ﺧﯩﺘﺎﻱ ﻫﯚﻛﯜﻣﯩﺘﻰ ﺑﯧﻴﺠﯩﯖﻐﺎ ﺋﺎﺯﺍﺩﻟﯩﻖ ﺋﺎﺭﻣﯩﻴﯩﺪﯨﻦ 34 ﻣﯩﯔ ﺋﻪﺳﻜﻪﺭ ﻳﯚﺗﻜﻪﭖ ﻛﻪﻟﺪﻯ

ﻛﻮﻣﻤﯘﻧﯩﺴﺖ ﺧﯩﺘﺎﻱ ﻫﯚﻛﯜﻣﯩﺘﻰ ﺑﯘﻧﺪﺍﻕ ﺋﯩﻘﺘﯩﺴﺎﺩﯨﻲ ﭘﯩﻼﻧﻨﯩﯔ ﻛﺎﭘﺎﻟﯩﺘﻰ ﺋﺎﺳﺘﯩﺪﺍ، ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﻰ ﺑﺎﺷﻠﯩﻨﯩﺸﻘﺎ ﺑﯩﺮ ﻧﻪﭼﭽﻪ ﻛﯜﻥ ﻗﺎﻟﻐﺎﻥ ﻫﺎﺯﯨﺮﻗﻰ ﯞﺍﻗﯩﺘﺘﺎ، 'ﺋﻮﻟﯩﻤﭙﯩﻜﻨﻰ ﻗﻮﻏﺪﺍﺵ' ﺩﯦﮕﻪﻥ ﻧﺎﻡ ﺑﯩﻠﻪﻥ ﺑﯧﻴﺠﯩﯔ ﺷﻪﻫﯩﺮﯨﮕﻪ ﺋﺎﺯﺍﺩﻟﯩﻖ ﺋﺎﺭﻣﯩﻴﯩﺪﯨﻦ ﻫﺎﯞﺍ، ﺩﯦﯖﯩﺰ، ﻗﯘﺭﯗﻗﻠﯘﻕ ﻗﺎﺗﺎﺭﻟﯩﻖ ﻫﻪﺭ ﺧﯩﻞ ﺋﻪﺳﻜﻪﺭ ﺗﯜﺭﻟﯩﺮﻯ ﺑﯘﻳﯩﭽﻪ 34 ﻣﯩﯔ ﺋﻪﺳﻜﻪﺭ ﻳﯚﺗﻜﻪﭖ ﻛﻪﻟﺪﻯ.

ﻫﺎﺯﯨﺮ ﺑﯧﻴﺠﯩﯔ ﺷﻪﻫﯩﺮﯨﺪﯨﻜﻰ ﭼﻮﯓ - ﻛﯩﭽﯩﻚ ﻛﻮﭼﯩﻼﺭﻧﯩﯔ ﻫﻪﻣﻤﯩﺴﯩﺪﻩ ﺋﺎﺯﺍﺩﻟﯩﻖ ﺋﺎﺭﻣﯩﻴﻪ ﺳﻮﻟﺪﺍﺗﻠﯩﺮﻯ ﯞﻩ ﺳﺎﻗﭽﯩﻼﺭ ﮔﯜﺯﻩﺕ ﻗﯩﻠﯩﺪﯗ، ﻳﻮﻟﺪﯨﻦ ﺋﯚﺗﻜﻪﻥ ﺩﯙﻟﻪﺕ ﭘﯘﻗﺮﺍﻟﯩﺮﯨﻨﻰ ﺭﻩﺳﻤﯩﻴﻪﺗﺴﯩﺰ ﺗﻮﺳﯘﭖ ﺳﻮﺭﺍﻕ ﻗﯩﻠﯩﺪﯗ ﻳﺎﻛﻰ ﻳﯧﻨﯩﻨﻰ ﺋﺎﺧﺘﯘﺭﯨﺪﯗ.

