ﺷﯟﯦﺘﺴﺎﺭﯨﻴﻪ ﻫﯚﻛﯜﻣﯩﺘﻰ ﺷﯘ ﻛﯜﻧﻰ ﮔﯜﻩﻧﺘﺎﻧﺎﻣﻮﺩﯨﻜﻰ ﺑﯩﺮ ﺋﯘﻳﻐﯘﺭ، ﺑﯩﺮ ﻟﯩﯟﯨﻴﯩﻠﯩﻚ ﯞﻩ ﺑﯩﺮ ﺋﺎﻟﺠﯩﺮﯨﻴﯩﻠﯩﻜﻨﻰ ﻣﻪﺯﻛﯘﺭ ﺩﯙﻟﻪﺗﻜﻪ ﻗﻮﺑﯘﻝ ﻗﯩﻠﯩﺶ ﻫﻪﻗﻘﯩﺪﯨﻜﻰ ﺋﯩﻠﺘﯩﻤﺎﺳﻨﻰ ﺗﺎﭘﺸﯘﺭﯗﯞﺍﻟﻐﺎﻧﻠﯩﻘﯩﻨﻰ ﺋﯧﺘﯩﺮﺍﭖ ﻗﯩﻠﺪﻯ.

ﺭﻭﯦﻴﺘﯧﺮﺱ ﺋﺎﮔﯧﻨﺘﻠﯩﻘﯩﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﺷﯟﯦﺘﺴﺎﺭﯨﻴﻪ ﻓﯧﺪﯦﺮﺍﻝ ﻛﯚﭼﻤﻪﻧﻠﻪﺭ ﺋﯩﺪﺍﺭﯨﺴﯩﻨﯩﯔ ﺋﻪﻣﻪﻟﺪﺍﺭﻯ ﺟﻮﻧﺎﺱ ﻣﻮﻧﺘﺎﻧﻰ " ﺑﯩﺰ ﺑﯘ ﺋﯩﻠﺘﯩﻤﺎﺳﻨﻰ ﻛﯚﺭﯛﭖ ﭼﯩﻘﯩﺸﻘﺎ ﺑﺎﺷﻠﯩﺪﯗﻕ، ﺑﯩﺰ ﺑﯘﻧﻰ ﭼﻪﺗﺌﻪﻟﺪﯨﻦ ﺗﺎﭘﺸﯘﺭﯗﯞﺍﻟﻐﺎﻥ ﺑﺎﺷﻘﺎ ﭘﺎﻧﺎﻫﻠﯩﻖ ﺋﯩﻠﺘﯩﻤﺎﺳﻠﯩﺮﯨﻐﺎ ﻗﻮﻳﯘﻟﻐﺎﻥ ﺷﻪﺭﺗﻠﻪﺭ ﺑﯘﻳﯩﭽﻪ ﺑﯩﺮ ﺗﻪﺭﻩﭖ ﻗﯩﻠﯩﻤﯩﺰ " ﺩﻩﭖ ﺗﻪﻛﯩﺘﻠﯩﮕﻪﻥ.

ﺧﻪﯞﻩﺭﺩﻩ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﭘﺎﻧﺎﻫﻠﯩﻖ ﺑﯧﺮﯨﺸﻜﻪ ﭼﺎﻗﯩﺮﻏﺎﻥ 3 ﻧﻪﭘﻪﺭ ﺗﯘﺗﻘﯘﻧﻨﯩﯔ ﺋﯩﭽﯩﺪﯨﻜﻰ ﺑﯩﺮ ﺋﯘﻳﻐﯘﺭﻧﯩﯔ ﺋﯩﺴﻤﻰ ﺗﯩﻠﻐﺎ ﺋﯧﻠﯩﻨﻤﯩﻐﺎﻥ، ﻟﯧﻜﯩﻦ ﺑﯘ ﻛﯩﺸﯩﻠﻪﺭﻧﯩﯔ ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ ﺋﺎﻗﻼﻧﻐﺎﻥ ﻛﯩﺸﯩﻠﻪﺭ ﺋﯩﻜﻪﻧﻠﯩﻜﻰ ﺋﯩﻠﮕﯩﺮﻯ ﺳﯜﺭﯛﻟﮕﻪﻥ. ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﯩﻨﯩﯔ ﻛﯚﭼﻤﻪﻧﻠﻪﺭ ﻣﻪﺳﯩﻠﯩﺴﻰ ﻛﻮﺭﺩﯨﻨﺎﺗﻮﺭﻯ ﮔﺮﺍﻑ ﺑﯘ ﻫﻪﻗﺘﯩﻜﻰ ﺑﺎﻳﺎﻧﺎﺗﯩﺪﺍ ﻣﯘﻧﺪﺍﻕ ﺩﻩﻳﺪﯗ": ﺷﯟﯦﺘﺴﺎﺭﯨﻴﻪ ﺑﯘ 3 ﻛﯩﺸﯩﻨﻰ ﻗﻮﺑﯘﻝ ﻗﯩﻠﯩﭗ، ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻜﻪ ﺋﯩﻨﺴﺎﻧﭙﻪﺭﯞﻩﺭﻟﯩﻜﻨﻰ ﺋﯩﭙﺎﺩﯨﻠﻪﺷﻨﯩﯔ ﯞﺍﻗﺘﻰ‏ - ﺳﺎﺋﯩﺘﻰ ﻳﯧﺘﯩﭗ ﻛﻪﻟﮕﻪﻧﻠﯩﻜﯩﻨﻰ ﻛﯚﺭﺳﯩﺘﯩﺸﻰ ﻛﯧﺮﻩﻙ. ﺑﯩﺰ ﮔﯘﺋﺎﻧﺘﺎﻧﺎﻣﻮﻧﯩﯔ ﺗﺎﻗﯩﻠﯩﺸﯩﻐﺎ ﻳﺎﺭﺩﻩﻡ ﻗﻮﻟﯩﻤﯩﺰﻧﻰ ﺳﯘﻧﯩﺸﯩﻤﯩﺰ ﻻﺯﯨﻢ."

ﺑﯘ 3 ﻛﯩﺸﻰ 11 - ﺳﯧﻨﺘﻪﺑﯩﺮ ﯞﻩﻗﻪﺳﯩﺪﯨﻦ ﻛﯧﻴﯩﻦ ﭘﺎﻛﯩﺴﺘﺎﻧﺪﺍ ﻗﻮﻟﻐﺎ ﺋﯧﻠﯩﻨﯩﭗ ﮔﯘﺋﺎﻧﺘﺎﻧﺎﻣﻮﻏﺎ ﻳﻮﻟﻼﻧﻐﺎﻥ ﺗﯘﻧﺠﻰ ﺗﯜﺭﻛﯜﻣﺪﯨﻜﻰ ﺗﯘﺗﻘﯘﻧﻼﺭ ﺋﯩﺪﻯ. ﮔﺮﺍﻓﻨﯩﯔ ﺋﻪﺳﻜﻪﺭﺗﯩﺸﯩﭽﻪ، ﺋﺎﻣﯧﺮﯨﻜﺎ ﺩﺍﺋﯩﺮﯨﻠﯩﺮﻯ ﺑﯘ 3 ﻛﯩﺸﯩﻨﻰ ﺩﯛﺷﻤﻪﻥ ﺟﻪﯕﭽﯩﺴﻰ، ﺩﻩﭖ ﺑﯧﻜﯩﺘﻜﻪﻥ ﺑﻮﻟﺴﯩﻤﯘ، ﻟﯧﻜﯩﻦ ﺋﯘﻻﺭ ﺋﯜﺳﺘﯩﺪﯨﻦ ﺭﻩﺳﻤﯩﻲ ﺳﻮﺕ ﺋﺎﭼﻤﯩﻐﺎﻥ. ﻧﯚﯞﻩﺗﺘﻪ ﮔﯘﺋﺎﻧﺘﺎﻧﺎﻣﻮﺩﺍ 265 ﻧﻪﭘﻪﺭ ﺋﻪﻟﻘﺎﺋﯩﺪﻩ ﯞﻩ ﺗﺎﻟﯩﺒﺎﻥ ﮔﯘﻣﺎﻧﺪﺍﺭﻯ ﺗﯘﺗﯘﭖ ﺗﯘﺭﯗﻟﻤﺎﻗﺘﺎ.

ﺋﺎﻣﯧﺮﯨﻜﺎ ﺩﯙﻟﻪﺕ ﻣﯘﺩﺍﭘﯩﺌﻪ ﻣﯩﻨﯩﺴﺘﯩﺮﻟﯩﻘﻰ ﺑﯘﻻﺭﻧﯩﯔ ﺋﯩﭽﯩﺪﯨﻜﻰ 80 ﺩﻩﻙ ﻛﯩﺸﯩﻨﻰ ﺋﯜﺳﺘﯩﺪﯨﻦ ﺋﯘﺭﯗﺵ ﺟﯩﻨﺎﻳﯩﺘﻰ ﺳﺎﺩﯨﺮ ﻗﯩﻠﯩﺶ ﺑﯩﻠﻪﻥ ﺋﻪﻳﯩﺒﻠﻪﭖ، ﺳﻮﺕ ﺋﯧﭽﯩﺸﻨﻰ ﺋﻮﻳﻼﺷﻤﺎﻗﺘﺎ ﺋﯩﻜﻪﻥ. ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﯩﺪﯨﻜﻰ ﮔﺮﺍﻑ، ﺑﯘ ﻛﯩﺸﯩﻠﻪﺭﻧﻰ ﮔﯘﺋﺎﻧﺘﺎﻧﺎﻣﻮﺩﯨﻜﻰ ﻣﻪﯞﺟﯜﺕ ﺷﺎﺭﺍﺋﯩﺖ ﺋﺎﺳﺘﯩﺪﺍ ﺋﯚﺯﻟﯜﻛﺴﯩﺰ ﺗﯘﺗﯘﭖ ﺗﯘﺭﯗﺷﻨﯩﯔ ﺋﯩﻨﺴﺎﻧﭙﻪﺭﯞﻩﺭﻟﯩﻜﻜﻪ ﺳﯩﻐﻤﺎﻳﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻥ.