“Irpan” shirkiti “Qutadghu bilik” ning awazliq nusxisini dunyagha keltürdi

Uyghur medeniyet tarixidiki ölmes abide “Qutadghu bilik” ning awazliq nusxisining yéqinda resmiy neshr qilinip tarqitilishi Uyghur aptonom rayonidiki ilim sahesidikiler arisida zor tesir peyda qilghan.
Ixtiyariy muxbirimiz qutlan
2012.12.31
qutadghu-bilik-un-305.jpg “Irpan” éléktron cheklik shirkitining pilanlishi, meblegh sélishi we neshrge teyyarlishi bilen béyjing milletler neshriyatida neshr qildurghan “Qutadghu bilik” ning awazliq nusxisining qap körünüshi. 2012-Yili.
RFA

Uyghur tor betliri tarqatqan xewerlerge qarighanda, 14-dékabir küni ürümchidiki xelq sariyida minglighan Uyghur ziyaliyliri we bilim ademlirining jem bolushi bilen “Qutadghu bilik” ning awazliq nusxisini tarqitish murasimi ötküzülgen. Murasimda medeniyet we edebiyat-sen'et sahesidiki közge körün'gen tetqiqatchilar pikir bayan qilip, nöwette Uyghur ilim saheside meydan'gha kelgen bu yéngiliqni tebrikligen.

Bu qétimqi “Qutadghu bilik” ning awazliq nusxisi ürümchi “Irpan” éléktron cheklik shirkitining pilanlishi, meblegh sélishi we neshrge teyyarlishi bilen k d we d w d sheklide yoruqluqqa chiqqan. “Irpan” shirkiti “Qutadghu bilik” ning 1991-yili neshr qilin'ghan Uyghurche nesriy yeshmisige asasen 17 sa'etlik awazliq nusxisini teyyarlap béyjingdiki milletler neshriyatida neshr qildurghan. Mezkur nusxining tékistini Uyghur rayonidiki dangliq awaz artisi abduqéyyum imin yuqiri maharet bilen oqup chiqqan. Yuqiri süpet we ilmiy ölchem boyiche yéngidin neshr qilin'ghan bu awazliq eser, nöwette Uyghur élining herqaysi jayliridiki “Irpan” shirkitining sétish nuqtilirida bazargha sélinmaqta iken. Bu heqte ziyaritimizni qobul qilghan pezilet xanim munularni bildürdi.

Ürümchi “Irpan” éléktron cheklik shirkiti abdulla ömerning tirishchanliqi bilen 2003-yili 14-dékabirda qurulghan bolup, özining tunji qedimini Uyghur tilidiki éléktron lughitini layihilesh we bazargha sélish bilen bashlighan. Shundin kéyin qisqighina 9 yil jeryanida bu shirket Uyghurche, in'glizche, xitayche, rusche, qazaqche, qirghizche, türkche, erebche we yaponche toqquz xil tilda éléktronluq lughetlerni ishlep bazargha salghan hemde Uyghur rayonidiki istémalchilarning qarshi élishigha sazawer bolghan.

“Irpan” shirkiti bu jeryanda Uyghurlarning klassik bilim bayliqini qézish we uni zamaniwi pen-téxnika bilen qayta yoruqluqqa chiqirish jehette zor tirishchanliq körsetken. 2008-Yili mahmud kashigheri tughulghanliqining 1000 yilliqigha atap “Diwani lughetit türk” ning 4 tildiki nusxisini irpan éléktron lughitige kirgüzgen. 2009-Yili Uyghur tilidiki tunji “Lughetlik yanfon” ni ishlep bazargha salghan. 2010-Yiligha kelgende bolsa meshghulat tili we sistémisi Uyghurche bolghan “Irpan herdem kompyutéri”ni ishlep bu sahediki boshluqni toldurghan. Nöwette “Irpan” shirkiti yenimu ilgiriligen halda Uyghur ma'aripi, edebiyat-sen'iti we medeniyiti saheside qollinishchanliqi yuqiri bolghan éléktronluq mehsulatlarni ishlepchiqirish bilen shughullanmaqta iken.

Bu yil 14-dékabirda ürümchidiki xelq sariyida tarqitish murasimi ötküzülgen “Qutadghu bilik” ning awazliq nusxisi “Irpan” shirkitining 9 yilliq tughulghan künige béghishlap öz xelqige sun'ghan sowghiti iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.