ﭘﻪﻳﻐﻪﻣﺒﻪﺭ ﺋﻪﻟﻪﻳﻬﯩﺴﺴﺎﻻﻡ ﺑﯩﺮ ﻫﻪﺩﯨﺴﺘﻪ:" ﺩﻩﺭﻩﺧﻠﻪﺭ ﺋﯩﭽﯩﺪﻩ ﻳﺎﭘﺮﯨﻘﻰ ﺗﯚﻛﯜﻟﻤﻪﻳﺪﯨﻐﺎﻥ، ﻫﻪﺭ ﺩﺍﺋﯩﻢ ﺋﺎﻟﻼﻫﻨﯩﯔ ﺋﯩﺰﻧﻰ ﺑﯩﻠﻪﻥ ﻣﯧﯟﻩ ﺑﯧﺮﯨﭗ ﺗﯘﺭﯨﺪﯨﻐﺎﻥ ﺑﯩﺮ ﺩﻩﺭﻩﺥ ﺑﺎﺭ، ﺋﯘ ﻣﯚﻣﯩﻨﮕﻪ ﺋﻮﺧﺸﺎﻳﺪﯗ. ﺋﯘ ﺑﻮﻟﺴﺎ، ﺧﻮﺭﻣﺎ ﺩﻩﺭﯨﺨﯩﺪﯗﺭ " ﺩﯦﮕﻪﻥ. ﭼﯜﻧﻜﻰ ﺧﻮﺭﻣﺎ ﺩﻩﺭﯨﺨﯩﺪﻩ ﻫﻪﻗﯩﻘﯩﻲ ﻣﯚﻣﯩﻦ ﺋﺎﺩﻩﻣﻨﯩﯔ ﻣﺎﺩﺩﻯ ﯞﻩ ﻣﻪﻧﯩﯟﻯ ﺳﯜﭘﻪﺗﻠﯩﺮﻯ ﮔﻪﯞﺩﯨﻠﻪﻧﮕﻪﻥ.

ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﻨﯩﯔ ﻣﻪﺩﯨﻨﻪ ﻣﯘﻧﻪﯞﯞﻩﺭﻩ ﺷﻪﻫﯩﺮﯨﺪﯨﻜﻰ ﺋﯩﺴﻼﻡ ﺋﯘﻧﯩﯟﯦﺮﺳﺘﯧﺘﯩﻨﻰ ﭘﯜﺗﺘﯜﺭﮔﻪﻧﺪﯨﻦ ﻛﯧﻴﯩﻦ، ﻣﻪﻛﻜﻪ ﺷﻪﻫﯩﺮﯨﺪﻩ ﺋﯩﻠﻤﯩﻲ ﺧﯩﺰﻣﻪﺗﻠﻪﺭ ﺑﯩﻠﻪﻥ ﺷﯘﻏﯘﻟﻠﯩﻨﯩﭗ ﻛﯧﻠﯩﯟﺍﺗﻘﺎﻥ ﺋﺎﺑﺪﯗﻟﺌﻪﺯﯨﺰ ﺋﻪﭘﻪﻧﺪﯨﮕﻪ ﻣﻪﺯﻛﯘﺭ ﻫﻪﺩﯨﺴﺘﯩﻜﻰ ﺋﻮﺧﺸﯩﺘﯩﺸﻨﯩﯔ ﻣﻪﻧﯩﺴﻰ ﻫﻪﻗﻘﯩﺪﻩ ﻣﯘﺭﺍﺟﯩﺌﻪﺕ ﻗﯩﻠﻐﺎﻥ ﺋﯩﺪﯗﻕ.

