ﻗﻮﻧﺎﻗﻠﯩﻘﻨﻰ ﺧﯩﺘﺎﻱ ﺗﻪﺭﻩﭖ ﺋﺎﻟﺘﻪ ﺳﺎﺋﻪﺕ ﻗﻮﺭﺷﺎﯞﺩﺍ ﺗﯘﺗﻘﺎﻥ. ﺑﯘ ﺟﻪﺭﻳﺎﻧﺪﺍ ﺧﯩﺘﺎﻱ ﺳﺎﻗﭽﯩﻠﯩﺮﻯ ﺭﺍﺩﯨﺌﻮ ﻛﺎﻧﯩﻴﻰ ﺋﺎﺭﻗﯩﻠﯩﻖ ﮔﯘﻣﺎﻧﺪﺍﺭﻻﺭﻧﻰ ﺗﻪﺳﻠﯩﻢ ﺑﻮﻟﯘﺷﻘﺎ ﭼﺎﻗﯩﺮﻏﺎﻥ. ﮔﯘﻣﺎﻧﺪﺍﺭﻻﺭ ﺗﻪﺳﻠﯩﻢ ﺑﻮﻟﯘﺷﻨﻰ ﺭﻩﺕ ﻗﯩﻠﻐﺎﻥ. ﺧﯩﺘﺎﻱ ﺋﻪﺳﻜﻪﺭﻟﯩﺮﻯ ﻗﻮﻧﺎﻗﻠﯩﻘﻘﺎ ﺩﻩﺭﻫﺎﻝ ﺑﺎﺳﺘﯘﺭﯗﭖ ﻛﯩﺮﯨﺸﻜﻪ ﺟﯜﺭﺋﻪﺕ ﻗﯩﻼﻟﻤﯩﻐﺎﻥ. ﺋﺎﺧﯩﺮﯨﺪﺍ ﺧﯩﺘﺎﻱ ﺗﻪﺭﻩﭖ ﻗﻮﺭﺷﺎﯞ ﭼﻪﻣﺒﯩﺮﯨﻜﯩﻨﻰ ﻛﯩﭽﯩﻜﻠﯩﺘﯩﭗ، ﮔﯘﻣﺎﻧﺪﺍﺭﻻﺭﻧﻰ ﺋﻮﻗﻘﺎ ﺗﯘﺗﻘﺎﻥ. ﮔﯘﻣﺎﻧﺪﺍﺭﻻﺭﺩﯨﻦ 6 ﻧﻪﭘﯩﺮﻯ ﺋﯚﻟﺘﯜﺭﯛﻟﮕﻪﻥ، 3 ﻧﻪﭘﯩﺮﻯ ﻳﺎﺭﯨﺪﺍﺭ ﻫﺎﻟﻪﺗﺘﻪ ﺋﻪﺳﯩﺮﮔﻪ ﭼﯜﺷﻜﻪﻥ.

ﮔﯘﻣﺎﻧﺪﺍﺭﻻﺭ ﺋﯚﻟﯜﺵ ﯞﻩ ﺋﻪﺳﯩﺮﮔﻪ ﭼﯜﺷﯜﺷﻨﯩﯔ ﺋﺎﻟﺪﯨﺪﺍ ﺧﯩﺘﺎﻱ ﺗﻪﺭﻩﭘﺘﯩﻦ ﺑﯩﺮ ﺋﻪﺳﻜﻪﺭ ﯞﻩ ﺑﯩﺮ ﺋﺎﻣﺎﻧﻠﯩﻖ ﺧﺎﺩﯨﻤﻰ ﺑﻮﻟﯘﭖ ﺋﯩﻜﻜﻰ ﻛﯩﺸﯩﻨﻰ ﻳﺎﺭﯨﻼﻧﺪﯗﺭﻏﺎﻥ.

ﮔﯘﻣﺎﻧﺪﺍﺭﻻﺭ ﺋﺎﺧﯩﺮﻗﻰ ﻧﻪﭘﯩﺴﯩﮕﯩﭽﻪ ﻗﺎﺭﺷﯩﻠﯩﻖ ﻛﯚﺭﺳﻪﺗﻜﻪﻥ

ﻗﺎﺭﺷﯩﻠﯩﻘﯩﻨﻰ ﻫﺎﻳﺎﺗﯩﻨﯩﯔ ﺋﺎﺧﯩﺮﻗﻰ ﻧﻪﭘﻪﺳﻠﯩﺮﯨﮕﻪ ﻗﻪﺩﻩﺭ ﺩﺍﯞﺍﻣﻼﺷﺘﯘﺭﻏﺎﻥ ﺑﯘ 6 ﻧﻪﭘﻪﺭ ﺋﯘﻳﻐﯘﺭ ﻣﯘﺳﺘﻪﻗﯩﻠﻠﯩﻖ ﺟﻪﯕﭽﯩﺴﯩﻨﯩﯔ ﺋﺎﺭﯨﺴﯩﺪﺍ 23 ﻳﺎﺷﻠﯩﻖ ﺋﯘﻳﻐﯘﺭ ﻗﯩﺰﻯ ﺋﺎﻧﺎﺭﮔﯜﻝ ﻣﯘﺗﻪﻟﻠﯩﭙﻨﯩﯖﻤﯘ ﺑﺎﺭﻟﯩﻘﻰ ﺗﻪﺧﻤﯩﻦ ﻗﯩﻠﯩﻨﻤﺎﻗﺘﺎ. ﻗﯩﺰﯨﻠﺒﻮﻳﻰ ﺳﺎﻗﭽﻰ ﭘﻮﻧﻜﯩﺘﻰ 9 ﮔﯘﻣﺎﻧﺪﺍﺭﻧﯩﯔ ﺑﯩﺮﯨﻨﯩﯔ ﺋﺎﻧﺎﺭﮔﯜﻝ ﻣﯘﺗﻪﻟﻠﯩﭗ ﺋﯩﺴﯩﻤﻠﯩﻚ ﺋﺎﻳﺎﻝ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﮔﻪﻥ ﺋﯩﺪﻯ. ﺳﺎﻗﭽﻰ ﺗﻪﺭﻩﭖ ﺗﯜﻧﯜﮔﯜﻧﻜﻰ ﻣﻪﻟﯘﻣﺎﺗﯩﺪﺍ ﺋﻪﺳﯩﺮ ﭼﯜﺷﻜﻪﻥ 3 ﻧﻪﭘﻪﺭ ﻳﺎﺭﯨﺪﺍﺭﻧﯩﯔ ﺋﻪﺭ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﻣﻪﻛﺘﻪ.

ﻳﻪﻧﻪ ﺗﯜﻧﯜﮔﯜﻧﻜﻰ ﺋﯩﮕﯩﻠﯩﺸﯩﻤﯩﺰﺩﻩ ، ﻳﺎﻣﺎﻧﻴﺎﺭ ﯞﻩﻗﻪﺳﯩﻨﯩﯔ ﻛﯧﻠﯩﭗ ﭼﯩﻘﯩﺶ ﺳﻪﯞﻩﺑﻰ ﻫﻪﻗﻘﯩﺪﯨﻤﯘ ﺗﻮﻟﯘﻗﺴﯩﺰ ﻣﻪﻟﯘﻣﺎﺗﻘﺎ ﺋﯩﮕﻪ ﺑﻮﻟﺪﯗﻕ. ﺋﯩﺴﻤﯩﻨﻰ ﯞﻩ ﺋﺎﯞﺍﺯﯨﻨﻰ ﺋﺎﺷﻜﺎﺭﯨﻠﯩﻤﺎﺳﻠﯩﻘﻨﻰ ﺗﻪﻟﻪﭖ ﻗﯩﻠﻐﺎﻥ ﺑﯩﺮ ﺋﯩﻨﻜﺎﺳﭽﻰ، ﻳﺎﻣﺎﻧﻴﺎﺭ ﯞﻩﻗﻪﺳﯩﮕﻪ ﺋﯩﻜﻜﻰ ﺑﺎﻙ ﺑﯧﻨﺰﯨﻨﻨﯩﯔ ﺳﻪﯞﻩﺏ ﺑﻮﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺋﯘﻧﯩﯔ ﺑﯩﻠﺪﯛﺭﯛﺷﯩﭽﻪ، ﮔﯘﻣﺎﻧﺪﺍﺭﻻﺭﺩﯨﻦ 5 ﻧﻪﭘﯩﺮﻯ 12 ‏ - ﺋﺎﯞﻏﯘﺳﺖ ﻛﯜﻧﻰ ﻛﻪﭼﺘﻪ، ﺋﯩﻜﻜﻰ ﺑﺎﻙ ﺑﯧﻨﺰﯨﻨﻨﻰ ﻳﯧﯖﯩﺸﻪﻫﻪﺭ ﻧﺎﻫﯩﻴﯩﺴﯩﻨﯩﯔ ﻳﺎﻣﺎﻧﻴﺎﺭ ﻳﯧﺰﯨﺴﯩﺪﯨﻦ ﭘﻪﻳﺰﯨﯟﺍﺗﻨﯩﯔ ﻗﯩﺰﯨﻠﺒﻮﻳﻰ ﻳﯧﺰﯨﺴﯩﻐﺎ ﻳﯚﺗﻜﻪﭖ ﻣﺎﯕﻐﺎﻥ. ﺋﯩﻜﻜﻰ ﺑﺎﻙ ﺑﯧﻨﺰﯨﻦ ﺑﯧﺴﯩﻠﻐﺎﻥ ﺋﺎﭘﺘﻮﻣﻮﺑﯩﻞ ﻳﺎﻣﺎﻧﻴﺎﺭ ﻳﯧﺰﯨﺴﻰ ﺑﯩﻠﻪﻥ ﻣﯩﺸﺎ ﻳﯧﺰﯨﺴﻰ ﺋﺎﺭﯨﺴﯩﺪﯨﻜﻰ ﻳﻮﻝ ﺗﻪﻛﺸﯜﺭﯛﺵ ﭘﻮﻧﻜﯩﺘﯩﻐﺎ ﻛﻪﻟﮕﻪﻧﺪﻩ، ﭘﻮﻧﻜﯩﺖ ﺧﺎﺩﯨﻤﻠﯩﺮﯨﻨﯩﯔ ﮔﯘﻣﺎﻧﯩﻨﻰ ﻗﻮﺯﻏﯩﻐﺎﻥ ﯞﻩ ﺋﯘﻻﺭ ﺑﯧﻨﺰﯨﻨﻨﻰ ﻧﯧﻤﻪ ﺋﯜﭼﯜﻥ ﻳﻮﺷﯘﺭﯗﭖ ﯞﻩ ﻛﯧﭽﯩﺪﻩ ﺋﯧﻠﯩﭗ ﻣﯧﯖﯩﯟﺍﺗﻘﺎﻧﻠﯩﻘﯩﻨﻰ ﺳﻮﺭﯨﻐﺎﻥ.

ﮔﯘﻣﺎﻧﺪﺍﺭﻻﺭ ﺑﯧﻨﺰﯨﻨﻨﻰ ﺋﯩﺸﻠﻪﭘﭽﯩﻘﯩﺮﯨﺸﺘﺎ ﻗﻮﻟﻠﯩﻨﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ؛ ﺋﺎﻣﺎﻧﻠﯩﻖ ﺧﺎﺩﯨﻤﻠﯩﺮﯨﻨﯩﯔ ﮔﯘﻣﺎﻧﻰ ﻳﯧﺸﯩﻠﻤﯩﮕﻪﻥ. ﮔﯘﻣﺎﻧﺪﺍﺭﻻﺭ ﺋﺎﻣﺎﻧﻠﯩﻖ ﺧﺎﺩﯨﻤﻠﯩﺮﯨﻐﺎ ، ﺋﯚﺯﻟﯩﺮﯨﻨﯩﯔ ﻳﺎﻣﺎﻥ ﺋﺎﺩﻩﻡ ﺋﻪﻣﻪﺳﻠﯩﻜﯩﻨﻰ ﭼﯜﺷﻪﻧﺪﯛﺭﮔﻪﻥ ﯞﻩ ﺋﯘﻻﺭﻏﺎ ﻣﯩﻠﻠﯩﻲ ﯞﻩ ﺩﯨﻨﯩﻲ ﻗﯧﺮﯨﻨﺪﺍﺷﻠﯩﻘﯩﻨﻰ ﺋﻪﺳﻠﯩﺘﯩﭗ ﻧﻪﺳﯩﻬﻪﺕ ﻗﯩﻠﻐﺎﻥ ﯞﻩ ﺋﺎﯞﺍﺭﯨﭽﯩﻠﯩﻖ ﺗﯘﻏﺪﯗﺭﻣﺎﺳﻠﯩﻘﯩﻨﻰ ﺗﻪﻟﻪﭖ ﻗﯩﻠﻐﺎﻥ.

ﻳﺎﻣﺎﻧﻴﺎﺭ ﯞﻩﻗﻪﺳﻰ ﮔﯘﻣﺎﻧﺪﺍﺭﻻﺭﻧﯩﯔ ﭘﯩﻼﻧﻰ ﺳﯩﺮﺗﯩﺪﺍ ﻳﯜﺯ ﺑﻪﺭﮔﻪﻥ

ﻧﻪﺳﯩﻬﻪﺗﻜﻪ ﭘﻪﺭﯞﺍ ﻗﯩﻠﻤﯩﻐﺎﻥ ﺋﺎﻣﺎﻧﻠﯩﻖ ﺧﺎﺩﯨﻤﻠﯩﺮﻯ ﺋﻪﻫﯟﺍﻟﻨﻰ ﺑﺎﺷﻠﯩﻘﯩﻐﺎ ﺩﻭﻛﻼﺕ ﻗﯩﻠﯩﺶ ﺋﯜﭼﯜﻥ ﺗﯧﻠﯧﻔﻮﻥ ﺗﯘﺭﯗﭘﻜﯩﺴﯩﻐﺎ ﻗﻮﻝ ﺋﯘﺯﺍﺗﻘﺎﻥ ﭼﯧﻐﯩﺪﺍ ﮔﯘﻣﺎﻧﺪﺍﺭﻻﺭ ﭘﯩﭽﺎﻕ ﺑﯩﻠﻪﻥ ﻫﯘﺟﯘﻣﻐﺎ ﺋﯚﺗﻜﻪﻥ، 3 ﻧﻪﭘﯩﺮﯨﻨﻰ ﺋﯚﻟﺘﯜﺭﯛﭖ، 1 ﻧﻪﭘﯩﺮﯨﻨﻰ ﻳﺎﺭﯨﻼﻧﺪﯗﺭﯗﭖ، ﺳﻪﭘﯩﺮﯨﻨﻰ ﺩﺍﯞﺍﻡ ﻗﯩﻠﻐﺎﻥ. ﻳﺎﻣﺎﻧﻴﺎﺭ ﯞﻩﻗﻪﺳﯩﻨﯩﯔ ﻛﯧﻠﯩﭗ ﭼﯩﻘﯩﺸﯩﻐﺎ ﺋﯩﻜﻜﻰ ﺑﺎﻙ ﺑﯧﻨﺰﯨﻨﻨﯩﯔ ﺳﻪﯞﻩﺏ ﺑﻮﻟﻐﺎﻧﻠﯩﻘﯩﻨﻰ ﻗﯩﺰﯨﻠﺒﻮﻳﻰ ﺳﺎﻗﭽﻰ ﭘﻮﻧﻜﯩﺘﯩﺪﯨﻜﻰ ﺑﯩﺮ ﺳﺎﻗﭽﻰ ﺧﺎﺩﯨﻤﯩﻨﯩﯔ ﺳﯚﺯﻟﯩﺮﯨﻤﯘ ﺋﯩﺴﭙﺎﺗﻠﯩﻤﺎﻗﺘﺎ.

ﺑﯘ ﺧﺎﺩﯨﻤﻨﯩﯔ ﺑﯩﻠﺪﯛﺭﯛﺷﯩﭽﻪ، ﻗﯩﺰﯨﻠﺒﻮﻳﻰ ﯞﻩﻗﻪﺳﻰ ﻳﯜﺯ ﺑﻪﺭﮔﻪﻥ ﻗﻮﻧﺎﻗﻠﯩﻘﻘﺎ ﻳﯧﻘﯩﻦ ﺟﺎﻳﺪﯨﻜﻰ ﺑﯩﺮ ﻗﻮﺭﻭﺩﯨﻦ 2 ﺑﺎﻙ ﺑﯧﻨﺰﯨﻦ ﺗﯧﭙﯩﻠﻐﺎﻥ. ﺑﯘ ﻗﻮﺭﻭ ﻳﺎﻣﺎﻧﻴﺎﺭ ﯞﻩﻗﻪﺳﯩﻨﯩﯔ ﮔﯘﻣﺎﻧﺪﺍﺭﻟﯩﺮﯨﻨﻰ ﻳﻮﺷﯘﺭﻏﺎﻥ ﺩﻩﭖ ﻗﺎﺭﺍﻟﻐﺎﻥ ﺋﺎﺑﺪﯗﺷﯜﻛﯜﺭ ﻗﺎﺭﯨﻤﻨﯩﯔ ﻗﻮﺭﺍﺳﻰ ﺑﻮﻟﯘﭖ، ﺋﺎﺑﺪﯗﺷﯜﻛﯜﺭ ﻗﺎﺭﻯ ﺳﺎﻗﭽﯩﻼﺭ ﺗﻪﺭﯨﭙﯩﺪﯨﻦ ﻧﯘﻗﺘﯩﻠﯩﻖ ﻛﯩﺸﯩﻠﻪﺭ ﻗﺎﺗﺎﺭﯨﺪﺍ ﺗﯩﺰﯨﻤﻐﺎ ﺋﯧﻠﯩﻨﻐﺎﻥ ﺩﯨﻨﯩﻲ ﺯﺍﺗﻼﺭﺩﯨﻦ ﺑﯩﺮﯨﺪﯗﺭ.

