Rabiye qadir xanim amérikidin Uyghur musapirlar mesilisige ayrim qarashni telep qilghan
2016.02.20
Dunya Uyghur qurultiyi re'isi rabiye qadir xanim 17 - féwral chüshtin kéyin amérika dölet ishlar ministirliqining kishilik hoquq, démokratiye ishlirigha mes'ul yardemchi dölet ishlar ministiri tom malinowskiy qatarliq bir qisim yuqiri derijilik emeldarliri bilen körüshüp, xitay hökümitining her türlük bésimliridin qéchip chet'ellerde musapir boluwatqan, bolupmu süriyege bérip qalghan Uyghurlarning teqdiridin endishe qiliwatqanliqini anglatqan.
D u q re'isi rabiye qadir xanim peyshenbidiki bu muhim uchrishishida, amérika we xelq'araning diqqet nezirini xitaygha qayturup kétilgen Uyghur musapirlarning aqiwitige we özimu bilmey ottura sherq ellirige bérip qalghan Uyghurlarning ehwaligha qaritishqa chaqirghan hemde xitayning musapir Uyghurlarni islam dölitige mangghan, dégen sözini ret qilip, ularning chet'elge qéchishini xitayning siyasiti keltürüp chiqarghanliqini, Uyghurlarning qéchishigha türtke bolghan küchning natonush bolghan ottura sherqtiki urush bolmastin, belki nechche on yillardin buyan dawam qilip kelgen basturush we kemsitish xaraktérlik dölet siyasiti, dep körsetken.
Rabiye qadir xanim bu qétimqi uchrishishta, amérika dölet ishliri ministirliqidiki oxshimighan bölüm emeldarlirigha xitayning zulumidin chéqip ottura sherqqe qangqip chiqip qalghan Uyghurlarning, süriye musapirlirigha oxshashla qutquzushqa mohtaj musapirlar ikenlikini otturigha qoyghan.
U yene amérika we xelq'ara jem'iyetning, Uyghur musapirlar mesilisige ayrim qarishini we ularning xitayning ziyankeshlikliridin qutquzushqa mohtaj ikenlikini, amérikining ularning urush otida qalghan jaylarda bihude qurban bolushining aldini élishta munasip tedbir élishini telep qilghanliqini éytti.
Rabiye qadir xanim nöwette Uyghurlar weziyitidin élip éytqanda, musapir Uyghurlar mesilisini amérika, yawropa ittipaqi we kishilik hoquq teshkilatlirigha anglitish yolida dewa pa'aliyetlirining kücheytilgenlikini, gerche bu mesilige qarita her qaysi dölet we kishilik hoquq teshkilatliri ortaq diqqet qilip kéliwatqan bolsimu, lékin bu heqte éniq bir qarar élinmighanliqini bayan qilip ötti.