ﺭﯗﺳﯩﻴﻪ ﭘﺮﯦﺰﯨﺪﯦﻨﺘﻰ ﻣﯧﺪﯞﯦﺪﯦﻔﻨﯩﯔ 11 - ﭼﯧﺴﻼ ﺳﻪﻳﺸﻪﻧﺒﻪ ﻛﯜﻧﻰ ﺑﺎﺷﻼﻧﻐﺎﻥ ﺗﯜﺭﻛﯩﻴﻪ ﺯﯨﻴﺎﺭﯨﺘﻰ ﺑﻮﻟﺴﺎ ﺋﯩﻜﻜﻰ ﺩﯙﻟﻪﺕ ﻣﯘﻧﺎﺳﯩﯟﯨﺘﯩﺪﯨﻜﻰ ﻳﯧﯖﻰ ﺑﯩﺮ ﻳﯜﺯﻟﯩﻨﯩﺸﻨﯩﯔ ﺑﯩﺸﺎﺭﯨﺘﻰ ﺩﻩﭖ ﻗﺎﺭﺍﻟﻤﺎﻗﺘﺎ.

ﺭﯗﺳﯩﻴﻪ ﭘﺮﯦﺰﯨﺪﯦﻨﺘﻰ ﻣﯧﺪﯞﯦﺪﯦﻒ ﺗﯜﺭﻛﯩﻴﯩﻨﻰ ﺋﯩﻜﻜﻰ ﻛﯜﻧﻠﯜﻙ ﺯﯨﻴﺎﺭﻩﺕ ﻗﯩﻠﯩﭗ، ﺗﯜﺭﻛﯩﻴﻪ ﭘﺮﯦﺰﯨﺪﯦﻨﺘﻰ ﺋﺎﺑﺪﯗﻟﻼ ﮔﯜﻝ ﺑﯩﻠﻪﻥ ﺋﯧﻨﯧﺮﮔﯩﻴﻪ، ﺑﯩﺨﻪﺗﻪﺭﻟﯩﻚ ﯞﻩ ﺳﺎﻳﺎﻫﻪﺕ ﺋﯩﺸﻠﯩﺮﯨﻐﺎ ﺋﺎﺋﯩﺖ ﺑﯩﺮ ﻗﺎﺗﺎﺭ ﻛﯧﻠﯩﺸﯩﻤﻠﻪﺭﻧﻰ ﺋﯩﻤﺰﺍﻟﯩﺪﻯ. ﺋﯩﻜﻜﻰ ﺗﻪﺭﻩﭖ ﺋﺎﺭﯨﺴﯩﺪﺍ ﺋﯩﻤﺰﺍﻻﻧﻐﺎﻥ ﺋﻪﯓ ﻣﯘﻫﯩﻢ ﻛﯧﻠﯩﺸﯩﻤﻠﻪﺭﻧﯩﯔ ﺑﯩﺮﻯ، ﺋﯩﻜﻜﻰ ﺩﯙﻟﻪﺕ ﺳﺎﻳﺎﻫﻪﺗﭽﯩﻠﯩﺮﯨﮕﻪ ﯞﯨﺰﺍ ﺗﻪﻟﻪﭖ ﻗﯩﻠﯩﺸﻨﻰ ﺑﯩﻜﺎﺭ ﻗﯩﻠﯩﺸﺘﯘﺭ. ﭘﺮﯦﺰﯨﺪﯦﻨﺖ ﻣﯧﺪﯞﯦﺪﯦﻒ ﺑﯩﻠﻪﻥ ﺗﯜﺭﻛﯩﻴﻪ ﺭﻩﺋﯩﺲ ﺟﯘﻣﻬﯘﺭﻯ ﺋﺎﺑﺪﯗﻟﻼ ﮔﯜﻝ ﺋﺎﺭﯨﺴﯩﺪﺍ ﺋﯚﺗﻜﯜﺯﯛﻟﮕﻪﻥ ﺭﻩﺳﻤﯩﻲ ﺳﯚﻫﺒﻪﺗﺘﻪ ﺗﻪﺭﻩﭘﻠﻪﺭ، ﺋﯩﻜﻜﻰ ﺩﯙﻟﻪﺕ ﻣﯘﻧﺎﺳﯩﯟﯨﺘﯩﻨﻰ ﻫﻪﺭ ﻗﺎﻳﺴﻰ ﺳﺎﻫﻪﻟﻪﺭﺩﻩ ﭼﻮﯕﻘﯘﺭﻻﺷﺘﯘﺭﯗﺵ ﯞﻩ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﺳﻪﯞﯨﻴﯩﮕﻪ ﻳﻪﺗﻜﯜﺯﯛﺷﻜﻪ ﺩﺍﺋﯩﺮ ﻣﻪﺳﯩﻠﯩﻠﻪﺭﻧﻰ ﻣﯘﺯﺍﻛﯩﺮﻩ ﻗﯩﻠﻐﺎﻥ. ﻣﯧﺪﯞﯦﺪﯦﻒ ﭼﺎﺭﺷﻪﻧﺒﻪ ﻛﯜﻧﻰ ﺋﺎﺑﺪﯗﻟﻼ ﮔﯜﻝ ﺑﯩﻠﻪﻥ ﺑﯩﺮﮔﻪ ﺋﯚﺗﻜﯜﺯﮔﻪﻥ ﺋﺎﺧﺒﺎﺭﺍﺕ ﺋﯧﻼﻥ ﻗﯩﻠﯩﺶ ﻳﯩﻐﯩﻨﯩﺪﺍ ﺑﯘ ﺋﯩﻜﻜﻰ ﺋﻪﻟﻨﯩﯔ ﻣﯘﻧﺎﺳﯩﯟﯨﺘﯩﮕﻪ ﺑﺎﻫﺎ ﺑﯧﺮﯨﭗ، ﺭﯗﺳﯩﻴﻪ‏ - ﺗﯜﺭﻛﯩﻴﻪ ﻣﯘﻧﺎﺳﯩﯟﯨﺘﻰ ﻳﯧﻘﯩﻨﺪﯨﻦ ﺑﯘﻳﺎﻥ "ﺟﯩﺪﺩﯨﻲ ﺋﯚﺯﮔﯩﺮﯨﺶ ﻳﺎﺳﯩﻐﺎﻧﻠﯩﻘﯩﻨﻰ ﯞﻩ ﻛﯚﭖ ﺗﻪﺭﻩﭘﻠﯩﻤﯩﻠﯩﻚ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﺗﯜﺱ ﺋﺎﻟﻐﺎﻧﻠﯩﻘﯩﻨﻰ" ﻫﻪﻡ ﺋﯩﻜﻜﻰ ﺩﯙﻟﻪﺕ ﻫﻪﻣﻜﺎﺭﻟﯩﺸﺎﻻﻳﺪﯨﻐﺎﻥ ﺳﺎﻫﻪﻟﻪﺭﺩﻩ "ﺯﻭﺭ ﭘﯘﺭﺳﻪﺕ" ﺑﺎﺭﻟﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ.

ﺋﺎﺑﺪﯗﻟﻼ ﮔﯜﻝ ﺑﻮﻟﺴﺎ "ﺭﺍﻳﻮﻧﺪﯨﻜﻰ ﻣﻪﺳﯩﻠﯩﻠﻪﺭﮔﻪ ﺑﻮﻟﻐﺎﻥ ﻛﯚﺯ ﻗﺎﺭﺍﺵ ﺟﻪﻫﻪﺗﺘﯩﻜﻰ ﺋﻮﺭﺗﺎﻗﻠﯩﻖ، ﺗﻪﺭﻩﭘﻠﻪﺭﻧﻰ ﻣﻪﻣﻨﯘﻥ ﻗﯩﻠﻐﺎﻧﻠﯩﻘﯩﻨﻰ ﯞﻩ ﺑﯘ ﻣﻪﺳﯩﻠﯩﻠﻪﺭﺩﻩ ﺋﯜﺯﻟﯜﻛﺴﯩﺰ ﺑﯩﺮﮔﻪ ﺋﯩﺸﻠﻪﺷﻜﻪ ﻗﻮﺷﯘﻟﻐﺎﻧﻠﯩﻘﻰ" ﻧﻰ ﺷﯘﻧﺪﺍﻗﻼ ﺋﯩﻜﻜﻰ ﺗﻪﺭﻩﭘﻨﯩﯔ "ﺳﻮﺩﺍ ﻫﻪﺟﯩﻤﯩﻨﻰ ﻛﻪﻟﮕﯜﺳﯩﺪﻩ 5 ﻳﯩﻠﺪﺍ 100 ﻣﯩﻠﻴﺎﺭﺩ ﺩﻭﻟﻼﺭﻏﺎ ﻳﻪﺗﻜﯜﺯﯛﺷﻨﻰ ﺋﺎﺭﺯﯗ ﻗﯩﻠﯩﺪﯨﻐﺎﻧﻠﯩﻘﻰ" ﻧﻰ ﺑﯩﻠﺪﯛﺭﮔﻪﻥ. ﻣﯧﺪﯞﯦﺪﯦﻒ ﺑﻮﻟﺴﺎ "ﺭﯗﺳﯩﻴﻪ‏ - ﺗﯜﺭﻛﯩﻴﻪ ﺋﺎﺭﯨﺴﯩﺪﺍ 30 ﻛﯜﻧﻠﯜﻙ ﺳﺎﻳﺎﻫﻪﺕ ﯞﯨﺰﯨﺴﯩﻨﯩﯔ ﺑﯩﻜﺎﺭ ﻗﯩﻠﯩﻨﻐﺎﻧﻠﯩﻘﻰ" ﻧﻰ ﺗﺎﺭﯨﺨﯩﻲ ﻛﯧﻠﯩﺸﯩﻢ ﺩﯦﮕﻪﻥ.

ﺗﯜﺭﻛﯩﻴﻪ، ﻳﺎﯞﺭﻭﭘﺎ ﯞﻩ ﺋﺎﻣﯧﺮﯨﻜﯩﻨﯩﯔ ﺗﺎﺭﯨﺨﯩﻲ ﺋﯩﺘﺘﯩﭙﺎﻗﺪﯦﺸﻰ ﺷﯘﻧﺪﺍﻗﻼ ﺵ ﺋﺎ ﺋﻪ ﺕ ﺩﯨﻜﻰ ﺑﯩﺮﺩﯨﻦ - ﺑﯩﺮ ﻣﯘﺳﯘﻟﻤﺎﻥ ﺩﯙﻟﻪﺗﺘﯘﺭ. ﻏﻪﺭﺑﻜﻪ ﻳﯜﺯﻟﯩﻨﯩﺶ ﺗﯜﺭﻛﯩﻴﯩﻨﯩﯔ ﺟﯘﻣﻬﯘﺭﯨﻴﻪﺕ ﻗﯘﺭﯗﻟﻐﺎﻥ ﺋﺎﺯ ﻛﻪﻡ 90 ﻳﯩﻠﺪﯨﻦ ﺑﯘﻳﺎﻥ ﺋﯩﺰﭼﯩﻞ ﺋﯚﺯﮔﻪﺭﻣﻪﻱ ﻛﯧﻠﯩﯟﺍﺗﻘﺎﻥ ﺳﯩﻴﺎﺳﯩﺘﻰ ﺋﯩﺪﻯ. ﻟﯧﻜﯩﻦ ﻣﯧﺪﯞﯦﺪﯦﻔﻨﯩﯔ ﺯﯨﻴﺎﺭﯨﺘﻰ ﯞﻩ ﺗﯜﺭﻛﯩﻴﻪ - ﺭﯗﺳﯩﻴﻪ ﻣﯘﻧﺎﺳﯩﯟﻩﺗﻠﯩﺮﯨﺪﻩ ﻳﯜﺯ ﺑﻪﺭﮔﻪﻥ ﻳﯧﻘﯩﻨﻘﻰ ﺋﯚﺯﮔﯩﺮﯨﺶ ﺑﻪﺯﻯ ﻛﯚﺯﻩﺗﻜﯜﭼﯩﻠﻪﺭﺩﻩ ﺗﯜﺭﻛﯩﻴﻪ ﺋﯚﺯﯨﻨﯩﯔ ﻳﺎﯞﺭﻭﭘﺎ ﺋﯩﺘﺘﯩﭙﺎﻗﯩﻐﺎ ﺋﻪﺯﺍ ﺑﻮﻟﯘﺵ ﻧﯩﺸﺎﻧﯩﻨﻰ ﺋﯚﺯﮔﻪﺭﺗﯩﭗ، ﺋﯚﺯﯨﮕﻪ ﻳﯧﯖﻰ ﺑﯩﺮ ﺋﯩﺘﺘﯩﭙﺎﻗﺪﺍﺵ ﺋﯩﺰﺩﻩﯞﺍﺗﺎﻣﺪﯗ ؟ ﺩﯦﮕﻪﻥ ﮔﯘﻣﺎﻧﻼﺭﻧﻰ ﻗﻮﺯﻏﯩﻤﺎﻱ ﻗﺎﻟﻤﯩﺪﻯ.

ﻟﯧﻜﯩﻦ، ﺗﯜﺭﻛﯩﻴﻪ ﺧﻪﻟﻘﺌﺎﺭﺍ ﺋﯩﺴﺘﺮﺍﺗﯧﮕﯩﻴﻪ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﻨﯩﯔ ﻣﻪﺳﺌﯘﻟﻰ ﺩﻭﻛﺘﻮﺭ ﺳﯩﻨﺎﻥ ﺋﻮﮔﺎﻥ ﺑﯘ ﺗﯜﺭﻛﯩﻴﯩﻨﯩﯔ ﻳﻮﻟﯩﻨﻰ ﺋﯚﺯﮔﻪﺭﺗﯩﭗ، ﺋﯚﺯﯨﮕﻪ ﻳﯧﯖﻰ ﺋﯩﺘﺘﯩﭙﺎﻗﺪﺍﺵ ﺗﯧﭙﯩﺶ ﻳﻮﻟﯩﻐﺎ ﻛﯧﺘﯩﯟﺍﺗﻘﺎﻧﻠﯩﻘﯩﻨﯩﯔ ﺑﯩﺸﺎﺭﯨﺘﻰ ﺋﯩﻜﻪﻧﻠﯩﻜﯩﻨﻰ ﺭﻩﺕ ﻗﯩﻠﯩﺪﯗ. ﺳﯩﻨﺎﻥ ﺋﻮﮔﺎﻥ، "ﺗﯜﺭﻛﯩﻴﯩﻨﯩﯔ ﺭﯗﺳﯩﻴﻪ ﺑﯩﻠﻪﻥ ﻫﻪﻣﻜﺎﺭﻟﯩﻘﯩﻨﻰ ﻛﯜﭼﻪﻳﺘﯩﺸﻰ ﻳﯧﯖﻰ ﭼﯩﻘﯩﺶ ﻳﻮﻟﻰ ﺋﯩﺰﺩﻩﺵ ﺩﻩﭖ ﻗﺎﺭﺍﻟﻤﺎﺳﻠﯩﻘﻰ ﻛﯧﺮﻩﻙ. ﺗﯜﺭﻛﯩﻴﻪ ﻳﺎﯞﺭﻭﭘﺎ ﺋﯩﺘﺘﯩﭙﺎﻗﻰ ﺋﻪﺯﺍﻟﯩﻘﯩﺪﯨﻦ ﯞﺍﺯ ﻛﻪﭼﻤﯩﺪﻯ. ﻟﯧﻜﯩﻦ ﺗﯜﺭﻛﯩﻴﯩﻨﯩﯔ ﻳﯧﻘﯩﻦ ﺋﺎﺭﯨﺪﺍ ﻳﺎﯞﺭﻭﭘﺎ ﺋﯩﺘﺘﯩﭙﺎﻗﯩﻐﺎ ﺋﻪﺯﺍ ﺑﻮﻟﯘﺵ ﺋﯧﻬﺘﯩﻤﺎﻟﻠﯩﻘﻰ ﻳﯘﻗﯩﺮﻯ ﺋﻪﻣﻪﺱ. ﺗﯜﺭﻛﯩﻴﯩﻨﯩﯔ ﺭﯗﺳﯩﻴﻪ ﺑﯩﻠﻪﻥ ﻣﯘﻧﺎﺳﯩﯟﯨﺘﯩﻨﻰ ﺋﺎﻟﻐﺎ ﺳﯜﺭﯛﺷﻰ ﺋﯩﻘﺘﯩﺴﺎﺩﻧﻰ ﺋﺎﺳﺎﺱ ﻗﯩﻠﻐﺎﻥ .... ﺗﯜﺭﻛﯩﻴﯩﻨﯩﯔ ﺭﯗﺳﯩﻴﻪ ﺑﯩﻠﻪﻥ ﻣﯘﻧﺎﺳﯩﯟﻩﺗﻨﻰ ﺗﻪﺭﻩﻗﻘﻰ ﻗﯩﻠﺪﯗﺭﯗﺷﻰ ﺋﯘﻧﯩﯔ ﻣﻪﻟﯘﻡ ﺑﯩﺮﺳﯩﮕﻪ ﻗﺎﺭﺷﻰ ﺑﯩﺮ ﮔﯘﺭﯗﻫ ﺋﯘﻳﯘﺷﺘﯘﺭﯗﺵ ﺧﯩﻴﺎﻟﯩﺪﯨﻦ ﻛﯧﻠﯩﭗ ﭼﯩﻘﻘﺎﻥ ﺋﻪﻣﻪﺱ. ﺧﯩﺘﺎﻳﻨﯩﯔ ﻛﯜﭼﯩﻴﯩﺸﻰ، ﺭﯗﺳﯩﻴﻪ، ﺋﺎﻣﯧﺮﯨﻜﺎ ﯞﻩ ﺗﯜﺭﻛﯩﻴﯩﻨﻰ ﺋﺎﻟﺪﯨﺮﯨﺘﯩﭗ ﻗﻮﻳﺪﻯ. ﺑﯘ ﺋﯜﭺ ﻛﯜﭺ ﺋﺎﺭﯨﺴﯩﺪﺍ ﺧﯩﺘﺎﻳﻐﺎ ﻗﺎﺭﺷﻰ ﺋﯚﺯ ‏ - ﺋﺎﺭﺍ ﻳﯧﻘﯩﻨﻠﯩﺸﯩﺶ ﻣﯘﺳﺎﭘﯩﺴﻰ ﺑﺎﺭ. ﺑﯘﺭﯗﻥ ﺋﺎﻣﯧﺮﯨﻜﺎ ﯞﻩ ﻳﺎﯞﺭﻭﭘﺎ ﺗﯜﺭﻛﯩﻴﯩﻨﯩﯔ ﺭﯗﺳﯩﻴﻪ ﺑﯩﻠﻪﻥ ﻳﯧﻘﯩﻨﻠﯩﺸﯩﺸﯩﻨﻰ ﺧﺎﻟﯩﻤﺎﻳﺘﺘﻰ. ﻫﺎﺯﯨﺮ ﺑﻮﻟﺴﺎ ﺑﯘﻧﯩﯖﻐﺎ ﺳﻮﻏﯘﻕ ﻣﯘﺋﺎﻣﯩﻠﻪ ﻗﯩﻠﻤﺎﻳﺪﯗ. ﻫﻪﺗﺘﺎ ﺑﻪﺯﯨﺪﻩ ﺋﯘﻻﺭ ﺋﺎﺭﯨﺴﯩﺪﯨﻜﻰ ﻳﯧﻘﯩﻨﭽﯩﻠﯩﻘﻨﻰ ﻗﻮﻟﻼﻳﺪﯗ، ﺩﯦﻴﯩﺸﻜﻪ ﺑﻮﻟﯩﺪﯗ" ﺩﻩﭖ ﻛﯚﺭﺳﻪﺗﺘﻰ.

