ﺋﺎﭘﺘﻮﺭ ﻣﺎﻗﺎﻟﯩﺴﯩﻨﻰ ﺗﯩﺒﻪﺕ ﻣﻪﺳﯩﻠﺴﯩﻰ ﺧﻪﻟﻘﺌﺎﺭﺍﻟﯩﻖ ﺑﯩﺮ ﻣﻪﺳﯩﻠﻪ ﺩﻩﭖ ﺑﺎﺷﻼﻳﺪﯗ ﯞﻩ ﺑﯘﻧﯩﯔ ﻳﯧﻘﯩﻨﻘﻰ ﭘﺎﻛﯩﺘﻠﯩﺮﻯ ﺳﯜﭘﯩﺘﯩﺪﻩ 14 ‏ - ﻣﺎﺭﺕ ﯞﻩﻗﻪﺳﻰ ﯞﻩ ﺩﯗﻧﻴﺎﺩﺍ ﺩﺍﯞﺍﻡ ﻗﯩﻠﻐﺎﻥ ﻣﻪﺷﺌﻪﻝ ﯞﻩﻗﻪﻟﯩﺮﯨﻨﻰ ﻛﯚﺭﺳﯩﺘﯩﺪﯗ. ﺋﺎﭘﺘﻮﺭ ﻣﺎﻗﺎﻟﯩﺴﯩﺪﻩ، ﺗﯩﺒﻪﺕ 1951 ‏ - ﻳﯩﻠﻰ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﻨﻰ ﻗﻮﺑﯘﻝ ﻗﯩﻠﻐﺎﻧﺪﺍ ﺷﻪﺭﺗﻠﯩﻚ ﻗﻮﺑﯘﻝ ﻗﯩﻠﻐﺎﻧﻠﯩﻘﯩﻨﻰ ﻳﻪﻧﻰ ﺋﯩﻜﻜﻰ ﺗﻪﺭﻩﭖ ﺋﺎﺭﯨﺴﯩﺪﺍ 17 ﻣﺎﺩﺩﯨﻠﯩﻖ ﺷﻪﺭﺗﻨﺎﻣﻪ ﺗﯜﺯﯛﻟﮕﻪﻧﻠﯩﻜﯩﻨﻰ؛ ﺋﻪﻣﻤﺎ ﺧﯩﺘﺎﻳﻨﯩﯔ ﺑﯘ ﺷﻪﺭﺗﻨﺎﻣﯩﮕﻪ ﺭﯨﺌﺎﻳﻪ ﻗﯩﻠﻤﯩﻐﺎﻧﻠﯩﻘﯩﻨﻰ، ﺷﯘﯕﺎ ﺗﯩﺒﻪﺗﻠﯩﻜﻠﻪﺭﻧﯩﯔ ﻣﯘﺳﺘﻪﻗﯩﻠﻠﯩﻘﯩﻨﻰ ﻗﺎﻳﺘﯘﺭﯨﯟﯦﻠﯩﺶ ﻫﻮﻗﯘﻗﻰ ﺑﺎﺭﻟﯩﻘﯩﻨﻰ ﻧﯘﻗﺘﯩﻠﯩﻖ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ.

ﺗﯩﺒﻪﺗﻠﻪﺭﻧﯩﯔ 17 ﺑﯧﺘﯩﻤﻰ

ﺋﺎﭘﺘﻮﺭ ﺗﯩﻠﻐﺎ ﺋﺎﻟﻐﺎﻥ 17 ﺑﯧﺘﯩﻢ 1951 ‏ - ﻳﯩﻠﻰ 5 ‏ - ﺋﺎﻳﻨﯩﯔ 23 ‏ - ﻛﯜﻧﻰ ﺗﯩﺒﻪﺕ ﻳﻪﺭﻟﯩﻚ ﻫﯚﻛﯜﻣﯩﺘﻰ ﺑﯩﻠﻪﻥ ﺧﯩﺘﺎﻱ ﻣﻪﺭﻛﯩﺰﯨﻲ ﻫﯚﻛﯜﻣﻪﺕ ﺋﺎﺭﯨﺴﯩﺪﺍ ﺗﯜﺯﯛﻟﮕﻪﻥ. ﺷﻪﺭﺗﻨﺎﻣﯩﻨﯩﯔ 3 ‏ - ﻣﺎﺩﺩﯨﺴﯩﺪﺍ، ﺗﯩﺒﻪﺗﺘﻪ ﺋﺎﭘﺘﻮﻧﻮﻣﯩﻴﻪ ﻳﯜﺭﮔﯜﺯﯨﻠﯩﺪﯨﻐﺎﻧﻠﯩﻘﻰ ﺑﯧﻜﯩﺘﯩﻠﮕﻪﻥ ؛ 4 ‏ - ﻣﺎﺩﺩﯨﺴﯩﺪﺍ، ﺗﯩﺒﻪﺗﺘﻪ ﻳﻮﻟﻐﺎ ﻗﻮﻳﯘﻟﯘﯞﺍﺗﻘﺎﻥ ﻣﻪﯞﺟﯘﺕ ﺳﯩﻴﺎﺳﯩﻲ ﺗﯜﺯﯛﻣﻨﯩﯔ ﺋﯚﺯﮔﻪﺭﻣﻪﻳﺪﯨﻐﺎﻧﻠﯩﻘﻰ، ﺩﺍﻻﻱ ﻻﻣﺎﻧﯩﯔ ﺋﻮﺭﻧﻰ، ﻫﻮﻗﯘﻗﻰ ﯞﻩ ﺭﻭﻟﯩﻐﺎ ﺩﻩﺧﻠﻰ ﻗﯩﻠﻤﺎﻳﺪﯨﻐﺎﻧﻠﯩﻘﻰ ﺑﻪﻟﮕﯩﻠﻪﻧﮕﻪﻥ. ﺷﻪﺭﺗﻨﺎﻣﯩﻨﯩﯔ ﻛﯧﻴﯩﻨﻜﻰ ﻣﺎﺩﺩﯨﻠﯩﺮﯨﺪﺍ ﺗﯩﺒﻪﺗﻠﯩﻜﻠﻪﺭﻧﯩﯔ ﺗﯩﻠﻰ، ﻳﯧﺰﯨﻘﻰ، ﻣﺎﺋﺎﺭﯨﭙﻰ ﺗﻪﺭﻩﻗﻘﯩﻲ ﻗﯩﻠﺪﯗﺭﯗﻟﯩﺪﯨﻐﺎﻧﻠﯩﻘﻰ، ﺋﯚﺭﭖ - ﺋﺎﺩﻩﺕ ﯞﻩ ﺩﯨﻨﯩﻲ ﺋﻪﺭﻛﯩﻨﻠﯩﻚ ﻳﻮﻟﻐﺎ ﻗﻮﻳﯘﻟﯩﺪﯨﻐﺎﻧﻠﯩﻘﻰ ﺑﻪﻟﮕﯩﻠﻪﻧﮕﻪﻥ.

ﺋﺎﺩﯞﯗﻛﺎﺕ ﭘﺎﺋﯘﻝ ﻫﺎﺭﺭﯨﺲ ﺷﻪﺭﺗﻨﺎﻣﯩﺪﯨﻜﻰ ﻣﺎﻧﺎ ﻣﯘﺷﯘ ﻣﺎﺩﺩﯨﻼﺭﻏﺎ ﺧﯩﺘﺎﻱ ﺗﻪﺭﻩﭖ ﺋﻪﻣﻪﻝ ﻗﯩﻠﻤﯩﻐﯩﻨﻰ ﺋﯜﭼﯜﻥ، ﺗﯩﺒﻪﺕ ﺧﻪﻟﻘﯩﻨﯩﯔ 1959 ‏ - ﻳﯩﻠﻰ ﺋﯩﺴﻴﺎﻥ ﻛﯚﺗﯜﺭﮔﻪﻧﻠﯩﻜﻰ ﯞﻩ ﺩﺍﻻﻱ ﻻﻣﺎ ﺑﺎﺷﭽﯩﻠﯩﻘﯩﺪﺍ 80 ﻣﯩﯔ ﺗﯩﺒﻪﺗﻠﯩﻜﻨﯩﯔ ﻫﯩﻨﺪﯨﺴﺘﺎﻧﻐﺎ ﻫﯩﺠﺮﺍﺕ ﻗﯩﻠﻐﺎﻧﻠﯩﻘﯩﻨﻰ ﺑﺎﻳﺎﻥ ﻗﯩﻠﻐﺎﻥ ﯞﻩ ﻣﯘﻧﺪﺍﻕ ﺩﯦﮕﻪﻥ: ﺷﻪﺭﺗﻨﺎﻣﯩﻨﻰ ﺑﯘﺯﻏﺎﻥ ﺗﻪﺭﻩﭖ ﺧﯩﺘﺎﻱ، ﺷﯘﯕﺎ ﺗﯩﺒﻪﺗﺘﯩﻜﻰ ﺧﯩﺘﺎﻱ ﻫﺎﻛﯩﻤﯩﻴﯩﺘﻰ ﻣﺎﻫﯩﻴﻪﺕ ﺟﻪﻫﻪﺗﺘﯩﻦ ﻣﯘﺳﺘﻪﻣﻠﯩﻜﯩﭽﻰ ﻫﺎﻛﯩﻤﯩﻴﻪﺕ.

" ﺗﯩﺒﻪﺕ ﺟﯘﯕﮕﻮﻧﯩﯔ ﺑﯩﺮ ﭘﺎﺭﭼﯩﺴﻰ ﺩﯦﻴﯩﺶ ﺋﺎﻗﻤﺎﻳﺪﯨﻐﺎﻥ ﮔﻪﭖ "

ﺋﺎﭘﺘﻮﺭ ﺧﯩﺘﺎﻱ ﺗﻪﺭﻩﭘﻨﯩﯔ ﺷﯩﺰﺍﯓ ﺋﻪﺯﻩﻟﺪﯨﻦ ﺟﯘﯕﮕﻮﻧﯩﯔ ﺑﯩﺮ ﻗﯩﺴﻤﻰ ﺩﯦﮕﻪﻥ ﻗﺎﺭﯨﺸﯩﻨﻰ ﺋﯩﻨﻜﺎﺭ ﻗﯩﻠﯩﺪﯗ ﯞﻩ ﺋﻪﮔﻪﺭ ﺑﯘ ﺗﻮﻏﺮﺍ ﺩﻩﭖ ﻗﺎﺭﺍﻟﺴﯩﻤﯘ،ﺧﯩﺘﺎﻳﻨﯩﯔ ﺗﯩﺒﻪﺗﺘﯩﻜﻰ ﻫﺎﻛﯩﻤﯩﻴﯩﺘﯩﻨﻰ ﻗﺎﻧﯘﻧﯩﻴﻼﺷﺘﯘﺭﯗﺷﻘﺎ ﺋﺎﺳﺎﺱ ﺑﻮﻻﻟﻤﺎﻳﺪﯗ ﺩﻩﭖ ﺋﻪﺳﻜﻪﺭﺗﯩﺪﯗ ﯞﻩ ﻣﯘﻧﺪﺍﻕ ﻳﺎﺯﯨﺪﯗ: ﺗﺎﺭﯨﺨﺘﺎ ﻣﯩﻠﻠﻪﺗﻠﻪﺭ ﺑﯩﺮ - ﺑﯩﺮﯨﻨﯩﯔ ﻫﺎﻛﯩﻤﯩﻴﯩﺘﻰ ﺋﺎﺳﺘﯩﺪﺍ ﻳﺎﺷﺎﻳﺪﯨﻐﺎﻥ ﺋﻪﻫﯟﺍﻝ ﻛﯚﭖ ﺑﻮﻟﻐﺎﻥ.

ﻳﯧﻘﯩﻨﻨﯩﻼ ﻣﯩﺴﺎﻟﻐﺎ ﺋﺎﻟﺴﺎﻕ، ﺋﺎﻟﺠﯩﺮﯨﻴﻪ ﻓﺮﺍﻧﺴﯩﻴﯩﻨﯩﯔ ﺑﯩﺮ ﭘﺎﺭﭼﯩﺴﻰ ﺋﯩﺪﻯ، ﻓﯩﻨﻼﻧﺪﯨﻴﻪ ﺭﯗﺳﯩﻴﯩﻨﯩﯔ ﺑﯩﺮ ﭘﺎﺭﭼﯩﺴﻰ ﺋﯩﺪﻯ، ﻛﻮﺭﯨﻴﻪ ﻳﺎﭘﻮﻧﯩﻴﯩﻨﯩﯔ ﺑﯩﺮ ﭘﺎﺭﭼﯩﺴﻰ ﺋﯩﺪﻯ. ﺋﺎﭘﺘﻮﺭﻧﯩﯔ ﻗﺎﺭﯨﺸﯩﭽﻪ، ﺏ ﺩ ﺕ ﻗﯘﺭﯗﻟﻐﺎﻥ ﭼﺎﻏﺪﺍ، ﺩﯙﻟﻪﺗﻠﻪﺭﻧﯩﯔ ﺋﯚﺗﻤﯜﺷﺘﯩﻜﻰ ﻫﯚﻛﯜﻣﺮﺍﻧﻠﯩﻖ ﻣﯘﻧﺎﺳﯩﯟﻩﺗﻠﯩﺮﯨﮕﻪ ﯞﻩ ﻗﯩﺴﻤﻪﻥ ﻣﻪﺩﻩﻧﯩﻴﻪﺕ ﺋﻮﺭﺗﺎﻗﻠﯩﻘﯩﻐﺎ ﺗﺎﻳﯩﻨﯩﭗ ﺗﯘﺭﯗﭖ، ﺑﺎﺷﻘﺎ ﻣﯩﻠﻠﻪﺗﻠﻪﺭﻧﯩﯔ ﻫﻪﻕ - ﻫﻮﻗﯘﻗﯩﻐﺎ ﺗﺎﺟﺎﯞﯗﺯ ﻗﯩﻠﯩﺸﻨﯩﯔ ﺋﺎﻟﺪﯨﻨﻰ ﺋﯧﻠﯩﺶ ﺋﯜﭼﯜﻥ، ﺏ ﺩ ﺕ ﺷﻪﺭﺗﻨﺎﻣﯩﺴﯩﺪﺍ ﻣﯩﻠﻠﻪﺗﻠﻪﺭﻧﯩﯔ ﺋﯚﺯ ﺗﻪﻗﺪﯨﺮﯨﻨﻰ ﺋﯚﺯﻯ ﺑﻪﻟﮕﯩﻠﻪﺵ ﻫﻮﻗﯘﻗﻰ ﺑﺎﺭﻟﯩﻘﯩﻨﻰ ﺑﻪﻟﮕﯩﻠﯩﮕﻪﻥ. ﺩﯗﻧﻴﺎ ﺷﻪﺭﺗﻨﺎﻣﯩﻨﯩﯔ ﺑﯘ ﻣﺎﺩﺩﯨﺴﯩﻐﺎ ﺗﺎﻳﯩﻨﯩﭗ ﺗﯘﺭﯗﭖ ﮔﯧﺮﻣﺎﻧﯩﻴﻪ ﯞﻩ ﻳﺎﭘﻮﻧﯩﻴﯩﻨﯩﯔ ﻛﯧﯖﻪﻳﻤﯩﭽﯩﻠﯩﻜﯩﮕﻪ ﺧﺎﺗﯩﻤﻪ ﺑﻪﺭﮔﻪﻥ.

ﺋﺎﭘﺘﻮﺭ ﻳﻪﻧﻪ ﻣﯘﻧﺪﺍﻕ ﻳﺎﺯﯨﺪﯗ: ﺋﻪﻟﯟﻩﺗﺘﻪ، ﺋﯚﺯ ﺗﻪﻗﺪﯨﺮﯨﻨﻰ ﺋﯚﺯﻯ ﺑﻪﻟﮕﯩﻠﻪﺵ ﺩﯦﮕﻪﻧﻠﯩﻚ ﻣﯘﺳﺘﻪﻗﯩﻞ ﺑﻮﻟﯘﺵ ﺩﯦﮕﻪﻧﻠﯩﻚ ﺋﻪﻣﻪﺱ، ﺑﻪﻟﻜﻰ ﻣﯘﺳﺘﻪﻗﯩﻞ ﺑﻮﻟﯘﺵ ‏ - ﺑﻮﻟﻤﺎﺳﻠﯩﻘﻨﻰ ﺋﯚﺯﻯ ﺗﺎﻟﻼﺵ ﺩﯦﮕﻪﻧﻠﯩﻚ. ﺷﻪﺭﺗﻨﺎﻣﯩﺪﯨﻦ ﻗﺎﺭﯨﻐﺎﻧﺪﺍ، ﺗﯩﺒﻪﺗﻠﯩﻜﻠﻪﺭ ﺋﻪﻳﻨﻰ ﭼﺎﻏﺪﺍ ﺧﯩﺘﺎﻱ ﺑﯩﻠﻪﻥ ﺑﯩﻠﻠﻪ ﻳﺎﺷﺎﺷﻨﻰ ﺗﺎﻟﻠﯩﻐﺎﻥ، ﺑﯩﻠﻠﻪ ﻳﺎﺷﺎﺷﻨﯩﯔ ﻣﯘﻣﻜﯩﻦ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ ﺗﻮﻧﯘﭖ ﻳﻪﺗﻜﻪﻧﺪﻩ، ﺋﺎﻳﺮﯨﻢ ﻳﺎﺷﺎﺷﻨﻰ ﺗﻪﻟﻪﭖ ﻗﯩﻠﻐﺎﻥ، ﺑﯘﻧﯩﯔ ﺋﻪﺟﻪﺑﻠﯩﻨﯩﺪﯨﻐﺎﻥ ﯞﻩ ﺋﻪﻳﯩﺒﻠﯩﻨﯩﺪﯨﻐﺎﻥ ﻫﯧﭽﺒﯩﺮ ﻳﯧﺮﻯ ﻳﻮﻕ. ﺑﯘ ﺗﻪﻟﻪﭖ ﺗﺎﻣﺎﻣﻪﻥ ﻫﻪﻗﻠﯩﻖ ﯞﻩ ﻗﺎﻧﯘﻧﯩﻲ.

" ﻣﻪﺳﯩﻠﻪ ﺗﯩﺒﻪﺗﺘﻪ ﺋﻪﻣﻪﺱ، ﺟﻮﯕﮕﯘﻟﯘﻗﻼﺭﻧﯩﯔ ﻛﺎﻟﻠﯩﺴﯩﺪﺍ "

ﺋﺎﭘﺘﻮﺭ ﻣﺎﻗﺎﻟﯩﺴﯩﺪﻩ، ﻛﻮﺳﻮﯞﺍ ﻣﯘﺳﺘﻪﻗﯩﻠﻠﯩﻘﯩﻨﻰ ﺑﯜﮔﯜﻥ 40 ﺗﯩﻦ ﺋﺎﺭﺗﯘﻕ ﺩﯙﻟﻪﺗﻨﯩﯔ، ﺟﯜﻣﻠﯩﺪﯨﻦ ﺗﻪﺭﻩﻗﻘﯩﻲ ﺗﺎﭘﻘﺎﻥ ﻳﻪﺗﺘﻪ ﺩﯙﻟﻪﺗﻨﯩﯔ ﺑﯩﺮﺩﻩﻙ ﺋﯧﺘﯩﺮﺍﭖ ﻗﯩﻠﻐﺎﻧﻠﯩﻘﯩﻨﻰ، ﺋﻪﮔﻪﺭ، ﺗﯩﺒﻪﺗﻠﯩﻜﻠﻪﺭ ﻣﯩﻠﻠﯩﻲ ﻛﯩﻤﻠﯩﻜﻰ، ﺗﺎﺭﯨﺨﻰ ﯞﻩ ﻣﯩﻠﻠﯩﻲ ﻛﯜﺭﯨﺸﻰ ﯞﻩ ﺋﯘﻻﺭ ﻳﻮﻟﯘﻗﻘﺎﻥ ﻣﯩﻠﻠﯩﻲ ﻛﻪﻣﺴﯩﺘﯩﺶ ﻛﻮﺳﻮﯞﺍﻟﯩﻘﻼﺭﻏﺎ ﺳﯧﻠﯩﺸﺘﯘﺭﯗﻟﺴﺎ ﺗﯩﺒﻪﺕ ﻣﯘﺳﺘﻪﻗﯩﻠﻠﯩﻖ ﻣﻪﺳﯩﻠﯩﺴﯩﻨﯩﯔ ﺗﯧﺨﯩﻤﯘ ﻛﯜﭼﻠﯜﻙ ﻗﺎﻧﯘﻧﯩﻲ ﺋﺎﺳﺎﺳﻘﺎ ﺋﯩﮕﻪ ﺋﯩﻜﻪﻧﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ.

ﺋﺎﺩﯞﻭﻛﺎﺕ ﭘﺎﺋﯘﻝ ﺑﯘ ﻣﺎﻗﺎﻟﯩﺴﯩﻨﻰ ﺋﯧﻼﻥ ﻗﯩﻠﻐﺎﻥ ﻛﯜﻧﻰ ﺗﻴﻪﻥ ﺷﯩﻦ ﺋﯩﺴﯩﻤﻠﯩﻚ ﺑﯩﺮ ﺧﯩﺘﺎﻱ ﺯﯨﻴﺎﻟﯩﺴﯩﻤﯘ، ﺑﻮﺷﯜﻥ ﺗﻮﺭ ﺑﯧﺘﯩﺪﻩ ﺗﯩﺒﻪﺕ ﻣﯘﺳﺘﻪﻗﯩﻠﻠﯩﻘﻰ ﻫﻪﻗﻘﯩﺪﻩ ﻣﺎﻗﺎﻟﻪ ﺋﯧﻼﻥ ﻗﯩﻠﺪﻯ. ﺋﯘ ﻣﺎﻗﺎﻟﯩﺴﯩﺪﻩ، ﺧﯩﺘﺎﻳﻨﯩﯔ ﺩﺍﻻﻱ ﻻﻣﺎﻧﻰ ﻣﯘﺳﺘﻪﻗﯩﻠﻠﯩﻖ ﺗﻪﻟﻪﭖ ﻗﯩﻠﺪﻯ ﺩﻩﭖ ﺋﻪﻳﯩﺒﻠﯩﺸﯩﻨﻰ، ﻗﺎﻻﻗﻠﯩﻖ ﺩﻩﭖ ﺗﻪﻧﻘﯩﺪ ﻗﯩﻠﺪﻯ. ﺋﯘ ﺑﯘ ﻫﻪﻗﺘﻪ ﻣﯘﻧﺪﺍﻕ ﺩﻩﻳﺪﯗ: ﺑﯜﮔﯜﻥ ﻛﺎﻧﺎﺩﺍﺩﺍ ﻛﻴﯘﺑﻪﻙ ﺭﺍﻳﻮﻧﻰ ﻣﯘﺳﺘﻪﻗﯩﻠﻠﯩﻖ ﺗﻪﻟﻪﭖ ﻗﯩﻠﯩﯟﺍﺗﯩﺪﯗ، ﺷﯩﻤﺎﻟﯩﻲ ﺋﯩﺮﻻﻧﺪﯨﻴﯩﻤﯘ ﻣﯘﺳﺘﻪﻗﯩﻠﻠﯩﻖ ﺗﻪﻟﻪﭖ ﻗﯩﻠﯩﯟﺍﺗﯩﺪﯗ، ﺋﺎﻣﯧﺮﯨﻜﯩﻨﯩﯔ ﺋﺎﻳﺮﯨﻢ ﺷﺘﺎﺗﻠﯩﺮﯨﺪﯨﻤﯘ ﺑﯘ ﺧﯩﻞ ﺋﻪﻫﯟﺍﻝ ﻣﻪﯞﺟﯘﺕ.

ﺑﯘ ﺩﯙﻟﻪﺗﻠﻪﺭﺩﻩ ﻣﯘﺳﺘﻪﻗﯩﻠﻠﯩﻖ ﺗﻪﻟﻪﭖ ﻗﯩﻠﻐﺎﻧﻼﺭ،ﺗﻪﻧﻘﯩﺪﻟﯩﻨﯩﺶ ﯞﻩ ﺟﺎﺯﺍﻟﯩﻨﯩﺶ ﺋﻪﻣﻪﺱ، ﺋﯚﺯﻯ ﺋﺎﻳﺮﯨﻠﻤﺎﻗﭽﻰ ﺑﻮﻟﯘﯞﺍﺗﻘﺎﻥ ﺩﯙﻟﻪﺗﺘﻪ ﻫﻮﻗﯘﻕ ﺗﯘﺗﯘﯞﺍﺗﯩﺪﯗ. ﺩﯦﻤﻪﻙ ﺑﯘ ﻳﻪﺭﺩﯨﻜﻰ ﻣﻪﺳﯩﻠﻪ ﺗﯩﺒﻪﺗﺘﯩﻜﻰ ﻣﻪﺳﯩﻠﻪ ﺋﻪﻣﻪﺱ، ﺋﻪﻣﻪﻟﯩﻴﻪﺗﺘﻪ ﺟﻮﯕﮕﯘﻟﯘﻗﻼﺭﻧﯩﯔ ﻛﺎﻟﻠﯩﺴﯩﺪﯨﻜﻰ ﻣﻪﺳﯩﻠﻪ ﻳﻪﻧﻰ ﺋﺎﯓ ﻣﻪﺳﯩﻠﯩﺴﻰ.

ﺋﯚﺗﻤﯜﺵ ﺑﯘﻳﺮﯗﻕ ﺋﻪﻣﻪﺱ، ﺑﻪﻟﻜﻰ ﺩﻩﺭﺱ

ﺋﺎﺩﯞﻭﻛﺎﺕ ﭘﺎﺋﯘﻝ ﺧﯩﺘﺎﻳﻨﯩﯔ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺕ ﺭﺍﻳﻮﻧﻠﯩﺮﯨﻨﻰ ﺋﻪﺯﻩﻟﺪﯨﻦ ﺧﯩﺘﺎﻳﻨﯩﯔ ﺑﯩﺮ ﭘﺎﺭﭼﯩﺴﻰ ﺩﻩﭖ ﺋﻮﺗﺘﯘﺭﯨﻐﺎ ﻗﻮﻳﯘﺷﯩﻨﻰ، ﺯﯙﺭﯛﺭﯨﻴﻪﺗﺴﯩﺰ ﯞﻩ ﺋﻪﻫﻤﯩﻴﻪﺗﺴﯩﺰ ﺩﻩﭖ ﻛﯚﺭﺳﯩﺘﯩﺪﯗ.

ﭼﯜﻧﻜﻰ ﺋﯘﻧﯩﯔ ﻗﺎﺭﯨﺸﯩﭽﻪ، ﻫﺎﻛﯩﻤﯩﻴﻪﺗﻠﻪﺭﻧﻰ ﻗﺎﻧﯘﻧﯩﻴﻼﺷﺘﯘﺭﯨﺪﯨﻐﺎﻥ ﺗﺎﺭﯨﺦ ﺋﻪﻣﻪﺱ، ﺑﻪﻟﻜﻰ ﻫﯚﻛﯜﻣﺮﺍﻧﻠﯩﻖ ﻗﯩﻠﯩﻨﯩﯟﺍﺗﻘﺎﻥ ﺧﻪﻟﻘﻨﯩﯔ ﺋﯩﺮﺍﺩﯨﺴﯩﺪﯗﺭ. ﺗﯩﺒﻪﺗﻠﯩﻜﻠﻪﺭﻧﯩﯔ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﻨﻰ ﺧﺎﻟﯩﻤﺎﻳﺪﯨﻐﺎﻧﻠﯩﻘﻰ ﺩﯗﻧﻴﺎﻏﺎ ﺋﺎﻳﺎﻥ ﺑﻮﻟﺪﻯ: ﺋﻪﮔﻪﺭ ﺧﯩﺘﺎﻱ ﺗﯩﺒﻪﺗﺘﻪ ﺗﺎﺭﯨﺨﺘﯩﻦ ﺑﯘﻳﺎﻥ ﻫﯚﻛﯜﻣﺮﺍﻧﻠﯩﻖ ﻗﯩﻠﯩﭗ ﻛﻪﻟﮕﻪﻧﻠﯩﻜﯩﻨﻰ ﺋﯩﺴﭙﺎﺗﻼﭖ ﭼﯩﻘﺴﺎ ﺋﯘ ﭼﺎﻏﺪﺍ، ﺧﯩﺘﺎﻳﻨﯩﯔ ﺗﯩﺒﻪﺗﻠﯩﻜﻠﻪﺭﻧﻰ ﺗﺎﺭﯨﺨﺘﯩﻦ ﺑﯘﻳﺎﻥ ﺋﯧﺰﯨﭗ ﻛﻪﻟﮕﻪﻧﻠﯩﻜﻰ ﺋﯩﺴﭙﺎﺗﻼﻧﻐﺎﻥ ﺑﻮﻟﯩﺪﯗ، ﺑﯘ ﺋﺎﺭﻗﯩﻠﯩﻖ ﺋﻪﻳﻨﻰ ﯞﺍﻗﯩﺘﺘﺎ، ﺧﯩﺘﺎﻳﻨﯩﯔ ﺗﯩﺒﻪﺗﺘﯩﻦ ﺗﯧﺨﯩﻤﯘ ﺑﺎﻟﺪﯗﺭ ﭼﯧﻜﯩﻨﯩﭗ ﭼﯩﻘﯩﺸﻰ ﻛﯧﺮﻩﻛﻠﯩﻜﻰ ﯞﻩ ﺋﯚﺗﻤﯜﺷﺘﻪ ﺳﺎﻟﻐﺎﻥ ﺯﯗﻟﯘﻣﻰ ﺋﯜﭼﯜﻥ ﺗﯚﻟﻪﻡ ﺗﯚﻟﯩﺸﻰ ﻛﯧﺮﻩﻛﻠﯩﻜﻰ ﺋﯩﺴﭙﺎﺗﻠﯩﻨﯩﭗ ﭼﯩﻘﯩﺪﯗ.
 
 ﺋﺎﭘﺘﻮﺭ ﺗﺎﺭﯨﺨﺘﺎ 2000 ﻳﯩﻠﻐﺎ ﻳﯧﻘﯩﻦ ﺑﯩﻠﻠﻪ ﻳﺎﺷﯩﻐﺎﻥ ﺋﯘﻛﺮﺍﺋﯩﻨﺎ ﺑﯩﻠﻪﻥ ﺭﯗﺳﯩﻴﯩﻨﯩﯔ ﺑﯜﮔﯜﻥ ﺋﺎﻳﺮﯨﻢ ﻳﺎﺷﺎﯞﺍﺗﻘﺎﻧﻠﯩﻘﯩﻨﻰ ﻳﯘﻗﯩﺮﯨﻘﻰ ﭘﯩﻜﯩﺮﻟﯩﺮﯨﮕﻪ ﺋﺎﺳﺎﺱ ﻗﯩﻠﯩﭗ ﻛﯚﺭﺳﯩﺘﯩﺪﯗ.