ﻣﻪﺭﻫﯘﻡ ﻣﯘﻫﻪﻣﻤﻪﺩ ﺭﻭﻫﻰ ﺋﯘﻳﻐﯘﺭ ﭼﻪﺗﺌﻪﻟﻠﻪﺭﺩﻩ ﻳﯧﺘﯩﺸﻜﻪﻥ ﺋﯩﺴﺘﯩﺪﺍﺗﻠﯩﻖ ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﯨﺪﯨﻦ ﺑﯩﺮﻯ ﺑﻮﻟﯘﭖ، ﺋﯘﻳﻐﯘﺭﻻﺭ ﯞﻩ ﺋﯘﻳﻐﯘﺭ ﺋﯧﻠﻰ ﺗﻮﻏﺮﯨﻠﯩﻖ ﻗﯩﻤﻤﻪﺗﻠﯩﻚ ﺋﻪﺳﻪﺭﻟﻪﺭﻧﻰ ﻗﺎﻟﺪﯗﺭﻏﺎﻥ ﺋﯩﻜﻪﻥ.

ﺋﯘﻳﻐﯘﺭ ﺯﯨﻴﺎﻟﯩﻴﺴﻰ ﻛﺎﻣﯩﻠﺠﺎﻥ ﻣﯘﻫﻪﻣﻤﻪﺩ ﺭﻭﻫﻰ ﺋﯘﻳﻐﯘﺭ ﻫﻪﻗﻘﯩﺪﻩ ﺗﻪﻳﻴﺎﺭﻟﯩﻐﺎﻥ ﻣﺎﻗﺎﻟﯩﺴﯩﺪﻩ ﻣﯘﻧﺪﺍﻕ ﺩﻩﭖ ﻳﺎﺯﯨﺪﯗ: "ﻣﯘﻫﻪﻣﻤﻪﺩ ﺭﻭﻫﻰ ﺋﯘﻳﻐﯘﺭ ﻣﯩﻼﺩﯨﻴﻪ 1911 - ﻳﯩﻠﻰ ﺋﯜﺳﺘﯜﻥ ﺋﺎﺗﯘﺷﺘﺎ ﺑﯩﺮ ﺗﯩﺠﺎﺭﻩﺗﭽﻰ ﺋﺎﺋﯩﻠﯩﺴﯩﺪﻩ ﺩﯗﻧﻴﺎﻏﺎ ﻛﻪﻟﮕﻪﻥ. 1912 - ﻳﯩﻠﻰ ﺩﺍﺩﯨﺴﻰ ﻣﯘﻫﻪﻣﻤﻪﺩ ﻣﯘﺳﺎ ﺋﻪﭘﻪﻧﺪﻯ ﻧﺎﻣﻪﻟﯘﻡ ﺑﯩﺮ ﯞﻩﻗﻪﺩﻩ ﯞﺍﭘﺎﺕ ﺑﻮﻟﯘﭖ، ﺑﯩﺮ ﻳﺎﺷﻠﯩﻖ ﺋﻮﻏﻠﯩﻨﻰ ﺩﯨﻴﺎﺭﯨﻤﯩﺰﻧﯩﯔ ﻗﺎﺑﺎﻫﻪﺕ ﻗﺎﭘﻠﯩﻐﺎﻥ ﺯﯗﻟﻤﻪﺗﻠﯩﻚ ﺋﺎﺳﻤﯩﻨﻰ ﺋﺎﺳﺘﯩﺪﺍ ﻳﯧﺘﯩﻢ، ﺗﺎﻳﺎﻧﭽﺴﯩﺰ ﻗﺎﻟﺪﯗﺭﯗﭖ ﻛﯧﺘﯩﺪﯗ. 