ﺋﺎﺑﺪﯗﻟﺌﻪﺯﯨﺰ ﺋﻪﭘﻪﻧﺪﻯ ﭘﻪﻳﻐﻪﻣﺒﻪﺭ ﺋﻪﻟﻪﻳﻬﯩﺴﺴﺎﻻﻣﻨﯩﯔ ﻳﯘﻗﯩﺮﯨﻘﻰ ﻫﻪﺩﯨﺴﯩﺪﯨﻜﻰ ﺋﻮﺧﺸﯩﺘﯩﺸﻨﻰ ﺷﻪﺭﻫﯩﻠﻪﭖ ﻣﯘﻧﺪﺍﻕ ﺩﯦﺪﻯ: ﻣﯚﻣﯩﻦ ﺋﺎﺩﻩﻡ ﺭﺍﺳﺘﯩﻨﻼ ﺧﻮﺭﻣﺎ ﺩﻩﺭﯨﺨﯩﮕﻪ ﺋﻮﺧﺸﺎﻳﺪﯗ. ﺋﯘ ﻣﯘﻧﺪﺍﻕ:

ﺧﻮﺭﻣﺎ ﺩﻩﺭﯨﺨﻰ ﺗﯜﭘﺘﯜﺯ ﺋﯚﺳﯩﺪﯨﻐﺎﻥ ﺩﻩﺭﻩﺥ، ﺋﯘﻧﯩﯔ ﺋﻪﮔﺮﻯ ﻳﺎﻛﻰ ﺳﯩﯖﺎﻳﺎﻥ ﻳﯧﺮﻯ ﻳﻮﻕ. ﻣﯚﻣﯩﻦ ﻛﯩﺸﯩﻤﯘ ﺷﯘﻧﺪﺍﻕ ﺗﯜﺯ ﺑﻮﻟﯩﺪﯗ. ﺑﯩﺮ ﺋﺎﻟﻼﻫﻘﺎ ﺋﯩﺸﯩﻨﯩﺪﯗ، ﻫﻪﻣﯩﺸﻪ ﺋﯩﻨﺴﺎﻧﻼﺭﻏﺎ ﭘﺎﻳﺪﯨﻠﯩﻖ ﻳﺎﺧﺸﻰ ﺋﯩﺸﻼﺭﻧﻰ ﻗﯩﻠﯩﺶ ﺑﯩﻠﻪﻥ ﺑﻮﻟﯩﺪﯗ، ﺋﯩﻼﻫﯩﻲ ﺗﻪﻟﯩﻤﺎﺗﻼﺭﺩﯨﻦ ﻗﺎﻳﺮﯨﻠﯩﭗ ﻛﻪﺗﻤﻪﻳﺪﯗ. ﺋﯘ ﺋﻮﻱ - ﭘﯩﻜﯩﺮﺩﻩ ﺗﯜﺯ، ﺋﯧﺘﯩﻘﺎﺩﺗﺎ ﺗﻮﻏﺮﺍ، ﺳﯚﺯﯨﺪﻩ ﺭﺍﺳﺘﭽﯩﻞ، ﺋﯩﺶ - ﻫﻪﺭﯨﻜﯩﺘﯩﺪﻩ ﺩﯗﺭﯗﺱ ﺑﻮﻟﯩﺪﯗ.

ﺧﻮﺭﻣﺎ ﺩﻩﺭﯨﺨﯩﻨﯩﯔ ﻳﯩﻠﺘﯩﺰﻯ ﻳﻪﺭﻧﯩﯔ ﺋﺎﺳﺘﯩﻐﺎ ﭘﯧﺘﯩﭗ ﻛﻪﺗﻜﻪﻥ، ﺷﺎﺧﻠﯩﺮﻯ ﻛﯚﻛﻜﻪ ﺗﺎﻗﺎﺷﻘﺎﻥ ﺑﻮﻟﯩﺪﯗ. ﻣﯚﻣﯩﻦ ﻛﯩﺸﯩﻤﯘ ﺷﯘﻧﺪﺍﻕ ﺑﻮﻟﯩﺪﯗ. ﺋﯘﻧﯩﯔ ﺋﯩﻤﺎﻧﻰ ﻣﯘﺳﺘﻪﻫﻜﻪﻡ ﺑﻮﻟﯘﭖ، ﺋﯘﻧﯩﯔ ﻗﯩﻠﻐﺎﻥ ﻳﺎﺧﺸﻰ ﺋﯩﺸﻠﯩﺮﻯ ﺋﺎﻟﻼﻫﻘﺎ ﺧﯘﺩﺩﻯ ﺧﻮﺭﻣﺎ ﺩﻩﺭﯨﺨﯩﺪﻩﻙ ﻛﯚﺗﯜﺭﯨﻠﯩﺪﯗ. ﺧﻮﺭﻣﺎ ﺩﻩﺭﯨﺨﻰ ﻣﻪﺯﻣﯘﺕ ﯞﻩ ﻛﯜﭼﻠﯜﻙ ﺑﻮﻟﯘﭖ، ﺋﯘﻧﯩﯔ ﺑﻮﻳﻰ ﺋﺎﺳﻤﺎﻧﻐﺎ ﺗﺎﻗﺎﺷﺴﯩﻤﯘ ﺑﻮﺭﺍﻥ - ﭼﺎﭘﻘﯘﻧﻼﺭ ﺋﯘﻧﻰ ﺗﻪﯞﺭﯨﺘﻪﻟﻤﻪﻳﺪﯗ. ﻣﯚﻣﯩﻦ ﺋﺎﺩﻩﻣﻤﯘ ﺷﯘﻧﯩﯖﻐﺎ ﺋﻮﺧﺸﺎﺵ ﺑﻮﻟﯘﭖ، ﺋﯘﻧﻰ ﺑﺎﻻﻳﻰ - ﺋﺎﭘﻪﺗﻠﻪﺭ، ﻣﯘﺳﯩﺒﻪﺗﻠﻪﺭ ﯞﻩ ﺋﯧﻐﯩﺮ ﻛﯜﻧﻠﻪﺭ ﻳﯩﻘﯩﺘﺎﻟﻤﺎﻳﺪﯗ. ﭼﯜﻧﻜﻰ ﻣﯚﻣﯩﻦ ﺋﺎﺩﻩﻡ ﺩﯦﮕﻪﻥ ﺳﻪﯞﺭﭼﺎﻥ ﻛﯧﻠﯩﺪﯗ.

ﺧﻮﺭﻣﺎ ﺩﻩﺭﯨﺨﯩﻨﯩﯔ ﺗﺎﺷﻘﻰ ﻛﯚﺭﯛﻧﯜﺷﻰ ﮔﯜﺯﻩﻝ، ﻣﯧﯟﯨﺴﯩﻤﯘ ﺗﻪﻣﻠﯩﻚ ﻛﯧﻠﯩﺪﯗ. ﻣﯚﻣﯩﻦ ﺋﺎﺩﻩﻣﻤﯘ ﺷﯘﻧﯩﯖﻐﺎ ﺋﻮﺧﺸﺎﺵ ﺑﻮﻟﯘﭖ، ﺋﯘﻧﯩﯔ ﺗﺎﺷﻘﻰ ﻛﯚﺭﯛﻧﯜﺷﻰ ﭘﺎﻛﯩﺰ، ﺭﻩﺗﻠﯩﻚ ﯞﻩ ﻳﯧﻘﯩﻤﻠﯩﻖ ﺑﻮﻟﯩﺪﯗ، ﺩﯨﻠﯩﻤﯘ ﭘﺎﻙ، ﺗﻪﺑﯩﺌﯩﺘﻰ ﺳﺎﭖ ﺑﻮﻟﯩﺪﯗ، ﻳﺎﻣﺎﻥ ﻗﯩﻠﯩﻖ، ﺑﻪﺗﻨﯩﻴﻪﺗﻠﯩﻚ، ﻛﯚﺭﻩﻟﻤﻪﺳﻠﯩﻚ، ﭘﯩﺨﺴﯩﻘﻠﯩﻖ، ﻗﻮﺭﻗﯘﻧﭽﺎﻗﻠﯩﻖ ﯞﻩ ﺑﺎﺷﻘﺎ ﻳﺎﻣﺎﻥ ﺋﯩﻠﻠﻪﺗﻠﻪﺭﺩﯨﻦ ﺧﺎﻟﯩﻲ ﺑﻮﻟﯩﺪﯗ. ﺋﯩﻨﺴﺎﻧﻼﺭﻏﺎ ﻣﻪﻧﭙﻪﺋﻪﺗﻠﯩﻚ ﺑﻮﻟﯩﺪﯗ. ﺧﻮﺭﻣﺎ ﺩﻩﺭﯨﺨﯩﻨﯩﯔ ﻫﻪﻣﻤﻪ ﻳﯧﺮﻯ ﭘﺎﻳﺪﯨﻠﯩﻖ. ﺋﯘﻧﯩﯔ ﻣﯧﯟﯨﺴﻰ ﻳﯧﻴﯩﻠﯩﺪﯗ، ﺋﻮﺯﯗﻗﻠﯘﻗﻰ ﻳﯘﻗﯩﺮﻯ ﺑﻮﻟﯩﺪﯗ. ﻳﺎﻏﯩﭽﻰ ﭼﻪﻟﻠﻪ - ﺑﺎﺭﺍﯓ ﻳﺎﺳﺎﺷﻘﺎ، ﺷﺎﺧﻠﯩﺮﻯ ﻗﻪﭘﻪﺱ ﻳﺎﺳﺎﺷﻘﺎ، ﻳﺎﭘﺮﺍﻗﻠﯩﺮﻯ ﺳﯧﯟﻩﺕ ﻳﺎﺳﺎﺷﻘﺎ، ﭘﺎﺧﺎﻟﻠﯩﺮﻯ ﺋﺎﺭﻏﺎﻣﭽﺎ ﻳﺎﺳﺎﺷﻘﺎ ﺋﯩﺸﻠﯩﺘﻠﯩﺪﯗ. ﻣﯧﯟﯨﺴﯩﻨﻰ ﺋﯩﻨﺴﺎﻧﻼﺭ ﻳﯧﺴﻪ، ﺋﯘﺭﯗﻗﻰ ﻫﺎﻳﯟﺍﻧﻼﺭﻏﺎ ﻫﻪﻟﻪﭖ ﻗﯩﻠﯩﭗ ﺑﯧﺮﯨﻠﯩﺪﯗ. ﻣﯚﻣﯩﻦ ﺋﺎﺩﻩﻣﻤﯘ ﺷﯘﻧﯩﯖﻐﺎ ﺋﻮﺧﺸﺎﺵ ﻫﻪﻣﻤﻪ ﺗﻪﺭﻩﭘﺘﯩﻦ ﭘﺎﻳﺪﯨﻠﯩﻖ ﺑﻮﻟﯩﺪﯗ، ﺋﯘﻧﯩﯔ ﺋﻪﻗﻠﻰ ﻫﻪﻗﻘﺎﻧﯩﻴﻠﯩﻘﯩﻨﻰ ﺋﻮﻳﻼﻳﺪﯗ، ﺗﯩﻠﻰ ﺭﺍﺳﺖ ﯞﻩ ﭘﺎﻳﺪﯨﻠﯩﻖ ﺳﯚﺯﻟﻪﺭﻧﻰ ﺳﯚﺯﻟﻪﻳﺪﯗ، ﻏﻪﻳﯟﻩﺕ ﻗﯩﻠﻤﺎﻳﺪﯗ، ﮔﻪﭖ ﺗﻮﺷﯘﻣﺎﻳﺪﯗ، ﺗﯚﻫﻤﻪﺕ ﭼﺎﭘﻠﯩﻤﺎﻳﺪﯗ. ﺷﯘﯕﺎ ﻫﻪﺭﻛﯩﻢ ﻣﯚﻣﯩﻦ ﺋﺎﺩﻩﻣﺪﯨﻦ ﻳﺎﺧﺸﯩﻠﯩﻖ ﻛﯜﺗﯩﺪﯗ، ﺋﯘﻧﯩﯖﺪﯨﻦ ﻳﺎﻣﺎﻧﻠﯩﻖ ﻛﻪﻟﻤﯩﮕﻪﭼﻜﻪ ﺋﯘﻧﯩﯖﻐﺎ ﻫﻪﺭﻛﯩﻢ ﺋﯩﺸﯩﻨﯩﺪﯗ ﯞﻩ ﺧﺎﺗﯩﺮﺟﻪﻡ ﺑﻮﻟﯩﺪﯗ.

