ﺧﻮﯕﻜﻮﯕﺪﯨﻜﻰ ﮔﯧﺰﯨﺖ - ﮊﯗﺭﻧﺎﻝ ﯞﻩ ﺗﯧﻠﯧﯟﯨﺰﻭﺭ ﻗﺎﻧﺎﻟﻠﯩﺮﯨﺪﺍ ﺋﯘﻳﻐﯘﺭ ﺋﯧﻠﯩﻨﯩﯔ ﻗﻪﺷﻘﻪﺭ ﺷﻪﻫﯩﺮﻯ ﯞﻩ ﻛﯘﭼﺎ ﻧﺎﻫﯩﻴﯩﺴﯩﺪﻩ ﻳﯜﺯ ﺑﻪﺭﮔﻪﻥ ﻧﺎﺭﺍﺯﯨﻠﯩﻖ ﻫﯘﺟﯘﻣﻠﯩﺮﻯ ﻳﻪﻧﻰ ﭘﺎﺭﺗﻼﺵ ﯞﻩﻗﻪﻟﯩﺮﻯ ﺋﺎﺭﻗﺎ - ﺋﺎﺭﻗﯩﺪﯨﻦ ﺋﯧﻼﻥ ﻗﯩﻠﯩﻨﯩﭗ، ﺗﯜﺭﻟﯜﻙ ﺗﻪﺳﯩﺮﻟﻪﺭﻧﻰ ﭘﻪﻳﺪﺍ ﻗﯩﻠﺪﻯ.

ﻣﻪﺯﻛﯜﺭ ﺧﻪﯞﻩﺭﻟﻪﺭﺩﻩ ﺋﯘﻳﻐﯘﺭﻻﺭﻧﯩﯔ ﺋﺎﺗﺎﻟﻤﯩﺶ ﺗﯧﺮﺭﻭﺭﻟﯘﻕ ﻫﻪﺭﯨﻜﻪﺗﻠﯩﺮﻯ ﺑﯩﻠﻪﻥ ﺷﯘﻏﯘﻟﻠﯩﻨﯩﭗ، ﭘﺎﺭﺗﻠﯩﺘﯩﺶ ﻫﯘﺟﯘﻣﻠﯩﺮﻯ ﻗﻮﺯﻏﺎﯞﺍﺗﻘﺎﻧﻠﯩﻘﻰ ﺗﻪﺳﯟﯨﺮﻟﻪﻧﮕﻪﻥ ﺑﻮﻟﯘﭖ، ﺑﯘ ﺧﻮﯕﻜﻮﯕﻠﯘﻗﻼﺭﺩﺍ ﺋﯘﻳﻐﯘﺭﻻﺭﻏﺎ ﻗﺎﺭﯨﺘﺎ ﺋﻪﻛﺲ ﺗﻪﺳﯩﺮﻟﻪﺭﻧﻰ ﭘﻪﻳﺪﺍ ﻗﯩﻠﻐﺎﻥ ﺑﻮﻟﺴﺎ، ﻳﻪﻧﻪ ﺑﯩﺮ ﻗﯩﺴﯩﻢ ﺧﻮﯕﻜﻮﯕﻠﯘﻗﻼﺭﺩﺍ ﺑﻮﻟﯘﭘﻤﯘ ﺧﻮﯕﻜﻮﯕﺪﯨﻜﻰ ﺋﯚﻛﺘﯩﭽﻰ ﻛﯜﭼﻠﻪﺭ ﯞﻩ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﻠﯩﺮﯨﺪﻩ ﺋﯘﻳﻐﯘﺭﻻﺭﻏﺎ ﻧﯩﺴﺒﻪﺗﻪﻥ ﻫﯧﺴﺪﺍﺷﻠﯩﻘﻼﺭﻧﯩﻤﯘ ﻣﻪﻳﺪﺍﻧﻐﺎ ﻛﻪﻟﺘﯜﺭﺩﻯ.

