ﭘﯘﺗﯩﻦ ﻛﺮﯦﻤﯩﻞ ﺳﺎﺭﯨﻴﯩﺪﯨﻜﻰ ﺋﯩﺸﺨﺎﻧﯩﺴﯩﻨﻰ 42 ﻳﺎﺷﻠﯩﻖ ﺩﻣﯩﺘﺮﯨﻲ ﻣﯧﺪﯞﯦﺪﯦﯟﻗﺎ ﺋﯚﺗﻜﯜﺯﯛﭖ ﺑﻪﺭﺩﻯ. ﺋﻪﻣﻤﺎ، ﻣﻪﺯﻛﯘﺭ ﻳﯧﯖﻰ ﭘﺮﯦﺰﯨﺪﯦﻨﺖ ﺷﯘ ﻛﯜﻧﯩﻼ ﭘﯘﺗﯩﻨﻨﻰ ﺑﺎﺵ ﻣﯩﻨﯩﺴﺘﯩﺮﻟﯩﻘﻘﺎ ﻛﯚﺭﺳﻪﺗﻜﻪﻥ.

ﻗﻪﺳﻪﻣﻴﺎﺩ ﻣﯘﺭﺍﺳﯩﻤﻰ

ﺳﻮﯞﯦﺖ ﺋﯩﺘﺘﯩﭙﺎﻗﻰ ﭘﺎﺭﭼﯩﻼﻧﻐﺎﻧﺪﯨﻦ ﻛﯧﻴﯩﻨﻜﻰ 17 ﻳﯩﻠﻠﯩﻖ ﺭﯗﺳﯩﻴﻪ ﺳﯩﻴﺎﺳﯩﻲ ﺗﺎﺭﯨﺨﻰ ﺑﯜﮔﯜﻥ ﻳﯧﯖﻰ ﺳﻪﻫﯩﭙﻪ ﺑﯩﻠﻪﻥ ﻳﯧﺰﯨﻠﺪﻯ. 70 ﻳﯩﻠﻠﯩﻖ ﺳﻮﯞﯦﺖ ﺋﯩﻤﭙﯧﺮﯨﻴﯩﺴﯩﻨﻰ ﻏﻮﻟﯩﺘﯩﭗ، ﺭﯗﺳﯩﻴﻪ ﺗﺎﺭﯨﺨﯩﺪﯨﻜﻰ ﺗﯘﻧﺠﻰ ﭘﺮﯦﺰﯨﺪﯦﻨﺖ ﺑﻮﻟﻐﺎﻥ ﺑﻮﺭﯨﺲ ﻳﯧﻠﺘﺴﯩﻨﺪﯨﻦ ﻛﯧﻴﯩﻦ ﺗﻪﺧﺘﻜﻪ ﭼﯩﻘﯩﭗ، 8 ﻳﯩﻞ ﺑﯘ ﺩﯙﻟﻪﺗﻨﻰ ﺋﯩﺪﺍﺭﻩ ﻗﯩﻠﻐﺎﻥ 55 ﻳﺎﺷﻠﯩﻖ ﯞﻻﺩﯨﻤﯩﺮ ﭘﯘﺗﯩﻦ ﭼﺎﺭﺷﻪﻧﺒﻪ ﻛﯜﻧﻰ ﭘﺮﯦﺰﯨﺪﯦﻨﺘﻠﯩﻖ ﻫﻮﻗﯘﻗﯩﻨﻰ ﺩﻣﯩﺘﺮﯨﻲ ﻣﯧﺪﯞﯦﺪﯦﯟﻗﺎ ﺗﺎﭘﺸﯘﺭﺩﻯ.

