ﺋﯩﭙﺘﺎﺭ ﭘﺎﺋﺎﻟﯩﻴﯩﺘﯩﮕﻪ ﺷﯩﯟﯦﺘﺴﯩﻴﻪ ﭘﺎﺭﻻﻣﯧﻨﺘﯩﻨﯩﯔ ﻣﯘﺋﺎﯞﯨﻦ ﺑﺎﺷﻠﯩﻘﻰ ﺑﯧﺮﮔﯩﺘﺘﺎ ﺳﯧﻠﻠﯧﻦ ﺧﺎﻧﯩﻢ ﯞﻩ ﺑﯩﺮ ﻗﯩﺴﯩﻢ ﭘﺎﺭﻻﻣﯧﻨﺖ ﺋﻪﺯﺍﻟﯩﺮﯨﺪﯨﻦ ﺳﯩﺮﺕ، ﺷﯩﯟﯦﺘﺴﯩﻴﯩﺪﻩ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﻫﻪﺭ ﻗﺎﻳﺴﻰ ﻣﯘﺳﯘﻟﻤﺎﻥ ﺋﻪﻟﻠﯩﺮﻯ ﺗﻪﺷﻜﯩﻼﺗﻠﯩﺮﯨﻨﯩﯔ ﯞﻩﻛﯩﻠﻠﯩﺮﻯ ﺑﻮﻟﯘﭖ ﻳﯜﺯﺩﯨﻦ ﺋﺎﺭﺗﯘﻕ ﻛﯩﺸﻰ ﻗﺎﺗﻨﺎﺷﺘﻰ. ﭘﺎﺋﺎﻟﯩﻴﻪﺕ ﺋﯩﭙﺘﺎﺭ ﺋﯜﭼﯜﻥ ﺋﯧﻴﺘﯩﻠﻐﺎﻥ ﺋﻪﺯﺍﻥ ﺋﺎﯞﺍﺯﻯ ﺑﯩﻠﻪﻥ ﻳﯜﺯ ﺋﺎﭼﺘﻰ.

ﭘﺎﺋﺎﻟﯩﻴﻪﺕ ﺟﻪﺭﻳﺎﻧﯩﺪﺍ ﺷﯩﯟﯦﺘﺴﯩﻴﻪ ﭘﺎﺭﻻﻣﯧﻨﺘﯩﻨﯩﯔ ﻣﯘﺋﺎﯞﯨﻦ ﺑﺎﺷﻠﯩﻘﻰ ﺑﯧﺮﮔﯩﺘﺘﺎ ﺳﯧﻠﻠﯧﻦ ﺧﺎﻧﯩﻢ ﺳﯚﺯﮔﻪ ﭼﯩﻘﯩﭗ ﺷﯩﯟﯦﺘﺴﯩﻴﯩﺪﻩ ﻳﺎﺷﺎﯞﺍﺗﻘﺎﻥ ﻣﯘﺳﯘﻟﻤﺎﻧﻼﺭﻧﯩﯔ ﺟﯜﻣﻠﯩﺪﯨﻦ ﺋﯘﻳﻐﯘﺭ ﻣﯘﺳﯘﻟﻤﺎﻧﻠﯩﺮﯨﻨﯩﯔ ﺭﺍﻣﯩﺰﺍﻧﯩﻨﻰ ﺗﻪﺑﺮﯨﻜﻠﯩﺪﻯ.