ﺋﯩﻜﻜﻰ ﺩﯙﻟﻪﺕ ﺭﻩﻫﺒﯩﺮﻯ ﺋﻪﻧﻘﻪﺭﻩﺩﯨﻜﻰ ﺋﺎﺧﺒﺎﺭﺍﺕ ﺋﯧﻼﻥ ﻗﯩﻠﯩﺶ ﻳﯩﻐﯩﻨﯩﺪﺍ ﺋﯩﻜﻜﻰ ﺋﻪﻟﻨﯩﯔ ﺭﺍﻳﻮﻥ ﺧﺎﺭﺍﻛﺘﯧﺮﻟﯩﻚ ﻣﻪﺳﯩﻠﯩﻠﻪﺭﮔﻪ ﺗﯘﺗﻘﺎﻥ ﭘﻮﺯﯨﺘﺴﯩﻴﯩﺴﯩﺪﯨﻜﻰ ﺋﻮﺭﺗﺎﻗﻠﯩﻘﻼﺭﻧﻰ ﺗﻪﻛﯩﺘﻠﻪﭖ، ﭘﻪﻟﻪﺳﺘﯩﻦ، ﺋﯩﺮﺍﻥ ﻣﻪﺳﯩﻠﯩﺴﻰ ﯞﻩ ﺋﻮﺗﺘﯘﺭﺍ ﺷﻪﺭﻗﻨﻰ ﻳﺎﺩﺭﻭﺳﯩﺰﻻﺷﺘﯘﺭﯗﺵ ﻗﺎﺗﺎﺭﻟﯩﻖ ﻣﻪﺳﯩﻠﯩﻠﻪﺭﺩﻩ ﭘﻮﺯﯨﺘﺴﯩﻴﯩﺴﯩﻨﯩﯔ ﺑﯩﺮ ‏ - ﺑﯩﺮﯨﮕﻪ ﻧﺎﻫﺎﻳﯩﺘﻰ ﻳﯧﻘﯩﻦ ﻛﯧﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ. ﺗﯜﺭﻛﯩﻴﻪ ﺑﯩﻠﻪﻥ ﺭﯗﺳﯩﻴﻪ ﻫﻪﻣﻜﺎﺭﻟﯩﻘﯩﺪﯨﻜﻰ ﻣﯘﻫﯩﻢ ﺳﺎﻫﻪﻟﻪﺭﻧﯩﯔ ﻳﻪﻧﻪ ﺑﯩﺮﻯ، ﺗﯜﺭﻛﯩﻴﯩﮕﻪ ﺭﯗﺱ ﺗﻪﺑﺌﯩﻲ ﮔﺎﺯﯨﻨﻰ ﺳﯧﺘﯩﺶ ﻣﻪﺳﯩﻠﯩﺴﯩﺪﯗﺭ.

ﻟﯧﻜﯩﻦ، ﺭﯗﺳﯩﻴﻪ ﺑﯩﻠﻪﻥ ﺗﯜﺭﻛﯩﻴﻪ ﻣﻪﻧﭙﻪﺋﻪﺕ ﺟﻪﻫﻪﺗﺘﯩﻜﻰ ﺑﻪﺯﻯ ﺋﻮﺭﺗﺎﻗﻠﯩﻘﻼﺭﻏﺎ ﺋﯩﮕﻪ ﺑﻮﻟﺴﯩﻤﯘ، ﻟﯧﻜﯩﻦ ﺋﯘﻻﺭ ﺋﺎﺭﯨﺴﯩﺪﺍ ﻳﻪﻧﯩﻼ ﻣﯘﻧﺎﺳﯩﯟﻩﺗﻜﻪ ﺗﻮﺳﺎﻟﻐﯘ ﺑﻮﻟﯘﯞﺍﺗﻘﺎﻥ ﺑﻪﺯﻯ ﺋﯩﺨﺘﯩﻼﭘﻼﺭ ﻣﻪﯞﺟﯘﺕ. ﺑﯘ ﺋﯩﺨﺘﯩﻼﭘﻼﺭ ﺭﯗﺳﯩﻴﯩﻨﯩﯔ ﮔﺮﻭﺯﯨﻴﯩﮕﻪ ﻫﯘﺟﯘﻡ ﻗﯩﻠﯩﭗ، ﺋﺎﺑﺨﺎﺯﯨﻴﻪ ﺑﯩﻠﻪﻥ ﺟﻪﻧﯘﺑﯩﻲ ﺋﻮﺳﺴﯩﺘﯩﻴﯩﻨﯩﯔ ﻣﯘﺳﺘﻪﻗﯩﻠﻠﯩﻘﯩﻨﻰ ﺋﯧﻼﻥ ﻗﯩﻠﯩﺸﻰ، ﺋﻪﺭﻣﯧﻨﯩﻴﻪ ﯞﻩ ﻗﺎﺭﺍﺑﺎﻍ ﻣﻪﺳﯩﻠﯩﺴﻰ، ﻛﯘﺭﺗﻠﻪﺭ ﯞﻩ ﺋﻮﺗﺘﯘﺭﺍ ﺋﺎﺳﯩﻴﺎﺩﯨﻜﻰ ﺗﻪﺳﯩﺮ ﺩﺍﺋﯩﺮﻩ ﻣﻪﺳﯩﻠﯩﺴﻰ ﻗﺎﺗﺎﺭﻟﯩﻘﻼﺭﻧﻰ ﺋﯚﺯ ﺋﯩﭽﯩﮕﻪ ﺋﺎﻟﯩﺪﯗ.

ﺗﯜﺭﻛﯩﻴﻪ ﺧﻪﻟﻘﺌﺎﺭﺍ ﺋﯩﺴﺘﺮﺍﺗﯧﮕﯩﻴﻪ ﻣﻪﺭﻛﯩﺰﯨﺪﯨﻜﻰ ﺩﻭﻛﺘﻮﺭ ﺳﯩﻨﺎﻥ ﺋﻮﮔﺎﻥ ﺑﻮﻟﺴﺎ، ﺭﯗﺳﯩﻴﯩﻨﯩﯔ ﻛﻪﻟﮕﯜﺳﯩﺪﻩ ﺗﯜﺭﻛﯩﻴﻪ ﺑﯩﻠﻪﻥ ﻫﻪﻣﻜﺎﺭﻟﯩﺸﯩﭗ، ﺧﯩﺘﺎﻳﻐﺎ ﻗﺎﺭﺷﻰ ﺗﯘﺭﯗﺷﻘﺎ ﻣﻪﺟﺒﯘﺭ ﺑﻮﻟﯩﺪﯨﻐﺎﻧﻠﯩﻘﯩﻨﻰ، ﭼﯜﻧﻜﻰ ﺭﯗﺳﯩﻴﻪ ﺧﯩﺘﺎﻳﻨﻰ ﺷﺎﯕﺨﻪﻱ ﮔﯘﺭﯗﻫﯩﻐﺎ ﻛﯩﺮﮔﯜﺯﯛﭖ، ﺯﻭﺭ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﺳﻪﯞﻩﻧﻠﯩﻚ ﺳﺎﺩﯨﺮ ﻗﯩﻠﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺋﯘ ﻣﯘﻧﺪﺍﻕ ﺩﻩﻳﺪﯗ" :ﺷﺎﯕﺨﻪﻱ ﻫﻪﻣﻜﺎﺭﻟﯩﻖ ﺗﻪﺷﻜﯩﻼﺗﻰ ﺭﯗﺳﯩﻴﻪ ﺑﯩﻠﻪﻥ ﺧﯩﺘﺎﻱ ﺋﺎﺭﯨﺴﯩﺪﺍ ﻗﯘﺭﯗﻟﻐﺎﻧﺪﺍ ﺭﯗﺳﯩﻴﻪ ﺯﻭﺭ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﺗﺎﺭﯨﺨﯩﻲ ﺧﺎﺗﺎﻟﯩﻖ ﺋﯚﺗﻜﯜﺯﺩﻯ. ﺧﯩﺘﺎﻳﻨﻰ ﺑﯘ ﺗﻪﺷﻜﯩﻼﺗﻘﺎ ﺋﻪﺯﺍ ﻗﯩﻠﯩﭗ، ﺧﯩﺘﺎﻳﻨﯩﯔ ﺋﻮﺗﺘﯘﺭﺍ ﺋﺎﺳﯩﻴﺎﺩﺍ ﺑﯘ ﺗﻪﺷﻜﯩﻼﺗﻨﻰ ﻗﻮﻟﻠﯩﻨﯩﭗ، ﺗﻪﺳﯩﺮ ﺩﺍﺋﯩﺮﯨﺴﯩﻨﻰ ﻛﯜﭼﻪﻳﺘﯩﺸﯩﮕﻪ ﺳﻪﯞﻩﺏ ﺑﻮﻟﺪﻯ. ﺑﯜﮔﯜﻥ ﺧﯩﺘﺎﻱ ﺑﯩﻠﻪﻥ ﺭﯗﺳﯩﻴﻪ ﺑﯩﺮ - ﺑﯩﺮﯨﻨﻰ ﺋﯩﺴﺘﺮﺍﺗﯧﮕﯩﻴﯩﻠﯩﻚ ﺷﯧﺮﯨﻚ ﺩﻩﭖ ﻗﺎﺭﯨﻤﺎﻗﺘﺎ. ﻟﯧﻜﯩﻦ ﺭﯗﺳﯩﻴﯩﻨﯩﯔ ﺧﯩﺘﺎﻱ ﻣﯘﺗﻪﺧﻪﺳﺴﯩﺴﻠﯩﺮﯨﺪﯨﻦ ﺳﻮﺭﯨﻐﯩﻨﯩﻤﯩﺰﺩﺍ ﯞﻩ ﻳﺎﻛﻰ ﺭﯗﺳﯩﻴﯩﻨﯩﯔ ﺧﯩﺘﺎﻱ ﺗﻮﻏﺮﯨﺴﯩﺪﯨﻜﻰ ﻫﯚﺟﺠﻪﺗﻠﯩﺮﯨﮕﻪ ﻗﺎﺭﯨﻐﯩﻨﯩﻤﯩﺰﺩﺍ، ﺭﯗﺳﯩﻴﻪ ﺋﯜﭼﯜﻥ ﺋﻪﯓ ﭼﻮﯓ ﺗﻪﻫﺪﯨﺖ ﺋﺎﻣﯧﺮﯨﻜﺎ ﺋﻪﻣﻪﺱ، ﺑﻪﻟﻜﻰ ﺧﯩﺘﺎﻱ. ﻛﻪﻟﮕﯜﺳﯩﺪﻩ ﺧﯩﺘﺎﻳﻨﯩﯔ ﺋﯩﻘﺘﯩﺴﺎﺩﻯ ﻛﯜﭼﻰ ﺭﯗﺳﯩﻴﯩﻨﯩﯔ ﻳﯩﺮﺍﻕ ﺷﻪﺭﻕ ﺭﺍﻳﻮﻧﯩﻐﺎ ﺗﻪﻫﺪﯨﺖ ﺳﺎﻟﯩﺪﯗ. ﺧﯩﺘﺎﻳﻨﯩﯔ ﺋﻮﺗﺘﯘﺭﺍ ﺋﺎﺳﯩﻴﺎﺩﯨﻜﻰ ﺗﻪﺳﯩﺮ ﻛﯜﭼﻰ ﻛﯚﺭﯛﻧﻪﺭﻟﯩﻚ ﺋﺎﺭﺗﯩﺪﯗ. ﺑﯘ ﺋﻪﻫﯟﺍﻟﺪﺍ ﺭﯗﺳﯩﻴﻪ ﺧﯩﺘﺎﻳﻐﺎ ﺋﯚﺯﻯ ﻳﺎﻟﻐﯘﺯ ﻗﺎﺭﺷﻰ ﺗﯘﺭﺍﻟﻤﺎﻳﺪﯨﻐﺎﻥ ﺋﻪﻫﯟﺍﻟﻐﺎ ﻛﯧﻠﯩﭗ ﻗﺎﻟﯩﺪﯗ. ﺭﯗﺳﯩﻴﻪ ﺧﯩﺘﺎﻳﻐﺎ ﻗﺎﺭﺷﻰ ﺋﺎﻣﯧﺮﯨﻜﺎ، ﺗﯜﺭﻛﯩﻴﻪ ﯞﻩ ﻳﺎﭘﻮﻧﯩﻴﻪ ﺑﯩﻠﻪﻥ ﺋﯩﺘﺘﯩﭙﺎﻗﻠﯩﺸﯩﺸﻘﺎ ﻣﻪﺟﺒﯘﺭ ﺑﻮﻟﯩﺪﯗ. ﺑﯘ، ﺑﯜﮔﯜﻥ ﻳﺎﻛﻰ ﺋﻪﺗﻪ ﻳﯜﺯ ﺑﯧﺮﯨﺪﯨﻐﺎﻥ ﺋﻪﻫﯟﺍﻟﻼﺭ ﺋﻪﻣﻪﺱ. ﺑﯘ، ﻛﻪﻟﮕﯜﺳﻰ 15 - 20 ﻳﯩﻠﺪﺍ ﻳﯜﺯ ﺑﯧﺮﯨﺪﯨﻐﺎﻥ ﻫﺎﺩﯨﺴﯩﻠﻪﺭﺩﯗﺭ.