ﺑﯘ ﻳﯩﻞ 3 - ﺋﺎﻳﺪﺍ ﭘﺮﯦﺰﯨﺪﯦﻨﺘﻠﯩﻘﻘﺎ ﺳﺎﻳﻼﻧﻐﺎﻥ ﺩﻣﯩﺘﺮﯨﻲ ﻣﯧﺪﯞﯦﺪﯦﯟﻧﯩﯔ ﻗﻪﺳﻪﻡ ﺑﯧﺮﯨﭗ، ﯞﻩﺯﯨﭙﻪ ﺗﺎﭘﺸﯘﺭﯗﯞﯦﻠﯩﺶ ﻣﯘﺭﺍﺳﯩﻤﻰ 7 - ﻣﺎﻱ ﻛﯜﻧﻰ ﻛﺮﯦﻤﯩﻞ ﺳﺎﺭﯨﻴﯩﺪﯨﻜﻰ ﺋﺎﻧﺪﺭﯦﻴﯧﯟﺳﻜﯩﻲ ﺯﺍﻟﯩﺪﺍ ﺋﯚﺗﻜﯜﺯﯛﻟﺪﻯ.

ﺭﯗﺳﯩﻴﯩﻨﯩﯔ "ﻧﻪﯞﺳﺮﯗ" ﺋﯘﭼﯘﺭ ﺗﻮﺭﯨﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﺭﯗﺳﯩﻴﻪ ﺑﺎﻳﺮﺍﻗﻠﯩﺮﻯ ﺋﯧﺴﯩﻠﻐﺎﻥ، ﺭﯗﺳﯩﻴﯩﻨﯩﯔ ﺋﻪﻧﺌﻪﻧﯩﯟﻯ ﻫﻪﺭﺑﯩﻲ ﻓﻮﺭﻣﯩﺴﯩﻨﻰ ﻛﯩﻴﮕﻪﻥ ﻫﯚﺭﻣﻪﺕ ﻗﺎﺭﺍﯞﯗﻟﻠﯩﺮﻯ ﻗﻮﻏﺪﺍﯞﺍﺗﻘﺎﻥ ﻛﺎﺭﯨﺪﻭﺭﺩﯨﻦ ﺋﯚﺗﻜﻪﻥ ﺩﻣﯩﺘﺮﯨﻲ ﻣﯧﺪﯞﯦﺪﯦﯟ ﺋﺎﻧﺪﺭﯦﻴﯧﯟﺳﻜﯩﻲ ﺯﺍﻟﯩﻐﺎ ﻛﯩﺮﯨﭗ ﻛﻪﻟﮕﻪﻧﺪﻩ ﺋﯩﻜﻜﻰ ﺗﻪﺭﻩﭘﻜﻪ ﺗﻮﭘﻼﻧﻐﺎﻥ ﻣﯘﺭﺍﺳﯩﻢ ﻗﺎﺗﻨﺎﺷﻘﯘﭼﯩﻠﯩﺮﯨﻨﯩﯔ ﮔﯜﻟﺪﯛﺭﺍﺱ ﺋﺎﻟﻘﯩﺸﻠﯩﺮﻯ ﻫﻪﻡ ﻣﯘﺯﯨﻜﺎ ﺳﺎﺩﺍﻟﯩﺮﻯ ﺋﯩﭽﯩﺪﻩ ﺗﯧﺰ ﻗﻪﺩﻩﻡ ﺗﺎﺷﻼﭖ، ﻣﯘﻧﺒﻪﺭﮔﻪ ﭼﯩﻘﺘﻰ ﻫﻪﻣﺪﻩ ﭘﯘﺗﯩﻨﻨﯩﯔ ﻗﯩﺴﻘﺎ ﺳﯚﺯﯨﺪﯨﻦ ﻛﯧﻴﯩﻦ، ﺑﯩﺮ ﻗﻮﻟﯩﺪﺍ ﺭﯗﺳﯩﻴﻪ ﺋﺎﺳﺎﺳﯩﻲ ﻗﺎﻧﯘﻧﻰ ﺗﯘﺗﯘﭖ ﺗﯘﺭﯗﭖ، " ﻗﻪﺳﻪﻡ ﺑﯧﺮﯨﻤﻪﻧﻜﻰ، ﺭﯗﺳﯩﻴﻪ ﻓﯧﺪﯦﺮﺍﺗﺴﯩﻴﯩﺴﯩﻨﯩﯔ ﭘﺮﯦﺰﯨﺪﯦﻨﺘﻠﯩﻖ ﯞﻩﺯﯨﭙﯩﺴﯩﻨﻰ ﺋﺎﺗﻘﯘﺭﯗﺵ ﺟﻪﺭﻳﺎﻧﯩﺪﺍ ﭘﯘﻗﺮﺍﻻﺭﻧﯩﯔ ﺋﻪﺭﻛﯩﻨﻠﯩﻜﻰ، ﻫﻮﻗﯘﻗﻠﯩﺮﯨﻨﻰ ﻫﯚﺭﻣﻪﺕ ﻗﯩﻠﯩﻤﻪﻥ ﻫﻪﻡ ﻗﻮﻏﺪﺍﻳﻤﻪﻥ، ﺭﯗﺳﯩﻴﻪ ﻓﯧﺪﯦﺮﺍﺗﺴﯩﻴﯩﺴﯩﻨﯩﯔ ﺋﺎﺳﺎﺳﯩﻲ ﻗﺎﻧﯘﻧﯩﻨﻰ ﻗﻮﻏﺪﺍﻳﻤﻪﻥ، ﺭﯗﺳﯩﻴﯩﻨﯩﯔ ﻣﯘﺳﺘﻪﻗﯩﻠﻠﯩﻘﻰ، ﺑﯩﺨﻪﺗﻪﺭﻟﯩﻜﻰ ﯞﻩ ﺯﯦﻤﯩﻦ ﭘﯜﺗﯜﻧﻠﯜﻛﯩﻨﻰ ﻗﻮﻏﺪﺍﭖ، ﺧﻪﻟﻖ ﺋﯜﭼﯜﻥ ﺳﺎﺩﺍﻗﻪﺗﻤﻪﻧﻠﯩﻚ ﺑﯩﻠﻪﻥ ﺧﯩﺰﻣﻪﺕ ﻗﯩﻠﯩﻤﻪﻥ" ﺩﻩﭖ ﻗﻪﺳﻪﻣﻴﺎﺩ ﻗﯩﻠﺪﻯ.

