ﻣﺎﻗﺎﻟﯩﺪﻩ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ 4‏ - ﺋﺎﯞﻏﯘﺳﺖ ﻛﯜﻧﻰ ﻗﻪﺷﻘﻪﺭﺩﻩ ﻳﯜﺯ ﺑﻪﺭﮔﻪﻥ ﺳﻪﻣﻪﻥ ﻳﻮﻟﯩﺪﯨﻜﻰ ﯞﻩﻗﻪﺩﻩ 16 ﻧﻪﭘﻪﺭ ﺧﯩﺘﺎﻱ ﺋﻪﺳﻜﻪﺭﻧﯩﯔ ﺋﯚﻟﺘﯜﺭﯛﻟﮕﻪﻧﻠﯩﻚ ﯞﻩﻗﻪﺳﯩﻨﻰ ﺋﻪﺳﻜﻪﺭﺗﯩﭗ، ﺯﻭﺭﺍﯞﺍﻧﻠﯩﻘﻨﯩﯔ ﻫﻪﺭ ﺗﯜﺭﻟﯜﻙ ﺷﻪﻛﻠﯩﮕﻪ ﻗﺎﺭﺷﻰ ﺗﯘﺭﯨﺪﯨﻐﺎﻧﻠﯩﻘﯩﻨﻰ، ﻟﯧﻜﯩﻦ ﺑﯘ ﺗﯜﺭﺩﯨﻜﻰ ﯞﻩﻗﻪﻟﻪﺭﮔﻪ ﺋﯩﻨﻜﺎﺱ ﻗﺎﻳﺘﯘﺭﻏﺎﻧﺪﺍ ﭼﯧﻜﯩﺪﯨﻦ ﺋﺎﺷﯘﺭﯗﯞﻩﺗﻤﻪﺳﻠﯩﻜﻨﯩﯔ ﻣﯘﻫﯩﻤﻠﯩﻘﯩﻨﻰ، ﺋﯘﻧﯩﯔ ﺋﯜﺳﺘﯩﮕﻪ ﺩﺍﺋﯩﺮﯨﻠﻪﺭﻧﯩﯔ ﻗﺎﺭﯨﺸﯩﻨﻰ ﺋﯩﺴﭙﺎﺗﻼﻳﺪﯨﻐﺎﻥ ﭘﺎﻛﯩﺘﻨﯩﯔ ﻳﻮﻗﻠﯘﻗﯩﻨﻰ ﺑﯩﻠﺪﯛﺭﮔﻪﻥ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ ﻣﯘﻧﺪﺍﻕ ﺩﻩﻳﺪﯗ": ﺋﻪﺭﻛﯩﻦ ﺩﯗﻧﻴﺎﻧﯩﯔ ﺭﻩﻫﺒﻪﺭﻟﯩﺮﻯ ﺋﻮﻟﯩﻤﭙﯩﻚ ﺋﯜﭼﯜﻥ ﺑﯧﻴﺠﯩﯖﻐﺎ ﻳﯩﻐﯩﻠﻐﺎﻥ ﻣﯘﺷﯘ ﻣﻪﺯﮔﯩﻠﺪﻩ ﻣﻪﻥ ﻫﻪﺭ ﻗﺎﻳﺴﻰ ﺩﯙﻟﻪﺕ ﺭﻩﻫﺒﻪﺭﻟﯩﺮﯨﻨﯩﯔ ﺧﯩﺘﺎﻱ ﻫﯚﻛﯜﻣﻪﺕ ﺋﻪﻣﻪﻟﺪﺍﺭﻟﯩﺮﻯ ﺑﯩﻠﻪﻥ ﺋﯘﭼﺮﺍﺷﻘﺎﻧﺪﺍ ﺋﯘﻳﻐﯘﺭ ﺧﻪﻟﻘﻰ ﺩﯗﭺ ﻛﯧﻠﯩﯟﺍﺗﻘﺎﻥ ﺋﯧﭽﯩﻨﯩﺸﻠﯩﻖ ﯞﻩﺯﯨﻴﻪﺗﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﺷﯩﻨﻰ ﺋﯜﻣﯩﺪ ﻗﯩﻠﯩﻤﻪﻥ... ﻣﻪﻥ ﻳﻪﻧﻪ ﺋﺎﻣﯧﺮﯨﻜﺎ ﻫﯚﻛﯜﻣﯩﺘﯩﻨﯩﯔ ﺭﺍﻳﻮﻧﻐﺎ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﺑﯩﺮ ﺋﻪﻣﻪﻟﺪﺍﺭﯨﻨﻰ ﺋﻪﯞﻩﺗﯩﭗ، ﻛﯩﺸﯩﻠﯩﻚ ﻫﻮﻗﯘﻕ ﺯﯨﻴﺎﻧﻜﻪﺷﻠﯩﻜﻰ ﺋﯜﺳﺘﯩﺪﯨﻦ ﺗﻪﻛﺸﯜﺭﯛﺵ ﺋﯧﻠﯩﭗ ﺑﯧﺮﯨﺸﯩﻨﻰ ﺗﻪﻟﻪﭖ ﻗﯩﻠﯩﻤﻪﻥ."

ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ 2001 ‏ - ﻳﯩﻠﻰ 11 ‏ - ﺳﯧﻨﺘﻪﺑﯩﺮ ﯞﻩﻗﻪﺳﯩﺪﯨﻦ ﻛﯧﻴﯩﻦ ﺳﺎﺑﯩﻖ ﺗﺎﺷﻘﻰ ﺋﯩﺸﻼﺭ ﻳﺎﺭﺩﻩﻣﭽﻰ ﻣﯩﻨﯩﺴﺘﯩﺮﻯ ﻟﻮﺭﯦﻦ ﻛﺮﯦﻴﻨﯩﺮﻧﻰ ﺋﯜﺭﯛﻣﭽﯩﮕﻪ ﺋﻪﯞﻩﺗﯩﭗ، ﺗﻪﻛﺸﯜﺭﯛﺵ ﺋﯧﻠﯩﭗ ﺑﺎﺭﻏﺎﻧﺪﯨﻦ ﺑﯧﺮﻯ ﺋﯘﻧﯩﯔ ﺑﯩﻠﻪﻥ ﺗﻪﯓ ﺩﻩﺭﯨﺠﯩﻠﯩﻚ ﺑﯩﺮﻩﺭ ﺋﻪﻣﻪﻟﺪﺍﺭﻧﻰ ﺋﯜﺭﯛﻣﭽﯩﮕﻪ ﺋﻪﯞﻩﺗﯩﭗ ﺑﺎﻗﻤﯩﻐﺎﻥ ﺋﯩﺪﻯ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ ﻣﻪﺯﻛﯘﺭ ﻣﺎﻗﺎﻟﯩﺴﻰ 4 ‏ - ﺋﺎﯞﻏﯘﺳﺖ ﻛﯜﻧﻰ ﻗﻪﺷﻘﻪﺭﺩﻩ، 10 ‏ - ﺋﺎﯞﻏﯘﺳﺖ ﻛﯜﻧﻰ ﻛﯘﭼﺎﺩﺍ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻛﯜﺭﻩﺷﭽﯩﻠﯩﺮﯨﻨﯩﯔ ﺧﯩﺘﺎﻱ ﮊﺍﻧﺪﺍﺭﻣﺎ ﻗﯩﺴﯩﻤﻠﯩﺮﯨﻐﺎ ﯞﻩ ﻫﯚﻛﯜﻣﻪﺕ ﺋﻮﺭﮔﺎﻧﻠﯩﺮﯨﻐﺎ ﻫﯘﺟﯘﻡ ﻗﯩﻠﯩﭗ، ﺋﯘﻳﻐﯘﺭﻻﺭﻧﯩﯔ ﺋﻪﻫﯟﺍﻟﻰ ﺩﯗﻧﻴﺎ ﺟﺎﻣﺎﺋﻪﺗﭽﯩﻠﯩﻜﯩﻨﯩﯔ ﺩﯨﻘﻘﯩﺘﯩﻨﻰ ﺗﺎﺭﺗﻘﺎﻥ، ﺧﯩﺘﺎﻱ ﺭﺍﻳﻮﻧﺪﺍ ﺋﻮﻟﯩﻤﭙﯩﻚ ﺑﯩﺨﻪﺗﻪﺭﻟﯩﻜﻰ ﯞﻩ ﺗﯧﺮﺭﻭﺭﻟﯘﻗﻨﻰ ﺑﺎﻫﺎﻧﻪ ﻗﯩﻠﯩﭗ، ﺋﯘﻳﻐﯘﺭﻻﺭﻧﻰ ﺑﺎﺳﺘﯘﺭﯗﺵ ﺑﯩﻠﻪﻥ ﺋﻪﻳﯩﺒﻠﯩﻨﯩﯟﺍﺗﻘﺎﻥ ﻣﻪﺯﮔﯩﻠﺪﻩ ﺋﯧﻼﻥ ﻗﯩﻠﯩﻨﺪﻯ.