ﺧﻮﺭﻣﺎ ﺩﻩﺭﯨﺨﯩﻨﯩﯔ ﻣﯧﯟﯨﺴﻰ ﻳﯩﻞ ﺑﻮﻳﻰ ﺋﯜﺯﯛﻟﯜﭖ ﻗﺎﻟﻤﺎﻳﺪﯗ، ﻳﯩﻞ ﺑﻮﻳﻰ ﺑﺎﺯﺍﺭﻏﺎ ﻛﯩﺮﯨﺪﯗ. ﺧﻮﺭﻣﺎ ﻏﯘﺭﺍ ﻫﺎﻟﯩﺘﯩﺪﯨﻤﯘ، ﭘﯩﺸﻘﺎﻥ ﻫﺎﻟﯩﺘﯩﺪﯗ، ﻗﯘﺭﯗﻏﺎﻥ ﻫﺎﻟﯩﺘﯩﺪﯨﻤﯘ ﻳﯧﻴﯩﻠﯩﺪﯗ. ﻣﯚﻣﯩﻦ ﺋﺎﺩﻩﻣﻤﯘ ﺷﯘﻧﺪﺍﻕ ﺑﻮﻟﯩﺪﯗ. ﺋﯘ ﺋﻪﺗﺮﺍﭘﯩﺪﯨﻜﯩﻠﻪﺭﮔﻪ ﺗﻮﺧﺘﺎﭖ ﻗﺎﻟﻤﺎﻱ ﺋﯜﺯﻟﯜﻛﺴﯩﺰ ﭘﺎﻳﺪﺍ - ﻣﻪﻧﭙﻪﺋﻪﺕ ﻳﻪﺗﻜﯜﺯﯨﺪﯗ، ﻳﺎﺭﺩﻩﻡ ﻗﯩﻠﯩﺪﯗ، ﺳﯩﻠﻪ - ﺭﻩﻫﯩﻢ ﻗﯩﻠﯩﭗ ﻳﻮﻗﻼﻳﺪﯗ.

ﺧﻮﺭﻣﺎ ﺩﻩﺭﯨﺨﯩﮕﻪ ﭼﺎﻟﻤﺎ ﺋﺎﺗﺴﯩﯖﯩﺰ ﻣﯧﯟﻩ ﺗﺎﺷﻼﭖ ﺑﯧﺮﯨﺪﯗ، ﻣﯚﻣﯩﻦ ﺋﺎﺩﻩﻣﻤﯘ ﻳﺎﻣﺎﻧﻠﯩﻘﻨﻰ ﻳﺎﻣﺎﻧﻠﯩﻖ ﺑﯩﻠﻪﻥ ﺋﻪﻣﻪﺱ، ﺑﻪﻟﻜﻰ ﻳﺎﺧﺸﯩﻠﯩﻖ ﺑﯩﻠﻪﻥ ﻗﺎﻳﺘﯘﺭﯨﺪﯗ. ﭘﻪﻳﻐﻪﻣﺒﯩﺮﯨﻤﯩﺰ ﻫﻪﺯﺭﯨﺘﻰ ﻣﯘﻫﻪﻣﻤﻪﺩ ﺋﻪﻟﻪﻳﻬﯩﺴﺴﺎﻻﻡ ﺑﯘ ﻣﺎﯞﺯﯗﺩﺍ ﺋﻪﯓ ﺋﯧﺴﯩﻞ ﺋﯜﻟﮕﯩﺪﯗﺭ. ﺋﯘ ﺋﯚﺯﯨﮕﻪ ﺑﻪﺭﻣﯩﮕﻪﻧﻠﻪﺭﮔﻪ ﺑﻪﺭﮔﻪﻥ، ﺋﯚﺯﯨﮕﻪ ﻳﺎﻣﺎﻧﻠﯩﻖ ﻗﯩﻠﻐﺎﻧﻼﺭﻏﺎ ﻳﺎﺧﺸﯩﻠﯩﻖ ﻗﯩﻠﻐﺎﻥ، ﺋﯚﺯﯨﻨﻰ ﻳﻮﻗﻠﯩﻤﯩﻐﺎﻧﻼﺭﻧﻰ ﻳﻮﻗﻠﯩﻐﺎﻥ، ﻳﺎﻣﺎﻧﻠﯩﻖ ﻗﯩﻠﻐﺎﻧﻼﺭﻧﻰ ﻛﻪﭼﯜﺭﯨﯟﻩﺗﻜﻪﻥ.