ﺭﯗﺳﯩﻴﻪ ﺋﯘﻳﻐﯘﺭﻻﺭﻧﯩﯔ ﻳﯧﻘﯩﻨﻘﻰ ﺯﺍﻣﺎﻥ ﺗﺎﺭﯨﺨﻰ ﯞﻩ ﺋﯘﻻﺭﻧﯩﯔ ﻛﯧﻴﯩﻨﻜﻰ ﺗﻪﻗﺪﯨﺮﯨﮕﻪ ﻣﯘﻧﺎﺳﯩﯟﻩﺗﻠﯩﻚ ﺯﻭﺭ ﯞﻩﻗﻪﻟﻪﺭﺩﻩ ﻫﻪﻝ ﻗﯩﻠﻐﯘﭺ ﺭﻭﻝ ﺋﻮﻳﻨﯩﻐﺎﻥ ﺩﯙﻟﻪﺕ. 1933‏ - ﻳﯩﻠﻰ ﻗﯘﺭﯗﻟﻐﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻡ ﺟﯘﻣﻬﯘﺭﯨﻴﯩﺘﯩﻨﯩﯔ ﺋﺎﻏﺪﯗﺭﯗﻟﯘﺷﻰ ﻳﺎﻛﻰ 1944 ‏ - ﻳﯩﻠﻰ ﻗﯘﺭﯗﻟﻐﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﯘﻣﻬﯘﺭﯨﻴﯩﺘﯩﻨﯩﯔ ﺧﯩﺘﺎﻳﻐﺎ ﻗﻮﺷﯘﯞﯦﺘﯩﻠﯩﺸﻰ ﺳﻮﯞﯦﺖ ﺋﯩﺘﺘﯩﭙﺎﻗﯩﻨﯩﯔ ﻗﺎﺭﺍﺭﻯ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﯩﻚ ﺋﯩﺪﻯ. ﺳﻮﯞﯦﺖ ﺋﯩﺘﺘﯩﭙﺎﻗﻰ ﭘﺎﺭﭼﯩﻼﻧﻐﺎﻧﺪﯨﻦ ﻛﯧﻴﯩﻦ ﺭﯗﺳﯩﻴﻪ ﻓﯧﺪﯦﺮﺍﺗﺴﯩﻴﯩﺴﻰ "ﺷﯩﻨﺠﺎﯓ" ﻣﻪﺳﯩﻠﯩﺴﯩﮕﻪ ﺋﺎﺭﯨﻠﯩﺸﯩﺸﺘﯩﻦ ﺋﯩﺰﭼﯩﻞ ﺋﯚﺯﯨﻨﻰ ﺗﺎﺭﺗﯩﭗ ﻛﻪﻟﮕﻪﻥ. 2009‏ - ﻳﯩﻠﻰ 5‏ - ﺋﯩﻴﯘﻝ "ﺋﯜﺭﯛﻣﭽﻰ ﯞﻩﻗﻪﺳﻰ"ﺩﻩ ﺭﯗﺳﯩﻴﻪ ﻫﯚﻛﯜﻣﯩﺘﻰ ﭘﻮﺯﯨﺘﺴﯩﻴﻪ ﺑﯩﻠﺪﯛﺭﯛﭖ، ﺧﯩﺘﺎﻳﻨﯩﯔ ﻣﻪﺯﻛﯘﺭ ﯞﻩﻗﻪﻧﻰ ﺑﯩﺮ ﺗﻪﺭﻩﭖ ﻗﯩﻠﯩﺶ ﺋﯘﺳﯘﻟﯩﻨﻰ ﻗﻮﻟﻼﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺋﯩﺪﻯ.