ﺧﻮﯕﻜﻮﯕﺪﯨﻜﻰ ﺋﯚﻛﺘﯩﭽﻰ ﻛﯜﭼﻠﻪﺭﻧﯩﯔ ﺑﯩﻠﺪﯛﺭﯛﺷﯩﭽﻪ، ﺋﯩﻠﮕﯩﺮﻯ ﺧﻮﯕﻜﻮﯕﺪﺍ ﺋﺎﺧﺒﺎﺭﺍﺕ ﺋﻪﺭﻛﯩﻨﻠﯩﻜﯩﮕﻪ ﻛﻪﯓ ﻳﻮﻝ ﺑﯧﺮﯨﻠﮕﻪﻧﺪﯨﻦ ﺳﯩﺮﺕ، ﺧﻮﯕﻜﻮﯓ ﻣﻪﺗﺒﯘﺋﺎﺗﻠﯩﺮﻯ ﻣﻪﺳﯩﻠﯩﻠﻪﺭﮔﻪ ﺋﺎﺩﯨﻞ ﺑﺎﻫﺎ ﺑﯧﺮﯨﺸﺘﻪ ﺧﯩﺘﺎﻳﻨﯩﯔ ﺑﺎﺷﻘﺎ ﺟﺎﻳﻠﯩﺮﯨﻨﯩﯔ ﻣﻪﺗﺒﯘﺋﺎﺗﻠﯩﺮﯨﻐﺎ ﻗﺎﺭﯨﻐﺎﻧﺪﺍ ﺋﺎﻟﺪﯨﻨﻘﻰ ﺋﻮﺭﯗﻧﻨﻰ ﺋﯩﮕﯩﻠﻪﭖ ﻛﻪﻟﮕﻪﻥ ﺋﯩﻜﻪﻥ. ﺑﯩﺮﺍﻕ ﻧﯚﯞﻩﺗﺘﻪ ﺧﻮﯕﻜﻮﯓ ﻣﻪﺗﺒﯘﺋﺎﺗﻠﯩﺮﯨﺪﺍ ﭼﻪﺗﺌﻪﻟﻠﻪﺭﺩﯨﻜﻰ ﺋﯘﻳﻐﯘﺭ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﻠﯩﺮﯨﻨﯩﯔ ﺋﺎﺗﺎﻟﻤﯩﺶ ﺗﯧﺮﺭﻭﺭﻟﯘﻕ ﭘﺎﺋﺎﻟﯩﻴﻪﺗﻠﻪﺭﻧﻰ ﺋﯧﻠﯩﭗ ﺑﯧﺮﯨﺸﻘﺎ ﻳﯧﺘﻪﻛﭽﯩﻠﯩﻚ ﻗﯩﻠﯩﯟﺍﺗﻘﺎﻧﻠﯩﻘﻰ، ﺑﻮﻟﯘﭘﻤﯘ ﺋﯘﻳﻐﯘﺭ ﺋﯧﻠﯩﻨﯩﯔ ﻗﻪﺷﻘﻪﺭ ﺷﻪﻫﯩﺮﻯ ﯞﻩ ﻛﯘﭼﺎ ﻧﺎﻫﯩﻴﯩﺴﯩﺪﻩ ﻫﯚﻛﯜﻣﻪﺗﻜﻪ ﻗﺎﺭﺷﻰ ﺋﯧﻠﯩﭗ ﺑﯧﺮﯨﻠﻐﺎﻥ ﻧﺎﺭﺍﺯﯨﻠﯩﻖ ﻫﻪﺭﯨﻜﻪﺗﻠﯩﺮﯨﻨﯩﯔ ﺗﯧﺮﺭﻭﺭﻟﯘﻕ ﻫﯘﺟﯘﻡ ﺩﻩﭖ ﻗﺎﺭﯨﻠﯩﭗ، ﻗﺎﺗﺘﯩﻖ ﺑﯩﺮ ﺗﻪﺭﻩﭖ ﻗﯩﻠﯩﻨﯩﺸﻰ ﻛﯧﺮﻩﻛﻠﯩﻜﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻤﺎﻗﺘﺎ، ﺋﯚﻛﺘﯩﭽﯩﻠﻪﺭ ﺑﻮﻟﺴﺎ، ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﯩﻨﯩﯔ ﺋﺎﺧﺒﺎﺭﺍﺕ ﺋﻪﺭﻛﯩﻨﻠﯩﻜﯩﻨﻰ ﻗﺎﺗﺘﯩﻖ ﻛﻮﻧﺘﺮﻭﻝ ﻗﯩﻠﯩﺶ ﯞﺍﺳﺘﯩﺴﻰ ﯞﻩ ﺑﯩﺮ ﺗﻪﺭﻩﭘﻠﯩﻤﻪ ﺧﻪﯞﻩﺭ ﺋﯧﻼﻥ ﻗﯩﻠﯩﺶ ﺋﯘﺳﻠﯘﺑﻠﯩﺮﯨﻨﯩﯔ ﺧﻮﯕﻜﻮﯓ ﺋﺎﻻﻫﯩﺪﻩ ﺭﺍﻳﻮﻧﯩﻐﺎ ﻗﻪﺩﻩﺭ ﻛﯧﯖﻪﻳﺘﯩﻠﮕﻪﻧﻠﯩﻜﯩﻨﻰ ﺋﺎﺷﻜﺎﺭﯨﻠﯩﺪﻯ.

ﺑﯩﺮ ﻗﯩﺴﯩﻢ ﺧﻮﯕﻜﻮﯕﻠﯘﻗﻼﺭ ﻣﯘﺧﺒﯩﺮﻻﺭﻏﺎ، ﺋﯘﻳﻐﯘﺭﻻﺭ " ﺗﯧﺮﺭﻭﺭﭼﻰ " ﺩﯦﮕﻪﻥ ﻗﺎﺭﺍﺷﻠﯩﺮﯨﻨﻰ ﺋﯩﭙﺎﺩﯨﻠﯩﮕﻪﻥ ﺑﻮﻟﺴﺎ، ﻳﻪﻧﻪ ﺑﯩﺮ ﻗﯩﺴﯩﻢ ﺧﻮﯕﻜﻮﯕﻠﯘﻗﻼﺭ " ﺋﯘﻳﻐﯘﺭﻻﺭ ﻧﯧﻤﻪ ﺩﯦﮕﻪﻥ ﺟﺎﺳﺎﺭﻩﺗﻠﯩﻚ ﺑﯩﺮ ﻣﯩﻠﻠﻪﺕ، ﺋﻪﻣﺪﯨﻼ 17 ﻳﺎﺷﻘﺎ ﻛﯩﺮﮔﻪﻥ ﻗﯩﺰﻧﯩﯔ ﻫﺎﻳﺎﺗﯩﻨﻰ ﻗﯘﺭﺑﺎﻥ ﻗﯩﻠﯩﭗ، ﻫﯚﻛﯜﻣﻪﺗﻜﻪ ﺑﻮﻟﻐﺎﻥ ﻧﺎﺭﺍﺯﯨﻠﯩﻘﯩﻨﻰ ﺋﯩﭙﺎﺩﯨﻠﯩﺸﻰ ﻧﺎﻫﺎﻳﯩﺘﻰ ﺋﺎﺯ ﺋﯘﭼﺮﺍﻳﺪﯨﻐﺎﻥ ﺑﯩﺮ ﻗﻪﻫﺮﯨﻤﺎﻧﻠﯩﻖ ﺭﻭﻫ " ﺩﻩﭖ ﺑﺎﻫﺎ ﺑﯧﺮﯨﺸﺘﻰ.

ﺋﯘﻳﻐﯘﺭ ﻣﻪﺳﯩﻠﯩﺴﯩﮕﻪ ﻳﯧﻘﯩﻨﺪﯨﻦ ﻛﯚﯕﯜﻝ ﺑﯚﻟﯜﭖ ﺑﯘ ﻫﻪﻗﺘﻪ ﺗﻪﺗﻘﯩﻘﺎﺗﻼﺭ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺧﻮﯕﻜﻮﯕﺪﯨﻜﻰ ﺋﯚﻛﺘﯩﭽﻰ ﻛﯜﭼﻠﻪﺭ ﯞﻩ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﻯ ﺋﯘﻳﻐﯘﺭﻻﺭﻧﯩﯔ ﻳﯧﻘﯩﻨﺪﯨﻦ ﺑﯘﻳﺎﻥ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﻗﺎﺭﺷﯩﻠﯩﻖ ﻛﯚﺭﺳﯩﺘﯩﺶ ﻫﻪﺭﯨﻜﻪﺗﻠﯩﺮﯨﻨﻰ " ﭘﯩﭽﺎﻕ ﺳﯚﯕﻪﻛﻜﻪ ﻳﻪﺗﻜﻪﻧﺪﻩ، ﻳﯜﺯ ﺑﯧﺮﯨﺪﯨﻐﺎﻥ ﺋﯩﺴﻴﺎﻥ " ﺩﻩﭖ ﺑﺎﻫﺎﻟﯩﺪﻯ.