ﻧﯚﯞﻩﺗﺘﻪ ﺋﺎﺑﺪﯗﺷﯜﻛﯜﺭ ﻗﺎﺭﻯ ﺑﯩﻠﻪﻥ ﺑﯩﺮﻟﯩﻜﺘﻪ ﺋﯘﻧﯩﯔ ﺋﯩﻜﻜﻰ ﺋﻮﻏﻠﯩﻤﯘ ﺳﻮﺭﺍﻗﻘﺎ ﺗﯘﺗﯘﭖ ﺗﯘﺭﯗﻟﻤﺎﻗﺘﺎ. ﻳﻪﻧﻪ ﺗﯜﻧﯜﮔﯜﻧﻜﻰ ﺋﯩﮕﯩﻠﯩﺸﯩﻤﯩﺰﺩﻩ 23 ﻳﺎﺷﻠﯩﻖ ﺋﯘﻳﻐﯘﺭ ﻗﯩﺰﻯ ﺋﺎﻧﺎﺭﮔﯜﻝ ﻣﯘﺗﻪﻟﻠﯩﭙﻨﯩﯔ 7 ﻳﺎﺷﻠﯩﻖ ﺋﻮﻏﻠﻰ ﻗﯩﺰﯨﻠﺒﻮﻳﻰ ﻳﯧﺰﯨﺴﯩﺪﺍ، 57 ﻳﺎﺷﻠﯩﻖ ﺋﺎﻧﯩﺴﻰ ﺋﺎﻣﺎﻧﮕﯜﻝ ﺑﻮﻟﺴﺎ ﻣﯩﺸﺎ ﻳﯧﺰﯨﺴﯩﺪﺍ ﺗﯘﺗﯘﭖ ﺗﯘﺭﯗﻟﻤﺎﻗﺘﺎ.

ﺑﯘ ﻗﯧﺘﯩﻤﻘﻰ ﯞﻩﻗﻪﺩﻩ، ﻫﺎﻳﺎﺗﯩﻨﯩﯔ ﺋﻪﯓ ﺋﺎﺧﯩﺮﻗﻰ ﻧﻪﭘﯩﺴﯩﮕﻪ ﻗﻪﺩﻩﺭ ﺧﯩﺘﺎﻱ ﻗﯩﺴﯩﻤﻠﯩﺮﯨﻐﺎ ﻗﺎﺭﺷﯩﻠﯩﻖ ﻛﯚﺭﺳﻪﺗﻜﻪﻥ 9 ﻧﻪﭘﻪﺭ ﺋﯘﻳﻐﯘﺭ ﻣﯘﺳﺘﻪﻗﯩﻠﻠﯩﻖ ﺟﻪﯕﭽﯩﺴﯩﺪﯨﻦ 6 ﻧﻪﭘﯩﺮﯨﻨﯩﯔ ﻧﺎﻡ ﺷﻪﺭﯨﭙﻰ ﻣﻪﻟﯘﻡ، ﺋﯘﻻﺭ ﺋﺎﺑﺪﯗﺭﯦﻬﯩﻢ ﺋﻪﻫﻪﺕ، ﻗﯧﻴﯘﻡ ﺑﺎﯞﯗﺩﯗﻥ، ﺋﯩﻤﺎﻡ ﻫﻪﺳﻪﻥ، ﻫﻪﺳﻪﻥ ﻫﻮﺷﯘﺭ ﯞﻩ ﺋﺎﺑﺪﯗﺳﺎﻻﻡ ﺳﯘﻟﺘﺎﻥ ﯞﻩ ﺋﺎﻧﺎﺭﮔﯜﻝ ﻣﯘﺗﻪﻟﻠﯩﭙﻠﻪﺭﺩﯗﺭ.