ﺑﯧﻴﺠﯩﯔ ﺷﻪﻫﯩﺮﯨﺪﻩ ﺋﯚﺗﻜﻪﻟﻠﻪﺭﮔﻪ ﻳﻪﻧﻪ 300 ﻣﯩﯔ ﻓﻮﺗﻮ ﺋﺎﭘﭙﺎﺭﺍﺗﻰ ﺑﯧﻜﯩﺘﺘﻰ

ﺑﯘﻧﯩﯖﺪﯨﻦ ﺑﺎﺷﻘﺎ ﻳﻪﻧﻪ، ﻛﻮﻣﻤﯘﻧﯩﺴﺖ ﺧﯩﺘﺎﻱ ﻫﯚﻛﯜﻣﯩﺘﻰ ﺩﯙﻟﻪﺕ ﭘﯘﻗﺮﺍﻟﯩﺮﯨﻨﻰ ﻧﺎﺯﺍﺭﻩﺕ ﻗﯩﻠﯩﺶ ﺋﯜﭼﯜﻥ، ﺑﯧﻴﺠﯩﯔ ﺷﻪﻫﯩﺮﯨﮕﻪ 300 ﻣﯩﯔ ﺩﺍﻧﻪ ﻓﻮﺗﻮ ﺋﺎﭘﭙﺎﺭﺍﺗﻰ ﺋﻮﺭﯗﻧﻼﺷﺘﯘﺭﺩﻯ. ﺗﯧﻠﯧﻔﻮﻧﻼﺭﻧﻰ ﺋﻮﻏﯘﺭﻟﯘﻗﭽﻪ ﺧﺎﺗﯩﺮﯨﻠﻪﻳﺪﯨﻐﺎﻥ - ﺋﺎﯕﻼﻳﺪﯨﻐﺎﻥ ﺋﯧﻠﯧﻜﺘﺮﻭﻧﻠﯘﻕ ﺳﯩﺴﺘﯧﻤﺎ ﻗﯘﺭﺩﻯ. ﻫﻪﺗﺘﺎ ﺗﺎﻛﺴﯩﻼﺭﻏﯩﻤﯘ ﺟﺎﺳﯘﺳﻠﯘﻕ ﻓﻮﺗﻮ ﺋﺎﭘﭙﺎﺭﺍﺗﻠﯩﺮﻯ ﯞﻩ ﺳﯜﻧﺌﯩﻲ ﻫﻪﻣﺮﺍﻫ ﺋﺎﺭﻗﯩﻠﯩﻖ ﺟﯘﻏﺮﺍﭘﯩﻴﯩﻠﯩﻚ ﺗﻮﭼﻜﯩﻼﺭﻧﻰ ﻛﯚﺭﺳﯩﺘﯩﺪﯨﻐﺎﻥ ﺋﯘﭼﯘﺭ ﺋﯜﺳﻜﯜﻧﯩﻠﯩﺮﻯ ﺑﯧﻜﯩﺘﺘﻰ.

'ﻣﻪﻳﺪﺍﻥ ﺗﺎﺯﯨﻼﺵ' ﺩﯦﮕﻪﻥ ﺋﺎﺗﺎﻟﻐﯘ ﻳﻪﻧﻪ ﭘﻪﻳﺪﺍ ﺑﻮﻟﺪﻯ

ﺭﺍﺩﯨﺌﻮﻣﯩﺰﻧﯩﯔ ﺋﻮﺑﺰﻭﺭﭼﯩﺴﻰ ﭼﯧﻦ ﻛﯘﻳﺪﯤ ﺋﻪﭘﻪﻧﺪﻯ ﺧﯩﺘﺎﻳﻨﯩﯔ ﻫﺎﺯﯨﺮ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﻰ ﺋﯚﺗﻜﯜﺯﯛﺷﻜﻪ ﻗﺎﺭﯨﺘﺎ ﻗﯩﻠﯩﯟﺍﺗﻘﺎﻥ ﻫﻪﺭ ﺧﯩﻞ ﺗﻪﻳﻴﺎﺭﻟﯩﻘﯩﻐﺎ ﯞﻩ ﺧﯩﺘﺎﻳﺪﺍ ﭘﻪﻳﺪﺍ ﺑﻮﻟﻐﺎﻥ 'ﻣﻪﻳﺪﺍﻥ ﺗﺎﺯﯨﻼﺵ' ﺩﯦﮕﻪﻥ ﺋﺎﺗﺎﻟﻐﯘﻧﯩﯔ ﻳﻪﻧﻪ ﭘﻪﻳﺪﺍ ﺑﻮﻟﻐﺎﻧﻠﯩﻘﯩﻐﺎ ﺋﺎﺳﺎﺳﻪﻥ، ﺑﯘﻧﻰ 'ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻚ ﻛﯧﺴﯩﻠﻰ' ﺩﻩﭖ ﺋﺎﺗﯩﺪﻯ.

 - ﺧﯩﺘﺎﻳﻨﯩﯔ ﻫﻪﺭ ﻗﺎﻧﺪﺍﻕ ﺋﯘﭼﯘﺭ ﯞﺍﺳﺘﯩﻠﯩﺮﯨﻨﻰ ﺋﺎﺧﺘﯘﺭﯗﭖ ﻛﯚﺭﺳﻪ، 'ﺋﻮﻟﯩﻤﭙﯩﻜﻨﻰ ﻗﻪﺗﺌﯩﻲ ﻗﻮﻏﺪﺍﻳﻤﯩﺰ' ﺩﻩﻳﺪﯨﻐﺎﻥ ﻫﻪﺭﺑﯩﻲ ﺷﯘﺋﺎﺭ (ﺋﯘﺭﯗﺵ ﺷﯘﺋﺎﺭﻯ) ﺋﯘﭼﺮﺍﻳﺪﯗ، - ﺩﻩﭖ ﺋﻮﺑﺰﻭﺭﯨﻨﻰ ﺑﺎﺷﻼﻳﺪﯗ ﭼﯧﻦ ﻛﯘﻳﺪﯤ ﺋﻪﭘﻪﻧﺪﻯ، - ﺧﯩﺘﺎﻱ ﻫﯚﻛﯜﻣﯩﺘﻰ ﺑﯧﻴﺠﯩﯖﺪﺍ ﺋﯚﺗﻜﯜﺯﯨﻠﯩﺪﯨﻐﺎﻥ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻨﻰ 'ﻗﻮﻏﺪﺍﺵ' ﺩﯦﮕﻪﻥ ﻧﺎﻡ ﺑﯩﻠﻪﻥ 11 ﺩﯨﯟﯨﺰﯨﻴﻪ ﻗﻮﺭﺍﻟﻠﯩﻖ ﺳﺎﻗﭽﯩﻨﻰ ﯞﻩ 60 ﻣﯩﯔ ﺳﺎﻗﭽﯩﻨﻰ ﺋﯩﺸﻘﺎ ﺳﯧﻠﯩﯟﺍﺗﻘﺎﻥ ﺋﯩﺪﻯ.

ﻳﯧﻘﯩﻨﺪﺍ ﻳﻪﻧﻪ ﺑﯘﻣﯘ ﻳﯧﺘﯩﺸﻤﻪﻱ، ﺑﺎﺷﻘﺎ ﺋﯚﻟﻜﯩﻠﻪﺭﺩﯨﻨﻤﯘ ﺳﺎﻗﭽﻰ ﻳﯚﺗﻜﻪﭖ ﻛﻪﻟﺪﻯ. ﺋﺎﺷﻜﺎﺭﯨﻠﯩﻨﯩﺸﯩﭽﻪ، ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﻰ ﺑﺎﺷﻠﯩﻨﯩﺪﯨﻐﺎﻥ ﯞﺍﻗﯩﺘﺘﺎ ﺑﯧﻴﺠﯩﯔ، ﺗﻴﻪﻧﺠﯩﻦ، ﺳﻪﻧﺪﯗﯓ، ﺷﺎﯕﺨﻪﻱ ﻗﺎﺗﺎﺭﻟﯩﻖ ﺟﺎﻳﻼﺭﺩﺍ ﺋﺎﺳﻤﺎﻧﺪﺍ ﺋﺎﻳﺮﻭﭘﯩﻼﻥ ﺋﯘﭼﻤﺎﻳﺪﯗ، ﻳﻮﻟﺪﯨﻦ ﺋﯚﺗﯩﺪﯨﻐﺎﻥ ﺋﺎﭘﺘﻮﻣﻮﺑﯩﻠﻼﺭ ﻗﻮﺵ ﺑﻪﻟﮕﻪ ﺋﯧﺴﯩﭗ، ﻫﻪﺭ ﺧﯩﻞ ﺋﯚﺗﻜﻪﻟﻠﻪﺭﺩﯨﻦ ﺗﻪﻛﺮﺍﺭ - ﺗﻪﻛﺮﺍﺭ ﺗﻪﻛﺸﯜﺭﯛﭖ ﺋﯚﺗﻜﯜﺯﯨﻠﯩﺪﯗ. ﻗﯘﺭﯗﻟﯘﺵ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺋﯩﺶ ﺋﻮﺭﯗﻧﻠﯩﺮﯨﺪﺍ ﺋﯩﺶ ﺗﻮﺧﺘﺎﻳﺪﯗ.

 - ﺑﯘ ﺋﺎﻻﻣﻪﺗﻠﻪﺭ ﺋﺎﺭﻗﯩﻠﯩﻖ ﺧﯩﺘﺎﻱ ﻫﯚﻛﯜﻣﯩﺘﻰ ﺋﯚﺯﯨﻨﯩﯔ، ﺑﺎﻳﺮﺍﻣﻨﻰ ﻫﺎﺯﯨﻐﺎ، ﻫﺎﺯﯨﻨﻰ ﺑﺎﻳﺮﺍﻣﻐﺎ ﺋﺎﻳﻼﻧﺪﯗﺭﯨﺪﯨﻐﺎﻥ ﺋﻪﻧﺌﻪﻧﯩﺴﯩﻨﻰ ﺧﻪﻟﻘﻘﻪ ﺋﻪﺳﻠﻪﺗﻤﻪﻛﺘﻪ، - ﺩﻩﻳﺪﯗ ﭼﯧﻦ ﻛﯘﻳﺪﯤ ﺋﻪﭘﻪﻧﺪﻯ ﺋﻮﺑﺰﻭﺭﯨﺪﺍ. ﺋﯘ ﻛﯩﺸﯩﻠﻪﺭﻧﻰ ﺗﯚﯞﻩﻧﺪﯨﻜﻰ ﯞﻩﻗﻪﻟﻪﺭﻧﻰ ﺋﻪﺳﻠﻪﭖ ﻗﻮﻳﯘﺷﻘﺎ ﭼﺎﻗﯩﺮﺩﻯ:

1976 ‏ - ﻳﯩﻠﻰ 4 ‏ - ﺋﺎﻳﻨﯩﯔ 5 ‏ - ﻛﯜﻧﻰ ﺑﯧﻴﺠﯩﯔ ﺷﻪﻫﯩﺮﯨﺪﻩ، ﺧﻪﻟﻖ ﮔﯜﻟﭽﻪﻣﺒﯩﺮﻩﻙ ﻛﯚﺗﯜﺭﯛﭖ ﯞﻩ ﻣﻪﺭﺳﯩﻴﻪ ﺋﻮﻗﯘﭖ ﺗﻴﻪﻧﺌﻪﻧﻤﯧﻦ ﻣﻪﻳﺪﺍﻧﯩﻐﺎ ﺗﻮﭘﻼﻧﻐﺎﻥ ﺋﯩﺪﻯ. ﺧﯩﺘﺎﻱ ﻫﯚﻛﯜﻣﯩﺘﻰ ﻛﯧﭽﯩﺪﻩ ﭼﯩﺮﺍﻗﻨﻰ ﺋﯚﭼﯜﺭﯛﭖ، 'ﻣﻪﻳﺪﺍﻥ ﺗﺎﺯﯨﻼﺵ' ﺩﻩﭖ ﺟﺎﻛﺎﺭﻟﯩﺪﻯ. ﺋﻪﻳﻨﻰ ﯞﺍﻗﯩﺘﺘﺎ ﺑﻪﺵ ﺑﺎﺗﺎﻟﻴﻮﻥ ﺋﺎﺯﺍﺩﻟﯩﻖ ﺋﺎﺭﻣﯩﻴﻪ، 3000 ﺳﺎﻗﭽﻰ، ﺋﻮﻥ ﻣﯩﯖﻠﯩﻐﺎﻥ 'ﺧﻪﻟﻖ ﺋﻪﺳﻜﯩﺮﻯ' ﻳﯧﺘﯩﭗ ﻛﯧﻠﯩﭗ ﺧﻪﻟﻘﻨﻰ ﺋﯘﺭﯗﭖ، ﻗﻮﻏﻼﭖ، ﻗﻮﻟﻐﺎ ﺋﯧﻠﯩﭗ 'ﻣﻪﻳﺪﺍﻥ ﺗﺎﺯﯨﻼﺵ' ﺋﯧﻠﯩﭗ ﺑﺎﺭﻏﺎﻥ ﺋﯩﺪﻯ.

1989‏ - ﻳﯩﻠﻰ 6 ‏ - ﺋﺎﻳﻨﯩﯔ 4 ‏ - ﻛﯜﻧﻰ ﺳﻪﻫﻪﺭﺩﻩ، ﺧﯩﺘﺎﻱ ﻫﯚﻛﯜﻣﯩﺘﻰ ﻳﻪﻧﻪ ﺗﻴﻪﻧﺌﻪﻧﻤﯧﻦ ﻣﻪﻳﺪﺍﻧﯩﺪﯨﻜﻰ ﭼﯩﺮﺍﻗﻼﺭﻧﻰ ﺋﯚﭼﯜﺭﯛﭖ 'ﻣﻪﻳﺪﺍﻥ ﺗﺎﺯﯨﻼﺵ' ﺋﯧﻠﯩﭗ ﺑﺎﺭﺩﻯ. 'ﭘﻮﻻﺕ ﻛﺎﺳﻜﯩﻠﯩﻖ ﺑﻪﺩ - ﺑﻪﺷﯩﺮﻩ ﻫﺎﻳﯟﺍﻧﻼﺭ' ﺑﯘ ﻣﻪﻳﺪﺍﻧﻨﻰ ﭼﻪﻳﻠﯩﺪﻯ، ﺩﯦﻤﻮﻛﺮﺍﺗﯩﻴﻪ ﻫﻪﻗﻘﯩﺪﯨﻜﻰ ﻫﺎﻳﺎﺟﺎﻧﻠﯩﻖ ﺳﯚﺯﻟﻪﺭ ﺗﻮﺧﺘﯩﺪﻯ، ﻣﯩﯖﻠﯩﻐﺎﻥ ﺋﻮﻗﯘﻏﯘﭼﯩﻼﺭ ﻗﺎﻧﻐﺎ ﻣﯧﻠﻪﻧﺪﻯ.

2008 ‏ - ﻳﯩﻠﻰ 3 ‏ - ﺋﺎﻳﻨﯩﯔ 14 ﻛﯜﻧﻰ، ﻛﻮﻣﻤﯘﻧﯩﺴﺖ ﺧﯩﺘﺎﻳﻨﯩﯔ ﻗﻮﺭﺍﻟﻠﯩﻖ ﻗﯩﺴﯩﻤﻠﯩﺮﻯ ﻳﻪﻧﻪ ﺗﯩﺒﻪﺗﺘﻪ ﻣﻪﻳﺪﺍﻥ ﺗﺎﺯﯨﻼﺵ ﺋﯧﻠﯩﭗ ﺑﺎﺭﺩﻯ. ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺩﯨﻨﯩﻲ ﺳﯩﻴﺎﺳﯩﺘﯩﮕﻪ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﯛﭖ ﻧﺎﻣﺎﻳﯩﺶ ﻗﯩﻠﻐﺎﻥ ﺗﯩﺒﻪﺕ ﻻﻣﺎﻟﯩﺮﯨﻨﻰ ﺑﺎﺳﺘﯘﺭﺩﻯ. ﯞﻩﻗﻪﻧﻰ ﻛﯚﺭﮔﻪﻥ ﭼﻪﺗﺌﻪﻝ ﻣﯘﺧﺒﯩﺮﻟﯩﺮﯨﻨﻰ ﺗﯩﺒﻪﺗﺘﯩﻦ ﻗﻮﻏﻼﭖ ﭼﯩﻘﺎﺭﺩﻯ.

