ﭘﻪﻳﺰﯨﯟﺍﺕ ﺳﺎﻗﭽﻰ ﺋﯩﺪﺍﺭﯨﺴﯩﻨﯩﯔ ﺑﯩﻠﺪﯛﺭﯛﺷﯩﭽﻪ، ﻗﯩﺰﯨﻞ ﺑﻮﻳﻰ ﯞﻩﻗﻪﺳﯩﺪﯨﻜﻰ ﻫﯘﺟﯘﻣﭽﯩﻼﺭﻧﯩﯔ ﻳﺎﻣﺎﻥ ﻳﺎﺭ ﯞﻩﻗﻪﺳﯩﻨﻰ ﭘﻪﻳﺪﺍ ﻗﯩﻠﻐﯘﭼﯩﻼﺭ ﺋﯩﻜﻪﻧﻠﯩﻜﯩﮕﻪ ﻫﺎﺯﯨﺮﭼﻪ ﻣﺎﺩﺩﯨﻲ ﭘﺎﻛﯩﺖ ﻳﻮﻕ، ﺋﻪﻣﻤﺎ ﺋﯘﻻﺭ ﭘﻪﺭﯨﺰﯨﻨﯩﯔ ﺗﻮﻏﺮﯨﻠﯩﻘﯩﻐﺎ %90 ﺋﯩﺸﻪﻧﭻ ﺑﯩﻠﻪﻥ ﻗﺎﺭﯨﻤﺎﻗﺘﺎ.

ﻳﺎﻣﺎﻥ ﻳﺎﺭ ﯞﻩﻗﻪﺳﻰ ﻳﯜﺯ ﺑﻪﺭﮔﯩﻨﯩﮕﻪ ﺑﯜﮔﯜﻥ 17 ﻛﯜﻥ ﺑﻮﻟﺪﻯ، ﻗﯩﺰﯨﻞ ﺑﻮﻳﻰ ﯞﻩﻗﻪﺳﻰ ﻳﯜﺯ ﺑﻪﺭﮔﯩﻨﯩﮕﻪ3 ﻛﯜﻥ ﺑﻮﻟﺪﻯ. ﺋﻪﻣﻤﺎ ﮔﯘﻣﺎﻧﺪﺍﺭﻻﺭ ﻫﺎﺯﯨﺮﻏﯩﭽﻪ ﺗﯘﺗﯘﻟﻤﯩﻐﺎﻥ. ﻧﯚﯞﻩﺗﺘﻪ ﻗﻪﺷﻘﻪﺭ ﯞﯨﻼﻳﯩﺘﻰ ﻣﻪﺯﻛﯘﺭ ﮔﯘﻣﺎﻧﺪﺍﺭﻻﺭﻧﻰ ﺗﯘﺗﯘﺵ ﺋﯜﭼﯜﻥ ﺋﻮﻣﯘﻣﻰ ﻳﯜﺯﻟﯜﻙ ﺳﻪﭘﻪﺭﯞﻩﺭﻟﯩﻜﻜﻪ ﻛﻪﻟﺘﯜﺭﯛﻟﮕﻪﻥ. ﻗﻪﺷﻘﻪﺭ ﯞﺍﻟﯩﺴﻰ ﺋﻪﻛﺒﻪﺭ ﻏﻮﭘﯘﺭﻣﯘ ﺳﻪﭘﻨﯩﯔ ﺋﺎﻟﺪﯨﺪﺍ. ﻗﻪﺷﻘﻪﺭ ﭘﺎﺭﺗﻜﻮﻡ ﺳﯧﻜﺮﯨﺘﺎﺭﻯ ﺷﻰ ﺩﺍﮔﺎﯓ ﺳﺎﻗﭽﯩﻼﺭﻧﻰ، ﺗﯘﺗﯘﺵ ﺟﻪﺭﻳﺎﻧﯩﺪﺍ ﺧﺎﺗﺎﻟﯩﺸﯩﺸﺘﯩﻦ ﻗﻮﺭﻗﻤﺎﺳﻠﯩﻘﻘﺎ ﭼﺎﻗﯩﺮﻏﺎﻥ.

