ﺩﯗﻧﻴﺎﺩﺍ ﻫﻪﺭ ﻗﺎﻧﺪﺍﻕ ﺑﯩﺮ ﺋﯩﺸﻨﯩﯔ ﺋﯚﺯﯨﮕﻪ ﻻﻳﯩﻖ ﻗﺎﺋﯩﺪﻩ - ﻳﻮﺳﯘﻧﻰ ﯞﻩ ﺋﯚﺯﯨﮕﻪ ﺧﺎﺱ ﺋﻪﺩﻩﭖ ﺋﻪﺧﻼﻗﻰ ﺑﺎﺭﺩﯗﺭ. ﺑﯩﺮﺍﯞﻧﯩﯔ ﺋﯚﻳﯩﮕﻪ ﻛﯩﺮﯨﺸﺘﻪ ﺋﯚﻱ ﺋﯩﮕﯩﺴﯩﺪﯨﻦ ﺭﯗﺧﺴﻪﺕ ﺳﻮﺭﺍﭖ ﻛﯩﺮﯨﺸﻤﯘ ﺷﯘ ﺋﻪﺩﻩﭖ - ﺋﻪﺧﻼﻕ ﻗﺎﺋﯩﺪﯨﻠﯩﺮﯨﺪﯨﻦ ﺑﯩﺮﯨﺪﯗﺭ.

ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﻨﯩﯔ ﻣﻪﻛﻜﻪ ﻣﯘﻛﻪﺭﺭﻩﻣﻪ ﺷﻪﻫﯩﺮﯨﺪﻩ ﺗﯘﺭﯗﺷﻠﯘﻕ ﻳﺎﺵ ﺋﺎﻟﯩﻢ ﺋﺎﺑﺪﯗﻟﻜﻪﺭﯨﻢ ﻫﺎﺟﯩﻢ ﺑﯘ ﻫﻪﻗﺘﯩﻜﻰ ﺳﯚﻫﺒﯩﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﻐﺎﻥ ﺋﯩﺪﻯ.

ﺋﺎﺑﺪﯗﻟﻜﻪﺭﯨﻢ ﻫﺎﺟﯩﻢ ﺑﯩﻠﻪﻥ ﺳﯚﻫﺒﻪﺕ

ﺋﺎﺑﺪﯗﻟﻜﻪﺭﯨﻢ ﻫﺎﺟﯩﻢ ﺑﯩﺮﺍﯞﻧﯩﯔ ﺋﯚﻳﯩﮕﻪ ﻛﯩﺮﯨﺸﺘﯩﻜﻰ ﺋﻪﺩﻩﭖ ﺋﻪﺧﻼﻕ ﻗﺎﺋﯩﺪﯨﻠﯩﺮﻯ ﻫﻪﻗﻘﯩﺪﻩ ﺗﻮﺧﺘﯘﻟﯘﭖ ﻣﯘﻧﺪﺍﻕ ﺩﯦﺪﻯ:" ﻣﯘﺳﯘﻟﻤﺎﻧﻼﺭﻧﯩﯔ ﺋﻪﻧﺌﻪﻧﯩﻠﯩﺮﻯ، ﮔﯜﺯﻩﻝ ﺋﻪﺩﻩﭖ - ﺋﻪﺧﻼﻕ ﻗﺎﺋﯩﺪﯨﻠﯩﺮﻯ ﺋﯩﻨﺘﺎﻳﯩﻦ ﻛﯚﭖ. ﻣﯧﻬﻤﺎﻥ ﺑﻮﻟﯘﺵ، ﺋﻮﻟﺘﯘﺭﯗﭖ - ﻗﻮﭘﯘﺵ، ﻳﻪﭖ - ﺋﯩﭽﯩﺶ، ﺳﯚﺯﻟﯩﺸﯩﺶ، ﺋﯘﺧﻼﺵ، ﺗﺎﺯﯨﻠﯩﻖ، ﺳﺎﻻﻣﻠﯩﺸﯩﺶ، ﺋﯩﺸﯩﻜﺘﯩﻦ ﻛﯩﺮﯨﺶ ﻗﺎﺗﺎﺭﻟﯩﻘﻼﺭﻧﯩﯔ ﻫﻪﻣﻤﯩﺴﯩﺪﻩ ﺑﻪﻟﮕﯩﻠﯩﻚ ﺋﻪﺩﻩﭖ - ﻗﺎﺋﯩﺪﯨﻠﻪﺭ ﺑﺎﺭ. ﺗﯚﯞﻩﻧﺪﻩ ﺋﯚﻳﮕﻪ ﻛﯩﺮﯨﺸﻨﯩﯔ ﺋﻪﺩﻩﭖ - ﻗﺎﺋﯩﺪﯨﻠﯩﺮﻯ ﻫﻪﻗﻘﯩﺪﻩ ﺗﻮﺧﺘﯩﻠﯩﻤﯩﺰ: ﺑﯩﺮﺍﯞﻧﯩﯔ ﺋﯚﻳﯩﮕﻪ ﻛﯩﺮﻣﻪﻛﭽﻰ ﺑﻮﻟﻐﺎﻥ ﺋﺎﺩﻩﻡ ﺋﺎﯞﯞﺍﻝ ﺋﯩﺸﯩﻜﻨﻰ ﭼﯧﻜﯩﭗ، ﺋﯚﻱ ﺋﯩﮕﯩﺴﯩﺪﯨﻦ ﺭﯗﺧﺴﻪﺕ ﺳﻮﺭﺍﭖ ﻛﯩﺮﯨﺸﻰ، ﺭﯗﺧﺴﻪﺕ ﻗﯩﻠﯩﻨﻤﯩﺴﺎ ﻗﺎﻳﺘﯩﭗ ﻛﯧﺘﯩﺸﻰ ﻻﺯﯨﻢ. ﺋﺎﻟﻼﻫ ﺗﺎﺋﺎﻻ ﻗﯘﺭﺋﺎﻥ ﻛﻪﺭﯨﻤﺪﻩ ﻣﯘﻧﺪﺍﻕ ﺗﻪﻟﯩﻢ ﺑﻪﺭﮔﻪﻥ:" ﺋﻰ ﻣﯚﻣﯩﻨﻠﻪﺭ! ﺑﺎﺷﻘﯩﻼﺭﻧﯩﯔ ﺋﯚﻳﻠﯩﺮﯨﮕﻪ (ﻛﯩﺮﯨﺸﻜﻪ) ﺋﯩﺠﺎﺯﻩﺕ ﺳﻮﺭﯨﻤﯩﻐﯩﭽﻪ ﯞﻩ ﺋﯚﻱ ﺋﯩﮕﯩﺴﯩﮕﻪ ﺳﺎﻻﻡ ﺑﻪﺭﻣﯩﮕﯩﭽﻪ ﻛﯩﺮﻣﻪﯕﻼﺭ، ﯞﻩﺯ - ﻧﻪﺳﯩﻬﻪﺕ ﺋﯧﻠﯩﺸﯩﯖﻼﺭ (ﻳﻪﻧﻰ ﺑﯘ ﮔﯜﺯﻩﻝ ﺋﻪﺧﻼﻕ - ﺋﻪﺩﻩﺑﻜﻪ ﺋﻪﻣﻪﻝ ﻗﯩﻠﯩﺸﯩﯖﻼﺭ) ﺋﯜﭼﯜﻥ ﺑﯘ ﺳﯩﻠﻪﺭﮔﻪ ﻳﺎﺧﺸﯩﺪﯗﺭ. ﺋﻪﮔﻪﺭ ﺑﺎﺷﻘﯩﻼﺭﻧﯩﯔ ﺋﯚﻳﻠﯩﺮﯨﺪﻩ ﻫﯧﭻ ﺋﺎﺩﻩﻡ ﺑﻮﻟﻤﯩﺴﺎ ﺳﯩﻠﻪﺭﮔﻪ ﺋﯩﺠﺎﺯﻩﺕ ﺑﯧﺮﯨﻠﻤﯩﮕﯩﭽﻪ ﻛﯩﺮﻣﻪﯕﻼﺭ، ﺋﻪﮔﻪﺭ ﺳﯩﻠﻪﺭﮔﻪ ﻗﺎﻳﺘﯩﯖﻼﺭ ﺩﯦﻴﯩﻠﺴﻪ ﻗﺎﻳﺘﯩﭗ ﻛﯧﺘﯩﯖﻼﺭ، ﻗﺎﻳﺘﯩﭗ ﻛﯧﺘﯩﺶ ﺳﯩﻠﻪﺭ ﺋﯜﭼﯜﻥ ﺋﻪﯓ ﻳﺎﺧﺸﯩﺪﯗﺭ، ﺋﺎﻟﻼﻫ ﺳﯩﻠﻪﺭﻧﯩﯔ ﻗﯩﻠﯩﺪﯨﻐﺎﻥ ﺋﻪﻣﻪﻟﻠﯩﺮﯨﯖﻼﺭﻧﻰ ﺑﯩﻠﯩﭗ ﺗﯘﺭﻏﯘﭼﯩﺪﯗﺭ. ﺷﻪﺧﺴﻰ ﺗﯘﺭﺍﻟﻐﯘ ﺑﻮﻟﻤﯩﻐﺎﻥ (ﻳﻪﻧﻰ ﺩﯗﻛﺎﻥ - ﺳﺎﺭﺍﻳﻼﺭﻏﺎ ﺋﻮﺧﺸﺎﺵ) ﺋﯚﻳﻠﻪﺭﮔﻪ ﻫﺎﺟﯩﺘﯩﯖﻼﺭ ﭼﯜﺷﯜﭖ ﻛﯩﺮﺳﻪﯕﻼﺭ، ﺳﯩﻠﻪﺭﮔﻪ ﻫﯧﭻ ﮔﯘﻧﺎﻫ ﻳﻮﻗﺘﯘﺭ"( ﻧﯘﺭ ﺳﯜﺭﯨﺴﻰ 27 - 29 - ﺋﺎﻳﻪﺗﻠﻪﺭ). ﭘﻪﻳﻐﻪﻣﺒﻪﺭ ﺋﻪﻟﻪﻳﻬﯩﺴﺴﺎﻻﻡ ﺑﯩﺮ ﻫﻪﺩﯨﺴﺘﻪ:" ﺭﯗﺧﺴﻪﺕ ﺋﯜﭺ ﻗﯧﺘﯩﻢ ﺳﻮﺭﯨﻠﯩﺪﯗ. ﺭﯗﺧﺴﻪﺕ ﺑﯧﺮﯨﻠﺴﻪ ﻛﯩﺮﯨﯔ. ﺋﻪﮔﻪﺭ ﺭﯗﺧﺴﻪﺕ ﺑﯧﺮﯨﻠﻤﯩﺴﻪ ﻗﺎﻳﺘﯩﭗ ﻛﯧﺘﯩﯔ" ﺩﻩﭖ ﻛﯚﺭﺳﻪﺗﻜﻪﻥ.

ﺋﯩﺸﯩﻜﻨﻰ ﭼﻪﻛﻜﻪﻧﺪﻩ، ﺋﯚﻱ ﺋﯩﮕﯩﺴﻰ " ﻛﯩﻢ ﺳﯩﺰ؟" ﺩﻩﭖ ﺳﻮﺭﯨﺴﺎ، "ﻣﻪﻥ" ﺩﯦﻤﻪﺳﺘﯩﻦ، ﺋﯩﺴﻤﯩﻨﻰ ﺋﯧﻴﺘﯩﭗ ﺑﯧﺮﯨﺶ، ﺋﯩﺸﯩﻚ ﺋﯧﭽﯩﻠﻐﺎﻧﺪﺍ ﺋﯩﺸﯩﻜﻨﯩﯔ ﺋﯘﺩﯗﻟﯩﺪﺍ ﺗﯘﺭﯗﯞﺍﻟﻤﺎﺳﺘﯩﻦ، ﺋﯩﺸﯩﻜﻨﯩﯔ ﻳﺎﻥ ﺗﻪﺭﯨﭙﯩﺪﻩ، ﻛﯚﺯﯨﻨﻰ ﺋﯩﺸﯩﻜﻨﯩﯔ ﺋﯩﭽﯩﮕﻪ ﻗﺎﺭﺍﺷﺘﯩﻦ ﻗﺎﭼﯘﺭﯗﭖ ﺗﯘﺭﯗﺵ ﻛﯧﺮﻩﻙ. ﺷﯘﻧﯩﯖﺪﻩﻙ، ﺋﯩﺸﯩﻜﺘﯩﻦ ﻛﯩﺮﮔﻪﻧﺪﻩ، ﺋﺎﯞﯞﺍﻝ ﺋﯚﻱ ﺋﯩﮕﯩﺴﯩﮕﻪ ﺳﺎﻻﻡ ﺑﯧﺮﯨﺶ، ﺋﯩﺸﯩﻜﺘﯩﻦ ﻛﯩﺮﮔﯩﭽﻪ ﺋﺎﻳﺎﻏﻼﺭﻧﻰ ﻗﯧﻘﯩﭗ، ﺳﯜﺭﺗﯜﭖ، ﺗﺎﺯﯨﻼﭖ ﻛﯩﺮﯨﺶ، ﺋﯚﻳﻨﯩﯔ ﺋﯩﭽﻰ ﭘﺎﻳﺎﻧﺪﺍﺯ ﺳﯧﻠﯩﻨﻐﺎﻥ ﺑﻮﻟﺴﺎ ﺋﯘﻧﯩﯖﻐﺎ ﺋﺎﻳﺎﻏﻨﻰ ﭼﯩﻘﯩﺮﯨﭗ ﻛﯩﺮﯨﺶ ﻻﺯﯨﻢ.

ﺋﯩﺸﯩﻜﺘﯩﻦ ﻛﯩﺮﯨﺸﺘﻪ ﺋﺎﯞﯞﺍﻝ ﭼﻮﯕﻼﺭ، ﺑﯩﻠﯩﻢ ﺋﻪﻫﻠﯩﻠﯩﺮﻯ، ﺋﺎﻧﺪﯨﻦ ﺗﻪﺭﺗﯩﭗ ﺑﻮﻳﯩﭽﻪ ﻳﺎﺷﻼﺭ ﻛﯩﺮﮔﯩﻨﻰ ﻳﺎﺧﺸﻰ. ﺑﺎﻟﯩﻼﺭ ﺋﺎﺗﺎ - ﺋﺎﻧﯩﻼﺭﻧﯩﯔ ﺋﯚﻳﻠﯩﺮﯨﮕﻪ ﻛﯩﺮﮔﻪﻧﺪﻩ، ﺋﺎﯞﯞﺍﻝ ﺋﯘﻻﺭﻏﺎ ﺳﺎﻻﻡ ﺑﻪﺭﮔﻪﻧﺪﯨﻦ ﻛﯧﻴﯩﻦ، ﻫﺎﻣﺎﻥ ﻛﯧﭽﯩﻜﻤﻪﺳﺘﯩﻦ ﺋﻪﯓ ﮔﯜﺯﻩﻝ ﯞﻩ ﺋﯧﺴﯩﻞ ﺋﯩﺒﺎﺭﯨﻠﻪﺭ ﺑﯩﻠﻪﻥ ﺋﯘﻻﺭﺩﯨﻦ ﻫﺎﻝ - ﺋﻪﻫﯟﺍﻝ ﺳﻮﺭﯨﺸﻰ ﺯﯙﺭﯛﺭﺩﯗﺭ.

ﺋﯚﻳﮕﻪ ﻛﯩﺮﯨﺸﺘﻪ ﺋﻪﺩﻩﭘﺴﯩﺰﻟﯩﻚ ﺳﺎﻧﯩﻠﯩﺪﯨﻐﺎﻥ ﺋﯩﺸﻼﺭ

ﺋﺎﺑﺪﯗﻟﻜﻪﺭﯨﻢ ﻫﺎﺟﯩﻢ ﺑﯩﺮﺍﯞﻧﯩﯔ ﺋﯚﻳﯩﮕﻪ ﻛﯩﺮﯨﺸﺘﻪ ﺋﻪﺩﻩﭘﺴﯩﺰﻟﯩﻚ ﺳﺎﻧﯩﻠﯩﺪﯨﻐﺎﻥ ﺋﯩﺸﻼﺭ ﻫﻪﻗﻘﯩﺪﻩ ﺗﻮﺧﺘﯘﻟﯘﭖ ﻣﯘﻧﺪﺍﻕ ﺩﯦﺪﻯ:" ﮔﻪﺭﭼﻪ ﺑﯩﺮﺍﯞﻧﯩﯔ ﺋﯚﻳﯩﮕﻪ ﻛﯧﻠﯩﺪﯨﻐﺎﻧﻠﯩﻘﯩﻨﻰ ﺋﺎﻟﺪﯨﻨﺌﺎﻻ ﺧﻪﯞﻩﺭ ﺑﯧﺮﯨﭗ ﻗﻮﻳﻐﺎﻥ ﺑﻮﻟﺴﯩﻤﯘ، ﺋﯘﻧﯩﯔ ﺋﯚﻳﯩﮕﻪ ﻛﯩﺮﯨﺸﺘﻪ ﺋﯩﺸﯩﻜﻨﻰ ﻗﺎﻗﻤﺎﺳﺘﯩﻦ ﻳﺎﻛﻰ ﺋﺎﻟﺪﯨﺮﺍﭖ ﺳﺎﻻﻡ ﺑﻪﺭﻣﻪﺳﺘﯩﻦ ﻛﯩﺮﯨﺶ، ﺋﯩﺸﯩﻜﻨﻰ ﺳﯩﻠﯩﻖ ﻗﺎﻗﻤﺎﺳﺘﯩﻦ ﺋﯚﻱ ﺋﯩﮕﯩﺴﯩﻨﻰ ﯞﻩ ﺧﻮﺷﻨﯩﻠﯩﺮﯨﻨﻰ ﺭﺍﻫﻪﺗﺴﯩﺰ ﻗﯩﻠﯩﺪﯨﻐﺎﻥ ﺷﻪﻛﯩﻠﺪﻩ ﻗﺎﺗﺘﯩﻖ ﻗﯧﻘﯩﺶ ﻳﺎﻛﻰ ﺋﯜﭺ ﻗﯧﺘﯩﻤﺪﯨﻦ ﺋﺎﺭﺗﯘﻕ ﻗﯧﻘﯩﺶ ﺋﻪﺩﻩﭘﺴﯩﺰﻟﯩﻜﺘﯘﺭ. ﺷﯘﻧﺪﺍﻗﻼ ﺑﯩﺮﺍﯞﻧﯩﯔ، ﺧﻮﺷﻨﯩﻼﺭﻧﯩﯔ، ﺑﺎﻟﯩﻼﺭﻧﯩﯔ ﺗﺎﻗﺎﻗﻠﯩﻖ ﺗﯘﺭﻏﺎﻥ ﺋﯩﺸﯩﻚ - ﺩﻩﺭﯞﺍﺯﯨﻠﯩﺮﯨﺪﯨﻦ ﻣﺎﺭﺍﭖ ﻗﺎﺭﺍﺵ ﺑﻪﻛﻤﯘ ﺋﻪﺩﻩﭘﺴﯩﺰﻟﯩﻜﺘﯘﺭ. ﭘﻪﻳﻐﻪﻣﺒﻪﺭ ﺋﻪﻟﻪﻳﻬﯩﺴﺴﺎﻻﻡ ﻣﯘﻧﺪﺍﻗﻼﺭﻏﺎ ﺋﺎﭼﭽﯩﻘﻠﯩﻨﯩﭗ:" ﺑﯩﺮﺍﯞﻧﯩﯔ ﺋﯚﻳﯩﮕﻪ ﺋﯩﺸﯩﻜﺘﯩﻦ ﻳﺎﻛﻰ ﺗﯚﺷﯜﻛﺘﯩﻦ ﺭﯗﺧﺴﻪﺗﺴﯩﺰ ﻣﺎﺭﺍﭖ ﻗﺎﺭﯨﻐﺎﻥ ﺋﺎﺩﻩﻣﻨﯩﯔ ﻛﯚﺯﯨﻨﻰ ﺋﻮﻳﯘﯞﻩﺗﺴﯩﻤﯘ ﺑﻮﻟﯩﺪﯗ" ﺩﻩﭖ ﺳﯚﻛﻜﻪﻥ. ﭼﯜﻧﻜﻰ ﻣﯘﻧﺪﺍﻕ ﻗﯩﻠﯩﺶ ﻫﻪﻡ ﺋﻪﺩﻩﭘﺴﯩﺰﻟﯩﻚ ﻫﻪﻡ ﺑﺎﺷﻘﯩﻼﺭﻧﯩﯔ ﻣﻪﺧﭙﯩﻴﻪﺗﻠﯩﻜﯩﮕﻪ ﻗﯩﻠﯩﻨﻐﺎﻥ ﺋﯧﻐﯩﺮ ﺧﯩﻴﺎﻧﻪﺗﺘﯘﺭ."

ﺋﺎﺑﺪﯗﻟﻜﻪﺭﯨﻢ ﻫﺎﺟﯩﻤﻨﯩﯔ ﺋﯧﻴﺘﯩﺸﯩﭽﻪ، ﺋﺎﺗﺎ - ﺋﺎﻧﯩﻼﺭﻧﯩﯖﻤﯘ ﺑﺎﻟﯩﻠﯩﺮﯨﻨﯩﯔ ﻳﺎﺗﺎﻗﻠﯩﺮﯨﻐﺎ ﺋﯩﺸﯩﻜﻨﻰ ﭼﯧﻜﯩﭗ، ﺭﯗﺧﺴﻪﺕ ﺳﻮﺭﯨﻤﺎﺳﺘﯩﻦ ﺧﺎﻟﯩﻐﺎﻧﭽﻪ ﻛﯩﺮﻣﻪﺳﻠﯩﻜﻰ، ﺑﺎﻟﯩﻼﺭﻧﯩﯖﻤﯘ ﺋﺎﺗﺎ - ﺋﺎﻧﯩﺴﯩﻨﯩﯔ ﻳﺎﺗﯩﻘﯩﻐﺎ ﻣﻪﻳﻠﻰ ﻛﯜﻧﺪﯛﺯﻯ، ﻣﻪﻳﻠﻰ ﺋﺎﺧﺸﺎﻣﻠﯩﺮﻯ ﺋﯩﺸﯩﻜﻨﻰ ﺳﯩﻠﯩﻖ ﭼﯧﻜﯩﭗ ﺭﯗﺧﺴﻪﺕ ﺋﺎﻟﻤﺎﺳﺘﯩﻦ ﻛﯩﺮﻣﻪﺳﻠﯩﻜﻰ ﻻﺯﯨﻢ. ﭼﯜﻧﻜﻰ ﻣﯘﻧﺪﺍﻕ ﻗﯩﻠﯩﺶ ﺋﺎﺗﺎ - ﺋﺎﻧﯩﻼﺭ ﺑﯩﻠﻪﻥ ﺑﺎﻟﯩﻼﺭ ﺋﻮﺗﺘﯘﺭﯨﺴﯩﺪﯨﻜﻰ ﺋﯩﭙﭙﻪﺕ - ﻫﺎﻳﺎﻧﯩﯔ ﺋﺎﺟﯩﺰﻟﯩﺸﯩﭗ ﻗﯧﻠﯩﺸﯩﻐﺎ، ﺋﺎﺭﯨﺴﯩﺪﯨﻜﻰ ﻫﯚﺭﻣﻪﺕ - ﺋﯧﻬﺘﯩﺮﺍﻣﻨﯩﯔ ﺳﯘﺳﻠﯩﺸﯩﭗ ﻗﯧﻠﯩﺸﯩﻐﺎ ﺳﻪﯞﻩﺏ ﺑﻮﻟﯩﺪﯗ. ﺑﯩﺮ ﺋﺎﺋﯩﻠﯩﻨﯩﯔ ﭘﻪﺭﺯﻩﻧﺘﻠﯩﺮﯨﻤﯘ ﺑﯩﺮ - ﺑﯩﺮﯨﻨﯩﯔ ﻳﺎﺗﺎﻗﻠﯩﺮﯨﻐﺎ ﻛﯩﺮﯨﺸﺘﻪ ﺋﻪﻟﯟﻩﺗﺘﻪ ﺋﯩﺸﯩﻜﯩﻨﻰ ﭼﯧﻜﯩﭗ، ﺭﯗﺧﺴﻪﺕ ﺳﻮﺭﺍﭖ ﻛﯩﺮﯨﺸﻰ ﺋﻪﺩﻩﭖ - ﺋﻪﺧﻼﻗﻨﯩﯔ ﺟﯜﻣﻠﯩﺴﯩﺪﯨﻨﺪﯗﺭ.