1932 - ﻳﯩﻠﻰ ﻳﯧﮕﯩﺮﻣﻪ ﺑﯩﺮ ﻳﺎﺷﻠﯩﻖ ﻣﯘﻫﻪﻣﻤﻪﺩ ﺭﻭﻫﻰ ﺋﯘﻳﻐﯘﺭ ﻗﻪﺷﻘﯩﺮﻯ ﯞﻩﺗﻪﻥ ﺧﻪﻟﻘﯩﻨﯩﯔ ﺋﯚﺯﯨﮕﻪ ﺑﯧﻐﯩﺸﻠﯩﻐﺎﻥ ﻣﯧﻬﺮﻯ - ﻣﯘﻫﻪﺑﺒﯩﺘﯩﮕﻪ ﺟﺎﯞﺍﺏ ﻗﺎﻳﺘﯘﺭﯗﺵ ﺋﯜﭼﯜﻥ ﭘﺎﻛﯩﺴﺘﺎﻧﻐﺎ ﻣﺎﯕﻐﺎﻥ ﻧﺎﻣﻪﻟﯘﻡ ﺑﯩﺮ ﻛﺎﺭﯞﺍﻧﻐﺎ ﻗﯧﺘﯩﻠﯩﭗ، ﭘﺎﻛﯩﺴﺘﺎﻧﻨﯩﯔ ﭘﯩﺸﺎﯞﯗﺭ ﺷﻪﻫﯩﺮﯨﮕﻪ ﻳﯧﺘﯩﭗ ﻛﯧﻠﯩﺪﯗ ﯞﻩ ﺋﯘ ﻳﻪﺭﺩﻩ ﺑﯩﺮ ﻣﻪﺯﮔﯩﻞ ﺗﯘﺭﻏﺎﻧﺪﯨﻦ ﻛﯧﻴﯩﻦ ﺋﺎﻓﻐﺎﻧﯩﺴﺘﺎﻧﻨﯩﯔ ﻛﺎﺑﯘﻝ ﺷﻪﻫﯩﺮﯨﮕﻪ ﺑﯧﺮﯨﭗ، ﺑﯩﺮ ﻣﯧﻬﻤﺎﻧﺨﺎﻧﯩﻐﺎ ﭼﯜﺷﯩﺪﯗ. ﺋﯘﻧﯩﯔ ﺯﯨﺮﻩﻛﻠﯩﻜﻰ ﯞﻩ ﺋﯘﻳﻐﯘﺭﻻﺭﻏﺎ ﺧﺎﺱ ﺋﻪﺩﻩﭖ - ﺋﻪﺧﻼﻗﯩﺪﯨﻦ ﺗﻪﺳﯩﺮﻟﻪﻧﮕﻪﻥ ﻣﯧﻬﻤﺎﻧﺨﺎﻧﺎ ﺧﻮﺟﺎﻳﯩﻨﻰ ﺋﯘﻧﻰ ﻣﯧﻬﻤﺎﻧﺨﺎﻧﯩﻨﯩﯔ ﻫﯧﺴﺎﯞﺍﺗﭽﯩﺴﻰ ﻗﯩﻠﯩﭗ ﺗﻪﻳﯩﻨﻠﻪﻳﺪﯗ. ﺋﺎﺭﯨﺪﯨﻦ ﺋﯘﺯﯗﻥ ﺋﯚﺗﻤﻪﻱ ﺋﯘﻧﯩﯔ ﻫﺎﻻﻟﻠﯩﻖ ﺑﯩﻠﻪﻥ ﻗﯩﻠﻐﺎﻥ ﺧﯩﺰﻣﯩﺘﯩﺪﯨﻦ ﺳﯜﻳﯜﻧﯜﭖ ﻛﻪﺗﻜﻪﻥ ﺧﻮﺟﺎﻳﯩﻦ ﻣﯩﻠﻠﻰ ﺋﻪﺳﻪﺑﯩﻴﻪﺗﻠﻪﺭﻧﻰ ﺑﯩﺮ ﻳﺎﻗﻘﺎ ﻗﺎﻳﺮﯨﭗ ﻗﻮﻳﯘﭖ، ﺋﯘﻧﻰ ﺋﯚﺯ ﺑﺎﺟﯩﺴﻨﯩﯔ ﻗﯩﺰﯨﻐﺎ ﺋﯚﻳﻠﻪﻧﺪﯛﺭﮔﻪﻥ. ﺋﯘ ﺋﺎﻓﻐﺎﻧﯩﺴﺘﺎﻧﺪﺍ ﺗﯘﺭﯗﺵ ﺟﻪﺭﻳﺎﻧﯩﺪﺍ ﺋﻪﺭﻩﺏ، ﺗﯜﺭﻙ، ﭘﻮﺷﺘﯘ ﯞﻩ ﭘﺎﺭﯨﺲ ﺗﯩﻠﻠﯩﺮﯨﻨﻰ ﭘﯩﺸﺸﯩﻖ ﺋﯚﮔﯩﻨﯩﭗ، ﺑﯩﻠﯩﻤﮕﻪ ﺑﻮﻟﻐﺎﻥ ﺗﻪﺷﻨﺎﻟﯩﻘﯩﻨﻰ ﻗﺎﻧﺪﯗﺭﯗﺷﻘﺎ ﻛﯩﺮﯨﺸﻜﻪﻥ ﯞﻩ ﺷﯘ ﺗﯩﻠﻼﺭﺩﺍ ﻫﻪﺭ ﺧﯩﻞ ﺷﯧﺌﯩﺮ، ﺋﯩﻠﻤﯩﻲ ﻣﺎﻗﺎﻟﯩﻠﻪﺭﻧﻰ ﻳﺎﺯﻏﺎﻥ."

ﻣﯘﻫﻪﻣﻤﻪﺩ ﺭﻭﻫﻰ ﺋﯘﻳﻐﯘﺭﻧﯩﯔ ﺋﻪﻣﮕﻪﻛﻠﯩﺮﻯ

ﻛﺎﻣﯩﻠﺠﺎﻥ ﻣﺎﻗﺎﻟﯩﺴﯩﺪﻩ ﻳﻪﻧﻪ ﻣﯘﻧﺪﺍﻕ ﺩﻩﭖ ﻳﺎﺯﯨﺪﯗ: " ﺋﯘ ﭘﺎﺭﯨﺲ، ﭘﻮﺷﺘﯘ ﺋﻪﺩﻩﺑﯩﻴﺎﺕ ﺳﺎﻫﻪﺳﯩﮕﻪ ﻗﻪﺩﻩﻡ ﻗﻮﻳﯘﭖ، ﺋﺎﺯﻏﯩﻨﺎ ﯞﺍﻗﯩﺖ ﺋﯩﭽﯩﺪﯨﻼ ﺋﺎﻓﻐﺎﻥ ﺧﻪﻟﻘﯩﻨﯩﯔ ﻗﺎﻳﯩﻠﻠﯩﻘﯩﻨﻰ ﻗﻮﻟﻐﺎ ﻛﻪﻟﺘﯜﺭﮔﻪﻥ ﯞﻩ ﺋﺎﻓﻐﺎﻧﯩﺴﺘﺎﻧﺪﯨﻜﻰ ﻣﻪﺷﻬﯘﺭ "ﺋﻪﻧﯩﺲ" ﻧﺎﻣﻠﯩﻖ ﭘﻮﺷﺘﯘ ﺗﯩﻠﯩﺪﯨﻜﻰ ﮔﯧﺰﯨﺘﯩﻨﯩﯔ ﻣﯘﻫﻪﺭﺭﯨﺮﻟﯩﻚ ﺧﯩﺰﻣﯩﺘﯩﻨﻰ ﺋﯩﺸﻠﯩﮕﻪﻥ. ﺋﯘ ﺑﯘ ﺟﻪﺭﻳﺎﻧﺪﺍ "ﺗﯜﺭﻛﻠﻪﺭ ﺋﯧﭙﺘﯩﺨﺎﺭﻯ" ﺩﯦﮕﻪﻥ ﺋﻪﺭﻩﭖ ﺗﯩﻠﯩﺪﯨﻜﻰ ﭼﻮﯓ ﻫﻪﺟﯩﻤﻠﯩﻚ ﺗﺎﺭﯨﺨﻰ ﻛﯩﺘﺎﺑﯩﻨﻰ ﻳﯧﺰﯨﺸﻘﺎ ﻛﯩﺮﯨﺸﻜﻪﻥ. ﻫﻪﻣﺪﻩ ﺋﯘﻳﻐﯘﺭﻻﺭﻏﺎ ﺋﺎﺋﯩﺖ ﻧﯘﺭﻏﯘﻥ ﻣﺎﻗﺎﻟﻪ، ﺧﻪﯞﻩﺭ، ﺋﻮﭼﯩﺮﯨﻜﻼﺭﻧﻰ ﻳﯧﺰﯨﭗ ﺋﺎﻓﻐﺎﻥ ﺧﻪﻟﻘﯩﮕﻪ ﺗﻮﻧﯘﺷﺘﯘﺭﻏﺎﻥ ﺑﻮﻟﯘﭖ، ﭘﺎﺭﯨﺲ ﺗﯩﻠﯩﺪﺍ ﻳﯧﺰﯨﻠﻐﺎﻧﻠﯩﺮﻯ ﺋﯩﭽﯩﺪﻩ ﺑﯩﺰ ﭘﻪﻗﻪﺕ ﻫﺎﺯﯨﺮ ﭘﺎﻛﯩﺴﺘﺎﻧﺪﯨﻜﻰ ﺋﺎﻟﻰ ﻣﻪﻛﺘﻪﭘﻠﻪﺭﻧﯩﯔ ﺋﻮﺗﺘﯘﺭﺍ ﺋﺎﺳﯩﻴﺎ ﺗﻪﺗﻘﯩﻘﺎﺕ ﻣﻪﺭﻛﻪﺯﻟﯩﺮﯨﺪﻩ ﯞﻩ ﻫﻪﺭ ﻗﺎﻳﺴﻰ ﻛﯘﺗﯘﭘﺨﺎﻧﯩﻠﯩﺮﯨﺪﺍ ﺳﺎﻗﻠﯩﻨﯩﯟﺍﺗﻘﺎﻥ "ﻳﯩﭙﻪﻙ ﻳﻮﻟﯩﺪﯨﻜﻰ ﺧﻮﺗﻪﻥ ﺩﺍﺳﺘﺎﻧﻰ" ﺩﯦﮕﻪﻥ ﺗﺎﺭﯨﺨﻰ ﻣﺎﻗﺎﻟﯩﺴﻰ ﺑﯩﻠﻪﻥ "ﺭﻭﻫﻰ ﻗﺎﻳﻐﯘﺳﻰ" ﻧﺎﻣﻠﯩﻖ ﺷﯧﺌﯩﺮﻻﺭ ﺗﻮﭘﻠﯩﻤﯩﻨﯩﯔ ﺋﻪﺳﻠﻰ ﺋﻮﺭﮔﯩﻨﺎﻟﻰ ﺑﯩﻠﻪﻧﻼ ﺋﯘﭼﺮﯨﺸﯩﺸﻘﺎ ﻣﯘﻳﻪﺳﺴﻪﺭ ﺑﯘﻻﻟﯩﺪﯗﻕ. ﻗﺎﻟﻐﺎﻧﻠﯩﺮﯨﻨﻰ ﺗﯧﺨﯩﻤﯘ ﭼﻮﯕﻘﯘﺭ ﺋﯩﺰﺩﯨﻨﯩﭗ ﺑﯧﻘﯩﺸﻘﺎ ﺗﻮﻏﺮﺍ ﻛﯩﻠﯩﺪﯗ. ﺋﯘ ﻻﻫﻮﺭﺩﯨﻜﻰ ﭼﯧﻐﯩﺪﯨﻼ ﺩﻩﺳﻠﯩﯟﯨﺪﻩ " ﺭﻭﻫﻰ ﻧﺎﻟﯩﺴﻰ " ﺋﺎﻧﺪﯨﻦ "ﻳﯧﯖﻰ ﻣﯩﻠﻠﻰ ﺭﻭﻫ " ﺩﯦﮕﻪﻥ ﺋﯘﻳﻐﯘﺭ ﺗﯩﻠﯩﺪﺍ ﻳﯧﺰﯨﻠﻐﺎﻥ ﺋﯩﻜﻜﻰ ﺷﯧﺌﯩﺮﻻﺭ ﺗﻮﭘﻠﯩﻤﻰ ﻧﻪﺷﺮ ﻗﯩﻠﯩﻨﻐﺎﻧﺪﯨﻦ ﺑﺎﺷﻘﺎ، ﻳﻪﻧﻪ ﺋﻮﺭﺩﯗ ﺗﯩﻠﯩﺪﺍ ﻳﯧﺰﯨﻠﻐﺎﻥ ﻧﯘﺭﻏﯘﻥ ﻣﺎﻗﺎﻟﻪ، ﺧﻪﯞﻩﺭﻟﯩﺮﻯ ﭘﺎﻛﯩﺴﺘﺎﻧﺪﯨﻜﻰ ﻫﻪﺭ ﻗﺎﻳﺴﻰ ﮔﯧﺰﯨﺖ - ﺟﻮﺭﻧﺎﻟﻼﺭﺩﺍ ﺋﯩﻼﻥ ﻗﯩﻠﯩﻨﯩﺸﻘﺎ ﺑﺎﺷﻼﻳﺪﯗ.