ﺧﯩﺘﺎﻱ ﺗﺎﺷﻘﻰ ﺋﯩﺸﻼﺭ ﺑﺎﻳﺎﻧﺎﺗﭽﯩﺴﻰ ﭼﯩﻦ ﮔﺎﯓ ﺗﯜﻧﯜﮔﯜﻧﻜﻰ ﺑﺎﻳﺎﻧﺎﺗﯩﺪﺍ، ﻣﻪﺯﻛﯘﺭ ﯞﻩﻗﻪ ﮔﯘﻣﺎﻧﺪﺍﺭﻟﯩﺮﯨﻨﻰ ﺑﯩﺮ ﺋﻮﭼﯘﻡ ﻛﯩﺸﯩﻠﻪﺭ ﺩﻩﭖ ﺋﺎﺗﯩﻐﺎﻥ ﯞﻩ ﺋﯘﻳﻐﯘﺭ ﺭﺍﻳﻮﻧﯩﺪﺍ ﻣﯩﻠﻠﻪﺗﻠﻪﺭ ﻣﯘﻧﺎﺳﯩﯟﯨﺘﻰ ﯞﻩﺯﯨﻴﯩﺘﯩﻨﯩﯔ ﭼﻮﯓ ﺟﻪﻫﻪﺗﺘﯩﻦ ﻳﺎﺧﺸﻰ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﮔﻪﻥ. ﺋﻪﻣﻤﺎ ﻗﻪﺷﻘﻪﺭ ﺧﻪﻟﻘﯩﻨﯩﯔ ﯞﻩﻗﻪ ﮔﯘﻣﺎﻧﺪﺍﺭﻟﯩﺮﯨﻨﻰ ﺑﯜﮔﯜﻧﮕﻪ ﻗﻪﺩﻩﺭ ﺑﺎﻏﺮﯨﺪﺍ ﻳﻮﺷﯘﺭﯗﭖ ﻛﯧﻠﯩﺸﻰ ﭼﯩﻨﮕﺎﯕﻨﯩﯔ ﺳﯚﺯﻟﯩﺮﯨﻨﻰ ﺋﯩﻨﻜﺎﺭ ﻗﯩﻠﻤﺎﻗﺘﺎ.

ﻧﯚﯞﻩﺗﺘﻪ ﻗﯩﺰﯨﻞ ﺑﻮﻳﻰ ﯞﻩﻗﻪﺳﯩﺪﯨﻜﻰ ﻳﺎﺭﯨﺪﺍﺭ ﺳﺎﻗﭽﯩﻼﺭﺩﯨﻦ ﺑﯩﺮ ﻧﻪﭘﯩﺮﯨﻨﯩﯔ ﺧﻪﺗﻪﺭﻟﯩﻚ ﺑﺎﺳﻘﯘﭼﺘﯩﻦ ﺋﯚﺗﻜﻪﻧﻠﯩﻜﻰ ﻣﻪﻟﯘﻡ ﺑﻮﻟﺪﻯ، ﺋﻪﻣﻤﺎ ﻳﺎﺭﯨﺪﺍﺭﻻﺭﺩﯨﻦ ﺑﯩﺮ ﻧﻪﭘﯩﺮﯨﻨﯩﯔ ﺋﯩﻜﻜﻰ ﺑﺎﺭﻣﯩﻘﻰ ﻛﯧﺴﯩﯟﯦﺘﯩﻠﮕﻪﻥ ﺑﻮﻟﯘﭖ، ﺋﯘﻧﯩﯔ ﺋﻪﻫﯟﺍﻟﻰ ﺋﯧﻨﯩﻖ ﺋﻪﻣﻪﺱ.

ﻳﻪﺭﻟﯩﻚ ﺳﺎﻗﭽﻰ ﭘﻮﻧﻜﯩﺘﯩﻨﯩﯔ ﺑﯩﺮ ﺧﺎﺩﯨﻤﻰ ﺑﯜﮔﯜﻥ ﯞﻩﻗﻪ ﮔﯘﻣﺎﻧﺪﺍﺭﻟﯩﺮﻯ ﻫﻪﻗﻘﯩﺪﻩ ﯞﻩ ﻗﯩﺰﯨﻞ ﺑﻮﻳﻰ ﯞﻩﻗﻪﺳﻰ ﻫﻪﻗﻘﯩﺪﻩ ﻳﻪﻧﻪ ﺑﯩﺮ ﻗﺎﺗﺎﺭ ﻳﯧﯖﻰ ﺋﯘﭼﯘﺭﻻﺭ ﺑﻪﺭﺩﻯ. ﻣﻪﻟﯘﻡ ﺑﻮﻟﯘﺷﯩﭽﻪ ﮔﯘﻣﺎﻧﺪﺍﺭﻻﺭ ﺳﺎﻧﻰ 7 ﺩﯨﻦ 9 ﻏﺎ ﻛﯚﭘﻪﻳﮕﻪﻥ، ﺋﯘﻻﺭﺩﯨﻦ ﺑﯩﺮﻯ ﺋﺎﻧﺎﺭﮔﯜﻝ ﻣﯘﺗﻪﻟﻠﯩﭗ ﺋﯩﺴﯩﻤﻠﯩﻚ ﺋﺎﻳﺎﻟﺪﯗﺭ.

ﺩﯨﻨﯩﻲ ﺋﯧﺘﯩﻘﺎﺩ ﺟﻪﻫﻪﺗﺘﯩﻜﻰ ﻣﯘﺳﺘﻪﻫﻜﻪﻣﻠﯩﻜﻰ ﺑﯩﻠﻪﻥ ﺧﯩﺘﺎﻱ ﺳﺎﻗﭽﯩﻠﯩﺮﯨﻨﯩﯔ ﺩﯨﻘﻘﻪﺕ ﻣﻪﺭﻛﯩﺰﯨﮕﻪ ﺋﺎﻳﻼﻧﻐﺎﻥ ﺋﺎﻧﺎﺭﮔﯜﻝ، ﺩﻩﺳﻠﻪﭘﺘﻪ ﻳﺎﻣﺎﻥ ﻳﺎﺭ ﯞﻩﻗﻪﺳﯩﻨﯩﯔ ﮔﯘﻣﺎﻧﺪﺍﺭﻟﯩﺮﯨﻐﺎ ﻳﺎﺭﺩﻩﻣﻠﻪﺷﻜﻪﻥ ﺩﻩﭖ ﻗﺎﺭﯨﻠﯩﭗ ﺗﻪﻗﯩﭗ ﻗﯩﻠﯩﻨﻐﺎﻥ ﺑﻮﻟﺴﺎ، ﺋﻪﻣﺪﯨﻠﯩﻜﺘﻪ ﻗﯩﺰﯨﻞ ﺑﻮﻳﻰ ﯞﻩﻗﻪﺳﯩﻨﯩﯔ ﺑﯩﯟﺍﺳﺘﻪ ﺋﯩﺸﺘﯩﺮﺍﻛﭽﯩﺴﻰ ﺳﯜﭘﯩﺘﯩﺪﻩ ﺋﯩﺰﻯ ﻗﻮﻏﻼﻧﻤﺎﻗﺘﺎ.