ﭘﺮﯦﺰﯨﺪﯦﻨﺖ ﺩﻣﯩﺘﺮﯨﻲ ﻣﯧﺪﯞﯦﺪﯦﯟ ﻧﯘﻗﺘﯩﺪﺍ ﻳﻪﻧﻪ، ﺋﯘ ﺋﯚﺯﯨﻨﯩﯔ 8 ﻳﯩﻠﻠﯩﻖ ﻣﯚﻫﻠﻪﺕ ﺋﯩﭽﯩﺪﻩ ﺗﻮﭘﻼﻧﻐﺎﻥ ﻛﯜﭼﻠﯜﻙ ﺋﺎﺳﺎﺳﻘﺎ ﺗﺎﻳﯩﻨﯩﭗ ﺗﯘﺭﯗﭖ، ﺭﯗﺳﯩﻴﯩﻨﻰ ﺩﯗﻧﻴﺎﺩﯨﻜﻰ ﻗﯘﺩﺭﻩﺗﻠﯩﻚ ﺩﯙﻟﻪﺕ ﻗﯩﻠﯩﭗ ﻗﯘﺭﯗﭖ ﭼﯩﻘﯩﺪﯨﻐﺎﻧﻠﯩﻘﯩﻨﻰ ﺟﺎﻛﺎﺭﻻﭖ، " ﺭﯗﺳﯩﻴﯩﻨﻰ ﺩﯗﻧﻴﺎﺩﯨﻜﻰ ﻗﯘﺩﺭﻩﺗﻠﯩﻚ ﺩﯙﻟﻪﺕ ﻗﯩﻠﯩﭗ ﻗﯘﺭﯗﭖ ﭼﯩﻘﯩﺶ ﺑﯩﺰﻧﯩﯔ ﺋﯩﺴﺘﺮﺍﺗﯧﮕﯩﻴﯩﻤﯩﺰ ﯞﻩ ﺑﯩﺰﻧﯩﯔ ﺑﯘﻧﯩﯖﺪﯨﻦ ﻛﯧﻴﯩﻨﻜﻰ ﺳﯩﻴﺎﺳﯩﻲ ﻳﯚﻧﯩﻠﯩﺸﯩﻤﯩﺰ" ﺩﻩﻳﺪﯗ. ﺋﯘ ﻳﻪﻧﻪ ﺩﯙﻟﻪﺗﻨﯩﯔ ﻗﺎﻧﯘﻥ - ﺗﯜﺯﯛﻣﻠﯩﺮﯨﻨﻰ ﭼﯩﯖﯩﺘﯩﭗ، ﭼﯩﺮﯨﻜﻠﯩﻜﻜﻪ ﺯﻩﺭﺑﻪ ﺑﯧﺮﯨﺪﯨﻐﺎﻧﻠﯩﻘﻰ ﻫﻪﻣﺪﻩ ﺧﻪﻟﻘﻨﯩﯔ ﺗﯘﺭﻣﯘﺵ ﭘﺎﺭﺍﯞﺍﻧﻠﯩﻘﯩﻨﻰ ﻛﺎﭘﺎﻟﻪﺗﻜﻪ ﺋﯩﮕﻪ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻥ.

 ﻗﻪﺳﻪﻡ ﺑﯧﺮﯨﺶ ﻣﯘﺭﺍﺳﯩﻤﯩﺪﺍ ﺳﺎﺑﯩﻖ ﭘﺮﯦﺰﯨﺪﯦﻨﺖ ﭘﯘﺗﯩﻨﻤﯘ ﻗﯩﺴﻘﺎ ﻧﯘﺗﯘﻕ ﺳﯚﺯﻟﻪﭖ، ﻣﯧﺪﯞﯦﺪﯦﯟﻧﯩﯔ ﺋﯘﻧﯩﯔ 8 ﻳﯩﻠﺪﯨﻦ ﺑﯘﻳﺎﻥ ﺩﺍﯞﺍﻣﻼﺷﺘﯘﺭﯗﭖ ﻛﯧﻠﯩﯟﺍﺗﻘﺎﻥ ﺳﯩﻴﺎﺳﯩﺘﯩﻨﻰ ﺩﺍﯞﺍﻣﻼﺷﺘﯘﺭﯨﺪﯨﻐﺎﻧﻠﯩﻘﯩﻨﻰ ﺋﻪﺳﻜﻪﺭﺗﯩﺶ ﺑﯩﻠﻪﻥ ﺑﯩﺮﮔﻪ ﺋﯚﺯﯨﻨﯩﯔ 8 ﻳﯩﻞ ﺋﯩﭽﯩﺪﯨﻜﻰ ﺳﯩﻴﺎﺳﻪﺗﻠﻪﺭﻧﯩﯔ ﺗﻮﻏﺮﺍ ﺑﻮﻟﻐﺎﻧﻠﯩﻘﯩﻨﻰ ﻫﻪﻣﺪﻩ ﺑﯘ ﻗﯧﺘﯩﻤﻘﻰ ﻫﻮﻗﯘﻕ ﺗﺎﭘﺸﯘﺭﯗﺷﻨﯩﯔ ﺭﯗﺳﯩﻴﻪ ﺋﯜﭼﯜﻥ ﻧﺎﻫﺎﻳﯩﺘﻰ ﻣﯘﻫﯩﻢ ﻗﻪﺩﻩﻡ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﻪﭖ، ﻣﯧﺪﯞﯦﺪﯦﯟﻗﺎ ﺋﯘﺗﯘﻕ ﺗﯩﻠﻪﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

