ﻓﺮﺍﻧﯩﺴﻴﻪ ﺋﺎﮔﯧﻨﺘﻠﯩﻘﯩﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﻧﯧﭙﺎﻝ ﺳﺎﻗﭽﯩﻠﯩﺮﻯ ﺳﻪﻳﺸﻪﻧﺒﻪ ﻛﯜﻧﻰ ﻧﯧﭙﺎﻟﻨﯩﯔ ﭘﺎﻳﺘﻪﺧﺘﻰ ﻛﺎﺗﻤﺎﻧﺪﯗ ﺷﻪﻫﯩﺮﯨﺪﯨﻜﻰ ﺧﯩﺘﺎﻱ ﺑﺎﺵ ﺋﻪﻟﭽﯩﺨﺎﻧﯩﺴﻰ ﺋﺎﻟﺪﯨﺪﺍ ﻧﺎﻣﺎﻳﯩﺶ ﺋﯚﺗﻜﯜﺯﻣﻪﻛﭽﻰ ﺑﻮﻟﻐﺎﻥ 100 ﺋﻪﺗﺮﺍﭘﯩﺪﺍ ﺗﯩﺒﻪﺗﻠﯩﻜﻨﻰ ﺗﯘﺗﻘﯘﻥ ﻗﯩﻠﻐﺎﻥ.

ﻣﺎﺭﺕ ﺋﯧﻴﯩﺪﺍ ﻟﺨﺎﺳﺎﺩﺍ ﻳﯜﺯ ﺑﻪﺭﮔﻪﻥ ﻗﻮﺯﻏﯩﻼﯕﺪﯨﻦ ﻛﯧﻴﯩﻦ، ﻫﻪﺭ ﻛﯜﻧﻰ ﺩﯦﮕﯜﺩﻩﻙ ﺗﯩﺒﻪﺗﻠﻪﺭﻧﯩﯔ ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﻗﺎﺭﺷﻰ ﻧﺎﺭﺍﺯﯨﻠﯩﻖ ﻧﺎﻣﺎﻳﯩﺸﻠﯩﺮﯨﻐﺎ ﺳﻪﻫﻨﻪ ﺑﻮﻟﯘﯞﺍﺗﻘﺎﻥ ﻧﯧﭙﺎﻟﺪﺍ، 20000 ﺋﻪﺗﺮﺍﭘﯩﺪﺍ ﺗﯩﺒﻪﺗﻠﯩﻚ ﻳﺎﺷﺎﻳﺪﯗ. ﻧﯧﭙﺎﻝ ﺳﺎﻗﭽﻰ ﺩﺍﺋﯩﺮﯨﻠﯩﺮﻯ ﺗﯩﺒﻪﺗﻠﯩﻚ ﻧﺎﻣﺎﻳﯩﺸﭽﯩﻼﺭﻧﯩﯔ ﺳﻪﻳﺸﻪﻧﺒﻪ ﻛﯜﻧﻰ ﭼﯜﺷﺘﯩﻦ ﻛﯧﻴﯩﻦ ﻗﻮﻳﯘﭖ ﺑﯧﺮﯨﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ.

ﻓﺮﺍﻧﯩﺴﻴﻪ ﺋﺎﮔﯧﻨﺘﻠﯩﻘﯩﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﺗﯩﺒﻪﺗﻠﯩﻚ ﭘﺎﺋﺎﻟﯩﻴﻪﺗﭽﯩﻠﻪﺭ، ﻧﯧﭙﺎﻝ ﺳﺎﻗﭽﯩﻠﯩﺮﯨﻨﯩﯔ ﺗﻪﺩﺑﯩﺮﻟﯩﺮﯨﮕﻪ ﻗﺎﺭﯨﻤﺎﻱ، ﺧﯩﺘﺎﻱ ﻫﯚﻛﯜﻣﯩﺘﯩﮕﻪ ﻗﺎﺭﺷﻰ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﻧﺎﺭﺍﺯﯨﻠﯩﻖ ﻫﻪﺭﯨﻜﻪﺗﻠﯩﺮﯨﻨﻰ ﺩﺍﯞﺍﻣﻼﺷﺘﯘﺭﯨﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻥ. ﺧﻪﯞﻩﺭﺩﻩ ﺋﯧﻴﺘﯩﻠﯩﺸﯩﭽﻪ، ﻫﺎﺯﯨﺮﻏﯩﭽﻪ، ﺧﯩﺘﺎﻳﻐﺎ ﻗﺎﺭﺷﻰ ﺋﯧﻠﯩﭗ ﺑﯧﺮﯨﻠﻐﺎﻥ ﻧﺎﻣﺎﻳﯩﺸﻼﺭﻏﺎ ﻗﺎﺗﻨﯩﺸﯩﭗ، 20 ﻗﯧﺘﯩﻢ ﻧﯧﭙﺎﻝ ﺳﺎﻗﭽﯩﻠﯩﺮﻯ ﺗﻪﺭﯨﭙﯩﺪﯨﻦ ﺗﯘﺗﯘﻟﻐﺎﻥ ﺗﯩﺒﻪﺗﻠﯩﻚ ﭘﺎﺋﺎﻟﯩﻴﻪﺗﭽﻰ ﻧﯩﻤﺎ ﺩﻭﻟﻜﺎﺭ ﺧﯩﺘﺎﻳﻐﺎ ﻗﺎﺭﺷﻰ ﻧﺎﻣﺎﻳﯩﺸﻼﺭﻏﺎ ﺩﺍﯞﺍﻣﻠﯩﻖ ﻗﺎﺗﻨﯩﺸﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﻪﭖ، ﺧﯩﺘﺎﻳﻼﺭ ﺗﯩﺒﻪﺗﺘﯩﻦ ﭼﯩﻘﯩﭗ ﻛﯧﺘﯩﺸﻰ ﻛﯧﺮﻩﻙ، ﺩﯦﮕﻪﻥ.

ﺋﯚﺗﻜﻪﻥ ﻫﻪﭘﺘﻪ، ﺋﺎﻣﯧﺮﯨﻜﯩﻨﯩﯔ ﻧﯧﭙﺎﻟﺪﯨﻜﻰ ﺑﺎﺵ ﺋﻪﻟﭽﯩﺨﺎﻧﯩﺴﻰ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، ﻧﯧﭙﺎﻝ ﺳﺎﻗﭽﯩﻠﯩﺮﯨﻨﯩﯔ ﺗﯩﺒﻪﺗﻠﯩﻚ ﻧﺎﻣﺎﻳﯩﺸﭽﯩﻼﺭﻏﺎ ﻗﺎﺭﺍﺗﻘﺎﻥ ﻣﯘﺋﺎﻣﯩﻠﯩﺴﯩﺪﯨﻦ ﺋﻪﭘﺴﯘﺳﻼﻧﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺧﻪﯞﻩﺭﻟﻪﺭﮔﻪ ﻗﺎﺭﯨﻐﺎﻧﺪﺍ، ﻫﻪﺭ ﻳﯩﻠﻰ 2500 ﺋﻪﺗﺮﺍﭘﯩﺪﺍ ﺗﯩﺒﻪﺗﻠﯩﻚ ﺗﯩﺒﻪﺗﺘﯩﻦ ﻗﯧﭽﯩﭗ، ﻧﯧﭙﺎﻝ ﺋﺎﺭﻗﯩﻠﯩﻖ ﺩﺍﻻﻱ ﻻﻣﺎ ﯞﻩ ﺗﯩﺒﻪﺕ ﺳﻪﺭﮔﻪﺭﺩﺍﻥ ﻫﯚﻛﯜﻣﯩﺘﻰ ﺟﺎﻳﻼﺷﻘﺎﻥ ﻫﯩﻨﺪﯨﺴﺘﺎﻧﻨﯩﯔ ﺩﺍﺭﺍﻣﺴﺎﻻ ﺷﻪﻫﯩﺮﯨﮕﻪ ﺑﯧﺮﯨﭗ ﺋﻮﺭﯗﻧﻼﺷﻤﺎﻗﺘﺎ.