ﺧﻮﺭﻣﺎ ﺩﻩﺭﯨﺨﻰ ﻳﯩﻞ ﺑﻮﻳﻰ ﻳﺎﭘﺮﺍﻗﻠﯩﻖ ﻫﺎﻟﻪﺗﺘﻪ ﻳﺎﭖ - ﻳﯧﺸﯩﻞ ﺗﻮﻥ ﻛﯩﻴﮕﻪﻥ ﺑﻮﻟﯩﺪﯗ. ﻣﯚﻣﯩﻨﻤﯘ ﮔﯜﺯﻩﻝ ﺋﻪﺧﻼﻕ، ﺗﻪﻗﯟﺍﻟﯩﻖ ﯞﻩ ﺋﺎﻟﯩﻴﺠﺎﻧﺎﺑﻠﯩﻖ ﺗﻮﻧﯩﻨﻰ ﺋﯚﻣﯜﺭ ﺑﻮﻳﻰ ﺳﺎﻟﻤﺎﻳﺪﯗ.

ﺧﻮﺭﻣﺎ ﺩﻩﺭﯨﺨﯩﻨﯩﯔ ﺳﺎﻳﯩﺴﻰ ﻳﯧﻨﯩﻚ ﺑﻮﻟﯘﭖ، ﺋﻪﺗﺮﺍﭘﺘﯩﻜﻰ ﺯﯨﺮﺍﺋﻪﺗﻠﻪﺭ ﯞﻩ ﺩﻩﻝ - ﺩﻩﺭﻩﺧﻠﻪﺭﻧﯩﯔ ﺋﯚﺳﯜﭖ ﻳﯧﺘﯩﻠﯩﺸﯩﮕﻪ ﺗﻮﺳﻘﯘﻧﻠﯘﻕ ﻗﯩﻠﻤﺎﻳﺪﯗ، ﺯﯨﻴﺎﻥ ﻳﻪﺗﻜﯜﺯﻣﻪﻳﺪﯗ. ﻣﯚﻣﯩﻦ ﺋﺎﺩﻩﻣﻤﯘ ﺋﻪﺗﺮﺍﭘﯩﺪﯨﻜﻰ ﺧﻮﺷﻨﯩﻠﯩﺮﯨﻐﺎ، ﺩﻭﺳﺖ - ﺑﯘﺭﺍﺩﻩﺭﻟﯩﺮﯨﮕﻪ، ﺧﯩﺰﻣﻪﺗﺪﺍﺷﻠﯩﺮﯨﻐﺎ ﺋﯧﻐﯩﺮﭼﯩﻠﯩﻖ ﺳﺎﻟﻤﺎﻳﺪﯗ، ﺯﯨﻴﺎﻥ ﻳﻪﺗﻜﯜﺯﻣﻪﻳﺪﯗ.

ﺩﯦﻤﻪﻙ، ﻣﯚﻣﯩﻦ ﺋﺎﺩﻩﻡ ﺧﯘﺩﺩﺩﻯ ﺧﻮﺭﻣﺎ ﺩﻩﺭﯨﺨﯩﮕﻪ ﯞﻩ ﻣﯧﯟﯨﺴﯩﮕﻪ ﺋﻮﺧﺸﺎﺵ ﺋﯩﻨﺴﺎﻧﻼﺭﻏﺎ ﻫﻪﻣﯩﺸﻪ ﭘﺎﻳﺪﯨﻠﯩﻖ ﯞﻩ ﻣﻪﻧﭙﻪﺋﻪﺗﻠﯩﻚ ﺑﻮﻟﯩﺪﯗ.