ﺑﯜﮔﯜﻧﻜﻰ ﺋﯘﻧﯩﯔ ﺑﯩﻠﻪﻥ ﺋﯚﺗﻜﯜﺯﮔﻪﻥ ﺳﯚﻫﺒﻪﺗﻨﯩﯔ ﺩﺍﯞﺍﻣﻰ ﺋﺎﺳﺎﺳﯩﺪﺍ ﺋﯚﺯﺑﯧﻜﯩﺴﺘﺎﻥ ﺧﻪﻟﻘﯩﻨﯩﯔ ﺋﯘﻳﻐﯘﺭﻻﺭﻧﯩﯔ ﻛﯩﺸﯩﻠﯩﻚ ﻫﻮﻗﯘﻕ ﺋﻪﻫﯟﺍﻟﯩﻨﻰ ﺑﯩﻠﯩﺶ ﺩﻩﺭﯨﺠﯩﺴﻰ، ﺋﯚﺯﺑﯧﻜﯩﺴﺘﺎﻧﻨﯩﯔ ﺋﻮﻣﯘﻣﯩﻲ ﺋﻪﻫﯟﺍﻟﻰ ﻫﻪﻗﻘﯩﺪﻩ ﻣﻪﻟﯘﻣﺎﺕ ﺑﯧﺮﯨﻤﯩﺰ.

ﻧﺎﺳﯩﺮ ﺯﺍﻛﯩﺮ ﺋﻪﭘﻪﻧﺪﯨﻨﯩﯔ ﺑﯩﻠﺪﯛﺭﯛﺷﯩﭽﻪ، 2005 - ﻳﯩﻠﯩﺪﯨﻜﻰ ﺋﻪﻧﺠﺎﻥ ﭘﺎﺟﯩﺌﻪﺳﯩﺪﯨﻦ ﻛﯩﻴﯩﻦ ﻳﺎﻣﺎﻧﻼﺷﻘﺎﻥ ﺋﯚﺯﺑﯧﻜﯩﺴﺘﺎﻥ ﺳﯩﻴﺎﺳﯩﻲ ﺋﻪﻫﯟﺍﻟﻰ، ﻫﺎﺯﯨﺮﻏﺎ ﻛﻪﻟﮕﻪﻧﺪﻩ ﺑﯩﺮ ﺋﺎﺯ ﻳﺎﺧﺸﯩﻼﻧﻐﺎﻥ ﻫﻪﻣﺪﻩ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﯨﻨﯩﯔ ﻣﻪﻟﯘﻡ ﺩﻩﺭﯨﺠﯩﺪﻩ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﺸﯩﻐﺎ ﺋﺎﺯ ﺑﻮﻟﺴﯩﻤﯘ ﻳﻮﻝ ﺑﯧﺮﯨﻠﮕﻪﻥ.

ﮔﻪﺭﭼﻪ ﺋﯚﺯﺑﯧﻜﯩﺴﺘﺎﻥ ﻫﯚﻛﯜﻣﯩﺘﻰ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﻯ ﯞﻩ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﻠﯩﺮﯨﮕﻪ ﺋﺎﺯﻏﯩﻨﻪ ﭘﺎﺋﺎﻟﯩﻴﻪﺕ ﺑﻮﺷﻠﯘﻗﻰ ﻳﺎﺭﺍﺗﻘﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﯚﺯﺑﯧﻜﯩﺴﺘﺎﻧﻨﯩﯔ ﺭﯗﺳﯩﻴﻪ ﯞﻩ ﺧﯩﺘﺎﻱ ﻗﺎﺗﺎﺭﻟﯩﻖ ﻛﯩﺸﯩﻠﯩﻚ ﻫﻮﻗﯘﻗﻨﻰ ﺩﻩﭘﺴﻪﻧﺪﻩ ﻗﯩﻠﻐﯘﭼﻰ ﺩﯨﻜﺘﺎﺗﻮﺭ ﺩﯙﻟﻪﺗﻠﻪﺭﻧﯩﯔ ﺑﺎﺵ ﺑﻮﻟﯘﺷﯩﺪﺍ ﺗﯜﺯﯛﻟﮕﻪﻥ ﺷﺎﯕﺨﻪﻱ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﯩﻐﺎ ﺋﻪﺯﺍ ﺑﻮﻟﯘﭖ ﺗﯘﺭﯗﺷﻰ ﻳﻪﻧﯩﻼ ﻳﺎﺧﺸﯩﻠﯩﻘﺘﯩﻦ ﺩﯦﺮﻩﻙ ﺑﻪﺭﻣﻪﻳﺪﯨﻐﺎﻧﻠﯩﻘﯩﻨﻰ ﻫﻪﻣﺪﻩ ﺋﯘﻳﻐﯘﺭﻻﺭﺩﯨﻦ ﺷﯘﻧﭽﻪ ﻳﯩﻞ ﺋﺎﻳﺮﯨﻠﯩﭗ ﻛﯧﺘﯩﺸﻜﯩﻤﯘ ﻳﻪﻧﯩﻼ ﺭﯗﺳﻼﺭﻧﯩﯔ ﺳﻪﯞﻩﺑﭽﻰ ﺋﯩﻜﻪﻧﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﺩﻯ.