ﺧﻮﯕﻜﻮﯕﺪﯨﻜﻰ ﻣﻪﺷﻬﯘﺭ ﺋﻮﺑﺰﻭﺭﭼﻰ ﻣﺎﺭﺗﯩﻦ ﺋﻪﭘﻪﻧﺪﻯ ﺑﯘ ﻫﻪﻗﺘﻪ ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﯩﭗ ﻣﯘﻧﺪﺍﻕ ﺩﯦﺪﻯ: "ﺧﯩﺘﺎﻱ ﻫﯚﻛﯜﻣﯩﺘﻰ ﺋﯘﻳﻐﯘﺭﻻﺭﻧﯩﯔ ﻧﺎﺭﺍﺯﯨﻠﯩﻖ ﻫﻪﺭﯨﻜﻪﺗﻠﯩﺮﯨﻨﻰ ﺧﻪﻟﻘﺌﺎﺭﺍ ﺗﯧﺮﺭﻭﺭﭼﯩﻠﯩﻘﻨﯩﯔ ﺑﯩﺮ ﻗﯩﺴﻤﻰ ﻗﯩﻠﯩﭗ، ﺋﯘﻻﺭﻧﻰ ﺑﺎﺳﺘﯘﺭﯗﭖ، ﺋﯚﺯﯨﻨﻰ ﺧﯘﺩﺩﻯ ﻫﻪﻗﻘﺎﻧﯩﻲ ﻫﻪﺭﯨﻜﻪﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻧﺪﻩﻙ ﻛﯚﺭﺳﯩﺘﯩﭗ ﻛﻪﻟﺪﻯ ﯞﻩ ﺑﯘ ﺋﺎﺭﻗﯩﻠﯩﻖ ﺗﯧﺮﺭﻭﺭﭼﯩﻠﯩﻘﻘﺎ ﺯﻩﺭﺑﻪ ﺑﯧﺮﯨﯟﺍﺗﻘﺎﻥ ﺩﯙﻟﻪﺗﻠﻪﺭ ﻗﺎﺗﺎﺭﯨﻐﺎ ﺋﯚﺗﯜﭖ، ﺧﻪﻟﻘﺌﺎﺭﺍ ﺟﺎﻣﺎﺋﻪﺗﻨﯩﯔ ﻫﯩﻤﺎﻳﯩﺴﯩﮕﻪ ﺋﯧﺮﯨﺸﻤﻪﻛﭽﻰ ﺑﻮﻟﺪﻯ، ﻟﯧﻜﯩﻦ ﺋﺎﺭﻗﺎ ‏ - ﺋﺎﺭﻗﯩﺪﯨﻦ ﻳﯜﺯ ﺑﻪﺭﮔﻪﻥ ﺋﯘﻳﻐﯘﺭﻻﺭﻧﯩﯔ ﻫﯚﻛﯜﻣﻪﺗﻜﻪ ﺑﯩﻠﺪﯛﺭﯛﯞﺍﺗﻘﺎﻥ ﻗﺎﺭﺷﯩﻠﯩﻖ ﻫﻪﺭﯨﻜﻪﺗﻠﯩﺮﻯ ﺋﯘﻻﺭﻧﯩﯔ ﻫﯧﭽﻘﺎﭼﺎﻥ ﺧﻪﻟﻘﺌﺎﺭﺍ ﺗﯧﺮﺭﻭﺭﻟﯘﻗﻨﯩﯔ ﺑﯩﺮ ﻗﯩﺴﻤﻰ ﺋﻪﻣﻪﺳﻠﯩﻜﯩﻨﻰ ﺩﻩﻟﯩﻞ ‏ - ﭘﺎﻛﯩﺘﻰ ﺑﯩﻠﻪﻥ ﺋﯩﺴﭙﺎﺗﻼﭖ ﺑﻪﺭﻣﻪﻛﺘﻪ."