ﺑﯧﺮﮔﯩﺘﺘﺎ ﺳﯧﻠﻠﯧﻦ ﺧﺎﻧﯩﻢ ﺳﯚﺯﯨﻨﯩﯔ ﺋﺎﺧﯩﺮﯨﺪﺍ ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﯩﭗ، ﺋﯘﻳﻐﯘﺭﻻﺭ ﻫﻪﻗﻘﯩﺪﻩ ﺳﻮﺭﯨﻐﺎﻥ ﺳﻮﺋﺎﻟﻠﯩﺮﯨﻤﯩﺰﻏﺎ ﺟﺎﯞﺍﺏ ﺑﻪﺭﺩﻯ. ﺋﯘ ﻣﯘﻧﺪﺍﻕ ﺩﻩﻳﺪﯗ: "ﻣﻪﻥ ﺋﯘﻳﻐﯘﺭﻻﺭ ﻫﻪﻗﻘﯩﺪﻩ ﮔﯧﺰﯨﺘﻼﺭﺩﺍ ﺋﻮﻗﯘﻏﺎﻥ ﯞﻩ ﺗﯧﻠﯩﯟﯨﺰﻭﺭﻻﺭﺩﺍ ﻛﯚﺭﮔﻪﻥ ﺋﯘﭼﯘﺭﻻﺭﺩﯨﻦ ﺑﺎﺷﻘﺎ ﻛﯚﭖ ﭼﯜﺷﻪﻧﭽﯩﮕﻪ ﺋﯩﮕﻪ ﺋﻪﻣﻪﺱ ﺋﯩﺪﯨﻢ. ﺑﯜﮔﯜﻥ ﺋﯩﭙﺘﺎﺭ ﭘﺎﺋﺎﻟﯩﻴﺘﯩﺪﻩ ﺋﯘﻳﻐﯘﺭﻻﺭ ﺑﯩﻠﻪﻥ ﺑﯩﯟﺍﺳﺘﻪ ﺋﯘﭼﺮﯨﺸﯩﭗ، ﺗﻪﻣﻠﯩﻚ ﻫﻪﺭ ﺧﯩﻞ ﺗﺎﻣﺎﻗﻠﯩﺮﯨﻨﻰ ﺗﯧﺘﯩﭗ ﺋﯘﻳﻐﯘﺭﻻﺭ ﻫﻪﻗﻘﯩﺪﯨﻜﻰ ﭼﯜﺷﻪﻧﭽﻪﻡ ﺗﯧﺨﯩﻤﯘ ﭼﻮﯕﻘﯘﺭﻻﺷﺘﻰ. ﻣﺎﯕﺎ ﺳﻮﻏﺎ ﻗﯩﻠﯩﻨﻐﺎﻥ ﺑﯘ ﻛﯚﻙ ﺷﺎﺭﭘﺎ ﺋﯘﻳﻐﯘﺭﻻﺭﻧﯩﯔ ﺑﺎﻳﺮﯨﻘﯩﻨﯩﯔ ﺳﯩﻤﯟﻭﻟﻰ ﺋﯩﻜﻪﻥ، ﻣﻪﻥ ﺑﯘ ﺳﻮﻏﯩﺪﯨﻦ ﺷﯘﻧﭽﯩﻠﯩﻚ ﺧﯘﺭﺳﻪﻥ ﺑﻮﻟﺪﯗﻡ. ﺋﯘﻳﻐﯘﺭﻻﺭ ﻫﻪﻗﻘﯩﺪﯨﻜﻰ ﺳﻮﺋﺎﻟﻼﺭ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻘﯩﻐﺎ ﺩﺍﺋﯩﺮ ﺋﯩﺸﻼﺭ ﺑﻮﻟﻐﺎﻧﻠﯩﻘﻰ ﺋﯜﭼﯜﻥ، ﺋﯘﻻﺭﻧﯩﯔ ﻗﺎﻧﺪﺍﻕ ﺧﯩﺰﻣﻪﺗﻠﻪﺭﺩﻩ ﺑﻮﻟﯘﯞﺍﺗﻘﺎﻧﻠﯩﻘﻰ ﻣﺎﯕﺎ ﻧﺎﻣﻪﻟﯘﻡ، ﺋﻪﻣﻤﺎ ﭘﺎﺕ ﻳﯧﻘﯩﻨﺪﺍ ﺷﯩﯟﯦﺘﺴﯩﻴﯩﻪ ﭘﺎﺭﻻﻣﯧﻨﺘﯩﺪﺍ ﺋﯘﻳﻐﯘﺭ ﻣﻪﺳﯩﻠﯩﺴﯩﻨﯩﯔ ﻣﯘﺯﺍﻛﯩﺮﻩ ﻗﯩﻠﯩﻨﯩﺪﯨﻐﺎﻧﻠﯩﻘﻰ ﻣﺎﯕﺎ ﻣﻪﻟﯘﻡ، ﭼﯜﻧﻜﻰ ﻣﯧﻨﯩﯔ ﻣﻪﻣﻪﺕ ﻗﺎﭘﻼﻥ ﯞﻩ ﺑﺎﺷﻘﺎ ﺑﯩﺮ ﻗﯩﺴﻢ ﭘﺎﺭﻻﻣﯧﻨﺖ ﺋﻪﺯﺍﻟﯩﺮﯨﻨﯩﯔ ﺋﯘﻳﻐﯘﺭ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﭘﺎﺭﻻﻣﯧﻨﺘﻘﺎ ﺳﯘﻧﻐﺎﻥ ﺧﻪﺗﻠﯩﺮﯨﺪﯨﻦ ﺧﻪﯞﯨﺮﯨﻢ ﺑﺎﺭ."

ﺋﯩﭙﺘﺎﺭﻟﯩﻖ ﭘﺎﺋﺎﻟﯩﻴﻪﺗﻨﻰ ﺋﯘﻳﯘﺷﺘﯘﺭﯗﺷﻘﺎ ﻛﯚﭖ ﻛﯜﭺ ﭼﯩﻘﺎﺭﻏﺎﻥ ﺷﯩﯟﯦﺘﺴﯩﻴﻪ ﭘﺎﺭﻻﻣﯧﻨﺘﯩﻨﯩﯔ ﻳﯧﺸﯩﻠﻼﺭ ﭘﺎﺭﺗﯩﻴﯩﺴﯩﺪﯨﻦ ﺑﻮﻟﻐﺎﻥ ﭘﺎﺭﻻﻣﯧﻨﺖ ﺋﻪﺯﺍﺳﻰ ﻣﻪﻣﻪﺕ ﻗﺎﭘﻼﻥ ﺋﯩﭙﺘﺎﺭ ﺋﯩﺸﺘﯩﺮﺍﻛﭽﯩﻠﯩﺮﯨﻐﺎ ﺋﯘﻳﻐﯘﺭﻻﺭ ﺑﯜﮔﯜﻧﻜﻰ ﻛﯜﻧﺪﻩ ﺩﯗﭺ ﻛﯩﻠﯩﯟﺍﺗﻘﺎﻥ ﺳﯩﻴﺎﺳﻰ، ﺋﯩﻘﺘﯩﺴﺎﺩﻯ، ﻣﻪﺩﻩﻧﻰ ﯞﻩ ﺩﯨﻨﯩﻲ ﺟﻪﻫﻪﺗﺘﯩﻜﻰ ﺯﯗﻟﯘﻣﻼﺭﻧﻰ ﺳﯚﺯﻟﻪﭖ ﺋﯚﺗﺘﻰ ﯞﻩ ﺋﯘﻳﻐﯘﺭ ﺗﺎﻣﺎﻗﻠﯩﺮﯨﻨﻰ ﺋﯩﭙﺘﺎﺭ ﺋﯩﺸﺘﯩﺮﺍﻛﭽﯩﻠﯩﺮﯨﻐﺎ ﺗﻪﭘﺴﯩﻠﯩﻲ ﺗﻮﻧﯘﺷﺘﯘﺭﺩﻯ.

ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﻐﺎﻥ ﻣﻪﻣﻪﺕ ﻗﺎﭘﻼﻥ ﺋﯘﻳﻐﯘﺭ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ ﻣﯘﻧﺪﺍﻕ ﺩﻩﻳﺪﯗ: "ﺋﯘﻳﻐﯘﺭ ﻣﻪﺳﯩﻠﯩﺴﻰ ﺑﯜﮔﯜﻧﻜﻰ ﻛﯜﻧﺪﻩ ﭘﯜﺗﯜﻥ ﺩﯗﻧﻴﺎ ﺋﯩﻨﺴﺎﻧﻠﯩﺮﻯ ﺑﯩﻠﯩﺸﻜﻪ ﺗﯩﮕﯩﺸﻠﯩﻚ ﺑﯩﺮ ﻣﻪﺳﯩﻠﻪ ﺑﻮﻟﺴﯩﻤﯘ، ﺋﻪﻣﻤﺎ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺗﻪﺗﯘﺭ ﺗﻪﺷﯟﯨﻘﺎﺗﻰ ﺑﯩﻠﻪﻥ ﻛﯩﺸﯩﻠﻪﺭﻧﯩﯔ ﻧﻪﺯﯨﺮﯨﺪﯨﻦ ﻳﯩﺮﺍﻗﺘﺎ ﻗﯧﻠﯩﯟﺍﺗﯩﺪﯗ. ﺋﯘﻳﻐﯘﺭ ﻣﻪﺳﯩﻠﯩﺴﻰ ﭘﻪﻗﻪﺕ ﭘﯜﺗﯜﻥ ﺗﯜﺭﻛﻰ ﻣﯩﻠﻠﻪﺗﻠﻪﺭﻧﯩﯔ، ﭘﯜﺗﯜﻥ ﻣﯘﺳﯘﻟﻤﺎﻥ ﺩﯗﻧﻴﺎﺳﯩﻨﯩﯔ ﻣﻪﺳﯩﻠﯩﯩﺴﻰ ﺑﻮﻟﯘﭖ ﻗﺎﻟﻤﺎﺳﺘﯩﻦ، ﺑﻪﻟﻜﻰ ﻫﻪﺭ ﻗﺎﻧﺪﺍﻕ ﯞﯨﺠﺪﺍﻥ ﺋﯩﮕﯩﺴﯩﻨﯩﯔ ﻛﯚﯕﯜﻝ ﺑﯚﻟﯜﺷﯩﮕﻪ ﺗﯩﮕﯩﺸﻠﯩﻚ ﻣﻪﺳﯩﻠﯩﺪﯗﺭ. ﺋﻪﻣﻤﺎ ﺑﯜﮔﯜﻧﻜﻰ ﻛﯜﻧﺪﻩ، ﺩﯗﻧﻴﺎﺩﯨﻜﻰ ﻧﯘﺭﻏﯘﻥ ﺩﯙﻟﻪﺗﻠﻪﺭ ﺧﯩﺘﺎﻳﻨﯩﯔ ﻛﯜﭼﻠﯜﻙ ﺋﯩﻘﺘﯩﺴﺎﺩﻯ ﻛﯜﭼﻰ ﺋﺎﻟﺪﯨﺪﺍ ﺋﯘﻳﻐﯘﺭﻻﺭﻧﯩﯔ ﺷﻪﺭﻗﻰ ﺗﯜﻛﯩﺴﺘﺎﻧﺪﯨﻜﻰ ﺋﯚﻟﺘﯜﺭﯛﻟﯜﯞﺍﺗﻘﺎﻥ، ﻗﯩﺮﻏﯩﻦ ﻗﯩﻠﯩﻨﯩﯟﺍﺗﻘﺎﻥ، ﺗﯜﺭﻣﯩﻠﻪﺭﮔﻪ ﻗﺎﻣﯩﻠﯩﯟﺍﺗﻘﺎﻧﻠﯩﻘﯩﺪﻩﻙ ﻫﻪﻗﯩﻘﻪﺗﻠﻪﺭﻧﻰ ﻛﯚﺭﯛﺷﻜﻪ ﺋﺎﺟﯩﺰﻟﯩﻖ ﻗﯩﻠﯩﯟﺍﺗﯩﺪﯗ. ﺑﯩﺰ ﺷﻪﺭﻗﻰ ﺗﯜﺭﻛﯩﺴﺘﺎﻧﺪﯨﻜﻰ ﺑﯘ ﺧﯩﻞ ﺋﯩﻨﺴﺎﻧﻰ ﺑﻮﻟﻤﯩﻐﺎﻥ ﻣﯘﺋﺎﻣﯩﻠﯩﻠﻪﺭﻧﯩﯔ ﺑﺎﻟﺪﯗﺭﺭﺍﻕ ﺋﺎﺧﯩﺮﻟﯩﺸﯩﺸﯩﻨﻰ ﺋﺎﺭﺯﯗ ﻗﯩﻠﯩﻤﯩﺰ. ﺋﯘﻳﻐﯘﺭﻻﺭﻧﯩﯔ ﺋﺎﻧﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺑﯘ ﺟﻪﻫﻪﺗﺘﻪ ﻛﯚﭖ ﺗﯩﺮﯨﺸﭽﺎﻧﻠﯩﻘﻼﺭﻧﻰ ﻛﯚﺭﺳﯩﺘﯩﯟﺍﺗﯩﺪﯗ. ﻣﻪﻥ ﺷﯘﻧﺪﺍﻕ ﻗﺎﺭﺍﻳﻤﻪﻧﻜﻰ، ﻫﻪﺭ ﺑﯩﺮ ﺋﯘﻳﻐﯘﺭﻧﯩﯔ ﺋﯘﻳﻐﯘﺭ ﻣﻪﺳﯩﻠﯩﺴﯩﻨﻰ ﺩﯗﻧﻴﺎﻏﺎ ﺗﻮﻧﯘﺷﺘﯘﺭﯗﺵ ﻣﻪﺟﺒﯘﺭﯨﻴﯩﺘﻰ ﺑﺎﺭ. ﺋﯘﻳﻐﯘﺭ ﻣﻪﺳﯩﻠﯩﺴﯩﻨﻰ ﺷﯩﯟﯦﺘﺴﯩﻴﻪ ﭘﺎﺭﻻﻣﯧﻨﺘﯩﺪﺍ ﻛﯚﺗﯜﺭﯛﭖ ﭼﯩﻘﯩﺸﻘﺎ ﻣﻪﻥ ﺗﻪﻳﻴﺎﺭ ﻫﻪﻡ ﻣﻪﻥ ﻣﯘﺷﯘ ﻳﻮﻟﺪﺍ ﺩﺍﯞﺍﻣﻠﯩﻖ ﺋﯩﺰﺩﯨﻨﯩﯟﺍﺗﯩﻤﻪﻥ."

ﭘﺎﺋﺎﻟﯩﻴﻪﺕ ﺟﻪﺭﻳﺎﻧﯩﺪﺍ ﺋﯘﻳﻐﯘﺭ ﻣﺎﺋﺎﺭﯨﭗ ﺋﯘﻳﯘﺷﻤﯩﺴﯩﻨﯩﯔ ﺋﯩﭙﺘﺎﺭ ﺯﯨﻴﺎﭘﯩﺘﯩﻨﻰ ﺋﯘﻳﯘﺷﺘﯘﺭﯗﺷﻘﺎ ﻣﻪﺳﺌﯘﻝ ﺑﻮﻟﻐﺎﻥ ﺋﻪﺧﻤﻪﺗﺠﺎﻥ ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﯩﭗ ﺋﯩﭙﺘﺎﺭ ﺯﯨﻴﺎﭘﯩﺘﯩﻨﻰ ﺋﻮﺭﯗﻧﻼﺷﺘﯘﺭﯗﺷﻘﺎ ﺩﺍﺋﯩﺮ ﺋﯩﺸﻼﺭﺩﯨﻦ ﺋﯘﭼﯘﺭ ﺑﻪﺭﺩﻯ.

ﻳﯘﻗﯩﺮﯨﺪﯨﻜﻰ ﺋﺎﯞﺍﺯ ﺋﯘﻟﯩﻨﯩﺸﯩﺪﯨﻦ، ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﯩﻤﯩﺰﻧﯩﯔ ﺗﻪﭘﺴﯩﻼﺗﯩﻨﻰ ﺋﺎﯕﻼﻳﺴﯩﻠﻪﺭ.