ﻣﺎﻗﺎﻟﯩﻨﯩﯔ ﺑﺎﺵ ﻗﯩﺴﻤﯩﻐﺎ، ﺋﯚﻣﻪﺭﺟﺎﻧﻨﯩﯔ ﯞﺍﻧﻜﻮﯞﯦﺮﺩﺍ ﺋﯚﺗﻜﯜﺯﯛﻟﮕﻪﻥ ﺧﯩﺘﺎﻱ ﺩﺍﺋﯩﺮﯨﻠﯩﺮﯨﮕﻪ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﯛﺵ ﻧﺎﻣﺎﻳﯩﺸﯩﺪﺍ،ﺷﻪﺭﻗﻰ ﺗﯜﺭﻛﯩﺴﺘﺎﻧﻨﯩﯔ ﺋﺎﻳﻴﯘﻟﺘﯘﺯﻟﯘﻕ ﻛﯚﻙ ﺑﺎﻳﺮﯨﻘﯩﻨﻰ ﺋﯩﮕﯩﺰ ﻛﯚﺗﯜﺭﯛﭖ، ﺗﯩﺒﻪﺗﻠﯩﻜﻠﻪﺭ ﺑﯩﻠﻪﻥ ﺑﯩﺮﮔﻪ ﺗﯘﺭﻏﺎﻥ ﺭﻩﺳﯩﻤﯩﮕﻪ ﺋﻮﺭﯗﻥ ﺑﯧﺮﯨﻠﮕﻪﻥ.

ﻣﺎﻗﺎﻟﻪ: "ﯞﺍﻧﻜﻮﯞﯦﺮﻏﺎ ﺗﯩﺒﻪﺗﻠﯩﻜﻠﻪﺭﻧﯩﯔ ﺗﻮﭘﻠﯩﻨﯩﯟﺍﺗﻘﺎﻧﻠﯩﻘﯩﻐﺎ ﻧﺎﻫﺎﻳﯩﺘﻰ ﺋﯘﺯﯗﻥ ﺑﻮﻟﻐﺎﻧﯩﺪﻯ. ﺋﯘﻳﻐﯘﺭﻻﺭ ﺑﻮﻟﺴﺎ، ﺋﻪﻣﺪﯨﻠﻪﺩﯨﻦ ﺑﯘ ﻳﻪﺭﺩﻩ ﭘﻪﻳﺪﺍ ﺑﻮﻟﯘﺷﻘﺎ ﺑﺎﺷﻠﯩﺪﻯ. ﺋﯘﻳﻐﯘﺭﻻﺭﻧﯩﯔ ﯞﻩﻛﯩﻠﻰ ﺳﯩﻴﺎﺳﯩﻲ ﭘﺎﻧﺎﻫﻼﻧﻐﯘﭼﻰ ﺳﺎﻻﻫﯩﻴﯩﺘﻰ ﺑﯩﻠﻪﻥ ﺑﯘ ﻳﻪﺭﮔﻪ ﻛﻪﻟﮕﻪﻥ ﺋﯚﻣﻪﺭﺟﺎﻥ،" ﺩﻩﭖ ﺑﺎﺷﻠﯩﻨﯩﺪﯗ.