"8 ﻳﯩﻞ ﺋﯩﻠﮕﯩﺮﻯ ﻣﻪﻥ ﺑﯩﺮﯨﻨﭽﻰ ﻗﯧﺘﯩﻢ ﭘﺮﯦﺰﯨﺪﯦﻨﺘﻠﯩﻘﻘﺎ ﻗﻪﺳﻪﻡ ﺑﻪﺭﮔﻪﻧﺪﯨﻦ ﺑﯘﻳﺎﻥ ﺋﻮﭼﯘﻕ ﺋﺎﺷﻜﺎﺭﺍ، ﺳﻪﻣﯩﻤﯩﻲ ﻫﻪﻡ ﺳﺎﺩﺍﻗﻪﺗﻤﻪﻧﻠﯩﻚ ﺑﯩﻠﻪﻥ ﺧﻪﻟﻖ ﻫﻪﻡ ﺩﯙﻟﻪﺕ ﺋﯜﭼﯜﻥ ﺧﯩﺰﻣﻪﺕ ﻗﯩﻠﯩﺶ ﻣﻪﺟﺒﯘﺭﯨﻴﯩﺘﯩﻨﻰ ﺯﯨﻤﻤﻪﻣﮕﻪ ﺋﺎﻟﻐﺎﻥ ﺋﯩﺪﯨﻢ. ﻣﻪﻥ ﺋﯚﺯﻩﻣﻨﯩﯔ ﺑﯘ ﯞﻩﺩﯨﻠﯩﺮﯨﮕﻪ ﺧﯩﻼﭘﻠﯩﻖ ﻗﯩﻠﻤﯩﺪﯨﻢ" ﺩﻩﻳﺪﯗ ﭘﯘﺗﯩﻦ ﺳﯚﺯﯨﺪﻩ. ﻗﻪﺳﻪﻡ ﺑﯧﺮﯨﺶ ﻣﯘﺭﺍﺳﯩﻤﯩﻐﺎ 2000ﺩﯨﻦ ﺋﺎﺭﺗﯘﻕ ﻣﯧﻬﻤﺎﻥ ﻗﺎﺗﻨﺎﺷﻘﺎﻥ.

ﻣﯧﺪﯞﯦﺪﯦﯟ ﺭﯗﺳﯩﻴﻪ ﺗﺎﺭﯨﺨﯩﺪﯨﻜﻰ ﻳﺎﺵ ﭘﺮﯦﺰﯨﺪﯦﻨﺖ

ﻣﯧﺪﯞﯦﺪﯦﯟ ﺭﯗﺳﯩﻴﯩﻨﯩﯔ ﺑﻮﺭﯨﺲ ﻳﯧﻠﺘﺴﯩﻦ، ﯞﻻﺩﯨﻤﯩﺮ ﭘﯘﺗﯩﻨﺪﯨﻦ ﻛﯧﻴﯩﻨﻜﻰ 3 - ﭘﺮﯦﺰﯨﺪﯦﻨﺘﻰ ﺷﯘﻧﯩﯖﺪﻩﻙ 1917 - ﻳﯩﻠﯩﺪﯨﻦ ﻛﯧﻴﯩﻨﻜﻰ ﭘﯜﺗﯜﻥ ﺭﯗﺳﯩﻴﻪ ﺗﺎﺭﯨﺨﯩﺪﯨﻜﻰ ﺋﻪﯓ ﻳﺎﺵ ﭘﺮﯦﺰﯨﺪﯦﻨﺖ ﺑﻮﻟﯘﭖ ﻫﯧﺴﺎﺑﻠﯩﻨﯩﺪﯗ. ﺋﯘ، ﺑﯘ ﻳﯩﻞ 42 ﻳﺎﺷﻘﺎ ﻛﯩﺮﮔﻪﻥ ﺑﻮﻟﯘﭖ، ﺋﯘﺯﯗﻥ ﻣﻪﺯﮔﯩﻞ ﺳﺎﻧﻜﺘﭙﯧﺘﯧﺮﺑﯘﺭﮒ ﻫﯚﻛﯜﻣﯩﺘﯩﺪﻩ ﯞﻻﺩﯨﻤﯩﺮ ﭘﯘﺗﯩﻦ ﺑﯩﻠﻪﻥ ﺑﯩﺮﮔﻪ ﺋﯩﺸﻠﯩﮕﻪﻥ، ﻣﻪﻣﻠﯩﻜﻪﺕ ﺑﻮﻳﯩﭽﻪ ﭼﻮﯓ ﺳﻮﺩﺍ - ﺳﺎﻧﺎﺋﻪﺕ ﺷﯩﺮﻛﻪﺗﻠﯩﺮﯨﻨﻰ ﺑﺎﺷﻘﯘﺭﻏﺎﻥ ﻫﻪﻣﺪﻩ ﭘﯘﺗﯩﻦ ﺗﻪﺭﯨﭙﯩﺪﯨﻦ ﻣﯘﺋﺎﯞﯨﻦ ﺑﺎﺵ ﻣﯩﻨﯩﺴﺘﯩﺮ ﯞﻩﺯﯨﭙﯩﺴﯩﮕﻪ ﺗﻪﻳﯩﻨﻠﻪﻧﮕﻪﻥ ﺋﯩﺪﻯ.

