ﻧﯘﺭﻏﯘﻧﻠﯩﻐﺎﻥ ﺗﯜﺭﻙ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻣﻪﺳﯩﻠﯩﺴﯩﮕﻪ ﺋﯚﺯ ﻣﻪﺳﯩﻠﯩﻤﯩﺰ ﺩﻩﭖ ﻗﺎﺭﺍﻳﺪﯗ. ﺷﯘﻧﯩﯔ ﺋﯜﭼﯜﻥ ﺗﯜﺭﻛﯩﻴﻪ ﺑﯩﻠﻪﻥ ﺧﯩﺘﺎﻱ ﺋﻮﺗﺘﯘﺭﯨﺴﯩﺪﯨﻜﻰ ﻣﯘﻧﺎﺳﯩﯟﻩﺗﻠﻪﺭ ﺑﻮﻟﺴﺎ ﺋﯘﻳﻐﯘﺭ ﺧﻪﻟﻘﻰ ﺑﯩﻠﻪﻥ ﺗﯜﺭﻙ ﺧﻪﻟﻘﻰ ﻳﯧﻘﯩﻨﺪﯨﻦ ﻛﯚﯕﯜﻝ ﺑﯚﻟﯜﭖ ﻛﯧﻠﯩﯟﺍﺗﻘﺎﻥ ﺋﻪﯓ ﻧﺎﺯﯗﻙ ﻣﻪﺳﯩﻠﯩﻠﻪﺭﻧﯩﯔ ﺑﯩﺮﻯ. ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻨﯩﯔ ﻳﯧﻘﯩﻨﻘﻰ ﺯﺍﻣﺎﻥ ﺗﺎﺭﯨﺨﯩﻐﺎ ﻧﻪﺯﻩﺭ ﺳﺎﻟﻐﺎﻧﺪﯨﻤﯘ، ﺋﯘﻳﻐﯘﺭﻻﺭﻧﯩﯔ ﻣﯩﻠﻠﯩﻲ ﻣﯘﺳﺘﻪﻗﯩﻠﻠﯩﻖ ﻛﯜﺭﻩﺷﻠﯩﺮﯨﺪﻩ ﺗﯜﺭﻛﯩﻴﻪ ﯞﻩ ﺗﯜﺭﻙ ﺧﻪﻟﻘﯩﻨﯩﯔ ﺑﺎﺷﺘﯩﻦ - ﺋﺎﺧﯩﺮﻯ ﻧﺎﻫﺎﻳﯩﺘﻰ ﻣﯘﻫﯩﻢ ﺭﻭﻝ ﺋﻮﻳﻨﯩﻐﺎﻧﻠﯩﻘﯩﻨﻰ ﻛﯚﺭﯛﯞﺍﻻﻻﻳﻤﯩﺰ.
 
ﺧﯩﺘﺎﻱ ﻫﯚﻛﯜﻣﯩﺘﻰ 2000 - ﻳﯩﻠﻼﺭﺩﯨﻦ ﻛﯧﻴﯩﻦ ﺗﯜﺭﻛﯩﻴﻪ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﯨﺘﯩﮕﻪ ﺋﺎﻻﻫﯩﺪﻩ ﺋﻪﻫﻤﯩﻴﻪﺕ ﺑﯧﺮﯨﭗ ﻛﻪﻟﻤﻪﻛﺘﻪ. 2001 - ﻳﯩﻠﻰ ﺗﯜﺭﻛﯩﻴﻪ ﺑﺎﺵ ﻣﯩﻨﯩﺴﺘﯩﺮﻯ ﻳﺎﺭﺩﻩﻣﭽﯩﺴﻰ ﺩﯙﻟﻪﺕ ﺑﺎﻫﭽﻪﻟﯩﻨﯩﯔ ﺋﯘﻳﻐﯘﺭ ﺩﯨﻴﺎﺭﯨﻐﺎ ﺋﯧﻠﯩﭗ ﺑﺎﺭﻏﺎﻥ ﺯﯨﻴﺎﺭﯨﺘﯩﺪﯨﻦ ﻛﯧﻴﯩﻦ، ﻳﻪﻧﻪ ﺑﯩﺮ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﺯﯨﻴﺎﺭﻩﺕ ﻳﯧﻘﯩﻨﺪﺍ 9 - ﺋﺎﻳﻨﯩﯔ 1 - ﻛﯜﻧﯩﺪﯨﻦ 4 - ﻛﯜﻧﯩﮕﯩﭽﻪ ﺋﯧﻠﯩﭗ ﺑﯧﺮﯨﻠﺪﻯ.

ﺑﯘ ﺯﯨﻴﺎﺭﻩﺕ ﺟﻪﺭﻳﺎﻧﯩﺪﺍ ﺗﯜﺭﻛﯩﻴﻪ ﺩﯙﻟﻪﺕ ﻣﯩﻨﯩﺴﺘﯩﺮﻯ ﻛﯜﺭﺷﺎﺕ ﺗﯜﺯﻣﻪﻥ ﺋﯜﺭﯛﻣﭽﯩﻨﻰ ﻳﻪﺭﻣﻪﻧﻜﯩﺴﯩﮕﻪ ﻗﺎﺗﻨﺎﺷﻘﺎﻧﺪﯨﻦ ﺑﺎﺷﻘﺎ، ﺧﯩﺘﺎﻱ ﺋﺎﻟﯩﻲ ﺭﻩﻫﺒﻪﺭﻟﻪﺭ ﯞﻩ ﺷﯩﺮﻛﻪﺕ ﻣﻪﺳﺌﯘﻟﻠﯩﺮﻯ ﺑﯩﻠﻪﻧﻤﯘ ﺋﯘﭼﺮﺍﺷﻘﺎﻥ. ﻣﻪﺧﻤﯘﺕ ﻗﻪﺷﻘﯩﺮﻯ ﯞﻩ ﻳﯜﺳﯜﻑ ﺧﺎﺱ ﻫﺎﺟﯩﭙﻨﯩﯔ ﻣﺎﺯﯨﺮﯨﻨﻰ ﺯﯨﻴﺎﺭﻩﺕ ﻗﯩﻠﻐﺎﻥ. ﺋﯩﺴﻤﯩﻨﻰ ﺋﺎﺷﻜﺎﺭﯨﻼﺷﻨﻰ ﺧﺎﻟﯩﻤﯩﻐﺎﻥ، ﺑﯘ ﻗﯧﺘﯩﻤﻘﻰ ﺯﯨﻴﺎﺭﻩﺗﺘﻪ ﻛﯜﺭﺷﺎﺕ ﺗﯜﺯﻣﻪﻧﻨﯩﯔ ﻳﯧﻨﯩﺪﺍ ﺑﻮﻟﻐﺎﻥ ﺑﯩﺮ ﺭﻩﻫﺒﻪﺭ، ﺑﯘ ﻗﯧﺘﯩﻤﻘﻰ ﺯﯨﻴﺎﺭﻩﺗﻨﯩﯔ ﻧﺎﻫﺎﻳﯩﺘﻰ ﻳﺎﺧﺸﻰ ﺋﯚﺗﻜﻪﻧﻠﯩﻜﯩﻨﻰ، ﺋﯜﺭﯛﻣﭽﻰ ﯞﻩ ﻗﻪﺷﻘﻪﺭﻧﯩﯔ ﺑﻪﻛﻼ ﺗﻪﺭﻩﻗﻘﻰ ﻗﯩﻠﯩﭗ ﻛﻪﺗﻜﻪﻧﻠﯩﻜﯩﻨﻰ، ﺧﯩﺘﺎﻳﻼﺭﻧﯩﯔ ﺗﯜﺭﻛﻠﻪﺭﻧﻰ ﺑﻪﻛﻼ ﻳﺎﺧﺸﻰ ﻛﯚﺭﯨﺪﯨﻐﺎﻧﻠﯩﻘﯩﻨﻰ ﺋﯧﻴﺘﺘﻰ. ﺋﯘ ﻳﻪﻧﻪ ﺳﯚﺯﯨﺪﻩ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺗﯜﺭﻛﯩﻴﯩﻨﯩﯔ ﺑﻪﻙ ﭼﻮﯓ ﺑﯩﻠﯩﺪﯨﻐﺎﻧﻠﯩﻘﯩﻨﻰ، ﺗﯜﺭﻙ ﻛﺎﺭﺧﺎﻧﯩﭽﯩﻼﺭﻧﯩﯔ ﺋﯘﻳﻐﯘﺭ ﺭﺍﻳﻮﻧﯩﺪﺍ ﺗﯩﺠﺎﺭﻩﺕ ﻗﯩﻠﯩﺸﯩﻨﻰ ﺋﺎﺭﺯﯗ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﯞﻩ ﺋﯘﻻﺭﻏﺎ ﺋﺎﻻﻫﯩﺪﻩ ﺳﯩﻴﺎﺳﻪﺕ ﻳﯜﺭﮔﯜﺯﯨﺪﯨﻐﺎﻧﻠﯩﻘﯩﻨﻰ ﺩﯦﮕﻪﻧﻠﯩﻜﯩﻨﻰ ﺩﯦﺪﻯ. ﺋﯘ ﻳﻪﻧﻪ ﺗﯜﺭﻛﯩﻴﻪ ﺋﯜﺭﯛﻣﭽﯩﺪﻩ ﺳﻮﺩﺍ - ﺳﺎﻧﺎﺋﻪﺕ ﺭﺍﻳﻮﻧﻰ ﻗﯘﺭﯗﺵ ﺋﯜﭼﯜﻥ ﺧﯩﺘﺎﻱ ﻫﯚﻛﯜﻣﯩﺘﻰ ﺑﯩﻠﻪﻥ ﺗﻮﺧﺘﺎﻣﻨﺎﻣﻪ ﺗﯜﺯﯛﻟﮕﻪﻧﻠﯩﻜﯩﻨﻰ، ﻣﻪﺧﻤﯘﺕ ﻗﻪﺷﻘﯩﺮﻯ ﯞﻩ ﻳﯜﺳﯜﻑ ﺧﺎﺱ ﻫﺎﺟﯩﭙﻼﺭﻧﯩﯔ ﻣﺎﺯﯨﺮﯨﻨﻰ ﺭﯦﻤﻮﻧﺖ ﻗﯩﻠﯩﺶ ﺗﻮﺧﺘﺎﻣﻨﺎﻣﯩﺴﯩﮕﯩﻤﯘ ﻗﻮﻝ ﻗﻮﻳﯘﻟﻐﺎﻧﻠﯩﻘﯩﻨﻰ، ﺋﻪﻣﻤﺎ ﺧﯩﺘﺎﻳﻼﺭﻧﯩﯔ ﺑﯘ ﺋﯘﭼﺮﯨﺸﯩﺸﻼﺭﺩﺍ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻣﻪﺳﯩﻠﯩﺴﯩﻨﻰ ﻛﯜﻥ ﺗﻪﺭﺗﯩﭙﻜﻪ ﺋﯧﻠﯩﭗ ﻛﻪﻟﻤﯩﮕﻪﻧﻠﯩﻜﯩﻨﻰ ﺋﯧﻴﺘﺘﻰ.

ﺗﯜﺭﻙ ﻣﻪﺗﺒﯘﺋﺎﺗﻠﯩﺮﯨﺪﯨﻜﻰ ﺑﯘ ﻫﻪﻗﺘﯩﻜﻰ ﺧﻪﯞﻩﺭﮔﻪ ﺋﺎﺳﺎﺳﻼﻧﻐﺎﻧﺪﺍ، ﺗﯜﺭﻛﯩﻴﻪ ﺩﯙﻟﻪﺕ ﻣﯩﻨﯩﺴﺘﯩﺮﯨﻨﯩﯔ ﯞﻩﻛﯩﻠﻠﻪﺭ ﺋﯚﻣﯩﻜﯩﻨﯩﯔ ﻗﻪﺷﻘﻪﺭ ﺯﯨﻴﺎﺭﯨﺘﻰ ﺟﻪﺭﻳﺎﻧﯩﺪﺍ، ﻗﻪﺷﻘﻪﺭ ﯞﺍﻟﯩﺴﻰ ﺋﻪﻛﭙﻪﺭ ﻏﻮﭘﯘﺭ ﺋﯚﻣﻪﻛﻜﻪ ﺯﯨﻴﺎﭘﻪﺕ ﺑﻪﺭﮔﻪﻥ. ﺯﯨﻴﺎﭘﻪﺗﺘﻪ ﺳﯚﺯ ﻗﯩﻠﯩﭗ، "ﺗﯜﺭﻙ ﻗﯧﺮﯨﻨﺪﺍﺷﻠﯩﻘﯩﻤﯩﺰ ﺑﯩﻠﻪﻥ ﺑﻮﻟﻐﺎﻥ ﻗﯧﺮﯨﻨﺪﺍﺷﻠﯩﻖ ﻣﯘﻧﺎﺳﯩﯟﯨﺘﯩﻤﯩﺰﻧﻰ ﺗﯧﺨﯩﻤﯘ ﻛﯜﭼﻪﻳﺘﯩﺶ ﺋﯜﭼﯜﻥ ﻫﻪﺭ ﺳﺎﻫﻪﺩﻩ ﻫﻪﻣﻜﺎﺭﻟﯩﺸﺎﻳﻠﻰ. ﻗﻪﺷﻘﻪﺭﺩﻩ ﺗﯚﻣﯜﺭ ﻛﺎﻧﻠﯩﺮﻯ ﺑﺎﺭ، ﺋﻪﻣﻤﺎ ﺑﯩﺮﻻ ﺗﯚﻣﯜﺭ ﺯﺍﯞﯗﺗﯩﻤﯩﺰ ﺑﺎﺭ، ﻗﻪﺷﻘﻪﺭﮔﻪ ﻛﯧﻠﯩﭗ ﺗﯚﻣﯜﺭ ﺯﺍﯞﯗﺗﻰ ﻗﯘﺭﯗﯕﻼﺭ ،" ﺩﯦﮕﻪﻥ.

ﺑﯘﺭﯗﻧﺪﯨﻦ ﺗﺎﺭﺗﯩﭗ ﺗﯜﺭﻛﯩﻴﻪﻧﻰ، ﺧﯩﺘﺎﻳﻨﻰ ﭘﺎﺭﭼﯩﻼﺷﻘﺎ ﺋﯘﺭﯨﻨﯩﯟﺍﺗﻘﺎﻥ ﺩﯙﻟﻪﺕ ﺩﻩﭖ ﺋﻪﻳﯩﺒﻠﻪﭖ ﻛﻪﻟﮕﻪﻥ ﺧﯩﺘﺎﻱ ﻫﯚﻛﯜﻣﯩﺘﻰ، ﺋﻪﻣﺪﻯ ﺑﻮﻟﺴﺎ ﺗﯜﺭﻛﻠﻪﺭﻧﻰ ﺑﯘ ﺭﺍﻳﻮﻧﻐﺎ ﻛﯧﻠﯩﺸﻜﻪ ﭼﺎﻗﯩﺮﻣﺎﻗﺘﺎ، ﺑﯩﺮ ﺗﻪﺭﻩﭘﺘﯩﻦ ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﯞﺍﺗﻘﺎﻥ ﺧﯩﺘﺎﻱ ﻫﯚﻛﯜﻣﯩﺘﻰ، ﻳﻪﻧﻪ ﺑﯩﺮ ﺗﻪﺭﻩﭘﺘﯩﻦ ﺗﯜﺭﻙ ﮔﺮﺍﺟﺪﺍﻧﻠﯩﺮﻯ ﺋﯘﻳﻐﯘﺭﻻﺭﻧﻰ ﯞﻩ ﺗﯜﺭﻛﻠﻪﺭﻧﻰ ﺋﯜﺭﯛﻣﭽﯩﮕﻪ ﻛﯧﻠﯩﭗ ﺯﺍﯞﯗﺕ ﻗﯘﺭﯗﺷﻘﺎ ﭼﺎﻗﯩﺮﻣﺎﻗﺘﺎ. ﺑﯘ ﺋﯚﺯﮔﯩﺮﯨﺸﻠﻪﺭﻧﯩﯔ ﭘﻪﺭﺩﻩ ﺋﺎﺭﻗﯩﺴﯩﺪﺍ ﻧﯧﻤﯩﻠﻪﺭ ﺑﺎﺭ؟

1980 - ﻳﯩﻠﻼﺭﺩﺍ ﺗﯜﺭﻛﯩﻴﻪ ﺧﯩﺘﺎﻱ ﻣﯘﻧﺎﺳﯩﯟﯨﺘﯩﻨﻰ ﺑﺎﺷﻼﺗﻘﺎﻥ ﺳﺎﺑﯩﻖ ﺳﻪﻫﯩﻴﻪ ﻣﯩﻨﯩﺴﺘﯩﺮﻯ ﻫﺎﻟﯩﻞ ﺷﯩﯟﮔﯩﻦ ﺋﻪﭘﻪﻧﺪﻯ ﺑﯘ ﻫﻪﻗﺘﯩﻜﻰ ﻛﯚﺯ ﻗﺎﺭﯨﺸﯩﻨﻰ ﺋﺎﯕﻠﯩﺘﯩﭗ ﻣﯘﻧﺪﺍﻕ ﺩﯦﺪﻯ: "ﻣﻪﻥ ﻛﯜﺭﺷﺎﺕ ﺗﯜﺯﻣﻪﻥ ﺑﯩﻠﻪﻥ ﺑﯩﻠﻠﻪ ﺋﯩﺪﯨﻢ. ﻣﻪﻥ ﻫﺎﺯﯨﺮﻣﯘ ﺧﯩﺘﺎﻳﺪﺍ. ﺑﯘ ﺑﯩﺰﻧﯩﯔ ﺋﯘﺯﯗﻥ ﻳﯩﻠﻠﯩﻖ ﺧﯩﺰﻣﻪﺗﻠﯩﺮﯨﻤﯩﺰﻧﯩﯔ ﻧﻪﺗﯩﺠﯩﺴﻰ. ﺧﯩﺘﺎﻳﻼﺭ ﺑﯩﻠﻪﻥ ﻫﻪﻣﻜﺎﺭﻟﯩﺸﯩﺸﯩﻤﯩﺰ ﯞﻩ ﺗﯩﺠﺎﺭﯨﻲ ﻣﯘﻧﺎﺳﯩﯟﻩﺗﻠﯩﺮﯨﻤﯩﺰﻧﻰ ﺗﻪﺭﻩﻗﻘﯩﻲ ﻗﯩﻠﺪﯗﺭﯨﺸﯩﻤﯩﺰ ﻛﯧﺮﻩﻙ. ﻫﯘﺷﻴﺎﺭﻟﯩﻖ ﺑﯩﻠﻪﻥ ﺑﯘ ﻫﻪﻣﻜﺎﺭﻟﯩﻘﯩﻤﯩﺰﻧﻰ ﻛﯜﭼﻪﻳﺘﺴﻪﻙ ﺋﯘﻳﻐﯘﺭﻻﺭﻏﯩﻤﯘ، ﺗﯜﺭﻛﻠﻪﺭﮔﯩﻤﯘ ﭘﺎﻳﺪﯨﺴﻰ ﺑﺎﺭ. ﺑﯘ ﻣﯘﻧﺎﺳﯩﯟﯨﺘﯩﻤﯩﺰﻧﻰ ﺗﻪﺭﻩﻗﻘﯩﻲ ﻗﯩﻠﺪﯗﺭﯨﺸﯩﻤﯩﺰ ﻛﯧﺮﻩﻙ. ﺗﯜﺭﻛﻠﻪﺭ ﺋﯘﻳﻐﯘﺭ ﺭﺍﻳﻮﻧﯩﻐﺎ ﺋﯘﻳﻐﯘﺭﻻﺭ ﺗﯜﺭﻛﯩﻴﯩﮕﻪ ﻛﯧﻠﯩﭗ ﺗﯩﺠﺎﺭﻩﺕ ﻗﯩﻠﯩﺸﻰ ﻛﯧﺮﻩﻙ. ﺗﯜﺭﻛﯩﻴﯩﺪﯨﻜﻰ ﺋﯘﻳﻐﯘﺭﻻﺭﻧﯩﯔ ﺳﺎﻧﻰ ﻛﯚﭘﯩﻴﯩﺸﻰ ﻛﯧﺮﻩﻙ. ﺑﯘ ﺯﯨﻴﺎﺭﻩﺗﻨﯩﯔ ﭘﻪﺭﺩﻩ ﺋﺎﺭﻗﯩﺴﯩﺪﺍ ﺑﯩﺰﻧﯩﯔ 1980 - ﻳﯩﻠﻼﺭﺩﯨﻦ ﺗﺎﺭﺗﯩﭗ ﺑﯘ ﺭﺍﻳﻮﻧﻐﺎ ﻛﯩﺮﯨﺶ ﺋﯜﭼﯜﻥ ﻗﯩﻠﻐﺎﻥ ﺧﯩﺰﻣﻪﺗﻠﯩﺮﯨﻤﯩﺰ ﺑﺎﺭ. ﻣﻪﻥ ﻳﻪﻧﻪ ﺷﯘﻧﻰ ﺩﯦﻤﻪﻛﭽﯩﻤﻪﻧﻜﻰ ﺋﻪﮔﻪﺭ ﺋﻪﻗﻠﯩﻤﯩﺰﻧﻰ ﺋﯩﺸﻠﯩﺘﯩﭗ ﺳﯩﻴﺎﺳﻪﺕ ﺋﯧﻠﯩﭗ ﺑﺎﺭﺳﺎﻕ ﺑﯘﻧﯩﯔ ﺋﯘﻳﻐﯘﺭ ﺧﻪﻟﻘﯩﻐﯩﻤﯘ، ﺗﯜﺭﻙ ﺧﻪﻟﻘﯩﻐﯩﻤﯘ ﭘﺎﻳﺪﯨﺴﻰ ﺑﻮﻟﯩﺪﯗ."
 
ﺑﻪﺯﻯ ﺋﯘﻳﻐﯘﺭ ﺋﻮﺑﺰﻭﺭﭼﯩﻼﺭ ﺗﯜﺭﻛﻠﻪﺭ ﺋﯜﺭﯛﻣﭽﯩﺪﻩ ﻛﺎﺭﺧﺎﻧﺎ ﻗﯘﺭﺳﺎ ﺋﯘﻳﻐﯘﺭﻻﺭﻏﺎ ﻫﯧﭽﻘﺎﻧﺪﺍﻕ ﭘﺎﻳﺪﯨﺴﻰ ﻳﻮﻕ ﺩﻩﯞﺍﺗﯩﺪﯗ؟ ﺑﯘﻧﯩﯖﻐﺎ ﻗﺎﻧﺪﺍﻕ ﻗﺎﺭﺍﻳﺴﯩﺰ ﺩﯦﮕﻪﻥ ﺳﻮﺋﺎﻟﯩﻤﯩﺰﻏﺎ ﺷﯘﻧﺪﺍﻕ ﺟﺎﯞﺍﺏ ﺑﻪﺭﺩﻯ: "ﻣﻪﻥ ﺑﯘ ﻛﯚﺯ ﻗﺎﺭﺍﺷﻘﺎ ﻗﻮﺷﯘﻟﻤﺎﻳﻤﻪﻥ. ﺑﯘﻧﺪﺍﻕ ﺋﯩﺶ ﻳﻮﻕ. ﺗﯩﺠﺎﺭﯨﻲ ﻣﯘﻧﺎﺳﯩﯟﯨﺘﯩﻤﯩﺰ ﺗﻪﺭﻩﻗﻘﯩﻲ ﻗﯩﻠﺴﺎ ﺋﯘﻳﻐﯘﺭﻻﺭﻏﺎ ﭘﺎﻳﺪﯨﺴﻰ ﺑﺎﺭ. ﻣﻪﻥ 1984 - ﻳﯩﻠﻰ ﺗﯘﻧﺠﻰ ﻗﯧﺘﯩﻢ ﺋﯘﻳﻐﯘﺭ ﺩﯨﻴﺎﺭﯨﻐﺎ ﺑﺎﺭﺩﯨﻢ. ﺋﯚﺯﮔﯩﺮﯨﺶ ﻧﺎﻫﺎﻳﯩﺘﻰ ﺯﻭﺭ، ﺗﯜﺭﻛﯩﻴﻪ ﺑﯘ ﺭﺍﻳﻮﻧﻐﺎ ﻛﯩﺮﯨﺸﻰ ﻛﯧﺮﻩﻙ."
 
ﺑﯩﺰ ﺑﯘ ﻫﻪﻗﺘﯩﻜﻰ ﻛﯚﺯ ﻗﺎﺭﯨﺸﯩﻨﻰ ﺋﯧﻠﯩﺶ ﺋﯜﭼﯜﻥ ﺋﯘﻳﻐﯘﺭ ﺋﺎﻧﺎﻟﯩﺰﭼﻰ ﯞﺍﺭﯨﺴﺠﺎﻥ ﺋﻪﭘﻪﻧﺪﯨﮕﻪ ﻣﯩﻜﺮﻭﻓﻮﻧﯩﻤﯩﺰﻧﻰ ﺋﯘﺯﺍﺗﺘﯘﻕ.