1955 - ﻳﯩﻠﻰ ﭘﺎﻛﯩﺴﺘﺎﻥ ﺭﺍﺩﯨﺌﻮ ﺋﯩﺴﺘﺎﻧﺴﯩﺴﻰ ﺗﯜﺭﻛﭽﻪ ﺋﺎﯕﻠﯩﺘﯩﺶ ﺑﺎﺷﻠﯩﻐﺎﻧﺪﺍ، ﻣﯘﻫﻪﻣﻤﻪﺩ ﺭﻭﻫﻰ ﺋﯩﺴﺘﺎﻧﺴﯩﻨﯩﯔ ﺗﺎﻟﻼﺵ ﺋﯩﻤﺘﯩﻬﺎﻧﯩﺪﯨﻦ ﻣﯘﯞﻩﭘﭙﯩﻘﯩﻴﻪﺗﻠﯩﻚ ﺋﯚﺗﯜﭖ، ﺋﯘﻳﻐﯘﺭﭼﻪ ﺋﺎﯕﻠﯩﺘﯩﺸﻨﻰ ﺑﺎﺷﻼﻳﺪﯗ. ﺷﯘﻧﯩﯔ ﺑﯩﻠﻪﻥ ﺭﺍﺩﯨﺌﻮ ﺋﯩﺴﺘﺎﻧﺴﯩﺴﯩﻨﯩﯔ ﺗﻪﻣﯩﻨﻠﯩﺸﻰ ﺑﯩﻠﻪﻥ ﺑﯩﺮ ﻳﯜﺭﯛﺵ ﻗﻮﺭﯛ ‏ - ﺟﺎﻳﻐﺎ ﺋﯩﮕﻪ ﺑﻮﻟﯩﺪﯗ. ﺋﻪﻣﻤﺎ ﺋﯘﻧﯩﯔ ﺑﯘ ﻳﯩﻠﻤﺎﻥ ﺗﯘﺭﻣﯘﺷﯩﻤﯘ ﺋﯘﺯﯗﻧﻐﺎ ﺑﺎﺭﻣﺎﻳﺪﯗ. ﺋﯚﻣﺮﻯ ﺗﯧﺨﻰ ﻳﻪﺗﺘﻪ ﺋﺎﻳﻐﺎ ﺑﺎﺭﻣﯩﻐﺎﻥ ﺑﯘ ﺋﺎﯕﻠﯩﺘﯩﺶ ﺗﻮﺧﺘﯩﺘﯩﻠﯩﺪﯗ. ﺷﯘﻧﺪﺍﻕ ﻗﯩﻠﯩﭗ ﺭﻭﻫﻰ ﺋﻪﭘﻪﻧﺪﯨﮕﻪ ﻧﯩﺴﺒﻪﺗﻪﻥ ﺗﯘﺭﻣﯘﺵ ﺟﻪﻫﻪﺗﺘﻪ ﻗﻪﻟﻪﻡ ﻫﻪﻗﻘﯩﮕﻪ ﺗﺎﻳﯩﻨﯩﺸﺘﯩﻦ ﺑﺎﺷﻘﺎ ﻳﻮﻝ ﻗﺎﻟﻤﺎﻳﺪﯗ. ﺷﯘﻧﺪﺍﻗﺘﯩﻤﯘ ﺋﯘ ﭼﻮﯓ ﺋﻮﻏﻠﻰ ﻣﯘﻫﻪﻣﻤﻪﺩ ﺑﯘﻏﺮﺍ ﺑﯩﻠﻪﻥ ﻛﯩﭽﯩﻚ ﺋﻮﻏﻠﻰ ﻣﯘﻫﻪﻣﻤﻪﺩ ﺑﺎﺑﯘﺭﻧﻰ ﺋﯩﻘﺘﯩﺴﺎﺩﯨﻲ ﭼﯩﻘﯩﻤﻼﺭﻏﺎ ﻗﺎﺭﯨﻤﺎﻱ ﺋﻮﻗﯘﺗﯘﺷﻨﻰ ﺩﺍﯞﺍﻣﻼﺷﺘﯘﺭﯨﺪﯗ. ﺋﯘ ﻛﺎﺭﺍﭼﯩﺪﺍ ﺗﯘﺭﯗﺵ ﺟﻪﺭﻳﺎﻧﯩﺪﺍ 1959 - ﻳﯩﻠﻰ ﺋﯩﻨﮕﯩﻠﯩﺰ ﺗﯩﻠﺪﺍ ﻳﯧﺰﯨﻠﻐﺎﻥ "ﺗﺎﺧﺎﺭﻻﺭﻧﯩﯔ ﺋﻪﺳﻠﻰ ﻳﯜﺭﺗﻰ" ﻧﺎﻣﻠﯩﻖ ﻣﻪﺷﻬﯘﺭ ﺗﺎﺭﯨﺨﻰ ﺋﻪﺳﯩﺮﻯ ﻧﻪﺷﺮﺩﯨﻦ ﭼﯩﻘﯩﺪﯗ. ﺋﺎﺭﻗﯩﺪﯨﻨﻼ ﺋﻮﺭﺩﯗ ﺗﯩﻠﯩﺪﺍ ﻳﯧﺰﯨﻠﻐﺎﻥ " ﺗﯩﭙﭙﯘ ﺳﯘﻟﺘﺎﻧﻨﯩﯔ ﺋﻮﺳﻤﺎﻧﯩﻴﻪ ﺧﻪﻟﯩﭙﯩﺴﯩﮕﻪ ﻳﺎﺯﻏﺎﻥ ﻣﻪﻛﺘﯘﭘﻠﯩﺮﻯ" ﻧﺎﻣﻠﯩﻖ ﺗﺎﺭﯨﺨﻰ ﺋﻪﺳﯩﺮﯨﻤﯘ ﺋﯩﻼﻥ ﻗﯩﻠﯩﻨﯩﺪﯗ. ﻫﻪﻣﺪﻩ "ﺗﯜﺭﻛﻠﻪﺭﻧﯩﯔ ﺋﯩﺴﻼﻡ ﺩﯨﻨﯩﻐﺎ ﻗﻮﺷﻘﺎﻥ ﺗﯚﻫﭙﯩﻠﯩﺮﻯ" ﻧﺎﻣﻠﯩﻖ ﻣﺎﻗﺎﻟﯩﺴﻤﯘ ﺋﯩﻨﮕﯩﻠﯩﺰ، ﺋﻮﺭﺩﯗ ﺗﯩﻠﻠﯩﺮﯨﺪﯨﻜﻰ ﺩﺍﯕﻠﯩﻖ ﺟﯘﺭﻧﺎﻟﻼﺭﺩﺍ ﺋﯩﻼﻥ ﻗﯩﻠﯩﻨﯩﺸﻘﺎ ﺑﺎﺷﻼﻳﺪﯗ.

ﺋﯘﻧﯩﯖﺪﯨﻦ ﺑﺎﺷﻘﺎ ﻳﻪﻧﻪ ﺑﯩﺰ ﺋﯘﭼﺮﯨﺸﯩﺸﻘﺎ ﺳﺎﺯﺍﯞﻩﺭ ﺑﻮﻟﻐﺎﻥ، ﺗﯧﺨﻰ ﻧﻪﺷﺮﺩﯨﻦ ﭼﯩﻘﻤﯩﻐﺎﻥ "ﻳﯧﯖﻰ ﺋﯧﭽﯩﻠﻐﺎﻥ ﮔﯜﻟﻠﻪﺭ" ﻧﺎﻣﻠﯩﻖ ﺷﯧﺌﯩﺮﻻﺭ ﺗﻮﭘﻠﯩﻤﻰ، "ﺗﯜﺭﻛﻠﻪﺭ ﺋﯩﭙﺘﯩﺨﺎﺭﻯ" ﻧﺎﻣﻠﯩﻖ ﭼﻮﯓ ﻫﻪﺟﯩﻤﻠﯩﻚ ﺋﻪﺭﻩﺏ ﺗﯩﻠﯩﺪﺍ ﻳﯧﺰﯨﻠﻐﺎﻥ ﺗﺎﺭﯨﺨﻰ ﻛﯩﺘﺎﺑﻰ ﯞﻩ ﺋﯘﻧﯩﯔ ﺋﯘﻳﻐﯘﺭﭼﻪ ﺗﻪﺭﺟﯩﻤﯩﺴﯩﻤﯘ ﺋﻮﺭﮔﯩﻨﺎﻝ ﻫﺎﻟﯩﺘﯩﺪﻩ ﭘﺎﻛﯩﺴﺘﺎﻧﺪﯨﻜﻰ ﺋﺎﺗﺎﻗﻠﯩﻖ ﻛﯘﺗﯘﭘﺨﺎﻧﯩﻼﺭﺩﺍ ﺳﺎﻗﻼﻧﻤﺎﻗﺘﺎ".

ﻣﯘﻫﻪﻣﻤﻪﺩ ﺭﻭﻫﯩﻲ ﺋﯘﻳﻐﯘﺭ ﻗﻪﺷﻘﯩﺮﯨﻴﻨﯩﯔ ﯞﺍﭘﺎﺗﻰ

ﻛﺎﻣﯩﻠﺠﺎﻥ ﻳﻪﻧﻪ ﻣﯘﻧﺪﺍﻕ ﺩﻩﭖ ﻳﺎﺯﯨﺪﯗ: " ﻗﯩﺴﻘﯩﺴﻰ، ﺋﯩﻤﺎﻧﻰ ﯞﻩ ﻣﻪﺳﺌﯘﻟﯩﻴﻪﺕ ﺗﯘﻳﻐﯘﺳﻰ ﺋﻮﻳﻐﺎﻕ ﺑﯘ ﺋﻮﺕ ﻳﯜﺭﻩﻙ، ﻣﻮﻝ - ﻫﻮﺳﯘﻟﻠﯘﻕ ﺋﺎﻟﯩﻤﯩﻤﯩﺰ ﺋﯚﺯ ﻫﺎﻳﺎﺗﯩﻨﻰ ﻏﯘﺭﺑﻪﺗﭽﯩﻠﯩﻜﺘﻪ ﺋﯚﺗﻜﯜﺯﮔﻪﻥ ﺑﻮﻟﺴﯩﻤﯘ، ﻟﯧﻜﯩﻦ ﺋﻪﻧﻪ ﺷﯘﻧﺪﺍﻕ ﺋﺎﺩﺩﻯ ﺳﺎﺩﺩﺍ، ﻣﻪﻧﯩﻠﯩﻚ ﺋﯚﺗﻜﯜﺯﯛﭖ، ﻫﯩﺠﺮﯨﻴﻪ 1385 - ﻳﯩﻠﻰ، ﻣﯩﻼﺩﯨﻴﻪ 1965 - ﻳﯩﻠﻰ 12 - ﺋﺎﻳﻨﯩﯔ 8 - ﻛﯜﻧﻰ ﺑﯘ ﺩﯗﻧﻴﺎ ﺑﯩﻠﻪﻥ ﯞﯨﺪﺍﻻﺷﺘﻰ. ﺋﯘﻧﯩﯔ ﻛﺎﺭﺍﭼﯩﺪﯨﻜﻰ ﻗﻪﺑﺮﯨﺴﯩﻨﯩﯔ ﺋﯜﺳﺘﯩﮕﻪ ﺋﻮﻳﯘﻟﻐﺎﻥ:

"ﻫﯧﭻ ﺋﯩﺶ ﻗﯩﻼﻟﻤﺎﻱ ﻛﻪﺗﺘﯩﻢ ﺟﺎﻫﺎﻧﺪﯨﻦ،
ﺧﯘﺩﺍ ﺩﻩﭖ ﺋﯩﻲ ﻣﯧﻬﺮﯨﺒﺎﻥ ﭘﻪﺭﯞﻩﺭﺩﯨﮕﺎﺭﯨﻢ،
ﺑﯧﺸﯩﻤﻐﺎ ﺑﯩﺮ ﺗﯘﺗﺎﻡ ﮔﯜﻟﻨﻰ ﻗﯩﻞ ﺳﻮﯞﻏﺎ،
ﺋﯧﭽﯩﻠﺴﺎ ﮔﻪﺭ ﺑﯧﻐﯩﻤﺪﺍ ﮔﯜﻟﻰ ﺋﺎﺭﻣﺎﻧﯩﻢ.

ﺩﯦﮕﻪﻥ ﻣﻮﻧﯘ ﻣﯩﺴﺮﺍﻟﯩﺮﻯ ﺧﻪﻟﻘﯩﻨﯩﯔ ﺑﺎﺭﻟﯩﻖ ﯞﺍﭘﺎﺩﺍﺭ ﺋﻮﻏﯘﻝ - ﻗﯩﺰﻟﯩﺮﯨﻨﻰ ﺋﯩﻤﺎﻥ ﯞﻩ ﺋﺎﺯﺍﺩﻟﯩﻖ ﺋﯜﭼﯜﻥ ﻛﯚﺭﻩﺵ ﻗﯩﻠﯩﺸﻘﺎ ﭼﺎﻗﯩﺮﯨﺪﯗ. ﺷﯘﻧﺪﺍﻗﻼ ﺋﺎﺭﻣﺎﻥ ﮔﯜﻟﻠﯩﺮﻯ ﺋﯧﭽﯩﻠﻐﺎﻥ، ﺋﺎﺷﯩﻘﻼﺭﻧﯩﯔ ﯞﯨﺴﺎﻝ ﭘﻪﻳﺘﻠﯩﺮﻯ ﻳﯧﺘﯩﭗ ﻛﻪﻟﮕﻪﻥ، ﺟﺎﻫﺎﻟﻪﺕ ﻗﻪﭘﻪﺳﻠﯩﺮﻯ ﺳﯘﻧﺪﯗﺭﯗﻟﯘﭖ، ﺑﯘﻟﺒﯘﻟﻼﺭ ﻫﯚﺭﯨﻴﻪﺕ ﻧﯘﺭﯨﺪﺍ ﺟﻪﯞﻻﻥ ﻗﯩﻠﻐﺎﻥ ﻛﯜﻧﻠﻪﺭﺩﻩ، ﻏﻪﻟﯩﺒﻪ ﺳﯜﭘﯩﺘﯩﺪﻩ ﻗﻪﺑﺮﻩ ﺑﯧﺸﯩﻐﺎ ﺑﯩﺮ ﺩﻩﺳﺘﻪ ﮔﯜﻟﻨﯩﯔ ﻗﻮﻳﯘﻟﯩﺸﯩﻨﻰ ﺗﻪﺷﻨﺎﻟﯩﻖ ﺑﯩﻠﻪﻥ ﻛﯜﺗﻤﻪﻛﺘﻪ."