ﺧﯩﺘﺎﻱ ﻫﯚﻛﯜﻣﯩﺘﻰ ﺋﯚﺯﻟﯩﺮﻯ ﺋﯧﻼﻥ ﻗﯩﻠﻐﺎﻧﺪﻩﻙ ﺋﯘﻳﻐﯘﺭﻻﺭﻧﯩﯔ ﺋﯩﺸﻠﻪﺗﻜﻪﻥ ﭘﺎﺭﺗﻼﺗﻘﯘﭺ ﺑﻮﻣﺒﯩﻠﯩﺮﻯ ﻗﻮﻟﺪﺍ ﻳﺎﺳﺎﻟﻐﺎﻥ ﺑﻮﻣﺒﯩﻼﺭ، ﺋﯘﻻﺭ ﻫﻪﺭﮔﯩﺰﻣﯘ ﺧﻪﻟﻘﺌﺎﺭﺍﺩﯨﻜﻰ ﺗﯧﺮﺭﻭﺭﭼﯩﻼﺭ ﺋﯩﺸﻠﻪﺗﻜﻪﻥ ﺋﯩﻠﻐﺎﺭ ﺗﯩﭙﻠﯩﻖ ﻗﻮﺭﺍﻟﻼﺭﻏﺎ ﺋﻮﺧﺸﯩﻤﺎﻳﺪﯗ، ﺑﯘﻧﯩﯖﺪﯨﻦ ﺑﯩﺮ ﻗﺎﻧﭽﻪ ﯞﺍﻗﯩﺖ ﺋﯩﻠﮕﯩﺮﻯ ﺋﯜﺭﯛﻣﭽﻰ ﺷﻪﻫﯩﺮﯨﺪﻩ ﻳﯜﺯ ﺑﻪﺭﮔﻪﻥ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﯩﺪﻩ ﺋﯘﻳﻐﯘﺭ ﻳﺎﺷﻠﯩﺮﯨﻨﻰ ﺗﯧﺮﺭﻭﺭﻟﯘﻕ ﭘﯩﻼﻧﻠﯩﺮﻯ ﺗﯜﺯﻣﻪﻛﭽﻰ ﺑﻮﻟﻐﺎﻥ ﺩﻩﭖ ﺑﺎﺳﺘﯘﺭﻏﺎﻥ ﺧﯩﺘﺎﻱ ﻫﯚﻛﯜﻣﯩﺘﻰ ﺋﯘﻻﺭﻧﯩﯔ ﻳﯩﻤﻪﻙ ﭘﯩﺸﯘﺭﯗﺵ ﺋﯜﭼﯜﻥ ﺋﯚﻳﯩﺪﻩ ﻗﻮﻟﻠﯩﻨﯩﺪﯨﻐﺎﻥ ﭘﯩﭽﺎﻕ ﺑﯩﻠﻪﻥ ﻗﺎﺭﺷﯩﻠﯩﻖ ﻛﯚﺭﺳﻪﺗﻜﻪﻧﻠﯩﻜﯩﻨﻰ ﺋﯧﻼﻥ ﻗﯩﻠﻐﺎﻥ ﺋﯩﺪﻯ.