ﺋﻪﻣﻤﺎ ﻫﻪﻣﻤﯩﻤﯩﺰﮔﻪ ﻣﻪﻟﯘﻡ ﺑﻮﻟﻐﯩﻨﯩﺪﻩﻙ، ﺋﯚﺯﺑﯧﻜﯩﺴﺘﺎﻥ ﻣﯘﺳﺘﻪﻗﯩﻠﻠﯩﻖ ﺟﺎﻛﺎﺭﻻﭖ 17 ﻳﯩﻠﻠﯩﻖ ﻣﯘﺳﺎﭘﯩﻨﻰ ﺗﺎﻣﺎﻣﻠﯩﺪﻯ. ﺑﯘ ﺗﯧﻤﯩﻼﺭﺩﺍ ﺳﯚﺯ ﺋﯧﭽﯩﻠﻐﺎﻧﺪﺍ ﻧﺎﺳﯩﺮ ﺯﺍﻛﯩﺮ ﺋﻪﭘﻪﻧﺪﯨﻨﯩﯔ ﭼﯩﺮﺍﻳﯩﻨﻰ ﺋﯧﻐﯩﺮ ﺧﻮﺭﺳﯩﻨﯩﺶ ﻗﺎﭘﻠﯩﻐﺎﻧﺪﻩﻙ ﻗﯩﻼﺗﺘﻰ. ﺋﯘ ﺋﯚﺯﺑﯧﻜﯩﺴﺘﺎﻧﻨﯩﯔ ﺩﯙﻟﻪﺕ ﺳﯩﻴﺎﺳﯩﺘﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ، ﺋﯚﺯﺑﯧﻜﯩﺴﺘﺎﻥ ﻣﯘﺳﺘﻪﻗﯩﻠﻠﯩﻘﯩﻨﻰ ﺋﯘﻳﻐﯘﺭ ﺧﻪﻟﻘﯩﻨﯩﯖﻤﯘ ﺋﯚﺯﺑﯧﻜﯩﺴﺘﺎﻥ ﺧﻪﻟﻘﻠﯩﺮﯨﮕﻪ ﺋﻮﺧﺸﺎﺷﻼ ﺷﺎﺩ - ﺧﯘﺭﺍﻣﻠﯩﻖ ﺋﯩﻠﻜﯩﺪﻩ ﻗﯘﺗﻠﯩﻐﺎﻧﻠﯩﻘﯩﻨﻰ، ﺋﻪﻣﻤﺎ ﺋﯚﺗﻜﻪﻥ 17 ﻳﯩﻞ ﺟﻪﺭﻳﺎﻧﯩﺪﺍ ﺋﯚﺯﺑﯧﻜﯩﺴﺘﺎﻧﺪﺍ ﺋﯘﻳﻐﯘﺭﻻﺭﻧﯩﯔ ﺋﯚﺯﺑﯧﻚ ﺧﻪﻟﻘﻰ ﺑﯩﻠﻪﻥ ﺋﻮﺧﺸﺎﺵ ﻗﻮﯞﻡ ﺋﯩﻜﻪﻧﻠﯩﻜﯩﻨﯩﯔ ﻫﯧﭻ ﻳﻪﺭﺩﻩ ﺗﯩﻠﻐﺎ ﺋﯧﻠﯩﻨﻤﯩﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ ﯞﻩ ﺋﯘﻛﺴﯩﻨﯩﭗ ﺗﯘﺭﯗﭖ، ﻫﯚﺳﻪﻳﯩﻦ ﺟﯧﻠﯩﻠﻨﻰ ﺋﯚﺯﺑﯧﻜﯩﺴﺘﺎﻧﻨﯩﯔ ﺧﯩﺘﺎﻳﻐﺎ ﺋﯚﺗﻜﯜﺯﯛﭖ ﺑﻪﺭﮔﻪﻧﻠﯩﻜﯩﺪﯨﻦ ﺋﯩﻨﺘﺎﻳﯩﻦ ﺋﯩﭽﻰ ﺋﯧﭽﯩﺸﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﻧﺎﺳﯩﺮ ﺯﺍﻛﯩﺮ ﺋﻪﭘﻪﻧﺪﻯ ﻣﯩﺴﺎﻝ ﻗﯩﻠﯩﭗ، ﺑﯘ ﻧﯚﯞﻩﺗﻠﯩﻚ ﻳﺎﯞﺭﻭﭘﺎ ﭘﯘﺗﺒﻮﻝ ﻟﻮﯕﻘﯩﺴﯩﻨﻰ ﺗﺎﻟﯩﺸﯩﺶ ﻣﯘﺳﺎﺑﯩﻘﯩﺴﯩﺪﻩ ﮔﯧﺮﻣﺎﻧﯩﻴﻪ ﺑﯩﻠﻪﻥ ﺗﯜﺭﻛﯩﻴﻪ ﻣﯘﺳﺎﺑﯩﻘﯩﻠﻪﺷﻜﻪﻧﺪﻩ ﺋﯚﺯﺑﯧﻜﻠﻪﺭﻧﯩﯔ ﮔﯧﺮﻣﺎﻧﯩﻴﻪ ﺗﻪﺭﻩﭘﺪﺍﺭﻯ ﺑﻮﻟﻐﺎﻧﻠﯩﻘﯩﺪﯨﻦ ﺗﻮﻟﯩﻤﯘ ﺋﻪﭘﺴﯘﺳﻼﻧﻐﺎﻧﻠﯩﻘﯩﻨﻰ ﻫﻪﻣﺪﻩ ﺑﯘﻧﯩﯔ ﺋﯚﺯﺑﯧﻜﯩﺴﺘﺎﻧﺪﯨﻜﻰ ﺩﯙﻟﻪﺕ ﺳﯩﻴﺎﺳﯩﺘﯩﻨﯩﯔ ﻣﻪﻫﺴﯘﻟﻰ ﺋﯩﻜﻪﻧﻠﯩﻜﯩﻨﻰ ﯞﻩ ﺑﯘﻧﺪﺍﻕ ﻛﯧﺘﯩﯟﯦﺮﯨﺸﻨﯩﯔ ﻳﺎﺧﺸﻰ ﺋﺎﻗﯩﯟﻩﺕ ﺋﯧﻠﯩﭗ ﻛﻪﻟﻤﻪﻳﺪﯨﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﺳﯚﻫﺒﻪﺕ ﺟﻪﺭﻳﺎﻧﯩﺪﺍ ﻧﺎﺳﯩﺮ ﺯﺍﻛﯩﺮ ﺋﻪﭘﻪﻧﺪﻯ ﺋﯚﺯﺑﯧﻜﯩﺴﺘﺎﻥ ﺧﻪﻟﻘﯩﻨﯩﯔ ﺋﯘﻳﻐﯘﺭﻻﺭ ﻫﻪﻗﻘﯩﺪﻩ ﺑﯩﻠﯩﺶ ﺩﻩﺭﯨﺠﯩﺴﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ، ﺋﯚﺯﺑﯧﻜﯩﺴﺘﺎﻥ ﻣﯘﺳﺘﻪﻗﯩﻞ ﺑﻮﻟﻐﺎﻥ 10 ﻧﻪﭼﭽﻪ ﻳﯩﻞ ﻣﺎﺑﻪﻳﻨﯩﺪﻩ ﺋﯚﺯﺑﯧﻜﯩﺴﺘﺎﻧﺪﺍ ﺋﯘﻳﻐﯘﺭﻻﺭﻏﺎ ﺑﻮﻟﻐﺎﻥ ﺗﻮﻧﯘﺷﯩﻨﯩﯔ ﺋﺎﺟﯩﺰﻻﭖ ﺑﺎﺭﻏﺎﻧﻠﯩﻘﯩﻨﻰ، ﺋﻪﻣﻤﺎ ﺋﯚﺯﺑﯧﻚ ﺳﻮﺩﯨﮕﻪﺭﻟﯩﺮﯨﻨﯩﯔ ﺋﯘﻳﻐﯘﺭ ﺩﯨﻴﺎﺭﯨﻐﺎ ﺑﻮﻟﻐﺎﻥ ﺳﻪﭘﻪﺭﻟﯩﺮﻯ، ﺋﯚﺯﺑﯧﻚ ﺧﻪﻟﻘﯩﻨﯩﯔ ﺋﯘﻳﻐﯘﺭﻻﺭﻏﺎ ﺑﻮﻟﻐﺎﻥ ﺗﻮﻧﯘﺷﯩﻨﻰ ﭼﻮﯕﻘﯘﺭﻻﺷﺘﯘﺭﯗﺷﻘﺎ ﺑﺎﺷﻠﯩﻐﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﺩﻯ.