ﻣﯧﺪﯞﯦﺪﯦﯟ ﺋﯚﺗﻜﻪﻥ ﻳﯩﻠﻰ ﭘﯘﺗﯩﻦ ﺗﻪﺭﯨﭙﯩﺪﯨﻦ ﺋﯚﺯﯨﻨﯩﯔ ﺋﯩﺰﺑﺎﺳﺎﺭﻯ ﺳﯜﭘﯩﺘﯩﺪﻩ ﺋﯧﻼﻥ ﻗﯩﻠﯩﻨﻐﺎﻧﺪﯨﻦ ﻛﯧﻴﯩﻦ، ﺑﯘ ﻳﯩﻞ 3 - ﺋﺎﻳﺪﯨﻜﻰ ﺳﺎﻳﻼﻣﺪﺍ ﻏﻪﻟﯩﺒﻪ ﻗﺎﺯﯨﻨﯩﭗ، %70 ﺋﺎﯞﺍﺯ ﺑﯩﻠﻪﻥ ﭘﺮﯦﺰﯨﺪﯦﻨﺘﻠﯩﻘﻘﺎ ﺳﺎﻳﻼﻧﻐﺎﻥ ﺋﯩﺪﻯ.

ﺧﯩﺘﺎﻱ ﻣﯧﺪﯞﯦﺪﯦﯟﻧﻰ ﻗﺎﺭﺷﻰ ﺋﺎﻟﺪﻯ

ﺩﻣﯩﺘﺮﯨﻲ ﻣﯧﺪﯞﯦﺪﯦﯟﻧﻰ ﺗﯘﻧﺠﻰ ﺑﻮﻟﯘﭖ، ﺧﯩﺘﺎﻱ ﺭﻩﺋﯩﺴﻰ ﺧﯘ ﺟﯩﻨﺘﺎﯞ ﺗﻪﺑﺮﯨﻜﻠﯩﮕﻪﻥ ﺑﻮﻟﯘﭖ، ﺷﯩﻨﺨﯘﺍﻧﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﺧﯘ ﺟﯩﻨﺘﺎﯞ ﺗﻪﺑﺮﯨﻜﻨﺎﻣﯩﺴﯩﺪﻩ ﻣﯧﺪﯞﯦﺪﯦﯟﻧﻰ ﺗﻪﺑﺮﯨﻜﻠﻪﺵ ﺑﯩﻠﻪﻥ ﺑﯩﺮﮔﻪ ﻳﻪﻧﻪ ﺟﯘﯕﮕﻮ ﺑﯩﻠﻪﻥ ﺭﯗﺳﯩﻴﯩﻨﯩﯔ ﭼﻮﯓ ﻗﻮﺷﻨﺎ ﺩﯙﻟﻪﺗﻠﻪﺭ ﺋﯩﻜﻪﻧﻠﯩﻜﻰ، ﺋﯘﻻﺭﻧﯩﯔ ﺋﯚﺯﺍﺭﺍ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﻣﯘﻧﺎﺳﯩﯟﻩﺗﻠﯩﺮﯨﻨﯩﯔ ﺩﺍﯞﺍﻣﻠﯩﻖ ﻛﯜﭼﯩﻴﯩﯟﺍﺗﻘﺎﻧﻠﯩﻘﻰ ﻫﻪﻣﺪﻩ ﺑﯘﻧﯩﯔ ﺋﯩﻜﻜﻰ ﺩﯙﻟﻪﺕ ﺧﻪﻟﻘﻠﯩﺮﯨﻨﯩﯔ ﻣﻪﻧﭙﻪﺋﻪﺗﻠﯩﺮﯨﮕﻪ ﺋﯘﻳﻐﯘﻥ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﻪﺵ ﺑﯩﻠﻪﻥ ﺑﯩﺮﮔﻪ ﺋﯚﺯﯨﻨﯩﯔ ﺑﯘﻧﯩﯖﺪﯨﻦ ﻛﯧﻴﯩﻦ ﺩﺍﯞﺍﻣﻠﯩﻖ ﺗﯜﺭﺩﻩ ﺋﯘﻧﯩﯔ ﺑﯩﻠﻪﻥ ﻫﻪﻣﻜﺎﺭﻟﯩﺸﯩﭗ، ﺟﯘﯕﮕﻮ - ﺭﯗﺳﯩﻴﻪ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﻣﯘﻧﺎﺳﯩﯟﻩﺗﻠﯩﺮﯨﻨﻰ ﺗﯧﺨﯩﻤﯘ ﻳﯘﻗﯩﺮﻯ ﺳﻪﯞﯨﻴﯩﮕﻪ ﻛﯚﺗﯜﺭﯛﺷﻜﻪ ﺗﯩﺮﯨﺸﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻥ.

ﻣﯧﺪﯞﯦﺪﯦﯟ ﺷﯘ ﻛﯜﻧﻰ ﭘﯘﺗﯩﻨﻨﯩﯔ ﺑﺎﺵ ﻣﯩﻨﯩﺴﺘﯩﺮ ﻧﺎﻣﺰﺍﺗﻰ ﺋﯩﻜﻪﻧﻠﯩﻜﯩﻨﻰ ﺟﺎﻛﺎﺭﻟﯩﺪﻯ

ﺭﯗﺳﯩﻴﻪ ﭘﺮﯦﺰﯨﺪﯦﻨﺖ ﺋﺎﺧﺒﺎﺭﺍﺕ ﺋﯩﺪﺍﺭﯨﺴﯩﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﻳﯧﯖﻰ ﭘﺮﯦﺰﯨﺪﯦﻨﺖ ﺩﯨﻤﯩﺘﺮﯨﻲ ﻣﯧﺪﯞﯦﺪﯦﯟ ﺷﯘ ﻛﯜﻧﯩﻼ ﯞﻻﺩﯨﻤﯩﺮ ﭘﯘﺗﯩﻨﻨﻰ ﺑﯩﺮﯨﻨﭽﻰ ﻧﯚﯞﻩﺗﻠﯩﻚ ﺑﺎﺵ ﻣﯩﻨﯩﺴﺘﯩﺮ ﻧﺎﻣﺰﺍﺗﻰ ﻗﯩﻠﯩﭗ ﻛﯚﺭﺳﻪﺗﻜﻪﻥ. ﺋﻪﮔﻪﺭ ﻣﯧﺪﯞﯦﺪﯦﯟ ﭘﺮﯦﺰﯨﺪﯦﻨﺖ ﺑﻮﻟﺴﺎ، ﯞﻻﺩﯨﻤﯩﺮ ﭘﯘﺗﯩﻨﻨﯩﯔ ﺑﺎﺵ ﻣﯩﻨﯩﺴﺘﯩﺮﻯ ﺑﻮﻟﯩﺪﯨﻐﺎﻧﻠﯩﻘﻰ ﺋﯩﻠﮕﯩﺮﯨﻼ ﺑﯧﻜﯩﺘﯩﻠﯩﭗ ﺑﻮﻟﯘﻧﻐﺎﻥ ﺑﻮﻟﯘﭖ، ﺑﯘﻧﻰ ﻫﻪﺗﺘﺎ ﻣﯧﺪﯞﯦﺪﯦﯟ ﺋﯚﺯﯨﻤﯘ ﺑﯩﯟﺍﺳﯩﺘﻪ ﺑﯩﻠﺪﯛﺭﮔﻪﻥ ﺋﯩﺪﻯ.

ﺩﯦﻤﻪﻙ، ﺭﯗﺳﯩﻴﻪ ﺋﺎﺳﺎﺳﯩﻲ ﻗﺎﻧﯘﻧﻰ ﺑﻮﻳﯩﭽﻪ 3 - ﻗﯧﺘﯩﻢ ﭘﺮﯦﺰﯨﺪﯦﻨﺖ ﺑﻮﻟﯘﺵ ﻣﯘﻣﻜﯩﻨﭽﯩﻠﯩﻜﻰ ﺑﻮﻟﻤﯩﻐﺎﻧﻠﯩﻘﯩﻐﺎ ﻗﺎﺭﯨﻤﺎﻱ، ﭘﯘﺗﯩﻦ ﺋﻪﻣﺪﻯ ﺑﺎﺵ ﻣﯩﻨﯩﺴﺘﯩﺮﻟﯩﻖ ﺳﺎﻻﻫﯩﻴﯩﺘﻰ ﺑﯩﻠﻪﻥ ﭘﺮﯦﺰﯨﺪﯦﻨﺖ ﻣﯧﺪﯞﯦﺪﯦﯟ ﺑﯩﻠﻪﻥ ﺑﯩﺮﻟﯩﻜﺘﻪ ﺭﯗﺳﯩﻴﯩﻨﻰ ﺋﯩﺪﺍﺭﻩ ﻗﯩﻠﯩﺸﻰ ﻣﯘﻣﻜﯩﻦ. ﻛﯚﺯﻩﺗﻜﯜﭼﯩﻠﻪﺭ ﻫﻪﺗﺘﺎ، ﺭﯗﺳﯩﻴﯩﻨﯩﯔ ﺋﯩﭽﻜﻰ - ﺗﺎﺷﻘﻰ ﺳﯩﻴﺎﺳﯩﺘﻰ ﻳﻪﻧﯩﻼ ﻣﯧﺪﯞﯦﺪﯦﯟﻗﺎ ﻗﺎﺭﯨﻐﺎﻧﺪﺍ، ﭘﯘﺗﯩﻦ ﺑﯩﻠﻪﻥ ﺑﻪﻛﺮﻩﻙ ﺑﺎﻏﻠﯩﻖ ﺑﻮﻟﯘﭖ ﻗﯧﻠﯩﺸﻰ ﻣﯘﻣﻜﯩﻨﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﺷﻤﺎﻗﺘﺎ.

ﻣﯧﺪﯞﯦﺪﯦﯟﻣﯘ ﭘﯘﺗﯩﻨﻨﯩﯔ ﺋﯩﭽﻜﻰ - ﺗﺎﺷﻘﻰ ﺳﯩﻴﺎﺳﻪﺗﻠﯩﺮﯨﻨﯩﯔ ﺩﺍﯞﺍﻣﻠﯩﺸﯩﺪﯨﻐﺎﻧﻠﯩﻘﯩﻨﻰ ﺋﯩﺰﭼﯩﻞ ﺗﻪﻛﯩﺘﻠﯩﮕﻪﻥ ﺋﯩﺪﻯ. ﻗﺎﺭﯨﻐﺎﻧﺪﺍ، ﻣﯧﺪﯞﯦﺪﯦﯟ ﺩﻩﯞﺭﯨﺪﻩ ﺭﯗﺳﯩﻴﯩﻨﯩﯔ ﺧﯩﺘﺎﻳﻐﺎ ﻗﺎﺭﺍﺗﻘﺎﻥ ﺳﯩﻴﺎﺳﻪﺗﻠﯩﺮﻯ ﭘﯘﺗﯩﻦ ﺩﻩﯞﺭﯨﮕﻪ ﺋﻮﺧﺸﺎﺵ ﻫﺎﻟﺪﺍ ﺩﺍﯞﺍﻣﻠﯩﺸﯩﺪﯗ، ﺟﯜﻣﻠﯩﺪﯨﻦ ﺭﯗﺳﯩﻴﯩﻨﯩﯔ ﺋﯘﻳﻐﯘﺭﻻﺭ ﻣﻪﺳﯩﻠﯩﺴﯩﺪﯨﻜﻰ ﻣﻪﻳﺪﺍﻧﯩﺪﺍ ﺋﯚﺯﮔﯩﺮﯨﺶ ﺑﻮﻟﻤﺎﺳﻠﯩﻘﻰ ﻣﯘﻣﻜﯩﻦ.