ﭘﻪﺭﯞﻩﺯ ﻣﯘﺷﻪﺭﺭﻩﭖ ﺩﻩﯞﺭﯨﺪﯨﻜﻰ ﺧﯩﺘﺎﻱ - ﭘﺎﻛﯩﺴﺘﺎﻥ ﺩﻭﺳﺘﻠﯘﻗﻰ، ﺋﯘﻳﻐﯘﺭ ﻣﯘﺳﺘﻪﻗﯩﻠﻠﯩﻖ ﻛﯜﭼﻠﯩﺮﯨﮕﻪ ﺑﯩﺮ ﻗﺎﺗﺎﺭ ﺋﯧﻐﯩﺮ ﺯﯨﻴﺎﻧﻼﺭﻧﻰ ﺋﯧﻠﯩﭗ ﻛﻪﻟﮕﻪﻥ. ﭘﻪﺭﯞﻩﺯ ﻣﯘﺷﻪﺭﺭﻩﭖ ﺑﯩﻠﻪﻥ ﭘﺎﻛﯩﺴﺘﺎﻧﺪﯨﻜﻰ ﺑﯩﺮﻟﻪﺷﻤﻪ ﻫﯚﻛﯜﻣﻪﺕ ﺋﺎﺭﯨﺴﯩﺪﯨﻜﻰ ﺋﺎﺳﺎﺳﻠﯩﻖ ﺋﯩﺨﺘﯩﻼﭘﻼﺭﺩﯨﻦ ﺑﯩﺮﻯ، ﺋﺎﻣﯧﺮﯨﻜﺎ ﺑﺎﺷﭽﯩﻠﯩﻘﯩﺪﺍ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ ﺗﺎﻟﯩﺒﺎﻥ ﻛﯜﭼﻠﯩﺮﯨﮕﻪ ﻗﺎﺭﺷﻰ ﻫﻪﺭﯨﻜﻪﺗﻜﻪ ﻗﺎﻧﺪﺍﻕ ﭘﻮﺯﯨﺘﺴﯩﻴﻪ ﺗﯘﺗﯘﺵ ﻣﻪﺳﯩﻠﯩﺴﻰ ﺋﯩﺪﻯ. ﭘﻪﺭﯞﻩﺯ ﻣﯘﺷﻪﺭﺭﻩﭖ ﺑﯘ ﻣﻪﺳﯩﻠﯩﺪﻩ ﺋﺎﻣﯧﺮﯨﻜﯩﻨﯩﯔ ﺋﺎﻛﺘﯩﭗ ﻗﻮﻟﻠﯩﻐﯘﭼﯩﺴﻰ، ﺑﯩﺮﻟﻪﺷﻤﻪ ﻫﯚﻛﯜﻣﻪﺕ ﺑﻮﻟﺴﺎ ﭘﺎﺳﺴﯩﭗ ﻣﻪﻳﺪﺍﻧﺪﺍ.

ﺭﺍﻳﯩﺲ: " ﻣﯘﺷﻪﺭﺭﻩﭖ ﺧﻪﻟﻘﺎﺭﺍ ﺗﯧﺮﺭﻭﺭﻏﺎ ﻗﺎﺭﺷﻰ ﻛﯜﺭﻩﺷﻨﯩﯔ ﺗﯚﻫﭙﯩﻜﺎﺭﻯ"

ﭘﻪﺭﯞﻩﺯ ﻣﯘﺷﻪﺭﺭﻩﭖ ﭘﺎﻛﯩﺴﺘﺎﻧﺪﯨﻜﻰ ﺗﺎﻟﯩﺒﺎﻥ ﺗﻪﺭﻩﭘﺪﺍﺭﻟﯩﺮﯨﻐﺎ ﻗﺎﺗﺘﯩﻖ ﻗﻮﻝ ﺳﯩﻴﺎﺳﻪﺕ ﻗﻮﻟﻼﻧﻐﺎﻥ ﯞﻩ ﻧﺎﺗﻮ ﺋﺎﺭﻣﯩﻴﯩﺴﯩﻨﯩﯔ ﭘﺎﻛﯩﺴﺘﺎﻥ ﭼﯧﮕﺮﯨﺴﻰ ﺋﯩﭽﯩﺪﯨﻜﻰ ﺗﺎﻟﯩﺒﺎﻥ ﻛﯜﭼﻠﯩﺮﯨﮕﻪ ﻗﺎﺭﺷﻰ ﺑﯩﺮ ﻗﯩﺴﯩﻢ ﺋﻪﺳﻜﯩﺮﯨﻲ ﻫﻪﺭﯨﻜﻪﺗﻠﯩﺮﯨﮕﯩﻤﯘ ﻛﯚﺯ ﻳﯘﻣﯘﭖ ﻛﻪﻟﮕﻪﻥ. ﺑﯩﺮﻟﻪﺷﻤﻪ ﻫﯚﻛﯜﻣﻪﺕ ﻫﺎﻛﯩﻤﯩﻴﻪﺕ ﺑﯧﺸﯩﻐﺎ ﻛﻪﻟﮕﻪﻧﺪﯨﻦ ﻛﯧﻴﯩﻦ ﭘﺎﻛﯩﺴﺘﺎﻧﺪﯨﻜﻰ ﺗﺎﻟﯩﺒﺎﻥ ﻛﯜﭼﻠﯩﺮﻯ ﺑﯩﻠﻪﻥ ﻣﯘﺭﻩﺳﺴﻪ ﻳﻮﻟﯩﻨﻰ ﺗﺎﻟﻠﯩﻐﺎﻥ ﯞﻩ ﺗﯜﺭﻣﯩﺪﯨﻜﻰ ﺑﯩﺮ ﺗﯜﺭﻛﯜﻡ ﺗﺎﻟﯩﺒﺎﻥ ﻛﯜﭼﻠﯩﺮﯨﻨﻰ ﻗﻮﻳﯘﯞﻩﺗﻜﻪﻥ ﺋﯩﺪﻯ. ﺑﻮﻟﯘﭘﻤﯘ، ﺋﺎﻣﯧﺮﯨﻜﯩﻨﯩﯔ ﺑﯘ ﻳﯩﻞ ﻣﺎﻱ ﺋﯧﻴﯩﺪﺍ ﭘﺎﻛﯩﺴﺘﺎﻧﻨﯩﯔ ﺩﺍﻣﺪﻭﻻ ﻛﻪﻧﺘﯩﺪﯨﻜﻰ، ﺗﺎﻟﯩﺒﺎﻥ ﻛﯜﭼﻠﯩﺮﻯ ﻳﻮﺷﯘﺭﯗﻧﻐﺎﻥ ﺩﻩﭖ ﻗﺎﺭﺍﻟﻐﺎﻥ ﺑﯩﺮ ﺋﯚﻳﮕﻪ ﺑﻮﻣﺒﺎ ﺗﺎﺷﻠﯩﺸﻰ ﺑﯩﺮﻟﻪﺷﻤﻪ ﻫﯚﻛﯜﻣﻪﺗﻨﯩﯔ ﻗﺎﺗﺘﯩﻖ ﻧﺎﺭﺍﺯﯨﻠﯩﻘﯩﻨﻰ ﻗﻮﺯﻏﯩﻐﺎﻥ ﯞﻩ ﻫﯚﻛﯜﻣﻪﺕ ﺋﺎﻣﯧﺮﯨﻜﯩﻨﻰ ﭘﺎﻛﯩﺴﺘﺎﻧﻨﯩﯔ ﺋﯩﮕﯩﻠﯩﻚ ﻫﻮﻗﯘﻗﯩﻐﺎ ﺩﻩﺧﻠﻰ ﻳﻪﺗﻜﯜﺯﯛﯞﺍﺗﯩﺪﯗ ﺩﻩﭖ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﮔﻪﻥ ﺋﯩﺪﻯ.

ﭘﻪﺭﯞﻩﺯ ﻣﯘﺷﻪﺭﺭﻩﭖ ﺋﯩﺴﺘﯩﭙﺎﺳﯩﻨﻰ ﺋﯧﻼﻥ ﻗﯩﻠﻐﺎﻧﺪﯨﻦ ﻛﯧﻴﯩﻦ، ﺋﺎﻣﯧﺮﯨﻜﺎ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﻛﺎﻧﺪﯨﻠﯩﺰﺍ ﺭﺍﻳﯩﺲ ﭘﻪﺭﯞﻩﺯ ﻣﯘﺷﻪﺭﺭﻩﭘﻨﯩﯔ ﺧﻪﻟﻘﺌﺎﺭﺍ ﺗﯧﺮﺭﻭﺭﻏﺎ ﻗﺎﺭﺷﻰ ﻛﯜﺭﻩﺷﻜﻪ ﺗﯚﻫﭙﻪ ﻗﻮﺷﻘﺎﻧﻠﯩﻘﯩﻨﻰ ﻣﻪﺩﻫﯩﻴﯩﻠﯩﺪﻯ. ﺭﺍﻳﯩﺲ، ﺑﯘﻧﯩﯔ ﺑﯩﻠﻪﻥ ﺑﯩﻠﻠﻪ ﻳﻪﻧﻪ، ﺋﺎﻣﯧﺮﯨﻜﯩﻨﯩﯔ ﭘﺎﻛﯩﺴﺘﺎﻧﺪﯨﻜﻰ ﺑﯩﺮﻟﻪﺷﻤﻪ ﻫﯚﻛﯜﻣﻪﺕ ﺑﯩﻠﻪﻥ ﻫﻪﻣﻜﺎﺭﻟﯩﻘﻨﻰ ﻛﯜﭼﻪﻳﺘﯩﺸﻨﻰ ﺧﺎﻻﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﻣﯘﺷﻪﺭﺭﻩﭖ ﺩﻩﯞﺭﯨﺪﻩ ﺋﯘﻳﻐﯘﺭ ﭘﺎﺋﺎﻟﯩﻴﻪﺗﭽﯩﻠﯩﺮﻯ

ﭘﻪﺭﯞﻩﺯ ﻣﯘﺷﻪﺭﺭﻩﭖ ﺩﻩﯞﺭﯨﺪﯨﻜﻰ ﺧﯩﺘﺎﻱ - ﭘﺎﻛﯩﺴﺘﺎﻥ ﺩﻭﺳﺘﻠﯘﻗﻰ ﺋﯘﻳﻐﯘﺭ ﻣﯘﺳﺘﻪﻗﯩﻠﻠﯩﻖ ﻛﯜﭼﻠﯩﺮﯨﮕﻪ ﺑﯩﺮ ﻗﺎﺗﺎﺭ ﺯﯨﻴﺎﻧﻼﺭﻧﻰ ﺋﯧﻠﯩﭗ ﻛﻪﻟﮕﻪﻥ ﺋﯩﺪﻯ. ﺷﻪﺭﻗﻰ ﺗﯜﺭﻛﯩﺴﺘﺎﻥ ﺋﯩﺴﻼﻡ ﻫﻪﺭﯨﻜﯩﺘﯩﻨﯩﯔ ﺑﺎﺷﻠﯩﻘﻰ ﻫﻪﺳﻪﻥ ﻣﻪﺧﺴﯘﻡ ﭘﺎﻛﯩﺴﺘﺎﻥ ﺋﺎﺭﻣﯩﻴﯩﺴﯩﻨﯩﯔ ﻫﯘﺟﯘﻣﯩﺪﺍ ﻫﺎﻳﺎﺗﯩﺪﯨﻦ ﺋﺎﻳﺮﯨﻠﻐﺎﻥ. ﺋﯩﺴﻤﺎﺋﯩﻞ ﺳﻪﻣﻪﺕ ﻗﺎﺗﺎﺭﻟﯩﻖ ﻳﻪﻧﻪ ﺑﯩﺮ ﺗﯜﺭﻛﯜﻡ ﺋﯘﻳﻐﯘﺭ ﻣﯘﺳﺘﻪﻗﯩﻠﭽﯩﻠﯩﺮﯨﻤﯘ ﻣﯘﺷﻪﺭﺭﻩﭖ ﺩﻩﯞﺭﯨﺪﻩ ﺧﯩﺘﺎﻳﻐﺎ ﺋﯚﺗﻜﯜﺯﯛﭖ ﺑﯧﺮﯨﻠﮕﻪﻥ ﯞﻩ ﺋﯚﻟﯜﻡ ﺟﺎﺯﺍﺳﯩﻐﺎ ﻳﻮﻟﯘﻗﻘﺎﻥ ﺋﯩﺪﻯ. ﺋﻪﻣﻤﺎ ﭘﺎﻛﯩﺴﺘﺎﻧﺪﯨﻜﻰ ﺑﯩﺮ ﻗﯩﺴﯩﻢ ﺩﯨﻨﯩﻲ ﺟﺎﻣﺎﺋﻪﺕ ﯞﻩ ﺋﺎﻣﻤﯩﯟﯨﻲ ﺗﻪﺷﻜﯩﻼﺗﻼﺭﻧﯩﯔ ﭘﺎﻛﯩﺴﺘﺎﻧﺪﯨﻜﻰ ﺋﯘﻳﻐﯘﺭ ﻣﯘﻫﺎﺟﯩﺮﻻﺭﻏﺎ ﺋﯩﺰﭼﯩﻞ ﺗﯜﺭﺩﻩ ﻫﯧﺴﺪﺍﺷﻠﯩﻖ ﻗﯩﻠﯩﭗ ﻛﯧﻠﯩﯟﺍﺗﻘﺎﻧﻠﯩﻘﻰ ﻣﻪﻟﯘﻡ. ﻧﯚﯞﻩﺗﺘﻪ ﮔﯘﺋﺎﻧﺘﺎﻧﺎﻣﻮ ﺗﯜﺭﻣﯩﺴﯩﺪﻩ ﻳﯧﺘﯩﯟﺍﺗﻘﺎﻥ ﺋﯘﻳﻐﯘﺭﻻﺭﻣﯘ ﺋﯚﺯﻟﯩﺮﯨﻨﯩﯔ ﭘﺎﻛﯩﺴﺘﺎﻧﺪﺍ ﻗﻮﻟﻐﺎ ﺋﯧﻠﯩﻨﻐﺎﻧﻠﯩﻘﯩﻨﻰ، ﺋﺎﻓﻐﺎﻧﯩﺴﺘﺎﻧﺪﺍ ﺋﻪﺳﻜﯩﺮﯨﻲ ﺗﻪﻟﯩﻢ ﺋﺎﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺋﯩﺪﻯ.

ﺧﯩﺘﺎﻳﻨﯩﯔ ﭘﺎﻛﯩﺴﺘﺎﻥ ﺑﺎﺵ ﺋﻪﻟﭽﯩﺴﻰ 2 ﺋﺎﻳﻨﯩﯔ ﺋﺎﻟﺪﯨﺪﺍ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، ﭘﺎﻛﯩﺴﺘﺎﻧﺪﯨﻜﻰ ﺗﯜﺭﻛﯩﺴﺘﺎﻥ ﺋﯩﺴﻼﻡ ﭘﺎﺭﺗﯩﻴﯩﺴﯩﻨﯩﯔ ﺧﯩﺘﺎﻳﻐﺎ ﺗﻪﻫﺪﯨﺖ ﺷﻪﻛﯩﻠﻠﻪﻧﺪﯛﺭﮔﻪﻧﻠﯩﻜﯩﻨﻰ، ﺧﯩﺘﺎﻱ - ﭘﺎﻛﯩﺴﺘﺎﻥ ﺩﻭﺳﺘﻠﯘﻗﯩﻨﻰ ﺑﯘﺯﯗﺷﻘﺎ ﺋﯘﺭﯗﻧﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﻫﻪﻡ ﺋﯘﻻﺭﻏﺎ ﻗﯘﭼﺎﻕ ﺋﯧﭽﯩﯟﺍﺗﻘﺎﻥ ﻳﻪﺭﻟﯩﻚ ﮔﯘﺭﯗﭘﭙﯩﻼﺭﻏﺎ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﮔﻪﻥ ﺋﯩﺪﻯ. ﺭﻭﻫﺎﻥ ﮔﯘﺭﺍﺗﺎﻧﺎ ﻗﺎﺗﺎﺭﻟﯩﻖ ﺑﯩﺮ ﻗﯩﺴﯩﻢ ﻣﯘﺗﻪﺧﻪﺳﺴﯩﺴﻠﻪﺭ، ﻳﯧﻘﯩﻨﺪﺍ ﺋﯩﻨﺘﯧﺮﻧﯧﺘﺘﻪ ﺧﯩﺘﺎﻳﻐﺎ ﻗﺎﺭﺷﻰ ﺑﺎﻳﺎﻧﺎﺕ ﺋﯧﻼﻥ ﻗﯩﻠﻐﺎﻥ ﺗﯜﺭﻛﯩﺴﺘﺎﻥ ﺋﯩﺴﻼﻡ ﭘﺎﺭﺗﯩﻴﯩﺴﯩﻨﯩﯔ ﭘﺎﻛﯩﺴﺘﺎﻧﺪﺍ ﺋﻮﺭﯗﻥ ﺗﯘﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﻣﻪﻛﺘﻪ.

ﺗﯜﺭﻛﯩﺴﺘﺎﻥ ﺋﯩﺴﻼﻡ ﭘﺎﺭﺗﯩﻴﯩﺴﯩﻨﯩﯔ ﺳﺎﻻﻫﯩﻴﯩﺘﻰ ﯞﻩ ﯞﻩﻛﯩﻠﻠﯩﻚ ﺧﺎﺭﺍﻛﺘﯧﺮﻯ ﻫﺎﺯﯨﺮﻏﯩﭽﻪ ﺋﯧﻨﯩﻘﺴﯩﺰ ﺑﯩﺮ ﺗﻪﺷﻜﯩﻼﺕ. ﺋﻪﻣﻤﺎ ﺋﯘ ﺑﻪﺭﮔﻪﻥ ﺑﺎﻳﺎﻧﺎﺗﻼﺭ، ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯧﺮﻯ ﺧﯩﺘﺎﻳﻐﺎ ﻗﺎﺭﺷﻰ ﺋﺎﺷﻜﺎﺭﺍ ﺟﻪﯓ ﺋﯧﻼﻥ ﻗﯩﻠﻐﺎﻥ، ﻣﯘﺳﺘﻪﻗﯩﻠﻠﯩﻖ ﺋﯩﺮﺍﺩﯨﺴﻰ ﻛﻪﺳﻜﯩﻦ ﺗﻮﻥ ﺑﯩﻠﻪﻥ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ ﺑﺎﻳﺎﻧﺎﺗﻼﺭﺩﯗﺭ . ﺷﯘﯕﺎ ﺧﯩﺘﺎﻳﻨﯩﯔ ﻣﯘﻫﺎﺟﯩﺮﻩﺗﺘﯩﻜﻰ ﺋﯘﻳﻐﯘﺭ ﭘﺎﺋﺎﻟﯩﻴﻪﺗﭽﯩﻠﯩﺮﯨﮕﻪ ﻗﺎﺭﺷﻰ ﻫﻪﺭﯨﻜﯩﺘﯩﺪﻩ ﭘﺎﻛﯩﺴﺘﺎﻧﻨﻰ ﻳﻪﻧﯩﻼ ﻣﯘﻫﯩﻢ ﺋﻮﺭﯗﻧﻐﺎ ﻗﻮﻳﯩﺪﯨﻐﺎﻧﻠﯩﻘﻰ ﭘﻪﺭﻩﺯ ﻗﯩﻠﯩﻨﻤﺎﻗﺘﺎ. ﺧﯩﺘﺎﻳﻨﯩﯔ ﺗﯧﺮﺭﻭﺭﻟﯘﻗﺘﯩﻦ ﻣﯘﺩﺍﭘﯩﺌﻪﻟﯩﻨﯩﺶ ﻣﻪﺳﻠﯩﻬﻪﺗﭽﯩﻠﯩﺮﯨﺪﯨﻦ ﺭﻭﻫﺎﻥ ﮔﯘﺭﺍﻧﺎ ﺋﯚﺗﻜﻪﻥ ﻫﻪﭘﺘﯩﺪﯨﻜﻰ ﺳﯚﺯﯨﺪﻩ، ﺧﯩﺘﺎﻳﻨﯩﯔ ﺷﻪﺭﻗﻰ ﺗﯜﺭﻛﯩﺴﺘﺎﻥ ﻛﯜﭼﻠﯩﺮﯨﮕﻪ ﻗﺎﺭﯨﺘﺎ ﺩﯙﻟﻪﺕ ﺋﯩﭽﯩﺪﻩ ﻳﯘﻣﺸﺎﻕ ﻗﻮﻝ ﺑﻮﻟﯘﺷﯩﻨﻰ، ﭘﺎﻛﯩﺴﺘﺎﻧﺪﯨﻜﻰ ﻛﯜﭼﻠﻪﺭﮔﻪ ﺩﯨﻘﻘﯩﺘﯩﻨﻰ ﻣﻪﻛﻪﺯﻟﻪﺷﺘﯜﺭﯛﺷﯩﻨﻰ ﺗﻪﻛﻠﯩﭗ ﺑﻪﺭﮔﻪﻥ ﺋﯩﺪﻯ.

ﭘﺎﻛﯩﺴﺘﺎﻧﺪﺍ ﺋﯘﻳﻐﯘﺭﻻﺭﻏﺎ ﻗﻮﻻﻳﻠﯩﻖ ﺗﯘﻏﯘﻟﯘﺷﻰ ﻣﯜﻣﻜﯩﻦ

ﺑﯜﮔﯜﻥ ﺗﯜﺭﻛﭽﻪ ﭘﺮﻩﺱ ﻣﯧﺪﯨﻴﺎ ﮔﯧﺰﯨﺘﯩﺪﻩ ﺋﯧﻼﻥ ﻗﯩﻠﯩﻨﻐﺎﻥ ﺑﯩﺮ ﻣﯘﻻﻫﯩﺰﯨﺪﻩ، ﭘﺎﻛﯩﺴﺘﺎﻥ - ﺋﺎﻣﯧﺮﯨﻜﺎ ﻣﯘﻧﺎﺳﯩﯟﯨﺘﯩﻨﯩﯔ ﻗﺎﻳﺴﻰ ﻳﯚﻧﯜﻟﯜﺷﺘﻪ ﺋﯩﻠﮕﯩﺮﯨﻠﯩﺸﯩﻨﻰ ﺗﻪﺧﻤﯩﻦ ﻗﯩﻠﯩﺶ ﺗﻪﺱ، ﺋﻪﻣﻤﺎ ﭘﻪﺭﯞﻩﺯ ﻣﯘﺷﻪﺭﺭﻩﭘﻨﯩﯔ ﺋﻮﺭﻧﯩﻐﺎ ﻛﯩﻢ ﻛﯧﻠﯩﺸﯩﺪﯨﻦ ﻗﻪﺗﺌﯩﻨﻪﺯﻩﺭ ﭘﺎﻛﯩﺴﺘﺎﻧﻨﯩﯔ ﺗﺎﻟﯩﺒﺎﻥ ﺗﻪﺭﻩﭘﺪﺍﺭﻟﯩﺮﯨﻐﺎ ﻗﺎﺭﯨﺘﺎ ﭘﻮﺯﯨﺘﺴﯩﻴﯩﺴﯩﺪﯨﻜﻰ ﻳﯘﻣﺸﺎﺷﻨﯩﯔ ﺩﺍﯞﺍﻣﻠﯩﺸﯩﺪﯨﻐﺎﻧﻠﯩﻘﻰ ﺋﯧﻨﯩﻖ. ﭼﯜﻧﻜﻰ ﻧﯚﯞﻩﺗﺘﯩﻜﻰ ﺑﯩﺮﻟﻪﺷﻤﻪ ﻫﯚﻛﯜﻣﻪﺕ ﺳﺎﻳﻼﻡ ﻣﻪﺯﮔﯩﻠﯩﺪﻩ ﭘﺎﻛﯩﺴﺘﺎﻥ ﺧﻪﻟﻘﯩﻐﻪ ﺑﯘ ﻫﻪﻗﺘﻪ ﯞﻩﺩﻩ ﺑﻪﺭﮔﻪﻥ. ﻳﻪﻧﻰ ﺗﺎﻟﯩﺒﺎﻥ ﻛﯜﭼﻠﯩﺮﯨﮕﻪ ﻗﺎﺭﯨﺘﺎ ﻗﺎﺗﺘﯩﻖ ﻗﻮﻝ ﺳﯩﻴﺎﺳﻪﺗﻜﻪ ﺧﺎﺗﯩﻤﻪ ﺑﯧﺮﯨﭗ، ﭘﺎﻛﯩﺴﺘﺎﻧﺪﯨﻜﻰ ﭘﺎﺭﺗﻼﺵ ﻫﻪﺭﯨﻜﻪﺗﻠﯩﺮﯨﻨﯩﯔ ﺋﺎﻟﺪﯨﻨﻰ ﺋﺎﻟﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ.

ﻛﯚﺯﻩﺗﻜﯜﭼﯩﻠﻪﺭﻧﯩﯔ ﻗﺎﺭﯨﺸﯩﭽﻪ، ﭘﺎﻛﯩﺴﺘﺎﻧﺪﺍ ﺗﺎﻟﯩﺒﺎﻥ ﻛﯜﭼﻠﯩﺮﯨﻨﯩﯔ ﺑﺎﺵ ﻛﯚﺗﯜﺭﯛﺷﻰ ﺋﺎﻓﻐﺎﻧﯩﺴﺘﺎﻥ ﺑﯩﻠﻪﻥ ﺑﯩﺮﻟﯩﻜﺘﻪ ﺧﯩﺘﺎﻳﻨﯩﻤﯘ ﺋﻪﻧﺪﯨﺸﯩﮕﻪ ﺳﺎﻟﯩﺪﯗ. ﭼﯜﻧﻜﻰ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺗﺎﻟﯩﺒﺎﻥ ﺑﯩﻠﻪﻥ ﻣﻪﺧﭙﯩﻲ ﻫﻪﻣﻜﺎﺭﻟﯩﻖ ﻣﯘﻧﺎﺳﯩﯟﯨﺘﻰ ﺑﺎﺭﻟﯩﻘﻰ، ﺷﻪﺭﻗﻰ ﺗﯜﺭﻛﯩﺴﺘﺎﻥ ﺋﯩﺴﻼﻡ ﻫﻪﺭﯨﻜﯩﺘﻰ ﺗﻪﺷﻜﯩﻼﺗﻰ ﺑﯩﻠﻪﻥ ﺗﺎﻟﯩﺒﺎﻥ ﺋﺎﺭﯨﺴﯩﺪﯨﻜﻰ ﻣﯘﻧﺎﺳﯩﯟﻩﺗﻜﻪ ﺋﻮﺧﺸﺎﺷﻼ ﺗﻪﺭﻩﭘﻠﻪﺭ ﺋﯧﺘﯩﺮﺍﭖ ﻗﯩﻠﻤﯩﻐﺎﻥ ﯞﻩ ﮔﯘﻣﺎﻧﻼﺭ ﺋﺎﻳﺪﯨﯖﻼﺷﻤﯩﻐﺎﻥ ﻣﯘﻧﺎﺳﯩﯟﻩﺗﺘﯘﺭ. ﺋﯘﻳﻐﯘﺭ ﻛﯚﺯﻩﺗﻜﯜﭼﯩﻠﻪﺭ، ﺋﻪﮔﻪﺭ ﯞﻩﺯﯨﻴﻪﺕ ﺑﯘ ﺷﻪﻛﯩﻠﺪﻩ ﺗﻪﺭﻩﻗﻘﯩﻲ ﻗﯩﻠﺴﺎ، ﭘﺎﻛﯩﺴﺘﺎﻧﺪﺍ ﺋﻮﻗﯘﺵ، ﺗﯩﺠﺎﺭﻩﺕ ﻗﯩﻠﯩﺶ ﯞﻩ ﺑﺎﺷﻘﺎ ﻣﻪﻗﺴﻪﺗﻠﻪﺭ ﺑﯩﻠﻪﻥ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭﻻﺭﻏﺎ ﻧﯩﺴﺒﻪﺗﻪﻥ ﺋﺎﺯﺍﺩﯨﭽﯩﻠﯩﻚ ﺗﯘﻏﯘﻟﯩﺪﯨﻐﺎﻧﻠﯩﻘﯩﻨﻰ ﺑﺎﻳﺎﻥ ﻗﯩﻠﻤﺎﻗﺘﺎ.