ﻟﯧﻜﯩﻦ، ﺗﯜﺭﻛﯩﻴﻪ ﺧﻪﻟﻘﺌﺎﺭﺍ ﺋﯩﺴﺘﺮﺍﺗﯧﮕﯩﻴﻪ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﺪﯨﻜﻰ ﺳﯩﻨﺎﻥ ﺋﻮﮔﺎﻥ ﺋﻪﭘﻪﻧﺪﻯ ﺑﻮﻟﺴﺎ، ﯞﻩﺯﯨﻴﻪﺗﻨﯩﯔ ﺗﻪﺭﻩﻗﻘﯩﻴﺎﺗﯩﻐﺎ ﺋﻪﮔﯩﺸﯩﭗ، ﻛﻪﻟﮕﯜﺳﯩﺪﻩ ﺭﯗﺳﯩﻴﯩﻨﯩﯔ "ﺷﻪﺭﻗﯩﻲ ﺗﯜﺭﻛﯩﺴﺘﺎﻥ" ﻣﻪﺳﯩﻠﯩﺴﯩﺪﯨﻜﻰ ﭘﻮﺯﯨﺘﺴﯩﻴﯩﺴﻰ ﺋﯚﺯﮔﯩﺮﯨﺪﯨﻐﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﺩﻯ. ﺋﯘ، "ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﯞﻩﻗﻪ ﻳﯜﺯ ﺑﻪﺭﮔﻪﻧﺪﻩ ﺭﯗﺳﯩﻴﻪ ﺟﯩﻢ ﺗﯘﺭﯗﯞﺍﻟﺪﻯ، ﻫﻪﺗﺘﺎ ﺧﯩﺘﺎﻳﻨﯩﯔ ﻣﻪﻳﺪﺍﻧﯩﻨﻰ ﻗﻮﻟﻠﯩﺪﻯ. ﻟﯧﻜﯩﻦ ﺑﯘ، ﺑﯜﮔﯜﻥ ﺋﯜﭼﯜﻥ ﺷﯘﻧﺪﺍﻗﺘﯘﺭ. ﺋﺎﻟﺪﯨﻤﯩﺰﺩﯨﻜﻰ ﺋﻮﺗﺘﯘﺭﺍ ﯞﻩ ﺋﯘﺯﯗﻥ ﻣﻪﺯﮔﯩﻠﺪﻩ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻨﯩﯔ ﺋﻪﻫﯟﺍﻟﻰ ﺭﯗﺳﯩﻴﻪ ﺗﻪﺭﯨﭙﯩﺪﯨﻦ ﻗﻮﻟﻼﻳﺪﯨﻐﺎﻥ ﺑﯩﺮ ﯞﻩﺯﯨﻴﻪﺗﻜﻪ ﻛﯧﻠﯩﺪﯗ. ﺗﯜﺭﻛﯩﻴﻪ ﺑﯘﺭﯗﻧﺪﯨﻦ ﺗﺎﺭﺗﯩﭗ ﻗﻮﻟﻼﯞﺍﺗﻘﺎﻥ. ﭼﯜﻧﻜﻰ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺗﯜﺭﻛﯩﻴﻪ ﺋﯩﭽﻜﻰ ﺳﯩﻴﺎﺳﯩﺘﯩﺪﯨﻜﻰ ﻧﺎﺯﯗﻙ ﺑﯩﺮ ﻣﻪﺳﯩﻠﻪ. ﺗﯜﺭﻛﯩﻴﻪ ﻫﯚﻛﯜﻣﯩﺘﻰ ﺑﺎﺷﻘﯩﭽﻪ ﭼﯜﺷﻪﻧﺴﯩﻤﯘ، ﻟﯧﻜﯩﻦ ﺗﯜﺭﻛﯩﻴﻪ ﺧﻪﻟﻘﻰ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﻳﯜﺯ ﺑﻪﺭﮔﻪﻥ ﯞﻩﻗﻪﻟﻪﺭﮔﻪ ﻗﺎﺭﺍﭖ ﺗﯘﺭﻣﺎﻳﺪﯗ. ﺗﯜﺭﻛﯩﻴﻪ ﺑﯩﻠﻪﻥ ﺭﯗﺳﯩﻴﯩﻨﯩﯔ ﻳﯧﻘﯩﻨﻠﯩﺸﯩﺸﻰ ﻗﯩﺴﻘﺎ ﻣﯘﺩﺩﻩﺗﺘﻪ ﺑﻮﻟﻤﯩﺴﯩﻤﯘ، ﻟﯧﻜﯩﻦ ﺋﻮﺗﺘﯘﺭﺍ ﯞﻩ ﺋﯘﺯﯗﻥ ﻣﯘﺩﺩﻩﺗﺘﻪ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻣﻪﺳﯩﻠﯩﺴﯩﺪﻩ ﺋﯚﺯ ﺋﯩﭙﺎﺩﯨﺴﯩﻨﻰ ﺗﺎﭘﯩﺪﯗ" ﺩﻩﭖ ﻛﯚﺭﺳﻪﺗﺘﻰ.

ﻳﯘﻗﯩﺮﯨﺪﯨﻜﻰ ﺋﺎﯞﺍﺯ ﺋﯘﻟﯩﻨﯩﺸﯩﺪﯨﻦ، ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﯩﻤﯩﺰﻧﯩﯔ ﺗﻪﭘﺴﯩﻼﺗﯩﻨﻰ ﺋﺎﯕﻼﻳﺴﯩﻠﻪﺭ.