ﻧﺎﺳﯩﺮ ﺯﺍﻛﯩﺮ ﺋﻪﭘﻪﻧﺪﻯ ﺋﯚﺯﺑﯧﻜﯩﺴﺘﺎﻥ ﻛﯩﺸﯩﻠﯩﻚ ﻫﻮﻗﯘﻕ ﺟﻪﻣﺌﯩﻴﯩﺘﻰ ( ﺋﯚﺯﺑﯧﻜﯩﺴﺘﺎﻥ ﺋﯩﻨﺴﺎﻥ ﻫﻪﻗﻠﯩﺮﻯ ﺟﻪﻣﺌﯩﻴﯩﺘﻰ) ﻧﻪﻣﻪﻧﮕﺎﻥ ﺑﯚﻟﯜﻣﯩﻨﯩﯔ ﻣﻪﺳﺌﯘﻟﻰ ﺑﻮﻟﯘﭖ ﺋﯘ ﻳﯧﻘﯩﻨﺪﺍ ﺑﯩﺮ ﻧﻪﭼﭽﻪ ﻫﻪﻣﺮﺍﻫﻠﯩﺮﻯ ﺑﯩﻠﻪﻥ ﺋﺎﻣﯧﺮﯨﻜﯩﺪﯨﻜﻰ ﺑﯩﺮ ﻗﯩﺴﯩﻢ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﻯ ﯞﻩ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻘﯩﻨﯩﯔ ﭼﺎﻗﯩﺮﯨﺸﻰ ﺑﯩﻠﻪﻥ ﺋﺎﻣﯧﺮﯨﻜﯩﻐﺎ ﺯﯨﻴﺎﺭﻩﺕ ﯞﻩ ﺋﯚﮔﯩﻨﯩﺸﻜﻪ ﻛﻪﻟﮕﻪﻥ ﺋﯩﺪﻯ.

ﺑﯩﺰ ﺷﯘ ﭘﯘﺭﺳﻪﺗﺘﻪ ﺋﯘﻧﯩﯔ ﺑﯩﻠﻪﻥ ﺋﯚﺯﺑﯧﻜﯩﺴﺘﺎﻧﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﺋﻪﻫﯟﺍﻟﻰ ﯞﻩ ﺑﺎﺷﻘﯩﻼﺭ ﻫﻪﻗﻘﯩﺪﻩ ﺳﯚﻫﺒﻪﺕ ﺋﯧﻠﯩﭗ ﺑﯧﺮﯨﺶ ﭘﯘﺭﺳﯩﺘﯩﮕﻪ ﺋﯧﺮﯨﺸﻜﻪﻥ ﺋﯩﺪﯗﻕ. ﻧﺎﺳﯩﺮ ﺯﺍﻛﯩﺮ ﺋﻪﭘﻪﻧﺪﻯ ﺳﯚﻫﺒﯩﺘﯩﻤﯩﺰ ﺟﻪﺭﻳﺎﻧﯩﺪﺍ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﻳﯧﺘﻪﻛﭽﯩﺴﻰ ﯞﻩ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﺭﻩﺋﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ: ﺋﯘ ﺋﺎﻳﺎﻝ ﭘﻪﻗﻪﺕ ﺳﯩﻠﻪﺭﻧﯩﯖﻼ ﺋﻪﻣﻪﺱ، ﺑﻪﻟﻜﻰ ﻫﻪﻣﻤﯩﻤﯩﺰﻧﯩﯔ ﺗﯘﻣﺎﺭﯨﺴﻰ ﺩﯦﺪﻯ.

ﻣﻪﻟﯘﻡ ﺑﻮﻟﯘﺷﯩﭽﻪ، ﺋﯘﻻﺭ ﯞﺍﺷﯩﻨﮕﺘﻮﻧﺪﯨﻜﻰ ﭘﺎﺋﺎﻟﯩﻴﻪﺗﻠﯩﺮﯨﻨﻰ ﺋﺎﻳﺎﻏﻼﺷﺘﯘﺭﯗﭖ ﺋﺎﻣﯧﺮﯨﻜﯩﻨﯩﯔ ﺑﺎﺷﻘﺎ ﺷﻪﻫﻪﺭﻟﯩﺮﯨﺪﻩ ﺯﯨﻴﺎﺭﻩﺗﺘﻪ ﺑﻮﻟﯘﺵ ﺋﯘﭼﯘﻥ ﻳﯜﺭﯛﭖ ﻛﻪﺗﻜﻪﻥ.