ﭘﺎﻛﯩﺴﺘﺎﻧﺪﺍ ﺋﯩﻜﻜﻰ ﻧﻪﭘﻪﺭ ﺧﯩﺘﺎﻱ ﺋﯩﻨﮋﯦﻨﯧﺮﻯ ﻳﻮﻗﺎﭖ ﻛﻪﺗﺘﻰ

ﻣﯘﺧﺒﯩﺮﯨﻤﯩﺰ ﺟﯜﻣﻪ ﺧﻪﯞﯨﺮﻯ

2008-09-01

ﺋﯚﺗﻜﻪﻥ ﻫﻪﭘﺘﻪ ﺟﯜﻣﻪ ﻛﯜﻧﻰ ﭘﺎﻛﯩﺴﺘﺎﻧﺪﺍ ﺋﯩﻜﻜﻰ ﻧﻪﭘﻪﺭ ﺧﯩﺘﺎﻱ ﺋﯩﻨﮋﯦﻨﯧﺮﻯ ﯞﻩ ﺋﯩﻜﻜﻰ ﻧﻪﭘﻪﺭ ﭘﺎﻛﯩﺴﺘﺎﻧﻠﯩﻖ ﻳﻮﻗﺎﭖ ﻛﻪﺗﻜﻪﻥ ﺑﻮﻟﯘﭖ، ﺭﻭﯦﻴﺘﯧﺮﺱ ﺋﺎﮔﯧﻨﺘﻠﯩﻘﯩﺪﺍ ﻛﯚﺭﺳﯩﺘﯩﻠﯩﺸﯩﭽﻪ، ﻧﯚﯞﻩﺗﺘﻪ ﭘﺎﻛﯩﺴﺘﺎﻥ ﺳﺎﻗﭽﻰ ﺩﺍﺋﯩﺮﯨﻠﯩﺮﻯ ﺑﯘ ﻛﯩﺸﯩﻠﻪﺭﻧﻰ ﺋﯩﺰﺩﻩﺷﻜﻪ ﺑﺎﺷﻠﯩﻐﺎﻥ.

ﻣﻪﻟﯘﻡ ﺑﻮﻟﯘﺷﯩﭽﻪ، ﺑﯘ ﺋﯩﻜﻜﻰ ﻧﻪﭘﻪﺭ ﺧﯩﺘﺎﻱ ﺋﯩﻨﮋﯦﻨﯧﺮ ﯞﻩ ﺋﯘﻻﺭﻧﯩﯔ ﺷﻮﭘﯘﺭﻯ ﯞﻩ ﺑﯩﺮ ﻗﻮﻏﺪﯨﻐﯘﭼﯩﺴﻰ ﺋﺎﻓﻐﺎﻧﯩﺴﺘﺎﻥ ﭼﯧﮕﺮﯨﺴﯩﻐﺎ ﻳﯧﻘﯩﻦ ﺟﺎﻳﻼﺷﻘﺎﻥ ﺩﯨﺮ ﺭﺍﻳﻮﻧﯩﺪﺍ ﺋﺎﻻﻗﻪ ﺋﯜﺳﻜﯜﻧﯩﺴﯩﻨﻰ ﺭﯦﻤﻮﻧﺖ ﻗﯩﻠﯩﭗ ﻗﺎﻳﺘﯩﺸﯩﺪﺍ ﻳﻮﻗﺎﭖ ﻛﻪﺗﻜﻪﻥ.

ﺩﯨﺮ ﺭﺍﻳﻮﻧﻰ ﭘﺎﻛﯩﺴﺘﺎﻧﻨﯩﯔ ﻗﻪﺑﯩﻠﻪ ﺭﺍﻳﻮﻧﻰ ﺳﯟﺍﺕ ﺟﯩﻠﻐﯩﺴﻰ ﺑﯩﻠﻪﻥ ﭼﯧﮕﺮﯨﺪﺍﺵ ﺑﻮﻟﯘﭖ، ﺋﯩﻠﮕﯩﺮﻯ ﺑﯘ ﺭﺍﻳﻮﻧﺪﺍ ﭘﺎﻛﯩﺴﺘﺎﻥ ﺋﻪﺳﻜﻪﺭﻟﯩﺮﻯ ﺗﺎﻟﯩﺒﺎﻥ ﻗﻮﺭﺍﻟﻠﯩﻖ ﻛﯜﭼﻠﯩﺮﻯ ﺑﯩﻠﻪﻥ ﺳﻮﻗﯘﺷﻘﺎﻥ ﺋﯩﺪﻯ.

ﺭﻭﻳﺘﯧﺮﯨﺴﺘﺎ ﺩﯨﺮ ﺭﺍﻳﻮﻧﻰ ﺳﺎﻗﭽﻰ ﺋﯩﺪﺍﺭﯨﺴﻰ ﺑﺎﺷﻠﯩﻘﻰ ﻫﻪﺳﻪﻥ ﺷﺎﻫﻨﯩﯔ ﺋﯧﻴﺘﻘﺎﻧﻠﯩﺮﯨﻨﻰ ﻧﻪﻗﯩﻞ ﺋﯧﻠﯩﭗ ﻛﯚﺭﺳﯩﺘﯩﻠﯩﺸﯩﭽﻪ، ﺑﯘ ﻧﯚﯞﻩﺕ ﻳﻮﻗﺎﭖ ﻛﻪﺗﻜﻪﻥ ﺋﯩﻜﻜﻰ ﻧﻪﭘﻪﺭ ﺧﯩﺘﺎﻱ ﺋﯩﻨﮋﯦﻨﯧﺮ ﺧﯩﺘﺎﻱ ﻛﯚﭼﻤﻪ ﺧﻪﯞﻩﺭﻟﯩﺸﯩﺶ ﺷﯩﺮﻛﯩﺘﯩﻨﯩﯔ ﺧﺎﺩﯨﻤﻠﯩﺮﻯ ﺑﻮﻟﯘﭖ، ﺧﯩﺘﺎﻳﻨﯩﯔ ﻛﯚﭼﻤﻪ ﺧﻪﯞﻩﺭﻟﯩﺸﯩﺶ ﺷﯩﺮﻛﯩﺘﻰ ﺋﯚﺗﻜﻪﻥ ﺋﺎﻳﺪﺍ ﻣﻪﺯﻛﯘﺭ ﺭﺍﻳﻮﻧﺪﺍ ﺋﯩﺸﻘﺎ ﻛﯩﺮﯨﺸﻜﻪﻥ ﺋﯩﻜﻪﻥ.

ﻳﻮﻗﺎﭖ ﻛﻪﺗﻜﻪﻥ ﺧﯩﺘﺎﻱ ﺋﯩﻨﮋﯦﻨﯧﺮﻟﯩﺮﻯ ﯞﻩ ﺋﯩﻜﻜﻰ ﻧﻪﭘﻪﺭ ﭘﺎﻛﯩﺴﺘﺎﻧﻠﯩﻖ ﻫﻪﻗﻘﯩﺪﻩ ﻫﯧﭽﻘﺎﻧﺪﺍﻕ ﻣﻪﻟﯘﻣﺎﺕ ﻳﻮﻕ ﺑﻮﻟﯘﭖ، ﻫﺎﺯﯨﺮﻏﯩﭽﻪ ﺑﯩﺮﻩﺭ ﻗﻮﺭﺍﻟﻠﯩﻖ ﮔﯘﺭﯗﭘﭙﺎ ﺋﯚﺯﻟﯩﺮﯨﻨﯩﯔ ﺑﯘ ﺋﯩﺸﻨﻰ ﺋﯜﺳﺘﯩﮕﻪ ﺋﺎﻟﯩﺪﯨﻐﺎﻧﻠﯩﻘﯩﻨﻰ ﺋﯧﻼﻥ ﻗﯩﻠﻤﯩﻐﺎﻥ.

ﺑﯘ ﭘﺎﻛﯩﺴﺘﺎﻧﺪﺍ ﺧﯩﺘﺎﻱ ﺋﯩﻨﮋﯦﻨﯧﺮﻟﯩﺮﯨﻨﯩﯔ ﺋﯩﻜﻜﯩﻨﭽﻰ ﻗﯧﺘﯩﻢ ﻳﻮﻗﺎﭖ ﻛﯧﺘﯩﺸﻰ ﺑﻮﻟﯘﭖ، 2004 - ﻳﯩﻠﻰ ﺋﯚﻛﺘﻪﺑﯩﺮﺩﻩ ﺋﯩﻜﻜﻰ ﻧﻪﭘﻪﺭ ﺧﯩﺘﺎﻱ ﺋﯩﻨﮋﯦﻨﯧﺮﻯ ﺟﻪﻧﯘﺑﻰ ﯞﻩﺯﯨﺮﯨﺴﺘﺎﻥ ﻗﻪﺑﯩﻠﻪ ﺭﺍﻳﻮﻧﯩﺪﺍ ﻳﻮﻗﺎﭖ ﻛﻪﺗﻜﻪﻥ ﺋﯩﺪﻯ.