ﺧﯩﺘﺎﻳﻐﺎ ﺗﻪﺭﻩﻗﻘﯩﻴﺎﺕ ﻳﺎﺭﺩﻩﻡ ﭘﯘﻟﻰ ﺑﯧﺮﯨﺶ ﻣﻪﺳﯩﻠﯩﺴﻰ، ﮔﯧﺮﻣﺎﻧﯩﻴﻪ ﭘﺎﺭﻻﻣﯧﻨﺘﯩﺪﺍ ﺋﯘﺯﯗﻧﺪﯨﻦ ﺑﯘﻳﺎﻥ ﺗﺎﻻﺵ - ﺗﺎﺭﺗﯩﺸﺘﺎ ﻗﺎﻟﻐﺎﻥ ﺑﯩﺮ ﻣﻪﺳﯩﻠﻪ. "ﺩﯗﻧﻴﺎ ﮔﯧﺰﯨﺘﻰ" ﻧﯩﯔ 9 - ﺋﺎﻳﻨﯩﯔ 22 - ﻛﯜﻧﯩﺪﯨﻜﻰ ﺧﻪﯞﯨﺮﯨﮕﻪ ﻗﺎﺭﯨﻐﺎﻧﺪﺍ، ﺑﯘ ﻗﯧﺘﯩﻢ ﮔﯧﺮﻣﺎﻧﯩﻴﻪ FDP ﭘﺎﺭﺗﯩﻴﯩﺴﯩﻨﯩﯔ ﻗﻪﺗﺌﯩﻲ ﻗﺎﺭﺷﻰ ﺗﯘﺭﯗﺷﻰ ﺑﯩﻠﻪﻥ، ﺧﯩﺘﺎﻳﻐﺎ ﺑﯧﺮﯨﻠﯩﺪﯨﻐﺎﻥ ﺗﻪﺭﻩﻗﻘﯩﻴﺎﺕ ﻳﺎﺭﺩﻩﻡ ﭘﯘﻟﯩﻨﻰ ﺗﻮﺧﺘﯩﺘﯩﺶ ﻣﻪﺳﯩﻠﯩﺴﯩﺪﻩ ﭘﺎﺭﻻﻣﯧﻨﺘﺘﯩﻜﯩﻠﻪﺭ ﭘﯩﻜﯩﺮ ﺑﯩﺮﻟﯩﻜﻰ ﺷﻪﻛﯩﻠﻠﻪﻧﺪﯛﺭﮔﻪﻥ. ﺋﯚﺗﻜﻪﻥ ﻳﯩﻠﻰ ﮔﯧﺮﻣﺎﻧﯩﻴﻪ ﻫﯚﻛﯜﻣﯩﺘﯩﻨﯩﯔ ﺧﯩﺘﺎﻳﺪﯨﻜﻰ ﺳﻪﻫﯩﻴﻪ ﺋﯩﺸﻠﯩﺮﻯ، ﻣﯘﻫﯩﺖ ﻗﻮﻏﺪﺍﺵ ﺋﯩﺸﻠﯩﺮﻯ ﯞﻩ ﭘﺎﺭﺍﯞﺍﻧﻠﯩﻖ ﺋﯩﺸﻠﯩﺮﻯ ﺋﯜﭼﯜﻥ ﺑﻪﺭﮔﻪﻥ ﭘﯘﻟﻰ 200 ﻣﯩﻠﻴﻮﻥ ﻳﯧﯟﺭﻭﻏﺎ ﻳﻪﺗﻜﻪﻥ ﺑﻮﻟﯘﭖ، ﺑﯘ ﻳﺎﺭﺩﻩﻡ ﮔﯧﺮﻣﺎﻧﯩﻴﯩﺪﯨﻜﻰ ﻫﻪﺭ ﻗﺎﻳﺴﻰ ﭘﺎﺭﺗﯩﻴﯩﻠﻪﺭﻧﯩﯔ ﻧﺎﺭﺍﺯﯨﻠﯩﻘﯩﻨﻰ ﻗﻮﺯﻏﺎﭘﻼ ﻗﺎﻟﻤﺎﻱ، ﺧﻪﻟﻖ ﺋﺎﺭﯨﺴﯩﺪﯨﻤﯘ ﻛﯜﭼﻠﯜﻙ ﻗﺎﺭﺷﯩﻠﯩﻖ ﭘﻪﻳﺪﺍ ﻗﯩﻠﻐﺎﻥ. "ﻫﺎﺭﺍﻡ ﻛﻪﺗﻜﻪﻥ ﭘﯘﻝ" ﺩﯦﮕﻪﻥ ﭼﯘﻗﺎﻥ ﻣﻪﺗﺒﯘﺋﺎﺗﻼﺭﻧﻰ ﻗﺎﭘﻠﯩﻐﺎﻥ.