ﺧﯩﺘﺎﻳﻨﯩﯔ ﺋﯘﻳﻐﯘﺭﻻﺭﻏﺎ 'ﺗﯧﺮﺭﻭﺭﻟﯘﻕ' ﻗﯩﻠﯩﯟﺍﺗﻘﺎﻧﻠﯩﻘﯩﻐﺎ ﺑﯧﺮﯨﻠﮕﻪﻥ ﺟﺎﯞﺍﺏ

ﺳﯩﻴﺎﺳﻰ ﻣﯘﻻﻫﯩﺰﯨﭽﻰ ﻟﯩﻦ ﺑﺎﯞﺧﯘﺍ ﺋﻪﭘﻪﻧﺪﻯ ﺑﯜﮔﯜﻥ ﺋﯚﺯﯨﻨﯩﯔ ﺗﻮﺭ ﺑﯧﺘﯩﺪﻩ ﺋﯧﻼﻥ ﻗﯩﻠﻐﺎﻥ 'ﺧﯩﺘﺎﻱ ﻛﻮﻣﻤﯘﻧﯩﺴﺖ ﻫﯚﻛﯜﻣﯩﺘﯩﻨﯩﯔ ﻛﯚﺯﯨﮕﻪ ﻫﺎﺯﯨﺮ ﻳﻪﺭ ﻳﯜﺯﯨﺪﯨﻜﻰ ﺋﺎﺩﻩﻡ ﻳﺎﻛﻰ ﺩﻩﻝ - ﺩﻩﺭﻩﺧﻨﯩﯔ ﻫﻪﻣﻤﯩﺴﻰ ﻗﻮﺭﺍﻝ ﻛﯚﺗﯜﺭﮔﻪﻥ ﺟﻪﯕﭽﻰ ﺑﻮﻟﯘﭖ ﻛﯚﺭﯛﻧﯩﯟﺍﺗﯩﺪﯗ' ﺩﯦﮕﻪﻥ ﺋﻮﺑﺰﻭﺭﯨﺪﺍ ﺑﺎﻳﺎﻥ ﻗﯩﻠﯩﺸﯩﭽﻪ، ﺧﯩﺘﺎﻳﺪﺍ ﻫﺎﺯﯨﺮ ﺋﯘﻳﻐﯘﺭﻻﺭﻧﻰ 'ﺗﯧﺮﺭﻭﺭﭼﻰ' ﻗﯩﻠﯩﭗ ﻛﯚﺭﺳﻪﺗﻤﻪﻛﭽﻰ ﺑﻮﻟﯘﭖ ﻳﯧﺰﯨﻠﻐﺎﻥ ﻣﺎﻗﺎﻟﯩﻠﻪﺭ ﻛﺎﻟﯩﻨﯩﯔ ﺗﯜﻛﯩﺪﯨﻨﻤﯘ ﻛﯚﭖ.

ﺋﻪﻣﻤﺎ ﺑﯜﮔﯜﻥ ﻗﻪﺷﻘﻪﺭﺩﻩ ﻳﯜﺯ ﺑﻪﺭﮔﻪﻥ ﺧﯩﺘﺎﻳﻨﯩﯔ ﭼﯧﮕﺮﺍ ﻣﯘﺩﺍﭘﯩﺌﻪ ﻗﯩﺴﯩﻤﻠﯩﺮﯨﻐﺎ ﻫﯘﺟﯘﻡ ﻗﯩﻠﻐﺎﻥ ﯞﻩﻗﻪ، ﻛﻮﻣﻤﯘﻧﯩﺴﺖ ﺧﯩﺘﺎﻳﻨﯩﯔ ﺋﯘﻳﻐﯘﺭﻻﺭﻏﺎ 'ﺗﯧﺮﺭﻭﺭﻟﯘﻕ' ﻗﯩﻠﯩﯟﺍﺗﻘﺎﻧﻠﯩﻘﯩﻐﺎ ﺑﯧﺮﯨﻠﮕﻪﻥ ﺟﺎﯞﺍﺏ ﺑﻮﻟﺪﻯ.

ﺋﯘﭼﯘﺭ ﯞﺍﺳﺘﯩﻠﯩﺮﻯ ﺑﯜﮔﯜﻥ ﻗﻪﺷﻘﻪﺭﺩﻩ ﻳﯜﺯ ﺑﻪﺭﮔﻪﻥ ﯞﻩﻗﻪﻧﻰ'ﺗﯧﺮﺭﻭﺭﻟﯘﻕ' ﺩﯦﻤﯩﺪﻯ

ﺑﯜﮔﯜﻥ ﺧﻪﻟﻘﺌﺎﺭﺍﺩﺍ ﻗﻪﺷﻘﻪﺭﺩﻩ ﻳﯜﺯ ﺑﻪﺭﮔﻪﻥ ﯞﻩﻗﻪ ﻫﻪﻗﻘﯩﺪﻩ ﺋﯧﻼﻥ ﻗﯩﻠﯩﻨﻐﺎﻥ ﺧﻪﯞﻩﺭﻟﻪﺭﻧﯩﯔ ﻣﻪﺯﻣﯘﻧﯩﺪﺍ ﺑﯘﺭﯗﻧﻘﻰ ﺧﻪﯞﻩﺭﻟﻪﺭﺩﯨﻜﻰ ﺋﺎﺗﺎﻟﻐﯘ ﻗﻮﻟﻠﯩﻨﯩﻠﻤﯩﺪﻯ. ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﻰ، ﺭﻭﻳﺘﯧﺮﺱ ﺋﺎﮔﯧﻨﺘﻠﯩﻘﻰ، ﻓﺮﺍﻧﺴﯩﻴﻪ ﺋﺎﮔﯧﻨﺘﻠﯩﻘﻰ ﻗﺎﺗﺎﺭﻟﯩﻖ ﭼﻮﯓ ﺋﯘﭼﯘﺭ ﯞﺍﺳﺘﯩﻠﯩﺮﻯ ﺑﯜﮔﯜﻥ ﻗﻪﺷﻘﻪﺭﺩﻩ ﻳﯜﺯ ﺑﻪﺭﮔﻪﻥ ﯞﻩﻗﻪﻧﻰ 'ﺧﯩﺘﺎﻳﻨﯩﯔ ﭼﯧﮕﺮﺍ ﻣﯘﺩﺍﭘﯩﺌﻪ ﻗﯩﺴﯩﻤﻠﯩﺮﯨﻐﺎ ﻫﯘﺟﯘﻡ' ﻗﯩﻠﯩﻨﻐﺎﻥ ﯞﻩﻗﻪ ﺩﻩﭖ ﺋﺎﺗﯩﺪﻯ.

ﺧﯩﺘﺎﻳﻨﯩﯔ ﺷﯩﻨﺨﯘﺍ ﺋﺎﮔﯧﻨﺘﻠﯩﻘﻰ، ﺧﻪﻟﻖ ﮔﯧﺰﯨﺘﻰ، ﻫﻪﺗﺘﺎ ﺧﯩﺘﺎﻳﻨﯩﯔ ﺋﯜﺭﯛﻣﭽﯩﺪﯨﻜﻰ 'ﺗﻪﯕﺮﯨﺘﺎﻍ ﺗﻮﺭ ﺑﯧﺘﻰ'ﻣﯘ، ﻗﻪﺷﻘﻪﺭﺩﻩ ﻳﯜﺯ ﺑﻪﺭﮔﻪﻥ ﺑﯘ ﯞﻩﻗﻪﻧﻰ، ﮔﻪﺭﭼﻪ ﺑﻪﺯﯨﻠﯩﺮﻯ 'ﺯﻭﺭﺍﯞﺍﻧﻠﯩﻖ ﻫﻪﺭﯨﻜﻪﺕ'ﺩﯦﮕﻪﻥ ﺑﻮﻟﺴﯩﻤﯘ، ﺋﻪﻣﻤﺎ 'ﺗﯧﺮﺭﻭﺭﻟﯘﻕ ﻫﻪﺭﯨﻜﻪﺕ' ﺩﻩﭖ ﺋﺎﺗﯩﻴﺎﻟﻤﯩﺪﻯ.