ﺋﯩﺴﺘﺎﻧﺴﯩﻤﯩﺰ ﺋﯩﮕﯩﻠﯩﮕﻪﻥ ﻣﻪﻟﯘﻣﺎﺗﻼﺭﻏﺎ ﻗﺎﺭﯨﻐﺎﻧﺪﺍ، ﺑﯧﻴﺠﯩﯔ ﺋﻮﻟﯩﻤﭙﯩﻚ ﺗﻪﻧﺘﻪﺭﺑﯩﻴﻪ ﻣﯘﺭﺍﺳﯩﻤﻰ ﺋﯚﺗﻜﯜﺯﯛﻟﯜﯞﺍﺗﻘﺎﻥ ﭘﻪﻳﺘﺘﻪ، " ﺋﻪﺭﻛﯩﻦ ﺗﯩﺒﻪﺕ ﺋﻮﻗﯘﻏﯘﭼﯩﻼﺭ ﻫﻪﺭﯨﻜﯩﺘﻰ" ﺗﻪﺷﻜﯩﻼﺗﯩﻨﯩﯔ ﺋﻮﺭﯗﻧﻼﺷﺘﯘﺭﯗﺷﻰ ﺑﯩﻠﻪﻥ ﺑﯧﻴﺠﯩﯖﺪﺍ ﻛﯚﭖ ﻗﯧﺘﯩﻢ ﻧﺎﺭﺍﺯﯨﻠﯩﻖ ﻧﺎﻣﺎﻳﯩﺸﻠﯩﺮﻯ ﺋﯚﺗﻜﯜﺯﯛﻟﮕﻪﻥ ﺑﻮﻟﯘﭖ، ﺳﻪﻳﺸﻪﻧﺒﻪ ﻛﯜﻧﻰ ﺋﻮﻟﯩﻤﭙﯩﻚ ﻣﻪﻳﺪﺍﻧﯩﻨﯩﯔ ﻳﯧﻨﯩﺪﯨﻜﻰ ﺋﻮﻟﯩﻤﭙﯩﻚ ﺑﺎﻏﭽﯩﺴﯩﺪﺍ 5 ﻧﻪﭘﻪﺭ ﺋﺎﻣﯧﺮﯨﻜﯩﻠﯩﻖ " ﺗﯩﺒﻪﺗﻜﻪ ﺋﻪﺭﻛﯩﻨﻠﯩﻚ " ﺩﻩﭖ ﻳﯧﺰﯨﻠﻐﺎﻥ ﻟﻮﺯﯗﻧﻜﯩﻨﻰ ﻛﯚﺗﯜﺭﯛﭖ 20 ﺳﯩﻜﯘﻧﺖ ﺋﯚﺗﻜﻪﻧﺪﻩ ﺳﺎﻗﭽﯩﻼﺭ ﺗﻪﺭﯨﭙﯩﺪﯨﻦ ﺗﯘﺗﯘﭖ ﻛﯧﺘﯩﻠﮕﻪﻥ.

ﻳﻪﻧﻪ ﺑﯩﺮ ﺋﺎﻣﯧﺮﯨﻜﯩﻠﯩﻖ ﺗﻪﺗﻘﯩﻘﺎﺗﭽﻰ ﻧﯘﺭ ﺋﺎﺭﻗﯩﻠﯩﻖ "ﺗﯩﺒﻪﺗﻜﻪ ﺋﻪﺭﻛﯩﻨﻠﯩﻚ" ﺩﯦﮕﻪﻧﮕﻪ ﺋﻮﺧﺸﺎﺵ ﺋﯩﺒﺎﺭﯨﻠﻪﺭﻧﻰ ﻛﯩﺸﯩﻠﻪﺭ ﻛﯚﭖ ﺗﻮﭘﻼﺷﻘﺎﻥ ﺟﺎﻳﻼﺭﺩﺍ ﻛﯚﺭﺳﻪﺗﻤﻪﻛﭽﻰ ﺑﻮﻟﯘﯞﺍﺗﻘﺎﻧﺪﺍ ﺳﺎﻗﭽﯩﻼﺭ ﺑﺎﻳﻘﺎﭖ ﻗﯧﻠﯩﭗ، ﺋﯘﻣﯘ ﻗﻮﻟﻐﺎ ﺋﯧﻠﯩﻨﻐﺎﻥ.

ﺋﻮﻟﯩﻤﭙﯩﻚ ﺑﺎﺷﻠﯩﻨﯩﭗ ﻫﺎﺯﯨﺮﻏﺎ ﻗﻪﺩﻩﺭ 4 ﻗﯧﺘﯩﻢ ﻧﺎﺭﺍﺯﯨﻠﯩﻖ ﻧﺎﻣﺎﻳﯩﺸﻠﯩﺮﻯ ﻳﯜﺯ ﺑﻪﺭﺩﻯ، ﺋﯚﺗﻜﻪﻥ ﻫﻪﭘﺘﯩﻨﯩﯔ ﺋﺎﺧﯩﺮﻯ ﺋﯩﻜﻜﻰ ﻛﯩﺸﻰ ﺋﻪﺗﯩﮕﻪﻥ ﺳﺎﺋﻪﺕ 5 ﺗﯩﻦ 45 ﻣﯩﻨﯘﺕ ﺋﯚﺗﻜﻪﻧﺪﻩ ﻣﻪﺭﻛﯩﺰﻯ ﺗﯧﻠﯧﯟﯨﺰﯨﻴﻪ ﺋﯩﺴﺘﺎﻧﺴﯩﺴﯩﻨﯩﯔ ﺗﯧﺨﻰ ﭘﯜﺗﻤﯩﮕﻪﻥ ﺑﯩﻨﺎﺳﯩﻐﺎ ﺧﯩﺘﺎﻳﭽﻪ ﯞﻩ ﺋﯩﻨﮕﯩﻠﯩﺰﭼﻪ ﻳﯧﺰﯨﻘﺘﺎ " ﺗﯩﺒﻪﺗﻜﻪ ﺋﻪﺭﻛﯩﻨﻠﯩﻚ" ﺩﻩﭖ ﻳﯧﺰﯨﻠﻐﺎﻥ ﻟﻮﺯﯗﻧﻜﯩﻨﻰ ﺋﯧﺴﯩﭗ ﻗﻮﻳﻐﺎﻥ ﺋﯩﺪﻯ.

ﺧﯩﺘﺎﻱ ﺳﺎﻗﭽﯩﻠﯩﺮﻯ ﻟﻮﺯﯗﻧﻜﺎ ﺋﺎﺳﻘﺎﻥ ﺋﯩﻜﻜﻰ ﻛﯩﺸﻰ ﯞﻩ ﻧﺎﻣﺎﻳﯩﺶ ﺋﯚﺗﻜﯜﺯﮔﻪﻥ 3 ﻛﯩﺸﯩﻨﻰ ﭼﯧﮕﺮﺍﺩﯨﻦ ﻗﻮﻏﻼﭖ ﭼﯩﻘﯩﺮﯨﭗ، ﺋﯘﻻﺭﻧﯩﯔ 5 ﻳﯩﻞ ﺋﯩﭽﯩﺪﻩ ﻗﺎﻳﺘﺎ ﻛﯩﺮﯨﺸﯩﻨﻰ ﭼﻪﻛﻠﯩﮕﻪﻥ.