ﺧﯩﺘﺎﻱ ﺩﻩﺭﯨﺠﯩﺪﯨﻦ ﺗﺎﺷﻘﯩﺮﻯ ﻛﯜﭼﻠﯜﻙ ﺩﯙﻟﻪﺕ ﺑﻮﻟﻤﺎﻗﭽﻰ

ﺧﻪﯞﻩﺭﮔﻪ ﺋﺎﺳﺎﺳﻼﻧﻐﺎﻧﺪﺍ، ﺧﯩﺘﺎﻳﻐﺎ ﺗﻪﺭﻩﻗﻘﯩﻴﺎﺕ ﻳﺎﺭﺩﻩﻡ ﭘﯘﻟﻰ ﺑﯧﺮﯨﺸﻜﻪ ﻗﺎﺭﺷﻰ ﻣﻪﻳﺪﺍﻧﺪﯨﻜﻰ ﺑﯩﺮ ﻗﯩﺴﯩﻢ ﻫﯚﻛﯜﻣﻪﺕ ﺧﺎﺩﯨﻤﻠﯩﺮﻯ "ﺧﯩﺘﺎﻳﻐﺎ ﻳﺎﺭﺩﻩﻡ ﭘﯘﻟﻰ ﺑﯧﺮﯨﺸﻨﯩﯔ ﻫﺎﺟﯩﺘﻰ ﻳﻮﻕ، ﺧﯩﺘﺎﻱ ﺋﻪﻣﺪﻯ ﺋﯚﺯ ﻛﯜﭼﯩﮕﻪ ﺗﺎﻳﯩﻨﯩﺸﻰ ﻛﯧﺮﻩﻙ" ﺩﯦﺴﻪ، ﻳﻪﻧﻪ ﺑﯩﺮ ﻗﯩﺴﻤﻰ "ﺑﯩﺰ ﺧﯩﺘﺎﻳﻨﻰ ﻳﯚﻟﻪﭖ ﺗﯘﺭﻏﯘﺯﯗﭖ، ﺋﯚﺯﯨﻤﯩﺰﮔﻪ ﺭﻩﻗﯩﭗ ﺑﻮﻻﻻﻳﺪﯨﻐﺎﻥ ﺳﻪﯞﯨﻴﯩﮕﻪ ﻛﯚﺗﯜﺭﯛﭖ ﻗﻮﻳﺪﯗﻕ. ﺧﯩﺘﺎﻳﻨﯩﯔ ﮔﯧﺮﻣﺎﻧﯩﻴﻪ ﺋﯩﻘﺘﯩﺴﺎﺩﯨﻐﺎ ﺳﯧﻠﯩﯟﺍﺗﻘﺎﻥ ﺯﯨﻴﯩﻨﻰ، ﺑﺎﺷﻘﺎ ﻫﻪﺭﻗﺎﻧﺪﺍﻕ ﺩﯙﻟﻪﺗﻠﻪﺭﻧﯩﯖﻜﯩﺪﯨﻦ ﺯﻭﺭ ﺑﻮﻟﻤﺎﻗﺘﺎ. ﻣﺎﻟﻠﯩﺮﯨﻤﯩﺰﻧﻰ ﻛﻮﭘﯩﻲ ﻗﯩﻠﯩﭗ ﻳﺎﺳﯩﻤﺎﻗﺘﺎ، ﺑﺎﺯﺍﺭﻟﯩﺮﯨﻤﯩﺰﻧﻰ ﻣﻮﻧﻮﭘﻮﻝ ﻗﯩﻠﻤﺎﻗﺘﺎ. ﺑﯘ ﺗﯜﭘﻪﻳﻠﻰ ﻳﯩﻠﯩﻐﺎ ﻗﺎﻧﭽﻪ ﺋﻮﻥ ﻣﯩﻠﻴﻮﻥ ﻳﯧﯟﺭﻭ ﺯﯨﻴﺎﻥ ﺗﺎﺭﺗﻤﺎﻗﺘﯩﻤﯩﺰ" ﺩﯦﮕﻪﻥ.

ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﻯ ﺑﻮﻟﺴﺎ "ﺧﯩﺘﺎﻱ ﻏﻪﺭﺑﻨﯩﯔ ﻳﺎﺭﺩﯨﻤﯩﻨﻰ ﻗﺎﻧﺪﺍﻗﺘﯘﺭ ﺧﻪﻟﻘﯩﻨﯩﯔ ﺗﯘﺭﻣﯘﺵ ﭘﺎﺭﺍﯞﺍﻧﻠﯩﻘﻰ ﺋﯜﭼﯜﻥ، ﻣﯘﻫﯩﺖ ﭘﺎﻛﻠﯩﻘﻰ ﺋﯜﭼﯜﻥ ﻳﺎﻛﻰ ﺩﯦﻤﻮﻛﺮﺍﺗﯩﻴﯩﻨﻰ ﺋﻪﻣﻪﻟﮕﻪ ﺋﺎﺷﯘﺭﯗﺵ ﺋﯜﭼﯜﻥ ﺋﻪﻣﻪﺱ، ﺑﻪﻟﻜﻰ ﻫﻪﺭﺑﯩﻲ ﺗﻪﺭﻩﻗﻘﯩﻴﺎﺗﻘﺎ ﺳﻪﺭﯨﭗ ﻗﯩﻠﯩﭗ، ﺩﻩﺭﯨﺠﯩﺪﯨﻦ ﺗﺎﺷﻘﯩﺮﻯ ﻛﯜﭼﻠﯜﻙ ﺩﯙﻟﻪﺕ ﺑﻮﻟﯘﺷﻘﺎ ﺋﯘﺭﯗﻧﻤﺎﻗﺘﺎ" ﺩﻩﭖ ﺋﻪﻳﯩﺒﻠﯩﮕﻪﻥ.

ﻣﯘﺳﺘﻪﺑﯩﺖ ﺑﯩﺮ ﺩﯙﻟﻪﺗﻜﻪ ﻳﺎﺭﺩﻩﻡ ﻗﯩﻠﯩﺸﻘﺎ ﺑﻮﻟﻤﺎﻳﺪﯗ

ﮔﯧﺮﻣﺎﻧﯩﻴﻪ ﭘﯘﻗﺮﺍﻟﯩﺮﯨﻨﯩﯔ ﻗﺎﺭﺷﯩﻠﯩﻘﻰ ﺗﯧﺨﯩﻤﯘ ﺯﻭﺭ ﺑﻮﻟﯘﭖ، ﺋﯘﻻﺭ "ﺧﯩﺘﺎﻳﺪﻩﻙ ﻛﯩﺸﯩﻠﯩﻚ ﻫﻮﻗﯘﻕ ﻛﺎﭘﺎﻟﻪﺗﻜﻪ ﺋﯩﮕﻪ ﺑﻮﻟﻤﯩﻐﺎﻥ، ﺋﻪﺭﻛﯩﻨﻠﯩﻚ ﻗﺎﻣﺎﻝ ﻗﯩﻠﯩﻨﻐﺎﻥ، ﻗﺎﻧﯘﻥ ﻛﯜﭼﯩﻨﻰ ﻳﻮﻗﺎﺗﻘﺎﻥ، ﺧﻪﻟﻖ ﺋﯩﭽﯩﺪﻩ ﻳﯩﻠﯩﻐﺎ 90ﻣﯩﯔ ﻗﯧﺘﯩﻤﺪﯨﻦ ﺋﺎﺭﺗﯘﻕ ﻗﺎﺭﺷﯩﻠﯩﻖ ﭘﻪﻳﺪﺍ ﻗﯩﻠﯩﯟﺍﺗﻘﺎﻥ ﻣﯘﺳﺘﻪﺑﯩﺖ ﺑﯩﺮ ﺩﯙﻟﻪﺗﻜﻪ ﻳﺎﺭﺩﻩﻡ ﻗﯩﻠﯩﺶ، ﺧﻪﻟﻘﻨﯩﯔ ﺋﯧﺰﯨﻠﯩﺸﯩﮕﻪ ﻳﺎﺭﺩﻩﻡ ﻗﯩﻠﻐﺎﻥ ﺑﯩﻠﻪﻥ ﺑﺎﺭﺍﯞﻩﺭ" ﺩﯦﮕﻪﻥ ﻗﺎﺭﺍﺷﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ.

ﺋﯘﻳﻐﯘﺭ ﺳﯩﻴﺎﺳﻪﺗﭽﯩﻠﯩﺮﻯ ﻏﻪﺭﺏ ﺋﻪﻟﻠﯩﺮﯨﻨﯩﯔ ﺧﯩﺘﺎﻳﻐﺎ ﺗﻪﺭﻩﻗﻘﯩﻴﺎﺕ ﻳﺎﺭﺩﻩﻡ ﭘﯘﻟﻰ ﺑﯧﺮﯨﺶ ﺋﯩﺸﯩﻐﺎ ﺋﯘﺯﯗﻥ ﻳﯩﻠﻼﺭﺩﯨﻦ ﺑﯘﻳﺎﻥ ﺋﯩﺰﭼﯩﻞ ﻗﺎﺭﺷﻰ ﺗﯘﺭﯗﭖ ﻛﻪﻟﮕﻪﻥ ﺑﻮﻟﯘﭖ، ﺋﯘﻻﺭ ﻏﻪﺭﺑﻨﯩﯔ ﺑﯘ ﻳﺎﺭﺩﯨﻤﻰ ﺧﯩﺘﺎﻳﺪﺍ ﺋﻪﺭﻛﯩﻨﻠﯩﻚ، ﺩﯦﻤﻮﻛﺮﺍﺗﯩﻴﻪ، ﻛﯩﺸﯩﻠﯩﻚ ﻫﻮﻗﯘﻕ ﯞﻩﺯﯨﻴﯩﺘﯩﻨﻰ ﻳﺎﺧﺸﯩﻼﺵ ﺋﻪﻣﻪﺱ، ﺑﻪﻟﻜﻰ ﺧﯩﺘﺎﻱ ﺩﯨﻜﺘﺎﺗﻮﺭﯨﺴﯩﻨﻰ ﻛﯜﭼﻠﻪﻧﺪﯛﺭﯛﭖ، ﺋﯘﻳﻐﯘﺭ ﻣﯩﻠﻠﯩﺘﯩﻨﯩﯔ ﺗﯧﺨﯩﻤﯘ ﻗﺎﺗﺘﯩﻖ ﺑﺎﺳﺘﯘﺭﯗﻟﯘﺷﯩﻐﺎ ﺗﯜﺭﺗﻜﻪ ﺑﻮﻟﯘﺵ ﺭﻭﻟﯩﻨﻰ ﺋﻮﻳﻨﺎﻳﺪﯗ، ﺩﯦﮕﻪﻥ ﺋﯩﺪﯨﻴﯩﻨﻰ ﺗﻪﺷﻪﺑﺒﯘﺱ ﻗﯩﻠﻐﺎﻥ ﺋﯩﺪﻯ.

"ﺧﯩﺘﺎﻱ ﻏﻪﺭﯨﭙﻨﯩﯔ ﻳﺎﺭﺩﻩﻡ ﭘﯘﻟﯩﻨﻰ ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﺷﻘﺎ ﺋﯩﺸﻠﻪﺗﻤﻪﻛﺘﻪ"

ﺑﺎﺵ ﺷﯩﺘﺎﺑﻰ ﮔﯧﺮﻣﺎﻧﯩﻴﯩﻨﯩﯔ ﻣﯩﻴﯘﻧﺨﯧﻦ ﺷﻪﻫﺮﯨﮕﻪ ﺟﺎﻳﻼﺷﻘﺎﻥ ﻳﺎﯞﺭﯗﭘﺎ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺑﯩﺮﻟﯩﻜﻰ ﺗﻪﺷﻜﯩﻼﺗﯩﻨﯩﯔ ﻣﯘﺋﺎﯞﯨﻦ ﺭﻩﺋﯩﺴﻰ ﺗﯘﺭﺳﯘﻥ ﺋﻪﭘﻪﻧﺪﻯ، ﻏﻪﺭﺏ ﺩﯦﻤﻮﻛﺮﺍﺗﯩﻚ ﺋﻪﻟﻠﯩﺮﯨﻨﯩﯔ ﻳﺎﻛﻰ ﺩﯗﻧﻴﺎ ﺑﺎﻧﻜﯩﺴﯩﻨﯩﯔ ﺧﯩﺘﺎﻳﻐﺎ ﺑﯧﺮﯨﯟﺍﺗﻘﺎﻥ ﺗﻪﺭﻩﻗﻘﯩﻴﺎﺕ ﻳﺎﺭﺩﻩﻡ ﭘﯘﻟﯩﻨﯩﯔ ﺧﻪﻟﻘﻜﻪ ﻫﯧﭽﻘﺎﻧﺪﺍﻕ ﻣﻪﻧﭙﻪﺋﻪﺗﻰ ﻳﻮﻗﻠﯩﻘﯩﻨﻰ، ﺋﻪﻛﺴﯩﭽﻪ ﺑﯘ ﭘﯘﻟﻨﯩﯔ ﺑﯩﮕﯘﻧﺎﻫ ﺧﻪﻟﻘﻨﯩﯔ ﺑﺎﺳﺘﯘﺭﯗﻟﯘﺷﻰ ﺋﯜﭼﯜﻥ ﺋﯩﺸﻠﯩﺘﯩﻠﯩﯟﺍﺗﻘﺎﻧﻠﯩﻘﯩﻨﻰ ﺗﻪﻛﯩﺘﻠﯩﺪﻯ.

 ﺗﯘﺭﺳﯘﻥ ﺋﻪﭘﻪﻧﺪﻯ ﺳﯚﺯﯨﺪﻩ ﻳﻪﻧﻪ، ﺋﯘﻳﻐﯘﺭ ﺩﯨﻴﺎﺭﯨﺪﯨﻦ ﺗﺎﻻﻥ - ﺗﺎﺭﺍﺝ ﻗﯩﻠﯩﻨﯩﯟﺍﺗﻘﺎﻥ ﺑﺎﻳﻠﯩﻘﻼﺭﻧﯩﯔ ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﺷﻘﺎ ﺳﻪﺭﯨﭗ ﻗﯩﻠﯩﻨﯩﯟﺍﺗﻘﺎﻧﻠﯩﻘﯩﻨﻰ، 90 - ﻳﯩﻠﻠﯩﺮﻯ ﺩﯗﻧﻴﺎ ﺑﺎﻧﻜﯩﺴﻰ ﺋﯘﻳﻐﯘﺭ ﺩﯨﻴﺎﺭﯨﻨﯩﯔ ﻳﯧﺰﺍ ﺋﯩﮕﯩﻠﯩﻚ ﺗﻪﺭﻩﻗﻘﯩﻴﺎﺗﻰ ﺋﯜﭼﯜﻥ ﺋﺎﺟﺮﺍﺗﻘﺎﻥ ﭘﯘﻟﻨﻰ، ﺧﯩﺘﺎﻳﻨﯩﯔ ﺑﯩﯖﺘﯜﺋﻪﻧﺪﯨﻜﻰ ﺋﻪﻣﮕﻪﻙ ﺑﯩﻠﻪﻥ ﺋﯚﺯﮔﻪﺭﺗﯩﺶ ﻣﻪﻳﺪﺍﻧﻠﯩﺮﯨﻐﺎ ﺋﯩﺸﻠﻪﺗﻜﻪﻧﻠﯩﻜﯩﻨﻰ ﻣﯩﺴﺎﻝ ﺋﺎﻟﺪﻯ.

ﮔﯧﺮﻣﺎﻧﯩﻴﯩﺪﻩ %88 ﺋﺎﺩﻩﻡ ﺧﯩﺘﺎﻳﻐﺎ ﻳﺎﺭﺩﻩﻡ ﺑﯧﺮﯨﺸﻜﻪ ﻗﺎﺭﺷﻰ

ﮔﯧﺮﻣﺎﻧﯩﻴﯩﻨﯩﯔ ﺧﯩﺘﺎﻳﻐﺎ ﺑﯧﺮﯨﯟﺍﺗﻘﺎﻥ ﺗﻪﺭﻩﻗﻘﯩﻴﺎﺕ ﻳﺎﺭﺩﻩﻡ ﭘﯘﻟﯩﻨﻰ ﺗﻮﺧﺘﯩﺘﯩﺶ ﻳﺎﻛﻰ ﺩﺍﯞﺍﻣﻼﺷﺘﯘﺭﯗﺵ ﻣﻪﺳﯩﻠﯩﺴﻰ ﺗﻮﻏﺮﯨﺴﯩﺪﺍ "ﺩﯗﻧﻴﺎ ﮔﯧﺰﯨﺘﻰ"ﺩﻩ ﺭﺍﻱ ﺳﯩﻨﺎﺵ ﺋﯧﻠﯩﭗ ﺑﯧﺮﯨﻠﻐﺎﻥ ﺑﻮﻟﯘﭖ، ﺭﺍﻱ ﺳﯩﻨﺎﺵ ﻧﻪﺗﯩﺠﯩﺴﯩﺪﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ، %88 ﺋﺎﺩﻩﻡ ﺧﯩﺘﺎﻳﻐﺎ ﻳﺎﺭﺩﻩﻡ ﺑﯧﺮﯨﻠﻤﻪﺳﻠﯩﻜﻰ ﻳﺎﻛﻰ ﺑﯧﺮﯨﻠﯩﯟﺍﺗﻘﺎﻥ ﺑﯘ ﺋﯩﻘﺘﯩﺴﺎﺩﻯ ﻳﺎﺭﺩﻩﻡ ﺑﯘﺭﯗﻧﻼ ﺗﻮﺧﺘﯩﺘﯩﻠﯩﺸﻰ ﻛﯧﺮﻩﻙ ﺋﯩﺪﻯ، ﺩﻩﭖ ﻗﺎﺭﯨﻐﺎﻥ. %4 ﺋﺎﺩﻩﻡ ﻫﺎﺯﯨﺮ ﺑﯘ ﻳﺎﺭﺩﻩﻣﻨﻰ ﺗﻮﺧﺘﯩﺘﯩﺸﻨﯩﯔ ﺩﻩﻝ ﯞﺍﻗﺘﻰ، ﺩﻩﭖ ﺋﺎﯞﺍﺯ ﺑﻪﺭﮔﻪﻥ. %9 ﺋﺎﺩﻩﻡ ﺑﻮﻟﺴﺎ، ﺧﯩﺘﺎﻱ ﺑﯘ ﻳﺎﺭﺩﻩﻣﮕﻪ ﻣﯘﻫﺘﺎﺝ، ﺩﻩﭖ ﻗﺎﺭﯨﻐﺎﻥ.

ﺧﻪﯞﻩﺭﮔﻪ ﺋﺎﺳﺎﺳﻼﻧﻐﺎﻧﺪﺍ، ﺧﯩﺘﺎﻳﻐﺎ ﺋﻪﯓ ﻛﯚﭖ ﺗﻪﺭﻩﻗﻘﯩﻴﺎﺕ ﻳﺎﺭﺩﻩﻡ ﭘﯘﻟﻰ ﺑﯧﺮﯨﯟﺍﺗﻘﺎﻥ ﺩﯙﻟﻪﺕ ﺋﺎﻣﯧﺮﯨﻜﺎ ﺑﻮﻟﯘﭖ، ﺋﺎﻣﯧﺮﯨﻜﺎ ﺧﯩﺘﺎﻳﻨﻰ ﺑﯜﮔﯜﻧﻜﻰ ﺗﻪﺭﻩﻗﻘﯩﻴﺎﺗﻘﺎ ﺑﺎﺷﻼﭖ ﻛﯩﺮﮔﻪﻥ ﯞﻩ ﻧﻪﺗﯩﺠﯩﺪﻩ ﺋﯚﺯﯨﮕﻪ ﺋﻪﯓ ﭼﻮﯓ ﺩﯛﺷﻤﻪﻥ ﺗﯧﭙﯩﯟﺍﻟﻐﺎﻥ ﺩﯙﻟﻪﺕ ﺑﻮﻟﯘﭖ ﻫﯧﺴﺎﺑﻠﯩﻨﯩﺪﯨﻜﻪﻥ.