ﭘﺎﻛﯩﺴﺘﺎﻥ ﺋﯩﺘﺘﯩﭙﺎﻗﺪﺍﺵ ﺋﺎﺭﻣﯩﻴﯩﻨﯩﯔ ﻫﯘﺟﯘﻣﯩﻐﺎ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﺩﻯ

ﻣﯘﺧﺒﯩﺮﯨﻤﯩﺰ ﺋﻪﻗﯩﺪﻩ ﺧﻪﯞﯨﺮﻯ

2008-09-04

ﭘﺎﻛﯩﺴﺘﺎﻥ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﻣﺎﺧﻤﯘﺩ ﻗﯘﺭﻩﻳﺸﻰ ﭘﻪﻳﺸﻪﻧﺒﻪ ﻛﯜﻧﻰ، ﺋﯩﺘﺘﯩﭙﺎﻗﺪﺍﺵ ﺋﺎﺭﻣﯩﻴﻪ ﻗﯩﺴﯩﻤﻠﯩﺮﯨﻨﯩﯔ ﭘﺎﻛﯩﺴﺘﺎﻥ ﺗﯧﺮﺭﯨﺘﻮﺭﯨﻴﯩﺴﻰ ﺋﯩﭽﯩﺪﻩ ﻫﯘﺟﯘﻡ ﻗﻮﺯﻏﺎﭖ، ﻫﯧﭽﻘﺎﻧﺪﺍﻕ ﻧﯩﺸﺎﻥ ﯞﻩ ﻳﺎﻛﻰ ﻣﯘﻫﯩﻢ ﺑﯩﺮ ﺗﯧﺮﺭﻭﺭﭼﯩﻨﻰ ﻗﻮﻟﻐﺎ ﭼﯜﺷﯜﺭﻩﻟﻤﯩﮕﻪﻧﻠﯩﻜﻰ، ﺋﻪﻛﺴﯩﭽﻪ ﻫﯘﺟﯘﻣﻐﺎ ﺋﯘﭼﺮﯨﻐﯘﭼﯩﻼﺭﻧﯩﯔ ﺋﺎﻳﺎﻟﻼﺭ ﯞﻩ ﺑﺎﻟﯩﻼﺭ ﺑﻮﻟﻐﺎﻧﻠﯩﻘﯩﺪﯨﻦ ﺋﻪﭘﺴﯘﺳﻼﻧﻐﺎﻧﻠﯩﻘﯩﻨﻰ، ﺷﯘﯕﺎ ﺑﯘ ﻗﯧﺘﯩﻤﻘﻰ ﻫﯘﺟﯘﻣﻨﻰ ﻗﺎﺗﺘﯩﻖ ﺋﻪﻳﯩﺒﻠﻪﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﭘﺎﻛﯩﺴﺘﺎﻥ ﻫﯚﻛﯜﻣﻪﺕ ﺧﺎﺩﯨﻤﻠﯩﺮﯨﻤﯘ ﻗﯘﺭﻩﻳﺸﯩﻨﯩﯔ ﻗﺎﺭﺍﺷﻠﯩﺮﯨﻐﺎ ﻗﻮﺷﯘﻟﯩﺪﯨﻐﺎﻧﻠﯩﻘﯩﻨﻰ ﺋﯩﭙﺎﺩﯨﻠﯩﺪﻯ.

ﺋﺎﻣﯧﺮﯨﻜﯩﻨﯩﯔ ﺋﯚﺯﯨﻨﻰ ﺋﺎﺷﻜﺎﺭﯨﻼﺷﻨﻰ ﺧﺎﻟﯩﻤﯩﻐﺎﻥ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﺑﯩﺮ ﺧﺎﺩﯨﻤﻰ ﭼﺎﺭﺷﻪﻧﺒﻪ ﻛﯜﻧﻰ ﺋﺎﻣﯧﺮﯨﻜﺎ ﻣﻪﺗﺒﯘﺋﺎﺗﻠﯩﺮﯨﻐﺎ، ﺋﺎﻣﯧﺮﯨﻜﺎ ﺑﺎﺷﭽﯩﻠﯩﻘﯩﺪﯨﻜﻰ ﺑﯩﺮ ﻗﯩﺴﯩﻢ ﻗﻮﺷﯘﻧﻼﺭﻧﯩﯔ ﺋﺎﻳﺮﯗﭘﯩﻼﻥ ﺑﯩﻠﻪﻥ ﭘﺎﻛﯩﺴﺘﺎﻧﻐﺎ ﭼﯧﮕﺮﯨﺴﯩﻐﺎ ﻛﯩﺮﯨﭗ، ﺋﺎﻓﻐﺎﻧﯩﺴﺘﺎﻥ ﺑﯩﻠﻪﻥ ﭼﯧﮕﺮﯨﻠﯩﻨﯩﺪﯨﻐﺎﻥ ﺑﯩﺮ ﺭﺍﻳﻮﻧﻐﺎ ﻫﯘﺟﯘﻡ ﻗﯩﻠﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺋﯩﺪﻯ.

ﭘﺎﻛﯩﺴﺘﺎﻥ ﺧﺎﺩﯨﻤﻠﯩﺮﯨﻨﯩﯔ ﺋﯧﻴﺘﯩﺸﯩﭽﻪ، ﭼﺎﺭﺷﻪﻧﺒﻪ ﻛﯜﻧﻰ ﺋﺎﻣﯧﺮﯨﻜﺎ ﻳﯧﺘﻪﻛﭽﯩﻠﯩﻜﯩﺪﯨﻜﻰ ﺋﯩﺘﺘﯩﭙﺎﻗﺪﺍﺵ ﺋﺎﺭﻣﯩﻴﻪ ﻗﻮﺷﯘﻧﻰ ﺋﺎﻓﻐﺎﻧﯩﺴﺘﺎﻧﻨﯩﯔ ﻳﯧﻨﯩﺪﯨﻜﻰ ﺟﻪﻧﯘﺑﯩﻲ ﯞﻩﺯﯨﺮﯨﺴﺘﺎﻥ ﺭﺍﻳﻮﻧﯩﻐﺎ ﺗﻪﯞﻩ ﺋﺎﻧﮕﯘﺭ ﺋﺎﺩﺍ ﻛﻪﻧﺘﯩﮕﻪ ﻫﯘﺟﯘﻡ ﻗﯩﻠﯩﭗ، ﺋﺎﺯ ﺩﯦﮕﻪﻧﺪﻩ 20 ﺋﺎﺩﻩﻣﻨﻰ ﺋﯧﺘﯩﭗ ﺋﯚﻟﺘﯜﺭﮔﻪﻥ، ﺋﯘﻻﺭﻧﯩﯔ ﻛﯚﭘﯩﻨﭽﯩﺴﻰ ﺋﺎﻳﺎﻝ ﯞﻩ ﺑﺎﻟﯩﻼﺭ ﺑﻮﻟﯘﭖ، ﭘﺎﻛﯩﺴﺘﺎﻥ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻘﻰ ﺑﯘ ﺳﻪﯞﻩﺑﻠﯩﻚ ﺋﯩﺘﺘﯩﭙﺎﻗﺪﺍﺵ ﺋﺎﺭﻣﯩﻴﻪ ﻗﯩﺴﯩﻤﻠﯩﺮﯨﻐﺎ ﻗﺎﺗﺘﯩﻖ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﺩﻯ.