ﯞﺍﺷﯩﻨﮕﺘﻮﻧﺪﯨﻜﻰ ﺧﻪﻟﻘﺌﺎﺭﺍﻟﯩﻖ ﺗﯩﺒﻪﺗﻜﻪ ﻳﺎﺭﺩﻩﻡ ﻫﻪﺭﯨﻜﯩﺘﻰ ﺗﻪﺷﻜﯩﻼﺗﯩﻨﯩﯔ ﻣﻪﺧﺴﯘﺱ ﺋﯧﻼﻥ ﻗﯩﻠﻐﺎﻥ ﺑﺎﻳﺎﻧﺎﺗﯩﺪﺍ ﻛﯚﺭﺳﯩﺘﯩﻠﯩﺸﯩﭽﻪ، ﺩﺍﻻﻱ ﻻﻣﺎ ﺋﺎﻛﯩﺴﯩﻨﯩﯔ ﯞﺍﭘﺎﺗﯩﻨﻰ 6 - ﺳﯧﻨﺘﻪﺑﯩﺮ ﻛﯜﻧﻰ ﺗﺎﯓ ﺳﻪﻫﻪﺭﺩﻩ ﺋﯘﻗﻘﺎﻥ.

ﺩﺍﻻﻱ ﻻﻣﺎﻧﯩﯔ ﺋﺎﻛﯩﺴﯩﻨﯩﯔ ﺩﯨﻨﯩﻲ ﺋﯩﺴﻤﻰ ﺗﺎﺳﻪﺭ ﺭﯨﻨﭙﻮﭼﻪ ﺑﻮﻟﯘﭖ، ﺗﯘﭘﺘﯧﻦ ﺟﯩﮕﻤﯥ ﻧﻮﺭﺑﯘ ﺋﯘﻧﯩﯔ ﺋﻪﺳﻠﻰ ﺋﯩﺴﻤﻰ. ﺋﯘ، ﺋﯩﻨﯩﺴﻰ ﺩﺍﻻﻱ ﻻﻣﺎ ﺑﯩﻠﻪﻥ ﺗﯩﺒﻪﺗﻨﯩﯔ ﺗﻪﻗﺪﯨﺮﻯ ﻣﻪﺳﯩﻠﯩﺴﯩﺪﻩ ﺋﻮﺧﺸﯩﻤﯩﻐﺎﻥ ﻗﺎﺭﺍﺵ ﯞﻩ ﻳﻮﻟﻐﺎ ﺋﯩﮕﻪ ﺑﻮﻟﯘﭖ، ﺋﯘ ﺑﺎﺷﺘﯩﻦ ﺋﺎﺧﯩﺮﻯ ﺗﯩﺒﻪﺗﻨﯩﯔ ﺗﻮﻟﯘﻕ ﻣﯘﺳﺘﻪﻗﯩﻠﻠﯩﻘﯩﻨﻰ ﺗﻪﺭﻏﯩﭗ ﻗﯩﻠﯩﭗ، ﺋﯚﺯﻯ ﺑﯩﯟﺍﺳﯩﺘﻪ ﺧﻪﻟﻘﺌﺎﺭﺍﻟﯩﻖ ﺗﯩﺒﻪﺕ ﻣﯘﺳﺘﻪﻗﯩﻠﻠﯩﻖ ﻫﻪﺭﯨﻜﯩﺘﻰ ﺗﻪﺷﻜﯩﻼﺗﯩﻨﻰ ﺑﻪﺭﭘﺎ ﻗﯩﻠﯩﭗ، ﺋﯩﻨﯩﺴﻰ ﺩﺍﻻﻱ ﻻﻣﺎﻧﯩﯔ "ﺋﻮﺗﺘﯘﺭﺍ ﻳﻮﻝ". ﻳﻪﻧﻰ ﺗﯩﺒﻪﺗﻜﻪ ﺋﺎﻟﯩﻲ ﺋﺎﭘﺘﻮﻧﻮﻣﯩﻴﻪ ﺋﯧﻠﯩﺶ ﺳﯩﻴﺎﺳﯩﻲ ﻳﯚﻧﯩﻠﯩﺸﯩﮕﻪ ﻗﺎﺭﺷﻰ ﺗﯘﺭﻏﺎﻥ. ﺋﯘﻧﯩﯔ ﺗﻪﺭﻏﯩﭗ ﻗﯩﻠﯩﺸﯩﭽﻪ، ﺗﯩﺒﻪﺗﻨﯩﯔ ﺑﯩﺮﻻ ﭼﯩﻘﯩﺶ ﻳﻮﻟﻰ ﺑﺎﺭ ﺑﻮﻟﯘﭖ، ﺋﯘ ﺑﻮﻟﺴﯩﻤﯘ، ﻣﯘﺳﺘﻪﻗﯩﻠﻠﯩﻖ.

ﺗﯘﭘﺘﯧﻦ ﺟﯩﮕﻤﻪ ﻧﻮﺭﺑﯘ 1922 - ﻳﯩﻠﻰ ﺗﯩﺒﻪﺗﺘﻪ ﺗﯘﻏﯘﻟﻐﺎﻥ. 1950 - ﻳﯩﻠﻼﺭﺩﯨﻦ ﻛﯧﻴﯩﻦ ﺗﯩﺒﻪﺗﺘﯩﻦ ﺋﺎﻳﺮﯨﻠﯩﭗ، ﺋﯘﺯﯗﻥ ﻣﻪﺯﮔﯩﻞ ﺋﺎﻣﯧﺮﯨﻜﯩﻨﯩﯔ ﺋﯩﻨﺪﯨﺌﺎﻧﺎ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺗﯩﺒﻪﺗﺸﯘﻧﺎﺱ ﭘﺮﻭﻓﯧﺴﺴﻮﺭ ﺑﻮﻟﯘﭖ ﺋﯩﺸﻠﻪﭖ، ﺋﯩﻨﺪﯨﺌﺎﻧﺎﺩﺍ ﻳﺎﺷﯩﻐﺎﻥ ﺋﯩﺪﻯ. ﻳﯧﻘﯩﻨﺪﺍ 73 ﻳﺎﺷﻠﯩﻖ ﺩﺍﻻﻱ ﻻﻣﺎﻣﯘ ﺋﯧﻐﯩﺮ ﺋﺎﻏﺮﯨﭗ ﻗﺎﻟﻐﺎﻥ ﺑﻮﻟﯘﭖ، ﺗﯩﺒﻪﺗﻠﯩﻜﻠﻪﺭ ﺋﺎﻛﯩﺴﯩﻨﯩﯔ ﺋﯚﻟﯜﻣﯩﻨﯩﯔ ﺋﯘﻧﯩﯖﻐﺎ ﺭﻭﻫﯩﻲ ﺯﻩﺭﺑﻪ ﺑﻮﻟﯘﺷﯩﺪﯨﻦ ﺋﻪﻧﺪﯨﺸﻪ ﻗﯩﻠﯩﺪﯨﻜﻪﻥ، ﺩﺍﻻﻱ ﻻﻣﺎ ﺋﯩﺰﭼﯩﻞ ﻫﺎﻟﺪﺍ ﺧﯩﺘﺎﻱ ﺗﻪﺭﻩﭖ ﺑﯩﻠﻪﻥ ﺳﯚﺯﻟﯩﺸﯩﭗ، ﺗﯩﺒﻪﺗﻜﻪ ﺋﺎﻟﯩﻲ ﺋﺎﭘﺘﻮﻧﻮﻣﯩﻴﻪ ﺋﯧﻠﯩﺶ ﻫﻪﻣﺪﻩ ﺗﯩﺒﻪﺗﻜﻪ ﻗﺎﻳﺘﯩﺸﻨﻰ ﺋﯜﻣﯩﺪ ﻗﯩﻠﻐﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﺋﯩﻠﮕﯩﺮﻯ ﺋﯚﺗﻜﯜﺯﯛﻟﮕﻪﻥ ﺳﯚﻫﺒﻪﺗﻠﻪﺭ ﻛﯚﺭﯛﻧﻪﺭﻟﯩﻚ ﻧﻪﺗﯩﺠﻪ ﺑﻪﺭﻣﯩﮕﻪﻥ.

ﺩﺍﻻﻱ ﻻﻣﺎ ﯞﻩﻛﯩﻠﻠﯩﺮﻯ 10 - ﺋﺎﻳﺪﺍ ﻳﻪﻧﻪ ﺑﯩﺮ ﻗﯧﺘﯩﻢ ﺑﯧﻴﺠﯩﯔ ﺑﯩﻠﻪﻥ ﺳﯚﺯﻟﯩﺸﯩﺶ ﺋﺎﻟﺪﯨﺪﺍ ﺗﯘﺭﻣﺎﻗﺘﺎ. ﺑﯩﺮﺍﻕ، ﺗﯩﺒﻪﺗﻠﻪﺭﻧﯩﯔ ﺋﯧﻴﺘﯩﺸﯩﭽﻪ، ﺩﺍﻻﻱ ﻻﻣﺎﻧﯩﯔ ﺋﺎﻛﯩﺴﻰ ﺋﯩﻨﯩﺴﯩﻨﯩﯔ ﺑﯧﻴﺠﯩﯖﺪﯨﻦ ﺳﯚﻫﺒﻪﺕ ﺋﺎﺭﻗﯩﻠﯩﻖ ﻣﻪﺳﯩﻠﯩﻨﻰ ﻫﻪﻝ ﻗﯩﻠﯩﺸﻘﺎ ﺋﯜﻣﯩﺪ ﺑﺎﻏﻠﯩﻤﺎﺳﻠﯩﻘﻨﻰ ﺗﻪﯞﺳﯩﻴﻪ ﻗﯩﻠﻐﺎﻥ ﺋﯩﻜﻪﻥ.