ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﺋﯩﺸﻠﻪﻣﭽﻰ ﺗﻮﺷﯘﺷﯘﺵ ﺧﯩﺰﻣﯩﺘﻰ ﺋﯘﻳﻐﯘﺭ ﺋﯧﻠﯩﻨﯩﯔ ﭘﻪﻳﺰﯨﯟﺍﺕ ﻧﺎﻫﯩﻴﯩﺴﯩﺪﻩ ﺑﯩﺮ ﻗﻪﺩﻩﺭ ﻛﯚﻟﻪﻣﻠﯩﻚ ﺋﯧﻠﯩﭗ ﺑﯧﺮﯨﻠﻐﺎﻥ ﺑﻮﻟﯘﭖ، "ﺋﯩﻘﺘﯩﺴﺎﺩ ﮔﯧﺰﯨﺘﻰ" ﺩﻩ ﻛﯚﺭﺳﯩﺘﯩﻠﯩﺸﯩﭽﻪ، ﺑﯘ ﻳﯩﻞ 9 - ﻣﺎﺭﺕ ﻳﻪﻧﻪ ﻣﻪﺯﻛﯘﺭ ﻧﺎﻫﯩﻴﯩﺪﯨﻦ 243 ﻧﻪﭘﻪﺭ ﻗﯩﺰ ﺧﯩﺘﺎﻳﻨﯩﯔ ﺗﻴﻪﻧﺠﯩﻦ، ﺧﯧﺒﯧﻲ ﻗﺎﺗﺎﺭﻟﯩﻖ ﺋﯚﻟﻜﯩﻠﯩﺮﯨﮕﻪ ﺋﯧﻠﯩﭗ ﻣﯧﯖﯩﻠﻐﺎﻥ.

ﺭﻭﺷﻪﻧﮕﯜﻝ ﻫﺎﺯﯨﺮ ﻛﯧﺴﻪﻝ ﺋﺎﻧﯩﺴﯩﻨﯩﯔ ﻫﺎﻟﯩﺪﯨﻦ ﺧﻪﯞﻩﺭ ﺋﯧﻠﯩﺶ ﺑﯘﺭﭼﯩﻨﻰ ﺋﯚﺯ ﺯﯨﻤﻤﯩﺴﯩﺪﻩ ﺋﯧﻠﯩﺸﻘﺎ ﻣﻪﺟﺒﯘﺭ

ﭘﻪﻳﺰﯨﯟﺍﺕ ﻧﺎﻫﯩﻴﻪ ﺗﻪﯞﻩﺳﯩﺪﯨﻦ 2008 - ﻳﯩﻠﯩﺪﺍ ﺧﯩﺘﺎﻱ ﺷﻪﻫﻪﺭﻟﯩﺮﯨﮕﻪ ﺑﯧﺮﯨﭗ ﺋﯩﺸﻠﻪﻳﺪﯨﻐﺎﻧﻼﺭﻧﻰ ﺗﯩﺰﯨﻤﻼﺵ ﯞﻩ ﺗﻪﺷﻜﯩﻠﻠﻪﺵ ﺧﯩﺰﻣﯩﺘﯩﻨﯩﯔ ﺋﺎﻟﻠﯩﺒﯘﺭﯗﻥ ﺑﺎﺷﻼﻧﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﭘﻪﻳﺰﯨﯟﺍﺕ ﻧﺎﻫﯩﻴﻪ ﻳﯧﯖﻰ ﻣﻪﻫﻪﻟﻠﻪ ﻳﯧﺰﯨﺴﻰ ﺗﻪﯞﻩﺳﯩﺪﯨﻜﻰ ﺑﯩﺮ ﻛﻪﻧﺖ ﺳﯧﻜﺮﯦﺘﺎﺭﻯ ﺑﯘ ﺧﯩﺰﻣﻪﺗﻜﻪ ﻗﺎﺭﺷﻰ ﭼﯩﻘﻘﯘﭼﯩﻼﺭ "ﺋﯩﺪﯨﻴﯩﺴﻰ ﻗﺎﻻﻕ ﻛﯩﺸﯩﻠﻪﺭ" ﺩﻩﭖ ﻗﺎﺭﺍﻳﺪﯨﻐﺎﻧﻠﯩﻘﯩﻨﻰ ﻗﻮﺷﯘﻣﭽﻪ ﻗﯩﻠﺪﻯ.

ﺭﺍﺩﯨﺌﻮﻣﯩﺰﻏﺎ ﻛﻪﻟﮕﻪﻥ ﻣﻪﻟﯘﻣﺎﺗﻼﺭﻏﺎ ﻗﺎﺭﯨﻐﺎﻧﺪﺍ، ﺑﯘ ﻧﯚﯞﻩﺕ ﭘﻪﻳﺰﯨﯟﺍﺕ ﻧﺎﻫﯩﻴﯩﺴﯩﻨﯩﯔ ﻫﻪﺭ ﻗﺎﻳﺴﻰ ﻳﯧﺰﯨﻠﯩﺮﯨﺪﯨﻦ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﺋﯩﺸﻠﻪﻣﭽﯩﻠﯩﻜﻜﻪ ﺋﯧﻠﯩﭗ ﻣﯧﯖﯩﻠﻐﺎﻥ ﺋﯘﻳﻐﯘﺭ ﻗﯩﺰﻟﯩﺮﻯ ﺋﺎﺭﯨﺴﯩﺪﺍ، ﺭﻭﺷﻪﻧﮕﯜﻝ ﺋﻮﺳﻤﺎﻥ ﺋﯩﺴﯩﻤﻠﯩﻚ ﺑﯩﺮ ﻗﯩﺰﻣﯘ ﺑﺎﺭ ﺑﻮﻟﯘﭖ، ﻣﻪﻟﯘﻡ ﺑﻮﻟﯘﺷﯩﭽﻪ، ﺭﻭﺷﻪﻧﮕﯜﻟﻨﯩﯔ ﺩﺍﺩﯨﺴﻰ ﺋﻮﺳﻤﺎﻥ ﻳﺎﺳﯩﻦ ﺧﯧﻠﻰ ﻳﯩﻠﻼﺭ ﺑﯘﺭﯗﻥ ﺋﺎﻟﻪﻣﺪﯨﻦ ﺋﯚﺗﻜﻪﻥ، ﺋﺎﻧﯩﺴﻰ ﻛﯧﺴﻪﻝ، ﺋﺎﻛﯩﺴﻰ ﺋﯚﻱ ﺋﺎﻳﺮﯨﭗ ﭼﯩﻘﯩﭗ ﻛﻪﺗﻜﻪﻥ ﺑﻮﻟﻐﺎﭼﻘﺎ ، ﺭﻭﺷﻪﻧﮕﯜﻝ ﻫﺎﺯﯨﺮ ﺋﯚﻳﺪﻩ ﻛﯧﺴﻪﻝ ﺋﺎﻧﯩﺴﯩﻨﯩﯔ ﻫﺎﻟﯩﺪﯨﻦ ﺧﻪﯞﻩﺭ ﺋﯧﻠﯩﺶ ﺑﯘﺭﭼﯩﻨﻰ ﻫﻪﻣﺪﻩ ﺋﯧﺘﯩﺰ - ﺋﯧﺮﯨﻖ ﺋﯩﺸﻠﯩﺮﯨﻨﻰ ﻗﯩﻠﯩﺸﻨﻰ ﺋﯚﺯ ﺯﯨﻤﻤﯩﺴﯩﺪﻩ ﺋﯧﻠﯩﺸﻘﺎ ﻣﻪﺟﺒﯘﺭ ﺑﻮﻟﻐﺎﻥ ﺋﯩﻜﻪﻥ.

ﻳﻪﺭﻟﯩﻚ ﺳﺎﻗﭽﻰ ﺩﺍﺋﯩﺮﯨﻠﯩﺮﻯ ﺭﻭﺷﻪﻧﮕﯜﻟﻨﯩﯔ ﺋﺎﻛﯩﺴﯩﻨﻰ ﻗﻮﻟﻐﺎ ﺋﺎﻟﻐﺎﻥ

ﺭﻭﺷﻪﻧﮕﯜﻝ ﯞﻩ ﺋﺎﺋﯩﻠﯩﺴﻰ ﻫﺎﺯﯨﺮ ﭘﻪﻳﺰﯨﯟﺍﺕ ﻧﺎﻫﯩﻴﯩﺴﻰ ﻳﯧﯖﻰ ﻣﻪﻫﻪﻟﻠﻪ ﻳﯧﺰﯨﺴﻰ 20 - ﻛﻪﻧﺘﯩﺪﻩ ﻳﺎﺷﺎﻳﺪﯨﻐﺎﻥ ﺑﻮﻟﯘﭖ، ﻳﻪﺭﻟﯩﻚ ﻫﯚﻛﯜﻣﻪﺕ ﺩﺍﺋﯩﺮﯨﻠﯩﺮﻯ ﺧﯩﺘﺎﻱ ﺷﻪﻫﻪﺭﻟﯩﺮﯨﮕﻪ ﺋﯩﺸﻠﻪﻣﭽﯩﻠﯩﻜﻜﻪ ﺋﯧﻠﯩﭗ ﻣﯧﯖﯩﻠﯩﺪﯨﻐﺎﻥ ﻗﯩﺰﻻﺭﻧﻰ ﺗﯩﺰﯨﻤﻼﺵ ﺋﯜﭼﯜﻥ ﺭﻭﺷﻪﻧﮕﯜﻝ ﺋﻮﺳﻤﺎﻧﻼﺭﻧﯩﯔ ﺋﯚﻳﮕﻪ ﻛﻪﻟﮕﻪﻧﺪﻩ ، ﺭﻭﺷﻪﻧﮕﯜﻝ ﺋﯚﺯﯨﻨﯩﯔ ﻧﯚﯞﻩﺗﺘﯩﻜﻰ ﺋﻪﻫﯟﺍﻟﯩﻨﻰ ﭼﯜﺷﻪﻧﺪﯛﺭﯛﭖ، ﺋﯚﺯﯨﻨﯩﯔ ﻛﯧﺴﻪﻝ ﺋﺎﻧﯩﺴﯩﻨﯩﯔ ﻫﺎﻟﯩﺪﯨﻦ ﺧﻪﯞﻩﺭ ﺋﺎﻟﻤﯩﺴﺎ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ، ﺋﯩﺸﻠﻪﻣﭽﯩﻠﯩﻜﻜﻪ ﺑﯧﺮﯨﺸﻘﺎ ﻣﯘﻣﻜﯩﻨﭽﯩﻠﯩﻜﻰ ﻳﻮﻗﻠﯘﻗﯩﻨﻰ ﭼﯜﺷﻪﻧﺪﯛﺭﯛﭖ ﺧﯩﺘﺎﻱ ﺷﻪﻫﻪﺭﻟﯩﺮﯨﮕﻪ ﺑﯧﺮﯨﺸﻨﻰ ﺭﻩﺕ ﻗﯩﻠﻐﺎﻥ. ﻟﯧﻜﯩﻦ، ﻫﯚﻛﯜﻣﻪﺕ ﺧﺎﺩﯨﻤﻠﯩﺮﻯ ﺭﻭﺷﻪﻧﮕﯜﻟﻨﯩﯔ ﭼﻮﻗﯘﻡ ﺑﯧﺮﯨﺸﻰ ﺷﻪﺭﺕ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﯛﭖ ﺋﯘﻧﻰ ﻣﻪﺟﺒﯘﺭﻟﯩﻐﺎﻧﺪﺍ ﺭﻭﺷﻪﻧﮕﯜﻟﻨﯩﯔ ﺋﺎﻛﯩﺴﻰ ﺋﻮﺗﺘﯘﺭﯨﻐﺎ ﭼﯜﺷﯜﭖ ﻗﺎﺭﺷﯩﻠﯩﻖ ﺑﯩﻠﺪﯛﺭﮔﻪﻧﺪﯨﻦ ﻛﯧﻴﯩﻦ ، ﻳﻪﺭﻟﯩﻚ ﺳﺎﻗﭽﻰ ﺩﺍﺋﯩﺮﯨﻠﯩﺮﻯ ﺭﻭﺷﻪﻧﮕﯜﻟﻨﯩﯔ ﺋﺎﻛﯩﺴﯩﻨﻰ ﻗﻮﻟﻐﺎ ﺋﺎﻟﻐﺎﻥ.

ﺑﯩﺰ ﺋﯩﮕﯩﻠﯩﮕﻪﻥ ﻣﻪﻟﯘﻣﺎﺗﻼﺭﻏﺎ ﻗﺎﺭﯨﻐﺎﻧﺪﺍ، ﺭﻭﺷﻪﻧﮕﯜﻝ ﺋﻮﺳﻤﺎﻥ، ﻫﺎﺯﯨﺮ ﮔﯧﺮﻣﺎﻧﯩﻴﯩﻨﯩﯔ ﻓﺮﺍﻧﻜﻔﻮﺭﺕ ﺷﻪﻫﯩﺮﯨﺪﯨﻜﻰ ﺷﻪﺭﻗﻰ ﺗﯜﺭﻛﯩﺴﺘﺎﻥ ﺑﯩﺮﻟﯩﻜﻰ ﺗﻪﺷﻜﯩﻼﺗﯩﻨﯩﯔ ﺭﻩﺋﯩﺴﻰ ﻛﯚﺭﻩﺵ ﺋﺎﺗﺎﺧﺎﻧﻨﯩﯔ ﻧﻪﯞﺭﻩ ﺳﯩﯖﻠﯩﺴﻰ ﺋﯩﻜﻪﻥ.

ﻫﺎﻟﺒﯘﻛﻰ ﺑﯩﺰ ﺭﻭﺷﻪﻧﮕﯜﻝ ﻫﻪﻗﻘﯩﺪﻩ ﺗﯧﺨﯩﻤﯘ ﺗﻪﭘﺴﯩﻠﯩﻲ ﻣﻪﻟﯘﻣﺎﺕ ﺋﯩﮕﯩﻠﻪﺵ ﺋﯜﭼﯜﻥ ﻳﯧﯖﯩﻤﻪﻫﻪﻟﻠﻪ ﻳﯧﺰﯨﺴﯩﺪﯨﻜﻰ ﻣﯘﻧﺎﺳﯟﻩﺗﻠﯩﻚ ﻫﯚﻛﯜﻣﻪﺕ ﺧﺎﺩﯨﻤﻠﯩﺮﻯ ﺑﯩﻠﻪﻥ ﺗﯧﻠﯧﻔﯘﻥ ﺋﺎﻻﻗﯩﺴﻰ ﻗﯩﻠﯩﺸﻘﺎ ﻛﯚﭖ ﺗﯩﺮﯨﺸﻘﺎﻥ ﺑﻮﻟﺴﺎﻗﻤﯘ ، ﻳﯧﺘﻪﺭﻟﯩﻚ ﺋﯘﭼﯘﺭﻏﺎ ﺋﯧﺮﯨﺸﻪﻟﻤﯩﺪﯗﻕ.

ﺭﯗﺷﻪﻧﮕﯜﻟﻠﻪﺭ ﺋﺎﺋﯩﻠﯩﺴﯩﻨﯩﯔ ﺋﯚﺯﯨﮕﻪ ﻗﻮﺷﻨﺎ ﻛﻪﻧﺘﺘﻪ ﺗﯘﺭﯨﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺑﯩﺮ ﻳﯧﺰﺍ ﻛﺎﺩﯨﺮﻯ ﺋﯘ ﻳﯧﺰﯨﺪﺍ ﺭﻭﺷﻪﻧﮕﯜﻝ ﺋﻮﺳﻤﺎﻥ ﺋﯩﺴﯩﻤﻠﯩﻚ ﺑﯩﺮ ﻗﯩﺰ ﺑﺎﺭﻟﯩﻘﯩﻨﻰ ، ﺋﺎﻧﯩﺴﯩﻨﯩﯔ ﺭﺍﺱ ﻛﯧﺴﻪﻝ ﺋﯩﻜﻪﻧﻠﯩﻜﯩﻨﻰ ﺋﯩﺴﭙﺎﺗﻠﯩﺪﻯ.

ﻛﯚﺭﻩﺵ ﺋﺎﺗﺎﺧﺎﻥ": ﺑﯘ ﺑﺎﺭﻟﯩﻖ ﺋﯘﻳﻐﯘﺭ ﺋﺎﺋﯩﻠﯩﺴﻰ ﺋﻪﺯﺍﺳﯩﻨﯩﯔ ﺑﯧﺸﯩﻐﺎ ﻛﯧﻠﯩﺸﻰ ﻣﯘﻣﻜﯩﻦ"

ﻫﺎﺯﯨﺮ ﺧﯩﺘﺎﻱ ﻫﯚﻛﯜﻣﯩﺘﻰ ﺋﯘﻳﻐﯘﺭ ﺋﯧﻠﯩﺪﻩ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺋﯘﻳﻐﯘﺭ ﻗﯩﺰﻟﯩﺮﯨﻨﻰ ﺧﯩﺘﺎﻱ ﺋﯚﻟﻜﯩﻠﯩﺮﯨﺪﻩ ﺋﯩﺸﻘﺎ ﺋﻮﺭﯗﻧﻼﺷﺘﯘﺭﯗﺵ ﻫﻪﻗﻘﯩﺪﻩ ﺗﻮﺧﺘﺎﻟﻐﺎﻥ ﻛﯜﺭﻩﺵ ﺋﺎﺗﺎﺧﺎﻥ، ﺋﯘﻳﻐﯘﺭ ﻗﯩﺰﻟﯩﺮﯨﻨﻰ ﺋﯩﺸﻘﺎ ﺋﻮﺭﯗﻧﻼﺷﺘﯘﺭﯗﺵ ﻗﺎﻧﺪﺍﻗﺘﯘﺭ ﺋﯘﻳﻐﯘﺭ ﻣﯩﻠﻠﯩﺘﯩﻨﻰ ﺑﯧﻴﯩﺘﯩﺶ ﺳﯩﻴﺎﺳﯩﺘﻰ ﺑﻮﻟﻐﺎﻥ ﺑﻮﻟﺴﺎ "ﺧﯩﺘﺎﻱ ﻫﯚﻛﯜﻣﯩﺘﻰ ﺑﯘ ﻗﯩﺰﻻﺭﻧﻰ ﺗﻪﯕﺮﯨﺘﯧﻐﯩﻨﯩﯔ ﺷﯩﻤﺎﻟﯩﺪﯨﻜﻰ ﺑﺎﻱ ﺭﺍﻳﻮﻧﻼﺭﺩﯨﻜﻰ ﺋﯩﺶ ﺋﻮﺭﯗﻧﻠﯩﺮﯨﻐﺎ ﺋﯩﺸﻘﺎ ﺋﻮﺭﯗﻧﻼﺷﺘﯘﺭﻏﺎﻥ ﺑﻮﻻﺗﺘﻰ" ﺩﯦﺪﻯ.

ﻛﯜﺭﻩﺵ ﺋﺎﺗﺎﺧﺎﻥ ﻳﻪﻧﻪ، ﺋﻪﻳﻨﻰ ﯞﺍﻗﯩﺘﺘﺎ ﺋﯘﻳﻐﯘﺭ ﺋﯩﻠﯩﺪﯨﻦ ﻧﯘﺭﻏﯘﻥ ﻳﺎﺵ ﻗﯩﺰﻻﺭ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﺋﯧﻠﯩﭗ ﻣﯧﯖﯩﻠﻐﺎﻧﺪﺍ ، ﻧﯘﺭﻏﯘﻥ ﻛﯩﺸﯩﻠﻪﺭﻧﯩﯔ ﺋﯩﻨﺘﺎﻳﯩﻦ ﭘﻪﺭﯞﺍﺳﯩﺰ ﻣﯘﺋﺎﻣﯩﻠﻪ ﻗﯩﻠﻐﺎﻧﻠﯩﻘﯩﻨﻰ ، ﺟﯩﺪﺩﯨﻴﻠﯩﻚ ﻫﯧﺲ ﻗﯩﻠﻤﯩﻐﺎﻧﻠﯩﻘﯩﻨﻰ، ﺑﯘ ﻛﻪﻟﮕﯜﻟﯜﻛﻨﯩﯔ ﭘﻪﻗﻪﺕ ﺑﯩﺮ ﺭﻭﺷﻪﻧﮕﯜﻝ ﺋﺎﺋﯩﻠﯩﺴﯩﻨﯩﯔ ﺑﯧﺸﯩﻐﺎ ﻛﯧﻠﯩﺶ ﺑﯩﻠﻪﻥ ﭼﻪﻛﻠﯩﻨﯩﭗ ﻗﺎﻟﻤﺎﻳﺪﯨﻐﺎﻧﻠﯩﻘﯩﻨﻰ ، ﺑﻪﻟﻜﯩﻢ ﺑﺎﺭﻟﯩﻖ ﺋﯘﻳﻐﯘﺭ ﺋﺎﺋﯩﻠﯩﺴﻰ ﺋﻪﺯﺍﺳﯩﻨﯩﯔ ﺑﯧﺸﯩﻐﺎ ﻛﯧﻠﯩﺸﻰ ﻣﯘﻣﻜﯩﻨﻠﯩﻜﯩﻨﻰ ، ﺷﯘﯕﺎ ﭼﻪﺗﺌﻪﻟﺪﯨﻜﻰ ﺋﯘﻳﻐﯘﺭ ﺗﻪﺷﻜﯩﻼﺗﻠﯩﺮﻯ ﭼﻮﻗﯘﻡ ﺑﯘ ﻫﻪﻗﺘﻪ ﺑﯩﺮ ﺗﻪﺩﺑﯩﺮ ﺋﯧﻠﯩﺸﻰ ﻻﺯﯨﻤﻠﯩﻘﯩﻨﻰ ﺑﯩﻠﺪﯛﺭﺩﻯ.