ﺋﯘﻧﺪﺍﻗﺘﺎ ﺧﻪﻟﻘﺌﺎﺭﺍ ﺗﯧﺮﺭﻭﺭ ﺗﻪﺷﻜﯩﻼﺗﻠﯩﺮﯨﻨﯩﯔ ﺑﯩﺮ ﻗﯩﺴﻤﻰ ﻫﯧﺴﺎﺑﻼﻧﻐﺎﻥ ﺋﯘﻳﻐﯘﺭﻻﺭ ﻧﯧﻤﻪ ﺋﯜﭼﯜﻥ ﻛﯜﭼﻠﯜﻙ ﻫﻪﺭﺑﯩﻲ ﻗﻮﺭﺍﻟﻼﺭﻏﺎ ﺋﯩﮕﻪ ﺋﻪﻟﻘﺎﺋﯩﺪﯨﮕﻪ ﺋﻮﺧﺸﺎﺵ ﺗﯧﺮﺭﻭﺭ ﺗﻪﺷﻜﯩﻼﺗﻠﯩﺮﯨﻨﯩﯔ ﻳﺎﺭﺩﯨﻤﻰ ﺋﺎﺳﺘﯩﺪﺍ ﺋﯘﻻﺭ ﺋﯩﺸﻠﻪﺗﻜﻪﻥ ﺋﯩﻠﻐﺎﺭ ﻗﻮﺭﺍﻟﻼﺭﻧﻰ ﻗﻮﻟﻼﻧﻤﺎﻱ ﺋﯚﺯﻟﯩﺮﻯ ﺋﯚﻳﺪﻩ ﻳﺎﺳﯩﯟﺍﻟﻐﺎﻥ ﺑﻮﻣﺒﯩﻼﺭﻧﻰ ﻗﻮﻟﻠﯩﻨﯩﺪﯗ؟

ﺋﻮﺑﺰﻭﺭﭼﻰ ﻣﺎﺭﺗﯩﻦ ﺋﻪﭘﻪﻧﺪﻯ ﺳﯚﺯﯨﺪﻩ ﻳﻪﻧﻪ ﻣﯘﻧﺪﺍﻕ ﺩﯦﺪﻯ": ﻣﯧﻨﯩﯖﭽﻪ ﻫﺎﺯﯨﺮ ﺋﯘﻳﻐﯘﺭﻻﺭ ﻗﻮﺑﯘﻝ ﻗﯩﻼﻟﻤﺎﻳﯟﺍﺗﻘﺎﻥ ﺑﻪﻛﻤﯘ ﻣﯘﻫﯩﻢ ﺑﯩﺮ ﻣﻪﺳﯩﻠﻪ ﺑﺎﺭ، ﺋﯘ ﺑﻮﻟﺴﯩﻤﯘ، ﺋﯘﻳﻐﯘﺭﻻﺭﻧﯩﯔ ﻳﺎﺵ ﻗﯩﺰﻟﯩﺮﯨﻨﻰ ﺧﯩﺘﺎﻱ ﺋﯚﻟﻜﯩﻠﯩﺮﯨﮕﻪ ﻳﯚﺗﻜﻪﺵ ﻣﻪﺳﯩﻠﯩﺴﻰ، ﺋﯘﻳﻐﯘﺭﻻﺭ ﻣﻪﻳﻠﻰ ﺩﯨﻨﯩﻲ ﺋﯧﺘﯩﻘﺎﺩ ﺟﻪﻫﻪﺗﺘﯩﻦ ﺑﻮﻟﺴﯘﻥ ﯞﻩ ﻳﺎﻛﻰ ﺋﯚﺭﭖ ‏ - ﺋﺎﺩﻩﺕ ﺟﻪﻫﻪﺗﺘﯩﻦ ﺑﻮﻟﺴﯘﻥ، ﺑﯘ ﺧﯩﻞ ﻛﻪﻣﺴﯩﺘﯩﺸﻨﻰ ﻗﻮﺑﯘﻝ ﻗﯩﻼﻟﻤﺎﻳﺪﯗ، ﺗﻪﻛﺸﯜﺭﯛﺷﻠﻪﺭﮔﻪ ﻗﺎﺭﯨﻐﺎﻧﺪﺍ، ﺧﯩﺘﺎﻱ ﺋﯚﻟﻜﯩﻠﯩﺮﯨﺪﻩ ﻫﺎﺯﯨﺮ ﻫﻪﺭ ﺧﯩﻞ ﻳﺎﻣﺎﻥ ﺋﺎﻗﯩﯟﻩﺗﻠﻪﺭﮔﻪ ﺋﯘﭼﺮﺍﯞﺍﺗﻘﺎﻥ ﺋﯘﻳﻐﯘﺭ ﺋﺎﻳﺎﻟﻠﯩﺮﻯ ﻧﺎﻫﺎﻳﯩﺘﯩﻤﯘ ﻛﯚﭖ ﺋﯩﻜﻪﻥ، ﺩﯦﻤﻪﻙ ﺑﯘ ﻗﯧﺘﯩﻢ ﻗﺎﺭﺷﯩﻠﯩﻖ ﺑﯩﻠﺪﯛﺭﮔﯜﭼﯩﻠﻪﺭ ﺋﺎﺭﯨﺴﯩﺪﺍ ﺋﺎﻳﺎﻟﻼﺭﻧﯩﯔ ﻛﯚﭖ ﺳﺎﻧﻠﯩﻘﻨﻰ ﺋﯩﮕﯩﻠﯩﺸﻰ، ﺋﯘﻳﻐﯘﺭﻻﺭﻧﯩﯔ ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﺑﻮﻟﻐﺎﻥ ﺋﯚﭼﻤﻪﻧﻠﯩﻜﯩﻨﯩﯔ ﻗﺎﻧﭽﯩﻠﯩﻚ ﺩﻩﺭﯨﺠﯩﺪﻩ ﻛﯜﭼﯩﻴﯩﭗ ﻛﻪﺗﻜﻪﻧﻠﯩﻜﯩﻨﯩﯔ ﻣﯘﻫﯩﻢ ﺑﯩﺮ ﺋﯩﭙﺎﺩﯨﺴﻰ."

ﮔﻪﺭﭼﻪ ﺧﻮﯕﻜﻮﯕﺪﺍ ﻣﺎﺭﺗﯩﻦ ﺋﻪﭘﻪﻧﺪﯨﻨﯩﯔ ﻗﺎﺭﯨﺸﯩﻐﺎ ﺋﻮﺧﺸﺎﺵ ﻗﺎﺭﺍﺷﺘﯩﻜﻰ ﻛﯩﺸﯩﻠﻪﺭ ﺧﯧﻠﻰ ﻛﯚﭖ ﺑﻮﻟﺴﯩﻤﯘ، ﺋﻪﻣﻤﺎ ﺧﻮﯕﻜﻮﯕﺪﯨﻜﻰ ﺯﯨﻴﺎﺭﯨﺘﯩﻤﯩﺰ ﺩﺍﯞﺍﻣﯩﺪﺍ ﺋﯘﻳﻐﯘﺭﻻﺭﻏﺎ ﺑﻮﻟﻐﺎﻥ ﺧﺎﺗﺎ ﻗﺎﺭﺍﺵ ﯞﻩ ﺋﯚﭼﻤﻪﻧﻠﯩﻜﻠﻪﺭﻧﯩﯖﻤﯘ ﻧﺎﻫﺎﻳﯩﺘﻰ ﺋﯧﻐﯩﺮ ﺋﯩﻜﻪﻧﻠﯩﻜﻰ ﺑﺎﻳﻘﺎﻟﺪﻯ.

ﺧﻮﯕﻜﻮﯕﺪﯨﻜﻰ ﻣﯧﺘﺮﻭ ﭘﺎﺭﻙ ﻣﯧﻬﻤﺎﻧﺨﺎﻧﯩﺴﻰ ﺧﺎﺩﯨﻤﻠﯩﺮﻯ ﺭﺍﺩﯨﺌﻮﻣﯩﺰ ﻣﯘﺧﺒﯩﺮﯨﻨﯩﯔ ﺋﯘﻳﻐﯘﺭ ﺋﯩﻜﻪﻧﻠﯩﻜﯩﺪﯨﻦ ﺧﻪﯞﻩﺭ ﺗﺎﭘﻘﺎﻧﺪﯨﻦ ﻛﯧﻴﯩﻦ، ﺗﯜﺭﻟﯜﻙ ﻗﯧﻴﯩﻨﭽﯩﻠﯩﻘﻼﺭﻧﻰ ﭼﯩﻘﯩﺮﯨﭗ، ﻣﯘﺧﺒﯩﺮﯨﻤﯩﺰﻧﻰ ﻣﻪﺯﻛﯜﺭ ﻣﯧﻬﻤﺎﻧﺨﺎﻧﯩﺪﯨﻦ ﺋﺎﻳﺮﯨﻠﯩﭗ ﺑﺎﺷﻘﺎ ﻣﯧﻬﻤﺎﻧﺨﺎﻧﯩﻐﺎ ﺋﻮﺭﯗﻧﻠﯩﺸﯩﺸﻘﺎ ﻣﻪﺟﺒﯘﺭﻟﯩﺪﻯ.