ ﺑﻪﻟﮕﯩﻠﯩﮕﻪﻥ ﺧﯩﺰﻣﻪﺗﭽﯩﻠﻪﺭﺩﯨﻦ ﺑﺎﺷﻘﺎ، ﻫﯧﭽﻘﺎﻧﺪﺍﻕ ﺑﯩﺮ ﻛﯩﺸﯩﻨﯩﯔ ﺳﯩﺮﺗﻘﺎ ﭼﯩﻘﯩﺸﯩﻨﻰ ﭼﻪﻛﻠﯩﮕﻪﻥ. ﺑﯘﻧﯩﯖﺪﯨﻦ ﺑﯘﺭﯗﻧﻤﯘ ﺑﯘ ﻳﯘﺭﺗﺘﺎ ﺋﯘﻳﻐﯘﺭﻻﺭﻏﺎ ﺋﯚﺯ ﯞﻩﺗﯩﻨﯩﻨﯩﯔ 'ﺷﻪﺭﻗﯩﻲ ﺗﯜﺭﻛﯩﺴﺘﺎﻥ' ﺩﯦﮕﻪﻥ ﻧﺎﻣﯩﻨﻰ ﺗﯩﻠﻐﺎ ﺋﯧﻠﯩﺸﯩﻐﺎ ﺭﯗﺧﺴﻪﺕ ﻗﯩﻠﯩﻨﻤﺎﻱ ﻛﻪﻟﮕﻪﻥ ﺋﯩﺪﻯ.
ﺧﻪﯞﻩﺭﺩﻩ ﺋﯧﻴﺘﯩﻠﯩﺸﯩﭽﻪ، ﻗﻪﺷﻘﻪﺭﺩﻩ ﺗﯘﺭﯨﺪﯨﻐﺎﻥ ﭼﯧﻦ ﮔﯘﺍﯕﺸﯧﯔ ﺋﯩﺴﯩﻤﻠﯩﻚ ﺑﯩﺮ ﺧﯩﺘﺎﻱ ﻣﯘﺧﺒﯩﺮﻏﺎ ' ﺳﺎﻗﭽﯩﻼﺭ ﻛﯧﭽﯩﻠﯩﺮﻯ ﺧﺎﻟﯩﻐﺎﻥ ﺋﯚﻳﮕﻪ ﻛﯩﺮﯨﭗ ﺋﺎﺧﺘﯘﺭﯗﺵ ﺋﯧﻠﯩﭗ ﺑﯧﺮﯨﯟﺍﺗﯩﺪﯗ' ﺩﯦﮕﻪﻥ.

ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯧﻴﯩﻨﯩﯔ ﺑﺎﻳﺎﻧﺎﺗﭽﯩﺴﻰ ﺩﯨﻠﺸﺎﺕ ﺭﯨﺸﯩﺘﻨﯩﯔ ﺋﯧﻴﺘﯩﺸﯩﭽﻪ، ﻗﻪﺷﻘﻪﺭﺩﻩ ﺋﻮﻗﯘﻏﯘﭼﯩﻼﺭﻧﻰ ﺋﻮﻟﯩﻤﭙﯩﻚ ﻣﻪﺷﺌﯩﻠﻰ ﺋﯜﭼﯜﻥ ﺋﯘﺳﯘﻝ ﺋﻮﻳﻨﯩﺘﯩﭗ، ﺧﯩﺘﺎﻳﻐﺎ ﻣﻪﺩﻩﺕ ﺑﯧﺮﯨﺪﯨﻐﺎﻥ ﺷﯘﺋﺎﺭﻻﺭﻧﻰ ﺗﻮﯞﻟﯩﺘﯩﺸﻨﯩﯔ ﺋﯚﺯﻯ، ﺋﻪﺭﻛﯩﻨﻠﯩﻜﻰ ﺧﯩﺘﺎﻱ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ ﺩﻩﭘﺴﻪﻧﺪﻩ ﻗﯩﻠﯩﻨﯩﯟﺍﺗﻘﺎﻥ ﻗﻪﺷﻘﻪﺭ ﺧﻪﻟﻘﻰ ﺋﯜﭼﯜﻥ ﻗﯩﻠﯩﻨﻐﺎﻥ ﺋﻪﯓ ﻫﺎﻗﺎﺭﻩﺕ.