ﺋﺎﻧﺎﺭﮔﯜﻝ ﻣﯘﺗﻪﻟﻠﯩﭗ ﺋﻪﺳﻠﯩﺪﻩ ﭘﻪﻳﺰﯨﯟﺍﺗﻨﯩﯔ ﻣﯩﺸﺎ ﻳﯧﺰﯨﺴﯩﺪﯨﻦ ﺑﻮﻟﯘﭖ، ﺋﯘ ﺑﯩﺮ ﻣﻪﺯﮔﯩﻞ ﺋﯜﺭﯛﻣﭽﻰ ﻗﺎﺗﺎﺭﻟﯩﻖ ﺟﺎﻳﻼﺭﺩﺍ ﺩﯨﻨﯩﻲ ﺗﻪﻟﯩﻢ ﺋﯧﻠﯩﺶ ﻳﺎﻛﻰ ﺩﯨﻨﯩﻲ ﺗﻪﺭﻏﯩﺒﺎﺕ ﺑﯩﻠﻪﻥ ﺷﯘﻏﯘﻟﻼﻧﻐﺎﻥ، ﻛﯧﻴﯩﻦ ﻗﯩﺰﯨﻞ ﺑﻮﻳﻰ ﻳﯧﺰﯨﺴﯩﻐﺎ ﺗﻮﻱ ﻗﯩﻠﯩﭗ ﻛﻪﻟﮕﻪﻥ.

ﺗﯜﻧﯜﮔﯜﻧﻜﻰ ﺋﯩﮕﯩﻠﯩﺸﯩﻤﯩﺰﺩﻩ ﭘﻪﻳﺰﯨﯟﺍﺕ ﺳﺎﻗﭽﻰ ﺑﺎﺷﻠﯩﻐﻰ ﺋﺎﻧﺎﺭﮔﯜﻝ ﻣﯘﺗﻪﻟﻠﯩﭙﻨﯩﯔ ﺋﺎﻧﯩﺴﻰ ﺋﺎﻣﺎﻧﮕﯘﻟﻨﻰ ﻣﯩﺸﺎ ﺳﺎﻗﭽﻰ ﭘﻮﻧﻜﯩﺘﯩﺪﺍ ﺗﯘﺗﯘﭖ ﺗﯘﺭﯨﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺋﯩﺪﻯ. ﺑﯜﮔﯜﻧﻜﻰ ﻣﻪﻟﯘﻣﺎﺗﺘﺎ ﺋﯘﻧﯩﯔ 8 ﻳﺎﺷﻠﯩﻖ ﺋﻮﻏﻠﯩﻨﯩﯔ ﺗﯘﺗﯘﭖ ﺗﯘﺭﯗﻟﯩﯟﺍﺗﻘﺎﻧﻠﯩﻘﻰ ﻣﻪﻟﯘﻡ ﺑﻮﻟﺪﻯ.

ﻣﻪﺯﻛﯘﺭ ﺳﺎﻗﭽﻰ ﺧﺎﺩﯨﻤﻰ ﻳﻪﻧﻪ ﮔﯘﻣﺎﻧﺪﺍﺭﻻﺭﻧﯩﯔ ﺋﺎﻻﻫﯩﺪﻩ ﭼﯧﻨﯩﻘﻘﺎﻥ ، ﺑﻪﺳﺘﻠﯩﻚ ﻛﯜﭼﻠﯜﻙ ﻛﯩﺸﯩﻠﻪﺭ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﺑﯘ، ﭘﻪﻳﺰﯨﯟﺍﺕ ﻧﺎﻫﯩﻴﯩﺴﯩﺪﻩ ﻳﯜﺯ ﺑﻪﺭﮔﻪﻥ 27 - ﺋﺎﯞﻏﯘﺳﺖ ﻗﯩﺰﯨﻞ ﺑﯘﻳﺎ ﯞﻩﻗﻪﺳﻰ ﻫﻪﻗﻘﯩﺪﯨﻜﻰ ﺋﻪﯓ ﻳﯧﯖﻰ ﻣﻪﻟﯘﻣﺎﺗﻼﺭﺩﯗﺭ.