ﻣﻪﺯﻛﯘﺭ ﺳﯚﻫﺒﻪﺗﻜﻪ ﺗﯩﺒﻪﺕ ﺗﻪﺭﻩﭘﺘﯩﻦ ﻟﻮﺩﻯ ﮔﻴﺎﺭﻯ ﯞﻩ ﻛﯧﻠﺴﺎﯓ ﮔﻴﺎﻟﺘﺴﻪﻧﻠﻪﺭ ﻗﺎﺗﻨﯩﺸﯩﺪﯨﻐﺎﻥ ﺑﻮﻟﯘﭖ، ﺗﯩﺒﻪﺕ ﺳﯜﺭﮔﯜﻧﺪﯨﻜﻰ ﻫﯚﻛﯜﻣﯩﺘﻰ ﺑﺎﺵ ﻣﯩﻨﯩﺴﺘﯩﺮﻯ ﺳﺎﻣﺪﻫﻮﯓ ﺭﯨﻨﭙﻮﭼﯥ ﺑﯘ ﻧﯚﯞﻩﺗﻠﯩﻚ ﺳﯚﻫﺒﻪﺗﻨﯩﯔ 2002 - ﻳﯩﻠﻰ ﺑﺎﺷﻼﻧﻐﺎﻥ ﺗﯩﺒﻪﺕ - ﺧﯩﺘﺎﻱ ﺩﯨﺌﺎﻟﻮﮔﯩﻨﯩﯔ ﺩﺍﯞﺍﻣﻰ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﮔﻪﻥ.

ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﯩﻨﯩﯔ ﺗﯩﺒﻪﺕ ﺳﯜﺭﮔﯜﻧﺪﯨﻜﻰ ﻫﯚﻛﯜﻣﯩﺘﯩﻨﯩﯔ ﺑﺎﻳﺎﻧﺎﺗﯩﺪﯨﻦ ﻧﻪﻗﯩﻞ ﺋﯧﻠﯩﭗ ﻛﯚﺭﺳﯩﺘﯩﺸﯩﭽﻪ، ﺩﺍﻻﻱ ﻻﻣﺎ ﯞﻩﻛﯩﻠﻠﯩﺮﯨﻨﻰ ﺗﯩﺒﻪﺕ ﺧﻪﻟﻘﻰ ﺋﯚﺯ ﯞﻩﺗﯩﻨﯩﺪﻩ ﻳﻮﻟﯘﻗﯘﯞﺍﺗﻘﺎﻥ ﻗﯩﻴﯩﻨﭽﯩﻠﯩﻘﻼﺭﻧﻰ ﻳﺎﺧﺸﯩﻼﺵ ﺟﻪﻫﻪﺗﺘﻪ ﻛﯚﺭﯛﻧﻪﺭﻟﯩﻚ ﺋﯩﻠﮕﯩﺮﯨﻠﻪﺵ ﻫﺎﺳﯩﻞ ﻗﯩﻠﯩﺶ ﺋﯜﭼﯜﻥ ﺑﺎﺭﻟﯩﻖ ﺗﯩﺮﯨﺸﭽﺎﻧﻠﯩﻘﻼﺭﻧﻰ ﻛﯚﺭﺳﯩﺘﯩﺸﻜﻪ ﭼﺎﻗﯩﺮﻏﺎﻥ.

ﺩﺍﻻﻱ ﻻﻣﺎ ﯞﻩﻛﯩﻠﻠﯩﺮﯨﻨﯩﯔ ﺧﯩﺘﺎﻳﻐﺎ ﺳﯚﻫﺒﻪﺗﻜﻪ ﻛﯧﻠﯩﺪﯨﻐﺎﻧﻠﯩﻘﻰ ﺧﯩﺘﺎﻳﻨﯩﯔ ﻫﯚﻛﯜﻣﻪﺕ ﺭﺍﺩﯨﺌﻮ ﯞﻩ ﮔﯧﺰﯨﺘﻠﯩﺮﯨﺪﯨﻤﯘ ﺧﻪﯞﻩﺭ ﻗﯩﻠﯩﻨﻐﺎﻥ ﺑﻮﻟﯘﭖ، ﺷﯩﻨﺨﯘﺍ ﺋﺎﺧﺒﺎﺭﺍﺗﯩﺪﺍ ﻫﯚﻛﯜﻣﻪﺕ ﻫﯚﺟﺠﻪﺗﻠﯩﺮﯨﺪﯨﻦ ﻧﻪﻗﯩﻞ ﺋﯧﻠﯩﭗ ﺧﻪﯞﻩﺭ ﻗﯩﻠﯩﺸﯩﭽﻪ، ﺧﯩﺘﺎﻱ ﻫﯚﻛﯜﻣﯩﺘﻰ ﺩﺍﻻﻱ ﻻﻣﺎ ﺑﯩﻠﻪﻥ ﺋﯧﻠﯩﭗ ﺑﯧﺮﯨﻠﯩﺪﯨﻐﺎﻥ ﺳﯚﻫﺒﻪﺗﻠﻪﺭﮔﻪ ﺋﯚﺯ ﺋﯩﺸﯩﻜﯩﻨﯩﯔ ﺩﺍﺋﯩﻢ ﺋﻮﭼﯘﻕ ﺋﯩﻜﻪﻧﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ ﻫﻪﻣﺪﻩ ﺩﺍﻻﻱ ﻻﻣﺎ ﺗﻪﺭﻩﭘﻨﯩﯔ ﺧﯩﺘﺎﻱ ﻣﻪﺭﻛﯩﺰﻯ ﻫﯚﻛﯜﻣﯩﺘﯩﻨﯩﯔ ﺗﻪﻟﻪﭘﻠﯩﺮﯨﮕﻪ ﺋﯩﺠﺎﺑﯩﻲ ﺋﯩﻨﻜﺎﺱ ﻗﺎﻳﺘﯘﺭﯗﺷﯩﻨﻰ ﺋﯜﻣﯩﺪ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ.

ﺩﯛﺷﻪﻧﺒﻪ ﻛﯜﻧﻰ ﺧﯩﺘﺎﻱ ﺯﯨﻴﺎﺭﯨﺘﯩﻨﻰ ﺋﺎﻳﺎﻏﻼﺷﺘﯘﺭﻏﺎﻥ ﺋﺎﻣﯧﺮﯨﻜﺎ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﻛﻮﻧﺪﺍﻟﯩﺰﺍ ﺭﺍﻳﺴﻤﯘ ﺧﯩﺘﺎﻱ ﺗﻪﺭﻩﭘﻨﻰ ﺩﺍﻻﻱ ﻻﻣﺎﻧﯩﯔ ﯞﻩﻛﯩﻠﻠﯩﺮﻯ ﺑﯩﻠﻪﻥ ﺳﯚﻫﺒﻪﺕ ﺋﯚﺗﻜﯜﺯﯛﺷﻜﻪ ﺭﯨﻐﺒﻪﺗﻠﻪﻧﺪﯛﺭﮔﻪﻥ ﺋﯩﺪﻯ.