ﻣﺎﻗﺎﻟﯩﺪﻩ ﺋﯚﻣﻪﺭﺟﺎﻧﻨﯩﯔ ﺧﯩﺘﺎﻳﻨﯩﯔ ﻏﻪﺭﺑﯩﺪﯨﻜﻰ ﺋﯘﻳﻐﯘﺭ ﺭﺍﻳﻮﻧﯩﻨﯩﯔ ﻳﻪﻧﻰ ﺳﺎﺑﯩﻖ ﺷﻪﺭﻗﻰ ﺗﯜﺭﻛﯩﺴﺘﺎﻧﻨﯩﯔ ﻗﻪﺷﻘﻪﺭ ﺷﻪﻫﯩﺮﯨﺪﻩ ﺗﯘﻏﯘﻟﻐﺎﻧﻠﯩﻘﻰ، ﺋﯘﻧﯩﯔ ﺗﯩﺒﻪﺗﻠﯩﻜﻠﻪﺭﮔﻪ ﺋﻮﺧﺸﺎﺵ ﺷﻪﺭﻗﻰ ﺗﯜﺭﻛﯩﺴﺘﺎﻧﻨﯩﯔ ﺧﯩﺘﺎﻳﻨﯩﯔ ﺑﻮﻳﯘﻧﺘﯘﺭﯨﻘﯩﺪﯨﻦ ﻗﯘﺗﯘﻟﯘﭖ، ﻣﯘﺳﺘﻪﻗﯩﻞ ﺑﻮﻟﯘﺷﯩﻨﻰ ﺋﺎﺭﺯﯗ ﻗﯩﻠﯩﺪﯨﻐﺎﻧﻠﯩﻘﻰ، ﺋﯘﻳﻐﯘﺭ ﺭﺍﻳﻮﻧﻨﯩﯔ 1949 - ﻳﯩﻠﻰ، ﺧﯩﺘﺎﻱ ﻛﻮﻣﻤﯘﻧﯩﺴﺘﻠﯩﺮﻯ ﻫﺎﻛﯩﻤﯩﻴﯩﺘﯩﻨﯩﯔ ﻛﻮﻧﺘﺮﻭﻟﻠﯘﻗﯩﻐﺎ ﺋﯚﺗﻜﻪﻧﻠﯩﻜﻰ ﯞﻩ ﺗﯩﺒﻪﺗﻨﻰ ﺧﯩﺘﺎﻳﻼﺭ 1951  - ﻳﯩﻠﻰ ﺑﯧﺴﯩﯟﺍﻟﻐﺎﻧﻠﯩﻘﻰ ﻗﺎﺗﺎﺭﻟﯩﻘﻼﺭ ﺋﻪﺳﻜﻪﺭﺗﯩﻠﮕﻪﻥ. ﺑﯩﺰ ﺋﯚﻣﻪﺭﺟﺎﻥ ﺋﻪﭘﻪﻧﺪﯨﻨﻰ ﺯﯨﻴﺎﺭﻩﺕ ﻗﯩﻠﻐﯩﻨﯩﻤﯩﺰﺩﺍ، ﺋﯘ ﺋﯘﻳﻐﯘﺭﻻﺭﻧﯩﯔ ﻏﻪﺭﺏ ﺩﯙﻟﻪﺗﻠﯩﺮﯨﺪﯨﻜﻰ ﺋﺎﺧﺒﺎﺭﺍﺕ ﺋﻪﺭﻛﯩﻨﻠﯩﻜﻰ ﺋﻪﯞﺯﻩﻟﻠﯩﻜﻠﯩﺮﯨﺪﯨﻦ ﭘﺎﻳﺪﯨﻠﯩﻨﯩﭗ، ﺋﯚﺯﻟﯩﺮﯨﻨﯩﯔ ﺳﯩﻴﺎﺳﯩﻲ ﯞﻩﺯﯨﻴﯩﺘﯩﻨﻰ ﺗﻮﻧﯘﺷﺘﯘﺭﯗﺷﻰ ﻻﺯﯨﻤﻠﯩﻘﯩﻨﻰ ﺗﻪﻛﯩﺘﻠﯩﺪﻯ.

ﻣﺎﻗﺎﻟﯩﺪﻩ ﺋﯚﻣﻪﺭﺟﺎﻧﻨﯩﯔ "ﺑﯩﺰ ﺗﯩﺒﻪﺗﻠﯩﻜﻠﻪﺭﻧﻰ ﻗﻮﻟﻼﻳﻤﯩﺰ، ﺋﯘﻳﻐﯘﺭﻻﺭ ﺑﯩﻠﻪﻥ ﺗﯩﺒﻪﺗﻠﯩﻜﻠﻪﺭﻧﯩﯔ ﺋﻪﻫﯟﺍﻟﻰ ﺋﻮﺧﺸﯩﺸﯩﭗ ﻛﯧﺘﯩﺪﯗ. ﺑﯩﺰ ﻛﯜﻧﻠﻪﺭﻧﯩﯔ ﺑﯩﺮﯨﺪﻩ، ﻣﯘﺳﺘﻪﻗﯩﻠﻠﯩﻘﯩﻤﯩﺰﻧﻰ ﻗﻮﻟﻐﺎ ﻛﻪﻟﺘﯜﺭﻩﻟﻪﻳﺪﯨﻐﺎﻧﻠﯩﻘﯩﻤﯩﺰﻏﺎ ﺋﯩﺸﯩﻨﯩﻤﯩﺰ. ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﺗﯩﺒﻪﺗﻠﯩﻜﻠﻪﺭﻧﻰ ﺑﯚﻟﮕﯜﻧﭽﻰ، ﺋﯘﻳﻐﯘﺭﻻﺭﻧﻰ ﺑﻮﻟﺴﺎ، ﺗﯧﺮﺭﻭﺭﭼﻰ، ﺩﻩﭖ ﺋﻪﻳﯩﺒﻠﯩﻤﻪﻛﺘﻪ. ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺕ ﺑﯚﻟﮕﯜﻧﭽﻰ ﯞﻩ ﺗﯧﺮﺭﻭﺭﭼﻰ ﺑﯩﻠﻪﻥ ﺋﻪﺭﻛﯩﻨﻠﯩﻚ ﺟﻪﯕﭽﯩﺴﻰ ﺋﻮﺗﺘﯘﺭﯨﺴﯩﺪﯨﻜﻰ ﭘﻪﺭﻗﻠﻪﺭﻧﻰ ﺋﻮﺑﺪﺍﻥ ﭼﯜﺷﯩﻨﯩﺸﻰ ﻛﯧﺮﻩﻙ،ﺩﯦﮕﻪﻥ ﺳﯚﺯﻟﯩﺮﯨﮕﻪ ﺋﻮﺭﯗﻥ ﺑﯧﺮﯨﻠﮕﻪﻥ.

ﻣﺎﻗﺎﻟﯩﺪﻩ ﯞﺍﻧﻜﻮﯞﯦﺮﺩﯨﻜﻰ ﺧﯩﺘﺎﻱ ﻛﻮﻧﺴﯘﻟﺨﺎﻧﯩﺴﯩﻨﯩﯔ ﻳﺎﺭﺩﻩﻣﭽﻰ ﻛﻮﻧﺴﯘﻟﻰ ﯞﺍﯓ ﺯﯦﻠﻴﺎﯕﻨﯩﯔ ﺗﯩﺒﻪﺕ ﺑﯩﻠﻪﻥ ﺋﯘﻳﻐﯘﺭ ﺭﺍﻳﻮﻧﯩﺪﺍ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺭﻩﭘﻠﻪﺭﺩﻩ "ﻏﺎﻳﻪﺕ ﺯﻭﺭ" ﺋﯩﻠﮕﯩﺮﯨﻠﻪﺵ ﺑﻮﻟﻐﺎﻧﻠﯩﻘﻰ، ﺩﯗﻧﻴﺎﺩﺍ ﻫﯧﭽﻘﺎﻧﺪﺍﻕ ﺑﯩﺮ ﺩﯙﻟﻪﺗﻨﯩﯔ ﻛﯩﺸﯩﻠﯩﻚ ﻫﻮﻗﯘﻗﯩﻨﯩﯔ ﻣﯘﻛﻪﻣﻤﻪﻝ ﺋﻪﻣﻪﺳﻠﯩﻜﻰ، ﺧﯩﺘﺎﻳﻨﯩﯔ ﺋﯚﺯﯨﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﻰ ﺋﯜﭼﯜﻥ ﺩﺍﯞﺍﻣﻠﯩﻖ ﺗﯩﺮﯨﺸﭽﺎﻧﻠﯩﻖ ﻛﯚﺭﺳﯩﺘﯩﯟﺍﺗﻘﺎﻧﻠﯩﻘﻰ،ﺋﻪﻣﻤﺎ ﺑﯘ ﺷﻪﻫﻪﺭﺩﻩ ﻧﺎﻣﺎﻳﯩﺶ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺋﯘﻳﻐﯘﺭﻻﺭ ﺑﯩﻠﻪﻥ ﺑﯩﻠﻪﻥ ﺗﯩﺒﻪﺗﻠﯩﻜﻠﻪﺭﻧﯩﯔ ﻛﯩﺸﯩﻠﻪﺭﻧﯩﯔ ﺩﯨﻘﻘﯩﺘﯩﻨﻰ ﺗﺎﺭﺗﯩﺶ ﺋﯜﭼﯜﻥ ﻣﻪﺳﯩﻠﯩﻨﻰ ﻛﯚﭘﺘﯜﺭﯛﺷﻜﻪ ﺋﯘﺭﯗﻧﯘﯞﺍﺗﻘﺎﻧﻠﯩﻘﻰ ﻫﻪﻗﻘﯩﺪﯨﻜﻰ ﺳﯚﺯﻟﯩﺮﯨﮕﯩﻤﯘ ﺋﻮﺭﯗﻥ ﺑﯧﺮﯨﻠﮕﻪﻥ.

ﻣﺎﻗﺎﻟﯩﺪﻩ ﺋﯘﻳﻐﯘﺭ ﺭﺍﻳﻮﻧﯩﻨﯩﯔ ﻛﯘﭼﺎ ﻧﺎﻫﯩﻴﯩﺴﯩﺪﻩ ﻳﯜﺯ ﺑﻪﺭﮔﻪﻥ ﺑﻮﻣﺒﺎ ﭘﺎﺭﺗﻼﺵ ﯞﻩﻗﻪﺳﯩﺪﯨﻦ ﻛﯧﻴﯩﻦ، 90 ﻧﻪﭘﻪﺭ ﺋﯘﻳﻐﯘﺭﻧﯩﯔ، ﻗﻪﺷﻘﻪﺭﺩﻩ ﺑﻮﻟﺴﺎ "ﺷﻪﺭﻗﻰ ﺗﯜﺭﻛﯩﺴﺘﺎﻥ ﺋﯩﺴﻼﻣﻰ ﻫﻪﺭﯨﻜﯩﺘﻰ" ﻧﯩﯔ ﺋﻪﺯﺍﺳﻰ ﺩﻩﭖ ﻗﺎﺭﺍﻟﻐﺎﻥ، 18 ﻧﻪﭘﻪﺭ ﺋﯘﻳﻐﯘﺭﻧﯩﯔ ﻗﻮﻟﻐﺎ ﺋﯧﻠﯩﻨﻐﺎﻧﻠﯩﻘﻰ ﻗﺎﺗﺎﺭﻟﯩﻘﻼﺭﻣﯘ ﺋﺎﻻﻫﯩﺪﻩ ﺋﻪﺳﻜﻪﺭﺗﯩﻠﮕﻪﻥ.

 ﺑﯘ ﻣﺎﻗﺎﻟﯩﮕﻪ ﺑﯧﺮﯨﻠﮕﻪﻥ ﺑﺎﻫﺎﻻﺭﺩﯨﻦ ﺑﯩﺮﯨﺪﻩ، ﺋﯘﻳﻐﯘﺭ ﺭﺍﻳﻮﻧﻰ ﯞﻩ ﺗﯩﺒﻪﺗﻨﻰ ﻛﺎﻧﺎﺩﺍﻧﯩﯔ ﻛﯘﺑﻪﻙ ﺭﺍﻳﻮﻧﻰ ﺑﯩﻠﻪﻥ ﺳﯧﻠﯩﺸﺘﯘﺭﯗﻟﻐﺎﻥ ﯞﻩ ﺑﯘ ﻣﺎﻗﺎﻟﯩﻨﻰ ﺧﻪﯞﻩﺭﭼﯩﻠﯩﻚ ﻳﻮﻟﻰ ﺑﯩﻠﻪﻥ ﺧﯩﺘﺎﻳﻐﺎ ﻗﺎﺭﺷﻰ ﺋﯧﻠﯩﭗ ﺑﯧﺮﯨﻠﻐﺎﻥ، ﺗﻪﺗﯜﺭ ﺗﻪﺷﯟﯨﻘﺎﺕ ﺩﻩﭖ ﺗﻪﻧﻘﯩﺪ ﻗﯩﻠﻐﺎﻥ. ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﻐﺎﻥ ﺋﯚﻣﻪﺭﺟﺎﻥ ﺋﻪﭘﻪﻧﺪﻯ ﺷﻪﺭﻗﻰ ﺗﯜﺭﻛﯩﺴﺘﺎﻥ ﯞﻩ ﺗﯩﺒﻪﺕ ﻣﻪﺳﯩﻠﯩﻠﯩﺮﻯ ﺑﯩﻠﻪﻥ ﻛﺎﻧﺎﺩﺍﻧﯩﯔ ﻛﯘﺑﻪﻙ ﻣﻪﺳﯩﻠﯩﺴﯩﻨﯩﯔ ﺗﯜﭘﺘﯩﻦ ﺋﻮﺧﺸﯩﻤﺎﻳﺪﯨﻐﺎﻧﻠﯩﻘﯩﻨﻰ،ﻛﺎﻧﺎﺩﺍ ﻣﻪﺗﺒﯘﺋﺎﺗﻠﯩﺮﯨﻨﯩﯔ ﻣﯘﺳﺘﻪﻗﯩﻞ ﻣﻪﺗﺒﯘﺋﺎﺕ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﺪﻯ.